| Library / Tipiṭaka / ತಿಪಿಟಕ • Tipiṭaka / ಸಮ್ಮೋಹವಿನೋದನೀ-ಅಟ್ಠಕಥಾ • Sammohavinodanī-aṭṭhakathā |
೩. ಪಞ್ಹಾಪುಚ್ಛಕವಣ್ಣನಾ
3. Pañhāpucchakavaṇṇanā
೬೩೮. ಪಞ್ಹಾಪುಚ್ಛಕೇ ಪಾಳಿಅನುಸಾರೇನೇವ ಝಾನಾನಂ ಕುಸಲಾದಿಭಾವೋ ವೇದಿತಬ್ಬೋ। ಆರಮ್ಮಣತ್ತಿಕೇಸು ಪನ ತಿಣ್ಣಂ ಝಾನಾನಂ ನಿಮಿತ್ತಾರಮ್ಮಣತ್ತಾ ಪರಿತ್ತಾರಮ್ಮಣಾದಿಭಾವೇನ ನವತ್ತಬ್ಬತಾ ವೇದಿತಬ್ಬಾ। ಲೋಕುತ್ತರಾ ಪನೇತ್ಥ ಮಗ್ಗಕಾಲೇ ಫಲಕಾಲೇ ವಾ ಸಿಯಾ ಅಪ್ಪಮಾಣಾರಮ್ಮಣಾ। ಚತುತ್ಥಂ ಝಾನಂ ಸಿಯಾ ಪರಿತ್ತಾರಮ್ಮಣನ್ತಿ ಏತ್ಥ ಕುಸಲತೋ ತೇರಸ ಚತುತ್ಥಜ್ಝಾನಾನಿ ಸಬ್ಬತ್ಥಪಾದಕಚತುತ್ಥಂ, ಇದ್ಧಿವಿಧಚತುತ್ಥಂ, ದಿಬ್ಬಸೋತಞಾಣಚತುತ್ಥಂ, ಚೇತೋಪರಿಯಞಾಣಚತುತ್ಥಂ, ಪುಬ್ಬೇನಿವಾಸಞಾಣಚತುತ್ಥಂ, ದಿಬ್ಬಚಕ್ಖುಞಾಣಚತುತ್ಥಂ, ಯಥಾಕಮ್ಮೂಪಗಞಾಣಚತುತ್ಥಂ, ಅನಾಗತಂಸಞಾಣಚತುತ್ಥಂ, ಆಕಾಸಾನಞ್ಚಾಯತನಾದಿಚತುತ್ಥಂ, ಲೋಕುತ್ತರಚತುತ್ಥನ್ತಿ।
638. Pañhāpucchake pāḷianusāreneva jhānānaṃ kusalādibhāvo veditabbo. Ārammaṇattikesu pana tiṇṇaṃ jhānānaṃ nimittārammaṇattā parittārammaṇādibhāvena navattabbatā veditabbā. Lokuttarā panettha maggakāle phalakāle vā siyā appamāṇārammaṇā. Catutthaṃ jhānaṃ siyā parittārammaṇanti ettha kusalato terasa catutthajjhānāni sabbatthapādakacatutthaṃ, iddhividhacatutthaṃ, dibbasotañāṇacatutthaṃ, cetopariyañāṇacatutthaṃ, pubbenivāsañāṇacatutthaṃ, dibbacakkhuñāṇacatutthaṃ, yathākammūpagañāṇacatutthaṃ, anāgataṃsañāṇacatutthaṃ, ākāsānañcāyatanādicatutthaṃ, lokuttaracatutthanti.
ತತ್ಥ ಸಬ್ಬತ್ಥಪಾದಕಚತುತ್ಥಂ ನವತ್ತಬ್ಬಾರಮ್ಮಣಮೇವ ಹೋತಿ।
Tattha sabbatthapādakacatutthaṃ navattabbārammaṇameva hoti.
ಇದ್ಧಿವಿಧಚತುತ್ಥಂ ಚಿತ್ತವಸೇನ ಕಾಯಂ ಪರಿಣಾಮೇನ್ತಸ್ಸ ಅದಿಸ್ಸಮಾನೇನ ಕಾಯೇನ ಪಾಟಿಹಾರಿಯಕರಣೇ ಕಾಯಾರಮ್ಮಣತ್ತಾ ಪರಿತ್ತಾರಮ್ಮಣಂ, ಕಾಯವಸೇನ ಚಿತ್ತಂ ಪರಿಣಾಮೇನ್ತಸ್ಸ ದಿಸ್ಸಮಾನೇನ ಕಾಯೇನ ಪಾಟಿಹಾರಿಯಂ ಕತ್ವಾ ಬ್ರಹ್ಮಲೋಕಂ ಗಚ್ಛನ್ತಸ್ಸ ಸಮಾಪತ್ತಿಚಿತ್ತಾರಮ್ಮಣತ್ತಾ ಮಹಗ್ಗತಾರಮ್ಮಣಂ।
Iddhividhacatutthaṃ cittavasena kāyaṃ pariṇāmentassa adissamānena kāyena pāṭihāriyakaraṇe kāyārammaṇattā parittārammaṇaṃ, kāyavasena cittaṃ pariṇāmentassa dissamānena kāyena pāṭihāriyaṃ katvā brahmalokaṃ gacchantassa samāpatticittārammaṇattā mahaggatārammaṇaṃ.
ದಿಬ್ಬಸೋತಞಾಣಚತುತ್ಥಂ ಸದ್ದಾರಮ್ಮಣತ್ತಾ ಪರಿತ್ತಾರಮ್ಮಣಂ।
Dibbasotañāṇacatutthaṃ saddārammaṇattā parittārammaṇaṃ.
ಚೇತೋಪರಿಯಞಾಣಚತುತ್ಥಂ ಕಾಮಾವಚರಚಿತ್ತಜಾನನಕಾಲೇ ಪರಿತ್ತಾರಮ್ಮಣಂ, ರೂಪಾವಚರಾರೂಪಾವಚರಚಿತ್ತಜಾನನಕಾಲೇ ಮಹಗ್ಗತಾರಮ್ಮಣಂ, ಲೋಕುತ್ತರಚಿತ್ತಜಾನನಕಾಲೇ ಅಪ್ಪಮಾಣಾರಮ್ಮಣಂ। ಚೇತೋಪರಿಯಞಾಣಲಾಭೀ ಪನ ಪುಥುಜ್ಜನೋ ಪುಥುಜ್ಜನಾನಂಯೇವ ಚಿತ್ತಂ ಜಾನಾತಿ, ನ ಅರಿಯಾನಂ। ಸೋತಾಪನ್ನೋ ಸೋತಾಪನ್ನಸ್ಸ ಚೇವ ಪುಥುಜ್ಜನಸ್ಸ ಚ; ಸಕದಾಗಾಮೀ ಸಕದಾಗಾಮಿನೋ ಚೇವ ಹೇಟ್ಠಿಮಾನಞ್ಚ ದ್ವಿನ್ನಂ; ಅನಾಗಾಮೀ ಅನಾಗಾಮಿನೋ ಚೇವ ಹೇಟ್ಠಿಮಾನಞ್ಚ ತಿಣ್ಣಂ; ಖೀಣಾಸವೋ ಸಬ್ಬೇಸಮ್ಪಿ ಜಾನಾತಿ।
Cetopariyañāṇacatutthaṃ kāmāvacaracittajānanakāle parittārammaṇaṃ, rūpāvacarārūpāvacaracittajānanakāle mahaggatārammaṇaṃ, lokuttaracittajānanakāle appamāṇārammaṇaṃ. Cetopariyañāṇalābhī pana puthujjano puthujjanānaṃyeva cittaṃ jānāti, na ariyānaṃ. Sotāpanno sotāpannassa ceva puthujjanassa ca; sakadāgāmī sakadāgāmino ceva heṭṭhimānañca dvinnaṃ; anāgāmī anāgāmino ceva heṭṭhimānañca tiṇṇaṃ; khīṇāsavo sabbesampi jānāti.
ಪುಬ್ಬೇನಿವಾಸಞಾಣಚತುತ್ಥಂ ಕಾಮಾವಚರಕ್ಖನ್ಧಾನುಸ್ಸರಣಕಾಲೇ ಪರಿತ್ತಾರಮ್ಮಣಂ, ರೂಪಾವಚರಾರೂಪಾವಚರಕ್ಖನ್ಧಾನುಸ್ಸರಣಕಾಲೇ ಮಹಗ್ಗತಾರಮ್ಮಣಂ, ‘‘ಅತೀತೇ ಬುದ್ಧಪಚ್ಚೇಕಬುದ್ಧಖೀಣಾಸವಾ ಮಗ್ಗಂ ಭಾವಯಿಂಸು, ಫಲಂ ಸಚ್ಛಿಕರಿಂಸೂ’’ತಿ ಅನುಸ್ಸರಣಕಾಲೇ ಅಪ್ಪಮಾಣಾರಮ್ಮಣಂ, ನಾಮಗೋತ್ತಾನುಸ್ಸರಣಕಾಲೇ ನವತ್ತಬ್ಬಾರಮ್ಮಣಂ।
Pubbenivāsañāṇacatutthaṃ kāmāvacarakkhandhānussaraṇakāle parittārammaṇaṃ, rūpāvacarārūpāvacarakkhandhānussaraṇakāle mahaggatārammaṇaṃ, ‘‘atīte buddhapaccekabuddhakhīṇāsavā maggaṃ bhāvayiṃsu, phalaṃ sacchikariṃsū’’ti anussaraṇakāle appamāṇārammaṇaṃ, nāmagottānussaraṇakāle navattabbārammaṇaṃ.
ದಿಬ್ಬಚಕ್ಖುಞಾಣಚತುತ್ಥಂ ವಣ್ಣಾರಮ್ಮಣತ್ತಾ ಪರಿತ್ತಾರಮ್ಮಣಂ।
Dibbacakkhuñāṇacatutthaṃ vaṇṇārammaṇattā parittārammaṇaṃ.
ಯಥಾಕಮ್ಮೂಪಗಞಾಣಚತುತ್ಥಂ ಕಾಮಾವಚರಕಮ್ಮಾನುಸ್ಸರಣಕಾಲೇ ಪರಿತ್ತಾರಮ್ಮಣಂ, ರೂಪಾವಚರಾರೂಪಾವಚರಕಮ್ಮಾನುಸ್ಸರಣಕಾಲೇ ಮಹಗ್ಗತಾರಮ್ಮಣಂ।
Yathākammūpagañāṇacatutthaṃ kāmāvacarakammānussaraṇakāle parittārammaṇaṃ, rūpāvacarārūpāvacarakammānussaraṇakāle mahaggatārammaṇaṃ.
ಅನಾಗತಂಸಞಾಣಚತುತ್ಥಂ ಅನಾಗತೇ ಕಾಮಧಾತುಯಾ ನಿಬ್ಬತ್ತಿಜಾನನಕಾಲೇ ಪರಿತ್ತಾರಮ್ಮಣಂ, ರೂಪಾರೂಪಭವೇಸು ನಿಬ್ಬತ್ತಿಜಾನನಕಾಲೇ ಮಹಗ್ಗತಾರಮ್ಮಣಂ, ‘‘ಅನಾಗತೇ ಬುದ್ಧಪಚ್ಚೇಕಬುದ್ಧಖೀಣಾಸವಾ ಮಗ್ಗಂ ಭಾವೇಸ್ಸನ್ತಿ, ಫಲಂ ಸಚ್ಛಿಕರಿಸ್ಸನ್ತೀ’’ತಿ ಜಾನನಕಾಲೇ ಅಪ್ಪಮಾಣಾರಮ್ಮಣಂ, ‘‘ಅನಾಗತೇ ಸಙ್ಖೋ ನಾಮ ರಾಜಾ ಭವಿಸ್ಸತೀ’’ತಿಆದಿನಾ (ದೀ॰ ನಿ॰ ೩.೧೦೮) ನಯೇನ ನಾಮಗೋತ್ತಾನುಸ್ಸರಣಕಾಲೇ ನವತ್ತಬ್ಬಾರಮ್ಮಣಂ।
Anāgataṃsañāṇacatutthaṃ anāgate kāmadhātuyā nibbattijānanakāle parittārammaṇaṃ, rūpārūpabhavesu nibbattijānanakāle mahaggatārammaṇaṃ, ‘‘anāgate buddhapaccekabuddhakhīṇāsavā maggaṃ bhāvessanti, phalaṃ sacchikarissantī’’ti jānanakāle appamāṇārammaṇaṃ, ‘‘anāgate saṅkho nāma rājā bhavissatī’’tiādinā (dī. ni. 3.108) nayena nāmagottānussaraṇakāle navattabbārammaṇaṃ.
ಆಕಾಸಾನಞ್ಚಾಯತನಆಕಿಞ್ಚಞ್ಞಾಯತನಚತುತ್ಥಂ ನವತ್ತಬ್ಬಾರಮ್ಮಣಂ। ವಿಞ್ಞಾಣಞ್ಚಾಯತನನೇವಸಞ್ಞಾನಾಸಞ್ಞಾಯತನಚತುತ್ಥಂ ಮಹಗ್ಗತಾರಮ್ಮಣಂ।
Ākāsānañcāyatanaākiñcaññāyatanacatutthaṃ navattabbārammaṇaṃ. Viññāṇañcāyatananevasaññānāsaññāyatanacatutthaṃ mahaggatārammaṇaṃ.
ಲೋಕುತ್ತರಚತುತ್ಥಂ ಅಪ್ಪಮಾಣಾರಮ್ಮಣಂ।
Lokuttaracatutthaṃ appamāṇārammaṇaṃ.
ಕಿರಿಯತೋಪಿ ತೇಸಂ ದ್ವಾದಸನ್ನಂ ಝಾನಾನಂ ಇದಮೇವ ಆರಮ್ಮಣವಿಧಾನಂ। ತೀಣಿ ಝಾನಾನಿ ನಮಗ್ಗಾರಮ್ಮಣಾತಿ ಪಚ್ಚವೇಕ್ಖಣಞಾಣಂ ವಾ ಚೇತೋಪರಿಯಾದಿಞಾಣಂ ವಾ ಮಗ್ಗಂ ಆರಮ್ಮಣಂ ಕರೇಯ್ಯ, ತೀಣಿ ಝಾನಾನಿ ತಥಾ ಅಪ್ಪವತ್ತಿತೋ ನಮಗ್ಗಾರಮ್ಮಣಾ, ಸಹಜಾತಹೇತುವಸೇನ ಪನ ಸಿಯಾ ಮಗ್ಗಹೇತುಕಾ; ವೀರಿಯಜೇಟ್ಠಿಕಾಯ ವಾ ವೀಮಂಸಾಜೇಟ್ಠಿಕಾಯ ವಾ ಮಗ್ಗಭಾವನಾಯ ಮಗ್ಗಾಧಿಪತಿನೋ; ಛನ್ದಚಿತ್ತಜೇಟ್ಠಕಕಾಲೇ ಫಲಕಾಲೇ ಚ ನವತ್ತಬ್ಬಾ।
Kiriyatopi tesaṃ dvādasannaṃ jhānānaṃ idameva ārammaṇavidhānaṃ. Tīṇi jhānāni namaggārammaṇāti paccavekkhaṇañāṇaṃ vā cetopariyādiñāṇaṃ vā maggaṃ ārammaṇaṃ kareyya, tīṇi jhānāni tathā appavattito namaggārammaṇā, sahajātahetuvasena pana siyā maggahetukā; vīriyajeṭṭhikāya vā vīmaṃsājeṭṭhikāya vā maggabhāvanāya maggādhipatino; chandacittajeṭṭhakakāle phalakāle ca navattabbā.
ಚತುತ್ಥಂ ಝಾನನ್ತಿ ಇಧಾಪಿ ಕುಸಲತೋ ತೇರಸಸು ಚತುತ್ಥಜ್ಝಾನೇಸು ಸಬ್ಬತ್ಥಪಾದಕಇದ್ಧಿವಿಧದಿಬ್ಬಸೋತದಿಬ್ಬಚಕ್ಖುಯಥಾಕಮ್ಮೂಪಗಞಾಣಚತುತ್ಥಞ್ಚೇವ ಚತುಬ್ಬಿಧಞ್ಚ ಆರುಪ್ಪಚತುತ್ಥಂ ಮಗ್ಗಾರಮ್ಮಣಾದಿಭಾವೇನ ನ ವತ್ತಬ್ಬಂ। ಚೇತೋಪರಿಯಪುಬ್ಬೇನಿವಾಸಅನಾಗತಂಸಞಾಣಚತುತ್ಥಂ ಪನ ಮಗ್ಗಾರಮ್ಮಣಂ ಹೋತಿ। ನ ವತ್ತಬ್ಬಂ ಮಗ್ಗಹೇತುಕಂ ಮಗ್ಗಾಧಿಪತೀತಿ ವಾ; ಲೋಕುತ್ತರಚತುತ್ಥಂ ಮಗ್ಗಾರಮ್ಮಣಂ ನ ಹೋತಿ; ಮಗ್ಗಕಾಲೇ ಪನ ಸಹಜಾತಹೇತುವಸೇನ ಮಗ್ಗಹೇತುಕಂ; ವೀರಿಯವೀಮಂಸಾಜೇಟ್ಠಿಕಾಯ ಮಗ್ಗಭಾವನಾಯ ಮಗ್ಗಾಧಿಪತಿ; ಛನ್ದಚಿತ್ತಜೇಟ್ಠಿಕಾಯ ಚೇವ ಮಗ್ಗಭಾವನಾಯ ಫಲಕಾಲೇ ಚ ನ ವತ್ತಬ್ಬಂ। ಕಿರಿಯತೋಪಿ ದ್ವಾದಸಸು ಝಾನೇಸು ಅಯಮೇವ ನಯೋ।
Catutthaṃ jhānanti idhāpi kusalato terasasu catutthajjhānesu sabbatthapādakaiddhividhadibbasotadibbacakkhuyathākammūpagañāṇacatutthañceva catubbidhañca āruppacatutthaṃ maggārammaṇādibhāvena na vattabbaṃ. Cetopariyapubbenivāsaanāgataṃsañāṇacatutthaṃ pana maggārammaṇaṃ hoti. Na vattabbaṃ maggahetukaṃ maggādhipatīti vā; lokuttaracatutthaṃ maggārammaṇaṃ na hoti; maggakāle pana sahajātahetuvasena maggahetukaṃ; vīriyavīmaṃsājeṭṭhikāya maggabhāvanāya maggādhipati; chandacittajeṭṭhikāya ceva maggabhāvanāya phalakāle ca na vattabbaṃ. Kiriyatopi dvādasasu jhānesu ayameva nayo.
ತೀಣಿ ಝಾನಾನಿ ನ ವತ್ತಬ್ಬಾತಿ ಅತೀತಾದೀಸು ಏಕಧಮ್ಮಮ್ಪಿ ಆರಬ್ಭ ಅಪ್ಪವತ್ತಿತೋ ನವತ್ತಬ್ಬಾತಿ ವೇದಿತಬ್ಬಾ।
Tīṇi jhānāni na vattabbāti atītādīsu ekadhammampi ārabbha appavattito navattabbāti veditabbā.
ಚತುತ್ಥಂ ಝಾನನ್ತಿ ಕುಸಲತೋ ತೇರಸಸು ಚತುತ್ಥಜ್ಝಾನೇಸು ಸಬ್ಬತ್ಥಪಾದಕಚತುತ್ಥಂ ನವತ್ತಬ್ಬಾರಮ್ಮಣಮೇವ। ಇದ್ಧಿವಿಧಚತುತ್ಥಂ ಕಾಯವಸೇನ ಚಿತ್ತಪರಿಣಾಮನೇ ಸಮಾಪತ್ತಿಚಿತ್ತಾರಮ್ಮಣತ್ತಾ ಅತೀತಾರಮ್ಮಣಂ; ‘‘ಅನಾಗತೇ ಇಮಾನಿ ಪುಪ್ಫಾನಿ ಮಾ ಮಿಲಾಯಿಂಸು, ದೀಪಾ ಮಾ ನಿಬ್ಬಾಯಿಂಸು, ಏಕೋ ಅಗ್ಗಿಕ್ಖನ್ಧೋ ಸಮುಟ್ಠಾತು, ಪಬ್ಬತೋ ಸಮುಟ್ಠಾತೂ’’ತಿ ಅಧಿಟ್ಠಾನಕಾಲೇ ಅನಾಗತಾರಮ್ಮಣಂ; ಚಿತ್ತವಸೇನ ಕಾಯಪರಿಣಾಮನಕಾಲೇ ಕಾಯಾರಮ್ಮಣತ್ತಾ ಪಚ್ಚುಪ್ಪನ್ನಾರಮ್ಮಣಂ। ದಿಬ್ಬಸೋತಞಾಣಚತುತ್ಥಂ ಸದ್ದಾರಮ್ಮಣತ್ತಾ ಪಚ್ಚುಪ್ಪನಾರಮ್ಮಣಂ। ಚೇತೋಪರಿಯಞಾಣಚತುತ್ಥಂ ಅತೀತೇ ಸತ್ತದಿವಸಬ್ಭನ್ತರೇ ಉಪ್ಪಜ್ಜಿತ್ವಾ ನಿರುದ್ಧಚಿತ್ತಜಾನನಕಾಲೇ ಅತೀತಾರಮ್ಮಣಂ; ಅನಾಗತೇ ಸತ್ತದಿವಸಬ್ಭನ್ತರೇ ಉಪ್ಪಜ್ಜನಕಚಿತ್ತಜಾನನಕಾಲೇ ಅನಾಗತಾರಮ್ಮಣಂ। ‘‘ಯಥಾ ಇಮಸ್ಸ ಭೋತೋ ಮನೋಸಙ್ಖಾರಾ ಪಣಿಹಿತಾ ಇಮಸ್ಸ ಚಿತ್ತಸ್ಸ ಅನನ್ತರಾ ಅಮುಂ ನಾಮ ವಿತಕ್ಕಂ ವಿತಕ್ಕೇಸ್ಸತೀತಿ। ಸೋ ಬಹುಞ್ಚೇಪಿ ಆದಿಸತಿ, ತಥೇವ ತಂ ಹೋತಿ ನೋ ಅಞ್ಞಥಾ’’ತಿ ಇಮಿನಾ ಹಿ ಸುತ್ತೇನ (ಅ॰ ನಿ॰ ೩.೬೧) ಚೇತೋಪರಿಯಞಾಣಸ್ಸೇವ ಪವತ್ತಿ ಪಕಾಸಿತಾ। ಅದ್ಧಾನಪಚ್ಚುಪ್ಪನ್ನಸನ್ತತಿಪಚ್ಚುಪ್ಪನ್ನವಸೇನೇವ ಪಚ್ಚುಪ್ಪನ್ನಂ ಆರಬ್ಭ ಪವತ್ತಿಕಾಲೇ ಪಚ್ಚುಪ್ಪನ್ನಾರಮ್ಮಣಂ। ವಿತ್ಥಾರಕಥಾ ಪನೇತ್ಥ ಹೇಟ್ಠಾಅಟ್ಠಕಥಾಕಣ್ಡವಣ್ಣನಾಯಂ ವುತ್ತನಯೇನೇವ ವೇದಿತಬ್ಬಾ।
Catutthaṃ jhānanti kusalato terasasu catutthajjhānesu sabbatthapādakacatutthaṃ navattabbārammaṇameva. Iddhividhacatutthaṃ kāyavasena cittapariṇāmane samāpatticittārammaṇattā atītārammaṇaṃ; ‘‘anāgate imāni pupphāni mā milāyiṃsu, dīpā mā nibbāyiṃsu, eko aggikkhandho samuṭṭhātu, pabbato samuṭṭhātū’’ti adhiṭṭhānakāle anāgatārammaṇaṃ; cittavasena kāyapariṇāmanakāle kāyārammaṇattā paccuppannārammaṇaṃ. Dibbasotañāṇacatutthaṃ saddārammaṇattā paccuppanārammaṇaṃ. Cetopariyañāṇacatutthaṃ atīte sattadivasabbhantare uppajjitvā niruddhacittajānanakāle atītārammaṇaṃ; anāgate sattadivasabbhantare uppajjanakacittajānanakāle anāgatārammaṇaṃ. ‘‘Yathā imassa bhoto manosaṅkhārā paṇihitā imassa cittassa anantarā amuṃ nāma vitakkaṃ vitakkessatīti. So bahuñcepi ādisati, tatheva taṃ hoti no aññathā’’ti iminā hi suttena (a. ni. 3.61) cetopariyañāṇasseva pavatti pakāsitā. Addhānapaccuppannasantatipaccuppannavaseneva paccuppannaṃ ārabbha pavattikāle paccuppannārammaṇaṃ. Vitthārakathā panettha heṭṭhāaṭṭhakathākaṇḍavaṇṇanāyaṃ vuttanayeneva veditabbā.
ಪುಬ್ಬೇನಿವಾಸಞಾಣಚತುತ್ಥಂ ಅತೀತಕ್ಖನ್ಧಾನುಸ್ಸರಣಕಾಲೇ ಅತೀತಾರಮ್ಮಣಂ, ನಾಮಗೋತ್ತಾನುಸ್ಸರಣಕಾಲೇ ನವತ್ತಬ್ಬಾರಮ್ಮಣಂ। ದಿಬ್ಬಚಕ್ಖುಞಾಣಚತುತ್ಥಂ ವಣ್ಣಾರಮ್ಮಣತ್ತಾ ಪಚ್ಚುಪ್ಪನ್ನಾರಮ್ಮಣಂ। ಯಥಾಕಮ್ಮೂಪಗಞಾಣಚತುತ್ಥಂ ಅತೀತಕಮ್ಮಮೇವ ಆರಮ್ಮಣಂ ಕರೋತೀತಿ ಅತೀತಾರಮ್ಮಣಂ। ಅನಾಗತಂಸಞಾಣಚತುತ್ಥಂ ಅನಾಗತಕ್ಖನ್ಧಾನುಸ್ಸರಣಕಾಲೇ ಅನಾಗತಾರಮ್ಮಣಂ, ನಾಮಗೋತ್ತಾನುಸ್ಸರಣಕಾಲೇ ನವತ್ತಬ್ಬಾರಮ್ಮಣಂ। ಆಕಾಸಾನಞ್ಚಾಯತನಆಕಿಞ್ಚಞ್ಞಾಯತನಚತುತ್ಥಂ ನವತ್ತಬ್ಬಾರಮ್ಮಣಮೇವ। ವಿಞ್ಞಾಣಞ್ಚಾಯತನನೇವಸಞ್ಞಾನಾಸಞ್ಞಾಯತನಚತುತ್ಥಂ ಅತೀತಾರಮ್ಮಣಮೇವ। ಲೋಕುತ್ತರಚತುತ್ಥಂ ನವತ್ತಬ್ಬಾರಮ್ಮಣಮೇವ। ಕಿರಿಯತೋಪಿ ದ್ವಾದಸಸು ಚತುತ್ಥಜ್ಝಾನೇಸು ಏಸೇವ ನಯೋ।
Pubbenivāsañāṇacatutthaṃ atītakkhandhānussaraṇakāle atītārammaṇaṃ, nāmagottānussaraṇakāle navattabbārammaṇaṃ. Dibbacakkhuñāṇacatutthaṃ vaṇṇārammaṇattā paccuppannārammaṇaṃ. Yathākammūpagañāṇacatutthaṃ atītakammameva ārammaṇaṃ karotīti atītārammaṇaṃ. Anāgataṃsañāṇacatutthaṃ anāgatakkhandhānussaraṇakāle anāgatārammaṇaṃ, nāmagottānussaraṇakāle navattabbārammaṇaṃ. Ākāsānañcāyatanaākiñcaññāyatanacatutthaṃ navattabbārammaṇameva. Viññāṇañcāyatananevasaññānāsaññāyatanacatutthaṃ atītārammaṇameva. Lokuttaracatutthaṃ navattabbārammaṇameva. Kiriyatopi dvādasasu catutthajjhānesu eseva nayo.
ತೀಣಿ ಝಾನಾನಿ ಬಹಿದ್ಧಾರಮ್ಮಣಾತಿ ಅಜ್ಝತ್ತತೋ ಬಹಿದ್ಧಾಭೂತಂ ನಿಮಿತ್ತಂ ಆರಬ್ಭ ಪವತ್ತಿತೋ ಬಹಿದ್ಧಾರಮ್ಮಣಾ।
Tīṇijhānāni bahiddhārammaṇāti ajjhattato bahiddhābhūtaṃ nimittaṃ ārabbha pavattito bahiddhārammaṇā.
ಚತುತ್ಥಂ ಝಾನನ್ತಿ ಇಧಾಪಿ ಕುಸಲತೋ ತೇರಸಸು ಚತುತ್ಥಜ್ಝಾನೇಸು ಸಬ್ಬತ್ಥಪಾದಕಚತುತ್ಥಂ ಬಹಿದ್ಧಾರಮ್ಮಣಮೇವ।
Catutthaṃ jhānanti idhāpi kusalato terasasu catutthajjhānesu sabbatthapādakacatutthaṃ bahiddhārammaṇameva.
ಇದ್ಧಿವಿಧಚತುತ್ಥಂ ಕಾಯವಸೇನ ಚಿತ್ತಪರಿಣಾಮನೇಪಿ ಚಿತ್ತವಸೇನ ಕಾಯಪರಿಣಾಮನೇಪಿ ಅತ್ತನೋವ ಕಾಯಚಿತ್ತಾರಮ್ಮಣತ್ತಾ ಅಜ್ಝತ್ತಾರಮ್ಮಣಂ; ‘‘ಬಹಿದ್ಧಾ ಹತ್ಥಿಮ್ಪಿ ದಸ್ಸೇತೀ’’ತಿಆದಿನಾ ನಯೇನ ಪವತ್ತಕಾಲೇ ಬಹಿದ್ಧಾರಮ್ಮಣಂ।
Iddhividhacatutthaṃ kāyavasena cittapariṇāmanepi cittavasena kāyapariṇāmanepi attanova kāyacittārammaṇattā ajjhattārammaṇaṃ; ‘‘bahiddhā hatthimpi dassetī’’tiādinā nayena pavattakāle bahiddhārammaṇaṃ.
ದಿಬ್ಬಸೋತಞಾಣಚತುತ್ಥಂ ಅತ್ತನೋ ಕುಚ್ಛಿಗತಸದ್ದಾರಮ್ಮಣಕಾಲೇ ಅಜ್ಝತ್ತಾರಮ್ಮಣಂ, ಪರಸ್ಸ ಸದ್ದಾರಮ್ಮಣಕಾಲೇ ಬಹಿದ್ಧಾರಮ್ಮಣಂ, ಉಭಯವಸೇನಾಪಿ ಅಜ್ಝತ್ತಬಹಿದ್ಧಾರಮ್ಮಣಂ।
Dibbasotañāṇacatutthaṃ attano kucchigatasaddārammaṇakāle ajjhattārammaṇaṃ, parassa saddārammaṇakāle bahiddhārammaṇaṃ, ubhayavasenāpi ajjhattabahiddhārammaṇaṃ.
ಚೇತೋಪರಿಯಞಾಣಚತುತ್ಥಂ ಬಹಿದ್ಧಾರಮ್ಮಣಮೇವ।
Cetopariyañāṇacatutthaṃ bahiddhārammaṇameva.
ಪುಬ್ಬೇನಿವಾಸಞಾಣಚತುತ್ಥಂ ಅತ್ತನೋ ಖನ್ಧಾನುಸ್ಸರಣಕಾಲೇ ಅಜ್ಝತ್ತಾರಮ್ಮಣಂ, ಪರಸ್ಸ ಖನ್ಧಾನಞ್ಚೇವ ನಾಮಗೋತ್ತಸ್ಸ ಚ ಅನುಸ್ಸರಣಕಾಲೇ ಬಹಿದ್ಧಾರಮ್ಮಣಂ।
Pubbenivāsañāṇacatutthaṃ attano khandhānussaraṇakāle ajjhattārammaṇaṃ, parassa khandhānañceva nāmagottassa ca anussaraṇakāle bahiddhārammaṇaṃ.
ದಿಬ್ಬಚಕ್ಖುಞಾಣಚತುತ್ಥಂ ಅತ್ತನೋ ರೂಪಾರಮ್ಮಣಕಾಲೇ ಅಜ್ಝತ್ತಾರಮ್ಮಣಂ, ಪರಸ್ಸ ರೂಪಾರಮ್ಮಣಕಾಲೇ ಬಹಿದ್ಧಾರಮ್ಮಣಂ, ಉಭಯವಸೇನಾಪಿ ಅಜ್ಝತ್ತಬಹಿದ್ಧಾರಮ್ಮಣಂ।
Dibbacakkhuñāṇacatutthaṃ attano rūpārammaṇakāle ajjhattārammaṇaṃ, parassa rūpārammaṇakāle bahiddhārammaṇaṃ, ubhayavasenāpi ajjhattabahiddhārammaṇaṃ.
ಯಥಾಕಮ್ಮೂಪಗಞಾಣಚತುತ್ಥಂ ಅತ್ತನೋ ಕಮ್ಮಜಾನನಕಾಲೇ ಅಜ್ಝತ್ತಾರಮ್ಮಣಂ, ಪರಸ್ಸ ಕಮ್ಮಜಾನನಕಾಲೇ ಬಹಿದ್ಧಾರಮ್ಮಣಂ, ಉಭಯವಸೇನಾಪಿ ಅಜ್ಝತ್ತಬಹಿದ್ಧಾರಮ್ಮಣಂ।
Yathākammūpagañāṇacatutthaṃ attano kammajānanakāle ajjhattārammaṇaṃ, parassa kammajānanakāle bahiddhārammaṇaṃ, ubhayavasenāpi ajjhattabahiddhārammaṇaṃ.
ಅನಾಗತಂಸಞಾಣಚತುತ್ಥಂ ಅತ್ತನೋ ಅನಾಗತೇ ನಿಬ್ಬತ್ತಿಜಾನನಕಾಲೇ ಅಜ್ಝತ್ತಾರಮ್ಮಣಂ, ಪರಸ್ಸ ಖನ್ಧಾನುಸ್ಸರಣಕಾಲೇ ಚೇವ ನಾಮಗೋತ್ತಾನುಸ್ಸರಣಕಾಲೇ ಚ ಬಹಿದ್ಧಾರಮ್ಮಣಂ, ಉಭಯವಸೇನಾಪಿ ಅಜ್ಝತ್ತಬಹಿದ್ಧಾರಮ್ಮಣಂ।
Anāgataṃsañāṇacatutthaṃ attano anāgate nibbattijānanakāle ajjhattārammaṇaṃ, parassa khandhānussaraṇakāle ceva nāmagottānussaraṇakāle ca bahiddhārammaṇaṃ, ubhayavasenāpi ajjhattabahiddhārammaṇaṃ.
ಆಕಾಸಾನಞ್ಚಾಯತನಚತುತ್ಥಂ ಬಹಿದ್ಧಾರಮ್ಮಣಂ। ಆಕಿಞ್ಚಞ್ಞಾಯತನಚತುತ್ಥಂ ನವತ್ತಬ್ಬಾರಮ್ಮಣಂ। ವಿಞ್ಞಾಣಞ್ಚಾಯತನನೇವಸಞ್ಞಾನಾಸಞ್ಞಾಯತನಚತುತ್ಥಂ ಅಜ್ಝತ್ತಾರಮ್ಮಣಂ।
Ākāsānañcāyatanacatutthaṃ bahiddhārammaṇaṃ. Ākiñcaññāyatanacatutthaṃ navattabbārammaṇaṃ. Viññāṇañcāyatananevasaññānāsaññāyatanacatutthaṃ ajjhattārammaṇaṃ.
ಲೋಕುತ್ತರಚತುತ್ಥಂ ಬಹಿದ್ಧಾರಮ್ಮಣಮೇವ। ಕಿರಿಯತೋಪಿ ದ್ವಾದಸಸು ಝಾನೇಸು ಅಯಮೇವ ನಯೋತಿ।
Lokuttaracatutthaṃ bahiddhārammaṇameva. Kiriyatopi dvādasasu jhānesu ayameva nayoti.
ಇಮಸ್ಮಿಂ ಪನ ಝಾನವಿಭಙ್ಗೇ ಸಮ್ಮಾಸಮ್ಬುದ್ಧೇನ ಸುತ್ತನ್ತಭಾಜನೀಯೇಪಿ ಲೋಕಿಯಲೋಕುತ್ತರಮಿಸ್ಸಕಾನೇವ ಝಾನಾನಿ ಕಥಿತಾನಿ; ಅಭಿಧಮ್ಮಭಾಜನೀಯೇಪಿ ಪಞ್ಹಾಪುಚ್ಛಕೇಪಿ। ತಯೋಪಿ ಹಿ ಏತೇ ನಯಾ ತೇಭೂಮಕಧಮ್ಮಮಿಸ್ಸಕತ್ತಾ ಏಕಪರಿಚ್ಛೇದಾ ಏವ। ಏವಮಯಂ ಝಾನವಿಭಙ್ಗೋಪಿ ತೇಪರಿವಟ್ಟಂ ನೀಹರಿತ್ವಾವ ಭಾಜೇತ್ವಾ ದಸ್ಸಿತೋತಿ।
Imasmiṃ pana jhānavibhaṅge sammāsambuddhena suttantabhājanīyepi lokiyalokuttaramissakāneva jhānāni kathitāni; abhidhammabhājanīyepi pañhāpucchakepi. Tayopi hi ete nayā tebhūmakadhammamissakattā ekaparicchedā eva. Evamayaṃ jhānavibhaṅgopi teparivaṭṭaṃ nīharitvāva bhājetvā dassitoti.
ಸಮ್ಮೋಹವಿನೋದನಿಯಾ ವಿಭಙ್ಗಟ್ಠಕಥಾಯ
Sammohavinodaniyā vibhaṅgaṭṭhakathāya
ಝಾನವಿಭಙ್ಗವಣ್ಣನಾ ನಿಟ್ಠಿತಾ।
Jhānavibhaṅgavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ವಿಭಙ್ಗಪಾಳಿ • Vibhaṅgapāḷi / ೧೨. ಝಾನವಿಭಙ್ಗೋ • 12. Jhānavibhaṅgo
