| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
பாளிமுத்தகவினிச்ச²யவண்ணனா
Pāḷimuttakavinicchayavaṇṇanā
தேன கோ² பன ஸமயேன ச²ப்³ப³க்³கி³யா பி⁴க்கூ² உச்சாவசே பத்தே தா⁴ரெந்தி, உச்சாவசானி பத்தமண்ட³லானி தா⁴ரெந்தீ’’தி (சுளவ॰ 253) ஏவமாதீ³னி வத்தூ²னி நிஸ்ஸாய ‘‘ந, பி⁴க்க²வே, உச்சாவசா பத்தா தா⁴ரேதப்³பா³, யோ தா⁴ரெய்ய, ஆபத்தி து³க்கடஸ்ஸா’’திஆதி³னா நயேன அகப்பியபரிக்கா²ரேஸு ச து³க்கடங் பஞ்ஞத்தங். கஸ்மா? தத³னுலோமத்தா. யத்தா²பி ந பஞ்ஞத்தங், தத்த² ‘‘ந, பி⁴க்க²வே, உச்சாவசானி ச²த்தானி தா⁴ரேதப்³பா³னி, யோ தா⁴ரெய்ய, ஆபத்தி து³க்கடஸ்ஸா’’திஆதி³னா (சூளவ॰ 269-270) நயேன து³க்கடங் ஸம்ப⁴வதி, தஸ்மா ‘‘தத்ராயங் பாளிமுத்தகோ’’தி ஆரபி⁴த்வா ஸப்³ப³பரிக்கா²ரேஸு வண்ணமட்ட²ங், ஸவிகாரங் வா கரொந்தஸ்ஸ ஆபத்தி து³க்கடந்தி தீ³பெந்தேன ‘‘ந வட்டதீ’’தி வுத்தந்தி வேதி³தப்³ப³ங். எத்தா²ஹ – ‘‘அனுஜானாமி, பி⁴க்க²வே, ட²பெத்வா பஹரணிங் ஸப்³ப³ங் லோஹப⁴ண்ட³ங், ட²பெத்வா ஆஸந்தி³ங் பல்லங்கங் தா³ருபத்தங் தா³ருபாது³கங் ஸப்³ப³ங் தா³ருப⁴ண்ட³ங், ட²பெத்வா கதகஞ்ச கும்ப⁴காரிகஞ்ச ஸப்³ப³ங் மத்திகாப⁴ண்ட³’’ந்தி (சூளவ॰ 293) வுத்தத்தா யதா²ட²பிதங் வஜ்ஜெத்வா இதரங் ஸப்³ப³ங் வண்ணமட்ட²ம்பி ஸவிகாரம்பி அவிஸேஸேன வட்டதீதி? வுச்சதே – தங் ந யுத்தங் யதா²த³ஸ்ஸிதபாளிவிரோத⁴தோ, தஸ்மா ‘‘ட²பெத்வா பஹரணி’’ந்தி ஏவங் ஜாதிவஸேன அயங் பாளி பவத்தா, யதா²த³ஸ்ஸிதா பாளி வண்ணமட்டா²தி³விகாரபடிஸேத⁴னவஸேன பவத்தாதி ஏவங் உப⁴யம்பி ந விருஜ்ஜ²தி, தஸ்மா யதா²வுத்தமேவ. ஆரக்³கே³ன நிகா²த³னக்³கே³ன, ‘‘ஆரக்³கே³ரிவ ஸாஸபோ’’தி (ம॰ நி॰ 2.458; த⁴॰ ப॰ 401; ஸு॰ நி॰ 630) எத்த² வுத்தனயதோ ஆரக்³கே³ன.
