| Library / Tipiṭaka / တိပိဋက • Tipiṭaka / ဝဇိရဗုဒ္ဓိ-ဋီကာ • Vajirabuddhi-ṭīkā |
ပာဠိမုတ္တကဝိနိစ္ဆယဝဏ္ဏနာ
Pāḷimuttakavinicchayavaṇṇanā
တေန ခော ပန သမယေန ဆဗ္ဗဂ္ဂိယာ ဘိက္ခူ ဥစ္စာဝစေ ပတ္တေ ဓာရေန္တိ, ဥစ္စာဝစာနိ ပတ္တမဏ္ဍလာနိ ဓာရေန္တီ’’တိ (စုဠဝ. ၂၅၃) ဧဝမာဒီနိ ဝတ္ထူနိ နိသ္သာယ ‘‘န, ဘိက္ခဝေ, ဥစ္စာဝစာ ပတ္တာ ဓာရေတဗ္ဗာ, ယော ဓာရေယ္ယ, အာပတ္တိ ဒုက္ကဋသ္သာ’’တိအာဒိနာ နယေန အကပ္ပိယပရိက္ခာရေသု စ ဒုက္ကဋံ ပညတ္တံ။ ကသ္မာ? တဒနုလောမတ္တာ။ ယတ္ထာပိ န ပညတ္တံ, တတ္ထ ‘‘န, ဘိက္ခဝေ, ဥစ္စာဝစာနိ ဆတ္တာနိ ဓာရေတဗ္ဗာနိ, ယော ဓာရေယ္ယ, အာပတ္တိ ဒုက္ကဋသ္သာ’’တိအာဒိနာ (စူဠဝ. ၂၆၉-၂၇၀) နယေန ဒုက္ကဋံ သမ္ဘဝတိ, တသ္မာ ‘‘တတ္ရာယံ ပာဠိမုတ္တကော’’တိ အာရဘိတ္ဝာ သဗ္ဗပရိက္ခာရေသု ဝဏ္ဏမဋ္ဌံ, သဝိကာရံ ဝာ ကရောန္တသ္သ အာပတ္တိ ဒုက္ကဋန္တိ ဒီပေန္တေန ‘‘န ဝဋ္ဋတီ’’တိ ဝုတ္တန္တိ ဝေဒိတဗ္ဗံ။ ဧတ္ထာဟ – ‘‘အနုဇာနာမိ, ဘိက္ခဝေ, ဌပေတ္ဝာ ပဟရဏိံ သဗ္ဗံ လောဟဘဏ္ဍံ, ဌပေတ္ဝာ အာသန္ဒိံ ပလ္လင္ကံ ဒာရုပတ္တံ ဒာရုပာဒုကံ သဗ္ဗံ ဒာရုဘဏ္ဍံ, ဌပေတ္ဝာ ကတကဉ္စ ကုမ္ဘကာရိကဉ္စ သဗ္ဗံ မတ္တိကာဘဏ္ဍ’’န္တိ (စူဠဝ. ၂၉၃) ဝုတ္တတ္တာ ယထာဌပိတံ ဝဇ္ဇေတ္ဝာ ဣတရံ သဗ္ဗံ ဝဏ္ဏမဋ္ဌမ္ပိ သဝိကာရမ္ပိ အဝိသေသေန ဝဋ္ဋတီတိ? ဝုစ္စတေ – တံ န ယုတ္တံ ယထာဒသ္သိတပာဠိဝိရောဓတော, တသ္မာ ‘‘ဌပေတ္ဝာ ပဟရဏိ’’န္တိ ဧဝံ ဇာတိဝသေန အယံ ပာဠိ ပဝတ္တာ, ယထာဒသ္သိတာ ပာဠိ ဝဏ္ဏမဋ္ဌာဒိဝိကာရပဋိသေဓနဝသေန ပဝတ္တာတိ ဧဝံ ဥဘယမ္ပိ န ဝိရုဇ္ဈတိ, တသ္မာ ယထာဝုတ္တမေဝ။ အာရဂ္ဂေန နိခာဒနဂ္ဂေန, ‘‘အာရဂ္ဂေရိဝ သာသပော’’တိ (မ. နိ. ၂.၄၅၈; ဓ. ပ. ၄၀၁; သု. နိ. ၆၃၀) ဧတ္ထ ဝုတ္တနယတော အာရဂ္ဂေန။
Tena kho pana samayena chabbaggiyā bhikkhū uccāvace patte dhārenti, uccāvacāni pattamaṇḍalāni dhārentī’’ti (cuḷava. 253) evamādīni vatthūni nissāya ‘‘na, bhikkhave, uccāvacā pattā dhāretabbā, yo dhāreyya, āpatti dukkaṭassā’’tiādinā nayena akappiyaparikkhāresu ca dukkaṭaṃ paññattaṃ. Kasmā? Tadanulomattā. Yatthāpi na paññattaṃ, tattha ‘‘na, bhikkhave, uccāvacāni chattāni dhāretabbāni, yo dhāreyya, āpatti dukkaṭassā’’tiādinā (cūḷava. 