| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
பி⁴க்கு²னிவிப⁴ங்கோ³
Bhikkhunivibhaṅgo
1964. ஏவங் பி⁴க்கு²விப⁴ங்க³பாளியா, அட்ட²கதா²ய ச ஆக³தங் வினிச்ச²யஸாரங் நாதிஸங்கே²பவித்தா²ரனயேன த³ஸ்ஸெத்வா இதா³னி தத³னந்தராய பி⁴க்கு²னிவிப⁴ங்க³பாளியா, தத³ட்ட²கதா²ய ச ஆக³தவினிச்ச²யஸாரங் த³ஸ்ஸேதுமாரப⁴ந்தோ ஆஹ ‘‘பி⁴க்கு²னீன’’ந்திஆதி³. தஸ்மிங் அபீதி எத்த² அபி-ஸத்³தோ³ வுத்தாபெக்கா²யங். ‘‘ஸமாஸேனா’’தி இத³ங் க³ந்த²வஸேன ஸங்கி²பனங் ஸந்தா⁴ய வுத்தங். ‘‘கிஞ்சிமத்த’’ந்தி இத³ங் அத்த²வஸேனாதி வேதி³தப்³ப³ங்.
1964. Evaṃ bhikkhuvibhaṅgapāḷiyā, aṭṭhakathāya ca āgataṃ vinicchayasāraṃ nātisaṅkhepavitthāranayena dassetvā idāni tadanantarāya bhikkhunivibhaṅgapāḷiyā, tadaṭṭhakathāya ca āgatavinicchayasāraṃ dassetumārabhanto āha ‘‘bhikkhunīna’’ntiādi. Tasmiṃ apīti ettha api-saddo vuttāpekkhāyaṃ. ‘‘Samāsenā’’ti idaṃ ganthavasena saṅkhipanaṃ sandhāya vuttaṃ. ‘‘Kiñcimatta’’nti idaṃ atthavasenāti veditabbaṃ.
பாராஜிககதா²வண்ணனா
Pārājikakathāvaṇṇanā
1965. ச²ந்த³ஸோதி மேது²னஸேவனராக³படிஸங்யுத்தேன ச²ந்தே³ன. ஏதேன ‘‘ச²ந்தே³ பன அஸதி ப³லக்காரேன பத⁴ங்ஸிதாய அனாபத்தீ’’தி (கங்கா²॰ அட்ட²॰ மேது²னத⁴ம்மஸிக்கா²பத³வண்ணனா) அட்ட²கதா² ஸூசிதா ஹோதி. ஸா ஸமணீ பாராஜிகா நாம ஹோதீதி பவுச்சதீதி யோஜனா.
1965.Chandasoti methunasevanarāgapaṭisaṃyuttena chandena. Etena ‘‘chande pana asati balakkārena padhaṃsitāya anāpattī’’ti (kaṅkhā. aṭṭha. methunadhammasikkhāpadavaṇṇanā) aṭṭhakathā sūcitā hoti. Sā samaṇī pārājikā nāma hotīti pavuccatīti yojanā.
1966-7. ‘‘ஸஜீவஸ்ஸ அபி அஜீவஸ்ஸா’’தி பத³ச்சே²தோ³. ‘‘ஸந்த²தங் வா அஸந்த²த’’ந்தி இத³ங் ‘‘அங்க³ஜாத’’ந்தி இமஸ்ஸ விஸேஸனங். அத்தனோ திவிதே⁴ மக்³கே³தி அத்தனோ வச்சபஸ்ஸாவமுக²மக்³கா³னங் அஞ்ஞதரஸ்மிங் மக்³கே³. எத்த² ‘‘ஸந்த²தே வா அஸந்த²தே வா’’தி ஸேஸோ, ‘‘அல்லோகாஸே’’தி இமினா ஸம்ப³ந்தோ⁴. ‘‘யேபு⁴ய்யஅக்கா²யிதாதி³க’’ந்தி பத³ச்சே²தோ³. ஆதி³-ஸத்³தே³ன அக்கா²யிதங் ஸங்க³ண்ஹாதி.
1966-7. ‘‘Sajīvassa api ajīvassā’’ti padacchedo. ‘‘Santhataṃ vā asanthata’’nti idaṃ ‘‘aṅgajāta’’nti imassa visesanaṃ. Attano tividhe maggeti attano vaccapassāvamukhamaggānaṃ aññatarasmiṃ magge. Ettha ‘‘santhate vā asanthate vā’’ti seso, ‘‘allokāse’’ti iminā sambandho. ‘‘Yebhuyyaakkhāyitādika’’nti padacchedo. Ādi-saddena akkhāyitaṃ saṅgaṇhāti.
மனுஸ்ஸபுரிஸாதீ³னங் நவன்னங் ஸஜீவஸ்ஸபி அஜீவஸ்ஸபி யஸ்ஸ கஸ்ஸசி ஸந்த²தங் வா அஸந்த²தங் வா யேபு⁴ய்யக்கா²யிதாதி³கங் அங்க³ஜாதங் அத்தனோ ஸந்த²தே வா அஸந்த²தே வா திவிதே⁴ மக்³கே³ அல்லோகாஸே திலப²லமத்தம்பி பவேஸெந்தீ பராஜிதாதி யோஜனா.
Manussapurisādīnaṃ navannaṃ sajīvassapi ajīvassapi yassa kassaci santhataṃ vā asanthataṃ vā yebhuyyakkhāyitādikaṃ aṅgajātaṃ attano santhate vā asanthate vā tividhe magge allokāse tilaphalamattampi pavesentī parājitāti yojanā.
1968. ஸாதா⁴ரணவினிச்ச²யந்தி பி⁴க்கு²பி⁴க்கு²னீனங் ஸாதா⁴ரணஸிக்கா²பத³வினிச்ச²யங்.
1968.Sādhāraṇavinicchayanti bhikkhubhikkhunīnaṃ sādhāraṇasikkhāpadavinicchayaṃ.
1969-70. அத⁴க்க²கந்தி எத்த² அக்க²கானங் அதோ⁴தி விக்³க³ஹோ. உப்³ப⁴ஜாணுமண்ட³லந்தி ஜாணுமண்ட³லானங் உப்³ப⁴ந்தி விக்³க³ஹோ. உப்³ப⁴-ஸத்³தோ³ உத்³த⁴ங்-ஸத்³த³பரியாயோ. இத⁴ ‘‘அத்தனோ’’தி ஸேஸோ. அவஸ்ஸுதஸ்ஸாதி காயஸங்ஸக்³க³ராகே³ன திந்தஸ்ஸ. அவஸ்ஸுதாதி எத்தா²பி ஏஸேவ நயோ. யாதி வுத்தத்தா ‘‘ஸா’’தி லப்³ப⁴தி. ஸரீரந்தி எத்த² ‘‘யங் கிஞ்சீ’’தி ஸேஸோ. பரோபக்கமமூலகங் பாராஜிகங் த³ஸ்ஸேதுமாஹ ‘‘தேன வா பு²ட்டா²’’தி. எத்த² ‘‘யதா²பரிச்சி²ன்னே காயே’’தி ச ‘‘ஸாதி³யெய்யா’’தி ச வத்தப்³ப³ங்.
1969-70.Adhakkhakanti ettha akkhakānaṃ adhoti viggaho. Ubbhajāṇumaṇḍalanti jāṇumaṇḍalānaṃ ubbhanti viggaho. Ubbha-saddo uddhaṃ-saddapariyāyo. Idha ‘‘attano’’ti seso. Avassutassāti kāyasaṃsaggarāgena tintassa. Avassutāti etthāpi eseva nayo. Yāti vuttattā ‘‘sā’’ti labbhati. Sarīranti ettha ‘‘yaṃ kiñcī’’ti seso. Paropakkamamūlakaṃ pārājikaṃ dassetumāha ‘‘tena vā phuṭṭhā’’ti. Ettha ‘‘yathāparicchinne kāye’’ti ca ‘‘sādiyeyyā’’ti ca vattabbaṃ.
யா பன பி⁴க்கு²னீ அவஸ்ஸுதா அவஸ்ஸுதஸ்ஸ மனுஸ்ஸபுக்³க³லஸ்ஸ யங் கிஞ்சி ஸரீரங் அத்தனோ அத⁴க்க²கங் உப்³ப⁴ஜாணுமண்ட³லங் யங் ஸரீரகங், தேன ஸரீரகேன சு²பெய்ய, தேன மனுஸ்ஸபுரிஸேன யதா²பரிச்சி²ன்னே காயே பு²ட்டா² ஸாதி³யெய்ய வா, ஸா பாராஜிகா ஸியாதி யோஜனா.
Yā pana bhikkhunī avassutā avassutassa manussapuggalassa yaṃ kiñci sarīraṃ attano adhakkhakaṃ ubbhajāṇumaṇḍalaṃ yaṃ sarīrakaṃ, tena sarīrakena chupeyya, tena manussapurisena yathāparicchinne kāye phuṭṭhā sādiyeyya vā, sā pārājikā siyāti yojanā.
1971-2. ‘‘க³ஹிதங் உப்³ப⁴ஜாணுனா’’தி இமினா கப்பரதோ உத்³த⁴ங் பாராஜிகக்கெ²த்தமேவாதி தீ³பேதி. அத்தனோ யதா²வுத்தப்பகாரேன காயேனாதி யோஜனா, அத்தனோ ‘‘அத⁴க்க²க’’ந்திஆதி³வுத்தப்பகாரேன காயேனாதி அத்தோ². ததா² அவஸ்ஸுதாய அவஸ்ஸுதஸ்ஸ புரிஸஸ்ஸ காயபடிப³த்³த⁴ங் பு²ஸந்தியா து²ல்லச்சயங் ஹோதி. அத்தனோ யதா²பரிச்சி²ன்னகாயபடிப³த்³தே⁴ன ததா² அவஸ்ஸுதாய அவஸ்ஸுதஸ்ஸ புரிஸஸ்ஸ காயங் பு²ஸந்தியா து²ல்லச்சயங் ஹோதி.
1971-2.‘‘Gahitaṃ ubbhajāṇunā’’ti iminā kapparato uddhaṃ pārājikakkhettamevāti dīpeti. Attano yathāvuttappakārena kāyenāti yojanā, attano ‘‘adhakkhaka’’ntiādivuttappakārena kāyenāti attho. Tathā avassutāya avassutassa purisassa kāyapaṭibaddhaṃ phusantiyā thullaccayaṃ hoti. Attano yathāparicchinnakāyapaṭibaddhena tathā avassutāya avassutassa purisassa kāyaṃ phusantiyā thullaccayaṃ hoti.
1973. அத்தனோ அவஸேஸேன காயேன அவஸ்ஸுதாய அவஸ்ஸுதஸ்ஸ புரிஸபுக்³க³லஸ்ஸ காயங் பு²ஸந்தியா து²ல்லச்சயங் ஹோதி. ஏவங் அத்தனோ பயோகே³ ச புரிஸஸ்ஸ பயோகே³ ச தஸ்ஸா பி⁴க்கு²னியாயேவ து²ல்லச்சயங் ஹோதீதி யோஜனா.
1973. Attano avasesena kāyena avassutāya avassutassa purisapuggalassa kāyaṃ phusantiyā thullaccayaṃ hoti. Evaṃ attano payoge ca purisassa payoge ca tassā bhikkhuniyāyeva thullaccayaṃ hotīti yojanā.
