| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༥. པཉྩམསིཀྑཱཔདཾ
5. Pañcamasikkhāpadaṃ
༨༡༠. ཏེན སམཡེན བུདྡྷོ བྷགཝཱ སཀྐེསུ ཝིཧརཏི ཀཔིལཝཏྠུསྨིཾ ནིགྲོདྷཱརཱམེ། ཨཐ ཁོ མཧཱཔཛཱཔཏི གོཏམཱི ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨདྷོཝཱཏེ ཨཊྛཱསི – ‘‘དུགྒནྡྷོ, བྷགཝཱ, མཱཏུགཱམོ’’ཏི། ཨཐ ཁོ བྷགཝཱ – ‘‘ཨཱདིཡནྟུ ཁོ བྷིཀྑུནིཡོ ཨུདཀསུདྡྷིཀ’’ནྟི, མཧཱཔཛཱཔཏིཾ གོཏམིཾ དྷམྨིཡཱ ཀཐཱཡ སནྡསྶེསི སམཱདཔེསི སམུཏྟེཛེསི སམྤཧཾསེསི། ཨཐ ཁོ མཧཱཔཛཱཔཏི གོཏམཱི བྷགཝཏཱ དྷམྨིཡཱ ཀཐཱཡ སནྡསྶིཏཱ སམཱདཔིཏཱ སམུཏྟེཛིཏཱ སམྤཧཾསིཏཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐཱམི། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, བྷིཀྑུནཱིནཾ ཨུདཀསུདྡྷིཀ’’ནྟི། ཏེན ཁོ པན སམཡེན ཨཉྙཏརཱ བྷིཀྑུནཱི – ‘‘བྷགཝཏཱ ཨུདཀསུདྡྷིཀཱ ཨནུཉྙཱཏཱ’’ཏི ཨཏིགམྦྷཱིརཾ ཨུདཀསུདྡྷིཀཾ ཨཱདིཡནྟཱི མུཏྟཀརཎེ ཝཎཾ ཨཀཱསི། ཨཐ ཁོ སཱ བྷིཀྑུནཱི བྷིཀྑུནཱིནཾ ཨེཏམཏྠཾ ཨཱརོཙེཏི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ཀཐཉྷི ནཱམ བྷིཀྑུནཱི ཨཏིགམྦྷཱིརཾ ཨུདཀསུདྡྷིཀཾ ཨཱདིཡིསྶཏཱིཏི…པེ॰… སཙྩཾ ཀིར, བྷིཀྑཝེ, བྷིཀྑུནཱི ཨཏིགམྦྷཱིརཾ ཨུདཀསུདྡྷིཀཾ ཨཱདིཡཏཱི’’ཏི 1? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, བྷིཀྑུནཱི ཨཏིགམྦྷཱིརཾ ཨུདཀསུདྡྷིཀཾ ཨཱདིཡིསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
810. Tena samayena buddho bhagavā sakkesu viharati kapilavatthusmiṃ nigrodhārāme. Atha kho mahāpajāpati gotamī yena bhagavā tenupasaṅkami; upasaṅkamitvā bhagavantaṃ abhivādetvā adhovāte aṭṭhāsi – ‘‘duggandho, bhagavā, mātugāmo’’ti. Atha kho bhagavā – ‘‘ādiyantu kho bhikkhuniyo udakasuddhika’’nti, mahāpajāpatiṃ gotamiṃ dhammiyā kathāya sandassesi samādapesi samuttejesi sampahaṃsesi. Atha kho mahāpajāpati gotamī bhagavatā dhammiyā kathāya sandassitā samādapitā samuttejitā sampahaṃsitā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, bhikkhunīnaṃ udakasuddhika’’nti. Tena kho pana samayena aññatarā bhikkhunī – ‘‘bhagavatā udakasuddhikā anuññātā’’ti atigambhīraṃ udakasuddhikaṃ ādiyantī muttakaraṇe vaṇaṃ akāsi. Atha kho sā bhikkhunī bhikkhunīnaṃ etamatthaṃ āroceti. Yā tā bhikkhuniyo appicchā…pe… tā ujjhāyanti khiyyanti vipācenti – kathañhi nāma bhikkhunī atigambhīraṃ udakasuddhikaṃ ādiyissatīti…pe… saccaṃ kira, bhikkhave, bhikkhunī atigambhīraṃ udakasuddhikaṃ ādiyatī’’ti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī atigambhīraṃ udakasuddhikaṃ ādiyissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༨༡༡. ‘‘ཨུདཀསུདྡྷིཀཾ པན བྷིཀྑུནིཡཱ ཨཱདིཡམཱནཱཡ དྭངྒུལཔབྦཔརམཾ ཨཱདཱཏབྦཾ། ཏཾ ཨཏིཀྐཱམེནྟིཡཱ པཱཙིཏྟིཡ’’ནྟི།
811.‘‘Udakasuddhikaṃ pana bhikkhuniyā ādiyamānāya dvaṅgulapabbaparamaṃ ādātabbaṃ. Taṃ atikkāmentiyā pācittiya’’nti.
༨༡༢. ཨུདཀསུདྡྷིཀཾ ནཱམ མུཏྟཀརཎསྶ དྷོཝནཱ ཝུཙྩཏི།
812.Udakasuddhikaṃ nāma muttakaraṇassa dhovanā vuccati.
ཨཱདིཡམཱནཱཡཱཏི དྷོཝནྟིཡཱ།
Ādiyamānāyāti dhovantiyā.
དྭངྒུལཔབྦཔརམཾ ཨཱདཱཏབྦནྟི དྭཱིསུ ཨངྒུལེསུ དྭེ པབྦཔརམཱ ཨཱདཱཏབྦཱ།
Dvaṅgulapabbaparamaṃ ādātabbanti dvīsu aṅgulesu dve pabbaparamā ādātabbā.
ཏཾ ཨཏིཀྐཱམེནྟིཡཱཏི སམྥསྶཾ སཱདིཡནྟཱི ཨནྟམསོ ཀེསགྒམཏྟམྤི ཨཏིཀྐཱམེཏི, ཨཱཔཏྟི པཱཙིཏྟིཡསྶ།
Taṃ atikkāmentiyāti samphassaṃ sādiyantī antamaso kesaggamattampi atikkāmeti, āpatti pācittiyassa.
༨༡༣. ཨཏིརེཀདྭངྒུལཔབྦེ ཨཏིརེཀསཉྙཱ ཨཱདིཡཏི, ཨཱཔཏྟི པཱཙིཏྟིཡསྶ། ཨཏིརེཀདྭངྒུལཔབྦེ ཝེམཏིཀཱ ཨཱདིཡཏི, ཨཱཔཏྟི པཱཙིཏྟིཡསྶ ། ཨཏིརེཀདྭངྒུལཔབྦེ ཨཱུནཀསཉྙཱ ཨཱདིཡཏི, ཨཱཔཏྟི པཱཙིཏྟིཡསྶ །
813. Atirekadvaṅgulapabbe atirekasaññā ādiyati, āpatti pācittiyassa. Atirekadvaṅgulapabbe vematikā ādiyati, āpatti pācittiyassa . Atirekadvaṅgulapabbe ūnakasaññā ādiyati, āpatti pācittiyassa .
ཨཱུནཀདྭངྒུལཔབྦེ ཨཏིརེཀསཉྙཱ, ཨཱཔཏྟི དུཀྐཊསྶ། ཨཱུནཀདྭངྒུལཔབྦེ ཝེམཏིཀཱ, ཨཱཔཏྟི དུཀྐཊསྶ། ཨཱུནཀདྭངྒུལཔབྦེ ཨཱུནཀསཉྙཱ, ཨནཱཔཏྟི།
Ūnakadvaṅgulapabbe atirekasaññā, āpatti dukkaṭassa. Ūnakadvaṅgulapabbe vematikā, āpatti dukkaṭassa. Ūnakadvaṅgulapabbe ūnakasaññā, anāpatti.
༨༡༤. ཨནཱཔཏྟི དྭངྒུལཔབྦཔརམཾ ཨཱདིཡཏི, ཨཱུནཀདྭངྒུལཔབྦཔརམཾ ཨཱདིཡཏི, ཨཱབཱདྷཔཙྩཡཱ, ཨུམྨཏྟིཀཱཡ, ཨཱདིཀམྨིཀཱཡཱཏི།
814. Anāpatti dvaṅgulapabbaparamaṃ ādiyati, ūnakadvaṅgulapabbaparamaṃ ādiyati, ābādhapaccayā, ummattikāya, ādikammikāyāti.
པཉྩམསིཀྑཱཔདཾ ནིཊྛིཏཾ།
Pañcamasikkhāpadaṃ niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༥. པཉྩམསིཀྑཱཔདཝཎྞནཱ • 5. Pañcamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༡. ལསུཎཝགྒཝཎྞནཱ • 1. Lasuṇavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༥. པཉྩམསིཀྑཱཔདཝཎྞནཱ • 5. Pañcamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. པཋམལསུཎཱདིསིཀྑཱཔདཝཎྞནཱ • 1. Paṭhamalasuṇādisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༥. པཉྩམསིཀྑཱཔདཾ • 5. Pañcamasikkhāpadaṃ