269-270) nayena dukkaṭaṃ sambhavati, tasmā ‘‘tatrāyaṃ pāḷimuttako’’ti ārabhitvā sabbaparikkhāresu vaṇṇamaṭṭhaṃ, savikāraṃ vā karontassa āpatti dukkaṭanti dīpentena ‘‘na vaṭṭatī’’ti vuttanti veditabbaṃ. Etthāha – ‘‘anujānāmi, bhikkhave, ṭhapetvā paharaṇiṃ sabbaṃ lohabhaṇḍaṃ, ṭhapetvā āsandiṃ pallaṅkaṃ dārupattaṃ dārupādukaṃ sabbaṃ dārubhaṇḍaṃ, ṭhapetvā katakañca kumbhakārikañca sabbaṃ mattikābhaṇḍa’’nti (cūḷava. 293) vuttattā yathāṭhapitaṃ vajjetvā itaraṃ sabbaṃ vaṇṇamaṭṭhampi savikārampi avisesena vaṭṭatīti? Vuccate – taṃ na yuttaṃ yathādassitapāḷivirodhato, tasmā ‘‘ṭhapetvā paharaṇi’’nti evaṃ jātivasena ayaṃ pāḷi pavattā, yathādassitā pāḷi vaṇṇamaṭṭhādivikārapaṭisedhanavasena pavattāti evaṃ ubhayampi na virujjhati, tasmā yathāvuttameva. Āraggena nikhādanaggena, ‘‘āraggeriva sāsapo’’ti (ma. ni. 2.458; dha. pa. 401; su. ni. 630) ettha vuttanayato āraggena.
ပဋ္ဋမုခေ ဝာတိ ပဋ္ဋကောဋိယံ။ ပရိယန္တေတိ စီဝရပရိယန္တေ။ ဝေဏိဥဟုမုနိယုပေညာမ။ အဂ္ဃိယန္တိ စေတိယံ။ ဂယမုဂ္ဂရန္တိ တုလာဒဏ္ဍသဏ္ဌာနံ, ဂယာ သီသေ သူစိကာ ဟောတိ, မုခပတ္တာ လဒ္ရာ။ ဥက္ကိရန္တိ နီဟရန္တိ ကရောန္တိ ဌပေန္တိ။ ကောဏသုတ္တပိဠကာ နာမ ဂဏ္ဌိကပဋ္ဋာဒိကောဏေသု သုတ္တမယပိဠကာ။ ယံ ဧတ္ထ စီဝရံ ဝာ ပတ္တော ဝာ ‘‘န ဝဋ္ဋတီ’’တိ ဝုတ္တော, တတ္ထ အဓိဋ္ဌာနံ ရုဟတိ, ဝိကပ္ပနာပိ ရုဟတီတိ ဝေဒိတဗ္ဗံ။ ဒေဍ္ဍုဘောတိ ဥဒကသပ္ပော။ အစ္ဆီတိ ကုဉ္ဇရက္ခိ။ ဂောမုတ္တကန္တိ ဂောမုတ္တသဏ္ဌာနာ ရာဇိယော။ ကုဉ္စိကာယ သေနာသနပရိက္ခာရတ္တာ သုဝဏ္ဏရူပိယမယာပိ ဝဋ္ဋတီတိ ဆာယာ ဒိသ္သတိ, ‘‘ကုဉ္စိကာယ ဝဏ္ဏမဋ္ဌကမ္မံ န ဝဋ္ဋတီ’’တိ ဝစနတော အညေ ကပ္ပိယလောဟာဒိမယာဝ ကုဉ္စိကာ ကပ္ပန္တိ ပရိဟရဏီယပရိက္ခာရတ္တာ။ အာရကဏ္ဋကော ပောတ္ထကာဒိကရဏသတ္ထကဇာတိ။ ‘‘အာမဏ္ဍကသာရကော အာမလကဖလမယော’’တိ ဝဒန္တိ ။ တာလပဏ္ဏဗီဇနီအာဒီသု ‘‘ဝဏ္ဏမဋ္ဌကမ္မံ ဝဋ္ဋတီ’’တိ ဝုတ္တံ။ ကိဉ္စာပိ တာနိ ကုဉ္စိကာ ဝိယ ပရိဟရဏီယာနိ, အထ ခော ‘‘ဥစ္စာဝစာနိ န ဓာရေတဗ္ဗာနီ’’တိ ပဋိက္ခေပာဘာဝတော ဝုတ္တံ။ ကေဝလဉ္ဟိ တာနိ ‘‘အနုဇာနာမိ, ဘိက္ခဝေ, ဝိဓူပနဉ္စ တာလဝဏ္ဋဉ္စာ’’တိအာဒိနာ (စူဠဝ. ၂၆၉) ဝုတ္တာနိ။ ဂဏ္ဌိပဒေ ပန ‘‘တေလဘာဇနေသု ဝဏ္ဏမဋ္ဌကမ္မံ ဝဋ္ဋတီတိ သေနာသနပရိက္ခာရတ္တာ’’တိ ဝုတ္တံ။ ရာဇဝလ္လဘာတိ ရာဇကုလူပကာ။ သီမာတိ ဣဓာဓိပ္ပေတာ ဘူမိ, ဗဒ္ဓသီမာ စ။ ‘‘ယေသံ သန္တကာ တေသံ သီမာ, တတ္ထ ပရေဟိ န ကတ္တဗ္ဗ’’န္တိ အနုဂဏ္ဌိပဒေ ဝုတ္တံ။ ‘‘ဘူမိ စ သီမာ စ ယေသံ သန္တကာ, တေဟိ ဧဝ ဝာရေတဗ္ဗာ။ ယေသံ ပန အညေသံ ဘူမိယံ သီမာ ကတာ, တေ ဝာရေတုံ န ဣသ္သရာ’’တိ ဝဒန္တိ ။ ‘‘သင္ဃဘေဒာဒီနံ ကာရဏတ္တာ ‘မာ ကရောထာ’တိ ပဋိသေဓေတဗ္ဗာ ဧဝာ’’တိ အန္ဓကဋ္ဌကထာယံ ဝုတ္တံ ကိရ။
Paṭṭamukhe vāti paṭṭakoṭiyaṃ. Pariyanteti cīvarapariyante. Veṇiuhumuniyupeññāma. Agghiyanti cetiyaṃ. Gayamuggaranti tulādaṇḍasaṇṭhānaṃ, gayā sīse sūcikā hoti, mukhapattā ladrā. Ukkiranti nīharanti karonti ṭhapenti. Koṇasuttapiḷakā nāma gaṇṭhikapaṭṭādikoṇesu suttamayapiḷakā. Yaṃ ettha cīvaraṃ vā patto vā ‘‘na vaṭṭatī’’ti vutto, tattha adhiṭṭhānaṃ ruhati, vikappanāpi ruhatīti veditabbaṃ. Deḍḍubhoti udakasappo. Acchīti kuñjarakkhi. Gomuttakanti gomuttasaṇṭhānā rājiyo. Kuñcikāya senāsanaparikkhārattā suvaṇṇarūpiyamayāpi vaṭṭatīti chāyā dissati, ‘‘kuñcikāya vaṇṇamaṭṭhakammaṃ na vaṭṭatī’’ti vacanato aññe kappiyalohādimayāva kuñcikā kappanti pariharaṇīyaparikkhārattā. Ārakaṇṭako potthakādikaraṇasatthakajāti. ‘‘Āmaṇḍakasārako āmalakaphalamayo’’ti vadanti . Tālapaṇṇabījanīādīsu ‘‘vaṇṇamaṭṭhakammaṃ vaṭṭatī’’ti vuttaṃ. Kiñcāpi tāni kuñcikā viya pariharaṇīyāni, atha kho ‘‘uccāvacāni na dhāretabbānī’’ti paṭikkhepābhāvato vuttaṃ. Kevalañhi tāni ‘‘anujānāmi, bhikkhave, vidhūpanañca tālavaṇṭañcā’’tiādinā (cūḷava. 269) vuttāni. Gaṇṭhipade pana ‘‘telabhājanesu vaṇṇamaṭṭhakammaṃ vaṭṭatīti senāsanaparikkhārattā’’ti vuttaṃ. Rājavallabhāti rājakulūpakā. Sīmāti idhādhippetā bhūmi, baddhasīmā ca. ‘‘Yesaṃ santakā tesaṃ sīmā, tattha parehi na kattabba’’nti anugaṇṭhipade vuttaṃ. ‘‘Bhūmi ca sīmā ca yesaṃ santakā, tehi eva vāretabbā. Yesaṃ pana aññesaṃ bhūmiyaṃ sīmā katā, te vāretuṃ na issarā’’ti vadanti . ‘‘Saṅghabhedādīnaṃ kāraṇattā ‘mā karothā’ti paṭisedhetabbā evā’’ti andhakaṭṭhakathāyaṃ vuttaṃ kira.
၈၆-၇. ဒာရုကုဋိကံ ကာတုံ, ကတ္တုန္တိ စ အတ္ထိ။ ခဏ္ဍာခဏ္ဍိကန္တိ ဖလာဖလံ ဝိယ ဒဋ္ဌဗ္ဗံ။ အာဏာပေဟီတိ ဝစနံ အနိဋ္ဌေ ဧဝ ဝုစ္စတီတိ ကတ္ဝာ ဗန္ဓံ အာဏာပေသိ။ ဣသ္သရိယမတ္တာယာတိ သမိဒ္ဓိယံ မတ္တာသဒ္ဒောတိ ဉာပေတိ။
86-7. Dārukuṭikaṃ kātuṃ, kattunti ca atthi. Khaṇḍākhaṇḍikanti phalāphalaṃ viya daṭṭhabbaṃ. Āṇāpehīti vacanaṃ aniṭṭhe eva vuccatīti katvā bandhaṃ āṇāpesi. Issariyamattāyāti samiddhiyaṃ mattāsaddoti ñāpeti.
၈၈. ‘‘ဧဝရူပံ ဝာစံ ဘာသိတ္ဝာ’’တိ စ ပာဌော။ လောမေန တ္ဝံ မုတ္တော, မာ ပုနပိ ဧဝရူပမကာသီတိ ဣဒံ ကိံ ဗ္ယာပာဒဒီပကံ, ဒာရူသုပိ လောဘက္ခန္ဓဒီပကံ ဝစနံ သောတာပန္နသ္သ သတော တသ္သ ရာဇသ္သ ပတိရူပံ။ နနု နာမ ‘‘ပုဗ္ဗေ ကတံ သုကတံ ဘန္တေ, ဝဒေယ္ယာထ ပုနပိ ယေနတ္ထော’’တိ ပဝာရေတ္ဝာ အတီဝ ပီတိပာမောဇ္ဇံ ဥပ္ပာဒေတဗ္ဗံ တေန သိယာတိ? သစ္စမေတံ သောတာပန္နတ္တာ အတီဝ ဗုဒ္ဓမာမကော ဓမ္မမာမကော သင္ဃမာမကော စ, တသ္မာ ဘိက္ခူနံ အကပ္ပိယံ အသဟန္တော, သိက္ခာပဒပညတ္တိယာ စ ဩကာသံ ကတ္တုကာမော ‘‘သုပယုတ္တာနိ မေ ဒာရူနီ’’တိ တုဋ္ဌစိတ္တောပိ ဧဝမာဟာတိ ဝေဒိတဗ္ဗံ။ ဣမေဟိ နာမ ဧဝရူပေ ဌာနေ။ ‘‘အာဂတပဒာနုရူပေနာတိ အညေဟိ ဝာ ပဒေဟိ, ဣတော ထောကတရေဟိ ဝာ အာဂတကာလေ တဒနုရူပာ ယောဇနာ ကာတဗ္ဗာ’’တိ ဂဏ္ဌိပဒေ ဝုတ္တံ။ ‘‘န ကေဝလံ ဣမသ္မိံယေဝ သိက္ခာပဒေ, အညေသုပိ အာဂစ္ဆန္တိ, တသ္မာ တတ္ထ တတ္ထ အာဂတပဒာနုရူပေန ယောဇနာ ဝေဒိတဗ္ဗာ’’တိ အနုဂဏ္ဌိပဒေ ဝုတ္တံ။ ဥဇ္ဈာယနတ္ထော အဒိန္နသ္သာဒိန္နတ္တာဝ, တေ ဥဇ္ဈာယိံသု။
88. ‘‘Evarūpaṃ vācaṃ bhāsitvā’’ti ca pāṭho. Lomena tvaṃ mutto, mā punapi evarūpamakāsīti idaṃ kiṃ byāpādadīpakaṃ, dārūsupi lobhakkhandhadīpakaṃ vacanaṃ sotāpannassa sato tassa rājassa patirūpaṃ. Nanu nāma ‘‘pubbe kataṃ sukataṃ bhante, vadeyyātha punapi yenattho’’ti pavāretvā atīva pītipāmojjaṃ uppādetabbaṃ tena siyāti? Saccametaṃ sotāpannattā atīva buddhamāmako dhammamāmako saṅghamāmako ca, tasmā bhikkhūnaṃ akappiyaṃ asahanto, sikkhāpadapaññattiyā ca okāsaṃ kattukāmo ‘‘supayuttāni me dārūnī’’ti tuṭṭhacittopi evamāhāti veditabbaṃ. Imehi nāma evarūpe ṭhāne. ‘‘Āgatapadānurūpenāti aññehi vā padehi, ito thokatarehi vā āgatakāle tadanurūpā yojanā kātabbā’’ti gaṇṭhipade vuttaṃ. ‘‘Na kevalaṃ imasmiṃyeva sikkhāpade, aññesupi āgacchanti, tasmā tattha tattha āgatapadānurūpena yojanā veditabbā’’ti anugaṇṭhipade vuttaṃ. Ujjhāyanattho adinnassādinnattāva, te ujjhāyiṃsu.
ရုဒ္ရဒာမကော နာမ ရုဒ္ရဒာမကာဒီဟိ ဥပ္ပာဒိတော။ ဗာရာဏသိနဂရာဒီသု တေဟိ တေဟိ ရာဇူဟိ ပောရာဏသတ္ထာနုရူပံ လက္ခဏသမ္ပန္နာ ဥပ္ပာဒိတာ နီလကဟာပဏာ။ တေသံ ကိရ တိဘာဂံ အဂ္ဃတိ ရုဒ္ရဒာမကော, တသ္မာ တသ္သ ပာဒော ထုလ္လစ္စယဝတ္ထု ဟောတိ။ မာသကော ပန ဣဓ အပ္ပမာဏံ။ ကဟာပဏော ကိဉ္စိကာလေ ဦနဝီသတိမာသကော ဟောတိ, ကိဉ္စိ ကာလေ အတိရေကဝီသတိမာသကော။ တသ္မာ တသ္သ ကဟာပဏသ္သ စတုတ္ထဘာဂော ပဉ္စမာသကော ဝိယ အတိရေကပဉ္စမာသကော ဝာ ဦနပဉ္စမာသကော ဝာ ပာဒောတိ ဝေဒိတဗ္ဗံ။ ဣမသ္သတ္ထသ္သ ဒီပနတ္ထံ ‘‘တဒာ ရာဇဂဟေ ဝီသတိမာသကော ကဟာပဏော ဟောတီ’’တိအာဒိ ဝုတ္တံ။ တတ္ထ ရဇတမယော သုဝဏ္ဏမယော တမ္ဗမယော စ ကဟာပဏော ဟောတိ။ သုဝဏ္ဏဘူမိယံ ဝိယ ပာဒောပိ ယတ္ထ တမ္ဗမယောဝ ကတော ဟောတိ, တတ္ထ သောဝ ပာဒောတိ အာစရိယော။ ယသ္မာ ပာဒော ဧကနီလကဟာပဏဂ္ဃနကော, တသ္မာ တသ္သ ပာဒသ္သ စတုတ္ထဘာဂောဝ သိယာ ပာဒောတိ ဧကေ။ ဣဒံ န ယုဇ္ဇတိ။ ယော စ တတ္ထ ပာဒာရဟော ဘဏ္ဍော, တသ္သ စတုတ္ထဘာဂသ္သေဝ ပာရာဇိကဝတ္ထုဘာဝပ္ပသင္ဂတော။ ယဒိ ပာဒာရဟံ ဘဏ္ဍံ ပာရာဇိကဝတ္ထု, သိဒ္ဓံ ‘‘သောဝ ပာဒော ပစ္ဆိမံ ပာရာဇိကဝတ္ထူ’’တိ ။ န ဟိ သဗ္ဗတ္ထ ဘဏ္ဍံ ဂဟေတ္ဝာ နီလကဟာပဏဂ္ဃေန အဂ္ဃာပေန္တိ။ ယသ္မာ တသ္သ တသ္သေဝ ကဟာပဏဂ္ဃေန အဂ္ဃာပေန္တိ, တသ္မာ တသ္သ တသ္သ ဇနပဒသ္သ ပာဒောဝ ပာဒောတိ တဒဂ္ဃနကမေဝ ပာဒဂ္ဃနကန္တိ သိဒ္ဓံ, ‘‘သော စ ခော ပောရာဏသ္သ နီလကဟာပဏသ္သ ဝသေန, န ဣတရေသန္တိ ယတ္ထ ပန နီလကဟာပဏာ ဝဠဉ္ဇံ ဂစ္ဆန္တိ, တတ္ထေဝာ’’တိ ကေစိ ဝဒန္တိ, ဥပပရိက္ခိတ္ဝာ ဂဟေတဗ္ဗံ။