Tena kho pana samayena chabbaggiyā bhikkhū uccāvace patte dhārenti, uccāvacāni pattamaṇḍalāni dhārentī’’ti (cuḷava. 253) evamādīni vatthūni nissāya ‘‘na, bhikkhave, uccāvacā pattā dhāretabbā, yo dhāreyya, āpatti dukkaṭassā’’tiādinā nayena akappiyaparikkhāresu ca dukkaṭaṃ paññattaṃ. Kasmā? Tadanulomattā. Yatthāpi na paññattaṃ, tattha ‘‘na, bhikkhave, uccāvacāni chattāni dhāretabbāni, yo dhāreyya, āpatti dukkaṭassā’’tiādinā (cūḷava. 269-270) nayena dukkaṭaṃ sambhavati, tasmā ‘‘tatrāyaṃ pāḷimuttako’’ti ārabhitvā sabbaparikkhāresu vaṇṇamaṭṭhaṃ, savikāraṃ vā karontassa āpatti dukkaṭanti dīpentena ‘‘na vaṭṭatī’’ti vuttanti veditabbaṃ. Etthāha – ‘‘anujānāmi, bhikkhave, ṭhapetvā paharaṇiṃ sabbaṃ lohabhaṇḍaṃ, ṭhapetvā āsandiṃ pallaṅkaṃ dārupattaṃ dārupādukaṃ sabbaṃ dārubhaṇḍaṃ, ṭhapetvā katakañca kumbhakārikañca sabbaṃ mattikābhaṇḍa’’nti (cūḷava. 293) vuttattā yathāṭhapitaṃ vajjetvā itaraṃ sabbaṃ vaṇṇamaṭṭhampi savikārampi avisesena vaṭṭatīti? Vuccate – taṃ na yuttaṃ yathādassitapāḷivirodhato, tasmā ‘‘ṭhapetvā paharaṇi’’nti evaṃ jātivasena ayaṃ pāḷi pavattā, yathādassitā pāḷi vaṇṇamaṭṭhādivikārapaṭisedhanavasena pavattāti evaṃ ubhayampi na virujjhati, tasmā yathāvuttameva. Āraggena nikhādanaggena, ‘‘āraggeriva sāsapo’’ti (ma. ni. 2.458; dha. pa. 401; su. ni. 630) ettha vuttanayato āraggena.
பட்டமுகே² வாதி பட்டகோடியங். பரியந்தேதி சீவரபரியந்தே. வேணிஉஹுமுனியுபேஞ்ஞாம. அக்³கி⁴யந்தி சேதியங். க³யமுக்³க³ரந்தி துலாத³ண்ட³ஸண்டா²னங், க³யா ஸீஸே ஸூசிகா ஹோதி, முக²பத்தா லத்³ரா. உக்கிரந்தி நீஹரந்தி கரொந்தி ட²பெந்தி. கோணஸுத்தபிளகா நாம க³ண்டி²கபட்டாதி³கோணேஸு ஸுத்தமயபிளகா. யங் எத்த² சீவரங் வா பத்தோ வா ‘‘ந வட்டதீ’’தி வுத்தோ, தத்த² அதி⁴ட்டா²னங் ருஹதி, விகப்பனாபி ருஹதீதி வேதி³தப்³ப³ங். தெ³ட்³டு³போ⁴தி உத³கஸப்போ. அச்சீ²தி குஞ்ஜரக்கி². கோ³முத்தகந்தி கோ³முத்தஸண்டா²னா ராஜியோ. குஞ்சிகாய ஸேனாஸனபரிக்கா²ரத்தா ஸுவண்ணரூபியமயாபி வட்டதீதி சா²யா தி³ஸ்ஸதி, ‘‘குஞ்சிகாய வண்ணமட்ட²கம்மங் ந வட்டதீ’’தி வசனதோ அஞ்ஞே கப்பியலோஹாதி³மயாவ குஞ்சிகா கப்பந்தி பரிஹரணீயபரிக்கா²ரத்தா. ஆரகண்டகோ பொத்த²காதி³கரணஸத்த²கஜாதி. ‘‘ஆமண்ட³கஸாரகோ ஆமலகப²லமயோ’’தி வத³ந்தி . தாலபண்ணபீ³ஜனீஆதீ³ஸு ‘‘வண்ணமட்ட²கம்மங் வட்டதீ’’தி வுத்தங். கிஞ்சாபி தானி குஞ்சிகா விய