| Library / Tipiṭaka / திபிடக • Tipiṭaka / த்³வேமாதிகாபாளி • Dvemātikāpāḷi |
3. ஓவாத³வக்³கோ³
3. Ovādavaggo
1. ஓவாத³ஸிக்கா²பத³வண்ணனா
1. Ovādasikkhāpadavaṇṇanā
ஓவாத³வக்³க³ஸ்ஸ பட²மே அஸம்மதோதி யா அட்ட²ங்க³ஸமன்னாக³தஸ்ஸ பி⁴க்கு²னோ ப⁴க³வதா ஞத்திசதுத்தே²ன கம்மேன (பாசி॰ 146) பி⁴க்கு²னோவாத³கஸம்முதி அனுஞ்ஞாதா, தாய அஸம்மதோ. ஓவதெ³ய்யாதி பி⁴க்கு²னிஸங்க⁴ங் வா ஸம்ப³ஹுலா வா ஏகங் பி⁴க்கு²னிங் வா ‘‘வஸ்ஸஸதூபஸம்பன்னாய பி⁴க்கு²னியா தத³ஹுபஸம்பன்னஸ்ஸ பி⁴க்கு²னோ அபி⁴வாத³னங் பச்சுட்டா²னங் அஞ்ஜலிகம்மங் ஸாமீசிகம்மங் காதப்³ப³’’ந்தி ஆதி³கே (சூளவ॰ 403) அட்ட² க³ருத⁴ம்மே ஓவாத³வஸேன ஓஸாரெந்தோ ஓவதெ³ய்ய. பாசித்தியந்தி ஓவாத³பரியோஸானே பாசித்தியங்.
Ovādavaggassa paṭhame asammatoti yā aṭṭhaṅgasamannāgatassa bhikkhuno bhagavatā ñatticatutthena kammena (pāci. 146) bhikkhunovādakasammuti anuññātā, tāya asammato. Ovadeyyāti bhikkhunisaṅghaṃ vā sambahulā vā ekaṃ bhikkhuniṃ vā ‘‘vassasatūpasampannāya bhikkhuniyā tadahupasampannassa bhikkhuno abhivādanaṃ paccuṭṭhānaṃ añjalikammaṃ sāmīcikammaṃ kātabba’’nti ādike (cūḷava. 403) aṭṭha garudhamme ovādavasena osārento ovadeyya. Pācittiyanti ovādapariyosāne pācittiyaṃ.
ஸாவத்தி²யங் ச²ப்³ப³க்³கி³யே பி⁴க்கூ² ஆரப்³ப⁴ ஓவத³னவத்து²ஸ்மிங் பஞ்ஞத்தங், அஸாதா⁴ரணபஞ்ஞத்தி, அனாணத்திகங், அஞ்ஞேன வா த⁴ம்மேன பி⁴க்கு²னீஸு உபஸம்பன்னமத்தங் வா ஓவத³தோ து³க்கடங். ஸம்மதஸ்ஸாபி தஞ்சே ஸம்முதிகம்மங் அத⁴ம்மகம்மங் ஹோதி, தஸ்மிங் அத⁴ம்மகம்மே அத⁴ம்மகம்மஸஞ்ஞினோ வக்³கே³ பி⁴க்கு²னிஸங்கே⁴ ஓவத³தோ திகபாசித்தியங், ததா² வேமதிகஸ்ஸ த⁴ம்மகம்மஸஞ்ஞினோ சாதி நவ பாசித்தியானி, ஸமக்³கே³பி பி⁴க்கு²னிஸங்கே⁴ன வாதி அத⁴ம்மகம்மவஸேன அட்டா²ரஸ. ஸசே பன தங் த⁴ம்மகம்மங் ஹோதி, ‘‘த⁴ம்மகம்மே த⁴ம்மகம்மஸஞ்ஞீ ஸமக்³க³ங் பி⁴க்கு²னிஸங்க⁴ங் ஸமக்³க³ஸஞ்ஞீ ஓவத³தீ’’தி (பாசி॰ 151) இத³ங் அவஸானபத³ங் ட²பெத்வா தேனேவ நயேன ஸத்தரஸ து³க்கடானி, ‘‘ஸமக்³க³ம்ஹாய்யா’’தி ச வுத்தே அஞ்ஞங் த⁴ம்மங், ‘‘வக்³க³ம்ஹாய்யா’’தி ச வுத்தே அட்ட² க³ருத⁴ம்மே ப⁴ணந்தஸ்ஸ, ஓவாத³ஞ்ச அனிய்யாதெத்வா அஞ்ஞங் த⁴ம்மங் ப⁴ணந்தஸ்ஸ து³க்கடமேவ. யோ பன த⁴ம்மகம்மே த⁴ம்மகம்மஸஞ்ஞீ ஸமக்³க³ங் பி⁴க்கு²னிஸங்க⁴ங் ஸமக்³க³ஸஞ்ஞீ ஓவத³தி, க³ருத⁴ம்மபாளிங் உத்³தே³ஸங் தே³தி, பரிபுச்ச²ங் தே³தி, ‘‘ஓஸாரேஹி அய்யா’’தி வுச்சமானோ ஓஸாரேதி, பஞ்ஹங் புட்டோ² கதே²தி, பி⁴க்கு²னீனங் ஸுணமானானங் அஞ்ஞஸ்ஸத்தா²ய ப⁴ணதி, ஸிக்க²மானாய வா ஸாமணேரியா வா ப⁴ணதி, தஸ்ஸ, உம்மத்தகாதீ³னஞ்ச அனாபத்தி. அஸம்மததா, பி⁴க்கு²னியா பரிபுண்ணூபஸம்பன்னதா, ஓவாத³வஸேன அட்ட²க³ருத⁴ம்மப⁴ணனந்தி இமானெத்த² தீணி அங்கா³னி. ஸமுட்டா²னாதீ³னி பத³ஸோத⁴ம்மஸதி³ஸானேவாதி.
