A World of Knowledge
    Library / Tipiṭaka / तिपिटक • Tipiṭaka / बुद्धवंसपाळि • Buddhavaṃsapāḷi

    १०. पदुमबुद्धवंसो

    10. Padumabuddhavaṃso

    .

    1.

    अनोमदस्सिस्स अपरेन, सम्बुद्धो द्विपदुत्तमो।

    Anomadassissa aparena, sambuddho dvipaduttamo;

    पदुमो नाम नामेन, असमो अप्पटिपुग्गलो॥

    Padumo nāma nāmena, asamo appaṭipuggalo.

    .

    2.

    तस्सापि असमं सीलं, समाधिपि अनन्तको।

    Tassāpi asamaṃ sīlaṃ, samādhipi anantako;

    असङ्खेय्यं ञाणवरं, विमुत्तिपि अनूपमा॥

    Asaṅkheyyaṃ ñāṇavaraṃ, vimuttipi anūpamā.

    .

    3.

    तस्सापि अतुलतेजस्स, धम्मचक्‍कप्पवत्तने।

    Tassāpi atulatejassa, dhammacakkappavattane;

    अभिसमया तयो आसुं, महातमपवाहना॥

    Abhisamayā tayo āsuṃ, mahātamapavāhanā.

    .

    4.

    पठमाभिसमये बुद्धो, कोटिसतमबोधयि।

    Paṭhamābhisamaye buddho, koṭisatamabodhayi;

    दुतियाभिसमये धीरो, नवुतिकोटिमबोधयि॥

    Dutiyābhisamaye dhīro, navutikoṭimabodhayi.

    .

    5.

    यदा च पदुमो बुद्धो, ओवदी सकमत्रजं।

    Yadā ca padumo buddho, ovadī sakamatrajaṃ;

    तदा असीतिकोटीनं, ततियाभिसमयो अहु॥

    Tadā asītikoṭīnaṃ, tatiyābhisamayo ahu.

    .

    6.

    सन्‍निपाता तयो आसुं, पदुमस्स महेसिनो।

    Sannipātā tayo āsuṃ, padumassa mahesino;

    कोटिसतसहस्सानं, पठमो आसि समागमो॥

    Koṭisatasahassānaṃ, paṭhamo āsi samāgamo.

    .

    7.

    कथिनत्थारसमये , उप्पन्‍ने कथिनचीवरे।

    Kathinatthārasamaye , uppanne kathinacīvare;

    धम्मसेनापतित्थाय, भिक्खू सिब्बिंसु 1 चीवरं॥

    Dhammasenāpatitthāya, bhikkhū sibbiṃsu 2 cīvaraṃ.

    .

    8.

    तदा ते विमला भिक्खू, छळभिञ्‍ञा महिद्धिका।

    Tadā te vimalā bhikkhū, chaḷabhiññā mahiddhikā;

    तीणि सतसहस्सानि, समिंसु अपराजिता॥

    Tīṇi satasahassāni, samiṃsu aparājitā.

    .

    9.

    पुनापरं सो नरासभो 3, पवने वासं उपागमि।

    Punāparaṃ so narāsabho 4, pavane vāsaṃ upāgami;

    तदा समागमो आसि, द्विन्‍नं सतसहस्सिनं॥

    Tadā samāgamo āsi, dvinnaṃ satasahassinaṃ.

    १०.

    10.

    अहं तेन समयेन, सीहो आसिं मिगाधिभू।

    Ahaṃ tena samayena, sīho āsiṃ migādhibhū;

    विवेकमनुब्रूहन्तं , पवने अद्दसं जिनं॥

    Vivekamanubrūhantaṃ , pavane addasaṃ jinaṃ.

    ११.

    11.

    वन्दित्वा सिरसा पादे, कत्वान तं पदक्खिणं।

    Vanditvā sirasā pāde, katvāna taṃ padakkhiṇaṃ;

    तिक्खत्तुं अभिनादित्वा, सत्ताहं जिनमुपट्ठहं॥

    Tikkhattuṃ abhināditvā, sattāhaṃ jinamupaṭṭhahaṃ.

    १२.

    12.

    सत्ताहं वरसमापत्तिया, वुट्ठहित्वा तथागतो।

    Sattāhaṃ varasamāpattiyā, vuṭṭhahitvā tathāgato;

    मनसा चिन्तयित्वान, कोटिभिक्खू समानयि॥

    Manasā cintayitvāna, koṭibhikkhū samānayi.

    १३.

    13.

    तदापि सो महावीरो, तेसं मज्झे वियाकरि।

    Tadāpi so mahāvīro, tesaṃ majjhe viyākari;

    ‘‘अपरिमेय्यितो कप्पे, अयं बुद्धो भविस्सति॥

    ‘‘Aparimeyyito kappe, ayaṃ buddho bhavissati.

    १४.

    14.

    ‘‘पधानं पदहित्वान…पे॰… हेस्साम सम्मुखा इमं’’॥

    ‘‘Padhānaṃ padahitvāna…pe… hessāma sammukhā imaṃ’’.

    १५.

    15.

    तस्सापि वचनं सुत्वा, भिय्यो चित्तं पसादयिं।

    Tassāpi vacanaṃ sutvā, bhiyyo cittaṃ pasādayiṃ;

    उत्तरिं वतमधिट्ठासिं, दसपारमिपूरिया॥

    Uttariṃ vatamadhiṭṭhāsiṃ, dasapāramipūriyā.

