| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೧೦. ಪದುಮಪೂಜಕತ್ಥೇರಅಪದಾನವಣ್ಣನಾ
10. Padumapūjakattheraapadānavaṇṇanā
ಹಿಮವನ್ತಸ್ಸಾವಿದೂರೇತಿಆದಿಕಂ ಆಯಸ್ಮತೋ ಪದುಮಪೂಜಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಪದುಮುತ್ತರಸ್ಸ ಭಗವತೋ ಕಾಲೇ ಬ್ರಾಹ್ಮಣಕುಲೇ ನಿಬ್ಬತ್ತೋ ವಿಞ್ಞುತಂ ಪತ್ವಾ ಸಕಸಿಪ್ಪೇ ನಿಪ್ಫತ್ತಿಂ ಪತ್ವಾ ತತ್ಥ ಸಾರಂ ಅಪಸ್ಸನ್ತೋ ಬುದ್ಧುಪ್ಪತ್ತಿತೋ ಪುರೇತರಂ ಉಪ್ಪನ್ನತ್ತಾ ಓವಾದಾನುಸಾಸನಂ ಅಲಭಿತ್ವಾ ಘರಾವಾಸಂ ಪಹಾಯ ಇಸಿಪಬ್ಬಜ್ಜಂ ಪಬ್ಬಜಿತ್ವಾ ಹಿಮವನ್ತಸ್ಸ ಅವಿದೂರೇ ಗೋತಮಕಂ ನಾಮ ಪಬ್ಬತಂ ನಿಸ್ಸಾಯ ಅಸ್ಸಮಂ ಕಾರೇತ್ವಾ ಪಞ್ಚಾಭಿಞ್ಞಾ ಅಟ್ಠ ಸಮಾಪತ್ತಿಯೋ ನಿಬ್ಬತ್ತೇತ್ವಾ ಝಾನಸುಖೇನೇವ ವಿಹಾಸಿ। ತದಾ ಪದುಮುತ್ತರೋ ಭಗವಾ ಬುದ್ಧೋ ಹುತ್ವಾ ಸತ್ತೇ ಸಂಸಾರತೋ ಉದ್ಧರನ್ತೋ ತಸ್ಸಾನುಕಮ್ಪಾಯ ಹಿಮವನ್ತಂ ಅಗಮಾಸಿ। ತಾಪಸೋ ಭಗವನ್ತಂ ದಿಸ್ವಾ ಪಸನ್ನಮಾನಸೋ ಸಕಸಿಸ್ಸೇ ಸಮಾನೇತ್ವಾ ತೇಹಿ ಪದುಮಪುಪ್ಫಾನಿ ಆಹರಾಪೇತ್ವಾ ಪೂಜೇಸಿ। ಸೋ ತೇನ ಪುಞ್ಞೇನ ದೇವಮನುಸ್ಸೇಸು ಸಂಸರನ್ತೋ ಉಭಯಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಸಾವತ್ಥಿಯಂ ಕುಲಗೇಹೇ ನಿಬ್ಬತ್ತೋ ಸದ್ಧೋ ಪಸನ್ನೋ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಅಹೋಸಿ।
Himavantassāvidūretiādikaṃ āyasmato padumapūjakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle brāhmaṇakule nibbatto viññutaṃ patvā sakasippe nipphattiṃ patvā tattha sāraṃ apassanto buddhuppattito puretaraṃ uppannattā ovādānusāsanaṃ alabhitvā gharāvāsaṃ pahāya isipabbajjaṃ pabbajitvā himavantassa avidūre gotamakaṃ nāma pabbataṃ nissāya assamaṃ kāretvā pañcābhiññā aṭṭha samāpattiyo nibbattetvā jhānasukheneva vihāsi. Tadā padumuttaro bhagavā buddho hutvā satte saṃsārato uddharanto tassānukampāya himavantaṃ agamāsi. Tāpaso bhagavantaṃ disvā pasannamānaso sakasisse samānetvā tehi padumapupphāni āharāpetvā pūjesi. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde sāvatthiyaṃ kulagehe nibbatto saddho pasanno pabbajitvā nacirasseva arahā ahosi.
೯೭. ಸೋ ಅತ್ತನೋ ಪುಞ್ಞಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಹಿಮವನ್ತಸ್ಸಾವಿದೂರೇತಿಆದಿಮಾಹ। ಗೋತಮೋ ನಾಮ ಪಬ್ಬತೋತಿ ಅನೇಕೇಸಂ ಯಕ್ಖದೇವತಾನಂ ಆವಾಸಭಾವೇನ ಅಧಿಟ್ಠಾನವಸೇನ ಗೋತಮಸ್ಸ ಭವನತ್ತಾ ಗೋತಮೋತಿ ಪಾಕಟೋ ಅಹೋಸಿ। ಪವತ್ತತಿ ತಿಟ್ಠತೀತಿ ಪಬ್ಬತೋ। ನಾಗರುಕ್ಖೇಹಿ ಸಞ್ಛನ್ನೋತಿ ರುಹತಿ ತಿಟ್ಠತೀತಿ ರುಕ್ಖೋ। ಅಥ ವಾ ಪಥವಿಂ ಖನನ್ತೋ ಉದ್ಧಂ ರುಹತೀತಿ ರುಕ್ಖೋ, ನಾನಾ ಅನೇಕಪ್ಪಕಾರಾ ಚಮ್ಪಕಕಪ್ಪೂರನಾಗಅಗರುಚನ್ದನಾದಯೋ ರುಕ್ಖಾತಿ ನಾನಾರುಕ್ಖಾ, ತೇಹಿ ನಾನಾರುಕ್ಖೇಹಿ ಸಞ್ಛನ್ನೋ ಪರಿಕಿಣ್ಣೋ ಗೋತಮೋ ಪಬ್ಬತೋತಿ ಸಮ್ಬನ್ಧೋ। ಮಹಾಭೂತಗಣಾಲಯೋತಿ ಭವನ್ತಿ ಜಾಯನ್ತಿ ಉಪ್ಪಜ್ಜನ್ತಿ ವಡ್ಢನ್ತಿ ಚಾತಿ ಭೂತಾ, ಮಹನ್ತಾ ಚ ತೇ ಭೂತಾ ಚಾತಿ ಮಹಾಭೂತಾ, ಮಹಾಭೂತಾನಂ ಗಣೋ ಸಮೂಹೋತಿ ಮಹಾಭೂತಗಣೋ, ಮಹಾಭೂತಗಣಸ್ಸ ಆಲಯೋ ಪತಿಟ್ಠಾತಿ ಮಹಾಭೂತಗಣಾಲಯೋ।
97. So attano puññakammaṃ saritvā somanassajāto pubbacaritāpadānaṃ pakāsento himavantassāvidūretiādimāha. Gotamo nāma pabbatoti anekesaṃ yakkhadevatānaṃ āvāsabhāvena adhiṭṭhānavasena gotamassa bhavanattā gotamoti pākaṭo ahosi. Pavattati tiṭṭhatīti pabbato. Nāgarukkhehi sañchannoti ruhati tiṭṭhatīti rukkho. Atha vā pathaviṃ khananto uddhaṃ ruhatīti rukkho, nānā anekappakārā campakakappūranāgaagarucandanādayo rukkhāti nānārukkhā, tehi nānārukkhehi sañchanno parikiṇṇo gotamo pabbatoti sambandho. Mahābhūtagaṇālayoti bhavanti jāyanti uppajjanti vaḍḍhanti cāti bhūtā, mahantā ca te bhūtā cāti mahābhūtā, mahābhūtānaṃ gaṇo samūhoti mahābhūtagaṇo, mahābhūtagaṇassa ālayo patiṭṭhāti mahābhūtagaṇālayo.
೯೮. ವೇಮಜ್ಝಮ್ಹಿ ಚ ತಸ್ಸಾಸೀತಿ ತಸ್ಸ ಗೋತಮಸ್ಸ ಪಬ್ಬತಸ್ಸ ವೇಮಜ್ಝೇ ಅಬ್ಭನ್ತರೇ ಅಸ್ಸಮೋ ಅಭಿನಿಮ್ಮಿತೋ ನಿಪ್ಫಾದಿತೋ ಕತೋತಿ ಅತ್ಥೋ। ಸೇಸಂ ಉತ್ತಾನಮೇವಾತಿ।
98.Vemajjhamhi ca tassāsīti tassa gotamassa pabbatassa vemajjhe abbhantare assamo abhinimmito nipphādito katoti attho. Sesaṃ uttānamevāti.
ಪದುಮಪೂಜಕತ್ಥೇರಅಪದಾನವಣ್ಣನಾ ಸಮತ್ತಾ।
Padumapūjakattheraapadānavaṇṇanā samattā.
ತೇರಸಮವಗ್ಗವಣ್ಣನಾ ಸಮತ್ತಾ।
Terasamavaggavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೧೦. ಪದುಮಪೂಜಕತ್ಥೇರಅಪದಾನಂ • 10. Padumapūjakattheraapadānaṃ