1974. யக்க²பேததிரச்சா²னபண்ட³கானங் காயங் ‘‘அத⁴க்க²கங் உப்³ப⁴ஜாணுமண்ட³ல’’ந்தி யதா²பரிச்சி²ன்னங் ததே²வ அத்தனோ காயேன உப⁴தோஅவஸ்ஸவே ஸதி பு²ஸந்தியா அஸ்ஸா பி⁴க்கு²னியா து²ல்லச்சயங், ததே²வ யக்கா²தீ³னங் பயோகே³பி தஸ்ஸாயேவ து²ல்லச்சயங் ஹோதீதி யோஜனா.
1974. Yakkhapetatiracchānapaṇḍakānaṃ kāyaṃ ‘‘adhakkhakaṃ ubbhajāṇumaṇḍala’’nti yathāparicchinnaṃ tatheva attano kāyena ubhatoavassave sati phusantiyā assā bhikkhuniyā thullaccayaṃ, tatheva yakkhādīnaṃ payogepi tassāyeva thullaccayaṃ hotīti yojanā.
1975. ஏகதோவஸ்ஸவே சாபீதி பி⁴க்கு²னியா வஸேன ஏகதோஅவஸ்ஸவே சாபி. து²ல்லச்சயமுதீ³ரிதந்தி பாராஜிகக்கெ²த்தபூ⁴தேன அத்தனோ காயேன மனுஸ்ஸபுரிஸஸ்ஸ காயங் பு²ஸந்தியா து²ல்லச்சயங் அட்ட²கதா²யங் (பாசி॰ அட்ட²॰ 662) வுத்தந்தி அத்தோ². அவஸேஸே ச ஸப்³ப³த்தா²தி யதா²வுத்தபாராஜிகக்கெ²த்ததோ அவஸேஸே து²ல்லச்சயக்கெ²த்தே ஸப்³ப³த்த² ஏகதோஅவஸ்ஸவே ஸதி து³க்கடங் ஹோதீதி அத்தோ². காயபடிப³த்³தே⁴ன காயபடிப³த்³தா⁴மஸனாதீ³ஸு ஸப்³ப³த்த² உப⁴தோஅவஸ்ஸவே வா ஏகதோஅவஸ்ஸவே வா து³க்கடமேவ ஹோதி.
1975.Ekatovassave cāpīti bhikkhuniyā vasena ekatoavassave cāpi. Thullaccayamudīritanti pārājikakkhettabhūtena attano kāyena manussapurisassa kāyaṃ phusantiyā thullaccayaṃ aṭṭhakathāyaṃ (pāci. aṭṭha. 662) vuttanti attho. Avasese ca sabbatthāti yathāvuttapārājikakkhettato avasese thullaccayakkhette sabbattha ekatoavassave sati dukkaṭaṃ hotīti attho. Kāyapaṭibaddhena kāyapaṭibaddhāmasanādīsu sabbattha ubhatoavassave vā ekatoavassave vā dukkaṭameva hoti.
1976. ‘‘உப்³ப⁴க்க²கமதோ⁴ஜாணுமண்ட³ல’’ந்தி யங் அபாராஜிகக்கெ²த்தங் இத⁴ த³ஸ்ஸிதங், எத்த² ஏகதோஅவஸ்ஸவே து³க்கடங் ஹோதி. கப்பரஸ்ஸ ச ஹெட்டா²பி எத்தே²வ அதோ⁴ஜாணுமண்ட³லே ஸங்க³ஹங் க³தந்தி யோஜனா.
1976.‘‘Ubbhakkhakamadhojāṇumaṇḍala’’nti yaṃ apārājikakkhettaṃ idha dassitaṃ, ettha ekatoavassave dukkaṭaṃ hoti. Kapparassa ca heṭṭhāpi ettheva adhojāṇumaṇḍale saṅgahaṃ gatanti yojanā.
1977-9. பி⁴க்கு² பி⁴க்கு²னியா ஸத்³தி⁴ங் ஸசே காயஸங்ஸக்³க³ங் கேலாயதி ஸேவதீதி யோஜனா. பி⁴க்கு²னியா நாஸோ ஸியாதி ஸீலவினாஸோ பாராஜிகாபத்தி ஸியாதி அத்தோ². கே³ஹபேமந்தி எத்த² ‘‘கே³ஹஸிதபேம’’ந்தி வத்தப்³பே³ கா³தா²ப³ந்த⁴வஸேன ஸித-ஸத்³த³லோபோ, அத்தோ² பனஸ்ஸ பி⁴க்கு²விப⁴ங்கே³ வுத்தனயோவ.
1977-9. Bhikkhu bhikkhuniyā saddhiṃ sace kāyasaṃsaggaṃ kelāyati sevatīti yojanā. Bhikkhuniyā nāso siyāti sīlavināso pārājikāpatti siyāti attho. Gehapemanti ettha ‘‘gehasitapema’’nti vattabbe gāthābandhavasena sita-saddalopo, attho panassa bhikkhuvibhaṅge vuttanayova.
1980. அவிஸேஸேனாதி ‘‘பி⁴க்கு²னியா’’தி வா ‘‘பி⁴க்கு²ஸ்ஸா’’தி வா விஸேஸங் அகத்வா.
1980.Avisesenāti ‘‘bhikkhuniyā’’ti vā ‘‘bhikkhussā’’ti vā visesaṃ akatvā.
