| Library / Tipiṭaka / ਤਿਪਿਟਕ • Tipiṭaka / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā |
ਪਕਿਣ੍ਣਕਕਥਾવਣ੍ਣਨਾ
Pakiṇṇakakathāvaṇṇanā
ਪਕਿਣ੍ਣਕੇ ਯਾਨਿ ਸਿਕ੍ਖਾਪਦਾਨਿ ‘‘ਕਿਰਿਯਾਨੀ’’ਤਿ વੁਚ੍ਚਨ੍ਤਿ, ਤੇਸਂ વਸੇਨ ਕਾਯੋ, વਾਚਾ ਚ ਸਹ વਿਞ੍ਞਤ੍ਤਿਯਾ વੇਦਿਤਬ੍ਬਾ। ਅਕਿਰਿਯਾਨਂ વਸੇਨ વਿਨਾ વਿਞ੍ਞਤ੍ਤਿਯਾ વੇਦਿਤਬ੍ਬਾ, ਚਿਤ੍ਤਂ ਪਨੇਤ੍ਥ ਅਪ੍ਪਮਾਣਂ ਭੂਤਾਰੋਚਨਸਮੁਟ੍ਠਾਨਸ੍ਸ ਕਿਰਿਯਤ੍ਤਾ, ਅਚਿਤ੍ਤਕਤ੍ਤਾ ਚ। ਤਤ੍ਥ ਕਿਰਿਯਾ ਆਪਤ੍ਤਿਯਾ ਅਨਨ੍ਤਰਚਿਤ੍ਤਸਮੁਟ੍ਠਾਨਾ વੇਦਿਤਬ੍ਬਾ। ਅવਿਞ੍ਞਤ੍ਤਿਜਨਕਮ੍ਪਿ ਏਕਚ੍ਚਂ ਬਾਹੁਲ੍ਲਨਯੇਨ ‘‘ਕਿਰਿਯ’’ਨ੍ਤਿ વੁਚ੍ਚਤਿ, ਯਥਯਿਦਂ ਪਠਮਪਾਰਾਜਿਕਂ વਿਞ੍ਞਤ੍ਤਿਯਾ ਅਭਾવੇਪਿ ‘‘ਸੋ ਚੇ ਸਾਦਿਯਤਿ, ਆਪਤ੍ਤਿ ਪਾਰਾਜਿਕਸ੍ਸਾ’’ਤਿ ਹਿ વੁਤ੍ਤਂ ‘‘ਨ ਸਾਦਿਯਤਿ ਅਨਾਪਤ੍ਤੀ’’ਤਿ ਚ। વਿਞ੍ਞਤ੍ਤਿਸਙ੍ਖਾਤਾਪਿ ਕਿਰਿਯਾ વਿਨਾ ਸੇવਨਚਿਤ੍ਤੇਨ ਨ ਹੋਤਿ ਚਿਤ੍ਤਜਤ੍ਤਾ, વਿਕਾਰਰੂਪਤ੍ਤਾ, ਚਿਤ੍ਤਾਨੁਪਰਿવਤ੍ਤਿਕਤ੍ਤਾ ਚ। ਤਸ੍ਮਾ ਕਿਰਿਯਾਸਙ੍ਖਾਤਮਿਦਂ વਿਞ੍ਞਤ੍ਤਿਰੂਪਂ ਇਤਰਂ ਚਿਤ੍ਤਜਰੂਪਂ વਿਯ ਜਨਕਚਿਤ੍ਤੇਨ વਿਨਾ ਨ ਤਿਟ੍ਠਤਿ, ਇਤਰਂ ਸਦ੍ਦਾਯਤਨਂ ਤਿਟ੍ਠਤਿ, ਤਸ੍ਮਾ ਕਿਰਿਯਾਯ ਸਤਿ ਏਕਨ੍ਤਤੋ ਤਜ੍ਜਨਕਂ ਸੇવਨਚਿਤ੍ਤਂ ਅਤ੍ਥਿਯੇવਾਤਿ ਕਤ੍વਾ ਨ ਸਾਦਿਯਤਿ ਅਨਾਪਤ੍ਤੀਤਿ ਨ ਯੁਜ੍ਜਤਿ। ਯਸ੍ਮਾ વਿਞ੍ਞਤ੍ਤਿਜਨਕਮ੍ਪਿ ਸਮਾਨਂ ਸੇવਨਚਿਤ੍ਤਂ ਨ ਸਬ੍ਬਕਾਲਂ વਿਞ੍ਞਤ੍ਤਿਂ ਜਨੇਤਿ, ਤਸ੍ਮਾ વਿਨਾਪਿ વਿਞ੍ਞਤ੍ਤਿਯਾ ਸਯਂ ਉਪ੍ਪਜ੍ਜਤੀਤਿ ਕਤ੍વਾ ‘‘ਸਾਦਿਯਤਿ, ਆਪਤ੍ਤਿ ਪਾਰਾਜਿਕਸ੍ਸਾ’’ਤਿ વੁਤ੍ਤਂ। ਨੁਪ੍ਪਜ੍ਜਤਿ ਚੇ, ਨ ਸਾਦਿਯਤਿ ਨਾਮ, ਤਸ੍ਸ ਅਨਾਪਤ੍ਤਿ, ਤੇਨੇવ ਭਗવਾ ‘‘ਕਿਂਚਿਤ੍ਤੋ ਤ੍વਂ ਭਿਕ੍ਖੂ’’ਤਿ ਚਿਤ੍ਤੇਨੇવ ਆਪਤ੍ਤਿਂ ਪਰਿਚ੍ਛਿਨ੍ਦਤਿ, ਨ ਕਿਰਿਯਾਯਾਤਿ વੇਦਿਤਬ੍ਬਂ। ਏਤ੍ਤਾવਤਾ ਛ ਆਪਤ੍ਤਿਸਮੁਟ੍ਠਾਨਾਨਿ, ਤਾਨਿ ਏવ ਆਪਤ੍ਤਿਕਰਾ ਧਮ੍ਮਾ ਨਾਮਾਤਿ ਚ, ਚਤੂਹਾਕਾਰੇਹਿ ਆਪਤ੍ਤਿਂ ਆਪਜ੍ਜਤਿ ਕਾਯੇਨ વਾਚਾਯ ਕਾਯવਾਚਾਹਿ ਕਮ੍ਮવਾਚਾਯ ਆਪਜ੍ਜਤੀਤਿ ਚ ਏਤਾਨਿ ਸੁਤ੍ਤਪਦਾਨਿ ਅવਿਰੋਧਿਤਾਨਿ ਹੋਨ੍ਤਿ, ਅਞ੍ਞਥਾ વਿਰੋਧਿਤਾਨਿ। ਕਥਂ? ਯਞ੍ਹਿ ਆਪਤ੍ਤਿਂ ਕਮ੍ਮવਾਚਾਯ ਆਪਜ੍ਜਤਿ, ਨ ਤਤ੍ਥ ਕਾਯਾਦਯੋਤਿ ਆਪਨ੍ਨਂ, ਤਤੋ ਕਮ੍ਮવਾਚਾਯ ਸਦ੍ਧਿਂ ਆਪਤ੍ਤਿਕਰਾ ਧਮ੍ਮਾ ਸਤ੍ਤਾਤਿ ਆਪਜ੍ਜਤਿ, ਅਥ ਤਤ੍ਥਾਪਿ ਕਾਯਾਦਯੋ ਏਕਤੋ વਾ ਨਾਨਾਤੋ વਾ ਲਬ੍ਭਨ੍ਤਿ। ‘‘ਚਤੂਹਿ ਆਕਾਰੇਹੀ’’ਤਿ ਨ ਯੁਜ੍ਜਤਿ, ‘‘ਤੀਹਾਕਾਰੇਹਿ ਆਪਤ੍ਤਿਂ ਆਪਜ੍ਜਤੀ’’ਤਿ વਤ੍ਤਬ੍ਬਂ ਸਿਯਾਤਿ ਏવਂ વਿਰੋਧਿਤਾਨਿ ਹੋਨ੍ਤਿ। ਕਥਂ ਅવਿਰੋਧਿਤਾਨੀਤਿ? ਸવਿਞ੍ਞਤ੍ਤਿਕਾવਿਞ੍ਞਤ੍ਤਿਕਭੇਦਭਿਨ੍ਨਤ੍ਤਾ ਕਾਯਾਦੀਨਂ। ਯਾ ਕਿਰਿਯਾ ਆਪਤ੍ਤਿ, ਤਂ ਏਕਚ੍ਚਂ ਕਾਯੇਨ ਸવਿਞ੍ਞਤ੍ਤਿਕੇਨ ਆਪਜ੍ਜਤਿ , ਏਕਚ੍ਚਂ ਸવਿਞ੍ਞਤ੍ਤਿਯਾ વਾਚਾਯ, ਏਕਚ੍ਚਂ ਸવਿਞ੍ਞਤ੍ਤਿਕਾਹਿ ਕਾਯવਾਚਾਹਿ ਆਪਜ੍ਜਤਿ। ਯਾ ਪਨ ਅਕਿਰਿਯਾ ਆਪਤ੍ਤਿ, ਤਂ ਏਕਚ੍ਚਂ ਕਮ੍ਮવਾਚਾਯ ਆਪਜ੍ਜਤਿ, ਤਞ੍ਚ ਖੋ ਅવਸਿਟ੍ਠਾਹਿ ਅવਿਞ੍ਞਤ੍ਤਿਕਾਹਿ ਕਾਯવਾਚਾਹਿਯੇવ, ਨ વਿਨਾ ‘‘ਨੋ ਚੇ ਕਾਯੇਨ વਾਚਾਯ ਪਟਿਨਿਸ੍ਸਜ੍ਜਤਿ, ਕਮ੍ਮવਾਚਾਪਰਿਯੋਸਾਨੇ ਆਪਤ੍ਤਿ ਸਙ੍ਘਾਦਿਸੇਸਸ੍ਸਾ’’ਤਿ (ਪਾਰਾ॰ ੪੧੪, ੪੨੧) વਚਨਤੋ। ਅવਿਸੇਸੇਨ વਾ ਏਕਚ੍ਚਂ ਆਪਤ੍ਤਿਂ ਕਾਯੇਨ ਆਪਜ੍ਜਤਿ, ਏਕਚ੍ਚਂ વਾਚਾਯ, ਏਕਚ੍ਚਂ ਕਾਯવਾਚਾਹਿ। ਯਂ ਪਨੇਤ੍ਥ ਕਾਯવਾਚਾਹਿ, ਤਂ ਏਕਚ੍ਚਂ ਕੇવਲਾਹਿ ਕਾਯવਾਚਾਹਿ ਆਪਜ੍ਜਤਿ, ਏਕਚ੍ਚਂ ਕਮ੍ਮવਾਚਾਯ ਆਪਜ੍ਜਤੀਤਿ ਅਯਮਤ੍ਥੋ વੇਦਿਤਬ੍ਬੋਤਿ ਏવਂ ਅવਿਰੋਧਿਤਾਨਿ ਹੋਨ੍ਤਿ।
Pakiṇṇake yāni sikkhāpadāni ‘‘kiriyānī’’ti vuccanti, tesaṃ vasena kāyo, vācā ca saha viññattiyā veditabbā. Akiriyānaṃ vasena vinā viññattiyā veditabbā, cittaṃ panettha appamāṇaṃ bhūtārocanasamuṭṭhānassa kiriyattā, acittakattā ca. Tattha kiriyā āpattiyā anantaracittasamuṭṭhānā veditabbā. Aviññattijanakampi ekaccaṃ bāhullanayena ‘‘kiriya’’nti vuccati, yathayidaṃ paṭhamapārājikaṃ viññattiyā abhāvepi ‘‘so ce sādiyati, āpatti pārājikassā’’ti hi vuttaṃ ‘‘na sādiyati anāpattī’’ti ca. Viññattisaṅkhātāpi kiriyā vinā sevanacittena na hoti cittajattā, vikārarūpattā, cittānuparivattikattā ca. Tasmā kiriyāsaṅkhātamidaṃ viññattirūpaṃ itaraṃ cittajarūpaṃ viya janakacittena vinā na tiṭṭhati, itaraṃ saddāyatanaṃ tiṭṭhati, tasmā kiriyāya sati ekantato tajjanakaṃ sevanacittaṃ atthiyevāti katvā na sādiyati anāpattīti na yujjati. Yasmā viññattijanakampi samānaṃ sevanacittaṃ na sabbakālaṃ viññattiṃ janeti, tasmā vināpi viññattiyā sayaṃ uppajjatīti katvā ‘‘sādiyati, āpatti pārājikassā’’ti vuttaṃ. Nuppajjati ce, na sādiyati nāma, tassa anāpatti, teneva bhagavā ‘‘kiṃcitto tvaṃ bhikkhū’’ti citteneva āpattiṃ paricchindati, na kiriyāyāti veditabbaṃ. Ettāvatā cha āpattisamuṭṭhānāni, tāni eva āpattikarā dhammā nāmāti ca, catūhākārehi āpattiṃ āpajjati kāyena vācāya kāyavācāhi kammavācāya āpajjatīti ca etāni suttapadāni avirodhitāni honti, aññathā virodhitāni. Kathaṃ? Yañhi āpattiṃ kammavācāya āpajjati, na tattha kāyādayoti āpannaṃ, tato kammavācāya saddhiṃ āpattikarā dhammā sattāti āpajjati, atha tatthāpi kāyādayo ekato vā nānāto vā labbhanti. ‘‘Catūhi ākārehī’’ti na yujjati, ‘‘tīhākārehi āpattiṃ āpajjatī’’ti vattabbaṃ siyāti evaṃ virodhitāni honti. Kathaṃ avirodhitānīti? Saviññattikāviññattikabhedabhinnattā kāyādīnaṃ. Yā kiriyā āpatti, taṃ ekaccaṃ kāyena saviññattikena āpajjati , ekaccaṃ saviññattiyā vācāya, ekaccaṃ saviññattikāhi kāyavācāhi āpajjati. Yā pana akiriyā āpatti, taṃ ekaccaṃ kammavācāya āpajjati, tañca kho avasiṭṭhāhi aviññattikāhi kāyavācāhiyeva, na vinā ‘‘no ce kāyena vācāya paṭinissajjati, kammavācāpariyosāne āpatti saṅghādisesassā’’ti (pārā. 414, 421) vacanato. Avisesena vā ekaccaṃ āpattiṃ kāyena āpajjati, ekaccaṃ vācāya, ekaccaṃ kāyavācāhi. Yaṃ panettha kāyavācāhi, taṃ ekaccaṃ kevalāhi kāyavācāhi āpajjati, ekaccaṃ kammavācāya āpajjatīti ayamattho veditabboti evaṃ avirodhitāni honti.
ਤਤ੍ਰਾਯਂ ਸਮਾਸਤੋ ਅਤ੍ਥવਿਭਾવਨਾ – ਕਾਯੇਨ ਆਪਜ੍ਜਤੀਤਿ ਕਾਯੇਨ ਸવਿਞ੍ਞਤ੍ਤਿਕੇਨ ਅਕਤ੍ਤਬ੍ਬਂ ਕਤ੍વਾ ਏਕਚ੍ਚਂ ਆਪਜ੍ਜਤਿ, ਅવਿਞ੍ਞਤ੍ਤਿਕੇਨ ਕਤ੍ਤਬ੍ਬਂ ਅਕਤ੍વਾ ਆਪਜ੍ਜਤਿ, ਤਦੁਭਯਮ੍ਪਿ ਕਾਯਕਮ੍ਮਂ ਨਾਮ। ਅਕਤਮ੍ਪਿ ਹਿ ਲੋਕੇ ‘‘ਕਤ’’ਨ੍ਤਿ વੁਚ੍ਚਤਿ ‘‘ਇਦਂ ਦੁਕ੍ਕਟਂ ਮਯਾ, ਯਂ ਮਯਾ ਪੁਞ੍ਞਂ ਨ ਕਤ’’ਨ੍ਤਿ ਏવਮਾਦੀਸੁ, ਸਾਸਨੇ ਚ ‘‘ਇਦਂ ਤੇ, ਆવੁਸੋ ਆਨਨ੍ਦ, ਦੁਕ੍ਕਟਂ, ਯਂ ਤ੍વਂ ਭਗવਨ੍ਤਂ ਨ ਪੁਚ੍ਛੀ’’ਤਿਆਦੀਸੁ (ਚੂਲ਼વ॰ ੪੪੩), ਏવਮਿਧ વਿਨਯਪਰਿਯਾਯੇ ਕਾਯੇਨ ਅਕਰਣੀਯਮ੍ਪਿ ‘‘ਕਾਯਕਮ੍ਮ’’ਨ੍ਤਿ વੁਚ੍ਚਤਿ, ਅਯਮੇવ ਨਯੋ વਾਚਾਯ ਆਪਜ੍ਜਤੀਤਿਆਦੀਸੁ। ਤਤ੍ਥ ਸਮੁਟ੍ਠਾਨਗ੍ਗਹਣਂ ਕਤ੍ਤਬ੍ਬਤੋ વਾ ਅਕਤ੍ਤਬ੍ਬਤੋ વਾ ਕਾਯਾਦਿਭੇਦਾਪੇਕ੍ਖਮੇવ ਆਪਤ੍ਤਿਂ ਆਪਜ੍ਜਤਿ, ਨ ਅਞ੍ਞਥਾਤਿ ਦਸ੍ਸਨਤ੍ਥਂ। ਕਿਰਿਯਾਗ੍ਗਹਣਂ ਕਾਯਾਦੀਨਂ ਸવਿਞ੍ਞਤ੍ਤਿਕਾવਿਞ੍ਞਤ੍ਤਿਕਭੇਦਦਸ੍ਸਨਤ੍ਥਂ। ਸਞ੍ਞਾਗ੍ਗਹਣਂ ਆਪਤ੍ਤਿਯਾ ਅਙ੍ਗਾਨਙ੍ਗਚਿਤ੍ਤવਿਸੇਸਦਸ੍ਸਨਤ੍ਥਂ, ਤੇਨ ਯਂ ਚਿਤ੍ਤਂ ਕਿਰਿਯਾਲਕ੍ਖਣੇ, ਅਕਿਰਿਯਾਲਕ੍ਖਣੇ વਾ ਸਨ੍ਨਿਹਿਤਂ, ਯਤੋ વਾ ਕਿਰਿਯਾ વਾ ਅਕਿਰਿਯਾ વਾ ਹੋਤਿ, ਨ ਤਂ ਅવਿਸੇਸੇਨ ਆਪਤ੍ਤਿਯਾ ਅਙ੍ਗਂ વਾ ਅਨਙ੍ਗਂ વਾ ਹੋਤਿ, ਕਿਨ੍ਤੁ ਯਾਯ ਸਞ੍ਞਾਯ ‘‘ਸਞ੍ਞਾવਿਮੋਕ੍ਖ’’ਨ੍ਤਿ વੁਚ੍ਚਤਿ, ਤਾਯ ਸਮ੍ਪਯੁਤ੍ਤਂ ਚਿਤ੍ਤਂ ਅਙ੍ਗਂ, ਇਤਰਂ ਅਨਙ੍ਗਨ੍ਤਿ ਦਸ੍ਸਿਤਂ ਹੋਤਿ। ਇਦਾਨਿ ਯੇਨ ਚਿਤ੍ਤੇਨ ਸਿਕ੍ਖਾਪਦਂ ਸਚਿਤ੍ਤਕਂ ਹੋਤਿ, ਯਦਭਾવਾ ਅਚਿਤ੍ਤਕਂ, ਤੇਨ ਤਸ੍ਸ ਅવਿਸੇਸੇਨ ਸਾવਜ੍ਜਤ੍ਤਾ ਲੋਕવਜ੍ਜਭਾવੋવ વੁਚ੍ਚਤਿ, ਕਿਨ੍ਤੁ ਸਾવਜ੍ਜਂਯੇવ ਸਮਾਨਂ ਏਕਚ੍ਚਂ ਲੋਕવਜ੍ਜਂ ਏਕਚ੍ਚਂ ਪਣ੍ਣਤ੍ਤਿવਜ੍ਜਨ੍ਤਿ ਦਸ੍ਸਨਤ੍ਥਂ ਲੋਕવਜ੍ਜਗ੍ਗਹਣਂ। ਚਿਤ੍ਤਮੇવ ਯਸ੍ਮਾ ‘‘ਲੋਕવਜ੍ਜ’’ਨ੍ਤਿ વੁਚ੍ਚਤਿ, ਤਸ੍ਮਾ ਮਨੋਕਮ੍ਮਮ੍ਪਿ ਸਿਯਾ ਆਪਤ੍ਤੀਤਿ ਅਨਿਟ੍ਠਪ੍ਪਸਙ੍ਗਨਿવਾਰਣਤ੍ਥਂ ਕਮ੍ਮਗ੍ਗਹਣਂ। ਯਂ ਪਨੇਤ੍ਥ ਅਕਿਰਿਯਾਲਕ੍ਖਣਂ ਕਮ੍ਮਂ, ਤਂ ਕੁਸਲਤ੍ਤਿਕવਿਨਿਮੁਤ੍ਤਂ ਸਿਯਾਤਿ ਅਨਿਟ੍ਠਪ੍ਪਸਙ੍ਗਨਿવਾਰਣਤ੍ਥਂ ਕੁਸਲਤ੍ਤਿਕਗ੍ਗਹਣਂ। ਯਾ ਪਨੇਤ੍ਥ ਅਬ੍ਯਾਕਤਾ ਆਪਤ੍ਤਿ, ਤਂ ਏਕਚ੍ਚਂ ਅવੇਦਨਮ੍ਪਿ ਸਞ੍ਞਾવੇਦਯਿਤਨਿਰੋਧਸਮਾਪਨ੍ਨੋ ਆਪਜ੍ਜਤੀਤਿ ਕਤ੍વਾ વੇਦਨਾਤ੍ਤਿਕਂ ਏਤ੍ਥ ਨ ਲਬ੍ਭਤੀਤਿ ਅਨਿਟ੍ਠਪ੍ਪਸਙ੍ਗਨਿવਾਰਣਤ੍ਥਂ વੇਦਨਾਤ੍ਤਿਕਗ੍ਗਹਣਂ ਕਤਨ੍ਤਿ વੇਦਿਤਬ੍ਬਂ। ਸਿਕ੍ਖਾਪਦਞ੍ਹਿ ਸਚਿਤ੍ਤਕਪੁਗ੍ਗਲવਸੇਨ ‘‘ਤਿਚਿਤ੍ਤਂ ਤਿવੇਦਨ’’ਨ੍ਤਿ ਲਦ੍ਧવੋਹਾਰਂ ਅਚਿਤ੍ਤਕੇਨਾਪਨ੍ਨਮ੍ਪਿ ‘‘ਤਿਚਿਤ੍ਤਂ ਤਿવੇਦਨ’’ਮਿਚ੍ਚੇવ વੁਚ੍ਚਤਿ। ਤਤ੍ਰਿਦਂ ਸੁਤ੍ਤਂ ‘‘ਅਤ੍ਥਾਪਤ੍ਤਿ ਅਚਿਤ੍ਤਕੋ ਆਪਜ੍ਜਤਿ ਅਚਿਤ੍ਤਕੋ વੁਟ੍ਠਾਤਿ (ਪਰਿ॰ ੩੨੪)। ਅਤ੍ਥਾਪਤ੍ਤਿ ਕੁਸਲਚਿਤ੍ਤੋ ਆਪਜ੍ਜਤਿ ਕੁਸਲਚਿਤ੍ਤੋ વੁਟ੍ਠਾਤੀ’’ਤਿਆਦਿ (ਪਰਿ॰ ੪੭੦)। ਅਨੁਗਣ੍ਠਿਪਦੇ ਪਨ ‘‘ਸਞ੍ਞਾ ਸਦਾ ਅਨਾਪਤ੍ਤਿਮੇવ ਕਰੋਤਿ, ਚਿਤ੍ਤਂ ਆਪਤ੍ਤਿਮੇવ, ਅਚਿਤ੍ਤਕਂ ਨਾਮ વਤ੍ਥੁਅવਿਜਾਨਨਂ, ਨੋਸਞ੍ਞਾવਿਮੋਕ੍ਖਂ વੀਤਿਕ੍ਕਮਜਾਨਨਂ, ਇਦਮੇਤੇਸਂ ਨਾਨਤ੍ਤ’’ਨ੍ਤਿ વੁਤ੍ਤਂ।
Tatrāyaṃ samāsato atthavibhāvanā – kāyena āpajjatīti kāyena saviññattikena akattabbaṃ katvā ekaccaṃ āpajjati, aviññattikena kattabbaṃ akatvā āpajjati, tadubhayampi kāyakammaṃ nāma. Akatampi hi loke ‘‘kata’’nti vuccati ‘‘idaṃ dukkaṭaṃ mayā, yaṃ mayā puññaṃ na kata’’nti evamādīsu, sāsane ca ‘‘idaṃ te, āvuso ānanda, dukkaṭaṃ, yaṃ tvaṃ bhagavantaṃ na pucchī’’tiādīsu (cūḷava. 443), evamidha vinayapariyāye kāyena akaraṇīyampi ‘‘kāyakamma’’nti vuccati, ayameva nayo vācāya āpajjatītiādīsu. Tattha samuṭṭhānaggahaṇaṃ kattabbato vā akattabbato vā kāyādibhedāpekkhameva āpattiṃ āpajjati, na aññathāti dassanatthaṃ. Kiriyāggahaṇaṃ kāyādīnaṃ saviññattikāviññattikabhedadassanatthaṃ. Saññāggahaṇaṃ āpattiyā aṅgānaṅgacittavisesadassanatthaṃ, tena yaṃ cittaṃ kiriyālakkhaṇe, akiriyālakkhaṇe vā sannihitaṃ, yato vā kiriyā vā akiriyā vā hoti, na taṃ avisesena āpattiyā aṅgaṃ vā anaṅgaṃ vā hoti, kintu yāya saññāya ‘‘saññāvimokkha’’nti vuccati, tāya sampayuttaṃ cittaṃ aṅgaṃ, itaraṃ anaṅganti dassitaṃ hoti. Idāni yena cittena sikkhāpadaṃ sacittakaṃ hoti, yadabhāvā acittakaṃ, tena tassa avisesena sāvajjattā lokavajjabhāvova vuccati, kintu sāvajjaṃyeva samānaṃ ekaccaṃ lokavajjaṃ ekaccaṃ paṇṇattivajjanti dassanatthaṃ lokavajjaggahaṇaṃ. Cittameva yasmā ‘‘lokavajja’’nti vuccati, tasmā manokammampi siyā āpattīti aniṭṭhappasaṅganivāraṇatthaṃ kammaggahaṇaṃ. Yaṃ panettha akiriyālakkhaṇaṃ kammaṃ, taṃ kusalattikavinimuttaṃ siyāti aniṭṭhappasaṅganivāraṇatthaṃ kusalattikaggahaṇaṃ. Yā panettha abyākatā āpatti, taṃ ekaccaṃ avedanampi saññāvedayitanirodhasamāpanno āpajjatīti katvā vedanāttikaṃ ettha na labbhatīti aniṭṭhappasaṅganivāraṇatthaṃ vedanāttikaggahaṇaṃ katanti veditabbaṃ. Sikkhāpadañhi sacittakapuggalavasena ‘‘ticittaṃ tivedana’’nti laddhavohāraṃ acittakenāpannampi ‘‘ticittaṃ tivedana’’micceva vuccati. Tatridaṃ suttaṃ ‘‘atthāpatti acittako āpajjati acittako vuṭṭhāti (pari. 324). Atthāpatti kusalacitto āpajjati kusalacitto vuṭṭhātī’’tiādi (pari. 470). Anugaṇṭhipade pana ‘‘saññā sadā anāpattimeva karoti, cittaṃ āpattimeva, acittakaṃ nāma vatthuavijānanaṃ, nosaññāvimokkhaṃ vītikkamajānanaṃ, idametesaṃ nānatta’’nti vuttaṃ.
ਸਬ੍ਬਸਙ੍ਗਾਹਕવਸੇਨਾਤਿ ਸਬ੍ਬਸਿਕ੍ਖਾਪਦਾਨਂ ਸਙ੍ਗਹવਸੇਨ। ਭਿਕ੍ਖੁਨਿਯਾ ਚੀવਰਦਾਨਾਦਿ ਕਿਰਿਯਾਕਿਰਿਯਤੋ। ਜਾਤਰੂਪਰਜਤਪਟਿਗ੍ਗਹਣਾਦਿ ਸਿਯਾ ਕਿਰਿਯਤੋ। ਉਪਨਿਕ੍ਖਿਤ੍ਤਾਪਟਿਕ੍ਖੇਪੇ ਸਿਯਾ ਅਕਿਰਿਯਤੋ। ਦੇਸਿਤવਤ੍ਥੁਕਪਮਾਣਾਤਿਕ੍ਕਨ੍ਤਕੁਟਿਕਰਣੇ ਸਿਯਾ ਕਿਰਿਯਤੋ, ਅਦੇਸਿਤવਤ੍ਥੁਕਪਮਾਣਾਤਿਕ੍ਕਨ੍ਤਕਰਣੇ ਸਿਯਾ ਕਿਰਿਯਾਕਿਰਿਯਤੋ। ਯਂ ਚਿਤ੍ਤਙ੍ਗਂ ਲਭਤਿਯੇવਾਤਿ ਕਾਯਚਿਤ੍ਤਂ વਾਚਾਚਿਤ੍ਤਨ੍ਤਿ ਏવਂ। વਿਨਾਪਿ ਚਿਤ੍ਤੇਨਾਤਿ ਏਤ੍ਥ વਿਨਾਪਿ ਚਿਤ੍ਤੇਨ ਸਹਾਪਿ ਚਿਤ੍ਤੇਨਾਤਿ ਅਧਿਪ੍ਪਾਯੋ। ਯੋ ਸੋ ਸવਿਞ੍ਞਤ੍ਤਿਕੋ, ਅવਿਞ੍ਞਤ੍ਤਿਕੋ ਚ વੁਤ੍ਤੋ ਕਾਯੋ, ਤਸ੍ਸ ਕਮ੍ਮਂ ਕਾਯਕਮ੍ਮਂ, ਤਥਾ વਚੀਕਮ੍ਮਂ। ਤਤ੍ਥ ਸવਿਞ੍ਞਤ੍ਤਿਕੋ ਕਾਯੋ ਉਪ੍ਪਤ੍ਤਿਯਾ ਕਮ੍ਮਂ ਸਾਧੇਤਿ, ਇਤਰੋ ਅਨੁਪ੍ਪਤ੍ਤਿਯਾ। ਤਥਾ વਾਚਾਤਿ વੇਦਿਤਬ੍ਬਂ, ਸਿਕ੍ਖਾਪਦਨ੍ਤਿ ‘‘ਯੋ ਤਤ੍ਥ ਨਾਮਕਾਯੋ ਪਦਕਾਯੋ’’ਤਿ વਚਨਤੋ વੀਤਿਕ੍ਕਮੇ ਯੁਜ੍ਜਤੀਤਿ વੁਤ੍ਤਂ। ‘‘ਹਸਿਤੁਪ੍ਪਾਦવੋਟ੍ਠਬ੍ਬਨਾਨਿਪਿ ਆਪਤ੍ਤਿਸਮੁਟ੍ਠਾਪਕਚਿਤ੍ਤਾਨਿ। ਇਦਮ੍ਪਿ ਨ ਮਯਾ ਪਰਿਚ੍ਛਿਨ੍ਨਨ੍ਤਿ ਹਸਮਾਨੋ ਪਸ੍ਸਤਿ ਯਦਾ, ਤਦਾ વੋਟ੍ਠਬ੍ਬਨਂ ਜવਨਗਤਿਕ’’ਨ੍ਤਿ ਅਨੁਗਣ੍ਠਿਪਦੇ વੁਤ੍ਤਂ। ਅਭਿਞ੍ਞਾਚਿਤ੍ਤਾਨਿ ਪਞ੍ਞਤ੍ਤਿਂ ਅਜਾਨਿਤ੍વਾ ਇਦ੍ਧਿવਿਕੁਬ੍ਬਨਾਦਿਕਾਲੇ ਗਹੇਤਬ੍ਬਾਨਿ।
Sabbasaṅgāhakavasenāti sabbasikkhāpadānaṃ saṅgahavasena. Bhikkhuniyā cīvaradānādi kiriyākiriyato. Jātarūparajatapaṭiggahaṇādi siyā kiriyato. Upanikkhittāpaṭikkhepe siyā akiriyato. Desitavatthukapamāṇātikkantakuṭikaraṇe siyā kiriyato, adesitavatthukapamāṇātikkantakaraṇe siyā kiriyākiriyato. Yaṃ cittaṅgaṃ labhatiyevāti kāyacittaṃ vācācittanti evaṃ. Vināpi cittenāti ettha vināpi cittena sahāpi cittenāti adhippāyo. Yo so saviññattiko, aviññattiko ca vutto kāyo, tassa kammaṃ kāyakammaṃ, tathā vacīkammaṃ. Tattha saviññattiko kāyo uppattiyā kammaṃ sādheti, itaro anuppattiyā. Tathā vācāti veditabbaṃ, sikkhāpadanti ‘‘yo tattha nāmakāyo padakāyo’’ti vacanato vītikkame yujjatīti vuttaṃ. ‘‘Hasituppādavoṭṭhabbanānipi āpattisamuṭṭhāpakacittāni. Idampi na mayā paricchinnanti hasamāno passati yadā, tadā voṭṭhabbanaṃ javanagatika’’nti anugaṇṭhipade vuttaṃ. Abhiññācittāni paññattiṃ ajānitvā iddhivikubbanādikāle gahetabbāni.
ਏਤ੍ਥ ਪਨ ਯੋ ਪਨ ਭਿਕ੍ਖੁ ਭਿਕ੍ਖੂਨਂ ਸਿਕ੍ਖਾਸਾਜੀવਸਮਾਪਨ੍ਨੋ…ਪੇ॰… ਮੇਥੁਨਂ ਧਮ੍ਮਂ ਪਟਿਸੇવਨ੍ਤੋ ਅਤ੍ਥਿ ਕੋਚਿ ਪਾਰਾਜਿਕੋ ਹੋਤਿ ਅਸਂવਾਸੋ, ਅਤ੍ਥਿ ਕੋਚਿ ਨ ਪਾਰਾਜਿਕੋ ਹੋਤਿ ਅਸਂવਾਸੋ। ਦੁਕ੍ਕਟਥੁਲ੍ਲਚ੍ਚਯવਤ੍ਥੂਸੁ ਪਟਿਸੇવਨ੍ਤੋ ਅਤ੍ਥਿ ਕੋਚਿ ਨ ਪਾਰਾਜਿਕੋ। ਪਕ੍ਖਪਣ੍ਡਕੋ ਅਪਣ੍ਡਕਪਕ੍ਖੇ ਉਪਸਮ੍ਪਨ੍ਨੋ ਪਣ੍ਡਕਪਕ੍ਖੇ ਮੇਥੁਨਂ ਧਮ੍ਮਂ ਪਟਿਸੇવਨ੍ਤੋ ਸੋ ਪਾਰਾਜਿਕਂ ਆਪਤ੍ਤਿਂ ਨਾਪਜ੍ਜਤੀਤਿ ਨ ਪਾਰਾਜਿਕੋ ਨਾਮ। ਨ ਹਿ ਅਭਿਕ੍ਖੁਨੋ ਆਪਤ੍ਤਿ ਨਾਮ ਅਤ੍ਥਿ। ਸੋ ਅਨਾਪਤ੍ਤਿਕਤ੍ਤਾ ਅਪਣ੍ਡਕਪਕ੍ਖੇ ਆਗਤੋ ਕਿਂ ਅਸਂવਾਸੋ ਹੋਤਿ ਨ ਹੋਤੀਤਿ? ਹੋਤਿ, ‘‘ਅਭਬ੍ਬੋ ਤੇਨ ਸਰੀਰਬਨ੍ਧਨੇਨਾ’’ਤਿ (ਪਾਰਾ॰ ੫੫; ਮਹਾવ॰ ੧੨੯) ਹਿ વੁਤ੍ਤਂ। ‘‘ਯੋ ਪਨ, ਭਿਕ੍ਖੁ, ਭਿਕ੍ਖੂਨਂ…ਪੇ॰… ਅਸਂવਾਸੋ’’ਤਿ (ਪਾਰਾ॰ ੪੪) વੁਤ੍ਤਤ੍ਤਾ ਯੋ ਪਨ ਭਿਕ੍ਖੁਭਾવੇਨ ਮੇਥੁਨਂ ਧਮ੍ਮਂ ਪਟਿਸੇવਤਿ, ਸੋ ਏવ ਅਭਬ੍ਬੋ। ਨਾਯਂ ਅਪਾਰਾਜਿਕਤ੍ਤਾਤਿ ਚੇ? ਨ, ‘‘ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ’’ਤਿ (ਮਹਾવ॰ ੮੬) વੁਤ੍ਤਟ੍ਠਾਨੇ ਯਥਾ ਅਭਿਕ੍ਖੁਨਾ ਕਮ੍ਮવਾਚਾਯ ਸਾવਿਤਾਯਪਿ ਕਮ੍ਮਂ ਰੁਹਤਿ ਕਮ੍ਮવਿਪਤ੍ਤਿਯਾ ਅਸਮ੍ਭવਤੋ, ਏવਂਸਮ੍ਪਦਮਿਦਂ ਦਟ੍ਠਬ੍ਬਂ। ਤਤ੍ਰਿਦਂ ਯੁਤ੍ਤਿ – ਉਪਸਮ੍ਪਨ੍ਨਪੁਬ੍ਬੋ ਏવ ਚੇ ਕਮ੍ਮવਾਚਂ ਸਾવੇਤਿ, ਸਙ੍ਘੋ ਚ ਤਸ੍ਮਿਂ ਉਪਸਮ੍ਪਨ੍ਨਸਞ੍ਞੀ, ਏવਞ੍ਚੇ ਕਮ੍ਮਂ ਰੁਹਤਿ, ਨ ਅਞ੍ਞਥਾਤਿ ਨੋ ਖਨ੍ਤੀਤਿ ਆਚਰਿਯੋ। ਗਹਟ੍ਠੋ વਾ ਤਿਤ੍ਥਿਯੋ વਾ ਪਣ੍ਡਕੋ વਾ ਅਨੁਪਸਮ੍ਪਨ੍ਨਸਞ੍ਞੀ ਕਮ੍ਮવਾਚਂ ਸਾવੇਤਿ, ਸਙ੍ਘੇਨ ਕਮ੍ਮવਾਚਾ ਨ વੁਤ੍ਤਾ ਹੋਤਿ, ‘‘ਸਙ੍ਘੋ ਉਪਸਮ੍ਪਾਦੇਯ੍ਯ, ਸਙ੍ਘੋ ਉਪਸਮ੍ਪਾਦੇਤਿ, ਉਪਸਮ੍ਪਨ੍ਨੋ ਸਙ੍ਘੇਨਾ’’ਤਿ (ਮਹਾવ॰ ੧੨੭) ਹਿ વਚਨਤੋ ਸਙ੍ਘੇਨ ਕਮ੍ਮવਾਚਾਯ વਤ੍ਤਬ੍ਬਾਯ ਸਙ੍ਘਪਰਿਯਾਪਨ੍ਨੇਨ, ਸਙ੍ਘਪਰਿਯਾਪਨ੍ਨਸਞ੍ਞਿਤੇਨ વਾ ਏਕੇਨ વੁਤ੍ਤਾ ਸਙ੍ਘੇਨ વੁਤ੍ਤਾવ ਹੋਤੀਤਿ વੇਦਿਤਬ੍ਬੋ, ਅਯਮੇવ ਸਬ੍ਬਕਮ੍ਮੇਸੁ ਯੁਤ੍ਤਿ। ਤਥਾ ਅਤ੍ਥਿ ਮੇਥੁਨਂ ਧਮ੍ਮਂ ਪਟਿਸੇવਨ੍ਤੋ ਕੋਚਿ ਨਾਸੇਤਬ੍ਬੋ ‘‘ਯੋ ਭਿਕ੍ਖੁਨੀਦੂਸਕੋ, ਅਯਂ ਨਾਸੇਤਬ੍ਬੋ’’ਤਿ વੁਤ੍ਤਤ੍ਤਾ ਏવ, ਸੋ ਅਨੁਪਸਮ੍ਪਨ੍ਨੋવ, ਸਹਸੇਯ੍ਯਾਪਤ੍ਤਿਆਦਿਂ ਜਨੇਤਿ, ਤਸ੍ਸ ਓਮਸਨੇ ਚ ਦੁਕ੍ਕਟਂ ਹੋਤਿ। ਅਭਿਕ੍ਖੁਨਿਯਾ ਮੇਥੁਨਂ ਧਮ੍ਮਂ ਪਟਿਸੇવਨ੍ਤੋ ਨ ਨਾਸੇਤਬ੍ਬੋ ‘‘ਅਨ੍ਤਿਮવਤ੍ਥੁਂ ਅਜ੍ਝਾਪਨ੍ਨੋ, ਭਿਕ੍ਖવੇ, ਅਨੁਪਸਮ੍ਪਨ੍ਨੋ…ਪੇ॰… ਨਾਸੇਤਬ੍ਬੋ’’ਤਿ ਪਾਲ਼ਿਯਾ ਅਭਾવਤੋ। ਤੇਨੇવ ਸੋ ਉਪਸਮ੍ਪਨ੍ਨਸਙ੍ਖ੍ਯਂ ਗਚ੍ਛਤਿ, ਨ ਸਹਸੇਯ੍ਯਾਪਤ੍ਤਾਦਿਂ ਜਨੇਤਿ, ਕੇવਲਂ ਅਸਂવਾਸੋਤਿ ਕਤ੍વਾ ਗਣਪੂਰਕੋ ਨ ਹੋਤਿ, ਏਕਕਮ੍ਮਂ ਏਕੁਦ੍ਦੇਸੋਪਿ ਹਿ ਸਂવਾਸੋਤਿ વੁਤ੍ਤੋ। ਸਮਸਿਕ੍ਖਤਾਪਿ ਸਂવਾਸੋਤਿ ਕਤ੍વਾ ਸੋ ਤੇਨ ਸਦ੍ਧਿਂ ਨਤ੍ਥੀਤਿ ਪਦਸੋਧਮ੍ਮਾਪਤ੍ਤਿਂ ਪਨ ਜਨੇਤੀਤਿ ਕਾਰਣਚ੍ਛਾਯਾ ਦਿਸ੍ਸਤਿ। ਯਥਾ ਭਿਕ੍ਖੁਨਿਯਾ ਸਦ੍ਧਿਂ ਭਿਕ੍ਖੁਸਙ੍ਘਸ੍ਸ ਏਕਕਮ੍ਮਾਦਿਨੋ ਸਂવਾਸਸ੍ਸ ਅਭਾવਾ ਭਿਕ੍ਖੁਨੀ ਅਸਂવਾਸਾ ਭਿਕ੍ਖੁਸ੍ਸ, ਤਥਾ ਭਿਕ੍ਖੁ ਚ ਭਿਕ੍ਖੁਨਿਯਾ, ਪਦਸੋਧਮ੍ਮਾਪਤ੍ਤਿਂ ਪਨ ਜਨੇਤਿ। ਤਥਾ ‘‘ਅਨ੍ਤਿਮવਤ੍ਥੁਂ ਅਜ੍ਝਾਪਨ੍ਨੋਪਿ ਏਕਚ੍ਚੋ ਯੋ ਨਾਸੇਤਬ੍ਬੋ’’ਤਿ ਅવੁਤ੍ਤੋਤਿ ਇਮਿਨਾ ਨਿਦਸ੍ਸਨੇਨ ਸਾ ਕਾਰਣਚ੍ਛਾਯਾ ਗਹਣਂ ਨ ਗਚ੍ਛਤਿ।
Ettha pana yo pana bhikkhu bhikkhūnaṃ sikkhāsājīvasamāpanno…pe… methunaṃ dhammaṃ paṭisevanto atthi koci pārājiko hoti asaṃvāso, atthi koci na pārājiko hoti asaṃvāso. Dukkaṭathullaccayavatthūsu paṭisevanto atthi koci na pārājiko. Pakkhapaṇḍako apaṇḍakapakkhe upasampanno paṇḍakapakkhe methunaṃ dhammaṃ paṭisevanto so pārājikaṃ āpattiṃ nāpajjatīti na pārājiko nāma. Na hi abhikkhuno āpatti nāma atthi. So anāpattikattā apaṇḍakapakkhe āgato kiṃ asaṃvāso hoti na hotīti? Hoti, ‘‘abhabbo tena sarīrabandhanenā’’ti (pārā. 55; mahāva. 129) hi vuttaṃ. ‘‘Yo pana, bhikkhu, bhikkhūnaṃ…pe… asaṃvāso’’ti (pārā. 44) vuttattā yo pana bhikkhubhāvena methunaṃ dhammaṃ paṭisevati, so eva abhabbo. Nāyaṃ apārājikattāti ce? Na, ‘‘byattena bhikkhunā paṭibalena saṅgho ñāpetabbo’’ti (mahāva. 86) vuttaṭṭhāne yathā abhikkhunā kammavācāya sāvitāyapi kammaṃ ruhati kammavipattiyā asambhavato, evaṃsampadamidaṃ daṭṭhabbaṃ. Tatridaṃ yutti – upasampannapubbo eva ce kammavācaṃ sāveti, saṅgho ca tasmiṃ upasampannasaññī, evañce kammaṃ ruhati, na aññathāti no khantīti ācariyo. Gahaṭṭho vā titthiyo vā paṇḍako vā anupasampannasaññī kammavācaṃ sāveti, saṅghena kammavācā na vuttā hoti, ‘‘saṅgho upasampādeyya, saṅgho upasampādeti, upasampanno saṅghenā’’ti (mahāva. 127) hi vacanato saṅghena kammavācāya vattabbāya saṅghapariyāpannena, saṅghapariyāpannasaññitena vā ekena vuttā saṅghena vuttāva hotīti veditabbo, ayameva sabbakammesu yutti. Tathā atthi methunaṃ dhammaṃ paṭisevanto koci nāsetabbo ‘‘yo bhikkhunīdūsako, ayaṃ nāsetabbo’’ti vuttattā eva, so anupasampannova, sahaseyyāpattiādiṃ janeti, tassa omasane ca dukkaṭaṃ hoti. Abhikkhuniyā methunaṃ dhammaṃ paṭisevanto na nāsetabbo ‘‘antimavatthuṃ ajjhāpanno, bhikkhave, anupasampanno…pe… nāsetabbo’’ti pāḷiyā abhāvato. Teneva so upasampannasaṅkhyaṃ gacchati, na sahaseyyāpattādiṃ janeti, kevalaṃ asaṃvāsoti katvā gaṇapūrako na hoti, ekakammaṃ ekuddesopi hi saṃvāsoti vutto. Samasikkhatāpi saṃvāsoti katvā so tena saddhiṃ natthīti padasodhammāpattiṃ pana janetīti kāraṇacchāyā dissati. Yathā bhikkhuniyā saddhiṃ bhikkhusaṅghassa ekakammādino saṃvāsassa abhāvā bhikkhunī asaṃvāsā bhikkhussa, tathā bhikkhu ca bhikkhuniyā, padasodhammāpattiṃ pana janeti. Tathā ‘‘antimavatthuṃ ajjhāpannopi ekacco yo nāsetabbo’’ti avuttoti iminā nidassanena sā kāraṇacchāyā gahaṇaṃ na gacchati.
ਅਪਿ ਚ ‘‘ਭਿਕ੍ਖੁ ਸੁਤ੍ਤਭਿਕ੍ਖੁਮ੍ਹਿ વਿਪ੍ਪਟਿਪਜ੍ਜਤਿ, ਪਟਿਬੁਦ੍ਧੋ ਸਾਦਿਯਤਿ, ਉਭੋ ਨਾਸੇਤਬ੍ਬਾ’’ਤਿ (ਪਾਰਾ॰ ੬੬) ਚ, ‘‘ਤੇਨ ਹਿ, ਭਿਕ੍ਖવੇ, ਮੇਤ੍ਤਿਯਂ ਭਿਕ੍ਖੁਨਿਂ ਨਾਸੇਥਾ’’ਤਿ (ਪਾਰਾ॰ ੩੮੪) ਚ વਚਨਤੋ ਯੋ ਸਙ੍ਘਮਜ੍ਝਂ ਪવਿਸਿਤ੍વਾ ਅਨੁવਿਜ੍ਜਕੇਨ ਅਨੁવਿਜ੍ਜਿਯਮਾਨੋ ਪਰਾਜਾਪਿਤੋ, ਸੋਪਿ ਅਨੁਪਸਮ੍ਪਨ੍ਨੋવ, ਨ ਓਮਸવਾਦਪਾਚਿਤ੍ਤਿਯਂ ਜਨੇਤੀਤਿ વੇਦਿਤਬ੍ਬਂ। ਕਿਞ੍ਚਾਪਿ ‘‘ਉਪਸਮ੍ਪਨ੍ਨਂ ਉਪਸਮ੍ਪਨ੍ਨਸਞ੍ਞੀ ਖੁਂਸੇਤੁਕਾਮੋ’’ਤਿ ਪਾਲ਼ਿ ਨਤ੍ਥਿ, ਕਿਞ੍ਚਾਪਿ ਕਙ੍ਖਾવਿਤਰਣਿਯਂ ‘‘ਯਂ ਅਕ੍ਕੋਸਤਿ, ਤਸ੍ਸ ਉਪਸਮ੍ਪਨ੍ਨਤਾ, ਅਨਞ੍ਞਾਪਦੇਸੇਨ ਜਾਤਿਆਦੀਹਿ ਅਕ੍ਕੋਸਨਂ, ‘ਮਂ ਅਕ੍ਕੋਸਤੀ’ਤਿ ਜਾਨਨਾ, ਅਤ੍ਥਪੁਰੇਕ੍ਖਾਰਤਾਦੀਨਂ ਅਭਾવੋਤਿ ਇਮਾਨੇਤ੍ਥ ਚਤ੍ਤਾਰਿ ਅਙ੍ਗਾਨੀ’’ਤਿ (ਕਙ੍ਖਾ॰ ਅਟ੍ਠ॰ ਓਮਸવਾਦਸਿਕ੍ਖਾਪਦવਣ੍ਣਨਾ) વੁਤ੍ਤਂ, ਤਥਾਪਿ ਦੁਟ੍ਠਦੋਸਸਿਕ੍ਖਾਪਦੇ ‘‘ਅਸੁਦ੍ਧੋ ਹੋਤਿ ਪੁਗ੍ਗਲੋ ਅਞ੍ਞਤਰਂ ਪਾਰਾਜਿਕਂ ਧਮ੍ਮਂ ਅਜ੍ਝਾਪਨ੍ਨੋ, ਤਞ੍ਚੇ ਸੁਦ੍ਧਦਿਟ੍ਠਿ ਸਮਾਨੋ ਓਕਾਸਂ ਕਾਰਾਪੇਤ੍વਾ ਅਕ੍ਕੋਸਾਧਿਪ੍ਪਾਯੋ વਦੇਤਿ, ਆਪਤ੍ਤਿ ਓਮਸવਾਦਸ੍ਸਾ’’ਤਿ (ਪਾਰਾ॰ ੩੮੯) વਚਨਤੋ ਅਸੁਦ੍ਧੇ ਉਪਸਮ੍ਪਨ੍ਨਸਞ੍ਞਾਯ ਏવ ਓਮਸਨ੍ਤਸ੍ਸ ਪਾਚਿਤ੍ਤਿਯਂ। ਅਸੁਦ੍ਧਦਿਟ੍ਠਿਸ੍ਸ ਦੁਕ੍ਕਟਂ। ‘‘ਸੁਦ੍ਧੋ ਹੋਤਿ ਪੁਗ੍ਗਲੋ, ਅਞ੍ਞਤਰਂ ਪਾਰਾਜਿਕਂ ਧਮ੍ਮਂ ਅਨਜ੍ਝਾਪਨ੍ਨੋ, ਤਞ੍ਚੇ ਸੁਦ੍ਧਦਿਟ੍ਠਿ ਸਮਾਨੋ ਓਕਾਸਂ ਕਾਰਾਪੇਤ੍વਾ ਅਕ੍ਕੋਸਾਧਿਪ੍ਪਾਯੋ વਦੇਤਿ, ਆਪਤ੍ਤਿ ਓਮਸવਾਦਸ੍ਸਾ’’ਤਿ (ਪਾਰਾ॰ ੩੮੯) વਚਨਤੋ ਪਨ ਕਙ੍ਖਾવਿਤਰਣਿਯਂ ‘‘ਤਸ੍ਸ ਉਪਸਮ੍ਪਨ੍ਨਤਾ ਉਪਸਮ੍ਪਨ੍ਨਸਞ੍ਞਿਤਾ’’ਤਿ ਨ વੁਤ੍ਤਂ ਅਨੇਕਂਸਿਕਤ੍ਤਾ ਤਸ੍ਸ ਅਙ੍ਗਸ੍ਸਾਤਿ વੇਦਿਤਬ੍ਬਂ।
Api ca ‘‘bhikkhu suttabhikkhumhi vippaṭipajjati, paṭibuddho sādiyati, ubho nāsetabbā’’ti (pārā. 66) ca, ‘‘tena hi, bhikkhave, mettiyaṃ bhikkhuniṃ nāsethā’’ti (pārā. 384) ca vacanato yo saṅghamajjhaṃ pavisitvā anuvijjakena anuvijjiyamāno parājāpito, sopi anupasampannova, na omasavādapācittiyaṃ janetīti veditabbaṃ. Kiñcāpi ‘‘upasampannaṃ upasampannasaññī khuṃsetukāmo’’ti pāḷi natthi, kiñcāpi kaṅkhāvitaraṇiyaṃ ‘‘yaṃ akkosati, tassa upasampannatā, anaññāpadesena jātiādīhi akkosanaṃ, ‘maṃ akkosatī’ti jānanā, atthapurekkhāratādīnaṃ abhāvoti imānettha cattāri aṅgānī’’ti (kaṅkhā. aṭṭha. omasavādasikkhāpadavaṇṇanā) vuttaṃ, tathāpi duṭṭhadosasikkhāpade ‘‘asuddho hoti puggalo aññataraṃ pārājikaṃ dhammaṃ ajjhāpanno, tañce suddhadiṭṭhi samāno okāsaṃ kārāpetvā akkosādhippāyo vadeti, āpatti omasavādassā’’ti (pārā. 389) vacanato asuddhe upasampannasaññāya eva omasantassa pācittiyaṃ. Asuddhadiṭṭhissa dukkaṭaṃ. ‘‘Suddho hoti puggalo, aññataraṃ pārājikaṃ dhammaṃ anajjhāpanno, tañce suddhadiṭṭhi samāno okāsaṃ kārāpetvā akkosādhippāyo vadeti, āpatti omasavādassā’’ti (pārā. 389) vacanato pana kaṅkhāvitaraṇiyaṃ ‘‘tassa upasampannatā upasampannasaññitā’’ti na vuttaṃ anekaṃsikattā tassa aṅgassāti veditabbaṃ.
ਅਪਿ ਚੇਤ੍ਥ ਸਿਕ੍ਖਾਪਚ੍ਚਕ੍ਖਾਤਕਚਤੁਕ੍ਕਂ વੇਦਿਤਬ੍ਬਂ, ਅਤ੍ਥਿ ਪੁਗ੍ਗਲੋ ਸਿਕ੍ਖਾਪਚ੍ਚਕ੍ਖਾਤਕੋ ਨ ਸਿਕ੍ਖਾਸਾਜੀવਸਮਾਪਨ੍ਨੋ, ਅਤ੍ਥਿ ਸਿਕ੍ਖਾਸਾਜੀવਸਮਾਪਨ੍ਨੋ ਨ ਸਿਕ੍ਖਾਪਚ੍ਚਕ੍ਖਾਤਕੋ, ਅਤ੍ਥਿ ਸਿਕ੍ਖਾਪਚ੍ਚਕ੍ਖਾਤਕੋ ਚੇવ ਸਿਕ੍ਖਾਸਾਜੀવਸਮਾਪਨ੍ਨੋ ਚ, ਅਤ੍ਥਿ ਨੇવ ਸਿਕ੍ਖਾਪਚ੍ਚਕ੍ਖਾਤਕੋ ਨ ਸਿਕ੍ਖਾਸਾਜੀવਸਮਾਪਨ੍ਨੋ। ਤਤ੍ਥ ਤਤਿਯੋ ਭਿਕ੍ਖੁਨੀਸਿਕ੍ਖਾਪਚ੍ਚਕ੍ਖਾਤਕੋ વੇਦਿਤਬ੍ਬੋ। ਸਾ ਹਿ ਯਾવ ਨ ਲਿਙ੍ਗਂ ਪਰਿਚ੍ਚਜਤਿ, ਕਾਸਾવੇ ਸਉਸ੍ਸਾਹਾવ ਸਮਾਨਾ ਸਾਮਞ੍ਞਾ ਚવਿਤੁਕਾਮਾ ਸਿਕ੍ਖਂ ਪਚ੍ਚਕ੍ਖਨ੍ਤੀਪਿ ਭਿਕ੍ਖੁਨੀ ਏવ ਸਿਕ੍ਖਾਸਾਜੀવਸਮਾਪਨ੍ਨਾવ। વੁਤ੍ਤਞ੍ਹਿ ਭਗવਤਾ ‘‘ਨ, ਭਿਕ੍ਖવੇ, ਭਿਕ੍ਖੁਨਿਯਾ ਸਿਕ੍ਖਾਪਚ੍ਚਕ੍ਖਾਨ’’ਨ੍ਤਿ (ਚੂਲ਼વ॰ ੪੩੪)। ਕਦਾ ਚ ਪਨ ਸਾ ਅਭਿਕ੍ਖੁਨੀ ਹੋਤੀਤਿ? ਯਦਾ ਸਾਮਞ੍ਞਾ ਚવਿਤੁਕਾਮਾ ਗਿਹਿਨਿવਾਸਨਂ ਨਿવਾਸੇਤਿ, ਸਾ ‘‘વਿਬ੍ਭਨ੍ਤਾ’’ਤਿ ਸਙ੍ਖ੍ਯਂ ਗਚ੍ਛਤਿ। વੁਤ੍ਤਞ੍ਹਿ ਭਗવਤਾ ‘‘ਯਦੇવ ਸਾ વਿਬ੍ਭਨ੍ਤਾ, ਤਦੇવ ਅਭਿਕ੍ਖੁਨੀ’’ਤਿ (ਚੂਲ਼વ॰ ੪੩੪)। ਕਿਤ੍ਤਾવਤਾ ਪਨ વਿਬ੍ਭਨ੍ਤਾ ਹੋਤੀਤਿ? ਸਾਮਞ੍ਞਾ ਚવਿਤੁਕਾਮਾ ਕਾਸਾવੇਸੁ ਅਨਾਲਯਾ ਕਾਸਾવਂ વਾ ਅਪਨੇਤਿ, ਨਗ੍ਗਾ વਾ ਗਚ੍ਛਤਿ, ਤਿਣਪਣ੍ਣਾਦਿਨਾ વਾ ਪਟਿਚ੍ਛਾਦੇਤ੍વਾ ਗਚ੍ਛਤਿ, ਕਾਸਾવਂਯੇવ વਾ ਗਿਹਿਨਿવਾਸਨਾਕਾਰੇਨ ਨਿવਾਸੇਤਿ, ਓਦਾਤਂ વਾ વਤ੍ਥਂ ਨਿવਾਸੇਤਿ, ਸਲਿਙ੍ਗੇਨੇવ વਾ ਸਦ੍ਧਿਂ ਤਿਤ੍ਥਿਯੇਸੁ ਪવਿਸਿਤ੍વਾ ਕੇਸਲੁਞ੍ਚਨਾਦਿવਤਂ ਸਮਾਦਿਯਤਿ, ਤਿਤ੍ਥਿਯਲਿਙ੍ਗਂ વਾ ਸਮਾਦਿਯਤਿ, ਤਦਾ વਿਬ੍ਭਨ੍ਤਾ ਨਾਮ ਹੋਤਿ। ਤਤ੍ਥ ਯਾ ਭਿਕ੍ਖੁਨਿਲਿਙ੍ਗੇ ਠਿਤਾવ ਤਿਤ੍ਥਿਯવਤਂ ਸਮਾਦਿਯਤਿ, ਸਾ ਤਿਤ੍ਥਿਯਪਕ੍ਕਨ੍ਤਕੋ ਭਿਕ੍ਖੁ વਿਯ ਪਚ੍ਛਾ ਪਬ੍ਬਜ੍ਜਮ੍ਪਿ ਨ ਲਭਤਿ, ਸੇਸਾ ਪਬ੍ਬਜ੍ਜਮੇવੇਕਂ ਲਭਨ੍ਤਿ, ਨ ਉਪਸਮ੍ਪਦਂ। ਪਾਲ਼ਿਯਂ ਕਿਞ੍ਚਾਪਿ ‘‘ਯਾ ਸਾ, ਭਿਕ੍ਖવੇ, ਭਿਕ੍ਖੁਨੀ ਸਕਾਸਾવਾ ਤਿਤ੍ਥਾਯਤਨਂ ਸਙ੍ਕਨ੍ਤਾ, ਸਾ ਆਗਤਾ ਨ ਉਪਸਮ੍ਪਾਦੇਤਬ੍ਬਾ’’ਤਿ વਚਨਤੋ ਯਾ ਪਠਮਂ વਿਬ੍ਭਮਿਤ੍વਾ ਪਚ੍ਛਾ ਤਿਤ੍ਥਾਯਤਨਂ ਸਙ੍ਕਨ੍ਤਾ, ਸਾ ਆਗਤਾ ਉਪਸਮ੍ਪਾਦੇਤਬ੍ਬਾਤਿ ਅਨੁਞ੍ਞਾਤਂ વਿਯ ਦਿਸ੍ਸਤਿ। ਸਙ੍ਗੀਤਿਆਚਰਿਯੇਹਿ ਪਨ ‘‘ਚਤੁવੀਸਤਿ ਪਾਰਾਜਿਕਾਨੀ’’ਤਿ વੁਤ੍ਤਤ੍ਤਾ ਨ ਪੁਨ ਸਾ ਉਪਸਮ੍ਪਾਦੇਤਬ੍ਬਾ, ਤਸ੍ਮਾ ਏવ ਸਿਕ੍ਖਾਪਚ੍ਚਕ੍ਖਾਨਂ ਨਾਨੁਞ੍ਞਾਤਂ ਭਗવਤਾ। ਅਨ੍ਤਿਮવਤ੍ਥੁਅਜ੍ਝਾਪਨ੍ਨਾ ਪਨ ਭਿਕ੍ਖੁਨੀ ਏવ। ਪਕ੍ਖਪਣ੍ਡਕੀਪਿ ਭਿਕ੍ਖੁਨੀ ਏવ। ਕਿਨ੍ਤਿ ਪੁਚ੍ਛਾ।
Api cettha sikkhāpaccakkhātakacatukkaṃ veditabbaṃ, atthi puggalo sikkhāpaccakkhātako na sikkhāsājīvasamāpanno, atthi sikkhāsājīvasamāpanno na sikkhāpaccakkhātako, atthi sikkhāpaccakkhātako ceva sikkhāsājīvasamāpanno ca, atthi neva sikkhāpaccakkhātako na sikkhāsājīvasamāpanno. Tattha tatiyo bhikkhunīsikkhāpaccakkhātako veditabbo. Sā hi yāva na liṅgaṃ pariccajati, kāsāve saussāhāva samānā sāmaññā cavitukāmā sikkhaṃ paccakkhantīpi bhikkhunī eva sikkhāsājīvasamāpannāva. Vuttañhi bhagavatā ‘‘na, bhikkhave, bhikkhuniyā sikkhāpaccakkhāna’’nti (cūḷava. 434). Kadā ca pana sā abhikkhunī hotīti? Yadā sāmaññā cavitukāmā gihinivāsanaṃ nivāseti, sā ‘‘vibbhantā’’ti saṅkhyaṃ gacchati. Vuttañhi bhagavatā ‘‘yadeva sā vibbhantā, tadeva abhikkhunī’’ti (cūḷava. 434). Kittāvatā pana vibbhantā hotīti? Sāmaññā cavitukāmā kāsāvesu anālayā kāsāvaṃ vā apaneti, naggā vā gacchati, tiṇapaṇṇādinā vā paṭicchādetvā gacchati, kāsāvaṃyeva vā gihinivāsanākārena nivāseti, odātaṃ vā vatthaṃ nivāseti, saliṅgeneva vā saddhiṃ titthiyesu pavisitvā kesaluñcanādivataṃ samādiyati, titthiyaliṅgaṃ vā samādiyati, tadā vibbhantā nāma hoti. Tattha yā bhikkhuniliṅge ṭhitāva titthiyavataṃ samādiyati, sā titthiyapakkantako bhikkhu viya pacchā pabbajjampi na labhati, sesā pabbajjamevekaṃ labhanti, na upasampadaṃ. Pāḷiyaṃ kiñcāpi ‘‘yā sā, bhikkhave, bhikkhunī sakāsāvā titthāyatanaṃ saṅkantā, sā āgatā na upasampādetabbā’’ti vacanato yā paṭhamaṃ vibbhamitvā pacchā titthāyatanaṃ saṅkantā, sā āgatā upasampādetabbāti anuññātaṃ viya dissati. Saṅgītiācariyehi pana ‘‘catuvīsati pārājikānī’’ti vuttattā na puna sā upasampādetabbā, tasmā eva sikkhāpaccakkhānaṃ nānuññātaṃ bhagavatā. Antimavatthuajjhāpannā pana bhikkhunī eva. Pakkhapaṇḍakīpi bhikkhunī eva. Kinti pucchā.