Sāvatthiyaṃ chabbaggiye bhikkhū ārabbha ovadanavatthusmiṃ paññattaṃ, asādhāraṇapaññatti, anāṇattikaṃ, aññena vā dhammena bhikkhunīsu upasampannamattaṃ vā ovadato dukkaṭaṃ. Sammatassāpi tañce sammutikammaṃ adhammakammaṃ hoti, tasmiṃ adhammakamme adhammakammasaññino vagge bhikkhunisaṅghe ovadato tikapācittiyaṃ, tathā vematikassa dhammakammasaññino cāti nava pācittiyāni, samaggepi bhikkhunisaṅghena vāti adhammakammavasena aṭṭhārasa. Sace pana taṃ dhammakammaṃ hoti, ‘‘dhammakamme dhammakammasaññī samaggaṃ bhikkhunisaṅghaṃ samaggasaññī ovadatī’’ti (pāci. 151) idaṃ avasānapadaṃ ṭhapetvā teneva nayena sattarasa dukkaṭāni, ‘‘samaggamhāyyā’’ti ca vutte aññaṃ dhammaṃ, ‘‘vaggamhāyyā’’ti ca vutte aṭṭha garudhamme bhaṇantassa, ovādañca aniyyātetvā aññaṃ dhammaṃ bhaṇantassa dukkaṭameva. Yo pana dhammakamme dhammakammasaññī samaggaṃ bhikkhunisaṅghaṃ samaggasaññī ovadati, garudhammapāḷiṃ uddesaṃ deti, paripucchaṃ deti, ‘‘osārehi ayyā’’ti vuccamāno osāreti, pañhaṃ puṭṭho katheti, bhikkhunīnaṃ suṇamānānaṃ aññassatthāya bhaṇati, sikkhamānāya vā sāmaṇeriyā vā bhaṇati, tassa, ummattakādīnañca anāpatti. Asammatatā, bhikkhuniyā paripuṇṇūpasampannatā, ovādavasena aṭṭhagarudhammabhaṇananti imānettha tīṇi aṅgāni. Samuṭṭhānādīni padasodhammasadisānevāti.
ஓவாத³ஸிக்கா²பத³வண்ணனா நிட்டி²தா.
Ovādasikkhāpadavaṇṇanā niṭṭhitā.
2. அத்த²ங்க³தஸிக்கா²பத³வண்ணனா
2. Atthaṅgatasikkhāpadavaṇṇanā
து³தியே ஓவதெ³ய்யாதி அட்ட²க³ருத⁴ம்மேஹி வா அஞ்ஞேன வா த⁴ம்மேன ஓவத³ந்தஸ்ஸ ஸம்மதஸ்ஸாபி பாசித்தியமேவ.
Dutiye ovadeyyāti aṭṭhagarudhammehi vā aññena vā dhammena ovadantassa sammatassāpi pācittiyameva.
ஸாவத்தி²யங் ஆயஸ்மந்தங் சூளபந்த²கங் ஆரப்³ப⁴ அத்த²ங்க³தே ஸூரியே ஓவத³னவத்து²ஸ்மிங் பஞ்ஞத்தங், அஸாதா⁴ரணபஞ்ஞத்தி, அனாணத்திகங், திகபாசித்தியங், ஸூரியே அத்த²ங்க³தே அத்த²ங்க³தஸஞ்ஞினோ வேமதிகஸ்ஸ வா, ஏகதோஉபஸம்பன்னங் ஓவத³ந்தஸ்ஸ ச து³க்கடங். புரிமஸிக்கா²பதே³ விய உத்³தே³ஸாதி³னயேன அனாபத்தி. அத்த²ங்க³தஸூரியதா, பரிபுண்ணூபஸம்பன்னதா, ஓவத³னந்தி இமானெத்த² தீணி அங்கா³னி. ஸமுட்டா²னாதீ³னி பத³ஸோத⁴ம்மஸதி³ஸானேவாதி.
Sāvatthiyaṃ āyasmantaṃ cūḷapanthakaṃ ārabbha atthaṅgate sūriye ovadanavatthusmiṃ paññattaṃ, asādhāraṇapaññatti, anāṇattikaṃ, tikapācittiyaṃ, sūriye atthaṅgate atthaṅgatasaññino vematikassa vā, ekatoupasampannaṃ ovadantassa ca dukkaṭaṃ. Purimasikkhāpade viya uddesādinayena anāpatti. Atthaṅgatasūriyatā, paripuṇṇūpasampannatā, ovadananti imānettha tīṇi aṅgāni. Samuṭṭhānādīni padasodhammasadisānevāti.
அத்த²ங்க³தஸிக்கா²பத³வண்ணனா நிட்டி²தா.
