| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೬. ಪಲೋಕಸುತ್ತಂ
6. Palokasuttaṃ
೫೭. ಅಥ ಖೋ ಅಞ್ಞತರೋ ಬ್ರಾಹ್ಮಣಮಹಾಸಾಲೋ ಯೇನ ಭಗವಾ ತೇನುಪಸಙ್ಕಮಿ…ಪೇ॰… ಏಕಮನ್ತಂ ನಿಸಿನ್ನೋ ಖೋ ಸೋ ಬ್ರಾಹ್ಮಣಮಹಾಸಾಲೋ ಭಗವನ್ತಂ ಏತದವೋಚ – ‘‘ಸುತಂ ಮೇತಂ, ಭೋ ಗೋತಮ, ಪುಬ್ಬಕಾನಂ ಬ್ರಾಹ್ಮಣಾನಂ ವುದ್ಧಾನಂ ಮಹಲ್ಲಕಾನಂ ಆಚರಿಯಪಾಚರಿಯಾನಂ ಭಾಸಮಾನಾನಂ – ‘ಪುಬ್ಬೇ ಸುದಂ 1 ಅಯಂ ಲೋಕೋ ಅವೀಚಿ ಮಞ್ಞೇ ಫುಟೋ ಅಹೋಸಿ ಮನುಸ್ಸೇಹಿ, ಕುಕ್ಕುಟಸಂಪಾತಿಕಾ ಗಾಮನಿಗಮರಾಜಧಾನಿಯೋ’ತಿ। ಕೋ ನು ಖೋ, ಭೋ ಗೋತಮ, ಹೇತು ಕೋ ಪಚ್ಚಯೋ ಯೇನೇತರಹಿ ಮನುಸ್ಸಾನಂ ಖಯೋ ಹೋತಿ, ತನುತ್ತಂ ಪಞ್ಞಾಯತಿ, ಗಾಮಾಪಿ ಅಗಾಮಾ ಹೋನ್ತಿ , ನಿಗಮಾಪಿ ಅನಿಗಮಾ ಹೋನ್ತಿ, ನಗರಾಪಿ ಅನಗರಾ ಹೋನ್ತಿ, ಜನಪದಾಪಿ ಅಜನಪದಾ ಹೋನ್ತೀ’’ತಿ?
57. Atha kho aññataro brāhmaṇamahāsālo yena bhagavā tenupasaṅkami…pe… ekamantaṃ nisinno kho so brāhmaṇamahāsālo bhagavantaṃ etadavoca – ‘‘sutaṃ metaṃ, bho gotama, pubbakānaṃ brāhmaṇānaṃ vuddhānaṃ mahallakānaṃ ācariyapācariyānaṃ bhāsamānānaṃ – ‘pubbe sudaṃ 2 ayaṃ loko avīci maññe phuṭo ahosi manussehi, kukkuṭasaṃpātikā gāmanigamarājadhāniyo’ti. Ko nu kho, bho gotama, hetu ko paccayo yenetarahi manussānaṃ khayo hoti, tanuttaṃ paññāyati, gāmāpi agāmā honti , nigamāpi anigamā honti, nagarāpi anagarā honti, janapadāpi ajanapadā hontī’’ti?
‘‘ಏತರಹಿ, ಬ್ರಾಹ್ಮಣ, ಮನುಸ್ಸಾ ಅಧಮ್ಮರಾಗರತ್ತಾ ವಿಸಮಲೋಭಾಭಿಭೂತಾ ಮಿಚ್ಛಾಧಮ್ಮಪರೇತಾ। ತೇ ಅಧಮ್ಮರಾಗರತ್ತಾ ವಿಸಮಲೋಭಾಭಿಭೂತಾ ಮಿಚ್ಛಾಧಮ್ಮಪರೇತಾ ತಿಣ್ಹಾನಿ ಸತ್ಥಾನಿ ಗಹೇತ್ವಾ ಅಞ್ಞಮಞ್ಞಂ 3 ಜೀವಿತಾ ವೋರೋಪೇನ್ತಿ, ತೇನ ಬಹೂ ಮನುಸ್ಸಾ ಕಾಲಂ ಕರೋನ್ತಿ। ಅಯಮ್ಪಿ ಖೋ , ಬ್ರಾಹ್ಮಣ, ಹೇತು ಅಯಂ ಪಚ್ಚಯೋ ಯೇನೇತರಹಿ ಮನುಸ್ಸಾನಂ ಖಯೋ ಹೋತಿ, ತನುತ್ತಂ ಪಞ್ಞಾಯತಿ, ಗಾಮಾಪಿ ಅಗಾಮಾ ಹೋನ್ತಿ, ನಿಗಮಾಪಿ ಅನಿಗಮಾ ಹೋನ್ತಿ, ನಗರಾಪಿ ಅನಗರಾ ಹೋನ್ತಿ, ಜನಪದಾಪಿ ಅಜನಪದಾ ಹೋನ್ತಿ।
‘‘Etarahi, brāhmaṇa, manussā adhammarāgarattā visamalobhābhibhūtā micchādhammaparetā. Te adhammarāgarattā visamalobhābhibhūtā micchādhammaparetā tiṇhāni satthāni gahetvā aññamaññaṃ 4 jīvitā voropenti, tena bahū manussā kālaṃ karonti. Ayampi kho , brāhmaṇa, hetu ayaṃ paccayo yenetarahi manussānaṃ khayo hoti, tanuttaṃ paññāyati, gāmāpi agāmā honti, nigamāpi anigamā honti, nagarāpi anagarā honti, janapadāpi ajanapadā honti.
