| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
பச்சயனித்³தே³ஸபகிண்ணகவினிச்ச²யகதா²
Paccayaniddesapakiṇṇakavinicchayakathā
இதா³னி ஏவங் உத்³தே³ஸனித்³தே³ஸதோ த³ஸ்ஸிதேஸு இமேஸு சதுவீஸதியா பச்சயேஸு ஞாணசாரஸ்ஸ விஸத³பா⁴வத்த²ங் அனேகத⁴ம்மானங் ஏகபச்சயபா⁴வதோ, ஏகத⁴ம்மஸ்ஸ அனேகபச்சயபா⁴வதோ, ஏகபச்சயஸ்ஸ அனேகபச்சயபா⁴வதோ, பச்சயஸபா⁴க³தோ, பச்சயவிஸபா⁴க³தோ, யுக³ளகதோ, ஜனகாஜனகதோ, ஸப்³ப³ட்டா²னிகாஸப்³ப³ட்டா²னிகதோ, ரூபங் ரூபஸ்ஸாதிஆதி³விகப்பதோ, ப⁴வபே⁴த³தோதி இமேஸங் த³ஸன்னங் பதா³னங் வஸேன பகிண்ணகவினிச்ச²யோ வேதி³தப்³போ³. தத்த² அனேகத⁴ம்மானங் ஏகபச்சயபா⁴வதோதி ஏதேஸு ஹி ட²பெத்வா கம்மபச்சயங் அவஸேஸேஸு தேவீஸதியா பச்சயேஸு அனேகத⁴ம்மா ஏகதோ பச்சயா ஹொந்தி. கம்மபச்சயோ பன ஏகோ சேதனாத⁴ம்மோயேவாதி ஏவங் தாவெத்த² அனேகத⁴ம்மானங் ஏகபச்சயபா⁴வதோ வினிச்ச²யோ வேதி³தப்³போ³.
Idāni evaṃ uddesaniddesato dassitesu imesu catuvīsatiyā paccayesu ñāṇacārassa visadabhāvatthaṃ anekadhammānaṃ ekapaccayabhāvato, ekadhammassa anekapaccayabhāvato, ekapaccayassa anekapaccayabhāvato, paccayasabhāgato, paccayavisabhāgato, yugaḷakato, janakājanakato, sabbaṭṭhānikāsabbaṭṭhānikato, rūpaṃ rūpassātiādivikappato, bhavabhedatoti imesaṃ dasannaṃ padānaṃ vasena pakiṇṇakavinicchayo veditabbo. Tattha anekadhammānaṃ ekapaccayabhāvatoti etesu hi ṭhapetvā kammapaccayaṃ avasesesu tevīsatiyā paccayesu anekadhammā ekato paccayā honti. Kammapaccayo pana eko cetanādhammoyevāti evaṃ tāvettha anekadhammānaṃ ekapaccayabhāvato vinicchayo veditabbo.
ஏகத⁴ம்மஸ்ஸ அனேகபச்சயபா⁴வதோதி ஹேதுபச்சயே தாவ அமோஹோ ஏகோ த⁴ம்மோ. ஸோ புரேஜாதகம்மாஹாரஜா²னபச்சயோவ ந ஹோதி, ஸேஸானங் வீஸதியா பச்சயானங் வஸேன பச்சயோ ஹோதி. அலோபா⁴தோ³ஸா இந்த்³ரியமக்³க³பச்சயாபி ந ஹொந்தி, ஸேஸானங் அட்டா²ரஸன்னங் பச்சயானங் வஸேன பச்சயா ஹொந்தி. லோப⁴மோஹா விபாகபச்சயாபி ந ஹொந்தி, ஸேஸானங் ஸத்தரஸன்னங் பச்சயானங் வஸேன பச்சயா ஹொந்தி. தோ³ஸோ அதி⁴பதிபச்சயோபி ந ஹோதி, ஸேஸானங் ஸோளஸன்னங் பச்சயானங் வஸேன பச்சயோ ஹோதி. ஆரம்மணபச்சயே ரூபாயதனங் சக்கு²விஞ்ஞாணதா⁴துயா ஆரம்மணபுரேஜாதஅத்தி²அவிக³தவஸேன சதுதா⁴ பச்சயோ; ததா² மனோதா⁴துயா அஹேதுகமனோவிஞ்ஞாணதா⁴துயா ச. ஸஹேதுகாய பன ஆரம்மணாதி⁴பதிஆரம்மணூபனிஸ்ஸயவஸேனாபி பச்சயோ ஹோதி. இமினா நயேன ஸப்³பே³ஸங் ஆரம்மணபச்சயத⁴ம்மானங் அனேகபச்சயபா⁴வோ வேதி³தப்³போ³.
Ekadhammassa anekapaccayabhāvatoti hetupaccaye tāva amoho eko dhammo. So purejātakammāhārajhānapaccayova na hoti, sesānaṃ vīsatiyā paccayānaṃ vasena paccayo hoti. Alobhādosā indriyamaggapaccayāpi na honti, sesānaṃ aṭṭhārasannaṃ paccayānaṃ vasena paccayā honti. Lobhamohā vipākapaccayāpi na honti, sesānaṃ sattarasannaṃ paccayānaṃ vasena paccayā honti. Doso adhipatipaccayopi na hoti, sesānaṃ soḷasannaṃ paccayānaṃ vasena paccayo hoti. Ārammaṇapaccaye rūpāyatanaṃ cakkhuviññāṇadhātuyā ārammaṇapurejātaatthiavigatavasena catudhā paccayo; tathā manodhātuyā ahetukamanoviññāṇadhātuyā ca. Sahetukāya pana ārammaṇādhipatiārammaṇūpanissayavasenāpi paccayo hoti. Iminā nayena sabbesaṃ ārammaṇapaccayadhammānaṃ anekapaccayabhāvo veditabbo.
அதி⁴பதிபச்சயே ஆரம்மணாதி⁴பதினோ ஆரம்மணபச்சயே வுத்தனயேனேவ அனேகபச்சயபா⁴வோ வேதி³தப்³போ³. ஸஹஜாதாதி⁴பதீஸு வீமங்ஸா அமோஹஹேது விய வீஸதிதா⁴ பச்சயோ ஹோதி. ச²ந்தோ³ ஹேதுபுரேஜாதகம்மஆஹாரஇந்த்³ரியஜா²னமக்³க³பச்சயோ ந ஹோதி, ஸேஸானங் ஸத்தரஸன்னங் பச்சயானங் வஸேன பச்சயோ ஹோதி. சித்தங் ஹேதுபுரேஜாதகம்மஜா²னமக்³க³பச்சயோ ந ஹோதி, ஸேஸானங் ஏகூனவீஸதியா பச்சயானங் வஸேன பச்சயோ ஹோதி. வீரியங் ஹேதுபுரேஜாதகம்மாஹாரஜா²னபச்சயோ ந ஹோதி, ஸேஸானங் ஏகூனவீஸதியா வஸேன பச்சயோ ஹோதி.
Adhipatipaccaye ārammaṇādhipatino ārammaṇapaccaye vuttanayeneva anekapaccayabhāvo veditabbo. Sahajātādhipatīsu vīmaṃsā amohahetu viya vīsatidhā paccayo hoti. Chando hetupurejātakammaāhāraindriyajhānamaggapaccayo na hoti, sesānaṃ sattarasannaṃ paccayānaṃ vasena paccayo hoti. Cittaṃ hetupurejātakammajhānamaggapaccayo na hoti, sesānaṃ ekūnavīsatiyā paccayānaṃ vasena paccayo hoti. Vīriyaṃ hetupurejātakammāhārajhānapaccayo na hoti, sesānaṃ ekūnavīsatiyā vasena paccayo hoti.