Atthaṅgatasikkhāpadavaṇṇanā niṭṭhitā.
3. பி⁴க்கு²னுபஸ்ஸயஸிக்கா²பத³வண்ணனா
3. Bhikkhunupassayasikkhāpadavaṇṇanā
ததியே பி⁴க்கு²னுபஸ்ஸயந்தி பி⁴க்கு²னியா ஏகரத்தங் வஸனட்டா²னம்பி. ஓவதெ³ய்யாதி இத⁴ க³ருத⁴ம்மேஹி ஓவத³ந்தஸ்ஸேவ பாசித்தியங். ஸசே பன அஸம்மதோ ஹோதி, த்³வே பாசித்தியானி. ஸசே பன ஸூரியேபி அத்த²ங்க³தே ஓவத³தி, தீணி ஹொந்தி. ஸம்மதஸ்ஸ பன ரத்திங் ஓவத³ந்தஸ்ஸபி த்³வே ஏவ ஹொந்தி. ஸம்மதத்தா ஹி பி⁴க்கு²ஸ்ஸ க³ருத⁴ம்மோவாத³மூலகங் பாசித்தியங் நத்தி². கி³லானாதி ந ஸக்கோதி ஓவாதா³ய வா ஸங்வாஸாய வா க³ந்துங்.
Tatiye bhikkhunupassayanti bhikkhuniyā ekarattaṃ vasanaṭṭhānampi. Ovadeyyāti idha garudhammehi ovadantasseva pācittiyaṃ. Sace pana asammato hoti, dve pācittiyāni. Sace pana sūriyepi atthaṅgate ovadati, tīṇi honti. Sammatassa pana rattiṃ ovadantassapi dve eva honti. Sammatattā hi bhikkhussa garudhammovādamūlakaṃ pācittiyaṃ natthi. Gilānāti na sakkoti ovādāya vā saṃvāsāya vā gantuṃ.
ஸக்கேஸு ச²ப்³ப³க்³கி³யே பி⁴க்கூ² ஆரப்³ப⁴ பி⁴க்கு²னுபஸ்ஸயங் உபஸங்கமித்வா ஓவத³னவத்து²ஸ்மிங் பஞ்ஞத்தங், ‘‘அஞ்ஞத்ர ஸமயா’’தி அயமெத்த² அனுபஞ்ஞத்தி, அஸாதா⁴ரணபஞ்ஞத்தி, அனாணத்திகங், திகபாசித்தியங், அனுபஸம்பன்னாய உபஸம்பன்னஸஞ்ஞினோ வேமதிகஸ்ஸ வா, ஏகதோஉபஸம்பன்னங் யேன கேனசி, இதரங் அஞ்ஞேன த⁴ம்மேன ஓவத³ந்தஸ்ஸ ச து³க்கடங். ஸமயே, அனுபஸம்பன்னாய, புரிமஸிக்கா²பதே³ விய உத்³தே³ஸாதி³னயேன ச அனாபத்தி. உபஸ்ஸயூபக³மனங், பரிபுண்ணூபஸம்பன்னதா, ஸமயாபா⁴வோ, க³ருத⁴ம்மேஹி ஓவத³னந்தி இமானெத்த² சத்தாரி அங்கா³னி. ஸமுட்டா²னாதீ³னி பட²மகதி²னஸதி³ஸானி, இத³ங் பன கிரியங் ஹோதீதி.
Sakkesu chabbaggiye bhikkhū ārabbha bhikkhunupassayaṃ upasaṅkamitvā ovadanavatthusmiṃ paññattaṃ, ‘‘aññatra samayā’’ti ayamettha anupaññatti, asādhāraṇapaññatti, anāṇattikaṃ, tikapācittiyaṃ, anupasampannāya upasampannasaññino vematikassa vā, ekatoupasampannaṃ yena kenaci, itaraṃ aññena dhammena ovadantassa ca dukkaṭaṃ. Samaye, anupasampannāya, purimasikkhāpade viya uddesādinayena ca anāpatti. Upassayūpagamanaṃ, paripuṇṇūpasampannatā, samayābhāvo, garudhammehi ovadananti imānettha cattāri aṅgāni. Samuṭṭhānādīni paṭhamakathinasadisāni, idaṃ pana kiriyaṃ hotīti.
பி⁴க்கு²னுபஸ்ஸயஸிக்கா²பத³வண்ணனா நிட்டி²தா.
Bhikkhunupassayasikkhāpadavaṇṇanā niṭṭhitā.
4. ஆமிஸஸிக்கா²பத³வண்ணனா
4. Āmisasikkhāpadavaṇṇanā
சதுத்தே² ஆமிஸஹேதூதி சீவராதீ³னங் அஞ்ஞதரஹேது. பி⁴க்கூ²தி ஸம்மதா பி⁴க்கூ² இதா⁴தி⁴ப்பேதா. பாசித்தியந்தி ஏவரூபே பி⁴க்கூ² அவண்ணகாமதாய ஏவங் ப⁴ணந்தஸ்ஸ பாசித்தியங்.
Catutthe āmisahetūti cīvarādīnaṃ aññatarahetu. Bhikkhūti sammatā bhikkhū idhādhippetā. Pācittiyanti evarūpe bhikkhū avaṇṇakāmatāya evaṃ bhaṇantassa pācittiyaṃ.