‘‘ಪುನ ಚಪರಂ, ಬ್ರಾಹ್ಮಣ, ಏತರಹಿ ಮನುಸ್ಸಾ ಅಧಮ್ಮರಾಗರತ್ತಾ ವಿಸಮಲೋಭಾಭಿಭೂತಾ ಮಿಚ್ಛಾಧಮ್ಮಪರೇತಾ। ತೇಸಂ ಅಧಮ್ಮರಾಗರತ್ತಾನಂ ವಿಸಮಲೋಭಾಭಿಭೂತಾನಂ ಮಿಚ್ಛಾಧಮ್ಮಪರೇತಾನಂ ದೇವೋ ನ ಸಮ್ಮಾಧಾರಂ ಅನುಪ್ಪವೇಚ್ಛತಿ। ತೇನ ದುಬ್ಭಿಕ್ಖಂ ಹೋತಿ ದುಸ್ಸಸ್ಸಂ ಸೇತಟ್ಠಿಕಂ ಸಲಾಕಾವುತ್ತಂ। ತೇನ ಬಹೂ ಮನುಸ್ಸಾ ಕಾಲಂ ಕರೋನ್ತಿ। ಅಯಮ್ಪಿ ಖೋ, ಬ್ರಾಹ್ಮಣ, ಹೇತು ಅಯಂ ಪಚ್ಚಯೋ ಯೇನೇತರಹಿ ಮನುಸ್ಸಾನಂ ಖಯೋ ಹೋತಿ, ತನುತ್ತಂ ಪಞ್ಞಾಯತಿ, ಗಾಮಾಪಿ ಅಗಾಮಾ ಹೋನ್ತಿ, ನಿಗಮಾಪಿ ಅನಿಗಮಾ ಹೋನ್ತಿ, ನಗರಾಪಿ ಅನಗರಾ ಹೋನ್ತಿ, ಜನಪದಾಪಿ ಅಜನಪದಾ ಹೋನ್ತಿ।
‘‘Puna caparaṃ, brāhmaṇa, etarahi manussā adhammarāgarattā visamalobhābhibhūtā micchādhammaparetā. Tesaṃ adhammarāgarattānaṃ visamalobhābhibhūtānaṃ micchādhammaparetānaṃ devo na sammādhāraṃ anuppavecchati. Tena dubbhikkhaṃ hoti dussassaṃ setaṭṭhikaṃ salākāvuttaṃ. Tena bahū manussā kālaṃ karonti. Ayampi kho, brāhmaṇa, hetu ayaṃ paccayo yenetarahi manussānaṃ khayo hoti, tanuttaṃ paññāyati, gāmāpi agāmā honti, nigamāpi anigamā honti, nagarāpi anagarā honti, janapadāpi ajanapadā honti.
‘‘ಪುನ ಚಪರಂ, ಬ್ರಾಹ್ಮಣ, ಏತರಹಿ ಮನುಸ್ಸಾ ಅಧಮ್ಮರಾಗರತ್ತಾ ವಿಸಮಲೋಭಾಭಿಭೂತಾ ಮಿಚ್ಛಾಧಮ್ಮಪರೇತಾ। ತೇಸಂ ಅಧಮ್ಮರಾಗರತ್ತಾನಂ ವಿಸಮಲೋಭಾಭಿಭೂತಾನಂ ಮಿಚ್ಛಾಧಮ್ಮಪರೇತಾನಂ ಯಕ್ಖಾ ವಾಳೇ ಅಮನುಸ್ಸೇ ಓಸ್ಸಜ್ಜನ್ತಿ 5, ತೇನ ಬಹೂ ಮನುಸ್ಸಾ ಕಾಲಂ ಕರೋನ್ತಿ। ಅಯಮ್ಪಿ ಖೋ, ಬ್ರಾಹ್ಮಣ, ಹೇತು ಅಯಂ ಪಚ್ಚಯೋ ಯೇನೇತರಹಿ ಮನುಸ್ಸಾನಂ ಖಯೋ ಹೋತಿ, ತನುತ್ತಂ ಪಞ್ಞಾಯತಿ, ಗಾಮಾಪಿ ಅಗಾಮಾ ಹೋನ್ತಿ, ನಿಗಮಾಪಿ ಅನಿಗಮಾ ಹೋನ್ತಿ, ನಗರಾಪಿ ಅನಗರಾ ಹೋನ್ತಿ, ಜನಪದಾಪಿ ಅಜನಪದಾ ಹೋನ್ತೀ’’ತಿ।
‘‘Puna caparaṃ, brāhmaṇa, etarahi manussā adhammarāgarattā visamalobhābhibhūtā micchādhammaparetā. Tesaṃ adhammarāgarattānaṃ visamalobhābhibhūtānaṃ micchādhammaparetānaṃ yakkhā vāḷe amanusse ossajjanti 6, tena bahū manussā kālaṃ karonti. Ayampi kho, brāhmaṇa, hetu ayaṃ paccayo yenetarahi manussānaṃ khayo hoti, tanuttaṃ paññāyati, gāmāpi agāmā honti, nigamāpi anigamā honti, nagarāpi anagarā honti, janapadāpi ajanapadā hontī’’ti.
‘‘ಅಭಿಕ್ಕನ್ತಂ, ಭೋ ಗೋತಮ…ಪೇ॰… ಉಪಾಸಕಂ ಮಂ ಭವಂ ಗೋತಮೋ ಧಾರೇತು ಅಜ್ಜತಗ್ಗೇ ಪಾಣುಪೇತಂ ಸರಣಂ ಗತ’’ನ್ತಿ। ಛಟ್ಠಂ।
‘‘Abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti. Chaṭṭhaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೬. ಪಲೋಕಸುತ್ತವಣ್ಣನಾ • 6. Palokasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೬. ಪಲೋಕಸುತ್ತವಣ್ಣನಾ • 6. Palokasuttavaṇṇanā
