| Library / Tipiṭaka / तिपिटक • Tipiṭaka / धम्मपदपाळि • Dhammapadapāḷi |
६. पण्डितवग्गो
6. Paṇḍitavaggo
७६.
76.
निधीनंव पवत्तारं, यं पस्से वज्जदस्सिनं।
Nidhīnaṃva pavattāraṃ, yaṃ passe vajjadassinaṃ;
निग्गय्हवादिं मेधाविं, तादिसं पण्डितं भजे।
Niggayhavādiṃ medhāviṃ, tādisaṃ paṇḍitaṃ bhaje;
तादिसं भजमानस्स, सेय्यो होति न पापियो॥
Tādisaṃ bhajamānassa, seyyo hoti na pāpiyo.
७७.
77.
ओवदेय्यानुसासेय्य, असब्भा च निवारये।
Ovadeyyānusāseyya, asabbhā ca nivāraye;
सतञ्हि सो पियो होति, असतं होति अप्पियो॥
Satañhi so piyo hoti, asataṃ hoti appiyo.
७८.
78.
न भजे पापके मित्ते, न भजे पुरिसाधमे।
Na bhaje pāpake mitte, na bhaje purisādhame;
भजेथ मित्ते कल्याणे, भजेथ पुरिसुत्तमे॥
Bhajetha mitte kalyāṇe, bhajetha purisuttame.
७९.
79.
धम्मपीति सुखं सेति, विप्पसन्नेन चेतसा।
Dhammapīti sukhaṃ seti, vippasannena cetasā;
अरियप्पवेदिते धम्मे, सदा रमति पण्डितो॥
Ariyappavedite dhamme, sadā ramati paṇḍito.
८०.
80.
उदकञ्हि नयन्ति नेत्तिका, उसुकारा नमयन्ति 1 तेजनं।
Udakañhi nayanti nettikā, usukārā namayanti 2 tejanaṃ;
दारुं नमयन्ति तच्छका, अत्तानं दमयन्ति पण्डिता॥
Dāruṃ namayanti tacchakā, attānaṃ damayanti paṇḍitā.
८१.
81.
एवं निन्दापसंसासु, न समिञ्जन्ति पण्डिता॥
Evaṃ nindāpasaṃsāsu, na samiñjanti paṇḍitā.
८२.
82.
यथापि रहदो गम्भीरो, विप्पसन्नो अनाविलो।
Yathāpi rahado gambhīro, vippasanno anāvilo;
एवं धम्मानि सुत्वान, विप्पसीदन्ति पण्डिता॥
Evaṃ dhammāni sutvāna, vippasīdanti paṇḍitā.
८३.
83.
सब्बत्थ वे सप्पुरिसा चजन्ति, न कामकामा लपयन्ति सन्तो।
Sabbattha ve sappurisā cajanti, na kāmakāmā lapayanti santo;
सुखेन फुट्ठा अथ वा दुखेन, न उच्चावचं 5 पण्डिता दस्सयन्ति॥
Sukhena phuṭṭhā atha vā dukhena, na uccāvacaṃ 6 paṇḍitā dassayanti.
८४.
84.
न अत्तहेतु न परस्स हेतु, न पुत्तमिच्छे न धनं न रट्ठं।
Na attahetu na parassa hetu, na puttamicche na dhanaṃ na raṭṭhaṃ;
न इच्छेय्य 7 अधम्मेन समिद्धिमत्तनो, स सीलवा पञ्ञवा धम्मिको सिया॥
Na iccheyya 8 adhammena samiddhimattano, sa sīlavā paññavā dhammiko siyā.
८५.
85.
अप्पका ते मनुस्सेसु, ये जना पारगामिनो।
Appakā te manussesu, ye janā pāragāmino;
अथायं इतरा पजा, तीरमेवानुधावति॥
Athāyaṃ itarā pajā, tīramevānudhāvati.
८६.
86.
ये च खो सम्मदक्खाते, धम्मे धम्मानुवत्तिनो।
Ye ca kho sammadakkhāte, dhamme dhammānuvattino;
ते जना पारमेस्सन्ति, मच्चुधेय्यं सुदुत्तरं॥
Te janā pāramessanti, maccudheyyaṃ suduttaraṃ.
८७.
87.
कण्हं धम्मं विप्पहाय, सुक्कं भावेथ पण्डितो।
Kaṇhaṃ dhammaṃ vippahāya, sukkaṃ bhāvetha paṇḍito;
ओका अनोकमागम्म, विवेके यत्थ दूरमं॥
Okā anokamāgamma, viveke yattha dūramaṃ.
८८.
88.
तत्राभिरतिमिच्छेय्य, हित्वा कामे अकिञ्चनो।
Tatrābhiratimiccheyya, hitvā kāme akiñcano;
८९.
89.
येसं सम्बोधियङ्गेसु, सम्मा चित्तं सुभावितं।
Yesaṃ sambodhiyaṅgesu, sammā cittaṃ subhāvitaṃ;
आदानपटिनिस्सग्गे, अनुपादाय ये रता।
Ādānapaṭinissagge, anupādāya ye ratā;
खीणासवा जुतिमन्तो, ते लोके परिनिब्बुता॥
Khīṇāsavā jutimanto, te loke parinibbutā.
पण्डितवग्गो छट्ठो निट्ठितो।
Paṇḍitavaggo chaṭṭho niṭṭhito.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / धम्मपद-अट्ठकथा • Dhammapada-aṭṭhakathā / ६. पण्डितवग्गो • 6. Paṇḍitavaggo