ஸாவத்தி²யங் ச²ப்³ப³க்³கி³யே பி⁴க்கூ² ஆரப்³ப⁴ ‘‘ஆமிஸஹேது ஓவத³ந்தீ’’தி ப⁴ணனவத்து²ஸ்மிங் பஞ்ஞத்தங், அஸாதா⁴ரணபஞ்ஞத்தி, அனாணத்திகங், த⁴ம்மகம்மே திகபாசித்தியங், அத⁴ம்மகம்மே திகது³க்கடங், அஸம்மதங் உபஸம்பன்னஞ்ச, அனுபஸம்பன்னஞ்ச ஸம்மதங் வா அஸம்மதங் வா ஏவங் ப⁴ணந்தஸ்ஸ து³க்கடமேவ. தத்த² யோ பி⁴க்கு² காலே ஸம்முதிங் லபி⁴த்வா ஸாமணேரபூ⁴மியங் ஸண்டி²தோ, அயங் ஸம்மதோ நாம அனுபஸம்பன்னோ. பகதியா சீவராதி³ஹேது ஓவத³ந்தங் பன ஏவங் ப⁴ணந்தஸ்ஸ , உம்மத்தகாதீ³னஞ்ச அனாபத்தி. உபஸம்பன்னதா, த⁴ம்மேன லத்³த⁴ஸம்முதிதா, அனாமிஸந்தரதா, அவண்ணகாமதாய ஏவங் ப⁴ணனந்தி இமானெத்த² சத்தாரி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ங் பன து³க்க²வேத³னமேவாதி.
Sāvatthiyaṃ chabbaggiye bhikkhū ārabbha ‘‘āmisahetu ovadantī’’ti bhaṇanavatthusmiṃ paññattaṃ, asādhāraṇapaññatti, anāṇattikaṃ, dhammakamme tikapācittiyaṃ, adhammakamme tikadukkaṭaṃ, asammataṃ upasampannañca, anupasampannañca sammataṃ vā asammataṃ vā evaṃ bhaṇantassa dukkaṭameva. Tattha yo bhikkhu kāle sammutiṃ labhitvā sāmaṇerabhūmiyaṃ saṇṭhito, ayaṃ sammato nāma anupasampanno. Pakatiyā cīvarādihetu ovadantaṃ pana evaṃ bhaṇantassa , ummattakādīnañca anāpatti. Upasampannatā, dhammena laddhasammutitā, anāmisantaratā, avaṇṇakāmatāya evaṃ bhaṇananti imānettha cattāri aṅgāni. Samuṭṭhānādīni adinnādānasadisāni, idaṃ pana dukkhavedanamevāti.
ஆமிஸஸிக்கா²பத³வண்ணனா நிட்டி²தா.
Āmisasikkhāpadavaṇṇanā niṭṭhitā.
5. சீவரதா³னஸிக்கா²பத³வண்ணனா
5. Cīvaradānasikkhāpadavaṇṇanā
பஞ்சமே ஸாவத்தி²யங் அஞ்ஞதரங் பி⁴க்கு²ங் ஆரப்³ப⁴ சீவரதா³னவத்து²ஸ்மிங் பஞ்ஞத்தங், ஸேஸகதா²மக்³கோ³ பனெத்த² சீவரப்படிக்³க³ஹணஸிக்கா²பதே³ வுத்தனயேனேவ வேதி³தப்³போ³. தத்ர ஹி பி⁴க்கு² படிக்³கா³ஹகோ, இத⁴ பி⁴க்கு²னீ, அயங் விஸேஸோ, ஸேஸங் தாதி³ஸமேவாதி.
Pañcame sāvatthiyaṃ aññataraṃ bhikkhuṃ ārabbha cīvaradānavatthusmiṃ paññattaṃ, sesakathāmaggo panettha cīvarappaṭiggahaṇasikkhāpade vuttanayeneva veditabbo. Tatra hi bhikkhu paṭiggāhako, idha bhikkhunī, ayaṃ viseso, sesaṃ tādisamevāti.
சீவரதா³னஸிக்கா²பத³வண்ணனா நிட்டி²தா.
Cīvaradānasikkhāpadavaṇṇanā niṭṭhitā.
6. சீவரஸிப்³ப³னஸிக்கா²பத³வண்ணனா
6. Cīvarasibbanasikkhāpadavaṇṇanā
ச²ட்டே² சீவரந்தி நிவாஸனபாருபனுபக³ங். ஸிப்³பெ³ய்ய வா ஸிப்³பா³பெய்யா வாதி எத்த² ஸயங் ஸிப்³ப³ந்தஸ்ஸ ஸூசிங் பவேஸெத்வா பவேஸெத்வா நீஹரணே பாசித்தியங், ஸதக்க²த்தும்பி விஜ்ஜி²த்வா ஸகிங் நீஹரந்தஸ்ஸ ஏகமேவ பாசித்தியங். ‘ஸிப்³பா³’தி வுத்தோ பன ஸசேபி ஸப்³ப³ங் ஸூசிகம்மங் நிட்டா²பேதி, ஆணாபகஸ்ஸ ஏகமேவ பாசித்தியங். அத² ‘‘யங் எத்த² சீவரே கத்தப்³ப³ங், ஸப்³ப³ங் தங் தவ பா⁴ரோ’’தி வுத்தோ நிட்டா²பேதி, தஸ்ஸ ஆராபதே² ஆராபதே² பாசித்தியங். ஆணாபகஸ்ஸ ஏகவாசாய ஸம்ப³ஹுலானிபி, புனப்புனங் ஆணத்தியங் பன வத்தப்³ப³மேவ நத்தி².
