| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
3. பச்சயவாரவண்ணனா
3. Paccayavāravaṇṇanā
243. பச்சயவாரே குஸலங் த⁴ம்மங் பச்சயாதி குஸலத⁴ம்மே பதிட்டி²தோ ஹுத்வா குஸலங் த⁴ம்மங் நிஸ்ஸயட்டே²ன பச்சயங் கத்வாதி அத்தோ². குஸலங் ஏகங் க²ந்த⁴ங் பச்சயாதி குஸலங் ஏகங் க²ந்த⁴ங் நிஸ்ஸயபச்சயங் கத்வா தயோ க²ந்தா⁴ உப்பஜ்ஜந்தி ஹேதுபச்சயாதி வுத்தங் ஹோதி. இமினாவுபாயேன ஸப்³ப³பதே³ஸு அத்தோ² வேதி³தப்³போ³. வத்து²ங் பச்சயா விபாகாப்³யாகதா கிரியாப்³யாகதா க²ந்தா⁴தி இத³ங் பஞ்சவோகாரே பவத்திவஸேன வுத்தங். பஞ்சவோகாரே பவத்தியஞ்ஹி க²ந்தா⁴னங் புரேஜாதங் வத்து² நிஸ்ஸயபச்சயோ ஹோதி. படிச்சட்ட²ஸ்ஸ பன ஸஹஜாதட்ட²த்தா படிச்சவாரே ஏஸ நயோ ந லப்³ப⁴தீதி படிஸந்தி⁴யங் ஸஹஜாதமேவ வத்து²ங் ஸந்தா⁴ய ‘‘வத்து²ங் படிச்ச க²ந்தா⁴’’தி வுத்தங். குஸலங் ஏகங் க²ந்த⁴ஞ்ச வத்து²ஞ்ச பச்சயா தயோ க²ந்தா⁴திஆதீ³ஸுபி இமினாவ நயேன அத்தோ² வேதி³தப்³போ³.
243. Paccayavāre kusalaṃ dhammaṃ paccayāti kusaladhamme patiṭṭhito hutvā kusalaṃ dhammaṃ nissayaṭṭhena paccayaṃ katvāti attho. Kusalaṃ ekaṃ khandhaṃ paccayāti kusalaṃ ekaṃ khandhaṃ nissayapaccayaṃ katvā tayo khandhā uppajjanti hetupaccayāti vuttaṃ hoti. Imināvupāyena sabbapadesu attho veditabbo. Vatthuṃ paccayā vipākābyākatā kiriyābyākatā khandhāti idaṃ pañcavokāre pavattivasena vuttaṃ. Pañcavokāre pavattiyañhi khandhānaṃ purejātaṃ vatthu nissayapaccayo hoti. Paṭiccaṭṭhassa pana sahajātaṭṭhattā paṭiccavāre esa nayo na labbhatīti paṭisandhiyaṃ sahajātameva vatthuṃ sandhāya ‘‘vatthuṃ paṭicca khandhā’’ti vuttaṃ. Kusalaṃ ekaṃ khandhañca vatthuñca paccayā tayo khandhātiādīsupi imināva nayena attho veditabbo.
அப்³யாகதங் த⁴ம்மங் பச்சயா குஸலோ ச அப்³யாகதோ சாதி குஸலாப்³யாகதானங் ஹேதுபச்சயவஸேன ஏகதோ உப்பத்திங் ஸந்தா⁴ய வுத்தங். குஸலுப்பத்திக்க²ணஸ்மிஞ்ஹி வத்து²ங் நிஸ்ஸாய குஸலா க²ந்தா⁴, சித்தஸமுட்டா²னே ச மஹாபூ⁴தே நிஸ்ஸாய சித்தஸமுட்டா²னங் உபாதா³ரூபங் ஹேதுபச்சயவஸேன ஏகதோ உப்பஜ்ஜதி. இதி பச்சயபூ⁴தஸ்ஸ அப்³யாகதஸ்ஸ நானத்தேபி பச்சயுப்பன்னானங் ஹேதுபச்சயவஸேன ஏகதோ உப்பத்திங் ஸந்தா⁴யேதங் வுத்தந்தி வேதி³தப்³ப³ங். அஞ்ஞேஸுபி ஏவரூபேஸு டா²னேஸு ஏஸேவ நயோ. ஏவங் இமஸ்மிங் ஹேதுபச்சயே ஸஹஜாதஞ்ச புரேஜாதஞ்ச நிஸ்ஸயட்டே²ன பச்சயங் கத்வா ஸத்தரஸ பஞ்ஹா விஸ்ஸஜ்ஜிதா. தத்த² க²ந்தா⁴ சேவ பூ⁴தா ச ஸஹஜாதவஸேன, வத்து² ஸஹஜாதபுரேஜாதவஸேன க³ஹிதங். படிச்சவாரே பன ஸஹஜாதவஸேன பச்சயோ லப்³ப⁴தி, தஸ்மா தத்த² நவேவ பஞ்ஹா விஸ்ஸஜ்ஜிதா. யே பனேதே எத்த² ஸத்தரஸ பஞ்ஹா விஸ்ஸஜ்ஜிதா, தேஸு ஏகாதி³கே ஏகாவஸானே விஸ்ஸஜ்ஜனே குஸலாதீ³ஸு ஏகபச்சயதோ ஏகோ பச்சயுப்பன்னோ. ஏகாதி³கே து³காவஸானே ஏகபச்சயதோ நானாபச்சயுப்பன்னோ. து³காதி³கே ஏகாவஸானே நானாபச்சயதோ ஏகோ பச்சயுப்பன்னோ. து³காதி³கே து³காவஸானே நானாபச்சயதோ நானாபச்சயுப்பன்னோ.
Abyākataṃdhammaṃ paccayā kusalo ca abyākato cāti kusalābyākatānaṃ hetupaccayavasena ekato uppattiṃ sandhāya vuttaṃ. Kusaluppattikkhaṇasmiñhi vatthuṃ nissāya kusalā khandhā, cittasamuṭṭhāne ca mahābhūte nissāya cittasamuṭṭhānaṃ upādārūpaṃ hetupaccayavasena ekato uppajjati. Iti paccayabhūtassa abyākatassa nānattepi paccayuppannānaṃ hetupaccayavasena ekato uppattiṃ sandhāyetaṃ vuttanti veditabbaṃ. Aññesupi evarūpesu ṭhānesu eseva nayo. Evaṃ imasmiṃ hetupaccaye sahajātañca purejātañca nissayaṭṭhena paccayaṃ katvā sattarasa pañhā vissajjitā. Tattha khandhā ceva bhūtā ca sahajātavasena, vatthu sahajātapurejātavasena gahitaṃ. Paṭiccavāre pana sahajātavasena paccayo labbhati, tasmā tattha naveva pañhā vissajjitā. Ye panete ettha sattarasa pañhā vissajjitā, tesu ekādike ekāvasāne vissajjane kusalādīsu ekapaccayato eko paccayuppanno. Ekādike dukāvasāne ekapaccayato nānāpaccayuppanno. Dukādike ekāvasāne nānāpaccayato eko paccayuppanno. Dukādike dukāvasāne nānāpaccayato nānāpaccayuppanno.
