| Library / Tipiṭaka / തിപിടക • Tipiṭaka / മഹാവഗ്ഗ-അട്ഠകഥാ • Mahāvagga-aṭṭhakathā |
പാലിലേയ്യകഗമനകഥാ
Pālileyyakagamanakathā
൪൬൭. പാലിലേയ്യകേ വിഹരതി രക്ഖിതവനസണ്ഡേതി പാലിലേയ്യകം ഉപനിസ്സായ രക്ഖിതവനസണ്ഡേ വിഹരതി. ഹത്ഥിനാഗോതി മഹാഹത്ഥീ. ഹത്ഥികലഭേഹീതി ഹത്ഥിപോതകേഹി. ഹത്ഥിച്ഛാപേഹീതി ഖീരൂപകേഹി ദഹരപോതകേഹി. ഛിന്നഗ്ഗാനീതി തേഹി പുരതോ പുരതോ ഗച്ഛന്തേഹി ഛിന്നഗ്ഗാനി ഖായിതാവസേസാനി ഖാണുസദിസാനി തിണാനി ഖാദതി. ഓഭഗ്ഗോഭഗ്ഗന്തി തേന ഹത്ഥിനാഗേന ഉച്ചട്ഠാനതോ ഭഞ്ജിത്വാ ഭഞ്ജിത്വാ പാതിതം. അസ്സ സാഖാഭങ്ഗന്തി ഏതസ്സ സന്തകം സാഖാഭങ്ഗം തേ ഖാദന്തി. ആവിലാനീതി തേഹി പഠമതരം ഓതരിത്വാ പിവന്തേഹി ആലുലിതാനി കദ്ദമോദകാനി പിവതി. ഓഗാഹാതി തിത്ഥതോ.
467.Pālileyyake viharati rakkhitavanasaṇḍeti pālileyyakaṃ upanissāya rakkhitavanasaṇḍe viharati. Hatthināgoti mahāhatthī. Hatthikalabhehīti hatthipotakehi. Hatthicchāpehīti khīrūpakehi daharapotakehi. Chinnaggānīti tehi purato purato gacchantehi chinnaggāni khāyitāvasesāni khāṇusadisāni tiṇāni khādati. Obhaggobhagganti tena hatthināgena uccaṭṭhānato bhañjitvā bhañjitvā pātitaṃ. Assa sākhābhaṅganti etassa santakaṃ sākhābhaṅgaṃ te khādanti. Āvilānīti tehi paṭhamataraṃ otaritvā pivantehi ālulitāni kaddamodakāni pivati. Ogāhāti titthato.
നാഗസ്സ നാഗേനാതി ഹത്ഥിനാഗസ്സ ബുദ്ധനാഗേന. ഈസാദന്തസ്സാതി രഥഈസാസദിസദന്തസ്സ. യദേകോ രമതീ വനേതി യസ്മാ ബുദ്ധനാഗോ വിയ അയമ്പി ഹത്ഥിനാഗോ ഏകോ പവിവിത്തോ വനേ രമതി; തസ്മാസ്സ നാഗസ്സ നാഗേന ചിത്തം സമേതി, ഏകീഭാവരതിയാ ഏകസദിസം ഹോതീതി അത്ഥോ.
Nāgassa nāgenāti hatthināgassa buddhanāgena. Īsādantassāti rathaīsāsadisadantassa. Yadeko ramatī vaneti yasmā buddhanāgo viya ayampi hatthināgo eko pavivitto vane ramati; tasmāssa nāgassa nāgena cittaṃ sameti, ekībhāvaratiyā ekasadisaṃ hotīti attho.
യഥാഭിരന്തം വിഹരിത്വാതി ഏത്ഥ തേമാസം ഭഗവാ തത്ഥ വിഹാസീതി വേദിതബ്ബോ. ഏത്താവതാ കോസമ്ബകേഹി കിര ഉബ്ബാള്ഹോ ഭഗവാ തേമാസം അരഞ്ഞം പവിസിത്വാ വസീതി സബ്ബത്ഥ കഥാ പത്ഥടാ അഹോസി.
Yathābhirantaṃ viharitvāti ettha temāsaṃ bhagavā tattha vihāsīti veditabbo. Ettāvatā kosambakehi kira ubbāḷho bhagavā temāsaṃ araññaṃ pavisitvā vasīti sabbattha kathā patthaṭā ahosi.
അഥ ഖോ കോസമ്ബകാ ഉപാസകാതി അഥ ഖോ ഇമം കഥാസല്ലാപം സുത്വാ കോസമ്ബിവാസിനോ ഉപാസകാ.
Atha kho kosambakā upāsakāti atha kho imaṃ kathāsallāpaṃ sutvā kosambivāsino upāsakā.
Related texts:
തിപിടക (മൂല) • Tipiṭaka (Mūla) / വിനയപിടക • Vinayapiṭaka / മഹാവഗ്ഗപാളി • Mahāvaggapāḷi / ൨൭൫. പാലിലേയ്യകഗമനകഥാ • 275. Pālileyyakagamanakathā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / സാരത്ഥദീപനീ-ടീകാ • Sāratthadīpanī-ṭīkā / പാലിലേയ്യകഗമനകഥാവണ്ണനാ • Pālileyyakagamanakathāvaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വജിരബുദ്ധി-ടീകാ • Vajirabuddhi-ṭīkā / പാലിലേയ്യകഗമനകഥാവണ്ണനാ • Pālileyyakagamanakathāvaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വിമതിവിനോദനീ-ടീകാ • Vimativinodanī-ṭīkā / പാലിലേയ്യകഗമനകഥാവണ്ണനാ • Pālileyyakagamanakathāvaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / പാചിത്യാദിയോജനാപാളി • Pācityādiyojanāpāḷi / ൨൭൫. പാലിലേയ്യകഗമനകഥാ • 275. Pālileyyakagamanakathā