Chaṭṭhe cīvaranti nivāsanapārupanupagaṃ. Sibbeyya vā sibbāpeyyā vāti ettha sayaṃ sibbantassa sūciṃ pavesetvā pavesetvā nīharaṇe pācittiyaṃ, satakkhattumpi vijjhitvā sakiṃ nīharantassa ekameva pācittiyaṃ. ‘Sibbā’ti vutto pana sacepi sabbaṃ sūcikammaṃ niṭṭhāpeti, āṇāpakassa ekameva pācittiyaṃ. Atha ‘‘yaṃ ettha cīvare kattabbaṃ, sabbaṃ taṃ tava bhāro’’ti vutto niṭṭhāpeti, tassa ārāpathe ārāpathe pācittiyaṃ. Āṇāpakassa ekavācāya sambahulānipi, punappunaṃ āṇattiyaṃ pana vattabbameva natthi.
ஸாவத்தி²யங் உதா³யித்தே²ரங் ஆரப்³ப⁴ சீவரஸிப்³ப³னவத்து²ஸ்மிங் பஞ்ஞத்தங், அஸாதா⁴ரணபஞ்ஞத்தி, ஸாணத்திகங், திகபாசித்தியங், ஞாதிகாய அஞ்ஞாதிகஸஞ்ஞினோ வா வேமதிகஸ்ஸ வா, ஏகதோஉபஸம்பன்னாய ஸிப்³ப³ந்தஸ்ஸ ச து³க்கடங். அஞ்ஞங் த²விகாதி³பரிக்கா²ரங் ஸிப்³ப³ந்தஸ்ஸ, ஞாதிகாய, ஸிக்க²மானஸாமணேரீனஞ்ச சீவரம்பி ஸிப்³ப³ந்தஸ்ஸ, உம்மத்தகாதீ³னஞ்ச அனாபத்தி. அஞ்ஞாதிகாய பி⁴க்கு²னியா ஸந்தகதா , நிவாஸனபாருபனுபக³தா, வுத்தலக்க²ணங் ஸிப்³ப³னங் வா ஸிப்³பா³பனங் வாதி இமானெத்த² தீணி அங்கா³னி. ஸமுட்டா²னாதீ³னி ஸஞ்சரித்தஸதி³ஸானேவாதி.
Sāvatthiyaṃ udāyittheraṃ ārabbha cīvarasibbanavatthusmiṃ paññattaṃ, asādhāraṇapaññatti, sāṇattikaṃ, tikapācittiyaṃ, ñātikāya aññātikasaññino vā vematikassa vā, ekatoupasampannāya sibbantassa ca dukkaṭaṃ. Aññaṃ thavikādiparikkhāraṃ sibbantassa, ñātikāya, sikkhamānasāmaṇerīnañca cīvarampi sibbantassa, ummattakādīnañca anāpatti. Aññātikāya bhikkhuniyā santakatā , nivāsanapārupanupagatā, vuttalakkhaṇaṃ sibbanaṃ vā sibbāpanaṃ vāti imānettha tīṇi aṅgāni. Samuṭṭhānādīni sañcarittasadisānevāti.
சீவரஸிப்³ப³னஸிக்கா²பத³வண்ணனா நிட்டி²தா.
Cīvarasibbanasikkhāpadavaṇṇanā niṭṭhitā.
7. ஸங்விதா⁴னஸிக்கா²பத³வண்ணனா
7. Saṃvidhānasikkhāpadavaṇṇanā
ஸத்தமே ஸங்விதா⁴யாதி ஸங்வித³ஹித்வா, க³மனகாலே ஸங்கேதங் கத்வாதி அத்தோ². ஏகத்³தா⁴னமக்³க³ந்தி ஏகங் அத்³தா⁴னஸங்கா²தங் மக்³க³ங், ஏகதோ வா அத்³தா⁴னமக்³க³ங். ஸத்த²க³மனீயோதி ஸத்தே²ன ஸத்³தி⁴ங் க³ந்தப்³போ³, ஸேஸங் உத்தானபத³த்த²மேவ. அயங் பனெத்த² வினிச்ச²யோ – அகப்பியபூ⁴மியங் ஸங்வித³ஹந்தஸ்ஸ ஸங்வித³ஹனபச்சயா தாவ து³க்கடங். தத்த² ட²பெத்வா பி⁴க்கு²னுபஸ்ஸயங் அந்தராராமங் ஆஸனஸாலங் தித்தி²யஸெய்யஞ்ச ஸேஸா அகப்பியபூ⁴மி, தத்த² ட²த்வா ஸங்வித³ஹந்தஸ்ஸாதி அத்தோ². ஸங்வித³ஹித்வா பன ‘‘அஜ்ஜ வா ஸ்வே வா’’தி நியமிதங் காலங் விஸங்கேதங் அகத்வா, த்³வாரவிஸங்கேதங் பன மக்³க³விஸங்கேதங் வா கத்வாபி பி⁴க்கு²னியா ஸத்³தி⁴ங் க³ச்ச²ந்தஸ்ஸ யாவ ஆஸன்னஸ்ஸாபி அஞ்ஞஸ்ஸ கா³மஸ்ஸ ‘‘அயங் இமஸ்ஸ உபசாரோ’’தி மனுஸ்ஸேஹி ட²பிதங் உபசாரங் ந ஓக்கமதி, தாவ அனாபத்தி. தங் ஓக்கமந்தஸ்ஸ பன பட²மபாதே³ து³க்கடங், து³தியபாதே³ பாசித்தியங், இதி கா³மூபசாரோக்கமனக³ணனாய பாசித்தியானி. அத்³த⁴யோஜனாதிக்கமே பன கா³மே அஸதி அத்³த⁴யோஜனக³ணனாய பாசித்தியங்.
