| Library / Tipiṭaka / तिपिटक • Tipiṭaka / अपदानपाळि • Apadānapāḷi |
५. पञ्चदीपदायिकाथेरीअपदानं
5. Pañcadīpadāyikātherīapadānaṃ
६१.
61.
६२.
62.
‘‘काळपक्खम्हि दिवसे, अद्दसं बोधिमुत्तमं।
‘‘Kāḷapakkhamhi divase, addasaṃ bodhimuttamaṃ;
तत्थ चित्तं पसादेत्वा, बोधिमूले निसीदहं॥
Tattha cittaṃ pasādetvā, bodhimūle nisīdahaṃ.
६३.
63.
‘‘गरुचित्तं उपट्ठेत्वा, सिरे कत्वान अञ्जलिं।
‘‘Garucittaṃ upaṭṭhetvā, sire katvāna añjaliṃ;
सोमनस्सं पवेदेत्वा, एवं चिन्तेसि तावदे॥
Somanassaṃ pavedetvā, evaṃ cintesi tāvade.
६४.
64.
‘‘‘यदि बुद्धो अमितगुणो, असमप्पटिपुग्गलो।
‘‘‘Yadi buddho amitaguṇo, asamappaṭipuggalo;
दस्सेतु पाटिहीरं मे, बोधि ओभासतु अयं’॥
Dassetu pāṭihīraṃ me, bodhi obhāsatu ayaṃ’.
६५.
65.
‘‘सह आवज्जिते मय्हं, बोधि पज्जलि तावदे।
‘‘Saha āvajjite mayhaṃ, bodhi pajjali tāvade;
सब्बसोण्णमया आसि, दिसा सब्बा विरोचति॥
Sabbasoṇṇamayā āsi, disā sabbā virocati.
६६.
66.
‘‘सत्तरत्तिन्दिवं तत्थ, बोधिमूले निसीदहं।
‘‘Sattarattindivaṃ tattha, bodhimūle nisīdahaṃ;
सत्तमे दिवसे पत्ते, दीपपूजं अकासहं॥
Sattame divase patte, dīpapūjaṃ akāsahaṃ.
६७.
67.
‘‘आसनं परिवारेत्वा, पञ्च दीपानि पज्जलुं।
‘‘Āsanaṃ parivāretvā, pañca dīpāni pajjaluṃ;
याव उदेति सूरियो, दीपा मे पज्जलुं तदा॥
Yāva udeti sūriyo, dīpā me pajjaluṃ tadā.
६८.
68.
‘‘तेन कम्मेन सुकतेन, चेतनापणिधीहि च।
‘‘Tena kammena sukatena, cetanāpaṇidhīhi ca;
जहित्वा मानुसं देहं, तावतिंसमगच्छहं॥
Jahitvā mānusaṃ dehaṃ, tāvatiṃsamagacchahaṃ.
६९.
69.
‘‘तत्थ मे सुकतं ब्यम्हं, पञ्चदीपाति वुच्चति।
‘‘Tattha me sukataṃ byamhaṃ, pañcadīpāti vuccati;
सट्ठियोजनमुब्बेधं, तिंसयोजनवित्थतं॥
Saṭṭhiyojanamubbedhaṃ, tiṃsayojanavitthataṃ.
७०.
70.
‘‘असङ्खियानि दीपानि, परिवारे जलिंसु मे।
‘‘Asaṅkhiyāni dīpāni, parivāre jaliṃsu me;
यावता देवभवनं, दीपालोकेन जोतति॥
Yāvatā devabhavanaṃ, dīpālokena jotati.
७१.
71.
उद्धं अधो च तिरियं, सब्बं पस्सामि चक्खुना॥
Uddhaṃ adho ca tiriyaṃ, sabbaṃ passāmi cakkhunā.
७२.
72.
तत्थ आवरणं नत्थि, रुक्खेसु पब्बतेसु वा॥
Tattha āvaraṇaṃ natthi, rukkhesu pabbatesu vā.
७३.
73.
‘‘असीति देवराजूनं, महेसित्तमकारयिं।
‘‘Asīti devarājūnaṃ, mahesittamakārayiṃ;
सतानं चक्कवत्तीनं, महेसित्तमकारयिं॥
Satānaṃ cakkavattīnaṃ, mahesittamakārayiṃ.