248-252. ஆரம்மணபச்சயாதீ³ஸுபி இமினாவுபாயேன பஞ்ஹாவிஸ்ஸஜ்ஜனப்பபே⁴தோ³ வேதி³தப்³போ³. யங் பனேதங் ஆரம்மணபச்சயே வத்து²ங் பச்சயா க²ந்தா⁴தி வுத்தங், தங் படிஸந்தி⁴க்க²ணே விபாகக்க²ந்தே⁴யேவ ஸந்தா⁴ய வுத்தங். சக்கு²விஞ்ஞாணாதீ³னி அப்³யாகதங் நிஸ்ஸாய ஆரம்மணபச்சயேன உப்பஜ்ஜந்தானங் பபே⁴த³த³ஸ்ஸனத்த²ங் வுத்தானி. புன வத்து²ங் பச்சயாதி பவத்தே விபாககிரியாப்³யாகதானங் உப்பத்தித³ஸ்ஸனத்த²ங் வுத்தங். ஸேஸங் புரிமனயேனேவ வேதி³தப்³ப³ங். ஏவங் இமஸ்மிங் ஆரம்மணபச்சயே ஸஹஜாதஞ்ச புரேஜாதஞ்ச பச்சயங் கத்வா ஸத்த பஞ்ஹா விஸ்ஸஜ்ஜிதா. தத்த² க²ந்தா⁴ ஸஹஜாதவஸேன, வத்து² ஸஹஜாதபுரேஜாதவஸேன, சக்கா²யதனாதீ³னி புரேஜாதவஸேனேவ க³ஹிதானி. படிச்சவாரே பன ஸஹஜாதவஸேனேவ பச்சயோ லப்³ப⁴தி. தஸ்மா தத்த² தயோவ பஞ்ஹா விஸ்ஸஜ்ஜிதா.
248-252. Ārammaṇapaccayādīsupi imināvupāyena pañhāvissajjanappabhedo veditabbo. Yaṃ panetaṃ ārammaṇapaccaye vatthuṃ paccayā khandhāti vuttaṃ, taṃ paṭisandhikkhaṇe vipākakkhandheyeva sandhāya vuttaṃ. Cakkhuviññāṇādīni abyākataṃ nissāya ārammaṇapaccayena uppajjantānaṃ pabhedadassanatthaṃ vuttāni. Puna vatthuṃ paccayāti pavatte vipākakiriyābyākatānaṃ uppattidassanatthaṃ vuttaṃ. Sesaṃ purimanayeneva veditabbaṃ. Evaṃ imasmiṃ ārammaṇapaccaye sahajātañca purejātañca paccayaṃ katvā satta pañhā vissajjitā. Tattha khandhā sahajātavasena, vatthu sahajātapurejātavasena, cakkhāyatanādīni purejātavaseneva gahitāni. Paṭiccavāre pana sahajātavaseneva paccayo labbhati. Tasmā tattha tayova pañhā vissajjitā.
253-254. அதி⁴பதிபச்சயே விபாகாப்³யாகதங் லோகுத்தரமேவ வேதி³தப்³ப³ங். அனந்தரஸமனந்தரா ரூபாபா⁴வேன ஆரம்மணஸதி³ஸா. பரதோ ஆஸேவனநத்தி²விக³தேஸுபி ஏஸேவ நயோ.
253-254. Adhipatipaccaye vipākābyākataṃ lokuttarameva veditabbaṃ. Anantarasamanantarā rūpābhāvena ārammaṇasadisā. Parato āsevananatthivigatesupi eseva nayo.
255. ஸஹஜாதபச்சயே கடத்தாரூபங் உபாதா³ரூபந்தி உபாதா³ரூபஸங்கா²தங் கடத்தாரூபங். இத³ங் அஸஞ்ஞஸத்தானஞ்ஞேவ ரூபங் ஸந்தா⁴ய வுத்தங். சக்கா²யதனாதீ³னி பஞ்சவோகாரவஸேன வுத்தானி.
255. Sahajātapaccaye kaṭattārūpaṃ upādārūpanti upādārūpasaṅkhātaṃ kaṭattārūpaṃ. Idaṃ asaññasattānaññeva rūpaṃ sandhāya vuttaṃ. Cakkhāyatanādīni pañcavokāravasena vuttāni.
256-257. அஞ்ஞமஞ்ஞபச்சயே ச யதா² ஆரம்மணபச்சயா ஏவந்தி விஸ்ஸஜ்ஜனஸமதங் ஸந்தா⁴ய வுத்தங். பச்சயுப்பன்னேஸு பன நானத்தங் அத்தி².
256-257. Aññamaññapaccaye ca yathā ārammaṇapaccayā evanti vissajjanasamataṃ sandhāya vuttaṃ. Paccayuppannesu pana nānattaṃ atthi.
258. உபனிஸ்ஸயபச்சயே ஆரம்மணபச்சயஸதி³ஸந்தி ரூபாபா⁴வதோபி விஸ்ஸஜ்ஜனஸமதாயபி வுத்தங்.
258. Upanissayapaccaye ārammaṇapaccayasadisanti rūpābhāvatopi vissajjanasamatāyapi vuttaṃ.
259-260. வத்து²ங் புரேஜாதபச்சயாதிஆதீ³னங் படிச்சவாரே வுத்தனயேனேவத்தோ² க³ஹேதப்³போ³.
259-260. Vatthuṃ purejātapaccayātiādīnaṃ paṭiccavāre vuttanayenevattho gahetabbo.
261-266. கம்மபச்சயே தீணீதி குஸலங் பச்சயா குஸலோ அப்³யாகதோ குஸலாப்³யாகதோ சாதி ஏவங் தீணி வேதி³தப்³பா³னி. அகுஸலேபி ஏஸேவ நயோ.
261-266. Kammapaccaye tīṇīti kusalaṃ paccayā kusalo abyākato kusalābyākato cāti evaṃ tīṇi veditabbāni. Akusalepi eseva nayo.
267-268. விப்பயுத்தபச்சயே க²ந்தே⁴ விப்பயுத்தபச்சயாதி க²ந்தே⁴ நிஸ்ஸாய விப்பயுத்தபச்சயா உப்பஜ்ஜந்தீதி அத்தோ². க²ந்தா⁴ வத்து²ங் விப்பயுத்தபச்சயாதி க²ந்தா⁴ வத்து²ங் நிஸ்ஸாய விப்பயுத்தபச்சயா உப்பஜ்ஜந்தீதி அத்தோ². ஸேஸங் ஹெட்டா² வுத்தனயேனேவ வேதி³தப்³ப³ங்.
267-268. Vippayuttapaccaye khandhe vippayuttapaccayāti khandhe nissāya vippayuttapaccayā uppajjantīti attho. Khandhā vatthuṃ vippayuttapaccayāti khandhā vatthuṃ nissāya vippayuttapaccayā uppajjantīti attho. Sesaṃ heṭṭhā vuttanayeneva veditabbaṃ.
269-276. இதா³னி யதா²லத்³தா⁴னி விஸ்ஸஜ்ஜனானி க³ணனவஸேன த³ஸ்ஸேதுங் ஹேதுயா ஸத்தரஸாதிஆதி³மாஹ. தத்த² ஹேதுயா ஸத்தரஸாதி குஸலேன குஸலங், குஸலேன அப்³யாகதங், குஸலேன குஸலாப்³யாகதந்தி ஏவங் குஸலவஸேன ஏகாதி³கானி ஏகாவஸானானி த்³வே, து³காவஸானங் ஏகந்தி தீணி வுத்தானி ஹொந்தி, ததா² அகுஸலவஸேன. அப்³யாகதேன அப்³யாகதங், தேனேவ குஸலங், அகுஸலங், குஸலாப்³யாகதங் அகுஸலாப்³யாகதஞ்ச; குஸலாப்³யாகதேஹி குஸலங், அப்³யாகதங், குஸலாப்³யாகதங்; அகுஸலாப்³யாகதேஹி அகுஸலங், அப்³யாகதங், அகுஸலாப்³யாகதந்தி ஏவங் ஸத்தரஸ வேதி³தப்³பா³னி.