1981. யஸ்ஸாதி பி⁴க்கு²ஸ்ஸ வா பி⁴க்கு²னியா வா. யத்தா²தி பி⁴க்கு²னியங் வா பி⁴க்கு²ஸ்மிங் வா. மனோஸுத்³த⁴ந்தி காயஸங்ஸக்³கா³தி³ராக³ரஹிதங். தஸ்ஸ பி⁴க்கு²ஸ்ஸ வா பி⁴க்கு²னியா வா தத்த² பி⁴க்கு²னியங் வா பி⁴க்கு²ஸ்மிங் வா விஸயே நதோ³ஸதா அனாபத்தீதி அத்தோ².
1981.Yassāti bhikkhussa vā bhikkhuniyā vā. Yatthāti bhikkhuniyaṃ vā bhikkhusmiṃ vā. Manosuddhanti kāyasaṃsaggādirāgarahitaṃ. Tassa bhikkhussa vā bhikkhuniyā vā tattha bhikkhuniyaṃ vā bhikkhusmiṃ vā visaye nadosatā anāpattīti attho.
1982. பி⁴ந்தி³த்வாதி ஸீலபே⁴த³ங் கத்வா. பி⁴க்கு²னியா அபகதத்தா ஆஹ ‘‘நேவ ஹோதி பி⁴க்கு²னிதூ³ஸகோ’’தி.
1982.Bhinditvāti sīlabhedaṃ katvā. Bhikkhuniyā apakatattā āha ‘‘neva hoti bhikkhunidūsako’’ti.
1983. அதா²தி வாக்யாரம்பே⁴. ந ஹோதாபத்தி பி⁴க்கு²னோதி எத்த² பி⁴க்கு²னீஹி காயஸங்ஸக்³க³ஸங்கா⁴தி³ஸேஸமாஹ.
1983.Athāti vākyārambhe. Na hotāpatti bhikkhunoti ettha bhikkhunīhi kāyasaṃsaggasaṅghādisesamāha.
1984. ‘‘கெ²த்தே’’தி வக்க²மானங் ‘‘பு²ட்டா²’’தி இமினா யோஜெத்வா ‘‘பாராஜிக’’ந்திஆதீ³ஹி, ‘‘து²ல்லச்சயங் கெ²த்தே’’திஆதீ³ஹி ச ஸம்ப³ந்தி⁴தப்³ப³ங். ‘‘பாராஜிக’’ந்தி வக்க²மானத்தா பு²ட்டா²தி எத்த² ‘‘பாராஜிகக்கெ²த்தே’’தி ஸேஸோ.
1984. ‘‘Khette’’ti vakkhamānaṃ ‘‘phuṭṭhā’’ti iminā yojetvā ‘‘pārājika’’ntiādīhi, ‘‘thullaccayaṃ khette’’tiādīhi ca sambandhitabbaṃ. ‘‘Pārājika’’nti vakkhamānattā phuṭṭhāti ettha ‘‘pārājikakkhette’’ti seso.
1985. ததா²தி நிச்சலாபி ஸாதி³யதி. கெ²த்தேதி து²ல்லச்சயாதீ³னங் கெ²த்தே. காயேன நிச்சலாயபி சித்தேன ஸாதி³யந்தியா ஆபத்தி கஸ்மா வுத்தாதி ஆஹ ‘‘வுத்தத்தா…பே॰… ஸத்து²னா’’தி , பி⁴க்கு²பாதிமொக்கே² விய ‘‘காயஸங்ஸக்³க³ங் ஸமாபஜ்ஜெய்யா’’தி அவத்வா இத⁴ ‘‘காயஸங்ஸக்³க³ங் ஸாதி³யெய்யா’’தி வுத்தத்தாதி அதி⁴ப்பாயோ.
1985.Tathāti niccalāpi sādiyati. Khetteti thullaccayādīnaṃ khette. Kāyena niccalāyapi cittena sādiyantiyā āpatti kasmā vuttāti āha ‘‘vuttattā…pe… satthunā’’ti , bhikkhupātimokkhe viya ‘‘kāyasaṃsaggaṃ samāpajjeyyā’’ti avatvā idha ‘‘kāyasaṃsaggaṃ sādiyeyyā’’ti vuttattāti adhippāyo.
1986. தஸ்ஸா ஆபத்தியா. க்ரியஸமுட்டா²னந்தி கிரியாய ஸமுட்டா²னங். ஏவங் ஸதீதி ஸாதி³யனமத்தேனேவ ஆபஜ்ஜிதப்³ப³பா⁴வே ஸதி. இத³ந்தி ‘‘கிரியஸமுட்டா²ன’’மிதிவிதா⁴னங். தப்³ப³ஹுலேனேவ நயேனாதி கிரியஸமுட்டா²னபா³ஹுல்லேன நயேன க²தி³ரவனாதி³வோஹாரோ வியாதி த³ட்ட²ப்³ப³ங்.
1986.Tassā āpattiyā. Kriyasamuṭṭhānanti kiriyāya samuṭṭhānaṃ. Evaṃ satīti sādiyanamatteneva āpajjitabbabhāve sati. Idanti ‘‘kiriyasamuṭṭhāna’’mitividhānaṃ. Tabbahuleneva nayenāti kiriyasamuṭṭhānabāhullena nayena khadiravanādivohāro viyāti daṭṭhabbaṃ.
1987. தஸ்ஸா பி⁴க்கு²னியா அஸஞ்சிச்ச விரஜ்ஜி²த்வா ஆமஸந்தியா அனாபத்தி, ‘‘அயங் புரிஸோ’’தி வா ‘‘இத்தீ²’’தி வா அஜானித்வா ஆமஸந்தியா அனாபத்தி, புரிஸஸ்ஸ ஆமஸனே ஸதி ப²ஸ்ஸங் அஸாதி³யந்தியா வா அனாபத்தீதி யோஜனா.