Sattame saṃvidhāyāti saṃvidahitvā, gamanakāle saṅketaṃ katvāti attho. Ekaddhānamagganti ekaṃ addhānasaṅkhātaṃ maggaṃ, ekato vā addhānamaggaṃ. Satthagamanīyoti satthena saddhiṃ gantabbo, sesaṃ uttānapadatthameva. Ayaṃ panettha vinicchayo – akappiyabhūmiyaṃ saṃvidahantassa saṃvidahanapaccayā tāva dukkaṭaṃ. Tattha ṭhapetvā bhikkhunupassayaṃ antarārāmaṃ āsanasālaṃ titthiyaseyyañca sesā akappiyabhūmi, tattha ṭhatvā saṃvidahantassāti attho. Saṃvidahitvā pana ‘‘ajja vā sve vā’’ti niyamitaṃ kālaṃ visaṅketaṃ akatvā, dvāravisaṅketaṃ pana maggavisaṅketaṃ vā katvāpi bhikkhuniyā saddhiṃ gacchantassa yāva āsannassāpi aññassa gāmassa ‘‘ayaṃ imassa upacāro’’ti manussehi ṭhapitaṃ upacāraṃ na okkamati, tāva anāpatti. Taṃ okkamantassa pana paṭhamapāde dukkaṭaṃ, dutiyapāde pācittiyaṃ, iti gāmūpacārokkamanagaṇanāya pācittiyāni. Addhayojanātikkame pana gāme asati addhayojanagaṇanāya pācittiyaṃ.
ஸாவத்தி²யங் ச²ப்³ப³க்³கி³யே பி⁴க்கூ² ஆரப்³ப⁴ ஏகத்³தா⁴னமக்³க³ப்படிபஜ்ஜனவத்து²ஸ்மிங் பஞ்ஞத்தங், ‘‘அஞ்ஞத்ர ஸமயா’’தி அயமெத்த² அனுபஞ்ஞத்தி, அஸாதா⁴ரணபஞ்ஞத்தி, அனாணத்திகங், திகபாசித்தியங், அஸங்வித³ஹிதே ஸங்வித³ஹிதஸஞ்ஞினோ வேமதிகஸ்ஸ வா, யோ ச பி⁴க்கு²னியா அஸங்வித³ஹந்தியா கேவலங் அத்தனாவ ஸங்வித³ஹதி, தஸ்ஸ து³க்கடங். ஸமயே ஸங்வித³ஹித்வாபி க³ச்ச²ந்தஸ்ஸ, அத்தனா அஸங்வித³ஹந்தஸ்ஸ, விஸங்கேதேன வா, ஆபதா³ஸு க³ச்ச²ந்தஸ்ஸ, உம்மத்தகாதீ³னஞ்ச அனாபத்தி. த்³வின்னம்பி ஸங்வித³ஹித்வா மக்³க³ப்படிபத்தி, அவிஸங்கேததா, ஸமயாபா⁴வோ, அனாபதா³, கா³மந்தரோக்கமனங் வா அத்³த⁴யோஜனாதிக்கமோ வாதி இமானெத்த² பஞ்ச அங்கா³னி. ஏகதோஉபஸம்பன்னாதீ³ஹி பன ஸத்³தி⁴ங் மாதுகா³மஸிக்கா²பதே³ன ஆபத்தி, அத்³தா⁴னஸமுட்டா²னங், கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மங், வசீகம்மங், திசித்தங், திவேத³னந்தி.
Sāvatthiyaṃ chabbaggiye bhikkhū ārabbha ekaddhānamaggappaṭipajjanavatthusmiṃ paññattaṃ, ‘‘aññatra samayā’’ti ayamettha anupaññatti, asādhāraṇapaññatti, anāṇattikaṃ, tikapācittiyaṃ, asaṃvidahite saṃvidahitasaññino vematikassa vā, yo ca bhikkhuniyā asaṃvidahantiyā kevalaṃ attanāva saṃvidahati, tassa dukkaṭaṃ. Samaye saṃvidahitvāpi gacchantassa, attanā asaṃvidahantassa, visaṅketena vā, āpadāsu gacchantassa, ummattakādīnañca anāpatti. Dvinnampi saṃvidahitvā maggappaṭipatti, avisaṅketatā, samayābhāvo, anāpadā, gāmantarokkamanaṃ vā addhayojanātikkamo vāti imānettha pañca aṅgāni. Ekatoupasampannādīhi pana saddhiṃ mātugāmasikkhāpadena āpatti, addhānasamuṭṭhānaṃ, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ஸங்விதா⁴னஸிக்கா²பத³வண்ணனா நிட்டி²தா.
Saṃvidhānasikkhāpadavaṇṇanā niṭṭhitā.
8. நாவாபி⁴ருஹனஸிக்கா²பத³வண்ணனா
8. Nāvābhiruhanasikkhāpadavaṇṇanā
அட்ட²மே ஸங்விதா⁴யாதி கீளாபுரெக்கா²ரோ ஸங்வித³ஹித்வா, அபி⁴ருஹனகாலே ஸங்கேதங் கத்வாதி அத்தோ². உத்³த⁴ங்கா³மினிந்தி கீளாவஸேன உத்³த⁴ங் நதி³யா படிஸோதங் க³ச்ச²ந்திங். அதோ⁴கா³மினிந்தி ததே²வ அதோ⁴ அனுஸோதங் க³ச்ச²ந்திங். யங் பன தித்த²ப்படிபாத³னத்த²ங் உத்³த⁴ங் வா அதோ⁴ வா ஹரந்தி, எத்த² அனாபத்தி. அஞ்ஞத்ர திரியங் தரணாயாதி உபயோக³த்தே² நிஸ்ஸக்கவசனங், யா திரியங் தரணா, தங் ட²பெத்வாதி அத்தோ². பாசித்தியந்தி ஸகா³மகதீரபஸ்ஸேன க³மனகாலே கா³மந்தரக³ணனாய, அகா³மகதீரபஸ்ஸேன வா யோஜனவித்த²தாய நதி³யா மஜ்ஜே²ன வா க³மனகாலே அத்³த⁴யோஜனக³ணனாய பாசித்தியங், ஸமுத்³தே³ பன யதா²ஸுக²ங் க³ந்துங் வட்டதி.
Aṭṭhame saṃvidhāyāti kīḷāpurekkhāro saṃvidahitvā, abhiruhanakāle saṅketaṃ katvāti attho. Uddhaṃgāmininti kīḷāvasena uddhaṃ nadiyā paṭisotaṃ gacchantiṃ. Adhogāmininti tatheva adho anusotaṃ gacchantiṃ. Yaṃ pana titthappaṭipādanatthaṃ uddhaṃ vā adho vā haranti, ettha anāpatti. Aññatra tiriyaṃ taraṇāyāti upayogatthe nissakkavacanaṃ, yā tiriyaṃ taraṇā, taṃ ṭhapetvāti attho. Pācittiyanti sagāmakatīrapassena gamanakāle gāmantaragaṇanāya, agāmakatīrapassena vā yojanavitthatāya nadiyā majjhena vā gamanakāle addhayojanagaṇanāya pācittiyaṃ, samudde pana yathāsukhaṃ gantuṃ vaṭṭati.
ஸாவத்தி²யங் ச²ப்³ப³க்³கி³யே பி⁴க்கூ² ஆரப்³ப⁴ நாவாபி⁴ருஹனவத்து²ஸ்மிங் பஞ்ஞத்தங், ‘‘அஞ்ஞத்ர திரியங் தரணாயா’’தி அயமெத்த² அனுபஞ்ஞத்தி, ஸேஸங் அனந்தரஸிக்கா²பதே³ வுத்தனயேனேவ வேதி³தப்³ப³ந்தி.
Sāvatthiyaṃ chabbaggiye bhikkhū ārabbha nāvābhiruhanavatthusmiṃ paññattaṃ, ‘‘aññatra tiriyaṃ taraṇāyā’’ti ayamettha anupaññatti, sesaṃ anantarasikkhāpade vuttanayeneva veditabbanti.
நாவாபி⁴ருஹனஸிக்கா²பத³வண்ணனா நிட்டி²தா.
Nāvābhiruhanasikkhāpadavaṇṇanā niṭṭhitā.
9. பரிபாசிதஸிக்கா²பத³வண்ணனா
9. Paripācitasikkhāpadavaṇṇanā
நவமே பி⁴க்கு²னிபரிபாசிதந்தி பி⁴க்கு²னியா பரிபாசிதங், நேவ தஸ்ஸ நாத்தனோ ஞாதகப்பவாரிதானங் கி³ஹீனங் ஸந்திகே பி⁴க்கு²ஸ்ஸ கு³ணங் பகாஸெத்வா ‘‘தே³த² அய்யஸ்ஸ, கரோத² அய்யஸ்ஸா’’தி ஏவங் நிப்பா²தி³தங் லத்³த⁴ப்³ப³ங் கதந்தி அத்தோ². புப்³பே³ கி³ஹிஸமாரம்பா⁴தி எத்த² ஸமாரம்போ⁴தி ஸமாரத்³த⁴ங், படியாதி³தஸ்ஸேதங் நாமங். கி³ஹீனங் ஸமாரம்போ⁴ கி³ஹிஸமாரம்போ⁴, பி⁴க்கு²னியா பரிபாசனதோ புப்³பே³ பட²மதரங்யேவ யங் பி⁴க்கூ²னங் அத்தா²ய கி³ஹீனங் படியாதி³தப⁴த்தங், ஞாதகப்பவாரிதானங் வா ஸந்தகங், தங் ட²பெத்வா அஞ்ஞங் ஜானங் பு⁴ஞ்ஜந்தஸ்ஸ பாசித்தியந்தி அத்தோ². தஞ்ச கோ² அஜ்ஜோ²ஹரணக³ணனாய, படிக்³க³ஹணே பனஸ்ஸ து³க்கடங்.
Navame bhikkhuniparipācitanti bhikkhuniyā paripācitaṃ, neva tassa nāttano ñātakappavāritānaṃ gihīnaṃ santike bhikkhussa guṇaṃ pakāsetvā ‘‘detha ayyassa, karotha ayyassā’’ti evaṃ nipphāditaṃ laddhabbaṃ katanti attho. Pubbe gihisamārambhāti ettha samārambhoti samāraddhaṃ, paṭiyāditassetaṃ nāmaṃ. Gihīnaṃ samārambho gihisamārambho, bhikkhuniyā paripācanato pubbe paṭhamataraṃyeva yaṃ bhikkhūnaṃ atthāya gihīnaṃ paṭiyāditabhattaṃ, ñātakappavāritānaṃ vā santakaṃ, taṃ ṭhapetvā aññaṃ jānaṃ bhuñjantassa pācittiyanti attho. Tañca kho ajjhoharaṇagaṇanāya, paṭiggahaṇe panassa dukkaṭaṃ.
ராஜக³ஹே தே³வத³த்தங் ஆரப்³ப⁴ பி⁴க்கு²னிபரிபாசிதபிண்ட³பாதபு⁴ஞ்ஜனவத்து²ஸ்மிங் பஞ்ஞத்தங், ‘‘அஞ்ஞத்ர புப்³பே³ கி³ஹிஸமாரம்பா⁴’’தி அயமெத்த² அனுபஞ்ஞத்தி, அஸாதா⁴ரணபஞ்ஞத்தி, அனாணத்திகங், ஏகதோஉபஸம்பன்னாய பரிபாசிதங் பு⁴ஞ்ஜந்தஸ்ஸ , அபரிபாசிதே பரிபாசிதஸஞ்ஞினோ, உப⁴யத்த² வேமதிகஸ்ஸ ச து³க்கடங். உப⁴யத்த² அபரிபாசிதஸஞ்ஞினோ, கி³ஹிஸமாரம்பே⁴, ஸிக்க²மானஸாமணேராதீ³ஹி பரிபாசிதே, பஞ்ச போ⁴ஜனானி ட²பெத்வா அவஸேஸே, உம்மத்தகாதீ³னஞ்ச அனாபத்தி. பி⁴க்கு²னியா பரிபாசிததா, பரிபாசிதபா⁴வஜானநங், கி³ஹிஸமாரம்பா⁴பா⁴வோ, ஓத³னாதீ³னங் அஞ்ஞதரதா, தஸ்ஸ அஜ்ஜோ²ஹரணந்தி இமானெத்த² பஞ்ச அங்கா³னி. ஸமுட்டா²னாதீ³னி பட²மபாராஜிகஸஅஸானி, இத³ங் பன பண்ணத்திவஜ்ஜங், திசித்தங், திவேத³னந்தி.
Rājagahe devadattaṃ ārabbha bhikkhuniparipācitapiṇḍapātabhuñjanavatthusmiṃ paññattaṃ, ‘‘aññatra pubbe gihisamārambhā’’ti ayamettha anupaññatti, asādhāraṇapaññatti, anāṇattikaṃ, ekatoupasampannāya paripācitaṃ bhuñjantassa , aparipācite paripācitasaññino, ubhayattha vematikassa ca dukkaṭaṃ. Ubhayattha aparipācitasaññino, gihisamārambhe, sikkhamānasāmaṇerādīhi paripācite, pañca bhojanāni ṭhapetvā avasese, ummattakādīnañca anāpatti. Bhikkhuniyā paripācitatā, paripācitabhāvajānanaṃ, gihisamārambhābhāvo, odanādīnaṃ aññataratā, tassa ajjhoharaṇanti imānettha pañca aṅgāni. Samuṭṭhānādīni paṭhamapārājikasaasāni, idaṃ pana paṇṇattivajjaṃ, ticittaṃ, tivedananti.
பரிபாசிதஸிக்கா²பத³வண்ணனா நிட்டி²தா.
Paripācitasikkhāpadavaṇṇanā niṭṭhitā.
10. ரஹோனிஸஜ்ஜஸிக்கா²பத³வண்ணனா
10. Rahonisajjasikkhāpadavaṇṇanā
த³ஸமே ஸப்³போ³பி கதா²மக்³கோ³ து³தியஅனியதே வுத்தனயேனேவ வேதி³தப்³போ³. இத³ஞ்ஹி ஸிக்கா²பத³ங் து³தியஅனியதேன ச உபரி உபனந்த³ஸ்ஸ சதுத்த²ஸிக்கா²பதே³ன ச ஏகபரிச்சே²த³ங், அட்டு²ப்பத்திவஸேன பன விஸுங் பஞ்ஞத்தந்தி.
Dasame sabbopi kathāmaggo dutiyaaniyate vuttanayeneva veditabbo. Idañhi sikkhāpadaṃ dutiyaaniyatena ca upari upanandassa catutthasikkhāpadena ca ekaparicchedaṃ, aṭṭhuppattivasena pana visuṃ paññattanti.
ரஹோனிஸஜ்ஜஸிக்கா²பத³வண்ணனா நிட்டி²தா.
Rahonisajjasikkhāpadavaṇṇanā niṭṭhitā.
ஓவாத³வக்³கோ³ ததியோ.
Ovādavaggo tatiyo.