பரிஹரணீயானி, அத² கோ² ‘‘உச்சாவசானி ந தா⁴ரேதப்³பா³னீ’’தி படிக்கே²பாபா⁴வதோ வுத்தங். கேவலஞ்ஹி தானி ‘‘அனுஜானாமி, பி⁴க்க²வே, விதூ⁴பனஞ்ச தாலவண்டஞ்சா’’திஆதி³னா (சூளவ॰ 269) வுத்தானி. க³ண்டி²பதே³ பன ‘‘தேலபா⁴ஜனேஸு வண்ணமட்ட²கம்மங் வட்டதீதி ஸேனாஸனபரிக்கா²ரத்தா’’தி வுத்தங். ராஜவல்லபா⁴தி ராஜகுலூபகா. ஸீமாதி இதா⁴தி⁴ப்பேதா பூ⁴மி, ப³த்³த⁴ஸீமா ச. ‘‘யேஸங் ஸந்தகா தேஸங் ஸீமா, தத்த² பரேஹி ந கத்தப்³ப³’’ந்தி அனுக³ண்டி²பதே³ வுத்தங். ‘‘பூ⁴மி ச ஸீமா ச யேஸங் ஸந்தகா, தேஹி ஏவ வாரேதப்³பா³. யேஸங் பன அஞ்ஞேஸங் பூ⁴மியங் ஸீமா கதா, தே வாரேதுங் ந இஸ்ஸரா’’தி வத³ந்தி . ‘‘ஸங்க⁴பே⁴தா³தீ³னங் காரணத்தா ‘மா கரோதா²’தி படிஸேதே⁴தப்³பா³ ஏவா’’தி அந்த⁴கட்ட²கதா²யங் வுத்தங் கிர.
Paṭṭamukhe vāti paṭṭakoṭiyaṃ. Pariyanteti cīvarapariyante. Veṇiuhumuniyupeññāma. Agghiyanti cetiyaṃ. Gayamuggaranti tulādaṇḍasaṇṭhānaṃ, gayā sīse sūcikā hoti, mukhapattā ladrā. Ukkiranti nīharanti karonti ṭhapenti. Koṇasuttapiḷakā nāma gaṇṭhikapaṭṭādikoṇesu suttamayapiḷakā. Yaṃ ettha cīvaraṃ vā patto vā ‘‘na vaṭṭatī’’ti vutto, tattha adhiṭṭhānaṃ ruhati, vikappanāpi ruhatīti veditabbaṃ. Deḍḍubhoti udakasappo. Acchīti kuñjarakkhi. Gomuttakanti gomuttasaṇṭhānā rājiyo. Kuñcikāya senāsanaparikkhārattā suvaṇṇarūpiyamayāpi vaṭṭatīti chāyā dissati, ‘‘kuñcikāya vaṇṇamaṭṭhakammaṃ na vaṭṭatī’’ti vacanato aññe kappiyalohādimayāva kuñcikā kappanti pariharaṇīyaparikkhārattā. Ārakaṇṭako potthakādikaraṇasatthakajāti. ‘‘Āmaṇḍakasārako āmalakaphalamayo’’ti vadanti . Tālapaṇṇabījanīādīsu ‘‘vaṇṇamaṭṭhakammaṃ vaṭṭatī’’ti vuttaṃ. Kiñcāpi tāni kuñcikā viya pariharaṇīyāni, atha kho ‘‘uccāvacāni na dhāretabbānī’’ti paṭikkhepābhāvato vuttaṃ. Kevalañhi tāni ‘‘anujānāmi, bhikkhave, vidhūpanañca tālavaṇṭañcā’’tiādinā (cūḷava. 269) vuttāni. Gaṇṭhipade pana ‘‘telabhājanesu vaṇṇamaṭṭhakammaṃ vaṭṭatīti senāsanaparikkhārattā’’ti vuttaṃ. Rājavallabhāti rājakulūpakā. Sīmāti idhādhippetā bhūmi, baddhasīmā ca. ‘‘Yesaṃ santakā tesaṃ sīmā, tattha parehi na kattabba’’nti anugaṇṭhipade vuttaṃ. ‘‘Bhūmi ca sīmā ca yesaṃ santakā, tehi eva vāretabbā. Yesaṃ pana aññesaṃ bhūmiyaṃ sīmā katā, te vāretuṃ na issarā’’ti vadanti . ‘‘Saṅghabhedādīnaṃ kāraṇattā ‘mā karothā’ti paṭisedhetabbā evā’’ti andhakaṭṭhakathāyaṃ vuttaṃ kira.
