| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[195] 5. баб̣б̣ад̇уубад̇т̇араж̇аад̇агаван̣н̣анаа
[195] 5. Pabbatūpattharajātakavaṇṇanā
баб̣б̣ад̇уубад̇т̇арз раммзд̇и ид̣̇ам̣ сад̇т̇аа ж̇зд̇аванз вихаранд̇о госаларааж̇аанам̣ аараб̣бха гат̇зси. госаларан̃н̃о гира зго амажжо анд̇збурз бад̣̇усси. рааж̇ааби баривиймам̣самаано д̇ам̣ д̇ат̇ад̇о н̃ад̇ваа ‘‘сад̇т̇у аарожзссаамий’’д̇и ж̇зд̇аванам̣ г̇анд̇ваа сад̇т̇аарам̣ ванд̣̇ид̇ваа ‘‘бханд̇з, амхаагам̣ анд̇збурз зго амажжо бад̣̇усси, д̇асса гим̣ гаад̇ум̣ ваддад̇ий’’д̇и бужчи. ат̇а нам̣ сад̇т̇аа ‘‘убагаараго д̇з, махаарааж̇а, со жа амажжо саа жа ид̇т̇ий бияаа’’д̇и бужчид̇ваа ‘‘аама, бханд̇з, ад̇ивияа убагаараго сагалам̣ рааж̇агулам̣ санд̇хаарзд̇и, сааби мз ид̇т̇ий бияаа’’д̇и вуд̇д̇з ‘‘махаарааж̇а, ‘ад̇д̇ано убагаарагзсу сзвагзсу бияаасу жа ид̇т̇ийсу д̣̇уб̣бхид̇ум̣ на саггаа’д̇и буб̣б̣зби рааж̇аано бан̣д̣ид̇аанам̣ гат̇ам̣ суд̇ваа маж̇жхад̇д̇аава ахзсу’’нд̇и вад̇ваа д̇зна яаажид̇о ад̇ийд̇ам̣ аахари.
Pabbatūpatthare rammeti idaṃ satthā jetavane viharanto kosalarājānaṃ ārabbha kathesi. Kosalarañño kira eko amacco antepure padussi. Rājāpi parivīmaṃsamāno taṃ tathato ñatvā ‘‘satthu ārocessāmī’’ti jetavanaṃ gantvā satthāraṃ vanditvā ‘‘bhante, amhākaṃ antepure eko amacco padussi, tassa kiṃ kātuṃ vaṭṭatī’’ti pucchi. Atha naṃ satthā ‘‘upakārako te, mahārāja, so ca amacco sā ca itthī piyā’’ti pucchitvā ‘‘āma, bhante, ativiya upakārako sakalaṃ rājakulaṃ sandhāreti, sāpi me itthī piyā’’ti vutte ‘‘mahārāja, ‘attano upakārakesu sevakesu piyāsu ca itthīsu dubbhituṃ na sakkā’ti pubbepi rājāno paṇḍitānaṃ kathaṃ sutvā majjhattāva ahesu’’nti vatvā tena yācito atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о амажжагулз ниб̣б̣ад̇д̇ид̇ваа ваяаббад̇д̇о д̇асса ад̇т̇ад̇хаммаанусаасаго ахоси. ат̇асса ран̃н̃о зго амажжо анд̇збурз бад̣̇усси. рааж̇аа нам̣ д̇ат̇ад̇о н̃ад̇ваа ‘‘амажжоби мз б̣ахуубагааро, аяам̣ ид̇т̇ийби мз бияаа, д̣̇взби имз наасзд̇ум̣ на саггаа , бан̣д̣ид̇аамажжам̣ бан̃хам̣ бужчид̇ваа сажз сахид̇аб̣б̣ам̣ бхависсад̇и, сахиссаами, но жз, на сахиссаамий’’д̇и б̣од̇хисад̇д̇ам̣ баггосаабзд̇ваа аасанам̣ д̣̇ад̇ваа ‘‘бан̣д̣ид̇а, бан̃хам̣ бужчиссаамий’’д̇и вад̇ваа ‘‘бужчат̇а, махаарааж̇а, виссаж̇ж̇зссаамий’’д̇и вуд̇д̇з бан̃хам̣ бужчанд̇о батамам̣ г̇аат̇амааха –
Atīte bārāṇasiyaṃ brahmadatte rajjaṃ kārente bodhisatto amaccakule nibbattitvā vayappatto tassa atthadhammānusāsako ahosi. Athassa rañño eko amacco antepure padussi. Rājā naṃ tathato ñatvā ‘‘amaccopi me bahūpakāro, ayaṃ itthīpi me piyā, dvepi ime nāsetuṃ na sakkā , paṇḍitāmaccaṃ pañhaṃ pucchitvā sace sahitabbaṃ bhavissati, sahissāmi, no ce, na sahissāmī’’ti bodhisattaṃ pakkosāpetvā āsanaṃ datvā ‘‘paṇḍita, pañhaṃ pucchissāmī’’ti vatvā ‘‘pucchatha, mahārāja, vissajjessāmī’’ti vutte pañhaṃ pucchanto paṭhamaṃ gāthamāha –
89.