Rudradāmako nāma rudradāmakādīhi uppādito. Bārāṇasinagarādīsu tehi tehi rājūhi porāṇasatthānurūpaṃ lakkhaṇasampannā uppāditā nīlakahāpaṇā. Tesaṃ kira tibhāgaṃ agghati rudradāmako, tasmā tassa pādo thullaccayavatthu hoti. Māsako pana idha appamāṇaṃ. Kahāpaṇo kiñcikāle ūnavīsatimāsako hoti, kiñci kāle atirekavīsatimāsako. Tasmā tassa kahāpaṇassa catutthabhāgo pañcamāsako viya atirekapañcamāsako vā ūnapañcamāsako vā pādoti veditabbaṃ. Imassatthassa dīpanatthaṃ ‘‘tadā rājagahe vīsatimāsako kahāpaṇo hotī’’tiādi vuttaṃ. Tattha rajatamayo suvaṇṇamayo tambamayo ca kahāpaṇo hoti. Suvaṇṇabhūmiyaṃ viya pādopi yattha tambamayova kato hoti, tattha sova pādoti ācariyo. Yasmā pādo ekanīlakahāpaṇagghanako, tasmā tassa pādassa catutthabhāgova siyā pādoti eke. Idaṃ na yujjati. Yo ca tattha pādāraho bhaṇḍo, tassa catutthabhāgasseva pārājikavatthubhāvappasaṅgato. Yadi pādārahaṃ bhaṇḍaṃ pārājikavatthu, siddhaṃ ‘‘sova pādo pacchimaṃ pārājikavatthū’’ti . Na hi sabbattha bhaṇḍaṃ gahetvā nīlakahāpaṇagghena agghāpenti. Yasmā tassa tasseva kahāpaṇagghena agghāpenti, tasmā tassa tassa janapadassa pādova pādoti tadagghanakameva pādagghanakanti siddhaṃ, ‘‘so ca kho porāṇassa nīlakahāpaṇassa vasena, na itaresanti yattha pana nīlakahāpaṇā vaḷañjaṃ gacchanti, tatthevā’’ti keci vadanti, upaparikkhitvā gahetabbaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၂. ဒုတိယပာရာဇိကံ • 2. Dutiyapārājikaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၂. ဒုတိယပာရာဇိကံ • 2. Dutiyapārājikaṃ
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ပာဠိမုတ္တကဝိနိစ္ဆယဝဏ္ဏနာ • Pāḷimuttakavinicchayavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ပာဠိမုတ္တကဝိနိစ္ဆယဝဏ္ဏနာ • Pāḷimuttakavinicchayavaṇṇanā