86-7. தா³ருகுடிகங் காதுங், கத்துந்தி ச அத்தி². க²ண்டா³க²ண்டி³கந்தி ப²லாப²லங் விய த³ட்ட²ப்³ப³ங். ஆணாபேஹீதி வசனங் அனிட்டே² ஏவ வுச்சதீதி கத்வா ப³ந்த⁴ங் ஆணாபேஸி. இஸ்ஸரியமத்தாயாதி ஸமித்³தி⁴யங் மத்தாஸத்³தோ³தி ஞாபேதி.
86-7. Dārukuṭikaṃ kātuṃ, kattunti ca atthi. Khaṇḍākhaṇḍikanti phalāphalaṃ viya daṭṭhabbaṃ. Āṇāpehīti vacanaṃ aniṭṭhe eva vuccatīti katvā bandhaṃ āṇāpesi. Issariyamattāyāti samiddhiyaṃ mattāsaddoti ñāpeti.
88. ‘‘ஏவரூபங் வாசங் பா⁴ஸித்வா’’தி ச பாடோ². லோமேன த்வங் முத்தோ, மா புனபி ஏவரூபமகாஸீதி இத³ங் கிங் ப்³யாபாத³தீ³பகங், தா³ரூஸுபி லோப⁴க்க²ந்த⁴தீ³பகங் வசனங் ஸோதாபன்னஸ்ஸ ஸதோ தஸ்ஸ ராஜஸ்ஸ பதிரூபங். நனு நாம ‘‘புப்³பே³ கதங் ஸுகதங் ப⁴ந்தே, வதெ³ய்யாத² புனபி யேனத்தோ²’’தி பவாரெத்வா அதீவ பீதிபாமோஜ்ஜங் உப்பாதே³தப்³ப³ங் தேன ஸியாதி? ஸச்சமேதங் ஸோதாபன்னத்தா அதீவ பு³த்³த⁴மாமகோ த⁴ம்மமாமகோ ஸங்க⁴மாமகோ ச, தஸ்மா பி⁴க்கூ²னங் அகப்பியங் அஸஹந்தோ, ஸிக்கா²பத³பஞ்ஞத்தியா ச ஓகாஸங் கத்துகாமோ ‘‘ஸுபயுத்தானி மே தா³ரூனீ’’தி துட்ட²சித்தோபி ஏவமாஹாதி வேதி³தப்³ப³ங். இமேஹி நாம ஏவரூபே டா²னே. ‘‘ஆக³தபதா³னுரூபேனாதி அஞ்ஞேஹி வா பதே³ஹி, இதோ தோ²கதரேஹி வா ஆக³தகாலே தத³னுரூபா யோஜனா காதப்³பா³’’தி க³ண்டி²பதே³ வுத்தங். ‘‘ந கேவலங் இமஸ்மிங்யேவ ஸிக்கா²பதே³, அஞ்ஞேஸுபி ஆக³ச்ச²ந்தி, தஸ்மா தத்த² தத்த² ஆக³தபதா³னுரூபேன யோஜனா வேதி³தப்³பா³’’தி அனுக³ண்டி²பதே³ வுத்தங். உஜ்ஜா²யனத்தோ² அதி³ன்னஸ்ஸாதி³ன்னத்தாவ, தே உஜ்ஜா²யிங்ஸு.
88. ‘‘Evarūpaṃ vācaṃ bhāsitvā’’ti ca pāṭho. Lomena tvaṃ mutto, mā punapi evarūpamakāsīti idaṃ kiṃ byāpādadīpakaṃ, dārūsupi lobhakkhandhadīpakaṃ vacanaṃ sotāpannassa sato tassa rājassa patirūpaṃ. Nanu nāma ‘‘pubbe kataṃ sukataṃ bhante, vadeyyātha punapi yenattho’’ti pavāretvā atīva pītipāmojjaṃ uppādetabbaṃ tena siyāti? Saccametaṃ sotāpannattā atīva buddhamāmako dhammamāmako saṅghamāmako ca, tasmā bhikkhūnaṃ akappiyaṃ asahanto, sikkhāpadapaññattiyā ca okāsaṃ kattukāmo ‘‘supayuttāni me dārūnī’’ti tuṭṭhacittopi evamāhāti veditabbaṃ. Imehi nāma evarūpe ṭhāne. ‘‘Āgatapadānurūpenāti aññehi vā padehi, ito thokatarehi vā āgatakāle tadanurūpā yojanā kātabbā’’ti gaṇṭhipade vuttaṃ. ‘‘Na kevalaṃ imasmiṃyeva sikkhāpade, aññesupi āgacchanti, tasmā tattha tattha āgatapadānurūpena yojanā veditabbā’’ti anugaṇṭhipade vuttaṃ. Ujjhāyanattho adinnassādinnattāva, te ujjhāyiṃsu.
ருத்³ரதா³மகோ நாம ருத்³ரதா³மகாதீ³ஹி உப்பாதி³தோ. பா³ராணஸினக³ராதீ³ஸு தேஹி தேஹி ராஜூஹி போராணஸத்தா²னுரூபங் லக்க²ணஸம்பன்னா உப்பாதி³தா நீலகஹாபணா. தேஸங் கிர திபா⁴க³ங் அக்³க⁴தி ருத்³ரதா³மகோ, தஸ்மா தஸ்ஸ பாதோ³ து²ல்லச்சயவத்து² ஹோதி. மாஸகோ பன இத⁴ அப்பமாணங். கஹாபணோ கிஞ்சிகாலே ஊனவீஸதிமாஸகோ ஹோதி, கிஞ்சி காலே அதிரேகவீஸதிமாஸகோ. தஸ்மா தஸ்ஸ கஹாபணஸ்ஸ சதுத்த²பா⁴கோ³ பஞ்சமாஸகோ விய அதிரேகபஞ்சமாஸகோ வா ஊனபஞ்சமாஸகோ வா பாதோ³தி வேதி³தப்³ப³ங். இமஸ்ஸத்த²ஸ்ஸ தீ³பனத்த²ங் ‘‘ததா³ ராஜக³ஹே வீஸதிமாஸகோ கஹாபணோ ஹோதீ’’திஆதி³ வுத்தங். தத்த² ரஜதமயோ ஸுவண்ணமயோ தம்ப³மயோ ச கஹாபணோ ஹோதி. ஸுவண்ணபூ⁴மியங் விய பாதோ³பி யத்த² தம்ப³மயோவ கதோ ஹோதி, தத்த² ஸோவ பாதோ³தி ஆசரியோ. யஸ்மா பாதோ³ ஏகனீலகஹாபணக்³க⁴னகோ, தஸ்மா தஸ்ஸ பாத³ஸ்ஸ சதுத்த²பா⁴கோ³வ ஸியா பாதோ³தி ஏகே. இத³ங் ந யுஜ்ஜதி. யோ ச தத்த² பாதா³ரஹோ ப⁴ண்டோ³, தஸ்ஸ சதுத்த²பா⁴க³ஸ்ஸேவ பாராஜிகவத்து²பா⁴வப்பஸங்க³தோ. யதி³ பாதா³ரஹங் ப⁴ண்ட³ங் பாராஜிகவத்து², ஸித்³த⁴ங் ‘‘ஸோவ பாதோ³ பச்சி²மங் பாராஜிகவத்தூ²’’தி . ந ஹி ஸப்³ப³த்த² ப⁴ண்ட³ங் க³ஹெத்வா