| Library / Tipiṭaka / တိပိဋက • Tipiṭaka / ပာစိတ္ယာဒိယောဇနာပာဠိ • Pācityādiyojanāpāḷi |
ပက္ခိကဘတ္တာဒိကထာ
Pakkhikabhattādikathā
ယန္တိ ဘတ္တံ ဒိယ္ယတီတိ သမ္ဗန္ဓော။ စာတုဒ္ဒသီပဉ္စဒ္ဒသီပဉ္စမီအဋ္ဌမီတိ အဘိလက္ခိတေသူတိ ယောဇနာ။ ကမ္မပ္ပသုတေဟီတိ ကမ္မူပစယေဟိ။ ဣမေဟိ ပာဌေဟိ ပက္ခေသု ဒာတဗ္ဗံ ပက္ခိကန္တိ ဝစနတ္ထံ ဒသ္သေတိ။ တန္တိ ပက္ခိကဘတ္တံ။ ‘‘ဟောတီ’’တိ ပဒေ ဝုတ္တကတ္တာ, ‘‘ဂာဟေတ္ဝာ’’တိ ပဒေ ဓာတုကမ္မံ, ‘‘ဘုဉ္ဇိတဗ္ဗ’’န္တိ ပဒေ ဝုတ္တကမ္မံ။ သဗ္ဗေသန္တိ ဘိက္ခူနံ။ ယေသန္တိ ဘိက္ခူနံ။ မန္ဒာတိ အပ္ပာ။ တန္တိ သလာကဘတ္တံ။ ပဏီတံ ဒေန္တီတိ ပဏီတံ ကတ္ဝာ ဒေန္တိ။ လူခဘတ္တန္တိ အသိနိဒ္ဓဘတ္တံ။
Yanti bhattaṃ diyyatīti sambandho. Cātuddasīpañcaddasīpañcamīaṭṭhamīti abhilakkhitesūti yojanā. Kammappasutehīti kammūpacayehi. Imehi pāṭhehi pakkhesu dātabbaṃ pakkhikanti vacanatthaṃ dasseti. Tanti pakkhikabhattaṃ. ‘‘Hotī’’ti pade vuttakattā, ‘‘gāhetvā’’ti pade dhātukammaṃ, ‘‘bhuñjitabba’’nti pade vuttakammaṃ. Sabbesanti bhikkhūnaṃ. Yesanti bhikkhūnaṃ. Mandāti appā. Tanti salākabhattaṃ. Paṇītaṃ dentīti paṇītaṃ katvā denti. Lūkhabhattanti asiniddhabhattaṃ.
ယံ ဘတ္တံ အတ္တနာ ဘုဉ္ဇတိ, တဒေဝ ဒိယ္ယတီတိ ယောဇနာ။ ဣမိနာ ဥပောသထေ ဒာတဗ္ဗံ ဥပောသထိကန္တိ ဝစနတ္ထံ ဒသ္သေတိ။ ဥပောသထေတိ ဥပောသထဒိဝသေ။ ဧတ္ထ စ ပဉ္စဒ္ဒသိယံ သစေ ဒာယကာ ‘‘ပက္ခိက’’န္တိ ဝတ္ဝာ ဒေန္တိ, ပက္ခိကံ နာမ။ အထ ‘‘ဥပောသထိက’’န္တိ ဝတ္ဝာ ဒေန္တိ, ဥပောသထိကံ နာမာတိ ဝိသေသော။ ပာဋိပဒေတိ ပာဋိပဒဒိဝသေ။ ဥပောသထကမ္မေနာတိ ဥပောသထကမ္မေန ဟေတုဘူတေန။ ‘‘ပာဋိပဒေ ဒိယ္ယနကဒာန’’န္တိ ဣမိနာ ပာဋိပဒေ ဒာတဗ္ဗံ ပာဋိပဒိကန္တိ ဝစနတ္ထံ ဒသ္သေတိ။ တမ္ပိ ဥဘယန္တိ ဥပောသထိကပာဋိပဒိကဝသေန ဥဘယမ္ပိ တံ ဘတ္တံ။ ဣတိ ဣမာနီတိ ဧတ္ထ ဣမသဒ္ဒေန ဣတိသဒ္ဒသ္သ ဣမသဒ္ဒတ္ထဘာဝော ဒသ္သိတော ဟောတိ။ သတ္တပိ ဘတ္တာနီတိ ဣမသ္မိံ သေနာသနက္ခန္ဓကေ အာဂတာနိ သင္ဃဘတ္တာဒီနိ သတ္တပိ ဘတ္တာနိ။
Yaṃ bhattaṃ attanā bhuñjati, tadeva diyyatīti yojanā. Iminā uposathe dātabbaṃ uposathikanti vacanatthaṃ dasseti. Uposatheti uposathadivase. Ettha ca pañcaddasiyaṃ sace dāyakā ‘‘pakkhika’’nti vatvā denti, pakkhikaṃ nāma. Atha ‘‘uposathika’’nti vatvā denti, uposathikaṃ nāmāti viseso. Pāṭipadeti pāṭipadadivase. Uposathakammenāti uposathakammena hetubhūtena. ‘‘Pāṭipade diyyanakadāna’’nti iminā pāṭipade dātabbaṃ pāṭipadikanti vacanatthaṃ dasseti. Tampi ubhayanti uposathikapāṭipadikavasena ubhayampi taṃ bhattaṃ. Iti imānīti ettha imasaddena itisaddassa imasaddatthabhāvo dassito hoti. Sattapi bhattānīti imasmiṃ senāsanakkhandhake āgatāni saṅghabhattādīni sattapi bhattāni.
အပရာနိပိ စတ္တာရိ ဘတ္တာနီတိ သမ္ဗန္ဓော။ တတ္ထာတိ စတူသု ဘတ္တေသု။ ‘‘အာဂန္တုကာနံ ဒိန္န’’န္တိအာဒိနာ အာဂန္တုကဘတ္တန္တိ ပဒသ္သ စတုတ္ထီမဇ္ဈေလောပသမာသံ ဒသ္သေတိ။ အညတ္ထ ပန ‘‘အာဂန္တုကသ္သ အတ္ထာယ အာဘတ’’န္တိအာဒိနာ ဆဋ္ဌီမဇ္ဈေလောပသမာသံ ဒသ္သေတိ။ ဧတ္ထာတိ စတူသု ဘတ္တေသု။ သဗ္ဗေသန္တိ ဘိက္ခူနံ။ ဧကော အာဂန္တုကော နိသီဒတီတိ သမ္ဗန္ဓော။ တေနာတိ ပဌမအာဂန္တုကေန။
Aparānipi cattāri bhattānīti sambandho. Tatthāti catūsu bhattesu. ‘‘Āgantukānaṃ dinna’’ntiādinā āgantukabhattanti padassa catutthīmajjhelopasamāsaṃ dasseti. Aññattha pana ‘‘āgantukassa atthāya ābhata’’ntiādinā chaṭṭhīmajjhelopasamāsaṃ dasseti. Etthāti catūsu bhattesu. Sabbesanti bhikkhūnaṃ. Eko āgantuko nisīdatīti sambandho. Tenāti paṭhamaāgantukena.
ယောတိ အာဂန္တုကော။ အာဂန္တ္ဝာပီတိ ပိသဒ္ဒော ဂရဟတ္ထော, ပစ္ဆာ ပန ပဂေဝာတိ အတ္ထော။ တေန ဂဏ္ဟိတဗ္ဗန္တိ ယောဇနာ။ ‘‘အာဂတဒိဝသေယေဝာ’’တိ ဣမိနာ န ဒုတိယဒိဝသာဒီသု ဘုဉ္ဇိတဗ္ဗန္တိ ဒသ္သေတိ။
Yoti āgantuko. Āgantvāpīti pisaddo garahattho, pacchā pana pagevāti attho. Tena gaṇhitabbanti yojanā. ‘‘Āgatadivaseyevā’’ti iminā na dutiyadivasādīsu bhuñjitabbanti dasseti.
ကတ္ထစီတိ ကိဉ္စိ ဌာနံ။ တန္တိ အာဂန္တုကဘတ္တံ။ နိဗန္ဓာပိတန္တိ နိစ္စံ ဌပိတံ။ အသနသာလာယန္တိ အန္တောဂာမေ အသနသာလာယံ။ အသတီတိ အသန္တေသု။
Katthacīti kiñci ṭhānaṃ. Tanti āgantukabhattaṃ. Nibandhāpitanti niccaṃ ṭhapitaṃ. Asanasālāyanti antogāme asanasālāyaṃ. Asatīti asantesu.
အာဝာသိကောပီတိ ပိသဒ္ဒော န ဂမိကောယေဝာတိ ဒသ္သေတိ။ ယထာ အာဂန္တုကဘတ္တံ ဒ္ဝေ ဝာ တီဏိ ဝာ သတ္တ ဝာ ဒိဝသာနိ လဗ္ဘတိ, ဧဝံ ဣဒံ ဂမိယဘတ္တံ န လဗ္ဘတီတိ ယောဇနာ။ ပန္ထန္တိ မဂ္ဂံ။ ရုန္ဓန္တီတိ ပိဒဟန္တိ။ ဥဒကံ ဝာ ရုန္ဓတီတိ သမ္ဗန္ဓော။ ဧတေ ဥပဒ္ဒဝေတိ စောရာဒယော ဧတေ ဥပဒ္ဒဝေ။ ဩဍ္ဍေတ္ဝာတိ ဌပေတ္ဝာ။
Āvāsikopīti pisaddo na gamikoyevāti dasseti. Yathā āgantukabhattaṃ dve vā tīṇi vā satta vā divasāni labbhati, evaṃ idaṃ gamiyabhattaṃ na labbhatīti yojanā. Panthanti maggaṃ. Rundhantīti pidahanti. Udakaṃ vā rundhatīti sambandho. Ete upaddaveti corādayo ete upaddave. Oḍḍetvāti ṭhapetvā.
ဧတသ္သာတိ မဟာဂိလာနသ္သ။ ပုန ဧတသ္သာတိ အနာဂတသ္သ မဟာဂိလာနသ္သ။ သပ္ပာယဘောဇနန္တိ ဂိလာနာနံ သပ္ပာယဘောဇနံ။ မိသ္သကယာဂုန္တိ နာနာတဏ္ဍုလေ မိသ္သေတ္ဝာ ပစိတံ ယာဂုံ။ န ကုပ္ပတီတိ န ဝိကာရံ ကရောတိ။
Etassāti mahāgilānassa. Puna etassāti anāgatassa mahāgilānassa. Sappāyabhojananti gilānānaṃ sappāyabhojanaṃ. Missakayāgunti nānātaṇḍule missetvā pacitaṃ yāguṃ. Na kuppatīti na vikāraṃ karoti.
ဣဒမ္ပီတိ ဂိလာနုပဋ္ဌာကဘတ္တမ္ပိ။ တတ္ထာတိ တသ္မိံ ကုလေ။ အသ္သာတိ ဂိလာနသ္သ။ ဧဝံ ဒိန္နာနီတိ ဧဝံ ဝက္ခမာနနယေန ဒိန္နာနိ ဟောန္တိ။ ပိဏ္ဍပာတိကာနမ္ပိ ဝဋ္ဋတီတိ ‘‘ဘိက္ခ’’န္တိ ကပ္ပိယဝောဟာရေန ဝုတ္တတ္တာ ပိဏ္ဍပာတိကာနမ္ပိ ဝဋ္ဋတိ။ န ဝဋ္ဋတီတိ ‘‘ဘတ္တ’’န္တိ အကပ္ပိယဝောဟာရေန ဝုတ္တတ္တာ န ဝဋ္ဋတိ။
Idampīti gilānupaṭṭhākabhattampi. Tatthāti tasmiṃ kule. Assāti gilānassa. Evaṃ dinnānīti evaṃ vakkhamānanayena dinnāni honti. Piṇḍapātikānampi vaṭṭatīti ‘‘bhikkha’’nti kappiyavohārena vuttattā piṇḍapātikānampi vaṭṭati. Na vaṭṭatīti ‘‘bhatta’’nti akappiyavohārena vuttattā na vaṭṭati.