அனந்தரபச்சயே ‘‘சக்கு²விஞ்ஞாணதா⁴தூ’’திஆதி³னா நயேன வுத்தேஸு சதூஸு க²ந்தே⁴ஸு வேத³னாக்க²ந்தோ⁴ ஹேதுபுரேஜாதகம்மாஹாரமக்³க³பச்சயோ ந ஹோதி, ஸேஸானங் ஏகூனவீஸதியா வஸேன பச்சயோ ஹோதி. ஸஞ்ஞாக்க²ந்தோ⁴ இந்த்³ரியஜா²னபச்சயோபி ந ஹோதி, ஸேஸானங் ஸத்தரஸன்னங் வஸேன பச்சயோ ஹோதி. ஸங்கா²ரக்க²ந்தே⁴ ஹேதூ ஹேதுபச்சயே வுத்தனயேன, ச²ந்த³வீரியானி அதி⁴பதிபச்சயே வுத்தனயேனேவ பச்சயா ஹொந்தி. ப²ஸ்ஸோ ஹேதுபுரேஜாதகம்மஇந்த்³ரியஜா²னமக்³க³பச்சயோ ந ஹோதி, ஸேஸானங் அட்டா²ரஸன்னங் வஸேன பச்சயோ ஹோதி. சேதனா ஹேதுபுரேஜாதஇந்த்³ரியஜா²னமக்³க³பச்சயோ ந ஹோதி. ஸேஸானங் ஏகூனவீஸதியா வஸேன பச்சயோ ஹோதி. விதக்கோ ஹேதுபுரேஜாதகம்மாஹாரிந்த்³ரியபச்சயோ ந ஹோதி, ஸேஸானங் ஏகூனவீஸதியா வஸேன பச்சயோ ஹோதி. விசாரோ மக்³க³பச்சயோபி ந ஹோதி, ஸேஸானங் அட்டா²ரஸன்னங் வஸேன பச்சயோ ஹோதி. பீதி தேஸஞ்ஞேவ வஸேன பச்சயோ ஹோதி. சித்தேகக்³க³தா ஹேதுபுரேஜாதகம்மாஹாரபச்சயோ ந ஹோதி, ஸேஸானங் வீஸதியா வஸேன பச்சயோ ஹோதி. ஸத்³தா⁴ ஹேதுபுரேஜாதகம்மாஹாரஜா²னமக்³க³பச்சயோ ந ஹோதி, ஸேஸானங் அட்டா²ரஸன்னங் வஸேன பச்சயோ ஹோதி. ஸதி தேஹி சேவ மக்³க³பச்சயேன சாதி ஏகூனவீஸதியா வஸேன பச்சயோ ஹோதி. ஜீவிதிந்த்³ரியங் ஸத்³தா⁴ய வுத்தானங் அட்டா²ரஸன்னங் வஸேன பச்சயோ ஹோதி. ஹிரொத்தப்பங் ததோ இந்த்³ரியபச்சயங் அபனெத்வா ஸேஸானங் ஸத்தரஸன்னங் வஸேன பச்சயோ ஹோதி. ததா² காயபஸ்ஸத்³தா⁴தீ³னி யுக³ளகானி, யேவாபனகேஸு அதி⁴மொக்க²மனஸிகாரதத்ரமஜ்ஜ²த்ததா கருணாமுதி³தா ச. விரதியோ பன தேஹி சேவ மக்³க³பச்சயேன சாதி அட்டா²ரஸதா⁴ பச்சயா ஹொந்தி. மிச்சா²தி³ட்டி² ததோ விபாகபச்சயங் அபனெத்வா ஸத்தரஸதா⁴, மிச்சா²வாசாகம்மந்தாஜீவா தேஹி சேவ கம்மாஹாரபச்சயேஹி சாதி ஏகூனவீஸதிதா⁴. அஹிரிகங் அனொத்தப்பங் மானோ தி²னங் மித்³த⁴ங் உத்³த⁴ச்சந்தி இமே ஹேதுபுரேஜாதகம்மவிபாகாஹாரிந்த்³ரியஜா²னமக்³க³பச்சயா ந ஹொந்தி, ஸேஸானங் பன ஸோளஸன்னங் பச்சயானங் வஸேன பச்சயா ஹொந்தி. விசிகிச்சா²இஸ்ஸாமச்ச²ரியகுக்குச்சானி ததோ அதி⁴பதிபச்சயங் அபனெத்வா பன்னரஸதா⁴ விஞ்ஞாணக்க²ந்த⁴ஸ்ஸ. அதி⁴பதிபச்சயே வுத்தனயேனேவ அனேகபச்சயபா⁴வோ வேதி³தப்³போ³. ஸமனந்தரபச்சயேபி ஏஸேவ நயோ.
Anantarapaccaye ‘‘cakkhuviññāṇadhātū’’tiādinā nayena vuttesu catūsu khandhesu vedanākkhandho hetupurejātakammāhāramaggapaccayo na hoti, sesānaṃ ekūnavīsatiyā vasena paccayo hoti. Saññākkhandho indriyajhānapaccayopi na hoti, sesānaṃ sattarasannaṃ vasena paccayo hoti. Saṅkhārakkhandhe hetū hetupaccaye vuttanayena, chandavīriyāni adhipatipaccaye vuttanayeneva paccayā honti. Phasso hetupurejātakammaindriyajhānamaggapaccayo na hoti, sesānaṃ aṭṭhārasannaṃ vasena paccayo hoti. Cetanā hetupurejātaindriyajhānamaggapaccayo na hoti. Sesānaṃ ekūnavīsatiyā vasena paccayo hoti. Vitakko hetupurejātakammāhārindriyapaccayo na hoti, sesānaṃ ekūnavīsatiyā vasena paccayo hoti. Vicāro maggapaccayopi na hoti, sesānaṃ aṭṭhārasannaṃ vasena paccayo hoti. Pīti tesaññeva vasena paccayo hoti. Cittekaggatā hetupurejātakammāhārapaccayo na hoti, sesānaṃ vīsatiyā vasena paccayo hoti. Saddhā hetupurejātakammāhārajhānamaggapaccayo na hoti, sesānaṃ aṭṭhārasannaṃ vasena paccayo hoti. Sati tehi ceva maggapaccayena cāti ekūnavīsatiyā vasena paccayo hoti. Jīvitindriyaṃ saddhāya vuttānaṃ aṭṭhārasannaṃ vasena paccayo hoti. Hirottappaṃ tato indriyapaccayaṃ apanetvā sesānaṃ sattarasannaṃ vasena paccayo hoti. Tathā kāyapassaddhādīni yugaḷakāni, yevāpanakesu adhimokkhamanasikāratatramajjhattatā karuṇāmuditā ca. Viratiyo pana tehi ceva maggapaccayena cāti aṭṭhārasadhā paccayā honti. Micchādiṭṭhi tato vipākapaccayaṃ apanetvā sattarasadhā, micchāvācākammantājīvā tehi ceva kammāhārapaccayehi cāti ekūnavīsatidhā. Ahirikaṃ anottappaṃ māno thinaṃ middhaṃ uddhaccanti ime hetupurejātakammavipākāhārindriyajhānamaggapaccayā na honti, sesānaṃ pana soḷasannaṃ paccayānaṃ vasena paccayā honti. Vicikicchāissāmacchariyakukkuccāni tato adhipatipaccayaṃ apanetvā pannarasadhā viññāṇakkhandhassa. Adhipatipaccaye vuttanayeneva anekapaccayabhāvo veditabbo. Samanantarapaccayepi eseva nayo.