1987.Tassā bhikkhuniyā asañcicca virajjhitvā āmasantiyā anāpatti, ‘‘ayaṃ puriso’’ti vā ‘‘itthī’’ti vā ajānitvā āmasantiyā anāpatti, purisassa āmasane sati phassaṃ asādiyantiyā vā anāpattīti yojanā.
1988. கி²த்தசித்தாயாதி யக்கு²ம்மத்தாய. உம்மத்திகாய வாதி பித்தகோபேன உம்மாத³ப்பத்தாய. இத³ஞ்ச ‘‘அஸுசீ’’தி வா ‘‘சந்த³ன’’ந்தி வா விஸேஸதங் அஜானநமேவ பமாணங்.
1988.Khittacittāyāti yakkhummattāya. Ummattikāya vāti pittakopena ummādappattāya. Idañca ‘‘asucī’’ti vā ‘‘candana’’nti vā visesataṃ ajānanameva pamāṇaṃ.
உப்³ப⁴ஜாணுமண்ட³லகதா²வண்ணனா.
Ubbhajāṇumaṇḍalakathāvaṇṇanā.
1989-90. ‘‘பாராஜிகத்தங் ஜானந்தீ’’தி இமினா அவஸேஸாபத்திங் ஜானித்வா சா²தெ³ந்தியா பாராஜிகாபா⁴வங் தீ³பேதி. ஸலிங்கே³ து டி²தாயாதி பப்³ப³ஜ்ஜாலிங்கே³யேவ டி²தாய. இதி து⁴ரே நிக்கி²த்தமத்தஸ்மிந்தி யோஜனா. இதி-ஸத்³தோ³ நித³ஸ்ஸனே. இதராய புப்³பே³யேவ ஆபன்னத்தா தமபெக்கி²த்வா ‘‘ஸா சா’’தி ஆஹ.
1989-90.‘‘Pārājikattaṃ jānantī’’ti iminā avasesāpattiṃ jānitvā chādentiyā pārājikābhāvaṃ dīpeti. Saliṅge tu ṭhitāyāti pabbajjāliṅgeyeva ṭhitāya. Iti dhure nikkhittamattasminti yojanā. Iti-saddo nidassane. Itarāya pubbeyeva āpannattā tamapekkhitvā ‘‘sā cā’’ti āha.
1991. வுத்தாவிஸிட்ட²ங் ஸப்³ப³ங் வினிச்ச²யங் ஸங்க³ஹேதுமாஹ ‘‘ஸேஸ’’ந்திஆதி³. தத்தா²தி து³ட்டு²ல்லபடிச்சா²த³னே.
1991. Vuttāvisiṭṭhaṃ sabbaṃ vinicchayaṃ saṅgahetumāha ‘‘sesa’’ntiādi. Tatthāti duṭṭhullapaṭicchādane.
வஜ்ஜபடிச்சா²தி³கதா²வண்ணனா.
Vajjapaṭicchādikathāvaṇṇanā.
1992-5. ஸங்கே⁴னாதி ஸமக்³கே³ன ஸங்கே⁴ன. உக்கி²த்தகோதி ஆபத்தியா அத³ஸ்ஸனாதீ³ஸு உக்கி²த்தகோ. ‘‘உக்கே²பனே டி²தோ’’தி இமினா உக்கே²பனீயகம்மகதஸ்ஸ அனோஸாரிதபா⁴வங் தீ³பேதி. யா தி³ட்டி² ஏதஸ்ஸாதி யங்தி³ட்டி²கோ, ஸோ உக்கி²த்தகோ பி⁴க்கு² யாய தி³ட்டி²யா ஸமன்னாக³தோ ஹோதீதி அதி⁴ப்பாயோ . ‘‘தஸ்ஸா தி³ட்டி²யா க³ஹணேனா’’தி இமினா அனுவத்தப்பகாரோ த³ஸ்ஸிதோ. தங் உக்கி²த்தகங் பி⁴க்கு²ந்தி யோஜனா. ஸா பி⁴க்கு²னீ அஞ்ஞாஹி பி⁴க்கு²னீஹி விஸும்பிச ஸங்க⁴மஜ்ஜே²பி ‘‘ஏஸோ கோ² அய்யே பி⁴க்கு² ஸமக்³கே³ன ஸங்கே⁴ன உக்கி²த்தோ’’திஆதி³னா (பாசி॰ 669) நயேன திக்க²த்துங் வுச்சமானாதி யோஜனா. தங் வத்து²ங் அசஜந்தீ க³ஹெத்வா யதி³ ததே²வ திட்ட²தீதி யோஜனா. எத்த² ‘‘யாவததியங் ஸமனுபா⁴ஸிதப்³பா³’’தி ஸேஸோ. தஸ்ஸ கம்மஸ்ஸ ஓஸானேதி ததியாய கம்மவாசாய ய்யகாரப்பத்தவஸேன அஸ்ஸ ஸமனுபா⁴ஸனகம்மஸ்ஸ பரியோஸானே. அஸாகியதீ⁴தராதி அஸாகியதீ⁴தா, பச்சத்தே கரணவசனங். ‘‘புன அப்படிஸந்தே⁴யா’’தி இமினா புன தேனேவ ச அத்தபா⁴வேன பி⁴க்கு²னிபா⁴வே படிஸந்தா⁴துங் அனரஹதா வுத்தா.
1992-5.Saṅghenāti samaggena saṅghena. Ukkhittakoti āpattiyā adassanādīsu ukkhittako. ‘‘Ukkhepane ṭhito’’ti iminā ukkhepanīyakammakatassa anosāritabhāvaṃ dīpeti. Yā diṭṭhi etassāti yaṃdiṭṭhiko, so ukkhittako bhikkhu yāya diṭṭhiyā samannāgato hotīti adhippāyo . ‘‘Tassā diṭṭhiyā gahaṇenā’’ti iminā anuvattappakāro dassito. Taṃ ukkhittakaṃ bhikkhunti yojanā. Sā bhikkhunī aññāhi bhikkhunīhi visumpica saṅghamajjhepi ‘‘eso kho ayye bhikkhu samaggena saṅghena ukkhitto’’tiādinā (pāci. 669) nayena tikkhattuṃ vuccamānāti yojanā. Taṃ vatthuṃ acajantī gahetvā yadi tatheva tiṭṭhatīti yojanā. Ettha ‘‘yāvatatiyaṃ samanubhāsitabbā’’ti seso. Tassa kammassa osāneti tatiyāya kammavācāya yyakārappattavasena assa samanubhāsanakammassa pariyosāne. Asākiyadhītarāti asākiyadhītā, paccatte karaṇavacanaṃ. ‘‘Puna appaṭisandheyā’’ti iminā puna teneva ca attabhāvena bhikkhunibhāve paṭisandhātuṃ anarahatā vuttā.
1996. திகது³க்கடங் நித்³தி³ட்ட²ந்தி அத⁴ம்மகம்மே அத⁴ம்மகம்மஸஞ்ஞா, வேமதிகா, த⁴ம்மகம்மஸஞ்ஞாதி ஏதாஸங் வஸேன திகது³க்கடங் வுத்தங். ஸமனுபா⁴ஸனே வுத்தா ஸமுட்டா²னாத³யோ ஸப்³பே³ இத⁴ வத்தப்³பா³தி யோஜனா.
1996.Tikadukkaṭaṃ niddiṭṭhanti adhammakamme adhammakammasaññā, vematikā, dhammakammasaññāti etāsaṃ vasena tikadukkaṭaṃ vuttaṃ. Samanubhāsane vuttā samuṭṭhānādayo sabbe idha vattabbāti yojanā.
உக்கி²த்தானுவத்திககதா²வண்ணனா.
Ukkhittānuvattikakathāvaṇṇanā.
1997. ‘‘ஹத்த²க்³க³ஹணங் வா ஸாதி³யெய்யாதி ஹத்தோ² நாம கப்பரங் உபாதா³ய யாவ அக்³க³னகா². ஏதஸ்ஸ அஸத்³த⁴ம்மஸ்ஸ படிஸேவனத்தா²ய உப்³ப⁴க்க²கங் அதோ⁴ஜாணுமண்ட³லங் க³ஹணங் ஸாதி³யதி, ஆபத்தி து²ல்லச்சயஸ்ஸா’’தி (பாசி॰ 676) வுத்தத்தா ஆஹ ‘‘அபாராஜிககெ²த்தஸ்ஸா’’திஆதி³. ‘‘த’’ந்தி வக்க²மானத்தா ‘‘ய’’ந்தி லப்³ப⁴தி. அபாராஜிகக்கெ²த்தஸ்ஸ யஸ்ஸ கஸ்ஸசி அங்க³ஸ்ஸ யங் க³ஹணங், தங் ஹத்த²க்³க³ஹணந்தி பவுச்சதீதி யோஜனா. ஹத்தே² க³ஹணங் ஹத்த²க்³க³ஹணங்.
1997. ‘‘Hatthaggahaṇaṃ vā sādiyeyyāti hattho nāma kapparaṃ upādāya yāva agganakhā. Etassa asaddhammassa paṭisevanatthāya ubbhakkhakaṃ adhojāṇumaṇḍalaṃ gahaṇaṃ sādiyati, āpatti thullaccayassā’’ti (pāci. 676) vuttattā āha ‘‘apārājikakhettassā’’tiādi. ‘‘Ta’’nti vakkhamānattā ‘‘ya’’nti labbhati. Apārājikakkhettassa yassa kassaci aṅgassa yaṃ gahaṇaṃ, taṃ hatthaggahaṇanti pavuccatīti yojanā. Hatthe gahaṇaṃ hatthaggahaṇaṃ.
1998. யஸ்ஸ கஸ்ஸசீதி வுத்தப்பகாரேன யஸ்ஸ கஸ்ஸசி சீவரஸ்ஸ யங் க³ஹணந்தி யோஜனா.
1998.Yassa kassacīti vuttappakārena yassa kassaci cīvarassa yaṃ gahaṇanti yojanā.
1999. அஸத்³த⁴ம்ம-ஸத்³தே³ன மேது²னஸ்ஸாபி வுச்சமானத்தா ததோ விஸேஸேதுமாஹ ‘‘காயஸங்ஸக்³க³ …பே॰… காரணா’’தி. பி⁴க்கு²னீ காயஸங்ஸக்³க³ஸங்கா²தஸ்ஸ அஸத்³த⁴ம்மஸ்ஸ காரணா புரிஸஸ்ஸ ஹத்த²பாஸஸ்மிங் திட்டெ²ய்ய வாதி யோஜனா.
1999. Asaddhamma-saddena methunassāpi vuccamānattā tato visesetumāha ‘‘kāyasaṃsagga…pe… kāraṇā’’ti. Bhikkhunī kāyasaṃsaggasaṅkhātassa asaddhammassa kāraṇā purisassa hatthapāsasmiṃ tiṭṭheyya vāti yojanā.
2000. ததோதி தஸ்ஸ அஸத்³த⁴ம்மஸ்ஸ காரணா. தத்தா²தி ஹத்த²பாஸே. புரிஸேனாதி எத்த² ‘‘கத’’ந்தி ஸேஸோ, ‘‘ஸங்கேத’’ந்தி இமினா ஸம்ப³ந்தோ⁴. ‘‘ஆக³மனங் அஸ்ஸா’’தி பத³ச்சே²தோ³. இச்செ²ய்யாதி வுத்தேபி ந க³மனிச்சா²மத்தேன, அத² கோ² பி⁴க்கு²னியா புரிஸஸ்ஸ ஹத்த²பாஸங், புரிஸேன ச பி⁴க்கு²னியா ஹத்த²பாஸங் ஓக்கந்தகாலேயேவ வத்து²பூரணங் த³ட்ட²ப்³ப³ங். யதா²ஹ ‘‘ஸங்கேதங் வா க³ச்செ²ய்யாதி ஏதஸ்ஸ அஸத்³த⁴ம்மஸ்ஸ படிஸேவனத்தா²ய புரிஸேன ‘இத்த²ன்னாமங் ஆக³ச்சா²’தி வுத்தா க³ச்ச²தி, பதே³ பதே³ ஆபத்தி து³க்கடஸ்ஸ. புரிஸஸ்ஸ ஹத்த²பாஸங் ஓக்கந்தமத்தே ஆபத்தி து²ல்லச்சயஸ்ஸா’’தி (பாசி॰ 676) ச ‘‘புரிஸஸ்ஸ அப்³பா⁴க³மனங் ஸாதி³யதி, ஆபத்தி து³க்கடஸ்ஸ. ஹத்த²பாஸங் ஓக்கந்தமத்தே ஆபத்தி து²ல்லச்சயஸ்ஸா’’தி (பாசி॰ 676) ச. எத்த² ச இத்த²ன்னாமங் ஆக³ச்சா²தி இத்த²ன்னாமங் டா²னங் ஆக³ச்சா²தி அத்தோ².
2000.Tatoti tassa asaddhammassa kāraṇā. Tatthāti hatthapāse. Purisenāti ettha ‘‘kata’’nti seso, ‘‘saṅketa’’nti iminā sambandho. ‘‘Āgamanaṃ assā’’ti padacchedo. Iccheyyāti vuttepi na gamanicchāmattena, atha kho bhikkhuniyā purisassa hatthapāsaṃ, purisena ca bhikkhuniyā hatthapāsaṃ okkantakāleyeva vatthupūraṇaṃ daṭṭhabbaṃ. Yathāha ‘‘saṅketaṃ vā gaccheyyāti etassa asaddhammassa paṭisevanatthāya purisena ‘itthannāmaṃ āgacchā’ti vuttā gacchati, pade pade āpatti dukkaṭassa. Purisassa hatthapāsaṃ okkantamatte āpatti thullaccayassā’’ti (pāci. 676) ca ‘‘purisassa abbhāgamanaṃ sādiyati, āpatti dukkaṭassa. Hatthapāsaṃ okkantamatte āpatti thullaccayassā’’ti (pāci. 676) ca. Ettha ca itthannāmaṃ āgacchāti itthannāmaṃ ṭhānaṃ āgacchāti attho.
2001. தத³த்தா²யாதி தஸ்ஸேவ காயஸங்ஸக்³க³ஸங்கா²தஅஸத்³த⁴ம்மஸ்ஸ ஸேவனத்தா²ய. படிச்ச²ன்னட்டா²னஞ்சாதி வத்தா²தி³னா யேன கேனசி படிச்ச²ன்னஓகாஸங். புரிஸஸ்ஸ ஹத்த²பாஸே டி²தா தத³த்தா²ய காயங் உபஸங்ஹரெய்ய வாதி யோஜனா.
2001.Tadatthāyāti tasseva kāyasaṃsaggasaṅkhātaasaddhammassa sevanatthāya. Paṭicchannaṭṭhānañcāti vatthādinā yena kenaci paṭicchannaokāsaṃ. Purisassa hatthapāse ṭhitā tadatthāya kāyaṃ upasaṃhareyya vāti yojanā.
2002. ஹத்த²க்³க³ஹணாதீ³னங் வுத்தப்பகாரானங் அட்ட²ன்னங் வத்தூ²னங் பூரணேன ‘‘அட்ட²வத்து²கா’’தி ஸங்கா²தா அயங் பி⁴க்கு²னீ வினட்டா² ஹோதி ஸீலவினாஸேன, ததோயேவ அஸ்ஸமணீ ஹோதி அபி⁴க்கு²னீ ஹோதீதி யோஜனா.
2002. Hatthaggahaṇādīnaṃ vuttappakārānaṃ aṭṭhannaṃ vatthūnaṃ pūraṇena ‘‘aṭṭhavatthukā’’ti saṅkhātā ayaṃ bhikkhunī vinaṭṭhā hoti sīlavināsena, tatoyeva assamaṇī hoti abhikkhunī hotīti yojanā.
2003. அனுலோமேன வாதி ஹத்த²க்³க³ஹணாதி³படிபாடியா வா. படிலோமேன வாதி தப்³பி³பரியதோ படிலோமேன வா. ஏகந்தரிகாய வாதி ஏகமேகங் அந்தரித்வா புன தஸ்ஸாபி கரணவஸேன ஏகந்தரிகாய வா. அனுலோமேன வா படிலோமேன வா ததே²கந்தரிகாய வா அட்ட²மங் வத்து²ங் பரிபூரெந்தீ சுதாதி யோஜனா.
2003.Anulomenavāti hatthaggahaṇādipaṭipāṭiyā vā. Paṭilomena vāti tabbipariyato paṭilomena vā. Ekantarikāya vāti ekamekaṃ antaritvā puna tassāpi karaṇavasena ekantarikāya vā. Anulomena vā paṭilomena vā tathekantarikāya vā aṭṭhamaṃ vatthuṃ paripūrentī cutāti yojanā.
2004. ஏததே³வ அத்த²ங் ப்³யதிரேகமுகே²ன ஸமத்தே²துமாஹ ‘‘அதா²தி³தோ’’திஆதி³. ஸதக்க²த்தும்பீதி ப³ஹுக்க²த்தும்பி. ஸத-ஸத்³தோ³ ஹெத்த² ப³ஹு-ஸத்³த³பரியாயோ. பாராஜிகா நேவ ஸியாதி யோஜனா, இமினா தங்தங்வத்து²மூலகங் து³க்கடது²ல்லச்சயங் ஆபஜ்ஜதீதி வுத்தங் ஹோதி.
2004. Etadeva atthaṃ byatirekamukhena samatthetumāha ‘‘athādito’’tiādi. Satakkhattumpīti bahukkhattumpi. Sata-saddo hettha bahu-saddapariyāyo. Pārājikā neva siyāti yojanā, iminā taṃtaṃvatthumūlakaṃ dukkaṭathullaccayaṃ āpajjatīti vuttaṃ hoti.
2005. யா பன ஆபத்தியோ ஆபன்னா, தே³ஸெத்வா தாஹி முச்சதீதி யோஜனா. து⁴ரனிக்கே²பனங் கத்வாதி ‘‘ந புனேவங் கரிஸ்ஸாமீ’’தி து⁴ரங் நிக்கி²பித்வா. தே³ஸிதா க³ணனூபிகாதி தே³ஸிதா தே³ஸிதக³ணனமேவ உபேதி, பாராஜிகஸ்ஸ அங்க³ங் ந ஹோதீதி அத்தோ². தஸ்மா யா ஏகங் ஆபன்னா, து⁴ரனிக்கே²பங் கத்வா தே³ஸெத்வா புன கிலேஸவஸேன ஆபஜ்ஜதி, புன தே³ஸேதி, ஏவங் அட்ட² வத்தூ²னி பூரெந்தீபி பாராஜிகா ந ஹோதி.
2005. Yā pana āpattiyo āpannā, desetvā tāhi muccatīti yojanā. Dhuranikkhepanaṃ katvāti ‘‘na punevaṃ karissāmī’’ti dhuraṃ nikkhipitvā. Desitā gaṇanūpikāti desitā desitagaṇanameva upeti, pārājikassa aṅgaṃ na hotīti attho. Tasmā yā ekaṃ āpannā, dhuranikkhepaṃ katvā desetvā puna kilesavasena āpajjati, puna deseti, evaṃ aṭṭha vatthūni pūrentīpi pārājikā na hoti.
2006. ஸஉஸ்ஸாஹாய தே³ஸிதாதி புன ஆபஜ்ஜனே அனிக்கி²த்தது⁴ராய பி⁴க்கு²னியா தே³ஸிதாபி ஆபத்தி தே³ஸனாக³ணனங் ந உபேதி. கிங் ஹோதீதி ஆஹ ‘‘தே³ஸிதாபி அதே³ஸிதா’’தி, தஸ்மா பாராஜிகாபத்தியா அங்க³மேவ ஹோதீதி அதி⁴ப்பாயோ.
2006.Saussāhāya desitāti puna āpajjane anikkhittadhurāya bhikkhuniyā desitāpi āpatti desanāgaṇanaṃ na upeti. Kiṃ hotīti āha ‘‘desitāpi adesitā’’ti, tasmā pārājikāpattiyā aṅgameva hotīti adhippāyo.
2008. அயங் அத்தோ²தி ‘‘அஸத்³த⁴ம்மோ நாம காயஸங்ஸக்³கோ³’’தி அயங் அத்தோ². உத்³தி³ஸிதோதி பகாஸிதோ.
2008.Ayaṃ atthoti ‘‘asaddhammo nāma kāyasaṃsaggo’’ti ayaṃ attho. Uddisitoti pakāsito.
2009. அயமத்தோ² கேன வசனேன உத்³தி³ஸிதோதி ஆஹ ‘‘விஞ்ஞூ…பே॰… ஸாத⁴கங் வசனங் இத³’’ந்தி. இத³ங் வசனந்தி ‘‘விஞ்ஞூ படிப³லோ காயஸங்ஸக்³க³ங் ஸமாபஜ்ஜிது’’ந்தி (பாசி॰ 676) இத³ங் வசனங். ஸாத⁴கங் பமாணங்.
2009. Ayamattho kena vacanena uddisitoti āha ‘‘viññū…pe… sādhakaṃ vacanaṃ ida’’nti. Idaṃ vacananti ‘‘viññū paṭibalo kāyasaṃsaggaṃ samāpajjitu’’nti (pāci. 676) idaṃ vacanaṃ. Sādhakaṃ pamāṇaṃ.
அட்ட²வத்து²ககதா²வண்ணனா.
Aṭṭhavatthukakathāvaṇṇanā.
2010. அவஸ்ஸுதா, வஜ்ஜபடிச்சா²தி³கா, உக்கி²த்தானுவத்திகா, அட்ட²வத்து²காதி இமா சதஸ்ஸோ பாராஜிகாபத்தியோ மஹேஸினா அஸாதா⁴ரணா பி⁴க்கு²னீனமேவ பஞ்ஞத்தாதி யோஜனா.
2010. Avassutā, vajjapaṭicchādikā, ukkhittānuvattikā, aṭṭhavatthukāti imā catasso pārājikāpattiyo mahesinā asādhāraṇā bhikkhunīnameva paññattāti yojanā.
இதி வினயத்த²ஸாரஸந்தீ³பனியா
Iti vinayatthasārasandīpaniyā
வினயவினிச்ச²யவண்ணனாய
Vinayavinicchayavaṇṇanāya
பாராஜிககதா²வண்ணனா நிட்டி²தா.
Pārājikakathāvaṇṇanā niṭṭhitā.
