Library / Tipiṭaka / တိပိဋက • Tipiṭaka / မဟာဝဂ္ဂ-အဋ္ဌကထာ • Mahāvagga-aṭṭhakathā

    ပဇ္ဇောတရာဇဝတ္ထုကထာ

    Pajjotarājavatthukathā

    ၃၃၄. ဇေဂုစ္ဆံ မေ သပ္ပီတိ အယံ ကိရ ရာဇာ ဝိစ္ဆိကသ္သ ဇာတော, ဝိစ္ဆိကဝိသပဋိဃာတာယ စ သပ္ပိ ဘေသဇ္ဇံ ဟောတိ ဝိစ္ဆိကာနံ ပဋိကူလံ, တသ္မာ ဧဝမာဟ။ ဥဒ္ဒေကံ ဒသ္သတီတိ ဥဂ္ဂာရံ ဒသ္သတိ။ ပညာသ ယောဇနိကာ ဟောတီတိ ပညာသ ယောဇနာနိ ဂန္တုံ သမတ္ထာ ဟောတိ။ န ကေဝလဉ္စသ္သ ရညော ဟတ္ထိနီယေဝ, နာဠာဂိရိ နာမ ဟတ္ထီ ယောဇနသတံ ဂစ္ဆတိ, စေလကဏ္ဏော စ မုဉ္စကေသော စာတိ ဒ္ဝေ အသ္သာ ဝီသယောဇနသတံ ဂစ္ဆန္တိ, ကာကော ဒာသော သဋ္ဌိယောဇနာနိ ဂစ္ဆတိ။

    334.Jegucchaṃ me sappīti ayaṃ kira rājā vicchikassa jāto, vicchikavisapaṭighātāya ca sappi bhesajjaṃ hoti vicchikānaṃ paṭikūlaṃ, tasmā evamāha. Uddekaṃ dassatīti uggāraṃ dassati. Paññāsa yojanikā hotīti paññāsa yojanāni gantuṃ samatthā hoti. Na kevalañcassa rañño hatthinīyeva, nāḷāgiri nāma hatthī yojanasataṃ gacchati, celakaṇṇo ca muñcakeso cāti dve assā vīsayojanasataṃ gacchanti, kāko dāso saṭṭhiyojanāni gacchati.

    ဧကသ္သ ကိရ ကုလပုတ္တသ္သ အနုပ္ပန္နေ ဗုဒ္ဓေ ဧကဒိဝသံ ဘုဉ္ဇိတုံ နိသိန္နသ္သ ပစ္စေကဗုဒ္ဓော ဒ္ဝာရေ ဌတ္ဝာ အဂမာသိ, တသ္သေကော ပုရိသော ‘‘ပစ္စေကဗုဒ္ဓော အာဂန္တ္ဝာ ဂတော’’တိ အာရောစေသိ။ သော သုတ္ဝာ ‘‘ဂစ္ဆ, ဝေဂေန ပတ္တံ အာဟရာ’’တိ အာဟရာပေတ္ဝာ အတ္တနော သဇ္ဇိတံ ဘတ္တံ သဗ္ဗံ ဒတ္ဝာ ပေသေသိ။ ဣတရော တံ အာဟရိတ္ဝာ ပစ္စေကဗုဒ္ဓသ္သ ဟတ္ထေ ဌပေတ္ဝာ ‘‘အဟံ ဘန္တေ တုမ္ဟာကံ ကတေန ဣမိနာ ကာယဝေယ္ယာဝတိကေန ယတ္ထ ယတ္ထ နိဗ္ဗတ္တောပိ ဝာဟနသမ္ပန္နော ဟောမီ’’တိ ပတ္ထနံ အကာသိ။ သော အယံ ဧတရဟိ ပဇ္ဇောတော နာမ ရာဇာ ဇာတော, တာယ ပတ္ထနာယ အယံ ဝာဟနသမ္ပတ္တိ။

    Ekassa kira kulaputtassa anuppanne buddhe ekadivasaṃ bhuñjituṃ nisinnassa paccekabuddho dvāre ṭhatvā agamāsi, tasseko puriso ‘‘paccekabuddho āgantvā gato’’ti ārocesi. So sutvā ‘‘gaccha, vegena pattaṃ āharā’’ti āharāpetvā attano sajjitaṃ bhattaṃ sabbaṃ datvā pesesi. Itaro taṃ āharitvā paccekabuddhassa hatthe ṭhapetvā ‘‘ahaṃ bhante tumhākaṃ katena iminā kāyaveyyāvatikena yattha yattha nibbattopi vāhanasampanno homī’’ti patthanaṃ akāsi. So ayaṃ etarahi pajjoto nāma rājā jāto, tāya patthanāya ayaṃ vāhanasampatti.

    သပ္ပိံ ပာယေတ္ဝာတိ သပ္ပိဉ္စ ပာယေတ္ဝာ; ပရိစာရိကာနဉ္စ အာဟာရာစာရေ ဝိဓိံ အာစိက္ခိတ္ဝာ။ နခေန ဘေသဇ္ဇံ ဩလုမ္ပေတ္ဝာတိ နခေန ဘေသဇ္ဇံ ဩဒဟိတ္ဝာ; ပက္ခိပိတ္ဝာတိ အတ္ထော။ နိစ္ဆာရေသီတိ ဝိရေစေသိ။

    Sappiṃ pāyetvāti sappiñca pāyetvā; paricārikānañca āhārācāre vidhiṃ ācikkhitvā. Nakhena bhesajjaṃ olumpetvāti nakhena bhesajjaṃ odahitvā; pakkhipitvāti attho. Nicchāresīti virecesi.







    Related texts:



    တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi / ၂၀၇. ပဇ္ဇောတရာဇဝတ္ထု • 207. Pajjotarājavatthu

    ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ပဇ္ဇောတရာဇဝတ္ထုကထာဒိဝဏ္ဏနာ • Pajjotarājavatthukathādivaṇṇanā

    ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ပဇ္ဇောတရာဇဝတ္ထုကထာဝဏ္ဏနာ • Pajjotarājavatthukathāvaṇṇanā

    ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၂၀၇. ပဇ္ဇောတရာဇဝတ္ထုကထာ • 207. Pajjotarājavatthukathā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact