| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೫. ಪಞ್ಞತ್ತಿಸುತ್ತಂ
5. Paññattisuttaṃ
೧೫. ‘‘ಚತಸ್ಸೋ ಇಮಾ, ಭಿಕ್ಖವೇ, ಅಗ್ಗಪಞ್ಞತ್ತಿಯೋ। ಕತಮಾ ಚತಸ್ಸೋ? ಏತದಗ್ಗಂ, ಭಿಕ್ಖವೇ, ಅತ್ತಭಾವೀನಂ ಯದಿದಂ – ರಾಹು ಅಸುರಿನ್ದೋ। ಏತದಗ್ಗಂ, ಭಿಕ್ಖವೇ, ಕಾಮಭೋಗೀನಂ ಯದಿದಂ – ರಾಜಾ ಮನ್ಧಾತಾ। ಏತದಗ್ಗಂ, ಭಿಕ್ಖವೇ, ಆಧಿಪತೇಯ್ಯಾನಂ ಯದಿದಂ – ಮಾರೋ ಪಾಪಿಮಾ। ಸದೇವಕೇ, ಭಿಕ್ಖವೇ, ಲೋಕೇ ಸಮಾರಕೇ ಸಬ್ರಹ್ಮಕೇ ಸಸ್ಸಮಣಬ್ರಾಹ್ಮಣಿಯಾ ಪಜಾಯ ಸದೇವಮನುಸ್ಸಾಯ ತಥಾಗತೋ ಅಗ್ಗಮಕ್ಖಾಯತಿ ಅರಹಂ ಸಮ್ಮಾಸಮ್ಬುದ್ಧೋ। ಇಮಾ ಖೋ, ಭಿಕ್ಖವೇ, ಚತಸ್ಸೋ ಅಗ್ಗಪಞ್ಞತ್ತಿಯೋ’’ತಿ।
15. ‘‘Catasso imā, bhikkhave, aggapaññattiyo. Katamā catasso? Etadaggaṃ, bhikkhave, attabhāvīnaṃ yadidaṃ – rāhu asurindo. Etadaggaṃ, bhikkhave, kāmabhogīnaṃ yadidaṃ – rājā mandhātā. Etadaggaṃ, bhikkhave, ādhipateyyānaṃ yadidaṃ – māro pāpimā. Sadevake, bhikkhave, loke samārake sabrahmake sassamaṇabrāhmaṇiyā pajāya sadevamanussāya tathāgato aggamakkhāyati arahaṃ sammāsambuddho. Imā kho, bhikkhave, catasso aggapaññattiyo’’ti.
‘‘ರಾಹುಗ್ಗಂ ಅತ್ತಭಾವೀನಂ, ಮನ್ಧಾತಾ ಕಾಮಭೋಗಿನಂ।
‘‘Rāhuggaṃ attabhāvīnaṃ, mandhātā kāmabhoginaṃ;
ಮಾರೋ ಆಧಿಪತೇಯ್ಯಾನಂ, ಇದ್ಧಿಯಾ ಯಸಸಾ ಜಲಂ॥
Māro ādhipateyyānaṃ, iddhiyā yasasā jalaṃ.
‘‘ಉದ್ಧಂ ತಿರಿಯಂ ಅಪಾಚೀನಂ, ಯಾವತಾ ಜಗತೋ ಗತಿ।
‘‘Uddhaṃ tiriyaṃ apācīnaṃ, yāvatā jagato gati;
ಸದೇವಕಸ್ಸ ಲೋಕಸ್ಸ, ಬುದ್ಧೋ ಅಗ್ಗೋ ಪವುಚ್ಚತೀ’’ತಿ॥ ಪಞ್ಚಮಂ।
Sadevakassa lokassa, buddho aggo pavuccatī’’ti. pañcamaṃ;
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೫. ಪಞ್ಞತ್ತಿಸುತ್ತವಣ್ಣನಾ • 5. Paññattisuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೫. ಪಞ್ಞತ್ತಿಸುತ್ತವಣ್ಣನಾ • 5. Paññattisuttavaṇṇanā
