| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. பலோகஸுத்தவண்ணனா
6. Palokasuttavaṇṇanā
57. ச²ட்டே² ஆசரியபாசரியானந்தி ஆசரியானஞ்சேவ ஆசரியாசரியானஞ்ச. அவீசி மஞ்ஞே பு²டோ அஹோஸீதி யதா² அவீசி மஹானிரயோ நிரந்தரபு²டோ நேரயிகஸத்தேஹி பரிபுண்ணோ, மனுஸ்ஸேஹி ஏவங் பரிபுண்ணோ ஹோதி. குக்குடஸங்பாதிகாதி ஏககா³மஸ்ஸ ச²த³னபிட்டி²தோ உப்பதித்வா இதரகா³மஸ்ஸ ச²த³னபிட்டே² பதனஸங்கா²தோ குக்குடஸங்பாதோ ஏதாஸு அத்தீ²தி குக்குடஸங்பாதிகா. குக்குடஸங்பாதி³காதிபி பாடோ², கா³மந்தரதோ கா³மந்தரங் குக்குடானங் பத³ஸா க³மனஸங்கா²தோ குக்குடஸங்பாதோ³ ஏதாஸு அத்தீ²தி அத்தோ². உப⁴யம்பேதங் க⁴னநிவாஸதங்யேவ தீ³பேதி. அத⁴ம்மராக³ரத்தாதி ராகோ³ நாம ஏகந்தேனேவ அத⁴ம்மோ, அத்தனோ பரிக்கா²ரேஸு பன உப்பஜ்ஜமானோ ந அத⁴ம்மராகோ³தி அதி⁴ப்பேதோ, பரபரிக்கா²ரேஸு உப்பஜ்ஜமானோவ அத⁴ம்மராகோ³தி. விஸமலோபா⁴பி⁴பூ⁴தாதி லோப⁴ஸ்ஸ ஸமகாலோ நாம நத்தி², ஏகந்தங் விஸமோவ ஏஸ. அத்தனா பரிக்³க³ஹிதவத்து²ம்ஹி பன உப்பஜ்ஜமானோ ஸமலோபோ⁴ நாம, பரபரிக்³க³ஹிதவத்து²ம்ஹி உப்பஜ்ஜமானோவ விஸமோதி அதி⁴ப்பேதோ. மிச்சா²த⁴ம்மபரேதாதி அவத்து²படிஸேவனஸங்கா²தேன மிச்சா²த⁴ம்மேன ஸமன்னாக³தா. தே³வோ ந ஸம்மா தா⁴ரங் அனுப்பவெச்ச²தீதி வஸ்ஸிதப்³ப³யுத்தே காலே வஸ்ஸங் ந வஸ்ஸதி. து³ப்³பி⁴க்க²ந்தி து³ல்லப⁴பி⁴க்க²ங். து³ஸ்ஸஸ்ஸந்தி விவித⁴ஸஸ்ஸானங் அஸம்பஜ்ஜனேன து³ஸ்ஸஸ்ஸங். ஸேதட்டி²கந்தி ஸஸ்ஸே ஸம்பஜ்ஜமானே பாணகா பதந்தி, தேஹி த³ட்ட²த்தா நிக்க²ந்தனிக்க²ந்தானி ஸாலிஸீஸானி ஸேதவண்ணானி ஹொந்தி நிஸ்ஸாரானி. தங் ஸந்தா⁴ய வுத்தங் ‘‘ஸேதட்டி²க’’ந்தி. ஸலாகாவுத்தந்தி வபிதங் வபிதங் ஸஸ்ஸங் ஸலாகாமத்தமேவ ஸம்பஜ்ஜதி, ப²லங் ந தே³தீதி அத்தோ². யக்கா²தி யக்கா²தி⁴பதினோ. வாளே அமனுஸ்ஸே ஒஸ்ஸஜ்ஜந்தீதி சண்ட³யக்கே² மனுஸ்ஸபதே² விஸ்ஸஜ்ஜெந்தி, தே லத்³தோ⁴காஸா மஹாஜனங் ஜீவிதக்க²யங் பாபெந்தி.
57. Chaṭṭhe ācariyapācariyānanti ācariyānañceva ācariyācariyānañca. Avīci maññe phuṭo ahosīti yathā avīci mahānirayo nirantaraphuṭo nerayikasattehi paripuṇṇo, manussehi evaṃ paripuṇṇo hoti. Kukkuṭasaṃpātikāti ekagāmassa chadanapiṭṭhito uppatitvā itaragāmassa chadanapiṭṭhe patanasaṅkhāto kukkuṭasaṃpāto etāsu atthīti kukkuṭasaṃpātikā. Kukkuṭasaṃpādikātipi pāṭho, gāmantarato gāmantaraṃ kukkuṭānaṃ padasā gamanasaṅkhāto kukkuṭasaṃpādo etāsu atthīti attho. Ubhayampetaṃ ghananivāsataṃyeva dīpeti. Adhammarāgarattāti rāgo nāma ekanteneva adhammo, attano parikkhāresu pana uppajjamāno na adhammarāgoti adhippeto, paraparikkhāresu uppajjamānova adhammarāgoti. Visamalobhābhibhūtāti lobhassa samakālo nāma natthi, ekantaṃ visamova esa. Attanā pariggahitavatthumhi pana uppajjamāno samalobho nāma, parapariggahitavatthumhi uppajjamānova visamoti adhippeto. Micchādhammaparetāti avatthupaṭisevanasaṅkhātena micchādhammena samannāgatā. Devo na sammā dhāraṃ anuppavecchatīti vassitabbayutte kāle vassaṃ na vassati. Dubbhikkhanti dullabhabhikkhaṃ. Dussassanti vividhasassānaṃ asampajjanena dussassaṃ. Setaṭṭhikanti sasse sampajjamāne pāṇakā patanti, tehi daṭṭhattā nikkhantanikkhantāni sālisīsāni setavaṇṇāni honti nissārāni. Taṃ sandhāya vuttaṃ ‘‘setaṭṭhika’’nti. Salākāvuttanti vapitaṃ vapitaṃ sassaṃ salākāmattameva sampajjati, phalaṃ na detīti attho. Yakkhāti yakkhādhipatino. Vāḷe amanusse ossajjantīti caṇḍayakkhe manussapathe vissajjenti, te laddhokāsā mahājanaṃ jīvitakkhayaṃ pāpenti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. பலோகஸுத்தங் • 6. Palokasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. பலோகஸுத்தவண்ணனா • 6. Palokasuttavaṇṇanā
