| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༧. པཱདུཀཝགྒོ
7. Pādukavaggo
༡༢༤༡. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཚབྦགྒིཡཱ བྷིཀྑུནིཡོ ཨུདཀེ ཨུཙྩཱརམྤི པསྶཱཝམྤི ཁེལ༹མྤི ཀརོནྟི། མནུསྶཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑུནིཡོ ཨུདཀེ ཨུཙྩཱརམྤི པསྶཱཝམྤི ཁེལ༹མྤི ཀརིསྶནྟི, སེཡྻཐཱཔི གིཧིནིཡོ ཀཱམབྷོགིནིཡོ’’ཏི! ཨསྶོསུཾ ཁོ བྷིཀྑུནིཡོ ཏེསཾ མནུསྶཱནཾ ཨུཛ྄ཛྷཱཡནྟཱནཾ ཁིཡྻནྟཱནཾ ཝིཔཱཙེནྟཱནཾ། ཡཱ ཏཱ བྷིཀྑུནིཡོ ཨཔྤིཙྪཱ, ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཚབྦགྒིཡཱ བྷིཀྑུནིཡོ ཨུདཀེ ཨུཙྩཱརམྤི པསྶཱཝམྤི ཁེལ༹མྤི ཀརིསྶནྟཱི’’ཏི! ཨཐ ཁོ བྷིཀྑུནིཡོ བྷིཀྑཱུནཾ ཨེཏམཏྠཾ ཨཱརོཙེསུཾ། བྷིཀྑཱུ 1 བྷགཝཏོ ཨེཏམཏྠཾ ཨཱརོཙེསུཾ། ཨཐ ཁོ བྷགཝཱ…པེ॰… བྷིཀྑཱུ པཊིཔུཙྪི – ‘‘སཙྩཾ ཀིར, བྷིཀྑཝེ, ཚབྦགྒིཡཱ བྷིཀྑུནིཡོ ཨུདཀེ ཨུཙྩཱརམྤི པསྶཱཝམྤི ཁེལ༹མྤི ཀརོནྟཱི’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, ཚབྦགྒིཡཱ བྷིཀྑུནིཡོ ཨུདཀེ ཨུཙྩཱརམྤི པསྶཱཝམྤི ཁེལ༹མྤི ཀརིསྶནྟི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
1241. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhuniyo udake uccārampi passāvampi kheḷampi karonti. Manussā ujjhāyanti khiyyanti vipācenti – ‘‘kathañhi nāma bhikkhuniyo udake uccārampi passāvampi kheḷampi karissanti, seyyathāpi gihiniyo kāmabhoginiyo’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā, tā ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo udake uccārampi passāvampi kheḷampi karissantī’’ti! Atha kho bhikkhuniyo bhikkhūnaṃ etamatthaṃ ārocesuṃ. Bhikkhū 2 bhagavato etamatthaṃ ārocesuṃ. Atha kho bhagavā…pe… bhikkhū paṭipucchi – ‘‘saccaṃ kira, bhikkhave, chabbaggiyā bhikkhuniyo udake uccārampi passāvampi kheḷampi karontī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, chabbaggiyā bhikkhuniyo udake uccārampi passāvampi kheḷampi karissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
‘‘ན ཨུདཀེ ཨུཙྩཱརཾ ཝཱ པསྶཱཝཾ ཝཱ ཁེལ༹ཾ ཝཱ ཀརིསྶཱམཱིཏི སིཀྑཱ ཀརཎཱིཡཱ’’ཏི །
‘‘Na udake uccāraṃ vā passāvaṃ vā kheḷaṃ vā karissāmīti sikkhā karaṇīyā’’ti .