    १६.

    16.

    चम्पकं नाम नगरं, असमो नाम खत्तियो।

    Campakaṃ nāma nagaraṃ, asamo nāma khattiyo;

    असमा नाम जनिका, पदुमस्स महेसिनो॥

    Asamā nāma janikā, padumassa mahesino.

    १७.

    17.

    दसवस्ससहस्सानि , अगारं अज्झ सो वसि।

    Dasavassasahassāni , agāraṃ ajjha so vasi;

    नन्दावसुयसुत्तरा , तयो पासादमुत्तमा॥

    Nandāvasuyasuttarā , tayo pāsādamuttamā.

    १८.

    18.

    तेत्तिंस च सहस्सानि, नारियो समलङ्कता।

    Tettiṃsa ca sahassāni, nāriyo samalaṅkatā;

    उत्तरा नाम सा नारी, रम्मो नामासि अत्रजो॥

    Uttarā nāma sā nārī, rammo nāmāsi atrajo.

    १९.

    19.

    निमित्ते चतुरो दिस्वा, रथयानेन निक्खमि।

    Nimitte caturo disvā, rathayānena nikkhami;

    अनूनअट्ठमासानि, पधानं पदही जिनो॥

    Anūnaaṭṭhamāsāni, padhānaṃ padahī jino.

    २०.

    20.

    ब्रह्मुना याचितो सन्तो, पदुमो लोकनायको।

    Brahmunā yācito santo, padumo lokanāyako;

    वत्ति चक्‍कं महावीरो, धनञ्‍चुय्यानमुत्तमे॥

    Vatti cakkaṃ mahāvīro, dhanañcuyyānamuttame.

    २१.

    21.

    सालो च उपसालो च, अहेसुं अग्गसावका।

    Sālo ca upasālo ca, ahesuṃ aggasāvakā;

    वरुणो नामुपट्ठाको, पदुमस्स महेसिनो॥

    Varuṇo nāmupaṭṭhāko, padumassa mahesino.

    २२.

    22.

    राधा चेव सुराधा च, अहेसुं अग्गसाविका।

    Rādhā ceva surādhā ca, ahesuṃ aggasāvikā;

    बोधि तस्स भगवतो, महासोणोति वुच्‍चति॥

    Bodhi tassa bhagavato, mahāsoṇoti vuccati.

    २३.

    23.

    भिय्यो चेव असमो च, अहेसुं अग्गुपट्ठका।

    Bhiyyo ceva asamo ca, ahesuṃ aggupaṭṭhakā;

    रुची च नन्दरामा च, अहेसुं अग्गुपट्ठिका॥

    Rucī ca nandarāmā ca, ahesuṃ aggupaṭṭhikā.

    २४.

    24.

    अट्ठपण्णासरतनं, अच्‍चुग्गतो महामुनि।

    Aṭṭhapaṇṇāsaratanaṃ, accuggato mahāmuni;

    पभा निद्धावती तस्स, असमा सब्बसो दिसा॥

    Pabhā niddhāvatī tassa, asamā sabbaso disā.

    २५.

    25.

    चन्दप्पभा सूरियप्पभा, रतनग्गिमणिप्पभा।

    Candappabhā sūriyappabhā, ratanaggimaṇippabhā;

    सब्बापि ता हता होन्ति, पत्वा जिनपभुत्तमं॥

    Sabbāpi tā hatā honti, patvā jinapabhuttamaṃ.

    २६.

    26.

    वस्ससतसहस्सानि, आयु विज्‍जति तावदे।

    Vassasatasahassāni, āyu vijjati tāvade;

    तावता तिट्ठमानो सो, तारेसि जनतं बहुं॥

    Tāvatā tiṭṭhamāno so, tāresi janataṃ bahuṃ.

    २७.

    27.

    परिपक्‍कमानसे सत्ते, बोधयित्वा असेसतो।

    Paripakkamānase satte, bodhayitvā asesato;

    सेसके अनुसासित्वा, निब्बुतो सो ससावको॥

    Sesake anusāsitvā, nibbuto so sasāvako.

    २८.

    28.

    उरगोव तचं जिण्णं, वद्धपत्तंव पादपो।

    Uragova tacaṃ jiṇṇaṃ, vaddhapattaṃva pādapo;

    जहित्वा सब्बसङ्खारे, निब्बुतो सो यथा सिखी॥

    Jahitvā sabbasaṅkhāre, nibbuto so yathā sikhī.

    २९.

    29.

    पदुमो जिनवरो सत्था, धम्मारामम्हि निब्बुतो।

    Padumo jinavaro satthā, dhammārāmamhi nibbuto;

    धातुवित्थारिकं आसि, तेसु तेसु पदेसतोति॥

    Dhātuvitthārikaṃ āsi, tesu tesu padesatoti.

    पदुमस्स भगवतो वंसो अट्ठमो।

    Padumassa bhagavato vaṃso aṭṭhamo.







    Footnotes:
    1. याचिंसु (क॰)
    2. yāciṃsu (ka.)
    3. नरवुसभो (स्या॰ कं॰)
    4. naravusabho (syā. kaṃ.)



    Related texts:



    अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / बुद्धवंस-अट्ठकथा • Buddhavaṃsa-aṭṭhakathā / १०. पदुमबुद्धवंसवण्णना • 10. Padumabuddhavaṃsavaṇṇanā


    © 1991-2025 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact