| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
5. பஞ்சகனித்³தே³ஸவண்ணனா
5. Pañcakaniddesavaṇṇanā
191. பஞ்சகே – தத்ராதி தேஸு ‘‘ஆரப⁴தி ச விப்படிஸாரீ ச ஹோதீ’’திஆதி³னா நயேன ஹெட்டா² உத்³தி³ட்ட²புக்³க³லேஸு. ய்வாயந்தி யோ அயங். ஆரப⁴தீதி எத்த² ஆரம்ப⁴ஸத்³தோ³ கம்மகிரியாஹிங்ஸனவீரியவிகோபனாபத்திவீதிக்கமேஸு வத்ததி. ததா² ஹேஸ ‘‘யங்கிஞ்சி து³க்க²ங் ஸம்போ⁴தி, ஸப்³ப³ங் ஆரம்ப⁴பச்சயா’’தி (ஸு॰ நி॰ 748) கம்மே ஆக³தோ. ‘‘மஹாயஞ்ஞா மஹாரம்பா⁴, ந தே ஹொந்தி மஹப்ப²லா’’தி (அ॰ நி॰ 4.39) கிரியாயங். ‘‘ஸமணங் கோ³தமங் உத்³தி³ஸ்ஸ பாணங் ஆரப⁴ந்தீ’’தி (ம॰ நி॰ 2.51-52) ஹிங்ஸனே. ‘‘ஆரப⁴த², நிக்க²மத², யுஞ்ஜத² பு³த்³த⁴ஸாஸனே’’தி (ஸங்॰ நி॰ 1.185) வீரியே. ‘‘பீ³ஜகா³மபூ⁴தகா³மஸமாரம்பா⁴ படிவிரதோ ஹோதீ’’தி (தீ³॰ நி॰ 1.10, 194; ம॰ நி॰ 1.293) விகோபனே. ‘‘ஆரப⁴தி ச விப்படிஸாரீ ச ஹோதீ’’தி (அ॰ நி॰ 5.142) அயங் பன ஆபத்திவீதிக்கமே ஆக³தோ. தஸ்மா ஆபத்திவீதிக்கமவஸேன ஆரப⁴தி சேவ தப்பச்சயா விப்படிஸாரீ ச ஹோதீதி அயமெத்த² அத்தோ².
191. Pañcake – tatrāti tesu ‘‘ārabhati ca vippaṭisārī ca hotī’’tiādinā nayena heṭṭhā uddiṭṭhapuggalesu. Yvāyanti yo ayaṃ. Ārabhatīti ettha ārambhasaddo kammakiriyāhiṃsanavīriyavikopanāpattivītikkamesu vattati. Tathā hesa ‘‘yaṃkiñci dukkhaṃ sambhoti, sabbaṃ ārambhapaccayā’’ti (su. ni. 748) kamme āgato. ‘‘Mahāyaññā mahārambhā, na te honti mahapphalā’’ti (a. ni. 4.39) kiriyāyaṃ. ‘‘Samaṇaṃ gotamaṃ uddissa pāṇaṃ ārabhantī’’ti (ma. ni. 2.51-52) hiṃsane. ‘‘Ārabhatha, nikkhamatha, yuñjatha buddhasāsane’’ti (saṃ. ni. 1.185) vīriye. ‘‘Bījagāmabhūtagāmasamārambhā paṭivirato hotī’’ti (dī. ni. 1.10, 194; ma. ni. 1.293) vikopane. ‘‘Ārabhati ca vippaṭisārī ca hotī’’ti (a. ni. 5.142) ayaṃ pana āpattivītikkame āgato. Tasmā āpattivītikkamavasena ārabhati ceva tappaccayā vippaṭisārī ca hotīti ayamettha attho.
யதா²பூ⁴தங் நப்பஜானாதீதி அனதி⁴க³தத்தா யதா²ஸபா⁴வதோ ந ஜானாதி. யத்த²ஸ்ஸாதி யஸ்மிங் அஸ்ஸ, யங் டா²னங் பத்வா ஏதஸ்ஸ புக்³க³லஸ்ஸ உப்பன்னா பாபகா அகுஸலா த⁴ம்மா அபரிஸேஸா நிருஜ்ஜ²ந்தீதி அத்தோ². கிங் பன பத்வா தே நிருஜ்ஜ²ந்தீதி? அரஹத்தமக்³க³ங். ப²லப்பத்தஸ்ஸ பன நிருத்³தா⁴ நாம ஹொந்தி. ஏவங் ஸந்தேபி இத⁴ மக்³க³கிச்சவஸேன ப²லமேவ வுத்தந்தி வேதி³தப்³ப³ங். ஆரம்ப⁴ஜாதி ஆபத்திவீதிக்கமஸம்ப⁴வா. விப்படிஸாரஜாதி விப்படிஸாரதோ ஜாதா. பவட்³ட⁴ந்தீதி புனப்புனங் உப்பஜ்ஜனேன வட்³ட⁴ந்தி. ஸாதூ⁴தி ஆயாசனஸாது⁴. இத³ங் வுத்தங் ஹோதி – யாவ அபரத்³த⁴ஞ்ச வத ஆயஸ்மதா, ஏவங் ஸந்தேபி மயங் ஆயஸ்மந்தங் யாசாம – ‘‘தே³ஸேதப்³ப³யுத்தகஸ்ஸ தே³ஸனாய, வுட்டா²தப்³ப³யுத்தகஸ்ஸ வுட்டா²னேன, ஆவிகாதப்³ப³யுத்தகஸ்ஸ ஆவிகிரியாய, ஆரம்ப⁴ஜே ஆஸவே பஹாய, ஸுத்³த⁴ந்தே டி²தபா⁴வபச்சவெக்க²ணேன விப்படிஸாரஜே ஆஸவே படிவினோதெ³த்வா நீஹரித்வா விபஸ்ஸனாசித்தஞ்சேவ விபஸ்ஸனாபஞ்ஞஞ்ச பா⁴வேதூ’’தி. அமுனா பஞ்சமேன புக்³க³லேனாதி ஏதேன பஞ்சமேன கீ²ணாஸவபுக்³க³லேன. ஸமஸமோ ப⁴விஸ்ஸதீதி லோகுத்தரகு³ணேஹி ஸமபா⁴வேனேவ ஸமோ ப⁴விஸ்ஸதீதி ஏவங் கீ²ணாஸவேன ஓவதி³தப்³போ³தி அத்தோ².
Yathābhūtaṃ nappajānātīti anadhigatattā yathāsabhāvato na jānāti. Yatthassāti yasmiṃ assa, yaṃ ṭhānaṃ patvā etassa puggalassa uppannā pāpakā akusalā dhammā aparisesā nirujjhantīti attho. Kiṃ pana patvā te nirujjhantīti? Arahattamaggaṃ. Phalappattassa pana niruddhā nāma honti. Evaṃ santepi idha maggakiccavasena phalameva vuttanti veditabbaṃ. Ārambhajāti āpattivītikkamasambhavā. Vippaṭisārajāti vippaṭisārato jātā. Pavaḍḍhantīti punappunaṃ uppajjanena vaḍḍhanti. Sādhūti āyācanasādhu. Idaṃ vuttaṃ hoti – yāva aparaddhañca vata āyasmatā, evaṃ santepi mayaṃ āyasmantaṃ yācāma – ‘‘desetabbayuttakassa desanāya, vuṭṭhātabbayuttakassa vuṭṭhānena, āvikātabbayuttakassa āvikiriyāya, ārambhaje āsave pahāya, suddhante ṭhitabhāvapaccavekkhaṇena vippaṭisāraje āsave paṭivinodetvā nīharitvā vipassanācittañceva vipassanāpaññañca bhāvetū’’ti. Amunā pañcamena puggalenāti etena pañcamena khīṇāsavapuggalena. Samasamo bhavissatīti lokuttaraguṇehi samabhāveneva samo bhavissatīti evaṃ khīṇāsavena ovaditabboti attho.
ஆரப⁴தி ந விப்படிஸாரீ ஹோதீதி ஆபத்திங் ஆபஜ்ஜதி. தங் பன தே³ஸேதுங் ஸபா⁴க³புக்³க³லங் பரியேஸதி. தஸ்மா ந விப்படிஸாரீ ஹோதி. அங்கு³த்தரட்ட²கதா²யங் பன ‘‘வுட்டி²தத்தா ந விப்படிஸாரீ ஹோதீ’’தி வுத்தங். ந ஆரப⁴தி விப்படிஸாரீ ஹோதீதி ஆபத்திங் நாபஜ்ஜதி, வினயபஞ்ஞத்தியங் பன அகோவித³த்தா அனாபத்தியங் ஆபத்திஸஞ்ஞீ ஹுத்வா விப்படிஸாரீ ஹோதி. அங்கு³த்தரட்ட²கதா²யங் பன ‘‘ஸகிங் ஆபத்திங் ஆபஜ்ஜித்வா ததோ வுட்டா²ய பச்சா² கிஞ்சாபி நாபஜ்ஜதி, விப்படிஸாரங் பன வினோதே³துங் ந ஸக்கோதீ’’தி வுத்தங். ந ஆரப⁴தி ந விப்படிஸாரீ ஹோதீதி நேவ ஆபத்திங் ஆபஜ்ஜதி, ந விப்படிஸாரீ ஹோதி. கதமோ பனேஸ புக்³க³லோதி? ஒஸ்ஸட்ட²வீரியபுக்³க³லோ. ஸோ ஹி ‘‘கிங் மே இமஸ்மிங் பு³த்³த⁴காலே பரினிப்³பா³னேன, அனாக³தே மெத்தெய்யஸம்மாஸம்பு³த்³த⁴காலே பரினிப்³பா³யிஸ்ஸாமீ’’தி விஸுத்³த⁴ஸீலோபி படிபத்திங் ந பூரேதி. ஸோபி ‘‘கிமத்த²ங் ஆயஸ்மா பமத்தோ விஹரதி புது²ஜ்ஜனஸ்ஸ நாம க³தி அனிப³த்³தா⁴. ஆயஸ்மா ஹி மெத்தெய்யஸம்மாஸம்பு³த்³த⁴ஸ்ஸ ஸம்முக²பா⁴வங் லபெ⁴ய்யபி ந லபெ⁴ய்யாபீதி அரஹத்தத்தா²ய விபஸ்ஸனங் பா⁴வேஹீ’’தி ஓவதி³தப்³போ³வ. ஸேஸங் ஸப்³ப³த்த² வுத்தனயேனேவ வேதி³தப்³ப³ங்.
Ārabhati na vippaṭisārī hotīti āpattiṃ āpajjati. Taṃ pana desetuṃ sabhāgapuggalaṃ pariyesati. Tasmā na vippaṭisārī hoti. Aṅguttaraṭṭhakathāyaṃ pana ‘‘vuṭṭhitattā na vippaṭisārī hotī’’ti vuttaṃ. Na ārabhati vippaṭisārī hotīti āpattiṃ nāpajjati, vinayapaññattiyaṃ pana akovidattā anāpattiyaṃ āpattisaññī hutvā vippaṭisārī hoti. Aṅguttaraṭṭhakathāyaṃ pana ‘‘sakiṃ āpattiṃ āpajjitvā tato vuṭṭhāya pacchā kiñcāpi nāpajjati, vippaṭisāraṃ pana vinodetuṃ na sakkotī’’ti vuttaṃ. Na ārabhati na vippaṭisārī hotīti neva āpattiṃ āpajjati, na vippaṭisārī hoti. Katamo panesa puggaloti? Ossaṭṭhavīriyapuggalo. So hi ‘‘kiṃ me imasmiṃ buddhakāle parinibbānena, anāgate metteyyasammāsambuddhakāle parinibbāyissāmī’’ti visuddhasīlopi paṭipattiṃ na pūreti. Sopi ‘‘kimatthaṃ āyasmā pamatto viharati puthujjanassa nāma gati anibaddhā. Āyasmā hi metteyyasammāsambuddhassa sammukhabhāvaṃ labheyyapi na labheyyāpīti arahattatthāya vipassanaṃ bhāvehī’’ti ovaditabbova. Sesaṃ sabbattha vuttanayeneva veditabbaṃ.
192. த³த்வா அவஜானாதீதிஆதீ³ஸு – ஏகோ பி⁴க்கு² மஹாபுஞ்ஞோ சதுபச்சயலாபீ⁴ ஹோதி. ஸோ சீவராதீ³னி லபி⁴த்வா அஞ்ஞங் அப்பபுஞ்ஞங் ஆபுச்ச²தி. ஸோபி தஸ்மிங் புனப்புனங் ஆபுச்ச²ந்தேபி க³ண்ஹாதியேவ. அத²ஸ்ஸ இதரோ தோ²கங் குபிதோ ஹுத்வா மங்குபா⁴வங் உப்பாதே³துகாமோ வத³தி – ‘‘அயங் அத்தனோ த⁴ம்மதாய சீவராதீ³னி ந லப⁴தி, அம்ஹே நிஸ்ஸாய லப⁴தீ’’தி. ஏவங் புக்³க³லோ த³த்வா அவஜானாதி நாம. ஏகோ பன ஏகேன ஸத்³தி⁴ங் த்³வே தீணி வஸ்ஸானி வஸந்தோ புப்³பே³ தங் புக்³க³லங் க³ருங் கத்வா பச்சா² க³ச்ச²ந்தே க³ச்ச²ந்தே காலே சித்தீகாரங் ந கரோதி, ஆஸனாபி ந வுட்டா²தி, உபட்டா²னம்பி ந க³ச்ச²தி. ஏவங் புக்³க³லோ ஸங்வாஸேன அவஜானாதி நாம.
192. Datvā avajānātītiādīsu – eko bhikkhu mahāpuñño catupaccayalābhī hoti. So cīvarādīni labhitvā aññaṃ appapuññaṃ āpucchati. Sopi tasmiṃ punappunaṃ āpucchantepi gaṇhātiyeva. Athassa itaro thokaṃ kupito hutvā maṅkubhāvaṃ uppādetukāmo vadati – ‘‘ayaṃ attano dhammatāya cīvarādīni na labhati, amhe nissāya labhatī’’ti. Evaṃ puggalo datvā avajānāti nāma. Eko pana ekena saddhiṃ dve tīṇi vassāni vasanto pubbe taṃ puggalaṃ garuṃ katvā pacchā gacchante gacchante kāle cittīkāraṃ na karoti, āsanāpi na vuṭṭhāti, upaṭṭhānampi na gacchati. Evaṃ puggalo saṃvāsena avajānāti nāma.
ஆதெ⁴ய்யமுகோ²தி ஆதி³தோ தெ⁴ய்யமுகோ². பட²மவசனஸ்மிங்யேவ ட²பிதமுகோ²தி அத்தோ². அதி⁴முச்சிதா ஹோதீதி ஸத்³தா⁴தா ஹோதி. தத்ராயங் நயோ – ஏகோ புக்³க³லோ ஸாருப்பங்யேவ பி⁴க்கு²ங் ‘அஸாருப்போ ஏஸோ’தி கதே²தி, தங் ஸுத்வா ஏஸ நிட்ட²ங் க³ச்ச²தி. புன அஞ்ஞேன ஸபா⁴கே³ன பி⁴க்கு²னா ‘ஸாருப்போ அய’ந்தி வுத்தேபி தஸ்ஸ வசனங் ந க³ண்ஹாதி ‘‘அஸுகேன நாம ‘அஸாருப்போ அய’ந்தி அம்ஹாகங் கதி²த’’ந்தி புரிமபி⁴க்கு²னோவ கத²ங் க³ண்ஹாதி. அபரோபிஸ்ஸ து³ஸ்ஸீலங் ‘ஸீலவா’தி கதே²தி. தஸ்ஸ வசனங் ஸத்³த³ஹித்வா புன அஞ்ஞேன ‘‘அஸாருப்போ ஏஸ பி⁴க்கு², நாயங் தும்ஹாகங் ஸந்திகங் உபஸங்கமிதுங் யுத்தோ’’தி வுத்தோபி தஸ்ஸ வசனங் அக்³க³ஹெத்வா புரிமஸ்ஸேவ கத²ங் க³ண்ஹாதி. அபரோ வண்ணம்பி கதி²தங் க³ண்ஹாதி, அவண்ணம்பி கதி²தங் க³ண்ஹாதியேவ. அயம்பி ஆதெ⁴ய்யமுகோ²யேவ நாம. ஆதா⁴தப்³ப³முகோ² யங் யங் ஸுணாதி, தத்த² தத்த² ட²பிதமுகோ²தி அத்தோ².
Ādheyyamukhoti ādito dheyyamukho. Paṭhamavacanasmiṃyeva ṭhapitamukhoti attho. Adhimuccitā hotīti saddhātā hoti. Tatrāyaṃ nayo – eko puggalo sāruppaṃyeva bhikkhuṃ ‘asāruppo eso’ti katheti, taṃ sutvā esa niṭṭhaṃ gacchati. Puna aññena sabhāgena bhikkhunā ‘sāruppo aya’nti vuttepi tassa vacanaṃ na gaṇhāti ‘‘asukena nāma ‘asāruppo aya’nti amhākaṃ kathita’’nti purimabhikkhunova kathaṃ gaṇhāti. Aparopissa dussīlaṃ ‘sīlavā’ti katheti. Tassa vacanaṃ saddahitvā puna aññena ‘‘asāruppo esa bhikkhu, nāyaṃ tumhākaṃ santikaṃ upasaṅkamituṃ yutto’’ti vuttopi tassa vacanaṃ aggahetvā purimasseva kathaṃ gaṇhāti. Aparo vaṇṇampi kathitaṃ gaṇhāti, avaṇṇampi kathitaṃ gaṇhātiyeva. Ayampi ādheyyamukhoyeva nāma. Ādhātabbamukho yaṃ yaṃ suṇāti, tattha tattha ṭhapitamukhoti attho.
லோலோதி ஸத்³தா⁴தீ³னங் இத்தரகாலட்டி²திகத்தா அஸ்ஸத்³தி⁴யாதீ³ஹி லுலிதபா⁴வேன லோலோ. இத்தரஸத்³தோ⁴தி பரித்தஸத்³தோ⁴, அபரிபுண்ணஸத்³தோ⁴. ஸேஸேஸுபி ஏஸேவ நயோ. எத்த² பன புனப்புனங் ப⁴ஜனவஸேன ஸத்³தா⁴வ ப⁴த்தி. பேமங் ஸத்³தா⁴பேமங் கே³ஹஸிதபேமம்பி வட்டதி. பஸாதோ³ ஸத்³தா⁴பஸாதோ³வ. ஏவங் புக்³க³லோ லோலோ ஹோதீதி ஏவங் இத்தரஸத்³தா⁴தி³தாய புக்³க³லோ லோலோ நாம ஹோதி. ஹலித்³தி³ராகோ³ விய , து²ஸராஸிம்ஹி கொட்டிதகா²ணுகோ விய, அஸ்ஸபிட்டி²யங் ட²பிதகும்ப⁴ண்ட³ங் விய ச அனிப³த்³த⁴ட்டா²னோ முஹுத்தேன பஸீத³தி, முஹுத்தேன குப்பதி.
Loloti saddhādīnaṃ ittarakālaṭṭhitikattā assaddhiyādīhi lulitabhāvena lolo. Ittarasaddhoti parittasaddho, aparipuṇṇasaddho. Sesesupi eseva nayo. Ettha pana punappunaṃ bhajanavasena saddhāva bhatti. Pemaṃ saddhāpemaṃ gehasitapemampi vaṭṭati. Pasādo saddhāpasādova. Evaṃ puggalo lolo hotīti evaṃ ittarasaddhāditāya puggalo lolo nāma hoti. Haliddirāgo viya , thusarāsimhi koṭṭitakhāṇuko viya, assapiṭṭhiyaṃ ṭhapitakumbhaṇḍaṃ viya ca anibaddhaṭṭhāno muhuttena pasīdati, muhuttena kuppati.
மந்தோ³ மோமூஹோதி அஞ்ஞாணபா⁴வேன மந்தோ³ அவிஸத³தாய மோமூஹோ. மஹாமூள்ஹோதி அத்தோ².
Mando momūhoti aññāṇabhāvena mando avisadatāya momūho. Mahāmūḷhoti attho.
193. யோதா⁴ஜீவூபமேஸு – யோதா⁴ஜீவாதி யுத்³தூ⁴பஜீவினோ. ரஜக்³க³ந்தி ஹத்தி²அஸ்ஸாதீ³னங் பாத³ப்பஹாரபி⁴ன்னாய பூ⁴மியா உக்³க³தங் ரஜக்க²ந்த⁴ங். ந ஸந்த²ம்ப⁴தீதி ஸந்த²ம்பி⁴த்வா டா²துங் ந ஸக்கோதி. ஸஹதி ரஜக்³க³ந்தி ரஜக்க²ந்த⁴ங் தி³ஸ்வாபி அதி⁴வாஸேதி. த⁴ஜக்³க³ந்தி ஹத்தி²அஸ்ஸாதி³பிட்டே²ஸு வா ரதே²ஸு வா உஸ்ஸாபிதானங் த⁴ஜானங் அக்³க³ங். உஸ்ஸாரணந்தி ஹத்தி²அஸ்ஸரதா²தீ³னஞ்சேவ ப³லகாயஸ்ஸ ச உச்சாஸத்³த³மஹாஸத்³த³ங். ஸம்பஹாரேதி ஸமாக³தே அப்பமத்தகேபி பஹாரே. ஹஞ்ஞதீதி விஹஞ்ஞதி, விகா⁴தங் ஆபஜ்ஜதி. ப்³யாபஜ்ஜதீதி விபத்திங் ஆபஜ்ஜதி, பகதிபா⁴வங் ஜஹதி. ஸஹதி ஸம்பஹாரந்தி த்³வே தயோ பஹாரே பத்வாபி ஸஹதி, அதி⁴வாஸேதி . தமேவ ஸங்கா³மஸீஸந்தி தமேவ ஜயக²ந்தா⁴வாரட்டா²னங். அஜ்ஜா²வஸதீதி ஸத்தாஹமத்தங் அபி⁴ப⁴வித்வா ஆவஸதி. கிங் காரணா? லத்³த⁴ப்பஹாரானங் பஹாரஜக்³க³னத்த²ஞ்சேவ கதகம்மானங் விஸேஸங் ஞத்வா டா²னந்தரதா³னத்த²ஞ்ச இஸ்ஸரியஸுகா²னுப⁴வனத்த²ஞ்ச.
193. Yodhājīvūpamesu – yodhājīvāti yuddhūpajīvino. Rajagganti hatthiassādīnaṃ pādappahārabhinnāya bhūmiyā uggataṃ rajakkhandhaṃ. Na santhambhatīti santhambhitvā ṭhātuṃ na sakkoti. Sahati rajagganti rajakkhandhaṃ disvāpi adhivāseti. Dhajagganti hatthiassādipiṭṭhesu vā rathesu vā ussāpitānaṃ dhajānaṃ aggaṃ. Ussāraṇanti hatthiassarathādīnañceva balakāyassa ca uccāsaddamahāsaddaṃ. Sampahāreti samāgate appamattakepi pahāre. Haññatīti vihaññati, vighātaṃ āpajjati. Byāpajjatīti vipattiṃ āpajjati, pakatibhāvaṃ jahati. Sahati sampahāranti dve tayo pahāre patvāpi sahati, adhivāseti . Tameva saṅgāmasīsanti tameva jayakhandhāvāraṭṭhānaṃ. Ajjhāvasatīti sattāhamattaṃ abhibhavitvā āvasati. Kiṃ kāraṇā? Laddhappahārānaṃ pahārajagganatthañceva katakammānaṃ visesaṃ ñatvā ṭhānantaradānatthañca issariyasukhānubhavanatthañca.
194. இதா³னி யஸ்மா ஸத்து² யோதா⁴ஜீவேஹி கிச்சங் நத்தி², இமஸ்மிங் பன ஸாஸனே ததா²ரூபே பஞ்ச புக்³க³லே த³ஸ்ஸேதுங் இத³ங் ஓபம்மங் ஆப⁴தங், தஸ்மா தே புக்³க³லே த³ஸ்ஸெந்தோ ஏவமேவந்திஆதி³மாஹ.
194. Idāni yasmā satthu yodhājīvehi kiccaṃ natthi, imasmiṃ pana sāsane tathārūpe pañca puggale dassetuṃ idaṃ opammaṃ ābhataṃ, tasmā te puggale dassento evamevantiādimāha.
தத்த² ஸங்ஸீத³தீதி மிச்சா²விதக்கஸ்மிங் விஸீத³தி, அனுபவிஸதி. ந ஸக்கோதி ப்³ரஹ்மசரியங் ஸந்தா⁴ரேதுந்தி ப்³ரஹ்மசரியவாஸங் அனுபச்சி²ஜ்ஜமானங் கோ³பேதுங் ந ஸக்கோதி. ஸிக்கா²து³ப்³ப³ல்யங் ஆவிகத்வாதி ஸிக்கா²ய து³ப்³ப³லபா⁴வங் பகாஸெத்வா. கிமஸ்ஸ ரஜக்³க³ஸ்மிந்தி கிங் தஸ்ஸ புக்³க³லஸ்ஸ ரஜக்³க³ங் நாமாதி வத³தி. அபி⁴ரூபாதி அபி⁴ரூபவதீ. த³ஸ்ஸனீயாதி த³ஸ்ஸனயொக்³கா³. பாஸாதி³காதி த³ஸ்ஸனேனேவ சித்தப்பஸாதா³வஹா. பரமாயாதி உத்தமாய. வண்ணபொக்க²ரதாயாதி ஸரீரவண்ணேன சேவ அங்க³ஸண்டா²னேன ச.
Tattha saṃsīdatīti micchāvitakkasmiṃ visīdati, anupavisati. Na sakkoti brahmacariyaṃ sandhāretunti brahmacariyavāsaṃ anupacchijjamānaṃ gopetuṃ na sakkoti. Sikkhādubbalyaṃ āvikatvāti sikkhāya dubbalabhāvaṃ pakāsetvā. Kimassa rajaggasminti kiṃ tassa puggalassa rajaggaṃ nāmāti vadati. Abhirūpāti abhirūpavatī. Dassanīyāti dassanayoggā. Pāsādikāti dassaneneva cittappasādāvahā. Paramāyāti uttamāya. Vaṇṇapokkharatāyāti sarīravaṇṇena ceva aṅgasaṇṭhānena ca.
196. ஊஹஸதீதி அவஹஸதி. உல்லபதீதி கதே²தி. உஜ்ஜக்³க⁴தீதி பாணிங் பஹரித்வா மஹாஹஸிதங் ஹஸதி. உப்பண்டே³தீதி உப்பண்ட³னகத²ங் கதே²தி.
196. Ūhasatīti avahasati. Ullapatīti katheti. Ujjagghatīti pāṇiṃ paharitvā mahāhasitaṃ hasati. Uppaṇḍetīti uppaṇḍanakathaṃ katheti.
197. அபி⁴னிஸீத³தீதி அபி⁴ப⁴வித்வா ஸந்திகே வா ஏகாஸனே வா நிஸீத³தி. து³தியபதே³பி ஏஸேவ நயோ. அஜ்ஜொ²த்த²ரதீதி அவத்த²ரதி.
197. Abhinisīdatīti abhibhavitvā santike vā ekāsane vā nisīdati. Dutiyapadepi eseva nayo. Ajjhottharatīti avattharati.
198. வினிவேடெ²த்வா வினிமோசெத்வாதி க³ஹிதட்டா²னதோ தஸ்ஸ ஹத்த²ங் வினிவேடெ²த்வா சேவ, மோசெத்வா ச. ஸேஸமெத்த² உத்தானத்த²மேவ.
198. Viniveṭhetvā vinimocetvāti gahitaṭṭhānato tassa hatthaṃ viniveṭhetvā ceva, mocetvā ca. Sesamettha uttānatthameva.
199. பிண்ட³பாதிகேஸு – மந்த³த்தா மோமூஹத்தாதி நேவ ஸமாதா³னங் ஜானாதி, ந ஆனிஸங்ஸங்; அத்தனோ பன மந்த³த்தா மோமூஹத்தா அஞ்ஞாணேனேவ பிண்ட³பாதிகோ ஹோதி. பாபிச்சோ² இச்சா²பகதோதி பிண்ட³பாதிகஸ்ஸ மே ஸதோ ‘‘அயங் பிண்ட³பாதிகோ’’தி சதுபச்சயஸக்காரங் கரிஸ்ஸந்தி. லஜ்ஜீ, அப்பிச்சோ²திஆதீ³ஹி ச கு³ணேஹி ஸம்பா⁴வெஸ்ஸந்தீதி. ஏவங் பாபிகாய இச்சா²ய ட²த்வா தாய பாபிச்சா²ய அபி⁴பூ⁴தோ ஹுத்வா பிண்ட³பாதிகோ ஹோதி. உம்மாத³வஸேன பிண்டா³ய சரந்தோ பன உம்மாதா³ சித்தவிக்கே²பா பிண்ட³பாதிகோ நாம ஹோதி. வண்ணிதந்தி இத³ங் பிண்ட³பாதிகங்க³ங் நாம பு³த்³தே⁴ஹி ச பு³த்³த⁴ஸாவகேஹி ச வண்ணிதங் பஸத்த²ந்தி பிண்ட³பாதிகோ ஹோதி. அப்பிச்ச²தங்யேவ நிஸ்ஸாயாதிஆதீ³ஸு – ‘‘இதி அப்பிச்சோ² ப⁴விஸ்ஸாமி, இத³ங் மே பிண்ட³பாதிகங்க³ங் அப்பிச்ச²தாய ஸங்வத்திஸ்ஸதி; ‘இதி ஸந்துட்டோ² ப⁴விஸ்ஸாமி இத³ங் மே பிண்ட³பாதிகங்க³ங் ஸந்துட்டி²யா ஸங்வத்திஸ்ஸதி’; ‘இதி கிலேஸே ஸங்லிகி²ஸ்ஸாமி’, இத³ங் மே பிண்ட³பாதிகங்க³ங் கிலேஸஸல்லேக²னத்தா²ய ஸங்வத்திஸ்ஸதீ’’தி பிண்ட³பாதிகோ ஹோதி. இத³மத்தி²தந்தி இமாய கல்யாணாய படிபத்தியா அத்தி²கபா⁴வங், இமினா வா பிண்ட³பாதமத்தேன அத்தி²கபா⁴வங். யங் யங் லத்³த⁴ங் தேன தேனேவ யாபனபா⁴வங் நிஸ்ஸாயாதி அத்தோ². அக்³கோ³தி ஜெட்ட²கோ. ஸேஸானி தஸ்ஸேவ வேவசனானி.
199. Piṇḍapātikesu – mandattā momūhattāti neva samādānaṃ jānāti, na ānisaṃsaṃ; attano pana mandattā momūhattā aññāṇeneva piṇḍapātiko hoti. Pāpiccho icchāpakatoti piṇḍapātikassa me sato ‘‘ayaṃ piṇḍapātiko’’ti catupaccayasakkāraṃ karissanti. Lajjī, appicchotiādīhi ca guṇehi sambhāvessantīti. Evaṃ pāpikāya icchāya ṭhatvā tāya pāpicchāya abhibhūto hutvā piṇḍapātiko hoti. Ummādavasena piṇḍāya caranto pana ummādā cittavikkhepā piṇḍapātiko nāma hoti. Vaṇṇitanti idaṃ piṇḍapātikaṅgaṃ nāma buddhehi ca buddhasāvakehi ca vaṇṇitaṃ pasatthanti piṇḍapātiko hoti. Appicchataṃyeva nissāyātiādīsu – ‘‘iti appiccho bhavissāmi, idaṃ me piṇḍapātikaṅgaṃ appicchatāya saṃvattissati; ‘iti santuṭṭho bhavissāmi idaṃ me piṇḍapātikaṅgaṃ santuṭṭhiyā saṃvattissati’; ‘iti kilese saṃlikhissāmi’, idaṃ me piṇḍapātikaṅgaṃ kilesasallekhanatthāya saṃvattissatī’’ti piṇḍapātiko hoti. Idamatthitanti imāya kalyāṇāya paṭipattiyā atthikabhāvaṃ, iminā vā piṇḍapātamattena atthikabhāvaṃ. Yaṃ yaṃ laddhaṃ tena teneva yāpanabhāvaṃ nissāyāti attho. Aggoti jeṭṭhako. Sesāni tasseva vevacanāni.
க³வா கீ²ரந்தி கா³விதோ கீ²ரங் நாம ஹோதி, ந வினா கா³வியா. கீ²ரம்ஹா த³தீ⁴திஆதீ³ஸுபி ஏஸேவ நயோ. ஏவமேவந்தி யதா² ஏதேஸு பஞ்சஸு கோ³ரஸேஸு ஸப்பிமண்டோ³ அக்³கோ³; ஏவமேவங் இமேஸு பஞ்சஸு பிண்ட³பாதிகேஸு ய்வாயங் அப்பிச்ச²தாதீ³னி நிஸ்ஸாய பிண்ட³பாதிகோ ஹோதி. அயங் அக்³கோ³ ச ஸெட்டோ² ச பாமொக்கோ² ச உத்தமோ ச பவரோ ச. இமேஸு பன பஞ்சஸு பிண்ட³பாதிகேஸு த்³வேவ ஜனா பிண்ட³பாதிகா , தயோ ந பிண்ட³பாதிகா. நாமமத்தேன பன பிண்ட³பாதிகாதி வேதி³தப்³பா³. க²லுபச்சா²ப⁴த்திகாதீ³ஸுபி ஏஸேவ நயோதி.
Gavā khīranti gāvito khīraṃ nāma hoti, na vinā gāviyā. Khīramhā dadhītiādīsupi eseva nayo. Evamevanti yathā etesu pañcasu gorasesu sappimaṇḍo aggo; evamevaṃ imesu pañcasu piṇḍapātikesu yvāyaṃ appicchatādīni nissāya piṇḍapātiko hoti. Ayaṃ aggo ca seṭṭho ca pāmokkho ca uttamo ca pavaro ca. Imesu pana pañcasu piṇḍapātikesu dveva janā piṇḍapātikā , tayo na piṇḍapātikā. Nāmamattena pana piṇḍapātikāti veditabbā. Khalupacchābhattikādīsupi eseva nayoti.
பஞ்சகனித்³தே³ஸவண்ணனா.
Pañcakaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / புக்³க³லபஞ்ஞத்திபாளி • Puggalapaññattipāḷi / 5. பஞ்சகபுக்³க³லபஞ்ஞத்தி • 5. Pañcakapuggalapaññatti
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 5. பஞ்சகனித்³தே³ஸவண்ணனா • 5. Pañcakaniddesavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 5. பஞ்சகனித்³தே³ஸவண்ணனா • 5. Pañcakaniddesavaṇṇanā
