| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
10. பது³மபூஜகத்தே²ரஅபதா³னவண்ணனா
10. Padumapūjakattheraapadānavaṇṇanā
ஹிமவந்தஸ்ஸாவிதூ³ரேதிஆதி³கங் ஆயஸ்மதோ பது³மபூஜகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ப்³ராஹ்மணகுலே நிப்³ப³த்தோ விஞ்ஞுதங் பத்வா ஸகஸிப்பே நிப்ப²த்திங் பத்வா தத்த² ஸாரங் அபஸ்ஸந்தோ பு³த்³து⁴ப்பத்திதோ புரேதரங் உப்பன்னத்தா ஓவாதா³னுஸாஸனங் அலபி⁴த்வா க⁴ராவாஸங் பஹாய இஸிபப்³ப³ஜ்ஜங் பப்³ப³ஜித்வா ஹிமவந்தஸ்ஸ அவிதூ³ரே கோ³தமகங் நாம பப்³ப³தங் நிஸ்ஸாய அஸ்ஸமங் காரெத்வா பஞ்சாபி⁴ஞ்ஞா அட்ட² ஸமாபத்தியோ நிப்³ப³த்தெத்வா ஜா²னஸுகே²னேவ விஹாஸி. ததா³ பது³முத்தரோ ப⁴க³வா பு³த்³தோ⁴ ஹுத்வா ஸத்தே ஸங்ஸாரதோ உத்³த⁴ரந்தோ தஸ்ஸானுகம்பாய ஹிமவந்தங் அக³மாஸி. தாபஸோ ப⁴க³வந்தங் தி³ஸ்வா பஸன்னமானஸோ ஸகஸிஸ்ஸே ஸமானெத்வா தேஹி பது³மபுப்பா²னி ஆஹராபெத்வா பூஜேஸி. ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ உப⁴யஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ஸாவத்தி²யங் குலகே³ஹே நிப்³ப³த்தோ ஸத்³தோ⁴ பஸன்னோ பப்³ப³ஜித்வா நசிரஸ்ஸேவ அரஹா அஹோஸி.
Himavantassāvidūretiādikaṃ āyasmato padumapūjakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle brāhmaṇakule nibbatto viññutaṃ patvā sakasippe nipphattiṃ patvā tattha sāraṃ apassanto buddhuppattito puretaraṃ uppannattā ovādānusāsanaṃ alabhitvā gharāvāsaṃ pahāya isipabbajjaṃ pabbajitvā himavantassa avidūre gotamakaṃ nāma pabbataṃ nissāya assamaṃ kāretvā pañcābhiññā aṭṭha samāpattiyo nibbattetvā jhānasukheneva vihāsi. Tadā padumuttaro bhagavā buddho hutvā satte saṃsārato uddharanto tassānukampāya himavantaṃ agamāsi. Tāpaso bhagavantaṃ disvā pasannamānaso sakasisse samānetvā tehi padumapupphāni āharāpetvā pūjesi. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde sāvatthiyaṃ kulagehe nibbatto saddho pasanno pabbajitvā nacirasseva arahā ahosi.
97. ஸோ அத்தனோ புஞ்ஞகம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஹிமவந்தஸ்ஸாவிதூ³ரேதிஆதி³மாஹ. கோ³தமோ நாம பப்³ப³தோதி அனேகேஸங் யக்க²தே³வதானங் ஆவாஸபா⁴வேன அதி⁴ட்டா²னவஸேன கோ³தமஸ்ஸ ப⁴வனத்தா கோ³தமோதி பாகடோ அஹோஸி. பவத்ததி திட்ட²தீதி பப்³ப³தோ. நாக³ருக்கே²ஹி ஸஞ்ச²ன்னோதி ருஹதி திட்ட²தீதி ருக்கோ². அத² வா பத²விங் க²னந்தோ உத்³த⁴ங் ருஹதீதி ருக்கோ², நானா அனேகப்பகாரா சம்பககப்பூரனாக³அக³ருசந்த³னாத³யோ ருக்கா²தி நானாருக்கா², தேஹி நானாருக்கே²ஹி ஸஞ்ச²ன்னோ பரிகிண்ணோ கோ³தமோ பப்³ப³தோதி ஸம்ப³ந்தோ⁴. மஹாபூ⁴தக³ணாலயோதி ப⁴வந்தி ஜாயந்தி உப்பஜ்ஜந்தி வட்³ட⁴ந்தி சாதி பூ⁴தா, மஹந்தா ச தே பூ⁴தா சாதி மஹாபூ⁴தா, மஹாபூ⁴தானங் க³ணோ ஸமூஹோதி மஹாபூ⁴தக³ணோ, மஹாபூ⁴தக³ணஸ்ஸ ஆலயோ பதிட்டா²தி மஹாபூ⁴தக³ணாலயோ.
97. So attano puññakammaṃ saritvā somanassajāto pubbacaritāpadānaṃ pakāsento himavantassāvidūretiādimāha. Gotamo nāma pabbatoti anekesaṃ yakkhadevatānaṃ āvāsabhāvena adhiṭṭhānavasena gotamassa bhavanattā gotamoti pākaṭo ahosi. Pavattati tiṭṭhatīti pabbato. Nāgarukkhehi sañchannoti ruhati tiṭṭhatīti rukkho. Atha vā pathaviṃ khananto uddhaṃ ruhatīti rukkho, nānā anekappakārā campakakappūranāgaagarucandanādayo rukkhāti nānārukkhā, tehi nānārukkhehi sañchanno parikiṇṇo gotamo pabbatoti sambandho. Mahābhūtagaṇālayoti bhavanti jāyanti uppajjanti vaḍḍhanti cāti bhūtā, mahantā ca te bhūtā cāti mahābhūtā, mahābhūtānaṃ gaṇo samūhoti mahābhūtagaṇo, mahābhūtagaṇassa ālayo patiṭṭhāti mahābhūtagaṇālayo.
98. வேமஜ்ஜ²ம்ஹி ச தஸ்ஸாஸீதி தஸ்ஸ கோ³தமஸ்ஸ பப்³ப³தஸ்ஸ வேமஜ்ஜே² அப்³ப⁴ந்தரே அஸ்ஸமோ அபி⁴னிம்மிதோ நிப்பா²தி³தோ கதோதி அத்தோ². ஸேஸங் உத்தானமேவாதி.
98.Vemajjhamhi ca tassāsīti tassa gotamassa pabbatassa vemajjhe abbhantare assamo abhinimmito nipphādito katoti attho. Sesaṃ uttānamevāti.
பது³மபூஜகத்தே²ரஅபதா³னவண்ணனா ஸமத்தா.
Padumapūjakattheraapadānavaṇṇanā samattā.
தேரஸமவக்³க³வண்ணனா ஸமத்தா.
Terasamavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 10. பது³மபூஜகத்தே²ரஅபதா³னங் • 10. Padumapūjakattheraapadānaṃ