ཨེཝཉྩིདཾ བྷགཝཏཱ བྷིཀྑུནཱིནཾ སིཀྑཱཔདཾ པཉྙཏྟཾ ཧོཏི།
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
ཏེན ཁོ པན སམཡེན གིལཱནཱ བྷིཀྑུནིཡོ ཨུདཀེ ཨུཙྩཱརམྤི པསྶཱཝམྤི ཁེལ༹མྤི ཀཱཏུཾ ཀུཀྐུཙྩཱཡནྟི། བྷགཝཏོ ཨེཏམཏྠཾ ཨཱརོཙེསུཾ…པེ॰… ཨནུཛཱནཱམི, བྷིཀྑཝེ, གིལཱནཱཡ བྷིཀྑུནིཡཱ ཨུདཀེ ཨུཙྩཱརམྤི པསྶཱཝམྤི ཁེལ༹མྤི ཀཱཏུཾ། ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
Tena kho pana samayena gilānā bhikkhuniyo udake uccārampi passāvampi kheḷampi kātuṃ kukkuccāyanti. Bhagavato etamatthaṃ ārocesuṃ…pe… anujānāmi, bhikkhave, gilānāya bhikkhuniyā udake uccārampi passāvampi kheḷampi kātuṃ. Evañca pana, bhikkhave, bhikkhuniyo imaṃ sikkhāpadaṃ uddisantu –
‘‘ན ཨུདཀེ ཨགིལཱནཱ ཨུཙྩཱརཾ ཝཱ པསྶཱཝཾ ཝཱ ཁེལ༹ཾ ཝཱ ཀརིསྶཱམཱིཏི སིཀྑཱ ཀརཎཱིཡཱ’’ཏི།
‘‘Na udake agilānā uccāraṃ vā passāvaṃ vā kheḷaṃ vā karissāmīti sikkhā karaṇīyā’’ti.
ན ཨུདཀེ ཨགིལཱནཱཡ ཨུཙྩཱརོ ཝཱ པསྶཱཝོ ཝཱ ཁེལོ༹ ཝཱ ཀཱཏབྦོ། ཡཱ ཨནཱདརིཡཾ པཊིཙྩ ཨུདཀེ ཨགིལཱནཱ ཨུཙྩཱརཾ ཝཱ པསྶཱཝཾ ཝཱ ཁེལ༹ཾ ཝཱ ཀརོཏི, ཨཱཔཏྟི དུཀྐཊསྶ།
Na udake agilānāya uccāro vā passāvo vā kheḷo vā kātabbo. Yā anādariyaṃ paṭicca udake agilānā uccāraṃ vā passāvaṃ vā kheḷaṃ vā karoti, āpatti dukkaṭassa.
ཨནཱཔཏྟི ཨསཉྩིཙྩ, ཨསྶཏིཡཱ, ཨཛཱནནྟིཡཱ, གིལཱནཱཡ, ཐལེ ཀཏོ ཨུདཀཾ ཨོཏྠརཏི, ཨཱཔདཱསུ, ཨུམྨཏྟིཀཱཡ, ཁིཏྟཙིཏྟཱཡ, ཝེདནཱཊྚཱཡ, ཨཱདིཀམྨིཀཱཡཱཏི།
Anāpatti asañcicca, assatiyā, ajānantiyā, gilānāya, thale kato udakaṃ ottharati, āpadāsu, ummattikāya, khittacittāya, vedanāṭṭāya, ādikammikāyāti.
པནྣརསམསིཀྑཱཔདཾ ནིཊྛིཏཾ།
Pannarasamasikkhāpadaṃ niṭṭhitaṃ.
པཱདུཀཝགྒོ སཏྟམོ།
Pādukavaggo sattamo.
ཨུདྡིཊྛཱ ཁོ, ཨཡྻཱཡོ, སེཁིཡཱ དྷམྨཱ། ཏཏྠཱཡྻཱཡོ པུཙྪཱམི – ‘‘ཀཙྩིཏྠ པརིསུདྡྷཱ’’? དུཏིཡམྤི པུཙྪཱམི – ‘‘ཀཙྩིཏྠ པརིསུདྡྷཱ’’? ཏཏིཡམྤི པུཙྪཱམི – ‘‘ཀཙྩིཏྠ པརིསུདྡྷཱ’’? པརིསུདྡྷེཏྠཱཡྻཱཡོ, ཏསྨཱ ཏུཎྷཱི, ཨེཝམེཏཾ དྷཱརཡཱམཱིཏི།
Uddiṭṭhā kho, ayyāyo, sekhiyā dhammā. Tatthāyyāyo pucchāmi – ‘‘kaccittha parisuddhā’’? Dutiyampi pucchāmi – ‘‘kaccittha parisuddhā’’? Tatiyampi pucchāmi – ‘‘kaccittha parisuddhā’’? Parisuddhetthāyyāyo, tasmā tuṇhī, evametaṃ dhārayāmīti.
སེཁིཡཀཎྜཾ ནིཊྛིཏཾ།
Sekhiyakaṇḍaṃ niṭṭhitaṃ.
Footnotes:
