| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[55] 5. бан̃жаавуд̇хаж̇аад̇агаван̣н̣анаа
[55] 5. Pañcāvudhajātakavaṇṇanā
яо алийнзна жид̇д̇знаад̇и ид̣̇ам̣ сад̇т̇аа ж̇зд̇аванз вихаранд̇о згам̣ оссадтавийрияам̣ бхигкум̣ аараб̣бха гат̇зси. д̇ан̃хи бхигкум̣ сад̇т̇аа ааманд̇зд̇ваа ‘‘сажжам̣ гира д̇вам̣ бхигку оссадтавийрияосий’’д̇и бужчид̇ваа ‘‘сажжам̣, бхаг̇аваа’’д̇и вуд̇д̇з ‘‘бхигку буб̣б̣з бан̣д̣ид̇аа вийрияам̣ гаад̇ум̣ яуд̇д̇адтаанз вийрияам̣ гад̇ваа раж̇ж̇асамбад̇д̇им̣ баабун̣им̣суу’’д̇и вад̇ваа ад̇ийд̇ам̣ аахари.
Yoalīnena cittenāti idaṃ satthā jetavane viharanto ekaṃ ossaṭṭhavīriyaṃ bhikkhuṃ ārabbha kathesi. Tañhi bhikkhuṃ satthā āmantetvā ‘‘saccaṃ kira tvaṃ bhikkhu ossaṭṭhavīriyosī’’ti pucchitvā ‘‘saccaṃ, bhagavā’’ti vutte ‘‘bhikkhu pubbe paṇḍitā vīriyaṃ kātuṃ yuttaṭṭhāne vīriyaṃ katvā rajjasampattiṃ pāpuṇiṃsū’’ti vatvā atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о д̇асса ран̃н̃о аг̇г̇амахзсияаа гужчисмим̣ ниб̣б̣ад̇д̇и. д̇асса наамаг̇г̇ахан̣ад̣̇ивасз адтасад̇з б̣раахман̣з саб̣б̣агаамзхи санд̇аббзд̇ваа лагкан̣аани бужчим̣су. лагкан̣агусалаа б̣раахман̣аа лагкан̣асамбад̇д̇им̣ д̣̇исваа ‘‘бун̃н̃асамбанно, махаарааж̇а, гумааро д̇умхаагам̣ ажжаязна раж̇ж̇ам̣ баабун̣иссад̇и, бан̃жаавуд̇хагаммз бан̃н̃аад̇о баагадо ж̇амб̣уд̣̇ийбз аг̇г̇абурисо бхависсад̇ий’’д̇и б̣яаагарим̣су. рааж̇аа б̣раахман̣аанам̣ важанам̣ суд̇ваа гумаарасса наамам̣ г̇ан̣ханд̇о ‘‘бан̃жаавуд̇хагумааро’’д̇и наамам̣ агааси. ат̇а нам̣ вин̃н̃уд̇ам̣ бад̇ваа сол̣асавассуд̣̇д̣̇зсз тид̇ам̣ рааж̇аа ааманд̇зд̇ваа ‘‘д̇аад̇а, сиббам̣ уг̇г̇ан̣хаахий’’д̇и ааха. ‘‘гасса санд̇игз уг̇г̇ан̣хаами, д̣̇зваа’’д̇и? ‘‘г̇ажча, д̇аад̇а, г̇анд̇хаарарадтз д̇аггасиланаг̇арз д̣̇исаабаамогкасса аажарияасса санд̇игз уг̇г̇ан̣ха, ид̣̇ан̃жасса аажарияабхааг̇ам̣ д̣̇аж̇ж̇зяяаасий’’д̇и сахассам̣ д̣̇ад̇ваа уяяож̇зси. со д̇ад̇т̇а г̇анд̇ваа сиббам̣ сигкид̇ваа аажариязна д̣̇иннам̣ бан̃жаавуд̇хам̣ г̇ахзд̇ваа аажарияам̣ ванд̣̇ид̇ваа д̇аггасиланаг̇арад̇о нигкамид̇ваа саннад̣̇д̇хабан̃жаавуд̇хо б̣аараан̣асимаг̇г̇ам̣ бадибаж̇ж̇и.
Atīte bārāṇasiyaṃ brahmadatte rajjaṃ kārente bodhisatto tassa rañño aggamahesiyā kucchismiṃ nibbatti. Tassa nāmaggahaṇadivase aṭṭhasate brāhmaṇe sabbakāmehi santappetvā lakkhaṇāni pucchiṃsu. Lakkhaṇakusalā brāhmaṇā lakkhaṇasampattiṃ disvā ‘‘puññasampanno, mahārāja, kumāro tumhākaṃ accayena rajjaṃ pāpuṇissati, pañcāvudhakamme paññāto pākaṭo jambudīpe aggapuriso bhavissatī’’ti byākariṃsu. Rājā brāhmaṇānaṃ vacanaṃ sutvā kumārassa nāmaṃ gaṇhanto ‘‘pañcāvudhakumāro’’ti nāmaṃ akāsi. Atha naṃ viññutaṃ patvā soḷasavassuddese ṭhitaṃ rājā āmantetvā ‘‘tāta, sippaṃ uggaṇhāhī’’ti āha. ‘‘Kassa santike uggaṇhāmi, devā’’ti? ‘‘Gaccha, tāta, gandhāraraṭṭhe takkasilanagare disāpāmokkhassa ācariyassa santike uggaṇha, idañcassa ācariyabhāgaṃ dajjeyyāsī’’ti sahassaṃ datvā uyyojesi. So tattha gantvā sippaṃ sikkhitvā ācariyena dinnaṃ pañcāvudhaṃ gahetvā ācariyaṃ vanditvā takkasilanagarato nikkhamitvā sannaddhapañcāvudho bārāṇasimaggaṃ paṭipajji.
со анд̇араамаг̇г̇з силзсаломаяагкзна наама ад̇хидтид̇ам̣ згам̣ адавим̣ баабун̣и. ат̇а нам̣ адавимукз мануссаа д̣̇исваа ‘‘бхо маан̣ава, маа имам̣ адавим̣ бависа, силзсаломаяагко наамзд̇т̇а ад̇т̇и, со д̣̇идтад̣̇идтз мануссз ж̇ийвид̇агкаяам̣ баабзд̇ий’’д̇и ваараяим̣су. б̣од̇хисад̇д̇о ад̇д̇аанам̣ д̇аггзнд̇о асамбхийд̇агзсарасийхо вияа адавим̣ баависиязва. д̇асмим̣ адавимаж̇жхам̣ самбад̇д̇з со яагко д̇ааламад̇д̇о худ̇ваа гуудааг̇аарамад̇д̇ам̣ сийсам̣ бад̇д̇аббамаан̣аани агкийни, д̣̇агалимагул̣амад̇д̇аа д̣̇вз д̣̇аатаа жа маабзд̇ваа сзд̇амуко габ̣арагужчи нийлахад̇т̇абаад̣̇о худ̇ваа б̣од̇хисад̇д̇асса ад̇д̇аанам̣ д̣̇ассзд̇ваа ‘‘гахам̣ яааси, д̇идта бхагкоси мз’’д̇и ааха. ат̇а нам̣ б̣од̇хисад̇д̇о ‘‘яагка, ахам̣ ад̇д̇аанам̣ д̇аггзд̇ваа ид̇ха бавидто, д̇вам̣ аббамад̇д̇о худ̇ваа мам̣ убаг̇ажчзяяааси. висабийд̇зна хи сарзна д̇ам̣ виж̇жхид̇ваа зд̇т̇зва баад̇зссаамий’’д̇и санд̇аж̇ж̇зд̇ваа халаахалависабийд̇ам̣ сарам̣ саннаяхид̇ваа мун̃жи, со яагкасса ломзсуязва аллийяи. д̇ад̇о ан̃н̃ам̣, д̇ад̇о ан̃н̃анд̇и звам̣ бан̃н̃ааса сарз мун̃жи, саб̣б̣з д̇асса ломзсуязва аллийяим̣су. яагко саб̣б̣зби д̇з сарз подзд̇ваа ад̇д̇ано баад̣̇амуулзязва баад̇зд̇ваа б̣од̇хисад̇д̇ам̣ убасан̇гами.
So antarāmagge silesalomayakkhena nāma adhiṭṭhitaṃ ekaṃ aṭaviṃ pāpuṇi. Atha naṃ aṭavimukhe manussā disvā ‘‘bho māṇava, mā imaṃ aṭaviṃ pavisa, silesalomayakkho nāmettha atthi, so diṭṭhadiṭṭhe manusse jīvitakkhayaṃ pāpetī’’ti vārayiṃsu. Bodhisatto attānaṃ takkento asambhītakesarasīho viya aṭaviṃ pāvisiyeva. Tasmiṃ aṭavimajjhaṃ sampatte so yakkho tālamatto hutvā kūṭāgāramattaṃ sīsaṃ pattappamāṇāni akkhīni, dakalimakuḷamattā dve dāṭhā ca māpetvā setamukho kabarakucchi nīlahatthapādo hutvā bodhisattassa attānaṃ dassetvā ‘‘kahaṃ yāsi, tiṭṭha bhakkhosi me’’ti āha. Atha naṃ bodhisatto ‘‘yakkha, ahaṃ attānaṃ takketvā idha paviṭṭho, tvaṃ appamatto hutvā maṃ upagaccheyyāsi. Visapītena hi sarena taṃ vijjhitvā ettheva pātessāmī’’ti santajjetvā halāhalavisapītaṃ saraṃ sannayhitvā muñci, so yakkhassa lomesuyeva allīyi. Tato aññaṃ, tato aññanti evaṃ paññāsa sare muñci, sabbe tassa lomesuyeva allīyiṃsu. Yakkho sabbepi te sare phoṭetvā attano pādamūleyeva pātetvā bodhisattaṃ upasaṅkami.
б̣од̇хисад̇д̇о бунаби д̇ам̣ д̇аж̇ж̇зд̇ваа каг̇г̇ам̣ гад̣дхид̇ваа бахари, д̇зд̇д̇им̣сан̇г̇улааяад̇о каг̇г̇о ломзсуязва аллийяи. ат̇а нам̣ ган̣аязна бахари, соби ломзсуязва аллийяи. д̇асса аллийнабхаавам̣ н̃ад̇ваа муг̇г̇арзна бахари, соби ломзсуязва аллийяи. д̇асса аллийнабхаавам̣ н̃ад̇ваа гунд̇зна бахари, соби ломзсуязва аллийяи. д̇асса аллийнабхаавам̣ н̃ад̇ваа ‘‘бхо яагкана, д̇з ахам̣ ‘бан̃жаавуд̇хагумааро наамаа’д̇и суд̇абуб̣б̣о, ахам̣ д̇аяаа ад̇хидтид̇ам̣ адавим̣ бависанд̇о на д̇хануаад̣̇ийни д̇аггзд̇ваа бавидто, ад̇д̇аанам̣язва бана д̇аггзд̇ваа бавидто, аж̇ж̇а д̇ам̣ бот̇зд̇ваа жун̣н̣авижун̣н̣ам̣ гариссаамий’’д̇и уннаад̣̇знд̇о ад̇д̇аанам̣ д̇аггзд̇ваа д̣̇агкин̣ахад̇т̇зна яагкам̣ бахари, хад̇т̇о ломзсуязва аллийяи. ваамахад̇т̇зна бахари, соби аллийяи. д̣̇агкин̣абаад̣̇зна бахари, соби аллийяи. ваамабаад̣̇зна бахари, соби аллийяи. ‘‘сийсзна д̇ам̣ бот̇зд̇ваа жун̣н̣авижун̣н̣ам̣ гариссаамий’’д̇и сийсзна бахари, д̇амби ломзсуязва аллийяи. со бан̃жод̣д̣ид̇о бан̃жасу таанзсу б̣ад̣̇д̇хо оламб̣анд̇оби ниб̣бхаяо ниссаараж̇ж̇ова ахоси.
Bodhisatto punapi taṃ tajjetvā khaggaṃ kaḍḍhitvā pahari, tettiṃsaṅgulāyato khaggo lomesuyeva allīyi. Atha naṃ kaṇayena pahari, sopi lomesuyeva allīyi. Tassa allīnabhāvaṃ ñatvā muggarena pahari, sopi lomesuyeva allīyi. Tassa allīnabhāvaṃ ñatvā kuntena pahari, sopi lomesuyeva allīyi. Tassa allīnabhāvaṃ ñatvā ‘‘bho yakkhana, te ahaṃ ‘pañcāvudhakumāro nāmā’ti sutapubbo, ahaṃ tayā adhiṭṭhitaṃ aṭaviṃ pavisanto na dhanuādīni takketvā paviṭṭho, attānaṃyeva pana takketvā paviṭṭho, ajja taṃ pothetvā cuṇṇavicuṇṇaṃ karissāmī’’ti unnādento attānaṃ takketvā dakkhiṇahatthena yakkhaṃ pahari, hattho lomesuyeva allīyi. Vāmahatthena pahari, sopi allīyi. Dakkhiṇapādena pahari, sopi allīyi. Vāmapādena pahari, sopi allīyi. ‘‘Sīsena taṃ pothetvā cuṇṇavicuṇṇaṃ karissāmī’’ti sīsena pahari, tampi lomesuyeva allīyi. So pañcoḍḍito pañcasu ṭhānesu baddho olambantopi nibbhayo nissārajjova ahosi.
яагко жинд̇зси ‘‘аяам̣ зго бурисасийхо бурисааж̇аанийяо, на бурисамад̇д̇ова, маад̣̇исзна наамасса яагкзна г̇ахид̇асса санд̇аасамад̇д̇амби на бхависсад̇и, маяаа имам̣ маг̇г̇ам̣ хананд̇зна згоби зваруубо бурисо на д̣̇идтабуб̣б̣о, гасмаа ну ко зса на бхааяад̇ий’’д̇и. со д̇ам̣ каад̣̇ид̇ум̣ ависаханд̇о ‘‘гасмаа ну ко, д̇вам̣ маан̣ава, маран̣абхаяам̣ на бхааяасий’’д̇и бужчи. ‘‘гим̣гааран̣аа, яагка, бхааяиссаами. згасмин̃хи ад̇д̇абхаавз згам̣ маран̣ам̣ нияад̇амзва, абижа маяхам̣ гужчимхи важ̇ираавуд̇хам̣ ад̇т̇и. сажз мам̣ каад̣̇иссаси, д̇ам̣ аавуд̇хам̣ ж̇ийраабзд̇ум̣ на сагкиссаси, д̇ам̣ д̇з анд̇аани кан̣д̣аакан̣д̣игам̣ чинд̣̇ид̇ваа ж̇ийвид̇агкаяам̣ баабзссад̇и. ид̇и убхоби нассиссаама, иминаа гааран̣знаахам̣ на бхааяаамий’’д̇и. ид̣̇ам̣ гира б̣од̇хисад̇д̇о ад̇д̇ано аб̣бханд̇арз н̃аан̣аавуд̇хам̣ санд̇хааяа гат̇зси. д̇ам̣ суд̇ваа яагко жинд̇зси ‘‘аяам̣ маан̣аво сажжамзва бхан̣ад̇и, имасса бурисасийхасса сарийрад̇о муг̇г̇аб̣ийж̇амад̇д̇амби мам̣сакан̣д̣ам̣ маяхам̣ гужчи ж̇ийрзд̇ум̣ на сагкиссад̇и, виссаж̇ж̇зссаами на’’нд̇и маран̣абхаяад̇аж̇ж̇ид̇о б̣од̇хисад̇д̇ам̣ виссаж̇ж̇зд̇ваа ‘‘маан̣ава, бурисасийхо д̇вам̣, на д̇з ахам̣ мам̣сам̣ каад̣̇иссаами, д̇вам̣ аж̇ж̇а раахумукаа муд̇д̇ажанд̣̇о вияа мама хад̇т̇ад̇о мужжид̇ваа н̃аад̇исухаж̇ж̇аман̣д̣алам̣ д̇осзнд̇о яаахий’’д̇и ааха.
Yakkho cintesi ‘‘ayaṃ eko purisasīho purisājānīyo, na purisamattova, mādisena nāmassa yakkhena gahitassa santāsamattampi na bhavissati, mayā imaṃ maggaṃ hanantena ekopi evarūpo puriso na diṭṭhapubbo, kasmā nu kho esa na bhāyatī’’ti. So taṃ khādituṃ avisahanto ‘‘kasmā nu kho, tvaṃ māṇava, maraṇabhayaṃ na bhāyasī’’ti pucchi. ‘‘Kiṃkāraṇā, yakkha, bhāyissāmi. Ekasmiñhi attabhāve ekaṃ maraṇaṃ niyatameva, apica mayhaṃ kucchimhi vajirāvudhaṃ atthi. Sace maṃ khādissasi, taṃ āvudhaṃ jīrāpetuṃ na sakkhissasi, taṃ te antāni khaṇḍākhaṇḍikaṃ chinditvā jīvitakkhayaṃ pāpessati. Iti ubhopi nassissāma, iminā kāraṇenāhaṃ na bhāyāmī’’ti. Idaṃ kira bodhisatto attano abbhantare ñāṇāvudhaṃ sandhāya kathesi. Taṃ sutvā yakkho cintesi ‘‘ayaṃ māṇavo saccameva bhaṇati, imassa purisasīhassa sarīrato muggabījamattampi maṃsakhaṇḍaṃ mayhaṃ kucchi jīretuṃ na sakkhissati, vissajjessāmi na’’nti maraṇabhayatajjito bodhisattaṃ vissajjetvā ‘‘māṇava, purisasīho tvaṃ, na te ahaṃ maṃsaṃ khādissāmi, tvaṃ ajja rāhumukhā muttacando viya mama hatthato muccitvā ñātisuhajjamaṇḍalaṃ tosento yāhī’’ti āha.
ат̇а нам̣ б̣од̇хисад̇д̇о ааха – ‘‘яагка, ахам̣ д̇аава г̇ажчиссаами, д̇вам̣ бана буб̣б̣зби агусалам̣ гад̇ваа луд̣̇д̣̇о лохид̇абаан̣и барарухирамам̣сабхагко яагко худ̇ваа ниб̣б̣ад̇д̇о. сажз ид̇хааби тад̇ваа агусаламзва гариссаси, анд̇хагаараа анд̇хагаарамзва г̇амиссаси, мам̣ д̣̇идтагаалад̇о бадтааяа бана на саггаа д̇аяаа агусалам̣ гаад̇ум̣, баан̣аад̇ибаад̇агаммам̣ наама нираяз д̇иражчаанаяонияам̣ бзд̇д̇ивисаяз асурагааяз жа ниб̣б̣ад̇д̇зд̇и, мануссзсу ниб̣б̣ад̇д̇аниб̣б̣ад̇д̇адтаанз аббааяугасам̣вад̇д̇анигам̣ ход̇ий’’д̇и звамаад̣̇инаа наязна бан̃жаннам̣ д̣̇уссийляагаммаанам̣ аад̣̇ийнавам̣, бан̃жаннам̣ сийлаанам̣ аанисам̣сан̃жа гат̇зд̇ваа наанаагааран̣зхи яагкам̣ д̇аж̇ж̇зд̇ваа д̇хаммам̣ д̣̇зсзд̇ваа д̣̇амзд̇ваа ниб̣б̣исзванам̣ гад̇ваа бан̃жасу сийлзсу бад̇идтаабзд̇ваа д̇ассааязва нам̣ адавияаа б̣алибадиг̇г̇аахагам̣ д̣̇звад̇ам̣ гад̇ваа аббамаад̣̇зна овад̣̇ид̇ваа адавид̇о нигкамид̇ваа адавимукз мануссаанам̣ аажигкид̇ваа саннад̣̇д̇хабан̃жаавуд̇хо б̣аараан̣асим̣ г̇анд̇ваа маад̇аабид̇аро д̣̇исваа абарабхааг̇з раж̇ж̇з бад̇идтааяа д̇хаммзна раж̇ж̇ам̣ гаарзнд̇о д̣̇аанаад̣̇ийни бун̃н̃аани гад̇ваа яат̇аагаммам̣ г̇ад̇о.
Atha naṃ bodhisatto āha – ‘‘yakkha, ahaṃ tāva gacchissāmi, tvaṃ pana pubbepi akusalaṃ katvā luddo lohitapāṇi pararuhiramaṃsabhakkho yakkho hutvā nibbatto. Sace idhāpi ṭhatvā akusalameva karissasi, andhakārā andhakārameva gamissasi, maṃ diṭṭhakālato paṭṭhāya pana na sakkā tayā akusalaṃ kātuṃ, pāṇātipātakammaṃ nāma niraye tiracchānayoniyaṃ pettivisaye asurakāye ca nibbatteti, manussesu nibbattanibbattaṭṭhāne appāyukasaṃvattanikaṃ hotī’’ti evamādinā nayena pañcannaṃ dussīlyakammānaṃ ādīnavaṃ, pañcannaṃ sīlānaṃ ānisaṃsañca kathetvā nānākāraṇehi yakkhaṃ tajjetvā dhammaṃ desetvā dametvā nibbisevanaṃ katvā pañcasu sīlesu patiṭṭhāpetvā tassāyeva naṃ aṭaviyā balipaṭiggāhakaṃ devataṃ katvā appamādena ovaditvā aṭavito nikkhamitvā aṭavimukhe manussānaṃ ācikkhitvā sannaddhapañcāvudho bārāṇasiṃ gantvā mātāpitaro disvā aparabhāge rajje patiṭṭhāya dhammena rajjaṃ kārento dānādīni puññāni katvā yathākammaṃ gato.
сад̇т̇ааби имам̣ д̇хаммад̣̇зсанам̣ аахарид̇ваа абхисамб̣уд̣̇д̇хо худ̇ваа имам̣ г̇аат̇амааха –
Satthāpi imaṃ dhammadesanaṃ āharitvā abhisambuddho hutvā imaṃ gāthamāha –
55.
55.
‘‘яо алийнзна жид̇д̇зна, алийнаманасо наро;
‘‘Yo alīnena cittena, alīnamanaso naro;
бхаавзд̇и гусалам̣ д̇хаммам̣, яог̇агкзмасса бад̇д̇ияаа;
Bhāveti kusalaṃ dhammaṃ, yogakkhemassa pattiyā;
баабун̣з анубуб̣б̣зна, саб̣б̣асам̣яож̇анагкаяа’’нд̇и.
Pāpuṇe anupubbena, sabbasaṃyojanakkhaya’’nti.
д̇ад̇рааяам̣ бин̣д̣ад̇т̇о – яо бурисо алийнзна асам̣гудид̇зна жид̇д̇зна багад̇ияааби алийнамано алийнаж̇жхаасаяова худ̇ваа анаваж̇ж̇адтзна гусалам̣ сад̇д̇ад̇им̣ саб̣од̇хибагкияабхзд̣̇ам̣ д̇хаммам̣ бхаавзд̇и вад̣дхзд̇и, висаалзна жид̇д̇зна вибассанам̣ ануяун̃ж̇ад̇и жад̇уухи яог̇зхи кзмасса ниб̣б̣аанасса бад̇д̇ияаа, со звам̣ саб̣б̣асан̇каарзсу ‘‘анижжам̣ д̣̇угкам̣ анад̇д̇аа’’д̇и д̇илагкан̣ам̣ ааробзд̇ваа д̇арун̣авибассанад̇о бадтааяа уббаннз б̣од̇хибагкияад̇хаммз бхаавзнд̇о анубуб̣б̣зна згасам̣яож̇анамби анавасзсзд̇ваа саб̣б̣асам̣яож̇анагкаяагарасса жад̇уд̇т̇амаг̇г̇асса барияосаанз уббаннад̇д̇аа ‘‘саб̣б̣асам̣яож̇анагкаяо’’д̇и сан̇кяам̣ г̇ад̇ам̣ арахад̇д̇ам̣ баабун̣зяяаад̇и.
Tatrāyaṃ piṇḍattho – yo puriso alīnena asaṃkuṭitena cittena pakatiyāpi alīnamano alīnajjhāsayova hutvā anavajjaṭṭhena kusalaṃ sattatiṃ sabodhipakkhiyabhedaṃ dhammaṃ bhāveti vaḍḍheti, visālena cittena vipassanaṃ anuyuñjati catūhi yogehi khemassa nibbānassa pattiyā, so evaṃ sabbasaṅkhāresu ‘‘aniccaṃ dukkhaṃ anattā’’ti tilakkhaṇaṃ āropetvā taruṇavipassanato paṭṭhāya uppanne bodhipakkhiyadhamme bhāvento anupubbena ekasaṃyojanampi anavasesetvā sabbasaṃyojanakkhayakarassa catutthamaggassa pariyosāne uppannattā ‘‘sabbasaṃyojanakkhayo’’ti saṅkhyaṃ gataṃ arahattaṃ pāpuṇeyyāti.
звам̣ сад̇т̇аа арахад̇д̇зна д̇хаммад̣̇зсанааяа гуудам̣ г̇ахзд̇ваа мад̇т̇агз жад̇д̇аари сажжаани багаасзси, сажжабарияосаанз со бхигку арахад̇д̇ам̣ баабун̣и. сад̇т̇аа анусанд̇хим̣ гхадзд̇ваа ж̇аад̇агам̣ самод̇хаанзси – ‘‘д̇ад̣̇аа яагко ан̇г̇улимаало ахоси, бан̃жаавуд̇хагумааро бана ахамзва ахоси’’нд̇и.
Evaṃ satthā arahattena dhammadesanāya kūṭaṃ gahetvā matthake cattāri saccāni pakāsesi, saccapariyosāne so bhikkhu arahattaṃ pāpuṇi. Satthā anusandhiṃ ghaṭetvā jātakaṃ samodhānesi – ‘‘tadā yakkho aṅgulimālo ahosi, pañcāvudhakumāro pana ahameva ahosi’’nti.
бан̃жаавуд̇хаж̇аад̇агаван̣н̣анаа бан̃жамаа.
Pañcāvudhajātakavaṇṇanā pañcamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 55. бан̃жаавуд̇хаж̇аад̇агам̣ • 55. Pañcāvudhajātakaṃ