269-276. Idāni yathāladdhāni vissajjanāni gaṇanavasena dassetuṃ hetuyā sattarasātiādimāha. Tattha hetuyā sattarasāti kusalena kusalaṃ, kusalena abyākataṃ, kusalena kusalābyākatanti evaṃ kusalavasena ekādikāni ekāvasānāni dve, dukāvasānaṃ ekanti tīṇi vuttāni honti, tathā akusalavasena. Abyākatena abyākataṃ, teneva kusalaṃ, akusalaṃ, kusalābyākataṃ akusalābyākatañca; kusalābyākatehi kusalaṃ, abyākataṃ, kusalābyākataṃ; akusalābyākatehi akusalaṃ, abyākataṃ, akusalābyākatanti evaṃ sattarasa veditabbāni.
ஆரம்மணே ஸத்தாதி குஸலேன குஸலங்; அகுஸலேன அகுஸலங், அப்³யாகதேன அப்³யாகதங், குஸலங், அகுஸலங்; குஸலாப்³யாகதேன குஸலங்; அகுஸலாப்³யாகதேன அகுஸலந்தி ஏவங் ஸத்த.
Ārammaṇesattāti kusalena kusalaṃ; akusalena akusalaṃ, abyākatena abyākataṃ, kusalaṃ, akusalaṃ; kusalābyākatena kusalaṃ; akusalābyākatena akusalanti evaṃ satta.
விபாகே ஏகந்தி அப்³யாகதேன அப்³யாகதமேவ. ஏவமெத்த² ஸத்தரஸ, ஸத்த, ஏகந்தி தயோ வாரபரிச்சே²தா³ ஹொந்தி. தேஸு த்³வாத³ஸ ஸத்தரஸகா, த³ஸ ஸத்தகா, ஏகங் ஏககந்தி தே ஸப்³பே³ ஸாது⁴கங் ஸல்லக்கெ²த்வா பரதோ து³கதிகாதி³வஸேன பச்சயஸங்ஸந்த³னே ஊனதரக³ணனஸ்ஸ வஸேன க³ணனா வேதி³தப்³பா³. ஸக்கா ஹி இமாய க³ணனாய து³கமூலாதீ³ஸு வாரபரிச்சே²தே³ ஜானிதுந்தி புன ‘‘குஸலங் த⁴ம்மங் பச்சயா குஸலோ த⁴ம்மோ’’தி அனாமஸித்வா க³ணனவஸேனேவ வாரபரிச்சே²த³ங் த³ஸ்ஸேதுங் ஹேதுபச்சயா ஆரம்மணே ஸத்தாதிஆதி³ ஆரத்³த⁴ங்.
Vipākeekanti abyākatena abyākatameva. Evamettha sattarasa, satta, ekanti tayo vāraparicchedā honti. Tesu dvādasa sattarasakā, dasa sattakā, ekaṃ ekakanti te sabbe sādhukaṃ sallakkhetvā parato dukatikādivasena paccayasaṃsandane ūnataragaṇanassa vasena gaṇanā veditabbā. Sakkā hi imāya gaṇanāya dukamūlādīsu vāraparicchede jānitunti puna ‘‘kusalaṃ dhammaṃ paccayā kusalo dhammo’’ti anāmasitvā gaṇanavaseneva vāraparicchedaṃ dassetuṃ hetupaccayā ārammaṇe sattātiādi āraddhaṃ.
தத்த² குஸலங் த⁴ம்மங் பச்சயா குஸலோ த⁴ம்மோ உப்பஜ்ஜதி ஹேதுபச்சயா ஆரம்மணபச்சயா. குஸலங் ஏகங் க²ந்த⁴ங் பச்சயா தயோ க²ந்தா⁴தி இமினா நயேன ஆரம்மணே லத்³த⁴விஸ்ஸஜ்ஜனானி வித்தா²ரேதப்³பா³னி. அயங் தாவ அனுலோமே நயோ.
Tattha kusalaṃ dhammaṃ paccayā kusalo dhammo uppajjati hetupaccayā ārammaṇapaccayā. Kusalaṃ ekaṃ khandhaṃ paccayā tayo khandhāti iminā nayena ārammaṇe laddhavissajjanāni vitthāretabbāni. Ayaṃ tāva anulome nayo.
277-285. பச்சனீயே பன குஸலங் ந லப்³ப⁴தீதி அகுஸலங் த⁴ம்மங் பச்சயாதி அகுஸலமேவ ஆதி³ங் கத்வா விஸ்ஸஜ்ஜனங் ஆரத்³த⁴ங். தங் யதா²பாளிமேவ நிய்யாதி. யஞ்ஹெத்த² வத்தப்³ப³ங் ஸியா, தங் படிச்சவாரஸ்ஸ பச்சனீயே வுத்தமேவ.
277-285. Paccanīye pana kusalaṃ na labbhatīti akusalaṃ dhammaṃ paccayāti akusalameva ādiṃ katvā vissajjanaṃ āraddhaṃ. Taṃ yathāpāḷimeva niyyāti. Yañhettha vattabbaṃ siyā, taṃ paṭiccavārassa paccanīye vuttameva.
286-287. யங் பனேதங் பச்சனீயே லத்³த⁴விஸ்ஸஜ்ஜனபரிச்சே²த³ங் க³ணனதோ த³ஸ்ஸேதுங் நஹேதுயா சத்தாரீதிஆதி³ வுத்தங், தத்த² சத்தாரி, ஸத்தரஸ, ஸத்த, பஞ்ச, தீணி, ஏகந்தி ச² பரிச்சே²தா³. தேஸங் வஸேன து³கதிகாதீ³ஸு பச்சயஸங்ஸந்த³னே க³ணனா வேதி³தப்³பா³. யோ ஹி பச்சயோ ஸத்தரஸ விஸ்ஸஜ்ஜனானி லப⁴தி, தேன ஸத்³தி⁴ங் ஸதி³ஸஸங்ஸந்த³னே ஸத்தரஸ, ஊனதரஸங்ஸந்த³னே ஸேஸா ச²பி பரிச்சே²தா³ லப்³ப⁴ந்தி. ஏவங் ஸேஸேஸுபி அதி⁴கபரிச்சே²த³ங் ட²பெத்வா ஸமஸமா ஊனதரா ச லப்³ப⁴ந்தீதி.
286-287. Yaṃ panetaṃ paccanīye laddhavissajjanaparicchedaṃ gaṇanato dassetuṃ nahetuyā cattārītiādi vuttaṃ, tattha cattāri, sattarasa, satta, pañca, tīṇi, ekanti cha paricchedā. Tesaṃ vasena dukatikādīsu paccayasaṃsandane gaṇanā veditabbā. Yo hi paccayo sattarasa vissajjanāni labhati, tena saddhiṃ sadisasaṃsandane sattarasa, ūnatarasaṃsandane sesā chapi paricchedā labbhanti. Evaṃ sesesupi adhikaparicchedaṃ ṭhapetvā samasamā ūnatarā ca labbhantīti.
எத்த² ச அதி⁴கதரா ந லப்³ப⁴ந்தீதி அயமெத்த² நியமோ. ஸமஸமா பன ஊனதரா ச அத்தா² விரோதே⁴ ஸதி லப்³ப⁴ந்தி. தேனெத்த² ‘‘நஹேதுபச்சயா நாரம்மணே ஏக’’ந்திஆதி³ வுத்தங். எத்த² ஹி நஹேதுயா சதுன்னங், நாரம்மணே பஞ்சன்னங் ஆக³தத்தா நஹேதுவஸேன சத்தாரீதி வத்தப்³ப³ங் ஸியா, நாரம்மணேன ஸத்³தி⁴ங் க⁴டிதத்தா பன ஆரம்மணத⁴ம்மோ விருஜ்ஜ²தீதி அகுஸலங் த⁴ம்மங் பச்சயா அகுஸலோ த⁴ம்மோ, அப்³யாகதங் த⁴ம்மங் பச்சயா அகுஸலோ, அகுஸலஞ்ச அப்³யாகதஞ்ச த⁴ம்மங் பச்சயா அகுஸலோதி தீணி விஸ்ஸஜ்ஜனானி பரிஹீனானி. அப்³யாகதங் த⁴ம்மங் பச்சயா அப்³யாகதோதி ரூபவஸேன ஏகமேவ வுத்தங். ஏவங் ஸப்³ப³த்த² விருத்³தா⁴விருத்³த⁴ங் ஞத்வா லப்³ப⁴மானபரிச்சே²தோ³ வேதி³தப்³போ³. அபிசெத்த² இத³ங் நயமத்தத³ஸ்ஸனங். நாதி⁴பதியா சத்தாரீதி நஹேதுயா லத்³தா⁴னேவ. ஸேஸசதுக்கேஸுபி ஏஸேவ நயோ.
Ettha ca adhikatarā na labbhantīti ayamettha niyamo. Samasamā pana ūnatarā ca atthā virodhe sati labbhanti. Tenettha ‘‘nahetupaccayā nārammaṇe eka’’ntiādi vuttaṃ. Ettha hi nahetuyā catunnaṃ, nārammaṇe pañcannaṃ āgatattā nahetuvasena cattārīti vattabbaṃ siyā, nārammaṇena saddhiṃ ghaṭitattā pana ārammaṇadhammo virujjhatīti akusalaṃ dhammaṃ paccayā akusalo dhammo, abyākataṃ dhammaṃ paccayā akusalo, akusalañca abyākatañca dhammaṃ paccayā akusaloti tīṇi vissajjanāni parihīnāni. Abyākataṃ dhammaṃ paccayā abyākatoti rūpavasena ekameva vuttaṃ. Evaṃ sabbattha viruddhāviruddhaṃ ñatvā labbhamānaparicchedo veditabbo. Apicettha idaṃ nayamattadassanaṃ. Nādhipatiyā cattārīti nahetuyā laddhāneva. Sesacatukkesupi eseva nayo.
நானந்தரே ஏகந்தி அஹேதுகசித்தஸமுட்டா²னஸ்ஸ சேவ ஸேஸரூபஸ்ஸ ச வஸேன அப்³யாகதேன அப்³யாகதங். ஏவங் ஸப்³பே³ஸு ஏககேஸு யுஜ்ஜமானகரூபங் ஜானிதப்³ப³ங். நபுரேஜாதே த்³வேதி இதா⁴பி நஹேதுவஸேன சத்தாரீதி வத்தப்³ப³ங் ஸியா, நபுரேஜாதேன ஸத்³தி⁴ங் க⁴டிதத்தா பன அப்³யாகதங் த⁴ம்மங் பச்சயா அகுஸலோ, அகுஸலஞ்ச அப்³யாகதஞ்ச த⁴ம்மங் பச்சயா அகுஸலோதி வத்து²புரேஜாதவஸேன த்³வே விஸ்ஸஜ்ஜனானி பரிஹீனானி. ஆருப்பே பன அஹேதுகமோஹஸ்ஸ அஹேதுககிரியஸ்ஸ ச வஸேன த்³வே வுத்தானி. நவிப்பயுத்தே த்³வேதி ஆருப்பே அஹேதுகாகுஸலகிரியவஸேன த்³வே. நோனத்தி² நோவிக³தேஸு ஏகந்தி ஸப்³ப³ஸ்ஸ ரூபஸ்ஸ வஸேன அப்³யாகதேன அப்³யாகதங் த³ட்ட²ப்³ப³ங். திகாதீ³ஸு அபுப்³ப³ங் நத்தி².
