| Library / Tipiṭaka / తిపిటక • Tipiṭaka / అఙ్గుత్తరనికాయ (అట్ఠకథా) • Aṅguttaranikāya (aṭṭhakathā) |
౯. పబ్బజ్జాసుత్తవణ్ణనా
9. Pabbajjāsuttavaṇṇanā
౫౯. నవమే తస్మాతి యస్మా ఏవం అపరిచితచిత్తస్స సామఞ్ఞత్థో న సమ్పజ్జతి, తస్మా. యథాపబ్బజ్జాపరిచితఞ్చ నో చిత్తం భవిస్సతీతి యథా పబ్బజ్జానురూపేన పరిచితం. యే హి కేచి పబ్బజన్తి నామ, సబ్బే తే అరహత్తం పత్థేత్వా. తస్మా యం చిత్తం అరహత్తాధిగమత్థాయ పరిచితం వడ్ఢితం, తం యథాపబ్బజ్జాపరిచితం నామాతి వేదితబ్బం. ఏవరూపం పన చిత్తం భవిస్సతీతి సిక్ఖితబ్బం. లోకస్స సమఞ్చ విసమఞ్చాతి సత్తలోకస్స సుచరితదుచ్చరితాని. లోకస్స భవఞ్చ విభవఞ్చాతి తస్స వడ్ఢిఞ్చ వినాసఞ్చ, తథా సమ్పత్తిఞ్చ విపత్తిఞ్చ. లోకస్స సముదయఞ్చ అత్థఙ్గమఞ్చాతి పన సఙ్ఖారలోకం సన్ధాయ వుత్తం, ఖన్ధానం నిబ్బత్తిఞ్చ భేదఞ్చాతి అత్థో.
59. Navame tasmāti yasmā evaṃ aparicitacittassa sāmaññattho na sampajjati, tasmā. Yathāpabbajjāparicitañca no cittaṃ bhavissatīti yathā pabbajjānurūpena paricitaṃ. Ye hi keci pabbajanti nāma, sabbe te arahattaṃ patthetvā. Tasmā yaṃ cittaṃ arahattādhigamatthāya paricitaṃ vaḍḍhitaṃ, taṃ yathāpabbajjāparicitaṃ nāmāti veditabbaṃ. Evarūpaṃ pana cittaṃ bhavissatīti sikkhitabbaṃ. Lokassa samañca visamañcāti sattalokassa sucaritaduccaritāni. Lokassa bhavañca vibhavañcāti tassa vaḍḍhiñca vināsañca, tathā sampattiñca vipattiñca. Lokassasamudayañca atthaṅgamañcāti pana saṅkhāralokaṃ sandhāya vuttaṃ, khandhānaṃ nibbattiñca bhedañcāti attho.
Related texts:
తిపిటక (మూల) • Tipiṭaka (Mūla) / సుత్తపిటక • Suttapiṭaka / అఙ్గుత్తరనికాయ • Aṅguttaranikāya / ౯. పబ్బజ్జాసుత్తం • 9. Pabbajjāsuttaṃ
టీకా • Tīkā / సుత్తపిటక (టీకా) • Suttapiṭaka (ṭīkā) / అఙ్గుత్తరనికాయ (టీకా) • Aṅguttaranikāya (ṭīkā) / ౧-౧౦. సచిత్తసుత్తాదివణ్ణనా • 1-10. Sacittasuttādivaṇṇanā