நீலகஹாபணக்³கே⁴ன அக்³கா⁴பெந்தி. யஸ்மா தஸ்ஸ தஸ்ஸேவ கஹாபணக்³கே⁴ன அக்³கா⁴பெந்தி, தஸ்மா தஸ்ஸ தஸ்ஸ ஜனபத³ஸ்ஸ பாதோ³வ பாதோ³தி தத³க்³க⁴னகமேவ பாத³க்³க⁴னகந்தி ஸித்³த⁴ங், ‘‘ஸோ ச கோ² போராணஸ்ஸ நீலகஹாபணஸ்ஸ வஸேன, ந இதரேஸந்தி யத்த² பன நீலகஹாபணா வளஞ்ஜங் க³ச்ச²ந்தி, தத்தே²வா’’தி கேசி வத³ந்தி, உபபரிக்கி²த்வா க³ஹேதப்³ப³ங்.
Rudradāmako nāma rudradāmakādīhi uppādito. Bārāṇasinagarādīsu tehi tehi rājūhi porāṇasatthānurūpaṃ lakkhaṇasampannā uppāditā nīlakahāpaṇā. Tesaṃ kira tibhāgaṃ agghati rudradāmako, tasmā tassa pādo thullaccayavatthu hoti. Māsako pana idha appamāṇaṃ. Kahāpaṇo kiñcikāle ūnavīsatimāsako hoti, kiñci kāle atirekavīsatimāsako. Tasmā tassa kahāpaṇassa catutthabhāgo pañcamāsako viya atirekapañcamāsako vā ūnapañcamāsako vā pādoti veditabbaṃ. Imassatthassa dīpanatthaṃ ‘‘tadā rājagahe vīsatimāsako kahāpaṇo hotī’’tiādi vuttaṃ. Tattha rajatamayo suvaṇṇamayo tambamayo ca kahāpaṇo hoti. Suvaṇṇabhūmiyaṃ viya pādopi yattha tambamayova kato hoti, tattha sova pādoti ācariyo. Yasmā pādo ekanīlakahāpaṇagghanako, tasmā tassa pādassa catutthabhāgova siyā pādoti eke. Idaṃ na yujjati. Yo ca tattha pādāraho bhaṇḍo, tassa catutthabhāgasseva pārājikavatthubhāvappasaṅgato. Yadi pādārahaṃ bhaṇḍaṃ pārājikavatthu, siddhaṃ ‘‘sova pādo pacchimaṃ pārājikavatthū’’ti . Na hi sabbattha bhaṇḍaṃ gahetvā nīlakahāpaṇagghena agghāpenti. Yasmā tassa tasseva kahāpaṇagghena agghāpenti, tasmā tassa tassa janapadassa pādova pādoti tadagghanakameva pādagghanakanti siddhaṃ, ‘‘so ca kho porāṇassa nīlakahāpaṇassa vasena, na itaresanti yattha pana nīlakahāpaṇā vaḷañjaṃ gacchanti, tatthevā’’ti keci vadanti, upaparikkhitvā gahetabbaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பாளிமுத்தகவினிச்ச²யவண்ணனா • Pāḷimuttakavinicchayavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பாளிமுத்தகவினிச்ச²யவண்ணனா • Pāḷimuttakavinicchayavaṇṇanā
