| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
6. பராப⁴வஸுத்தவண்ணனா
6. Parābhavasuttavaṇṇanā
ஏவங் மே ஸுதந்தி பராப⁴வஸுத்தங். கா உப்பத்தி? மங்க³லஸுத்தங் கிர ஸுத்வா தே³வானங் ஏதத³ஹோஸி – ‘‘ப⁴க³வதா மங்க³லஸுத்தே ஸத்தானங் வுட்³டி⁴ஞ்ச ஸொத்தி²ஞ்ச கத²யமானேன ஏகங்ஸேன ப⁴வோ ஏவ கதி²தோ, நோ பராப⁴வோ. ஹந்த³ தா³னி யேன ஸத்தா பரிஹாயந்தி வினஸ்ஸந்தி, தங் நேஸங் பராப⁴வம்பி புச்சா²மா’’தி. அத² மங்க³லஸுத்தங் கதி²ததி³வஸதோ து³தியதி³வஸே த³ஸஸஹஸ்ஸசக்கவாளேஸு தே³வதாயோ பராப⁴வஸுத்தங் ஸோதுகாமா இமஸ்மிங் ஏகசக்கவாளே ஸன்னிபதித்வா ஏகவாலக்³க³கோடிஓகாஸமத்தே த³ஸபி வீஸம்பி திங்ஸம்பி சத்தாலீஸம்பி பஞ்ஞாஸம்பி ஸட்டி²பி ஸத்ததிபி அஸீதிபி ஸுகு²மத்தபா⁴வே நிம்மினித்வா ஸப்³ப³தே³வமாரப்³ரஹ்மானோ ஸிரியா ச தேஜேன ச அதி⁴க³ய்ஹ விரோசமானங் பஞ்ஞத்தவரபு³த்³தா⁴ஸனே நிஸின்னங் ப⁴க³வந்தங் பரிவாரெத்வா அட்ட²ங்ஸு. ததோ ஸக்கேன தே³வானமிந்தே³ன ஆணத்தோ அஞ்ஞதரோ தே³வபுத்தோ ப⁴க³வந்தங் பராப⁴வபஞ்ஹங் புச்சி². அத² ப⁴க³வா புச்சா²வஸேன இமங் ஸுத்தமபா⁴ஸி.
Evaṃme sutanti parābhavasuttaṃ. Kā uppatti? Maṅgalasuttaṃ kira sutvā devānaṃ etadahosi – ‘‘bhagavatā maṅgalasutte sattānaṃ vuḍḍhiñca sotthiñca kathayamānena ekaṃsena bhavo eva kathito, no parābhavo. Handa dāni yena sattā parihāyanti vinassanti, taṃ nesaṃ parābhavampi pucchāmā’’ti. Atha maṅgalasuttaṃ kathitadivasato dutiyadivase dasasahassacakkavāḷesu devatāyo parābhavasuttaṃ sotukāmā imasmiṃ ekacakkavāḷe sannipatitvā ekavālaggakoṭiokāsamatte dasapi vīsampi tiṃsampi cattālīsampi paññāsampi saṭṭhipi sattatipi asītipi sukhumattabhāve nimminitvā sabbadevamārabrahmāno siriyā ca tejena ca adhigayha virocamānaṃ paññattavarabuddhāsane nisinnaṃ bhagavantaṃ parivāretvā aṭṭhaṃsu. Tato sakkena devānamindena āṇatto aññataro devaputto bhagavantaṃ parābhavapañhaṃ pucchi. Atha bhagavā pucchāvasena imaṃ suttamabhāsi.
தத்த² ‘‘ஏவங் மே ஸுத’’ந்திஆதி³ ஆயஸ்மதா ஆனந்தே³ன வுத்தங். ‘‘பராப⁴வந்தங் புரிஸ’’ந்திஆதி³னா நயேன ஏகந்தரிகா கா³தா² தே³வபுத்தேன வுத்தா, ‘‘ஸுவிஜானோ ப⁴வங் ஹோதீ’’திஆதி³னா நயேன ஏகந்தரிகா ஏவ அவஸானகா³தா² ச ப⁴க³வதா வுத்தா, ததே³தங் ஸப்³ப³ம்பி ஸமோதா⁴னெத்வா ‘‘பராப⁴வஸுத்த’’ந்தி வுச்சதி. தத்த² ‘‘ஏவங் மே ஸுத’’ந்திஆதீ³ஸு யங் வத்தப்³ப³ங், தங் ஸப்³ப³ங் மங்க³லஸுத்தவண்ணனாயங் வக்கா²ம.
Tattha ‘‘evaṃ me suta’’ntiādi āyasmatā ānandena vuttaṃ. ‘‘Parābhavantaṃ purisa’’ntiādinā nayena ekantarikā gāthā devaputtena vuttā, ‘‘suvijāno bhavaṃ hotī’’tiādinā nayena ekantarikā eva avasānagāthā ca bhagavatā vuttā, tadetaṃ sabbampi samodhānetvā ‘‘parābhavasutta’’nti vuccati. Tattha ‘‘evaṃ me suta’’ntiādīsu yaṃ vattabbaṃ, taṃ sabbaṃ maṅgalasuttavaṇṇanāyaṃ vakkhāma.
91. பராப⁴வந்தங் புரிஸந்திஆதீ³ஸு பன பராப⁴வந்தந்தி பரிஹாயந்தங் வினஸ்ஸந்தங். புரிஸந்தி யங்கிஞ்சி ஸத்தங் ஜந்துங். மயங் புச்சா²ம கோ³தமாதி ஸேஸதே³வேஹி ஸத்³தி⁴ங் அத்தானங் நித³ஸ்ஸெத்வா ஓகாஸங் காரெந்தோ ஸோ தே³வபுத்தோ கொ³த்தேன ப⁴க³வந்தங் ஆலபதி. ப⁴வந்தங் புட்டு²மாக³ம்மாதி மயஞ்ஹி ப⁴வந்தங் புச்சி²ஸ்ஸாமாதி ததோ ததோ சக்கவாளா ஆக³தாதி அத்தோ². ஏதேன ஆத³ரங் த³ஸ்ஸேதி. கிங் பராப⁴வதோ முக²ந்தி ஏவங் ஆக³தானங் அம்ஹாகங் ப்³ரூஹி பராப⁴வதோ புரிஸஸ்ஸ கிங் முக²ங், கிங் த்³வாரங், கா யோனி, கிங் காரணங், யேன மயங் பராப⁴வந்தங் புரிஸங் ஜானெய்யாமாதி அத்தோ². ஏதேன ‘‘பராப⁴வந்தங் புரிஸ’’ந்தி எத்த² வுத்தஸ்ஸ பராப⁴வதோ புரிஸஸ்ஸ பராப⁴வகாரணங் புச்ச²தி. பராப⁴வகாரணே ஹி ஞாதே தேன காரணஸாமஞ்ஞேன ஸக்கா யோ கோசி பராப⁴வபுரிஸோ ஜானிதுந்தி .
91.Parābhavantaṃ purisantiādīsu pana parābhavantanti parihāyantaṃ vinassantaṃ. Purisanti yaṃkiñci sattaṃ jantuṃ. Mayaṃ pucchāmagotamāti sesadevehi saddhiṃ attānaṃ nidassetvā okāsaṃ kārento so devaputto gottena bhagavantaṃ ālapati. Bhavantaṃ puṭṭhumāgammāti mayañhi bhavantaṃ pucchissāmāti tato tato cakkavāḷā āgatāti attho. Etena ādaraṃ dasseti. Kiṃ parābhavato mukhanti evaṃ āgatānaṃ amhākaṃ brūhi parābhavato purisassa kiṃ mukhaṃ, kiṃ dvāraṃ, kā yoni, kiṃ kāraṇaṃ, yena mayaṃ parābhavantaṃ purisaṃ jāneyyāmāti attho. Etena ‘‘parābhavantaṃ purisa’’nti ettha vuttassa parābhavato purisassa parābhavakāraṇaṃ pucchati. Parābhavakāraṇe hi ñāte tena kāraṇasāmaññena sakkā yo koci parābhavapuriso jānitunti .
92. அத²ஸ்ஸ ப⁴க³வா ஸுட்டு² பாகடீகரணத்த²ங் படிபக்க²ங் த³ஸ்ஸெத்வா புக்³க³லாதி⁴ட்டா²னாய தே³ஸனாய பராப⁴வமுக²ங் தீ³பெந்தோ ஆஹ ‘‘ஸுவிஜானோ ப⁴வ’’ந்தி. தஸ்ஸத்தோ² – ய்வாயங் ப⁴வங் வட்³ட⁴ந்தோ அபரிஹாயந்தோ புரிஸோ, ஸோ ஸுவிஜானோ ஹோதி, ஸுகே²ன அகஸிரேன அகிச்சே²ன ஸக்கா விஜானிதுங். யோபாயங் பராப⁴வதீதி பராப⁴வோ, பரிஹாயதி வினஸ்ஸதி, யஸ்ஸ தும்ஹே பராப⁴வதோ புரிஸஸ்ஸ முக²ங் மங் புச்ச²த², ஸோபி ஸுவிஜானோ. கத²ங்? அயஞ்ஹி த⁴ம்மகாமோ ப⁴வங் ஹோதி த³ஸகுஸலகம்மபத²த⁴ம்மங் காமேதி, பிஹேதி, பத்தே²தி, ஸுணாதி, படிபஜ்ஜதி, ஸோ தங் படிபத்திங் தி³ஸ்வா ஸுத்வா ச ஜானிதப்³ப³தோ ஸுவிஜானோ ஹோதி. இதரோபி த⁴ம்மதெ³ஸ்ஸீ பராப⁴வோ, தமேவ த⁴ம்மங் தெ³ஸ்ஸதி, ந காமேதி, ந பிஹேதி, ந பத்தே²தி, ந ஸுணாதி, ந படிபஜ்ஜதி, ஸோ தங் விப்படிபத்திங் தி³ஸ்வா ஸுத்வா ச ஜானிதப்³ப³தோ ஸுவிஜானோ ஹோதீதி. ஏவமெத்த² ப⁴க³வா படிபக்க²ங் த³ஸ்ஸெந்தோ அத்த²தோ த⁴ம்மகாமதங் ப⁴வதோ முக²ங் த³ஸ்ஸெத்வா த⁴ம்மதெ³ஸ்ஸிதங் பராப⁴வதோ முக²ங் த³ஸ்ஸேதீதி வேதி³தப்³ப³ங்.
92. Athassa bhagavā suṭṭhu pākaṭīkaraṇatthaṃ paṭipakkhaṃ dassetvā puggalādhiṭṭhānāya desanāya parābhavamukhaṃ dīpento āha ‘‘suvijāno bhava’’nti. Tassattho – yvāyaṃ bhavaṃ vaḍḍhanto aparihāyanto puriso, so suvijāno hoti, sukhena akasirena akicchena sakkā vijānituṃ. Yopāyaṃ parābhavatīti parābhavo, parihāyati vinassati, yassa tumhe parābhavato purisassa mukhaṃ maṃ pucchatha, sopi suvijāno. Kathaṃ? Ayañhi dhammakāmo bhavaṃ hoti dasakusalakammapathadhammaṃ kāmeti, piheti, pattheti, suṇāti, paṭipajjati, so taṃ paṭipattiṃ disvā sutvā ca jānitabbato suvijāno hoti. Itaropi dhammadessī parābhavo, tameva dhammaṃ dessati, na kāmeti, na piheti, na pattheti, na suṇāti, na paṭipajjati, so taṃ vippaṭipattiṃ disvā sutvā ca jānitabbato suvijāno hotīti. Evamettha bhagavā paṭipakkhaṃ dassento atthato dhammakāmataṃ bhavato mukhaṃ dassetvā dhammadessitaṃ parābhavato mukhaṃ dassetīti veditabbaṃ.
93. அத² ஸா தே³வதா ப⁴க³வதோ பா⁴ஸிதங் அபி⁴னந்த³மானா ஆஹ ‘‘இதி ஹேத’’ந்தி. தஸ்ஸத்தோ² – இதி ஹி யதா² வுத்தோ ப⁴க³வதா, ததே²வ ஏதங் விஜானாம, க³ண்ஹாம, தா⁴ரேம, பட²மோ ஸோ பராப⁴வோ ஸோ த⁴ம்மதெ³ஸ்ஸிதாலக்க²ணோ பட²மோ பராப⁴வோ. யானி மயங் பராப⁴வமுகா²னி விஜானிதுங் ஆக³தம்ஹா, தேஸு இத³ங் தாவ ஏகங் பராப⁴வமுக²ந்தி வுத்தங் ஹோதி. தத்த² விக்³க³ஹோ, பராப⁴வந்தி ஏதேனாதி பராப⁴வோ. கேன ச பராப⁴வந்தி? யங் பராப⁴வதோ முக²ங், காரணங், தேன. ப்³யஞ்ஜனமத்தேன ஏவ ஹி எத்த² நானாகரணங், அத்த²தோ பன பராப⁴வோதி வா பராப⁴வதோ முக²ந்தி வா நானாகரணங் நத்தி². ஏவமேகங் பராப⁴வதோ முக²ங் விஜானாமாதி அபி⁴னந்தி³த்வா ததோ பரங் ஞாதுகாமதாயாஹ ‘‘து³தியங் ப⁴க³வா ப்³ரூஹி, கிங் பராப⁴வதோ முக²’’ந்தி. இதோ பரஞ்ச ததியங் சதுத்த²ந்திஆதீ³ஸுபி இமினாவ நயேனத்தோ² வேதி³தப்³போ³.
93. Atha sā devatā bhagavato bhāsitaṃ abhinandamānā āha ‘‘iti heta’’nti. Tassattho – iti hi yathā vutto bhagavatā, tatheva etaṃ vijānāma, gaṇhāma, dhārema, paṭhamo so parābhavo so dhammadessitālakkhaṇo paṭhamo parābhavo. Yāni mayaṃ parābhavamukhāni vijānituṃ āgatamhā, tesu idaṃ tāva ekaṃ parābhavamukhanti vuttaṃ hoti. Tattha viggaho, parābhavanti etenāti parābhavo. Kena ca parābhavanti? Yaṃ parābhavato mukhaṃ, kāraṇaṃ, tena. Byañjanamattena eva hi ettha nānākaraṇaṃ, atthato pana parābhavoti vā parābhavato mukhanti vā nānākaraṇaṃ natthi. Evamekaṃ parābhavato mukhaṃ vijānāmāti abhinanditvā tato paraṃ ñātukāmatāyāha ‘‘dutiyaṃ bhagavā brūhi, kiṃ parābhavato mukha’’nti. Ito parañca tatiyaṃ catutthantiādīsupi imināva nayenattho veditabbo.
94. ப்³யாகரணபக்கே²பி ச யஸ்மா தே தே ஸத்தா தேஹி தேஹி பராப⁴வமுகே²ஹி ஸமன்னாக³தா, ந ஏகோயேவ ஸப்³பே³ஹி, ந ச ஸப்³பே³ ஏகேனேவ, தஸ்மா தேஸங் தேஸங் தானி தானி பராப⁴வமுகா²னி த³ஸ்ஸேதுங் ‘‘அஸந்தஸ்ஸ பியா ஹொந்தீ’’திஆதி³னா நயேன புக்³க³லாதி⁴ட்டா²னாய ஏவ தே³ஸனாய நானாவிதா⁴னி பராப⁴வமுகா²னி ப்³யாகாஸீதி வேதி³தப்³பா³.
94. Byākaraṇapakkhepi ca yasmā te te sattā tehi tehi parābhavamukhehi samannāgatā, na ekoyeva sabbehi, na ca sabbe ekeneva, tasmā tesaṃ tesaṃ tāni tāni parābhavamukhāni dassetuṃ ‘‘asantassa piyā hontī’’tiādinā nayena puggalādhiṭṭhānāya eva desanāya nānāvidhāni parābhavamukhāni byākāsīti veditabbā.
தத்ராயங் ஸங்கே²பதோ அத்த²வண்ணனா – அஸந்தோ நாம ச² ஸத்தா²ரோ, யே வா பனஞ்ஞேபி அவூபஸந்தேன காயவசீமனோகம்மேன ஸமன்னாக³தா, தே அஸந்தோ அஸ்ஸபியா ஹொந்தி ஸுனக்க²த்தாதீ³னங் அசேலககோரக²த்தியாத³யோ விய. ஸந்தோ நாம பு³த்³த⁴பச்சேகபு³த்³த⁴ஸாவகா. யே வா பனஞ்ஞேபி வூபஸந்தேன காயவசீமனோகம்மேன ஸமன்னாக³தா, தே ஸந்தே ந குருதே பியங், அத்தனோ பியே இட்டே² கந்தே மனாபே ந குருதேதி அத்தோ². வேனெய்யவஸேன ஹெத்த² வசனபே⁴தோ³ கதோதி வேதி³தப்³போ³. அத² வா ஸந்தே ந குருதேதி ஸந்தே ந ஸேவதீதி அத்தோ², யதா² ‘‘ராஜானங் ஸேவதீ’’தி ஏதஸ்மிஞ்ஹி அத்தே² ராஜானங் பியங் குருதேதி ஸத்³த³விதூ³ மந்தெந்தி. பியந்தி பியமானோ, துஸ்ஸமானோ, மோத³மானோதி அத்தோ². அஸதங் த⁴ம்மோ நாம த்³வாஸட்டி² தி³ட்டி²க³தானி, த³ஸாகுஸலகம்மபதா² வா. தங் அஸதங் த⁴ம்மங் ரோசேதி, பிஹேதி, பத்தே²தி, ஸேவதி. ஏவமேதாய கா³தா²ய அஸந்தபியதா, ஸந்தஅப்பியதா, அஸத்³த⁴ம்மரோசனஞ்சாதி திவித⁴ங் பராப⁴வதோ முக²ங் வுத்தங். ஏதேன ஹி ஸமன்னாக³தோ புரிஸோ பராப⁴வதி பரிஹாயதி, நேவ இத⁴ ந ஹுரங் வுட்³டி⁴ங் பாபுணாதி, தஸ்மா ‘‘பராப⁴வதோ முக²’’ந்தி வுச்சதி. வித்தா²ரங் பனெத்த² ‘‘அஸேவனா ச பா³லானங், பண்டி³தானஞ்ச ஸேவனா’’தி கா³தா²வண்ணனாயங் வக்கா²ம.
Tatrāyaṃ saṅkhepato atthavaṇṇanā – asanto nāma cha satthāro, ye vā panaññepi avūpasantena kāyavacīmanokammena samannāgatā, te asanto assapiyā honti sunakkhattādīnaṃ acelakakorakhattiyādayo viya. Santo nāma buddhapaccekabuddhasāvakā. Ye vā panaññepi vūpasantena kāyavacīmanokammena samannāgatā, te sante na kurute piyaṃ, attano piye iṭṭhe kante manāpe na kuruteti attho. Veneyyavasena hettha vacanabhedo katoti veditabbo. Atha vā sante na kuruteti sante na sevatīti attho, yathā ‘‘rājānaṃ sevatī’’ti etasmiñhi atthe rājānaṃ piyaṃ kuruteti saddavidū mantenti. Piyanti piyamāno, tussamāno, modamānoti attho. Asataṃdhammo nāma dvāsaṭṭhi diṭṭhigatāni, dasākusalakammapathā vā. Taṃ asataṃ dhammaṃ roceti, piheti, pattheti, sevati. Evametāya gāthāya asantapiyatā, santaappiyatā, asaddhammarocanañcāti tividhaṃ parābhavato mukhaṃ vuttaṃ. Etena hi samannāgato puriso parābhavati parihāyati, neva idha na huraṃ vuḍḍhiṃ pāpuṇāti, tasmā ‘‘parābhavato mukha’’nti vuccati. Vitthāraṃ panettha ‘‘asevanā ca bālānaṃ, paṇḍitānañca sevanā’’ti gāthāvaṇṇanāyaṃ vakkhāma.
96. நித்³தா³ஸீலீ நாம யோ க³ச்ச²ந்தோபி, நிஸீத³ந்தோபி, திட்ட²ந்தோபி, ஸயானோபி நித்³தா³யதியேவ. ஸபா⁴ஸீலீ நாம ஸங்க³ணிகாராமதங், ப⁴ஸ்ஸாராமதமனுயுத்தோ. அனுட்டா²தாதி வீரியதேஜவிரஹிதோ உட்டா²னஸீலோ ந ஹோதி, அஞ்ஞேஹி சோதி³யமானோ க³ஹட்டோ² வா ஸமானோ க³ஹட்ட²கம்மங் , பப்³ப³ஜிதோ வா பப்³ப³ஜிதகம்மங் ஆரப⁴தி. அலஸோதி ஜாதிஅலஸோ, அச்சந்தாபி⁴பூ⁴தோ தி²னேன டி²தட்டா²னே டி²தோ ஏவ ஹோதி, நிஸின்னட்டா²னே நிஸின்னோ ஏவ ஹோதி, அத்தனோ உஸ்ஸாஹேன அஞ்ஞங் இரியாபத²ங் ந கப்பேதி. அதீதே அரஞ்ஞே அக்³கி³ம்ஹி உட்டி²தே அபலாயனஅலஸா செத்த² நித³ஸ்ஸனங். அயமெத்த² உக்கட்ட²பரிச்சே²தோ³, ததோ லாமகபரிச்சே²தே³னாபி பன அலஸோ அலஸொத்வேவ வேதி³தப்³போ³. த⁴ஜோவ ரத²ஸ்ஸ, தூ⁴மோவ அக்³கி³னோ, கோதோ⁴ பஞ்ஞாணமஸ்ஸாதி கோத⁴பஞ்ஞாணோ. தோ³ஸசரிதோ கி²ப்பகோபீ அருகூபமசித்தோ புக்³க³லோ ஏவரூபோ ஹோதி. இமாய கா³தா²ய நித்³தா³ஸீலதா, ஸபா⁴ஸீலதா, அனுட்டா²னதா, அலஸதா, கோத⁴பஞ்ஞாணதாதி பஞ்சவித⁴ங் பராப⁴வமுக²ங் வுத்தங். ஏதேன ஹி ஸமன்னாக³தோ நேவ க³ஹட்டோ² க³ஹட்ட²வுட்³டி⁴ங், ந பப்³ப³ஜிதோ பப்³ப³ஜிதவுட்³டி⁴ங் பாபுணாதி, அஞ்ஞத³த்து² பரிஹாயதியேவ பராப⁴வதியேவ, தஸ்மா ‘‘பராப⁴வதோ முக²’’ந்தி வுச்சதி.
96.Niddāsīlī nāma yo gacchantopi, nisīdantopi, tiṭṭhantopi, sayānopi niddāyatiyeva. Sabhāsīlī nāma saṅgaṇikārāmataṃ, bhassārāmatamanuyutto. Anuṭṭhātāti vīriyatejavirahito uṭṭhānasīlo na hoti, aññehi codiyamāno gahaṭṭho vā samāno gahaṭṭhakammaṃ , pabbajito vā pabbajitakammaṃ ārabhati. Alasoti jātialaso, accantābhibhūto thinena ṭhitaṭṭhāne ṭhito eva hoti, nisinnaṭṭhāne nisinno eva hoti, attano ussāhena aññaṃ iriyāpathaṃ na kappeti. Atīte araññe aggimhi uṭṭhite apalāyanaalasā cettha nidassanaṃ. Ayamettha ukkaṭṭhaparicchedo, tato lāmakaparicchedenāpi pana alaso alasotveva veditabbo. Dhajova rathassa, dhūmova aggino, kodho paññāṇamassāti kodhapaññāṇo. Dosacarito khippakopī arukūpamacitto puggalo evarūpo hoti. Imāya gāthāya niddāsīlatā, sabhāsīlatā, anuṭṭhānatā, alasatā, kodhapaññāṇatāti pañcavidhaṃ parābhavamukhaṃ vuttaṃ. Etena hi samannāgato neva gahaṭṭho gahaṭṭhavuḍḍhiṃ, na pabbajito pabbajitavuḍḍhiṃ pāpuṇāti, aññadatthu parihāyatiyeva parābhavatiyeva, tasmā ‘‘parābhavato mukha’’nti vuccati.
98. மாதாதி ஜனிகா வேதி³தப்³பா³. பிதாதி ஜனகோயேவ. ஜிண்ணகங் ஸரீரஸிதி²லதாய. க³தயொப்³ப³னங் யொப்³ப³னாதிக்கமேன ஆஸீதிகங் வா நாவுதிகங் வா ஸயங் கம்மானி காதுமஸமத்த²ங். பஹு ஸந்தோதி ஸமத்தோ² ஸமானோ ஸுக²ங் ஜீவமானோ. ந ப⁴ரதீதி ந போஸேதி. இமாய கா³தா²ய மாதாபிதூனங் அப⁴ரணங், அபோஸனங், அனுபட்டா²னங் ஏகங்யேவ பராப⁴வமுக²ங் வுத்தங். ஏதேன ஹி ஸமன்னாக³தோ யங் தங் –
98.Mātāti janikā veditabbā. Pitāti janakoyeva. Jiṇṇakaṃ sarīrasithilatāya. Gatayobbanaṃ yobbanātikkamena āsītikaṃ vā nāvutikaṃ vā sayaṃ kammāni kātumasamatthaṃ. Pahu santoti samattho samāno sukhaṃ jīvamāno. Na bharatīti na poseti. Imāya gāthāya mātāpitūnaṃ abharaṇaṃ, aposanaṃ, anupaṭṭhānaṃ ekaṃyeva parābhavamukhaṃ vuttaṃ. Etena hi samannāgato yaṃ taṃ –
‘‘தாய நங் பாரிசரியாய, மாதாபிதூஸு பண்டி³தா;
‘‘Tāya naṃ pāricariyāya, mātāpitūsu paṇḍitā;
இதே⁴வ நங் பஸங்ஸந்தி, பேச்ச ஸக்³கே³ பமோத³தீ’’தி. (இதிவு॰ 106; அ॰ நி॰ 4.63) –
Idheva naṃ pasaṃsanti, pecca sagge pamodatī’’ti. (itivu. 106; a. ni. 4.63) –
மாதாபிதுப⁴ரணே ஆனிஸங்ஸங் வுத்தங். தங் ந பாபுணாதி, அஞ்ஞத³த்து² ‘‘மாதாபிதரோபி ந ப⁴ரதி, கங் அஞ்ஞங் ப⁴ரிஸ்ஸதீ’’தி நிந்த³ஞ்ச வஜ்ஜனீயதஞ்ச து³க்³க³திஞ்ச பாபுணந்தோ பராப⁴வதியேவ, தஸ்மா ‘‘பராப⁴வதோ முக²’’ந்தி வுச்சதி.
Mātāpitubharaṇe ānisaṃsaṃ vuttaṃ. Taṃ na pāpuṇāti, aññadatthu ‘‘mātāpitaropi na bharati, kaṃ aññaṃ bharissatī’’ti nindañca vajjanīyatañca duggatiñca pāpuṇanto parābhavatiyeva, tasmā ‘‘parābhavato mukha’’nti vuccati.
100. பாபானங் பா³ஹிதத்தா ப்³ராஹ்மணங், ஸமிதத்தா ஸமணங். ப்³ராஹ்மணகுலப்பப⁴வம்பி வா ப்³ராஹ்மணங், பப்³ப³ஜ்ஜுபக³தங் ஸமணங், ததோ அஞ்ஞங் வாபி யங்கிஞ்சி யாசனகங். முஸாவாதே³ன வஞ்சேதீதி ‘‘வத³, ப⁴ந்தே, பச்சயேனா’’தி பவாரெத்வா யாசிதோ வா படிஜானித்வா பச்சா² அப்பதா³னேன தஸ்ஸ தங் ஆஸங் விஸங்வாதே³தி. இமாய கா³தா²ய ப்³ராஹ்மணாதீ³னங் முஸாவாதே³ன வஞ்சனங் ஏகங்யேவ பராப⁴வமுக²ங் வுத்தங். ஏதேன ஹி ஸமன்னாக³தோ இத⁴ நிந்த³ங், ஸம்பராயே து³க்³க³திங் ஸுக³தியம்பி அதி⁴ப்பாயவிபத்திஞ்ச பாபுணாதி. வுத்தஞ்ஹேதங் –
100. Pāpānaṃ bāhitattā brāhmaṇaṃ, samitattā samaṇaṃ. Brāhmaṇakulappabhavampi vā brāhmaṇaṃ, pabbajjupagataṃ samaṇaṃ, tato aññaṃ vāpi yaṃkiñci yācanakaṃ. Musāvādena vañcetīti ‘‘vada, bhante, paccayenā’’ti pavāretvā yācito vā paṭijānitvā pacchā appadānena tassa taṃ āsaṃ visaṃvādeti. Imāya gāthāya brāhmaṇādīnaṃ musāvādena vañcanaṃ ekaṃyeva parābhavamukhaṃ vuttaṃ. Etena hi samannāgato idha nindaṃ, samparāye duggatiṃ sugatiyampi adhippāyavipattiñca pāpuṇāti. Vuttañhetaṃ –
‘‘து³ஸ்ஸீலஸ்ஸ ஸீலவிபன்னஸ்ஸ பாபகோ கித்திஸத்³தோ³ அப்³பு⁴க்³க³ச்ச²தீ’’தி (தீ³॰ நி॰ 2.149; அ॰ நி॰ 5.213; மஹாவ॰ 285).
‘‘Dussīlassa sīlavipannassa pāpako kittisaddo abbhuggacchatī’’ti (dī. ni. 2.149; a. ni. 5.213; mahāva. 285).
ததா² –
Tathā –
‘‘சதூஹி, பி⁴க்க²வே, த⁴ம்மேஹி ஸமன்னாக³தோ யதா²ப⁴தங் நிக்கி²த்தோ ஏவங் நிரயே. கதமேஹி சதூஹி? முஸாவாதீ³ ஹோதீ’’திஆதி³ (அ॰ நி॰ 4.82).
‘‘Catūhi, bhikkhave, dhammehi samannāgato yathābhataṃ nikkhitto evaṃ niraye. Katamehi catūhi? Musāvādī hotī’’tiādi (a. ni. 4.82).
ததா² –
Tathā –
‘‘இத⁴, ஸாரிபுத்த, ஏகச்சோ ஸமணங் வா ப்³ராஹ்மணங் வா உபஸங்கமித்வா பவாரேதி, ‘வத³, ப⁴ந்தே, பச்சயேனா’தி, ஸோ யேன பவாரேதி, தங் ந தே³தி. ஸோ சே ததோ சுதோ இத்த²த்தங் ஆக³ச்ச²தி. ஸோ யங் யதே³வ வணிஜ்ஜங் பயோஜேதி, ஸாஸ்ஸ ஹோதி சே²த³கா³மினீ. இத⁴ பன ஸாரிபுத்த…பே॰… ஸோ யேன பவாரேதி, ந தங் யதா²தி⁴ப்பாயங் தே³தி. ஸோ சே ததோ சுதோ இத்த²த்தங் ஆக³ச்ச²தி. ஸோ யங் யதே³வ வணிஜ்ஜங் பயோஜேதி, ஸாஸ்ஸ ந ஹோதி யதா²தி⁴ப்பாயா’’தி (அ॰ நி॰ 4.79).
‘‘Idha, sāriputta, ekacco samaṇaṃ vā brāhmaṇaṃ vā upasaṅkamitvā pavāreti, ‘vada, bhante, paccayenā’ti, so yena pavāreti, taṃ na deti. So ce tato cuto itthattaṃ āgacchati. So yaṃ yadeva vaṇijjaṃ payojeti, sāssa hoti chedagāminī. Idha pana sāriputta…pe… so yena pavāreti, na taṃ yathādhippāyaṃ deti. So ce tato cuto itthattaṃ āgacchati. So yaṃ yadeva vaṇijjaṃ payojeti, sāssa na hoti yathādhippāyā’’ti (a. ni. 4.79).
ஏவமிமானி நிந்தா³தீ³னி பாபுணந்தோ பராப⁴வதியேவ, தஸ்மா ‘‘பராப⁴வதோ முக²’’ந்தி வுத்தங்.
Evamimāni nindādīni pāpuṇanto parābhavatiyeva, tasmā ‘‘parābhavato mukha’’nti vuttaṃ.
102. பஹூதவித்தோதி பஹூதஜாதரூபரஜதமணிரதனோ. ஸஹிரஞ்ஞோதி ஸகஹாபணோ. ஸபோ⁴ஜனோதி அனேகஸூபப்³யஞ்ஜனபோ⁴ஜனஸம்பன்னோ. ஏகோ பு⁴ஞ்ஜதி ஸாதூ³னீதி ஸாதூ³னி போ⁴ஜனானி அத்தனோ புத்தானம்பி அத³த்வா படிச்ச²ன்னோகாஸே பு⁴ஞ்ஜதீதி ஏகோ பு⁴ஞ்ஜதி ஸாதூ³னி. இமாய கா³தா²ய போ⁴ஜனகி³த்³த⁴தாய போ⁴ஜனமச்ச²ரியங் ஏகங்யேவ பராப⁴வமுக²ங் வுத்தங். ஏதேன ஹி ஸமன்னாக³தோ நிந்த³ங் வஜ்ஜனீயங் து³க்³க³திந்தி ஏவமாதீ³னி பாபுணந்தோ பராப⁴வதியேவ, தஸ்மா ‘‘பராப⁴வதோ முக²’’ந்தி வுத்தங். வுத்தனயேனேவ ஸப்³ப³ங் ஸுத்தானுஸாரேன யோஜேதப்³ப³ங், அதிவித்தா²ரப⁴யேன பன இதா³னி யோஜனானயங் அத³ஸ்ஸெத்வா அத்த²மத்தமேவ ப⁴ணாம.
102.Pahūtavittoti pahūtajātarūparajatamaṇiratano. Sahiraññoti sakahāpaṇo. Sabhojanoti anekasūpabyañjanabhojanasampanno. Eko bhuñjati sādūnīti sādūni bhojanāni attano puttānampi adatvā paṭicchannokāse bhuñjatīti eko bhuñjati sādūni. Imāya gāthāya bhojanagiddhatāya bhojanamacchariyaṃ ekaṃyeva parābhavamukhaṃ vuttaṃ. Etena hi samannāgato nindaṃ vajjanīyaṃ duggatinti evamādīni pāpuṇanto parābhavatiyeva, tasmā ‘‘parābhavato mukha’’nti vuttaṃ. Vuttanayeneva sabbaṃ suttānusārena yojetabbaṃ, ativitthārabhayena pana idāni yojanānayaṃ adassetvā atthamattameva bhaṇāma.
104. ஜாதித்த²த்³தோ⁴ நாம யோ ‘‘அஹங் ஜாதிஸம்பன்னோ’’தி மானங் ஜனெத்வா தேன த²த்³தோ⁴ வாதபூரிதப⁴ஸ்தா விய உத்³து⁴மாதோ ஹுத்வா ந கஸ்ஸசி ஓனமதி. ஏஸ நயோ த⁴னகொ³த்தத்த²த்³தே⁴ஸு. ஸஞ்ஞாதிங் அதிமஞ்ஞேதீதி அத்தனோ ஞாதிம்பி ஜாதியா அதிமஞ்ஞதி ஸக்யா விய விடடூப⁴ங். த⁴னேனாபி ச ‘‘கபணோ அயங் த³லித்³தோ³’’தி அதிமஞ்ஞதி, ஸாமீசிமத்தம்பி ந கரோதி, தஸ்ஸ தே ஞாதயோ பராப⁴வமேவ இச்ச²ந்தி. இமாய கா³தா²ய வத்து²தோ சதுப்³பி³த⁴ங், லக்க²ணதோ ஏகங்யேவ பராப⁴வமுக²ங் வுத்தங்.
104.Jātitthaddho nāma yo ‘‘ahaṃ jātisampanno’’ti mānaṃ janetvā tena thaddho vātapūritabhastā viya uddhumāto hutvā na kassaci onamati. Esa nayo dhanagottatthaddhesu. Saññātiṃ atimaññetīti attano ñātimpi jātiyā atimaññati sakyā viya viṭaṭūbhaṃ. Dhanenāpi ca ‘‘kapaṇo ayaṃ daliddo’’ti atimaññati, sāmīcimattampi na karoti, tassa te ñātayo parābhavameva icchanti. Imāya gāthāya vatthuto catubbidhaṃ, lakkhaṇato ekaṃyeva parābhavamukhaṃ vuttaṃ.
106. இத்தி²து⁴த்தோதி இத்தீ²ஸு ஸாரத்தோ, யங்கிஞ்சி அத்தி², தங் ஸப்³ப³ம்பி த³த்வா அபராபரங் இத்தி²ங் ஸங்க³ண்ஹாதி. ததா² ஸப்³ப³ம்பி அத்தனோ ஸந்தகங் நிக்கி²பித்வா ஸுராபானபயுத்தோ ஸுராது⁴த்தோ. நிவத்த²ஸாடகம்பி நிக்கி²பித்வா ஜூதகீளனமனுயுத்தோ அக்க²து⁴த்தோ. ஏதேஹி தீஹி டா²னேஹி யங்கிஞ்சிபி லத்³த⁴ங் ஹோதி, தஸ்ஸ வினாஸனதோ லத்³த⁴ங் லத்³த⁴ங் வினாஸேதீதி வேதி³தப்³போ³. ஏவங்விதோ⁴ பராப⁴வதியேவ, தேனஸ்ஸேதங் இமாய கா³தா²ய திவித⁴ங் பராப⁴வமுக²ங் வுத்தங்.
106.Itthidhuttoti itthīsu sāratto, yaṃkiñci atthi, taṃ sabbampi datvā aparāparaṃ itthiṃ saṅgaṇhāti. Tathā sabbampi attano santakaṃ nikkhipitvā surāpānapayutto surādhutto. Nivatthasāṭakampi nikkhipitvā jūtakīḷanamanuyutto akkhadhutto. Etehi tīhi ṭhānehi yaṃkiñcipi laddhaṃ hoti, tassa vināsanato laddhaṃ laddhaṃ vināsetīti veditabbo. Evaṃvidho parābhavatiyeva, tenassetaṃ imāya gāthāya tividhaṃ parābhavamukhaṃ vuttaṃ.
108. ஸேஹி தா³ரேஹீதி அத்தனோ தா³ரேஹி. யோ அத்தனோ தா³ரேஹி அஸந்துட்டோ² ஹுத்வா வேஸியாஸு பது³ஸ்ஸதி, ததா² பரதா³ரேஸு, ஸோ யஸ்மா வேஸீனங் த⁴னப்பதா³னேன பரதா³ரஸேவனேன ச ராஜத³ண்டா³தீ³ஹி பராப⁴வதியேவ, தேனஸ்ஸேதங் இமாய கா³தா²ய து³வித⁴ங் பராப⁴வமுக²ங் வுத்தங்.
108.Sehi dārehīti attano dārehi. Yo attano dārehi asantuṭṭho hutvā vesiyāsu padussati, tathā paradāresu, so yasmā vesīnaṃ dhanappadānena paradārasevanena ca rājadaṇḍādīhi parābhavatiyeva, tenassetaṃ imāya gāthāya duvidhaṃ parābhavamukhaṃ vuttaṃ.
110. அதீதயொப்³ப³னோதி யொப்³ப³னமதிச்ச ஆஸீதிகோ வா நாவுதிகோ வா ஹுத்வா ஆனேதி பரிக்³க³ண்ஹாதி. திம்ப³ருத்த²னிந்தி திம்ப³ருப²லஸதி³ஸத்த²னிங் தருணதா³ரிகங். தஸ்ஸா இஸ்ஸா ந ஸுபதீதி ‘‘த³ஹராய மஹல்லகேன ஸத்³தி⁴ங் ரதி ச ஸங்வாஸோ ச அமனாபோ, மா ஹேவ கோ² தருணங் பத்தெ²ய்யா’’தி இஸ்ஸாய தங் ரக்க²ந்தோ ந ஸுபதி. ஸோ யஸ்மா காமராகே³ன ச இஸ்ஸாய ச ட³ய்ஹந்தோ ப³ஹித்³தா⁴ கம்மந்தே ச அப்பயோஜெந்தோ பராப⁴வதியேவ, தேனஸ்ஸேதங் இமாய கா³தா²ய இமங் இஸ்ஸாய அஸுபனங் ஏகங்யேவ பராப⁴வமுக²ங் வுத்தங்.
110.Atītayobbanoti yobbanamaticca āsītiko vā nāvutiko vā hutvā āneti pariggaṇhāti. Timbarutthaninti timbaruphalasadisatthaniṃ taruṇadārikaṃ. Tassā issā na supatīti ‘‘daharāya mahallakena saddhiṃ rati ca saṃvāso ca amanāpo, mā heva kho taruṇaṃ pattheyyā’’ti issāya taṃ rakkhanto na supati. So yasmā kāmarāgena ca issāya ca ḍayhanto bahiddhā kammante ca appayojento parābhavatiyeva, tenassetaṃ imāya gāthāya imaṃ issāya asupanaṃ ekaṃyeva parābhavamukhaṃ vuttaṃ.
112. ஸொண்டி³ந்தி மச்ச²மங்ஸாதீ³ஸு லோலங் கே³த⁴ஜாதிகங். விகிரணிந்தி தேஸங் அத்தா²ய த⁴னங் பங்ஸுகங் விய விகிரித்வா நாஸனஸீலங். புரிஸங் வாபி தாதி³ஸந்தி புரிஸோ வாபி யோ ஏவரூபோ ஹோதி, தங் யோ இஸ்ஸரியஸ்மிங் ட²பேதி, லஞ்ச²னமுத்³தி³காதீ³னி த³த்வா க⁴ராவாஸே கம்மந்தே வா வணிஜ்ஜாதி³வோஹாரேஸு வா ததே³வ வாவடங் காரேதி. ஸோ யஸ்மா தஸ்ஸ தோ³ஸேன த⁴னக்க²யங் பாபுணந்தோ பராப⁴வதியேவ, தேனஸ்ஸேதங் இமாய கா³தா²ய ததா²வித⁴ஸ்ஸ இஸ்ஸரியஸ்மிங் ட²பனங் ஏகங்யேவ பராப⁴வமுக²ங் வுத்தங்.
112.Soṇḍinti macchamaṃsādīsu lolaṃ gedhajātikaṃ. Vikiraṇinti tesaṃ atthāya dhanaṃ paṃsukaṃ viya vikiritvā nāsanasīlaṃ. Purisaṃ vāpi tādisanti puriso vāpi yo evarūpo hoti, taṃ yo issariyasmiṃ ṭhapeti, lañchanamuddikādīni datvā gharāvāse kammante vā vaṇijjādivohāresu vā tadeva vāvaṭaṃ kāreti. So yasmā tassa dosena dhanakkhayaṃ pāpuṇanto parābhavatiyeva, tenassetaṃ imāya gāthāya tathāvidhassa issariyasmiṃ ṭhapanaṃ ekaṃyeva parābhavamukhaṃ vuttaṃ.
114. அப்பபோ⁴கோ³ நாம ஸன்னிசிதானஞ்ச போ⁴கா³னங் ஆயமுக²ஸ்ஸ ச அபா⁴வதோ. மஹாதண்ஹோதி மஹதியா போ⁴க³தண்ஹாய ஸமன்னாக³தோ, யங் லத்³த⁴ங், தேன அஸந்துட்டோ². க²த்தியே ஜாயதே குலேதி க²த்தியானங் குலே ஜாயதி. ஸோ ச ரஜ்ஜங் பத்த²யதீதி ஸோ ஏதாய மஹாதண்ஹதாய அனுபாயேன உப்படிபாடியா அத்தனோ தா³யஜ்ஜபூ⁴தங் அலப்³ப⁴னெய்யங் வா பரஸந்தகங் ரஜ்ஜங் பத்தே²தி, ஸோ ஏவங் பத்தெ²ந்தோ யஸ்மா தம்பி அப்பகங் போ⁴க³ங் யோதா⁴ஜீவாதீ³னங் த³த்வா ரஜ்ஜங் அபாபுணந்தோ பராப⁴வதியேவ, தேனஸ்ஸேதங் இமாய கா³தா²ய ரஜ்ஜபத்த²னங் ஏகங்யேவ பராப⁴வமுக²ங் வுத்தங்.
114.Appabhogo nāma sannicitānañca bhogānaṃ āyamukhassa ca abhāvato. Mahātaṇhoti mahatiyā bhogataṇhāya samannāgato, yaṃ laddhaṃ, tena asantuṭṭho. Khattiye jāyate kuleti khattiyānaṃ kule jāyati. So ca rajjaṃ patthayatīti so etāya mahātaṇhatāya anupāyena uppaṭipāṭiyā attano dāyajjabhūtaṃ alabbhaneyyaṃ vā parasantakaṃ rajjaṃ pattheti, so evaṃ patthento yasmā tampi appakaṃ bhogaṃ yodhājīvādīnaṃ datvā rajjaṃ apāpuṇanto parābhavatiyeva, tenassetaṃ imāya gāthāya rajjapatthanaṃ ekaṃyeva parābhavamukhaṃ vuttaṃ.
115. இதோ பரங் யதி³ ஸா தே³வதா ‘‘தேரஸமங் ப⁴க³வா ப்³ரூஹி…பே॰… ஸதஸஹஸ்ஸிமங் ப⁴க³வா ப்³ரூஹீ’’தி புச்செ²ய்ய, தம்பி ப⁴க³வா கதெ²ய்ய. யஸ்மா பன ஸா தே³வதா ‘‘கிங் இமேஹி புச்சி²தேஹி, ஏகமெத்த² வுட்³டி⁴கரங் நத்தீ²’’தி தானி பராப⁴வமுகா²னி அஸுய்யமானா எத்தகம்பி புச்சி²த்வா விப்படிஸாரீ ஹுத்வா துண்ஹீ அஹோஸி, தஸ்மா ப⁴க³வா தஸ்ஸாஸயங் விதி³த்வா தே³ஸனங் நிட்டா²பெந்தோ இமங் கா³த²ங் அபா⁴ஸி ‘‘ஏதே பராப⁴வே லோகே’’தி.
115. Ito paraṃ yadi sā devatā ‘‘terasamaṃ bhagavā brūhi…pe… satasahassimaṃ bhagavā brūhī’’ti puccheyya, tampi bhagavā katheyya. Yasmā pana sā devatā ‘‘kiṃ imehi pucchitehi, ekamettha vuḍḍhikaraṃ natthī’’ti tāni parābhavamukhāni asuyyamānā ettakampi pucchitvā vippaṭisārī hutvā tuṇhī ahosi, tasmā bhagavā tassāsayaṃ viditvā desanaṃ niṭṭhāpento imaṃ gāthaṃ abhāsi ‘‘ete parābhave loke’’ti.
தத்த² பண்டி³தோதி பரிவீமங்ஸாய ஸமன்னாக³தோ. ஸமவெக்கி²யாதி பஞ்ஞாசக்கு²னா உபபரிக்கி²த்வா. அரியோதி ந மக்³கே³ன, ந ப²லேன, அபிச கோ², பன ஏதஸ்மிங் பராப⁴வஸங்கா²தே அனயே ந இரியதீதி அரியோ. யேன த³ஸ்ஸனேன யாய பஞ்ஞாய பராப⁴வே தி³ஸ்வா விவஜ்ஜேதி, தேன ஸம்பன்னத்தா த³ஸ்ஸனஸம்பன்னோ. ஸ லோகங் ப⁴ஜதே ஸிவந்தி ஸோ ஏவரூபோ ஸிவங் கே²மமுத்தமமனுபத்³த³வங் தே³வலோகங் ப⁴ஜதி, அல்லீயதி, உபக³ச்ச²தீதி வுத்தங் ஹோதி. தே³ஸனாபரியோஸானே பராப⁴வமுகா²னி ஸுத்வா உப்பன்னஸங்வேகா³னுரூபங் யோனிஸோ பத³ஹித்வா ஸோதாபத்திஸகதா³கா³மிஅனாகா³மிப²லானி பத்தா தே³வதா க³ணனங் வீதிவத்தா. யதா²ஹ –
Tattha paṇḍitoti parivīmaṃsāya samannāgato. Samavekkhiyāti paññācakkhunā upaparikkhitvā. Ariyoti na maggena, na phalena, apica kho, pana etasmiṃ parābhavasaṅkhāte anaye na iriyatīti ariyo. Yena dassanena yāya paññāya parābhave disvā vivajjeti, tena sampannattā dassanasampanno. Sa lokaṃ bhajate sivanti so evarūpo sivaṃ khemamuttamamanupaddavaṃ devalokaṃ bhajati, allīyati, upagacchatīti vuttaṃ hoti. Desanāpariyosāne parābhavamukhāni sutvā uppannasaṃvegānurūpaṃ yoniso padahitvā sotāpattisakadāgāmianāgāmiphalāni pattā devatā gaṇanaṃ vītivattā. Yathāha –
‘‘மஹாஸமயஸுத்தே ச, அதோ² மங்க³லஸுத்தகே;
‘‘Mahāsamayasutte ca, atho maṅgalasuttake;
ஸமசித்தே ராஹுலோவாதே³, த⁴ம்மசக்கே பராப⁴வே.
Samacitte rāhulovāde, dhammacakke parābhave.
‘‘தே³வதாஸமிதீ தத்த², அப்பமெய்யா அஸங்கி²யா;
‘‘Devatāsamitī tattha, appameyyā asaṅkhiyā;
த⁴ம்மாபி⁴ஸமயோ செத்த², க³ணனாதோ அஸங்கி²யோ’’தி.
Dhammābhisamayo cettha, gaṇanāto asaṅkhiyo’’ti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய பராப⁴வஸுத்தவண்ணனா நிட்டி²தா.
Suttanipāta-aṭṭhakathāya parābhavasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 6. பராப⁴வஸுத்தங் • 6. Parābhavasuttaṃ