Nānantare ekanti ahetukacittasamuṭṭhānassa ceva sesarūpassa ca vasena abyākatena abyākataṃ. Evaṃ sabbesu ekakesu yujjamānakarūpaṃ jānitabbaṃ. Napurejāte dveti idhāpi nahetuvasena cattārīti vattabbaṃ siyā, napurejātena saddhiṃ ghaṭitattā pana abyākataṃ dhammaṃ paccayā akusalo, akusalañca abyākatañca dhammaṃ paccayā akusaloti vatthupurejātavasena dve vissajjanāni parihīnāni. Āruppe pana ahetukamohassa ahetukakiriyassa ca vasena dve vuttāni. Navippayutte dveti āruppe ahetukākusalakiriyavasena dve. Nonatthi novigatesu ekanti sabbassa rūpassa vasena abyākatena abyākataṃ daṭṭhabbaṃ. Tikādīsu apubbaṃ natthi.
288. நாரம்மணமூலகே பன நஅதி⁴பதியா பஞ்சாதி நாரம்மணே லத்³தா⁴னேவ. நகம்மே ஏகந்தி எத்த² சித்தஸமுட்டா²னஞ்ச கடத்தாரூபஞ்ச அக்³க³ஹெத்வா ஸேஸரூபவஸேன அப்³யாகதேன அப்³யாகதங் வேதி³தப்³ப³ங்.
288. Nārammaṇamūlake pana naadhipatiyā pañcāti nārammaṇe laddhāneva. Nakamme ekanti ettha cittasamuṭṭhānañca kaṭattārūpañca aggahetvā sesarūpavasena abyākatena abyākataṃ veditabbaṃ.
289-296. நாதி⁴பதிமூலகே நபுரேஜாதே ஸத்தாதி நபுரேஜாதே லத்³தா⁴னேவ. நபச்சா²ஜாதே ஸத்தரஸாதி இமானிபி தத்த² லத்³தா⁴னி ஸத்தரஸேவ. நானந்தரனஸமனந்தரனஅஞ்ஞமஞ்ஞனஉபனிஸ்ஸயனஸம்பயுத்தனோனத்தி²னோவிக³தமூலகானி நாரம்மணமூலகஸதி³ஸானேவ. இமினாவ நயமத்தத³ஸ்ஸனேன ஸப்³ப³த்த² ஆக³தானாக³தங் லப்³ப⁴மானாலப்³ப⁴மானஞ்ச வேதி³தப்³ப³ந்தி.
289-296. Nādhipatimūlake napurejāte sattāti napurejāte laddhāneva. Napacchājāte sattarasāti imānipi tattha laddhāni sattaraseva. Nānantaranasamanantaranaaññamaññanaupanissayanasampayuttanonatthinovigatamūlakāni nārammaṇamūlakasadisāneva. Imināva nayamattadassanena sabbattha āgatānāgataṃ labbhamānālabbhamānañca veditabbanti.
பச்சனீயவண்ணனா நிட்டி²தா.
Paccanīyavaṇṇanā niṭṭhitā.
297-328. இமினாயேவ பன லக்க²ணேன அனுலோமங் புரதோ கத்வா அனுலோமபச்சனீயே பச்சனீயங் புரதோ கத்வா பச்சனீயானுலோமே ச க³ணனபரிச்சே²தோ³ ஆக³தானாக³தங் லப்³ப⁴மானாலப்³ப⁴மானஞ்ச வேதி³தப்³ப³ந்தி.
297-328. Imināyeva pana lakkhaṇena anulomaṃ purato katvā anulomapaccanīye paccanīyaṃ purato katvā paccanīyānulome ca gaṇanaparicchedo āgatānāgataṃ labbhamānālabbhamānañca veditabbanti.
பச்சயவாரவண்ணனா நிட்டி²தா.
Paccayavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / 1. குஸலத்திகங் • 1. Kusalattikaṃ
