Library / Tipiṭaka / તિપિટક • Tipiṭaka / મહાવગ્ગ-અટ્ઠકથા • Mahāvagga-aṭṭhakathā |
પચ્છિમવિકપ્પનુપગચીવરાદિકથા
Pacchimavikappanupagacīvarādikathā
૩૫૯. પંસુકૂલકતોતિ કતપંસુકૂલો. ગરુકો હોતીતિ જિણ્ણજિણ્ણટ્ઠાને અગ્ગળારોપનેન ગરુકો હોતિ. સુત્તલૂખં કાતુન્તિ સુત્તેનેવ અગ્ગળં કાતુન્તિ અત્થો. વિકણ્ણો હોતીતિ સુત્તં અચ્છેત્વા અચ્છેત્વા સિબ્બન્તાનં એકો સઙ્ઘાટિકોણો દીઘો હોતિ. વિકણ્ણં ઉદ્ધરિતુન્તિ દીઘકોણં છિન્દિતું. ઓકિરિયન્તીતિ છિન્નકોણતો ગળન્તિ. અનુવાતં પરિભણ્ડન્તિ અનુવાતઞ્ચેવ પરિભણ્ડઞ્ચ. પત્તા લુજ્જન્તીતિ મહન્તેસુ પત્તમુખેસુ દિન્નાનિ સુત્તાનિ ગળન્તિ, તતો પત્તા લુજ્જન્તિ. અટ્ઠપદકં કાતુન્તિ અટ્ઠપદકચ્છન્નેન પત્તમુખં સિબ્બિતું.
359.Paṃsukūlakatoti katapaṃsukūlo. Garuko hotīti jiṇṇajiṇṇaṭṭhāne aggaḷāropanena garuko hoti. Suttalūkhaṃ kātunti sutteneva aggaḷaṃ kātunti attho. Vikaṇṇo hotīti suttaṃ acchetvā acchetvā sibbantānaṃ eko saṅghāṭikoṇo dīgho hoti. Vikaṇṇaṃ uddharitunti dīghakoṇaṃ chindituṃ. Okiriyantīti chinnakoṇato gaḷanti. Anuvātaṃ paribhaṇḍanti anuvātañceva paribhaṇḍañca. Pattā lujjantīti mahantesu pattamukhesu dinnāni suttāni gaḷanti, tato pattā lujjanti. Aṭṭhapadakaṃ kātunti aṭṭhapadakacchannena pattamukhaṃ sibbituṃ.
૩૬૦. અન્વાધિકમ્પિ આરોપેતુન્તિ આગન્તુકપત્તમ્પિ દાતું. ઇદં પન અપ્પહોનકે આરોપેતબ્બં. સચે પહોતિ, આગન્તુકપત્તં ન વટ્ટતિ, છિન્દિતબ્બમેવ.
360.Anvādhikampi āropetunti āgantukapattampi dātuṃ. Idaṃ pana appahonake āropetabbaṃ. Sace pahoti, āgantukapattaṃ na vaṭṭati, chinditabbameva.
૩૬૧. ન ચ ભિક્ખવે સદ્ધાદેય્યન્તિ એત્થ સેસઞાતીનં દેન્તો વિનિપાતેતિયેવ. માતાપિતરો પન સચે રજ્જે ઠિતા પત્થયન્તિ, દાતબ્બં.
361.Na ca bhikkhave saddhādeyyanti ettha sesañātīnaṃ dento vinipātetiyeva. Mātāpitaro pana sace rajje ṭhitā patthayanti, dātabbaṃ.
૩૬૨. ગિલાનોતિ ગિલાનતાય ગહેત્વા ગન્તું અસમત્થો. વસ્સિકસઙ્કેતન્તિ વસ્સિકે ચત્તારો માસે. નદીપારન્તિ નદિયા પારે ભત્તં ભુઞ્જિતબ્બં હોતિ. અગ્ગળગુત્તિવિહારોતિ સબ્બેસ્વેવ ચેતેસુ ગિલાનવસ્સિકસઙ્કેતનદીપારગમનઅત્થતકથિનભાવેસુ અગ્ગળગુત્તિયેવ પમાણં. ગુત્તે એવ હિ વિહારે એતેસુ કારણેસુ નિક્ખિપિત્વા બહિ ગન્તું વટ્ટતિ, ન અગુત્તે. આરઞ્ઞકસ્સ પન વિહારો ન સુગુત્તો હોતિ, તેન ભણ્ડુક્ખલિકાય પક્ખિપિત્વા પાસાણસુસિર રુક્ખસુસિરાદીસુ સુપ્પટિચ્છન્નેસુ ઠપેત્વા ગન્તબ્બં.
362.Gilānoti gilānatāya gahetvā gantuṃ asamattho. Vassikasaṅketanti vassike cattāro māse. Nadīpāranti nadiyā pāre bhattaṃ bhuñjitabbaṃ hoti. Aggaḷaguttivihāroti sabbesveva cetesu gilānavassikasaṅketanadīpāragamanaatthatakathinabhāvesu aggaḷaguttiyeva pamāṇaṃ. Gutte eva hi vihāre etesu kāraṇesu nikkhipitvā bahi gantuṃ vaṭṭati, na agutte. Āraññakassa pana vihāro na sugutto hoti, tena bhaṇḍukkhalikāya pakkhipitvā pāsāṇasusira rukkhasusirādīsu suppaṭicchannesu ṭhapetvā gantabbaṃ.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / મહાવગ્ગપાળિ • Mahāvaggapāḷi / ૨૨૧. પચ્છિમવિકપ્પનુપગચીવરાદિકથા • 221. Pacchimavikappanupagacīvarādikathā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / પચ્છિમવિકપ્પનુપગચીવરાદિકથાવણ્ણના • Pacchimavikappanupagacīvarādikathāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / નિસીદનાદિઅનુજાનનકથાવણ્ણના • Nisīdanādianujānanakathāvaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ચીવરરજનકથાદિવણ્ણના • Cīvararajanakathādivaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / ૨૨૧. પચ્છિમવિકપ્પનુપગચીવરાદિકથા • 221. Pacchimavikappanupagacīvarādikathā