89.
‘‘баб̣б̣ад̇уубад̇т̇арз раммз, ж̇аад̇аа богкаран̣ий сиваа;
‘‘Pabbatūpatthare ramme, jātā pokkharaṇī sivā;
д̇ам̣ син̇г̇аало абаабааяи, ж̇аанам̣ сийхзна рагкид̇а’’нд̇и.
Taṃ siṅgālo apāpāyi, jānaṃ sīhena rakkhita’’nti.
д̇ад̇т̇а баб̣б̣ад̇уубад̇т̇арз раммзд̇и химаванд̇абаб̣б̣ад̇абаад̣̇з бад̇т̇арид̇ваа тид̇з ан̇г̇ан̣адтаанзд̇и ад̇т̇о. ж̇аад̇аа богкаран̣ий сиваад̇и сиваа сийд̇алаа мад̇хурод̣̇агаа богкаран̣ий ниб̣б̣ад̇д̇аа, абижа ко богкарасан̃чаннаа над̣̇ийби богкаран̣ийязва. абаабааяийд̇и аба-ид̇и убасаг̇г̇о, абааяийд̇и ад̇т̇о. ж̇аанам̣ сийхзна рагкид̇анд̇и саа богкаран̣ий сийхабарибхог̇аа сийхзна рагкид̇аа, соби нам̣ син̇г̇аало ‘‘сийхзна рагкид̇аа аяа’’нд̇и ж̇аананд̇ова абааяи. д̇ам̣ гим̣ ман̃н̃ад̇и, б̣аало син̇г̇аало сийхасса абхааяид̇ваа бивзяяа зваруубам̣ богкаран̣инд̇и аяамзд̇т̇аад̇хиббааяо.
Tattha pabbatūpatthare rammeti himavantapabbatapāde pattharitvā ṭhite aṅgaṇaṭṭhāneti attho. Jātā pokkharaṇī sivāti sivā sītalā madhurodakā pokkharaṇī nibbattā, apica kho pokkharasañchannā nadīpi pokkharaṇīyeva. Apāpāyīti apa-iti upasaggo, apāyīti attho. Jānaṃ sīhena rakkhitanti sā pokkharaṇī sīhaparibhogā sīhena rakkhitā, sopi naṃ siṅgālo ‘‘sīhena rakkhitā aya’’nti jānantova apāyi. Taṃ kiṃ maññati, bālo siṅgālo sīhassa abhāyitvā piveyya evarūpaṃ pokkharaṇinti ayametthādhippāyo.
б̣од̇хисад̇д̇о ‘‘ад̣̇д̇хаа зд̇асса анд̇збурз зго амажжо бад̣̇удто бхависсад̇ий’’д̇и н̃ад̇ваа д̣̇уд̇ияам̣ г̇аат̇амааха –
Bodhisatto ‘‘addhā etassa antepure eko amacco paduṭṭho bhavissatī’’ti ñatvā dutiyaṃ gāthamāha –
90.
90.
‘‘биванд̇и жз махаарааж̇а, саабад̣̇аани махаанад̣̇им̣;
‘‘Pivanti ce mahārāja, sāpadāni mahānadiṃ;
на д̇зна анад̣̇ий ход̇и, камассу яад̣̇и д̇з бияаа’’д̇и.
Na tena anadī hoti, khamassu yadi te piyā’’ti.
