| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
ပကိဏ္ဏကကထာဝဏ္ဏနာ
Pakiṇṇakakathāvaṇṇanā
ဗဟု ဧကတော ဒာရုအာဒိဘာရိယသ္သ ဧကသ္သ ဘဏ္ဍသ္သ ဥက္ခိပနကာလေ ‘‘ဂဏ္ဟထ ဥက္ခိပထာ’’တိ ဝစီပယောဂေန သဒ္ဓိံ ကာယပယောဂသဗ္ဘာဝဋ္ဌာနံ သန္ဓာယ ‘‘သာဟတ္ထိကာဏတ္တိက’’န္တိ ဝုတ္တံ။ ‘‘တ္ဝံ ဧတံ ဝတ္ထုံ ဂဏ္ဟ, အဟံ အည’’န္တိ ဧဝံ ပဝတ္တေ ပန အဝဟာရေ အတ္တနာ ဂဟိတံ သာဟတ္ထိကမေဝ, ပရေန ဂာဟာပိတံ အာဏတ္တိကမေဝ, တေနေဝ တဒုဘယဂ္ဃေန ပဉ္စမာသေပိ ပာရာဇိကံ န ဟောတိ, ဧကေကဘဏ္ဍဂ္ဃဝသေန ထုလ္လစ္စယာဒိမေဝ ဟောတိ။ ဝုတ္တဉ္ဟိ ‘‘သာဟတ္ထိကံ ဝာ အာဏတ္တိကသ္သ အင္ဂံ န ဟောတီ’’တိအာဒိ။ ဥပနိက္ခိတ္တဘဏ္ဍံ ဘဏ္ဍဒေယ္ယဉ္စ အဒာတုကာမတာယ ‘‘ဒေမိ ဒမ္မီ’’တိ ဝိက္ခိပန္တော တုဏ္ဟီဘာဝေန ဝိဟေဌေန္တောပိ တေန တေန ကာယဝိကာရာဒိကိရိယာယ ပရသ္သ ဓုရံ နိက္ခိပာပေသီတိ ‘‘ကိရိယာသမုဋ္ဌာနဉ္စာ’’တိ ဝုတ္တံ။
Bahu ekato dāruādibhāriyassa ekassa bhaṇḍassa ukkhipanakāle ‘‘gaṇhatha ukkhipathā’’ti vacīpayogena saddhiṃ kāyapayogasabbhāvaṭṭhānaṃ sandhāya ‘‘sāhatthikāṇattika’’nti vuttaṃ. ‘‘Tvaṃ etaṃ vatthuṃ gaṇha, ahaṃ añña’’nti evaṃ pavatte pana avahāre attanā gahitaṃ sāhatthikameva, parena gāhāpitaṃ āṇattikameva, teneva tadubhayagghena pañcamāsepi pārājikaṃ na hoti, ekekabhaṇḍagghavasena thullaccayādimeva hoti. Vuttañhi ‘‘sāhatthikaṃ vā āṇattikassa aṅgaṃ na hotī’’tiādi. Upanikkhittabhaṇḍaṃ bhaṇḍadeyyañca adātukāmatāya ‘‘demi dammī’’ti vikkhipanto tuṇhībhāvena viheṭhentopi tena tena kāyavikārādikiriyāya parassa dhuraṃ nikkhipāpesīti ‘‘kiriyāsamuṭṭhānañcā’’ti vuttaṃ.
ပဒဘာဇနီယဝဏ္ဏနာနယော နိဋ္ဌိတော။
Padabhājanīyavaṇṇanānayo niṭṭhito.
