| Library / Tipiṭaka / तिपिटक • Tipiṭaka / अपदानपाळि • Apadānapāḷi |
९. पदुमत्थेरअपदानं
9. Padumattheraapadānaṃ
६७.
67.
‘‘चतुसच्चं पकासेन्तो, वरधम्मप्पवत्तको।
‘‘Catusaccaṃ pakāsento, varadhammappavattako;
६८.
68.
पदुमुत्तरमुनिस्स, पहट्ठो उक्खिपिमम्बरे॥
Padumuttaramunissa, pahaṭṭho ukkhipimambare.
६९.
69.
‘‘आगच्छन्ते च पदुमे, अब्भुतो आसि तावदे।
‘‘Āgacchante ca padume, abbhuto āsi tāvade;
मम सङ्कप्पमञ्ञाय, पग्गण्हि वदतं वरो॥
Mama saṅkappamaññāya, paggaṇhi vadataṃ varo.
७०.
70.
‘‘करसेट्ठेन पग्गय्ह, जलजं पुप्फमुत्तमं।
‘‘Karaseṭṭhena paggayha, jalajaṃ pupphamuttamaṃ;
भिक्खुसङ्घे ठितो सत्था, इमा गाथा अभासथ॥
Bhikkhusaṅghe ṭhito satthā, imā gāthā abhāsatha.
७१.
71.
‘‘‘येनिदं पदुमं खित्तं, सब्बञ्ञुम्हि विनायके 5।
‘‘‘Yenidaṃ padumaṃ khittaṃ, sabbaññumhi vināyake 6;
तमहं कित्तयिस्सामि, सुणाथ मम भासतो॥
Tamahaṃ kittayissāmi, suṇātha mama bhāsato.
७२.
72.
‘‘‘तिंसकप्पानि देविन्दो, देवरज्जं करिस्सति।
‘‘‘Tiṃsakappāni devindo, devarajjaṃ karissati;
पथब्या रज्जं सत्तसतं, वसुधं आवसिस्सति॥
Pathabyā rajjaṃ sattasataṃ, vasudhaṃ āvasissati.
७३.
73.
‘‘‘तत्थ पत्तं गणेत्वान, चक्कवत्ती भविस्सति।
‘‘‘Tattha pattaṃ gaṇetvāna, cakkavattī bhavissati;
आकासतो पुप्फवुट्ठि, अभिवस्सिस्सती तदा॥
Ākāsato pupphavuṭṭhi, abhivassissatī tadā.
७४.
74.
‘‘‘कप्पसतसहस्सम्हि, ओक्काककुलसम्भवो।
‘‘‘Kappasatasahassamhi, okkākakulasambhavo;
गोतमो नाम नामेन, सत्था लोके भविस्सति॥
Gotamo nāma nāmena, satthā loke bhavissati.
७५.
75.
‘‘‘तस्स धम्मेसु दायादो, ओरसो धम्मनिम्मितो।
‘‘‘Tassa dhammesu dāyādo, oraso dhammanimmito;
सब्बासवे परिञ्ञाय, निब्बायिस्सतिनासवो’॥
Sabbāsave pariññāya, nibbāyissatināsavo’.
७६.
76.
‘‘निक्खमित्वान कुच्छिम्हा, सम्पजानो पतिस्सतो।
‘‘Nikkhamitvāna kucchimhā, sampajāno patissato;
जातिया पञ्चवस्सोहं, अरहत्तं अपापुणिं॥
Jātiyā pañcavassohaṃ, arahattaṃ apāpuṇiṃ.
७७.
77.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा पदुमो थेरो इमा गाथायो अभासित्थाति।
Itthaṃ sudaṃ āyasmā padumo thero imā gāthāyo abhāsitthāti.
पदुमत्थेरस्सापदानं नवमं।
Padumattherassāpadānaṃ navamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / ९. पदुमत्थेरअपदानवण्णना • 9. Padumattheraapadānavaṇṇanā
