| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၄. ပဒသုတ္တံ
4. Padasuttaṃ
၅၂၄. ‘‘သေယ္ယထာပိ , ဘိက္ခဝေ, ယာနိ ကာနိစိ ဇင္ဂလာနံ 1 ပာဏာနံ ပဒဇာတာနိ သဗ္ဗာနိ တာနိ ဟတ္ထိပဒေ သမောဓာနံ ဂစ္ဆန္တိ, ဟတ္ထိပဒံ တေသံ အဂ္ဂမက္ခာယတိ, ယဒိဒံ – မဟန္တတ္တေန; ဧဝမေဝ ခော, ဘိက္ခဝေ, ယာနိ ကာနိစိ ပဒာနိ ဗောဓာယ သံဝတ္တန္တိ , ပညိန္ဒ္ရိယံ ပဒံ တေသံ အဂ္ဂမက္ခာယတိ, ယဒိဒံ – ဗောဓာယ။ ကတမာနိ စ, ဘိက္ခဝေ, ပဒာနိ ဗောဓာယ သံဝတ္တန္တိ? သဒ္ဓိန္ဒ္ရိယံ, ဘိက္ခဝေ, ပဒံ, တံ ဗောဓာယ သံဝတ္တတိ; ဝီရိယိန္ဒ္ရိယံ ပဒံ, တံ ဗောဓာယ သံဝတ္တတိ; သတိန္ဒ္ရိယံ ပဒံ, တံ ဗောဓာယ သံဝတ္တတိ; သမာဓိန္ဒ္ရိယံ ပဒံ, တံ ဗောဓာယ သံဝတ္တတိ; ပညိန္ဒ္ရိယံ ပဒံ, တံ ဗောဓာယ သံဝတ္တတိ။ သေယ္ယထာပိ, ဘိက္ခဝေ, ယာနိ ကာနိစိ ဇင္ဂလာနံ ပာဏာနံ ပဒဇာတာနိ သဗ္ဗာနိ တာနိ ဟတ္ထိပဒေ သမောဓာနံ ဂစ္ဆန္တိ, ဟတ္ထိပဒံ တေသံ အဂ္ဂမက္ခာယတိ, ယဒိဒံ – မဟန္တတ္တေန; ဧဝမေဝ ခော, ဘိက္ခဝေ, ယာနိ ကာနိစိ ပဒာနိ ဗောဓာယ သံဝတ္တန္တိ, ပညိန္ဒ္ရိယံ ပဒံ တေသံ အဂ္ဂမက္ခာယတိ, ယဒိဒံ – ဗောဓာယာ’’တိ။ စတုတ္ထံ။
524. ‘‘Seyyathāpi , bhikkhave, yāni kānici jaṅgalānaṃ 2 pāṇānaṃ padajātāni sabbāni tāni hatthipade samodhānaṃ gacchanti, hatthipadaṃ tesaṃ aggamakkhāyati, yadidaṃ – mahantattena; evameva kho, bhikkhave, yāni kānici padāni bodhāya saṃvattanti , paññindriyaṃ padaṃ tesaṃ aggamakkhāyati, yadidaṃ – bodhāya. Katamāni ca, bhikkhave, padāni bodhāya saṃvattanti? Saddhindriyaṃ, bhikkhave, padaṃ, taṃ bodhāya saṃvattati; vīriyindriyaṃ padaṃ, taṃ bodhāya saṃvattati; satindriyaṃ padaṃ, taṃ bodhāya saṃvattati; samādhindriyaṃ padaṃ, taṃ bodhāya saṃvattati; paññindriyaṃ padaṃ, taṃ bodhāya saṃvattati. Seyyathāpi, bhikkhave, yāni kānici jaṅgalānaṃ pāṇānaṃ padajātāni sabbāni tāni hatthipade samodhānaṃ gacchanti, hatthipadaṃ tesaṃ aggamakkhāyati, yadidaṃ – mahantattena; evameva kho, bhikkhave, yāni kānici padāni bodhāya saṃvattanti, paññindriyaṃ padaṃ tesaṃ aggamakkhāyati, yadidaṃ – bodhāyā’’ti. Catutthaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄-၅. ပဒသုတ္တာဒိဝဏ္ဏနာ • 4-5. Padasuttādivaṇṇanā