အပရာနိပိ တီဏိ ဘတ္တာနီတိ သမ္ဗန္ဓော။ တတ္ထာတိ တီသု ဘတ္တေသု။ ဓုရဘတ္တန္တိ ဧတ္ထ ဓုရသဒ္ဒသ္သ ဓုဝသဒ္ဒေန အတ္ထတော သဒိသတ္တာ နိစ္စတ္ထောတိ အာဟ ‘‘နိစ္စဘတ္တံ ဝုစ္စတီ’’တိ။ တန္တိ ဓုရဘတ္တံ။ တတ္ထာတိ ဒုဝိဓေသု။ ‘‘သင္ဃိကေ’’တိ ပာဌသေသော ယောဇေတဗ္ဗော။ ပုဂ္ဂလိကေပီတိ ပိသဒ္ဒော ‘‘သင္ဃိကေ’’တိ ပဒံ အပေက္ခတိ။ ပစ္ဆာတိ ပဌမံ ‘‘ဘိက္ခံ ဂဏ္ဟထာ’’တိ ဝုတ္တဝစနတော, ဝုတ္တဝစနသ္သ ဝာ ပရံ။
Aparānipi tīṇi bhattānīti sambandho. Tatthāti tīsu bhattesu. Dhurabhattanti ettha dhurasaddassa dhuvasaddena atthato sadisattā niccatthoti āha ‘‘niccabhattaṃ vuccatī’’ti. Tanti dhurabhattaṃ. Tatthāti duvidhesu. ‘‘Saṅghike’’ti pāṭhaseso yojetabbo. Puggalikepīti pisaddo ‘‘saṅghike’’ti padaṃ apekkhati. Pacchāti paṭhamaṃ ‘‘bhikkhaṃ gaṇhathā’’ti vuttavacanato, vuttavacanassa vā paraṃ.
ကုဋိံ ကတ္ဝာ ဒာတဗ္ဗံ ဘတ္တံ ကုဋိဘတ္တန္တိ ဒသ္သေန္တော အာဟ ‘‘ကုဋိဘတ္တံ နာမာ’’တိအာဒိ။ ယန္တိ ဘတ္တံ, နိဗန္ဓာပိတန္တိ သမ္ဗန္ဓော, သေနာသနဝာသိနော ဘိက္ခူတိ သမ္ဗန္ဓော။ ယံ ပနာတိ ဘတ္တံ ပန, ဒိန္နန္တိ သမ္ဗန္ဓော။ တသ္သေဝာတိ ပုဂ္ဂလသ္သေဝ။ တသ္မိန္တိ ပုဂ္ဂလေ။
Kuṭiṃ katvā dātabbaṃ bhattaṃ kuṭibhattanti dassento āha ‘‘kuṭibhattaṃ nāmā’’tiādi. Yanti bhattaṃ, nibandhāpitanti sambandho, senāsanavāsino bhikkhūti sambandho. Yaṃ panāti bhattaṃ pana, dinnanti sambandho. Tassevāti puggalasseva. Tasminti puggale.
ဝာရေန , ဝာရံ ဂဟေတ္ဝာ ဝာ ဒိန္နံ ဘတ္တံ ဝာရဘတ္တန္တိ ဒသ္သေန္တော အာဟ ‘‘ဝာရဘတ္တံ နာမာ’’တိအာဒိ။ တမ္ပီတိ ဝာရဘတ္တမ္ပိ။ နိဂမနဝသေန သမ္ပိဏ္ဍေတ္ဝာ ဒသ္သေန္တော အာဟ ‘‘ဣတိ ဣမာနိ စာ’’တိအာဒိ။
Vārena , vāraṃ gahetvā vā dinnaṃ bhattaṃ vārabhattanti dassento āha ‘‘vārabhattaṃ nāmā’’tiādi. Tampīti vārabhattampi. Nigamanavasena sampiṇḍetvā dassento āha ‘‘iti imāni cā’’tiādi.
အဋ္ဌကထာယန္တိ မဟာအဋ္ဌကထာယံ, ဝုတ္တာနီတိ သမ္ဗန္ဓော။ တတ္ထာတိ စတူသု ဘတ္တေသု။ ဝိဟာရေ ဥပ္ပန္နံ ဘတ္တံ ဝိဟာရဘတ္တန္တိ ဒသ္သေန္တော အာဟ ‘‘ဝိဟာရဘတ္တံ နာမာ’’တိအာဒိ။ တတ္ရုပ္ပာဒဘတ္တန္တိ တသ္မိံ ဝိဟာရေ ဒိန္နခေတ္တဝတ္ထုအာဒီဟိ ဥပ္ပာဒဘတ္တံ။ တန္တိ ဝိဟာရဘတ္တံ။ ယထာတိ ယေနာကာရေန, ပဋိဂ္ဂဟိယမာနေတိ သမ္ဗန္ဓော။ အဋ္ဌန္နံ သမူဟော, အဋ္ဌ ပရိမာဏာနိ ယသ္သာတိ ဝာ အဋ္ဌကော, တသ္သ ဒိန္နံ ဘတ္တံ အဋ္ဌကဘတ္တံ။ ဧဝံ စတုက္ကဘတ္တန္တိ ဧတ္ထာပိ။ တမေဝတ္ထံ ဒသ္သေန္တော အာဟ ‘‘အဋ္ဌန္နံ ဘိက္ခူနံ ဒေမာ’’တိအာဒိ။ မဟာဘိသင္ခာရိကေနာတိ သဗ္ဗိနောနီတာဒီဟိ မဟန္တော အဘိသင္ခာရော မဟာဘိသင္ခာရော, သော ဧတသ္သ အတ္ထီတိ မဟာဘိသင္ခာရိကော, တေန အတိရသကပူဝေန ပတ္တေ ပက္ခိပိတ္ဝာတိ သမ္ဗန္ဓော။ ‘‘ထကေတ္ဝာ ဒိန္န’’န္တိ ဣမိနာ ဂူဟိတ္ဝာ ဒာတဗ္ဗံ ဂုဠ္ဟကံ, တမေဝ ဘတ္တံ ဂုဠ္ဟကဘတ္တန္တိ ဝစနတ္ထံ ဒသ္သေတိ။
Aṭṭhakathāyanti mahāaṭṭhakathāyaṃ, vuttānīti sambandho. Tatthāti catūsu bhattesu. Vihāre uppannaṃ bhattaṃ vihārabhattanti dassento āha ‘‘vihārabhattaṃ nāmā’’tiādi. Tatruppādabhattanti tasmiṃ vihāre dinnakhettavatthuādīhi uppādabhattaṃ. Tanti vihārabhattaṃ. Yathāti yenākārena, paṭiggahiyamāneti sambandho. Aṭṭhannaṃ samūho, aṭṭha parimāṇāni yassāti vā aṭṭhako, tassa dinnaṃ bhattaṃ aṭṭhakabhattaṃ. Evaṃ catukkabhattanti etthāpi. Tamevatthaṃ dassento āha ‘‘aṭṭhannaṃ bhikkhūnaṃ demā’’tiādi. Mahābhisaṅkhārikenāti sabbinonītādīhi mahanto abhisaṅkhāro mahābhisaṅkhāro, so etassa atthīti mahābhisaṅkhāriko, tena atirasakapūvena patte pakkhipitvāti sambandho. ‘‘Thaketvā dinna’’nti iminā gūhitvā dātabbaṃ guḷhakaṃ, tameva bhattaṃ guḷhakabhattanti vacanatthaṃ dasseti.
ဣဓာတိ ဣမသ္မိံ လောကေ။ ဧကစ္စေ မနုသ္သာ ဒေန္တီတိ သမ္ဗန္ဓော။ ‘‘ဘိက္ခုပရိစ္ဆေဒဇာနနတ္ထံ ဂုဠကေ ဒေန္တီ’’တိ ဣမိနာ ဂုဠကေန ဘိက္ခူ ဂဏေတ္ဝာ ဒာတဗ္ဗံ ဘတ္တံ ဂုဠကဘတ္တန္တိ ဝစနတ္ထံ ဒသ္သေတိ။ ဧတ္ထ စ ပုရိမနယေ ဠကာရေ ဟကာရသံယောဂော အတ္ထိ, ပစ္ဆိမနယေ နတ္ထီတိ ဒဋ္ဌဗ္ဗံ။ ဂုဠပိဏ္ဍဂဏနာယ ဘိက္ခုဂဏနံ ဇာနာတိ။ ဣတီတိအာဒိ နိဂမနံ။ စီဝရဘာဇနီယံ ဝုတ္တန္တိ သမ္ဗန္ဓော။
Idhāti imasmiṃ loke. Ekacce manussā dentīti sambandho. ‘‘Bhikkhuparicchedajānanatthaṃ guḷake dentī’’ti iminā guḷakena bhikkhū gaṇetvā dātabbaṃ bhattaṃ guḷakabhattanti vacanatthaṃ dasseti. Ettha ca purimanaye ḷakāre hakārasaṃyogo atthi, pacchimanaye natthīti daṭṭhabbaṃ. Guḷapiṇḍagaṇanāya bhikkhugaṇanaṃ jānāti. Itītiādi nigamanaṃ. Cīvarabhājanīyaṃ vuttanti sambandho.
သဗ္ဗိအာဒီသု ဘေသဇ္ဇေသူတိ နိဒ္ဓာရဏေ ဘုမ္မံ, ‘‘သဗ္ဗိသ္သာ’’တိ ပဒံ ‘‘ကုမ္ဘသတမ္ပီ’’တိ ပဒေ နိသ္သိတသမ္ဗန္ဓော။
Sabbiādīsu bhesajjesūti niddhāraṇe bhummaṃ, ‘‘sabbissā’’ti padaṃ ‘‘kumbhasatampī’’ti pade nissitasambandho.
ပစ္ဆာ အာဂတာနံ ဒာတဗ္ဗမေဝာတိ ဒုတိယဘာဂေ အဒာတဗ္ဗေယေဝ ပစ္ဆာ အာဂတာနံ ဒာတဗ္ဗမေဝ။ သဗ္ဗသန္နိပာတဋ္ဌာနေယေဝာတိ သဗ္ဗေသံ ဘိက္ခူနံ သန္နိပာတဋ္ဌာနေဝ။ ဘာဇနီယဘဏ္ဍံ နာမ ဘာဇနဋ္ဌာနံ သမ္ပတ္တသ္သေဝ ပာပုဏာတိ, န အသမ္ပတ္တသ္သ။ သဗ္ဗသန္နိပာတဋ္ဌာနေ စ ယေဘုယ္ယေန သမ္ပတ္တော ဟောတိ, တေန ဝုတ္တံ ‘‘သဗ္ဗသန္နိပာတဋ္ဌာနေယေဝာ’’တိ။
Pacchāāgatānaṃ dātabbamevāti dutiyabhāge adātabbeyeva pacchā āgatānaṃ dātabbameva. Sabbasannipātaṭṭhāneyevāti sabbesaṃ bhikkhūnaṃ sannipātaṭṭhāneva. Bhājanīyabhaṇḍaṃ nāma bhājanaṭṭhānaṃ sampattasseva pāpuṇāti, na asampattassa. Sabbasannipātaṭṭhāne ca yebhuyyena sampatto hoti, tena vuttaṃ ‘‘sabbasannipātaṭṭhāneyevā’’ti.
ယထာဌိတံယေဝာတိ ကိဉ္စိ အဘာဇေတ္ဝာ ယထာဌိတံယေဝ။ ‘‘ဒုဂ္ဂဟိတ’’န္တိ ဝတ္ဝာ တဒတ္ထံ ဒသ္သေန္တော အာဟ ‘‘တံ ဂတဂတဋ္ဌာနေ သင္ဃိကမေဝ ဟောတီ’’တိ။ အာဝဇ္ဇေတ္ဝာတိ ပရိဏာမေတ္ဝာ။ တမ္ပီတိ ထာလကေ ပက္ခိတ္တံ သဗ္ဗိမ္ပိ။ ထိနန္တိ ဃနဘာဝေန တိဋ္ဌတီတိ ထိနံ, ဃနန္တိ ဝုတ္တံ ဟောတိ။ ဝုတ္တပရိစ္ဆေဒတောတိ ‘‘ဒသ ဘိက္ခူ, ဒသေဝ စ သဗ္ဗိကုမ္ဘာ’’တိ ဝုတ္တပရိစ္ဆေဒတော။
Yathāṭhitaṃyevāti kiñci abhājetvā yathāṭhitaṃyeva. ‘‘Duggahita’’nti vatvā tadatthaṃ dassento āha ‘‘taṃ gatagataṭṭhāne saṅghikameva hotī’’ti. Āvajjetvāti pariṇāmetvā. Tampīti thālake pakkhittaṃ sabbimpi. Thinanti ghanabhāvena tiṭṭhatīti thinaṃ, ghananti vuttaṃ hoti. Vuttaparicchedatoti ‘‘dasa bhikkhū, daseva ca sabbikumbhā’’ti vuttaparicchedato.
ဂာထာယံ ပာဠိန္တိ ဝိနယပာဠိံ။ အဋ္ဌကထဉ္စေဝာတိ တသ္သာ အဋ္ဌကထဉ္စေဝ။ ဝိစက္ခဏောတိ ဝိဝိဓံ အတ္ထံ စက္ခတိ ပသ္သတီတိ ဝိစက္ခဏော။ ဧဝန္တိ ယထာဝုတ္တနယေန။ တတ္ရာယံ ယောဇနာ – ဧဝံ ဝိစက္ခဏော ဘိက္ခု ပာဠိံ, အဋ္ဌကထဉ္စေဝ ဩလောကေတ္ဝာ အပ္ပမတ္တောဝ ဟုတ္ဝာ သင္ဃိကေ ပစ္စယေ ဘာဇယေတိ။
Gāthāyaṃ pāḷinti vinayapāḷiṃ. Aṭṭhakathañcevāti tassā aṭṭhakathañceva. Vicakkhaṇoti vividhaṃ atthaṃ cakkhati passatīti vicakkhaṇo. Evanti yathāvuttanayena. Tatrāyaṃ yojanā – evaṃ vicakkhaṇo bhikkhu pāḷiṃ, aṭṭhakathañceva oloketvā appamattova hutvā saṅghike paccaye bhājayeti.
ဣတိ ပစ္စယဘာဇနီယကထာယ ယောဇနာ သမတ္တာ။
Iti paccayabhājanīyakathāya yojanā samattā.
ဥပဍ္ဎဘာဂောတိ ဘိက္ခူနံ လဒ္ဓဘာဂတော ဥပဍ္ဎော ဘာဂော။ သေသံ သုဝိညေယ္ယမေဝ။
Upaḍḍhabhāgoti bhikkhūnaṃ laddhabhāgato upaḍḍho bhāgo. Sesaṃ suviññeyyameva.
ဣတိ သေနာသနက္ခန္ဓကဝဏ္ဏနာယ ယောဇနာ သမတ္တာ။
Iti senāsanakkhandhakavaṇṇanāya yojanā samattā.