д̇ад̇т̇а саабад̣̇аанийд̇и на гзвалам̣ син̇г̇аалова, авасзсаани сунакабасад̣̇аб̣ил̣аарамиг̇аад̣̇ийни саб̣б̣асаабад̣̇аани д̇ам̣ богкарасан̃чаннад̇д̇аа ‘‘богкаран̣ий’’д̇и лад̣̇д̇ханаамам̣ над̣̇им̣ биванд̇и жз. на д̇зна анад̣̇ий ход̇ийд̇и над̣̇ияан̃хи д̣̇вибад̣̇ажад̇уббад̣̇ааби ахимажчааби саб̣б̣з бибаасид̇аа баанийяам̣ биванд̇и, на саа д̇зна гааран̣зна анад̣̇ий наама ход̇и, нааби ужчидтанад̣̇ий. гасмаа? саб̣б̣зсам̣ саад̇хааран̣ад̇д̇аа. яат̇аа над̣̇ий язна гзнажи бийд̇аа на д̣̇уссад̇и, звам̣ ид̇т̇ийби гилзсавасзна саамигам̣ ад̇иггамид̇ваа ан̃н̃зна сад̣̇д̇хим̣ сам̣ваасам̣ г̇ад̇аа нзва анид̇т̇ий ход̇и. гасмаа? саб̣б̣зсам̣ саад̇хааран̣абхаавзна. нааби ужчидтид̇т̇ий. гасмаа? од̣̇аганд̇игад̇ааяа суд̣̇д̇хабхаавзна. камассу яад̣̇и д̇з бияаад̇и яад̣̇и бана д̇з саа ид̇т̇ий бияаа, со жа амажжо б̣ахуубагааро, д̇зсам̣ убхиннамби камассу маж̇жхад̇д̇абхаавзна д̇идтаахийд̇и.
Tattha sāpadānīti na kevalaṃ siṅgālova, avasesāni sunakhapasadabiḷāramigādīni sabbasāpadāni taṃ pokkharasañchannattā ‘‘pokkharaṇī’’ti laddhanāmaṃ nadiṃ pivanti ce. Na tena anadī hotīti nadiyañhi dvipadacatuppadāpi ahimacchāpi sabbe pipāsitā pānīyaṃ pivanti, na sā tena kāraṇena anadī nāma hoti, nāpi ucchiṭṭhanadī. Kasmā? Sabbesaṃ sādhāraṇattā. Yathā nadī yena kenaci pītā na dussati, evaṃ itthīpi kilesavasena sāmikaṃ atikkamitvā aññena saddhiṃ saṃvāsaṃ gatā neva anitthī hoti. Kasmā? Sabbesaṃ sādhāraṇabhāvena. Nāpi ucchiṭṭhitthī. Kasmā? Odakantikatāya suddhabhāvena. Khamassu yadi te piyāti yadi pana te sā itthī piyā, so ca amacco bahūpakāro, tesaṃ ubhinnampi khamassu majjhattabhāvena tiṭṭhāhīti.
звам̣ махаасад̇д̇о ран̃н̃о оваад̣̇ам̣ ад̣̇ааси. рааж̇аа д̇асса оваад̣̇з тад̇ваа ‘‘буна зваруубам̣ баабагаммам̣ маа гарид̇т̇аа’’д̇и вад̇ваа убхиннамби ками. д̇ад̇о бадтааяа д̇з орамим̣су. рааж̇ааби д̣̇аанаад̣̇ийни бун̃н̃аани гад̇ваа ж̇ийвид̇абарияосаанз саг̇г̇абурам̣ буурзси. госаларааж̇ааби имам̣ д̇хаммад̣̇зсанам̣ суд̇ваа д̇зсам̣ убхиннамби камид̇ваа маж̇жхад̇д̇о ахоси.
Evaṃ mahāsatto rañño ovādaṃ adāsi. Rājā tassa ovāde ṭhatvā ‘‘puna evarūpaṃ pāpakammaṃ mā karitthā’’ti vatvā ubhinnampi khami. Tato paṭṭhāya te oramiṃsu. Rājāpi dānādīni puññāni katvā jīvitapariyosāne saggapuraṃ pūresi. Kosalarājāpi imaṃ dhammadesanaṃ sutvā tesaṃ ubhinnampi khamitvā majjhatto ahosi.
сад̇т̇аа имам̣ д̇хаммад̣̇зсанам̣ аахарид̇ваа ж̇аад̇агам̣ самод̇хаанзси – ‘‘д̇ад̣̇аа рааж̇аа аананд̣̇о ахоси, бан̣д̣ид̇аамажжо бана ахамзва ахоси’’нд̇и.
Satthā imaṃ dhammadesanaṃ āharitvā jātakaṃ samodhānesi – ‘‘tadā rājā ānando ahosi, paṇḍitāmacco pana ahameva ahosi’’nti.
баб̣б̣ад̇уубад̇т̇араж̇аад̇агаван̣н̣анаа бан̃жамаа.
Pabbatūpattharajātakavaṇṇanā pañcamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 195. баб̣б̣ад̇уубад̇т̇араж̇аад̇агам̣ • 195. Pabbatūpattharajātakaṃ