७४.
74.
‘‘यं यं योनुपपज्जामि, देवत्तं अथ मानुसं।
‘‘Yaṃ yaṃ yonupapajjāmi, devattaṃ atha mānusaṃ;
दीपसतसहस्सानि, परिवारे जलन्ति मे॥
Dīpasatasahassāni, parivāre jalanti me.
७५.
75.
‘‘देवलोका चवित्वान, उप्पज्जिं मातुकुच्छियं।
‘‘Devalokā cavitvāna, uppajjiṃ mātukucchiyaṃ;
मातुकुच्छिगता सन्ती, अक्खि मे न निमीलति॥
Mātukucchigatā santī, akkhi me na nimīlati.
७६.
76.
‘‘दीपसतसहस्सानि, पुञ्ञकम्मसमङ्गिता।
‘‘Dīpasatasahassāni, puññakammasamaṅgitā;
जलन्ति सूतिकागेहे, पञ्चदीपानिदं फलं॥
Jalanti sūtikāgehe, pañcadīpānidaṃ phalaṃ.
७७.
77.
‘‘पच्छिमे भवे सम्पत्ते, मानसं विनिवत्तयिं।
‘‘Pacchime bhave sampatte, mānasaṃ vinivattayiṃ;
अजरामतं सीतिभावं, निब्बानं फस्सयिं अहं॥
Ajarāmataṃ sītibhāvaṃ, nibbānaṃ phassayiṃ ahaṃ.
७८.
78.
‘‘जातिया सत्तवस्साहं, अरहत्तमपापुणिं।
‘‘Jātiyā sattavassāhaṃ, arahattamapāpuṇiṃ;
उपसम्पादयी बुद्धो, गुणमञ्ञाय गोतमो॥
Upasampādayī buddho, guṇamaññāya gotamo.
७९.
79.
‘‘मण्डपे रुक्खमूले वा, सुञ्ञागारे वसन्तिया।
‘‘Maṇḍape rukkhamūle vā, suññāgāre vasantiyā;
सदा पज्जलते दीपं, पञ्चदीपानिदं फलं॥
Sadā pajjalate dīpaṃ, pañcadīpānidaṃ phalaṃ.
८०.
80.
‘‘दिब्बचक्खु विसुद्धं मे, समाधिकुसला अहं।
‘‘Dibbacakkhu visuddhaṃ me, samādhikusalā ahaṃ;
अभिञ्ञापारमिप्पत्ता, पञ्चदीपानिदं फलं॥
Abhiññāpāramippattā, pañcadīpānidaṃ phalaṃ.
८१.
81.
‘‘सब्बवोसितवोसाना, कतकिच्चा अनासवा।
‘‘Sabbavositavosānā, katakiccā anāsavā;
पञ्चदीपा महावीर, पादे वन्दामि चक्खुम॥
Pañcadīpā mahāvīra, pāde vandāmi cakkhuma.
८२.
82.
‘‘सतसहस्सितो कप्पे, यं दीपमददिं तदा।
‘‘Satasahassito kappe, yaṃ dīpamadadiṃ tadā;
दुग्गतिं नाभिजानामि, पञ्चदीपानिदं फलं॥
Duggatiṃ nābhijānāmi, pañcadīpānidaṃ phalaṃ.
८३.
83.
‘‘किलेसा झापिता मय्हं…पे॰… विहरामि अनासवा॥
‘‘Kilesā jhāpitā mayhaṃ…pe… viharāmi anāsavā.
८४.
84.
‘‘स्वागतं वत मे आसि…पे॰… कतं बुद्धस्स सासनं॥
‘‘Svāgataṃ vata me āsi…pe… kataṃ buddhassa sāsanaṃ.
८५.
85.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं पञ्चदीपदायिका भिक्खुनी इमा गाथायो अभासित्थाति।
Itthaṃ sudaṃ pañcadīpadāyikā bhikkhunī imā gāthāyo abhāsitthāti.
पञ्चदीपदायिकाथेरियापदानं पञ्चमं।
Pañcadīpadāyikātheriyāpadānaṃ pañcamaṃ.
Footnotes:
