| Library / Tipiṭaka / તિપિટક • Tipiṭaka / અઙ્ગુત્તરનિકાય • Aṅguttaranikāya |
૫. પઞ્હપુચ્છાસુત્તં
5. Pañhapucchāsuttaṃ
૧૬૫. તત્ર ખો આયસ્મા સારિપુત્તો ભિક્ખૂ આમન્તેસિ…પે॰… ‘‘યો હિ કોચિ, આવુસો, પરં પઞ્હં પુચ્છતિ, સબ્બો સો પઞ્ચહિ ઠાનેહિ, એતેસં વા અઞ્ઞતરેન. કતમેહિ પઞ્ચહિ? મન્દત્તા મોમૂહત્તા 1 પરં પઞ્હં પુચ્છતિ, પાપિચ્છો ઇચ્છાપકતો પરં પઞ્હં પુચ્છતિ, પરિભવં પરં પઞ્હં પુચ્છતિ, અઞ્ઞાતુકામો પરં પઞ્હં પુચ્છતિ, અથ વા પનેવંચિત્તો 2 પરં પઞ્હં પુચ્છતિ – ‘સચે મે પઞ્હં પુટ્ઠો સમ્મદેવ બ્યાકરિસ્સતિ ઇચ્ચેતં કુસલં, નો ચે 3 મે પઞ્હં પુટ્ઠો સમ્મદેવ બ્યાકરિસ્સતિ અહમસ્સ સમ્મદેવ બ્યાકરિસ્સામી’તિ. યો હિ કોચિ, આવુસો, પરં પઞ્હં પુચ્છતિ, સબ્બો સો ઇમેહિ પઞ્ચહિ ઠાનેહિ, એતેસં વા અઞ્ઞતરેન. અહં ખો પનાવુસો, એવંચિત્તો પરં પઞ્હં પુચ્છામિ – ‘સચે મે પઞ્હં પુટ્ઠો સમ્મદેવ બ્યાકરિસ્સતિ ઇચ્ચેતં કુસલં, નો ચે મે પઞ્હં પુટ્ઠો સમ્મદેવ બ્યાકરિસ્સતિ, અહમસ્સ સમ્મદેવ બ્યાકરિસ્સામી’’તિ. પઞ્ચમં.
165. Tatra kho āyasmā sāriputto bhikkhū āmantesi…pe… ‘‘yo hi koci, āvuso, paraṃ pañhaṃ pucchati, sabbo so pañcahi ṭhānehi, etesaṃ vā aññatarena. Katamehi pañcahi? Mandattā momūhattā 4 paraṃ pañhaṃ pucchati, pāpiccho icchāpakato paraṃ pañhaṃ pucchati, paribhavaṃ paraṃ pañhaṃ pucchati, aññātukāmo paraṃ pañhaṃ pucchati, atha vā panevaṃcitto 5 paraṃ pañhaṃ pucchati – ‘sace me pañhaṃ puṭṭho sammadeva byākarissati iccetaṃ kusalaṃ, no ce 6 me pañhaṃ puṭṭho sammadeva byākarissati ahamassa sammadeva byākarissāmī’ti. Yo hi koci, āvuso, paraṃ pañhaṃ pucchati, sabbo so imehi pañcahi ṭhānehi, etesaṃ vā aññatarena. Ahaṃ kho panāvuso, evaṃcitto paraṃ pañhaṃ pucchāmi – ‘sace me pañhaṃ puṭṭho sammadeva byākarissati iccetaṃ kusalaṃ, no ce me pañhaṃ puṭṭho sammadeva byākarissati, ahamassa sammadeva byākarissāmī’’ti. Pañcamaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૫. પઞ્હપુચ્છાસુત્તવણ્ણના • 5. Pañhapucchāsuttavaṇṇanā
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૧-૫. પઠમઆઘાતપટિવિનયસુત્તાદિવણ્ણના • 1-5. Paṭhamaāghātapaṭivinayasuttādivaṇṇanā