ஸஹஜாதபச்சயே சதூஸு தாவ க²ந்தே⁴ஸு ஏகேகஸ்ஸ த⁴ம்மஸ்ஸ அனேகபச்சயபா⁴வோ வுத்தனயேனேவ வேதி³தப்³போ³. சத்தாரி மஹாபூ⁴தானி ஆரம்மணஆரம்மணாதி⁴பதிஸஹஜாதஅஞ்ஞமஞ்ஞனிஸ்ஸயஉபனிஸ்ஸயபுரேஜாதஅத்தி²அவிக³தவஸேன நவதா⁴ பச்சயா ஹொந்தி. ஹத³யவத்து² தேஸஞ்சேவ விப்பயுத்தஸ்ஸ ச வஸேன த³ஸதா⁴ பச்சயோ ஹோதி. அஞ்ஞமஞ்ஞபச்சயே அபுப்³ப³ங் நத்தி². நிஸ்ஸயபச்சயே சக்கா²யதனாதீ³னி ஆரம்மணஆரம்மணாதி⁴பதினிஸ்ஸயஉபனிஸ்ஸயபுரேஜாதஇந்த்³ரியவிப்பயுத்தஅத்தி²அவிக³தவஸேன நவதா⁴ பச்சயா ஹொந்தி. உபனிஸ்ஸயே அபுப்³ப³ங் நத்தி². புரேஜாதபச்சயே ரூபஸத்³த³க³ந்த⁴ரஸாயதனானி ஆரம்மணஆரம்மணாதி⁴பதிஉபனிஸ்ஸயபுரேஜாதஅத்தி²அவிக³தவஸேன ச²தா⁴ பச்சயா ஹொந்தி. எத்தகமேவெத்த² அபுப்³ப³ங். பச்சா²ஜாதாதீ³ஸு அபுப்³ப³ங் நத்தி². ஆஹாரபச்சயே கப³ளீகாராஹாரோ ஆரம்மணஆரம்மணாதி⁴பதிஉபனிஸ்ஸயஆஹாரஅத்தி²அவிக³தவஸேன ச²தா⁴ பச்சயோ ஹோதி. இந்த்³ரியாதீ³ஸு அபுப்³ப³ங் நத்தி². ஏவமெத்த² ஏகத⁴ம்மஸ்ஸ அனேகபச்சயபா⁴வதோபி விஞ்ஞாதப்³போ³ வினிச்ச²யோ.
Sahajātapaccaye catūsu tāva khandhesu ekekassa dhammassa anekapaccayabhāvo vuttanayeneva veditabbo. Cattāri mahābhūtāni ārammaṇaārammaṇādhipatisahajātaaññamaññanissayaupanissayapurejātaatthiavigatavasena navadhā paccayā honti. Hadayavatthu tesañceva vippayuttassa ca vasena dasadhā paccayo hoti. Aññamaññapaccaye apubbaṃ natthi. Nissayapaccaye cakkhāyatanādīni ārammaṇaārammaṇādhipatinissayaupanissayapurejātaindriyavippayuttaatthiavigatavasena navadhā paccayā honti. Upanissaye apubbaṃ natthi. Purejātapaccaye rūpasaddagandharasāyatanāni ārammaṇaārammaṇādhipatiupanissayapurejātaatthiavigatavasena chadhā paccayā honti. Ettakamevettha apubbaṃ. Pacchājātādīsu apubbaṃ natthi. Āhārapaccaye kabaḷīkārāhāro ārammaṇaārammaṇādhipatiupanissayaāhāraatthiavigatavasena chadhā paccayo hoti. Indriyādīsu apubbaṃ natthi. Evamettha ekadhammassa anekapaccayabhāvatopi viññātabbo vinicchayo.
ஏகபச்சயஸ்ஸ அனேகபச்சயபா⁴வதோதி ஹேதுபச்சயாதீ³ஸு யஸ்ஸ கஸ்ஸசி ஏகஸ்ஸ பச்சயஸ்ஸ யேனாகாரேன யேனத்தே²ன யோ பச்சயுப்பன்னானங் பச்சயோ ஹோதி, தங் ஆகாரங் தங் அத்த²ங் அவிஜஹித்வாவ அஞ்ஞேஹிபி யேஹாகாரேஹி யேஹி அத்தே²ஹி ஸோ தஸ்மிஞ்ஞேவ க²ணே தேஸங் த⁴ம்மானங் அனேகபச்சயபா⁴வங் க³ச்ச²தி, ததோ அனேகபச்சயபா⁴வதோ தஸ்ஸ வினிச்ச²யோ வேதி³தப்³போ³தி அத்தோ². ஸெய்யதி²த³ங் – அமோஹோ ஹேதுபச்சயோ, ஸோ ஹேதுபச்சயத்தங் அவிஜஹந்தோவ அதி⁴பதிஸஹஜாதஅஞ்ஞமஞ்ஞனிஸ்ஸயவிபாகஇந்த்³ரியமக்³க³ஸம்பயுத்தவிப்பயுத்தஅத்தி²அவிக³தானங் வஸேன அபரேஹிபி ஏகாத³ஸஹாகாரேஹி அனேகபச்சயபா⁴வங் க³ச்ச²தி. அலோபா⁴தோ³ஸா ததோ அதி⁴பதிஇந்த்³ரியமக்³க³பச்சயே தயோ அபனெத்வா ஸேஸானங் வஸேன அனேகபச்சயபா⁴வங் க³ச்ச²ந்தி. இத³ங் விபாகஹேதூஸுயேவ லப்³ப⁴தி, குஸலகிரியேஸு பன விபாகபச்சயதா பரிஹாயதி. லோப⁴தோ³ஸமோஹா தே தயோ விபாகஞ்சாதி சத்தாரோ அபனெத்வா ஸேஸானங் வஸேன அனேகபச்சயபா⁴வங் க³ச்ச²ந்தி.
Ekapaccayassa anekapaccayabhāvatoti hetupaccayādīsu yassa kassaci ekassa paccayassa yenākārena yenatthena yo paccayuppannānaṃ paccayo hoti, taṃ ākāraṃ taṃ atthaṃ avijahitvāva aññehipi yehākārehi yehi atthehi so tasmiññeva khaṇe tesaṃ dhammānaṃ anekapaccayabhāvaṃ gacchati, tato anekapaccayabhāvato tassa vinicchayo veditabboti attho. Seyyathidaṃ – amoho hetupaccayo, so hetupaccayattaṃ avijahantova adhipatisahajātaaññamaññanissayavipākaindriyamaggasampayuttavippayuttaatthiavigatānaṃ vasena aparehipi ekādasahākārehi anekapaccayabhāvaṃ gacchati. Alobhādosā tato adhipatiindriyamaggapaccaye tayo apanetvā sesānaṃ vasena anekapaccayabhāvaṃ gacchanti. Idaṃ vipākahetūsuyeva labbhati, kusalakiriyesu pana vipākapaccayatā parihāyati. Lobhadosamohā te tayo vipākañcāti cattāro apanetvā sesānaṃ vasena anekapaccayabhāvaṃ gacchanti.
ஆரம்மணபச்சயோ தங் ஆரம்மணபச்சயத்தங் அவிஜஹந்தங்யேவ ஆரம்மணாதி⁴பதினிஸ்ஸயஉபனிஸ்ஸயபுரேஜாதவிப்பயுத்தஅத்தி²அவிக³தானங் வஸேன அபரேஹிபி ஸத்தஹாகாரேஹி அனேகபச்சயபா⁴வங் க³ச்ச²தி. அயமெத்த² உக்கட்ட²பரிச்சே²தோ³, அரூபத⁴ம்மானங் பன அதீதானாக³தானங் வா ரூபத⁴ம்மானங் ஆரம்மணபச்சயபா⁴வே ஸதி ஆரம்மணாதி⁴பதிஆரம்மணூபனிஸ்ஸயமத்தஞ்ஞேவ உத்தரி லப்³ப⁴தி. அதி⁴பதிபச்சயே வீமங்ஸா அமோஹஸதி³ஸா. ச²ந்தோ³ அதி⁴பதிபச்சயோ அதி⁴பதிபச்சயத்தங் அவிஜஹந்தோவ ஸஹஜாதஅஞ்ஞமஞ்ஞனிஸ்ஸயவிபாகஸம்பயுத்தவிப்பயுத்தஅத்தி²அவிக³தானங் வஸேன அபரேஹிபி அட்ட²ஹாகாரேஹி அனேகபச்சயபா⁴வங் க³ச்ச²தி. வீரியங் தேஸஞ்சேவ இந்த்³ரியமக்³க³பச்சயானஞ்சாதி இமேஸங் வஸேன அபரேஹிபி த³ஸஹாகாரேஹி அனேகபச்சயபா⁴வங் க³ச்ச²தி. சித்தங் ததோ மக்³க³பச்சயங் அபனெத்வா ஆஹாரபச்சயங் பக்கி²பித்வா இமேஸங் வஸேன அதி⁴பதிபச்சயதோ உத்தரி த³ஸஹாகாரேஹி அனேகபச்சயபா⁴வங் க³ச்ச²தி. ஆரம்மணாதி⁴பதினோ பன ஹெட்டா² ஆரம்மணபச்சயே வுத்தனயேனேவ அனேகபச்சயபா⁴வோ வேதி³தப்³போ³.
Ārammaṇapaccayo taṃ ārammaṇapaccayattaṃ avijahantaṃyeva ārammaṇādhipatinissayaupanissayapurejātavippayuttaatthiavigatānaṃ vasena aparehipi sattahākārehi anekapaccayabhāvaṃ gacchati. Ayamettha ukkaṭṭhaparicchedo, arūpadhammānaṃ pana atītānāgatānaṃ vā rūpadhammānaṃ ārammaṇapaccayabhāve sati ārammaṇādhipatiārammaṇūpanissayamattaññeva uttari labbhati. Adhipatipaccaye vīmaṃsā amohasadisā. Chando adhipatipaccayo adhipatipaccayattaṃ avijahantova sahajātaaññamaññanissayavipākasampayuttavippayuttaatthiavigatānaṃ vasena aparehipi aṭṭhahākārehi anekapaccayabhāvaṃ gacchati. Vīriyaṃ tesañceva indriyamaggapaccayānañcāti imesaṃ vasena aparehipi dasahākārehi anekapaccayabhāvaṃ gacchati. Cittaṃ tato maggapaccayaṃ apanetvā āhārapaccayaṃ pakkhipitvā imesaṃ vasena adhipatipaccayato uttari dasahākārehi anekapaccayabhāvaṃ gacchati. Ārammaṇādhipatino pana heṭṭhā ārammaṇapaccaye vuttanayeneva anekapaccayabhāvo veditabbo.
அனந்தரஸமனந்தரபச்சயா அனந்தரஸமனந்தரபச்சயத்தங் அவிஜஹந்தாவ உபனிஸ்ஸயகம்மஆஸேவனநத்தி²விக³தானங் வஸேன அபரேஹிபி பஞ்சஹாகாரேஹி அனேகபச்சயபா⁴வங் க³ச்ச²ந்தி. அரியமக்³க³சேதனாயேவ செத்த² கம்மபச்சயதங் லப⁴தி, ந ஸேஸத⁴ம்மா. ஸஹஜாதபச்சயோ ஸஹஜாதபச்சயத்தங் அவிஜஹந்தோவ ஹேதுஅதி⁴பதிஅஞ்ஞமஞ்ஞனிஸ்ஸயகம்மவிபாகஆஹாரஇந்த்³ரியஜா²னமக்³க³ஸம்பயுத்தவிப்பயுத்தஅத்தி²அவிக³தானங் வஸேன அபரேஹி சுத்³த³ஸஹாகாரேஹி அனேகபச்சயபா⁴வங் க³ச்ச²தி. அயம்பி உக்கட்ட²பரிச்சே²தோ³ வத்து²ஸஹஜாதாதீ³னங் பன வஸேனெத்த² ஹேதுபச்சயாதீ³னங் அபா⁴வோபி வேதி³தப்³போ³. அஞ்ஞமஞ்ஞபச்சயேபி ஏஸேவ நயோ.
Anantarasamanantarapaccayā anantarasamanantarapaccayattaṃ avijahantāva upanissayakammaāsevananatthivigatānaṃ vasena aparehipi pañcahākārehi anekapaccayabhāvaṃ gacchanti. Ariyamaggacetanāyeva cettha kammapaccayataṃ labhati, na sesadhammā. Sahajātapaccayo sahajātapaccayattaṃ avijahantova hetuadhipatiaññamaññanissayakammavipākaāhāraindriyajhānamaggasampayuttavippayuttaatthiavigatānaṃ vasena aparehi cuddasahākārehi anekapaccayabhāvaṃ gacchati. Ayampi ukkaṭṭhaparicchedo vatthusahajātādīnaṃ pana vasenettha hetupaccayādīnaṃ abhāvopi veditabbo. Aññamaññapaccayepi eseva nayo.
நிஸ்ஸயபச்சயோ நிஸ்ஸயபச்சயத்தங் அவிஜஹந்தோவ சதுவீஸதியா பச்சயேஸு அத்தனோ நிஸ்ஸயபச்சயத்தஞ்சேவ அனந்தரஸமனந்தரபச்சா²ஜாதஆஸேவனநத்தி²விக³தபச்சயே ச ச² அபனெத்வா ஸேஸானங் வஸேன அபரேஹிபி ஸத்தரஸஹாகாரேஹி அனேகபச்சயபா⁴வங் க³ச்ச²தி. அயம்பி உக்கட்ட²பரிச்சே²தோ³வ வத்து²னிஸ்ஸயாதீ³னங் பன வஸேனெத்த² ஹேதுபச்சயாதீ³னங் ஆபா⁴வோபி வேதி³தப்³போ³.
Nissayapaccayo nissayapaccayattaṃ avijahantova catuvīsatiyā paccayesu attano nissayapaccayattañceva anantarasamanantarapacchājātaāsevananatthivigatapaccaye ca cha apanetvā sesānaṃ vasena aparehipi sattarasahākārehi anekapaccayabhāvaṃ gacchati. Ayampi ukkaṭṭhaparicchedova vatthunissayādīnaṃ pana vasenettha hetupaccayādīnaṃ ābhāvopi veditabbo.
உபனிஸ்ஸயபச்சயே ஆரம்மணூபனிஸ்ஸயோ ஆரம்மணாதி⁴பதிஸதி³ஸோ. அனந்தரூபனிஸ்ஸயோ அனந்தரூபனிஸ்ஸயபச்சயத்தங் அவிஜஹந்தோவ அனந்தரஸமனந்தரகம்மஆஸேவனநத்தி²விக³தானங் வஸேன அபரேஹிபி ச²ஹாகாரேஹி அனேகபச்சயபா⁴வங் க³ச்ச²தி. அரியமக்³க³சேதனாயேவ செத்த² கம்மபச்சயதங் லப⁴தி, ந ஸேஸத⁴ம்மா. பகதூபனிஸ்ஸயோ பகதூபனிஸ்ஸயோவ. புரேஜாதபச்சயோ அத்தனோ புரேஜாதபச்சயத்தங் அவிஜஹந்தோவ ஆரம்மணஆரம்மணாதி⁴பதினிஸ்ஸயஉபனிஸ்ஸயஇந்த்³ரியவிப்பயுத்தஅத்தி²அவிக³தானங் வஸேன அபரேஹிபி அட்ட²ஹாகாரேஹி அனேகபச்சயபா⁴வங் க³ச்ச²தி. அயம்பி உக்கட்ட²னித்³தே³ஸோவ ஆரம்மணபுரேஜாதே பனெத்த² நிஸ்ஸயஇந்த்³ரியவிப்பயுத்தபச்சயதா ந லப்³ப⁴தி. இதோ உத்தரிபி லப்³ப⁴மானாலப்³ப⁴மானங் வேதி³தப்³ப³ங். பச்சா²ஜாதபச்சயோ அத்தனோ பச்சா²ஜாதபச்சயபா⁴வங் அவிஜஹந்தோவ விப்பயுத்தஅத்தி²அவிக³தானங் வஸேன அபரேஹிபி தீஹாகாரேஹி அனேகபச்சயபா⁴வங் க³ச்ச²தி. ஆஸேவனபச்சயோ ஆஸேவனபச்சயத்தங் அவிஜஹந்தோவ அனந்தரஸமனந்தரஉபனிஸ்ஸயனத்தி²விக³தானங் வஸேன அபரேஹிபி பஞ்சஹாகாரேஹி அனேகபச்சயபா⁴வங் க³ச்ச²தி.
Upanissayapaccaye ārammaṇūpanissayo ārammaṇādhipatisadiso. Anantarūpanissayo anantarūpanissayapaccayattaṃ avijahantova anantarasamanantarakammaāsevananatthivigatānaṃ vasena aparehipi chahākārehi anekapaccayabhāvaṃ gacchati. Ariyamaggacetanāyeva cettha kammapaccayataṃ labhati, na sesadhammā. Pakatūpanissayo pakatūpanissayova. Purejātapaccayo attano purejātapaccayattaṃ avijahantova ārammaṇaārammaṇādhipatinissayaupanissayaindriyavippayuttaatthiavigatānaṃ vasena aparehipi aṭṭhahākārehi anekapaccayabhāvaṃ gacchati. Ayampi ukkaṭṭhaniddesova ārammaṇapurejāte panettha nissayaindriyavippayuttapaccayatā na labbhati. Ito uttaripi labbhamānālabbhamānaṃ veditabbaṃ. Pacchājātapaccayo attano pacchājātapaccayabhāvaṃ avijahantova vippayuttaatthiavigatānaṃ vasena aparehipi tīhākārehi anekapaccayabhāvaṃ gacchati. Āsevanapaccayo āsevanapaccayattaṃ avijahantova anantarasamanantaraupanissayanatthivigatānaṃ vasena aparehipi pañcahākārehi anekapaccayabhāvaṃ gacchati.
கம்மபச்சயோ கம்மபச்சயத்தங் அவிஜஹந்தோவ ஏகக்க²ணிகோ தாவ ஸஹஜாதஅஞ்ஞமஞ்ஞனிஸ்ஸயவிபாகஆஹாரஸம்பயுத்தவிப்பயுத்தஅத்தி²அவிக³தானங் வஸேன அபரேஹிபி நவஹாகாரேஹி அனேகபச்சயபா⁴வங் க³ச்ச²தி. நானாக்க²ணிகோ உபனிஸ்ஸயஅனந்தரஸமனந்தரனத்தி²விக³தானங் வஸேன அபரேஹிபி பஞ்சஹாகாரேஹி அனேகபச்சயபா⁴வங் க³ச்ச²தி. விபாகபச்சயோ விபாகபச்சயத்தங் அவிஜஹந்தோவ ஹேதுஅதி⁴பதிஸஹஜாதஅஞ்ஞமஞ்ஞனிஸ்ஸயகம்மஆஹாரஇந்த்³ரியஜா²னமக்³க³ஸம்பயுத்தவிப்பயுத்தஅத்தி²அவிக³தானங் வஸேன அபரேஹிபி சுத்³த³ஸஹாகாரேஹி அனேகபச்சயபா⁴வங் க³ச்ச²தி. ஆஹாரபச்சயே கப³ளீகாரோ ஆஹாரோ ஆஹாரபச்சயத்தங் அவிஜஹந்தோவ அத்தி²அவிக³தானங் வஸேன அபரேஹிபி த்³வீஹாகாரேஹி அனேகபச்சயபா⁴வங் க³ச்ச²தி. ஸேஸா தயோ ஆஹாரபச்சயத்தங் அவிஜஹந்தாவ யதா²னுரூபங் அதி⁴பதிஸஹஜாதஅஞ்ஞமஞ்ஞனிஸ்ஸயகம்மவிபாகஇந்த்³ரியஸம்பயுத்தவிப்பயுத்தஅத்தி²அவிக³தானங் வஸேன அபரேஹிபி ஏகாத³ஸஹாகாரேஹி அனேகபச்சயபா⁴வங் க³ச்ச²ந்தி.
Kammapaccayo kammapaccayattaṃ avijahantova ekakkhaṇiko tāva sahajātaaññamaññanissayavipākaāhārasampayuttavippayuttaatthiavigatānaṃ vasena aparehipi navahākārehi anekapaccayabhāvaṃ gacchati. Nānākkhaṇiko upanissayaanantarasamanantaranatthivigatānaṃ vasena aparehipi pañcahākārehi anekapaccayabhāvaṃ gacchati. Vipākapaccayo vipākapaccayattaṃ avijahantova hetuadhipatisahajātaaññamaññanissayakammaāhāraindriyajhānamaggasampayuttavippayuttaatthiavigatānaṃ vasena aparehipi cuddasahākārehi anekapaccayabhāvaṃ gacchati. Āhārapaccaye kabaḷīkāro āhāro āhārapaccayattaṃ avijahantova atthiavigatānaṃ vasena aparehipi dvīhākārehi anekapaccayabhāvaṃ gacchati. Sesā tayo āhārapaccayattaṃ avijahantāva yathānurūpaṃ adhipatisahajātaaññamaññanissayakammavipākaindriyasampayuttavippayuttaatthiavigatānaṃ vasena aparehipi ekādasahākārehi anekapaccayabhāvaṃ gacchanti.
இந்த்³ரியபச்சயே ரூபினோ பஞ்சிந்த்³ரியா இந்த்³ரியபச்சயத்தங் அவிஜஹந்தாவ நிஸ்ஸயபுரேஜாதவிப்பயுத்தஅத்தி²அவிக³தானங் வஸேன அபரேஹிபி பஞ்சஹாகாரேஹி அனேகபச்சயபா⁴வங் க³ச்ச²ந்தி. ரூபஜீவிதிந்த்³ரியம்பி இந்த்³ரியபச்சயத்தங் அவிஜஹந்தஞ்ஞேவ அத்தி²அவிக³தானங் வஸேன அபரேஹிபி த்³வீஹாகாரேஹி அனேகபச்சயபா⁴வங் க³ச்ச²தி. அரூபினோ இந்த்³ரியானிபி யதா²னுரூபங் இந்த்³ரியபச்சயத்தங் அவிஜஹந்தானேவ ஹேதுஅதி⁴பதிஸஹஜாதஅஞ்ஞமஞ்ஞனிஸ்ஸயவிபாகஆஹாரஜா²னமக்³க³ஸம்பயுத்தவிப்பயுத்தஅத்தி²அவிக³தானங் வஸேன அபரேஹிபி தேரஸஹாகாரேஹி அனேகபச்சயபா⁴வங் க³ச்ச²ந்தி. ஜா²னபச்சயோ ஜா²னபச்சயத்தங் அவிஜஹந்தோவ யதா²னுரூபங் ஸஹஜாதஅஞ்ஞமஞ்ஞனிஸ்ஸயவிபாகஇந்த்³ரியமக்³க³ஸம்பயுத்தவிப்பயுத்தஅத்தி²அவிக³தானங் வஸேன அபரேஹிபி த³ஸஹாகாரேஹி அனேகபச்சயபா⁴வங் க³ச்ச²தி. மக்³க³பச்சயோ மக்³க³பச்சயத்தங் அவிஜஹந்தோவ யதா²னுரூபங் ஜா²னபச்சயே வுத்தானங் த³ஸன்னங் ஹேதுஅதி⁴பதீனஞ்சாதி இமேஸங் வஸேன அபரேஹிபி த்³வாத³ஸஹாகாரேஹி அனேகபச்சயபா⁴வங் க³ச்ச²தி.
Indriyapaccaye rūpino pañcindriyā indriyapaccayattaṃ avijahantāva nissayapurejātavippayuttaatthiavigatānaṃ vasena aparehipi pañcahākārehi anekapaccayabhāvaṃ gacchanti. Rūpajīvitindriyampi indriyapaccayattaṃ avijahantaññeva atthiavigatānaṃ vasena aparehipi dvīhākārehi anekapaccayabhāvaṃ gacchati. Arūpino indriyānipi yathānurūpaṃ indriyapaccayattaṃ avijahantāneva hetuadhipatisahajātaaññamaññanissayavipākaāhārajhānamaggasampayuttavippayuttaatthiavigatānaṃ vasena aparehipi terasahākārehi anekapaccayabhāvaṃ gacchanti. Jhānapaccayo jhānapaccayattaṃ avijahantova yathānurūpaṃ sahajātaaññamaññanissayavipākaindriyamaggasampayuttavippayuttaatthiavigatānaṃ vasena aparehipi dasahākārehi anekapaccayabhāvaṃ gacchati. Maggapaccayo maggapaccayattaṃ avijahantova yathānurūpaṃ jhānapaccaye vuttānaṃ dasannaṃ hetuadhipatīnañcāti imesaṃ vasena aparehipi dvādasahākārehi anekapaccayabhāvaṃ gacchati.
ஸம்பயுத்தபச்சயோ ஸம்பயுத்தபச்சயத்தங் அவிஜஹந்தோவ யதா²னுரூபங் ஹேதுஅதி⁴பதிஸஹஜாதஅஞ்ஞமஞ்ஞனிஸ்ஸயகம்மவிபாகஆஹாரஇந்த்³ரியஜா²னமக்³க³அத்தி²அவிக³தானங் வஸேன அபரேஹிபி தேரஸஹாகாரேஹி அனேகபச்சயபா⁴வங் க³ச்ச²தி. விப்பயுத்தபச்சயோ விப்பயுத்தபச்சயத்தங் அவிஜஹந்தோவ அனந்தரஸமனந்தரஆஸேவனஸம்பயுத்தனத்தி²விக³தஸங்கா²தே ச² பச்சயே அபனெத்வா ஸேஸானங் வஸேன யதா²னுரூபங் அபரேஹிபி ஸத்தரஸஹாகாரேஹி அனேகபச்சயபா⁴வங் க³ச்ச²தி. தத்த² ரூபஸ்ஸ ச அரூபஸ்ஸ ச பச்சயவிபா⁴கோ³ வேதி³தப்³போ³. அத்தி²பச்சயோ அத்தி²பச்சயத்தங் அவிஜஹந்தோவ அனந்தரஸமனந்தரஆஸேவனநத்தி²விக³தஸங்கா²தே பஞ்ச பச்சயே அபனெத்வா ஸேஸானங் வஸேன யதா²னுரூபங் அபரேஹி அட்டா²ரஸஹாகாரேஹி அனேகபச்சயபா⁴வங் க³ச்ச²தி. நத்தி²பச்சயவிக³தபச்சயா அனந்தரபச்சயஸதி³ஸா . அவிக³தபச்சயோ அத்தி²பச்சயஸதி³ஸோயேவாதி ஏவமெத்த² ஏகபச்சயஸ்ஸ அனேகபச்சயபா⁴வதோபி விஞ்ஞாதப்³போ³ வினிச்ச²யோ.
Sampayuttapaccayo sampayuttapaccayattaṃ avijahantova yathānurūpaṃ hetuadhipatisahajātaaññamaññanissayakammavipākaāhāraindriyajhānamaggaatthiavigatānaṃ vasena aparehipi terasahākārehi anekapaccayabhāvaṃ gacchati. Vippayuttapaccayo vippayuttapaccayattaṃ avijahantova anantarasamanantaraāsevanasampayuttanatthivigatasaṅkhāte cha paccaye apanetvā sesānaṃ vasena yathānurūpaṃ aparehipi sattarasahākārehi anekapaccayabhāvaṃ gacchati. Tattha rūpassa ca arūpassa ca paccayavibhāgo veditabbo. Atthipaccayo atthipaccayattaṃ avijahantova anantarasamanantaraāsevananatthivigatasaṅkhāte pañca paccaye apanetvā sesānaṃ vasena yathānurūpaṃ aparehi aṭṭhārasahākārehi anekapaccayabhāvaṃ gacchati. Natthipaccayavigatapaccayā anantarapaccayasadisā . Avigatapaccayo atthipaccayasadisoyevāti evamettha ekapaccayassa anekapaccayabhāvatopi viññātabbo vinicchayo.
பச்சயஸபா⁴க³தோதி ஏதேஸு ஹி சதுவீஸதியா பச்சயேஸு அனந்தரஸமனந்தரஅனந்தரூபனிஸ்ஸயஆஸேவனநத்தி²விக³தா ஸபா⁴கா³, ததா² ஆரம்மணஆரம்மணாதி⁴பதிஆரம்மணூபனிஸ்ஸயாதி இமினா உபாயேனெத்த² பச்சயஸபா⁴க³தோபி விஞ்ஞாதப்³போ³ வினிச்ச²யோ.
Paccayasabhāgatoti etesu hi catuvīsatiyā paccayesu anantarasamanantaraanantarūpanissayaāsevananatthivigatā sabhāgā, tathā ārammaṇaārammaṇādhipatiārammaṇūpanissayāti iminā upāyenettha paccayasabhāgatopi viññātabbo vinicchayo.
பச்சயவிஸபா⁴க³தோதி புரேஜாதபச்சயோ பனெத்த² பச்சா²ஜாதபச்சயேன விஸபா⁴கோ³, ததா² ஸம்பயுத்தபச்சயோ விப்பயுத்தபச்சயேன, அத்தி²பச்சயோ நத்தி²பச்சயேன, விக³தபச்சயோ அவிக³தபச்சயேனாதி இமினா உபாயேனெத்த² பச்சயவிஸபா⁴க³தோபி விஞ்ஞாதப்³போ³ வினிச்ச²யோ.
Paccayavisabhāgatoti purejātapaccayo panettha pacchājātapaccayena visabhāgo, tathā sampayuttapaccayo vippayuttapaccayena, atthipaccayo natthipaccayena, vigatapaccayo avigatapaccayenāti iminā upāyenettha paccayavisabhāgatopi viññātabbo vinicchayo.
யுக³ளகதோதி ஏதேஸு ச அத்த²ஸரிக்க²தாய, ஸத்³த³ஸரிக்க²தாய, காலபடிபக்க²தாய, ஹேதுப²லதாய, அஞ்ஞமஞ்ஞபடிபக்க²தாயாதி இமேஹி காரணேஹி யுக³ளகதோ விஞ்ஞாதப்³போ³ வினிச்ச²யோ. அனந்தரஸமனந்தரா ஹி அத்த²ஸரிக்க²தாய ஏகங் யுக³ளகங் நாம; நிஸ்ஸயூபனிஸ்ஸயா ஸத்³த³ஸரிக்க²தாய, புரேஜாதபச்சா²ஜாதா காலபடிபக்க²தாய, கம்மபச்சயவிபாகபச்சயா ஹேதுப²லதாய, ஸம்பயுத்தவிப்பயுத்தபச்சயா அஞ்ஞமஞ்ஞபடிபக்க²தாய ஏகங் யுக³ளகங் நாம, ததா² அத்தி²னத்தி²பச்சயா, விக³தாவிக³தபச்சயா சாதி ஏவமெத்த² யுக³ளகதோபி விஞ்ஞாதப்³போ³ வினிச்ச²யோ. ஜனகாஜனகதோதி ஏதேஸு ச அனந்தரஸமனந்தரானந்தரூபனிஸ்ஸயபகதூபனிஸ்ஸயாஸேவனபச்சயா நானாக்க²ணிகோ, கம்மபச்சயோ, நத்தி²விக³தபச்சயாதி இமே பச்சயா ஜனகாயேவ, ந அஜனகா. பச்சா²ஜாதபச்சயோ கேவலங் உபத்த²ம்ப⁴கோயேவ, ந ஜனகோ. ஸேஸா ஜனகா ச அஜனகா ச உபத்த²ம்ப⁴கா சாதி அத்தோ². ஏவமெத்த² ஜனகாஜனகதோபி விஞ்ஞாதப்³போ³ வினிச்ச²யோ.
Yugaḷakatoti etesu ca atthasarikkhatāya, saddasarikkhatāya, kālapaṭipakkhatāya, hetuphalatāya, aññamaññapaṭipakkhatāyāti imehi kāraṇehi yugaḷakato viññātabbo vinicchayo. Anantarasamanantarā hi atthasarikkhatāya ekaṃ yugaḷakaṃ nāma; nissayūpanissayā saddasarikkhatāya, purejātapacchājātā kālapaṭipakkhatāya, kammapaccayavipākapaccayā hetuphalatāya, sampayuttavippayuttapaccayā aññamaññapaṭipakkhatāya ekaṃ yugaḷakaṃ nāma, tathā atthinatthipaccayā, vigatāvigatapaccayā cāti evamettha yugaḷakatopi viññātabbo vinicchayo. Janakājanakatoti etesu ca anantarasamanantarānantarūpanissayapakatūpanissayāsevanapaccayā nānākkhaṇiko, kammapaccayo, natthivigatapaccayāti ime paccayā janakāyeva, na ajanakā. Pacchājātapaccayo kevalaṃ upatthambhakoyeva, na janako. Sesā janakā ca ajanakā ca upatthambhakā cāti attho. Evamettha janakājanakatopi viññātabbo vinicchayo.
ஸப்³ப³ட்டா²னிகாஸப்³ப³ட்டா²னிகதோதி ஏதேஸு ச ஸஹஜாதனிஸ்ஸயஅத்தி²அவிக³தபச்சயா ஸப்³ப³ட்டா²னிகா நாம, ஸப்³பே³ஸங் ஸங்க²தானங் ரூபாரூபத⁴ம்மானங் டா²னபூ⁴தா காரணபூ⁴தாதி அத்தோ². ஏதேஹி வினா உப்பஜ்ஜமானோ ஏகத⁴ம்மோபி நத்தீ²தி. ஆரம்மணஆரம்மணாதி⁴பதிஅனந்தரஸமனந்தரானந்தரூபனிஸ்ஸயபகதூபனிஸ்ஸயாஸேவனஸம்பயுத்தனத்தி²விக³தபச்சயா அஸப்³ப³ட்டா²னிகா நாம. ந ஸப்³பே³ஸங் ரூபாரூபத⁴ம்மானங் டா²னபூ⁴தா, அரூபக்க²ந்தா⁴னஞ்ஞேவ பன டா²னபூ⁴தா காரணபூ⁴தாதி அத்தோ². அரூபத⁴ம்மாயேவ ஹி ஏதேஹி உப்பஜ்ஜந்தி, ந ரூபத⁴ம்மா. புரேஜாதபச்சா²ஜாதாபி அஸப்³ப³ட்டா²னிகா அரூபரூபானஞ்ஞேவ யதா²க்கமேன பச்சயபா⁴வதோ. வுத்தாவஸேஸாபி ஏகச்சானங் ரூபாரூபத⁴ம்மானங் உப்பத்திஹேதுதோ ந ஸப்³ப³ட்டா²னிகாதி ஏவமெத்த² ஸப்³ப³ட்டா²னிகா ஸப்³ப³ட்டா²னிகதோபி விஞ்ஞாதப்³போ³ வினிச்ச²யோ.
Sabbaṭṭhānikāsabbaṭṭhānikatoti etesu ca sahajātanissayaatthiavigatapaccayā sabbaṭṭhānikā nāma, sabbesaṃ saṅkhatānaṃ rūpārūpadhammānaṃ ṭhānabhūtā kāraṇabhūtāti attho. Etehi vinā uppajjamāno ekadhammopi natthīti. Ārammaṇaārammaṇādhipatianantarasamanantarānantarūpanissayapakatūpanissayāsevanasampayuttanatthivigatapaccayā asabbaṭṭhānikā nāma. Na sabbesaṃ rūpārūpadhammānaṃ ṭhānabhūtā, arūpakkhandhānaññeva pana ṭhānabhūtā kāraṇabhūtāti attho. Arūpadhammāyeva hi etehi uppajjanti, na rūpadhammā. Purejātapacchājātāpi asabbaṭṭhānikā arūparūpānaññeva yathākkamena paccayabhāvato. Vuttāvasesāpi ekaccānaṃ rūpārūpadhammānaṃ uppattihetuto na sabbaṭṭhānikāti evamettha sabbaṭṭhānikā sabbaṭṭhānikatopi viññātabbo vinicchayo.
ரூபங் ரூபஸ்ஸாதிஆதி³விகப்பதோதி ஏதேஸு ச சதுவீஸதியா பச்சயேஸு ஏகபச்சயோபி ஏகந்தேன ரூபமேவ ஹுத்வா ரூபஸ்ஸேவ பச்சயோ நாம நத்தி², ஏகந்தேன பன ரூபங் ஹுத்வா அரூபஸ்ஸேவ பச்சயோ நாம அத்தி². கதரோ பனேஸோதி? புரேஜாதபச்சயோ. புரேஜாதபச்சயோ ஹி ஏகந்தேன ரூபமேவ ஹுத்வா அரூபஸ்ஸேவ பச்சயோ ஹோதி. ஏகந்தேன ரூபமேவ ஹுத்வா ரூபாரூபஸ்ஸேவ பச்சயோ நாமாதிபி நத்தி², ஏகந்தேன பன அரூபங் ஹுத்வா அரூபஸ்ஸேவ பச்சயோ நாம அத்தி². கதரோ பனேஸோதி? அனந்தரஸமனந்தரஆஸேவனஸம்பயுத்தனத்தி²விக³தவஸேன ச²ப்³பி³தோ⁴. ஸோ ஹி ஸப்³போ³பி ஏகந்தேன அரூபமேவ ஹுத்வா அரூபஸ்ஸேவ பச்சயோ ஹோதி. ஏகந்தேன அரூபமேவ ஹுத்வாபி ஏகந்தேன ரூபஸ்ஸேவ பச்சயோ நாமாதிபி அத்தி². கதரோ பனேஸோதி? பச்சா²ஜாதபச்சயோ. ஸோ ஹி ஏகந்தேன அரூபங் ஹுத்வா ரூபஸ்ஸேவ பச்சயோ ஹோதி; ஏகந்தேன பன அரூபத⁴ம்மோவ ஹுத்வா ரூபாரூபானங் பச்சயோபி அத்தி². கதரோ பனேஸோதி? ஹேதுகம்மவிபாகஜா²னமக்³க³வஸேன பஞ்சவிதோ⁴. ஸோ ஹி ஸப்³போ³பி ஏகந்தேன அரூபமேவ ஹுத்வா ரூபத⁴ம்மானங் அரூபத⁴ம்மானம்பி பச்சயோ ஹோதி. ஏகந்தேன பன ரூபாரூபமேவ ஹுத்வா ரூபஸ்ஸேவ பச்சயோ நாமாதிபி நத்தி², அரூபஸ்ஸேவ பன ஹோதி. கதரோ பனேஸோதி? ஆரம்மணபச்சயோ சேவ உபனிஸ்ஸயபச்சயோ ச. இத³ஞ்ஹி த்³வயங் ஏகந்தேன ரூபாரூபமேவ ஹுத்வா அரூபஸ்ஸேவ பச்சயோ ஹோதி. ஏகந்தேன ரூபாரூபமேவ ஹுத்வா பன ரூபாரூபஸ்ஸேவ பச்சயோ நாமாதிபி அத்தி². கதரோ பனேஸோதி? அதி⁴பதிஸஹஜாதஅஞ்ஞமஞ்ஞனிஸ்ஸயஆஹாரஇந்த்³ரியவிப்பயுத்தஅத்தி²அவிக³தவஸேன நவவிதோ⁴. ஸோ ஹி ஸப்³போ³பி ஏகந்தேன ரூபாரூபமேவ ஹுத்வா ரூபாரூபஸ்ஸேவ பச்சயோ ஹோதீதி ஏவமெத்த² ரூபங் ரூபஸ்ஸாதிஆதி³விகப்பதோபி விஞ்ஞாதப்³போ³ வினிச்ச²யோ.
Rūpaṃ rūpassātiādivikappatoti etesu ca catuvīsatiyā paccayesu ekapaccayopi ekantena rūpameva hutvā rūpasseva paccayo nāma natthi, ekantena pana rūpaṃ hutvā arūpasseva paccayo nāma atthi. Kataro panesoti? Purejātapaccayo. Purejātapaccayo hi ekantena rūpameva hutvā arūpasseva paccayo hoti. Ekantena rūpameva hutvā rūpārūpasseva paccayo nāmātipi natthi, ekantena pana arūpaṃ hutvā arūpasseva paccayo nāma atthi. Kataro panesoti? Anantarasamanantaraāsevanasampayuttanatthivigatavasena chabbidho. So hi sabbopi ekantena arūpameva hutvā arūpasseva paccayo hoti. Ekantena arūpameva hutvāpi ekantena rūpasseva paccayo nāmātipi atthi. Kataro panesoti? Pacchājātapaccayo. So hi ekantena arūpaṃ hutvā rūpasseva paccayo hoti; ekantena pana arūpadhammova hutvā rūpārūpānaṃ paccayopi atthi. Kataro panesoti? Hetukammavipākajhānamaggavasena pañcavidho. So hi sabbopi ekantena arūpameva hutvā rūpadhammānaṃ arūpadhammānampi paccayo hoti. Ekantena pana rūpārūpameva hutvā rūpasseva paccayo nāmātipi natthi, arūpasseva pana hoti. Kataro panesoti? Ārammaṇapaccayo ceva upanissayapaccayo ca. Idañhi dvayaṃ ekantena rūpārūpameva hutvā arūpasseva paccayo hoti. Ekantena rūpārūpameva hutvā pana rūpārūpasseva paccayo nāmātipi atthi. Kataro panesoti? Adhipatisahajātaaññamaññanissayaāhāraindriyavippayuttaatthiavigatavasena navavidho. So hi sabbopi ekantena rūpārūpameva hutvā rūpārūpasseva paccayo hotīti evamettha rūpaṃ rūpassātiādivikappatopi viññātabbo vinicchayo.
ப⁴வபே⁴த³தோதி இமேஸு பன சதுவீஸதியா பச்சயேஸு பஞ்சவோகாரப⁴வே தாவ ந கோசி பச்சயோ ந லப்³ப⁴தி நாம. சதுவோகாரப⁴வே பன தயோ புரேஜாதபச்சா²ஜாதவிப்பயுத்தபச்சயே அபனெத்வா ஸேஸா ஏகவீஸதிமேவ லப்³ப⁴ந்தி. ஏகவோகாரப⁴வே ஸஹஜாதஅஞ்ஞமஞ்ஞனிஸ்ஸயகம்மஇந்த்³ரியஅத்தி²அவிக³தவஸேன ஸத்தேவ லப்³ப⁴ந்தி. பா³ஹிரே பன அனிந்த்³ரியப³த்³த⁴ரூபே ஸஹஜாதஅஞ்ஞமஞ்ஞனிஸ்ஸயஅத்தி²அவிக³தவஸேன பஞ்சேவ லப்³ப⁴ந்தீதி ஏவமெத்த² ப⁴வபே⁴த³தோபி விஞ்ஞாதப்³போ³ வினிச்ச²யோதி.
Bhavabhedatoti imesu pana catuvīsatiyā paccayesu pañcavokārabhave tāva na koci paccayo na labbhati nāma. Catuvokārabhave pana tayo purejātapacchājātavippayuttapaccaye apanetvā sesā ekavīsatimeva labbhanti. Ekavokārabhave sahajātaaññamaññanissayakammaindriyaatthiavigatavasena satteva labbhanti. Bāhire pana anindriyabaddharūpe sahajātaaññamaññanissayaatthiavigatavasena pañceva labbhantīti evamettha bhavabhedatopi viññātabbo vinicchayoti.
பச்சயனித்³தே³ஸவாரவண்ணனா நிட்டி²தா.
Paccayaniddesavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / (2) பச்சயனித்³தே³ஸோ • (2) Paccayaniddeso
