| Library / Tipiṭaka / તિપિટક • Tipiṭaka / વિનયવિનિચ્છય-ટીકા • Vinayavinicchaya-ṭīkā |
ભિક્ખુનિવિભઙ્ગો
Bhikkhunivibhaṅgo
૧૯૬૪. એવં ભિક્ખુવિભઙ્ગપાળિયા, અટ્ઠકથાય ચ આગતં વિનિચ્છયસારં નાતિસઙ્ખેપવિત્થારનયેન દસ્સેત્વા ઇદાનિ તદનન્તરાય ભિક્ખુનિવિભઙ્ગપાળિયા, તદટ્ઠકથાય ચ આગતવિનિચ્છયસારં દસ્સેતુમારભન્તો આહ ‘‘ભિક્ખુનીન’’ન્તિઆદિ. તસ્મિં અપીતિ એત્થ અપિ-સદ્દો વુત્તાપેક્ખાયં. ‘‘સમાસેના’’તિ ઇદં ગન્થવસેન સઙ્ખિપનં સન્ધાય વુત્તં. ‘‘કિઞ્ચિમત્ત’’ન્તિ ઇદં અત્થવસેનાતિ વેદિતબ્બં.
1964. Evaṃ bhikkhuvibhaṅgapāḷiyā, aṭṭhakathāya ca āgataṃ vinicchayasāraṃ nātisaṅkhepavitthāranayena dassetvā idāni tadanantarāya bhikkhunivibhaṅgapāḷiyā, tadaṭṭhakathāya ca āgatavinicchayasāraṃ dassetumārabhanto āha ‘‘bhikkhunīna’’ntiādi. Tasmiṃ apīti ettha api-saddo vuttāpekkhāyaṃ. ‘‘Samāsenā’’ti idaṃ ganthavasena saṅkhipanaṃ sandhāya vuttaṃ. ‘‘Kiñcimatta’’nti idaṃ atthavasenāti veditabbaṃ.
પારાજિકકથાવણ્ણના
Pārājikakathāvaṇṇanā
૧૯૬૫. છન્દસોતિ મેથુનસેવનરાગપટિસંયુત્તેન છન્દેન. એતેન ‘‘છન્દે પન અસતિ બલક્કારેન પધંસિતાય અનાપત્તી’’તિ (કઙ્ખા॰ અટ્ઠ॰ મેથુનધમ્મસિક્ખાપદવણ્ણના) અટ્ઠકથા સૂચિતા હોતિ. સા સમણી પારાજિકા નામ હોતીતિ પવુચ્ચતીતિ યોજના.
1965.Chandasoti methunasevanarāgapaṭisaṃyuttena chandena. Etena ‘‘chande pana asati balakkārena padhaṃsitāya anāpattī’’ti (kaṅkhā. aṭṭha. methunadhammasikkhāpadavaṇṇanā) aṭṭhakathā sūcitā hoti. Sā samaṇī pārājikā nāma hotīti pavuccatīti yojanā.
૧૯૬૬-૭. ‘‘સજીવસ્સ અપિ અજીવસ્સા’’તિ પદચ્છેદો. ‘‘સન્થતં વા અસન્થત’’ન્તિ ઇદં ‘‘અઙ્ગજાત’’ન્તિ ઇમસ્સ વિસેસનં. અત્તનો તિવિધે મગ્ગેતિ અત્તનો વચ્ચપસ્સાવમુખમગ્ગાનં અઞ્ઞતરસ્મિં મગ્ગે. એત્થ ‘‘સન્થતે વા અસન્થતે વા’’તિ સેસો, ‘‘અલ્લોકાસે’’તિ ઇમિના સમ્બન્ધો. ‘‘યેભુય્યઅક્ખાયિતાદિક’’ન્તિ પદચ્છેદો. આદિ-સદ્દેન અક્ખાયિતં સઙ્ગણ્હાતિ.
1966-7. ‘‘Sajīvassa api ajīvassā’’ti padacchedo. ‘‘Santhataṃ vā asanthata’’nti idaṃ ‘‘aṅgajāta’’nti imassa visesanaṃ. Attano tividhe maggeti attano vaccapassāvamukhamaggānaṃ aññatarasmiṃ magge. Ettha ‘‘santhate vā asanthate vā’’ti seso, ‘‘allokāse’’ti iminā sambandho. ‘‘Yebhuyyaakkhāyitādika’’nti padacchedo. Ādi-saddena akkhāyitaṃ saṅgaṇhāti.
મનુસ્સપુરિસાદીનં નવન્નં સજીવસ્સપિ અજીવસ્સપિ યસ્સ કસ્સચિ સન્થતં વા અસન્થતં વા યેભુય્યક્ખાયિતાદિકં અઙ્ગજાતં અત્તનો સન્થતે વા અસન્થતે વા તિવિધે મગ્ગે અલ્લોકાસે તિલફલમત્તમ્પિ પવેસેન્તી પરાજિતાતિ યોજના.
Manussapurisādīnaṃ navannaṃ sajīvassapi ajīvassapi yassa kassaci santhataṃ vā asanthataṃ vā yebhuyyakkhāyitādikaṃ aṅgajātaṃ attano santhate vā asanthate vā tividhe magge allokāse tilaphalamattampi pavesentī parājitāti yojanā.
૧૯૬૮. સાધારણવિનિચ્છયન્તિ ભિક્ખુભિક્ખુનીનં સાધારણસિક્ખાપદવિનિચ્છયં.
1968.Sādhāraṇavinicchayanti bhikkhubhikkhunīnaṃ sādhāraṇasikkhāpadavinicchayaṃ.
૧૯૬૯-૭૦. અધક્ખકન્તિ એત્થ અક્ખકાનં અધોતિ વિગ્ગહો. ઉબ્ભજાણુમણ્ડલન્તિ જાણુમણ્ડલાનં ઉબ્ભન્તિ વિગ્ગહો. ઉબ્ભ-સદ્દો ઉદ્ધં-સદ્દપરિયાયો. ઇધ ‘‘અત્તનો’’તિ સેસો. અવસ્સુતસ્સાતિ કાયસંસગ્ગરાગેન તિન્તસ્સ. અવસ્સુતાતિ એત્થાપિ એસેવ નયો. યાતિ વુત્તત્તા ‘‘સા’’તિ લબ્ભતિ. સરીરન્તિ એત્થ ‘‘યં કિઞ્ચી’’તિ સેસો. પરોપક્કમમૂલકં પારાજિકં દસ્સેતુમાહ ‘‘તેન વા ફુટ્ઠા’’તિ. એત્થ ‘‘યથાપરિચ્છિન્ને કાયે’’તિ ચ ‘‘સાદિયેય્યા’’તિ ચ વત્તબ્બં.
1969-70.Adhakkhakanti ettha akkhakānaṃ adhoti viggaho. Ubbhajāṇumaṇḍalanti jāṇumaṇḍalānaṃ ubbhanti viggaho. Ubbha-saddo uddhaṃ-saddapariyāyo. Idha ‘‘attano’’ti seso. Avassutassāti kāyasaṃsaggarāgena tintassa. Avassutāti etthāpi eseva nayo. Yāti vuttattā ‘‘sā’’ti labbhati. Sarīranti ettha ‘‘yaṃ kiñcī’’ti seso. Paropakkamamūlakaṃ pārājikaṃ dassetumāha ‘‘tena vā phuṭṭhā’’ti. Ettha ‘‘yathāparicchinne kāye’’ti ca ‘‘sādiyeyyā’’ti ca vattabbaṃ.
યા પન ભિક્ખુની અવસ્સુતા અવસ્સુતસ્સ મનુસ્સપુગ્ગલસ્સ યં કિઞ્ચિ સરીરં અત્તનો અધક્ખકં ઉબ્ભજાણુમણ્ડલં યં સરીરકં, તેન સરીરકેન છુપેય્ય, તેન મનુસ્સપુરિસેન યથાપરિચ્છિન્ને કાયે ફુટ્ઠા સાદિયેય્ય વા, સા પારાજિકા સિયાતિ યોજના.
Yā pana bhikkhunī avassutā avassutassa manussapuggalassa yaṃ kiñci sarīraṃ attano adhakkhakaṃ ubbhajāṇumaṇḍalaṃ yaṃ sarīrakaṃ, tena sarīrakena chupeyya, tena manussapurisena yathāparicchinne kāye phuṭṭhā sādiyeyya vā, sā pārājikā siyāti yojanā.
૧૯૭૧-૨. ‘‘ગહિતં ઉબ્ભજાણુના’’તિ ઇમિના કપ્પરતો ઉદ્ધં પારાજિકક્ખેત્તમેવાતિ દીપેતિ. અત્તનો યથાવુત્તપ્પકારેન કાયેનાતિ યોજના, અત્તનો ‘‘અધક્ખક’’ન્તિઆદિવુત્તપ્પકારેન કાયેનાતિ અત્થો. તથા અવસ્સુતાય અવસ્સુતસ્સ પુરિસસ્સ કાયપટિબદ્ધં ફુસન્તિયા થુલ્લચ્ચયં હોતિ. અત્તનો યથાપરિચ્છિન્નકાયપટિબદ્ધેન તથા અવસ્સુતાય અવસ્સુતસ્સ પુરિસસ્સ કાયં ફુસન્તિયા થુલ્લચ્ચયં હોતિ.
1971-2.‘‘Gahitaṃ ubbhajāṇunā’’ti iminā kapparato uddhaṃ pārājikakkhettamevāti dīpeti. Attano yathāvuttappakārena kāyenāti yojanā, attano ‘‘adhakkhaka’’ntiādivuttappakārena kāyenāti attho. Tathā avassutāya avassutassa purisassa kāyapaṭibaddhaṃ phusantiyā thullaccayaṃ hoti. Attano yathāparicchinnakāyapaṭibaddhena tathā avassutāya avassutassa purisassa kāyaṃ phusantiyā thullaccayaṃ hoti.
૧૯૭૩. અત્તનો અવસેસેન કાયેન અવસ્સુતાય અવસ્સુતસ્સ પુરિસપુગ્ગલસ્સ કાયં ફુસન્તિયા થુલ્લચ્ચયં હોતિ. એવં અત્તનો પયોગે ચ પુરિસસ્સ પયોગે ચ તસ્સા ભિક્ખુનિયાયેવ થુલ્લચ્ચયં હોતીતિ યોજના.
1973. Attano avasesena kāyena avassutāya avassutassa purisapuggalassa kāyaṃ phusantiyā thullaccayaṃ hoti. Evaṃ attano payoge ca purisassa payoge ca tassā bhikkhuniyāyeva thullaccayaṃ hotīti yojanā.
૧૯૭૪. યક્ખપેતતિરચ્છાનપણ્ડકાનં કાયં ‘‘અધક્ખકં ઉબ્ભજાણુમણ્ડલ’’ન્તિ યથાપરિચ્છિન્નં તથેવ અત્તનો કાયેન ઉભતોઅવસ્સવે સતિ ફુસન્તિયા અસ્સા ભિક્ખુનિયા થુલ્લચ્ચયં, તથેવ યક્ખાદીનં પયોગેપિ તસ્સાયેવ થુલ્લચ્ચયં હોતીતિ યોજના.
1974. Yakkhapetatiracchānapaṇḍakānaṃ kāyaṃ ‘‘adhakkhakaṃ ubbhajāṇumaṇḍala’’nti yathāparicchinnaṃ tatheva attano kāyena ubhatoavassave sati phusantiyā assā bhikkhuniyā thullaccayaṃ, tatheva yakkhādīnaṃ payogepi tassāyeva thullaccayaṃ hotīti yojanā.
૧૯૭૫. એકતોવસ્સવે ચાપીતિ ભિક્ખુનિયા વસેન એકતોઅવસ્સવે ચાપિ. થુલ્લચ્ચયમુદીરિતન્તિ પારાજિકક્ખેત્તભૂતેન અત્તનો કાયેન મનુસ્સપુરિસસ્સ કાયં ફુસન્તિયા થુલ્લચ્ચયં અટ્ઠકથાયં (પાચિ॰ અટ્ઠ॰ ૬૬૨) વુત્તન્તિ અત્થો. અવસેસે ચ સબ્બત્થાતિ યથાવુત્તપારાજિકક્ખેત્તતો અવસેસે થુલ્લચ્ચયક્ખેત્તે સબ્બત્થ એકતોઅવસ્સવે સતિ દુક્કટં હોતીતિ અત્થો. કાયપટિબદ્ધેન કાયપટિબદ્ધામસનાદીસુ સબ્બત્થ ઉભતોઅવસ્સવે વા એકતોઅવસ્સવે વા દુક્કટમેવ હોતિ.
1975.Ekatovassave cāpīti bhikkhuniyā vasena ekatoavassave cāpi. Thullaccayamudīritanti pārājikakkhettabhūtena attano kāyena manussapurisassa kāyaṃ phusantiyā thullaccayaṃ aṭṭhakathāyaṃ (pāci. aṭṭha. 662) vuttanti attho. Avasese ca sabbatthāti yathāvuttapārājikakkhettato avasese thullaccayakkhette sabbattha ekatoavassave sati dukkaṭaṃ hotīti attho. Kāyapaṭibaddhena kāyapaṭibaddhāmasanādīsu sabbattha ubhatoavassave vā ekatoavassave vā dukkaṭameva hoti.
૧૯૭૬. ‘‘ઉબ્ભક્ખકમધોજાણુમણ્ડલ’’ન્તિ યં અપારાજિકક્ખેત્તં ઇધ દસ્સિતં, એત્થ એકતોઅવસ્સવે દુક્કટં હોતિ. કપ્પરસ્સ ચ હેટ્ઠાપિ એત્થેવ અધોજાણુમણ્ડલે સઙ્ગહં ગતન્તિ યોજના.
1976.‘‘Ubbhakkhakamadhojāṇumaṇḍala’’nti yaṃ apārājikakkhettaṃ idha dassitaṃ, ettha ekatoavassave dukkaṭaṃ hoti. Kapparassa ca heṭṭhāpi ettheva adhojāṇumaṇḍale saṅgahaṃ gatanti yojanā.
૧૯૭૭-૯. ભિક્ખુ ભિક્ખુનિયા સદ્ધિં સચે કાયસંસગ્ગં કેલાયતિ સેવતીતિ યોજના. ભિક્ખુનિયા નાસો સિયાતિ સીલવિનાસો પારાજિકાપત્તિ સિયાતિ અત્થો. ગેહપેમન્તિ એત્થ ‘‘ગેહસિતપેમ’’ન્તિ વત્તબ્બે ગાથાબન્ધવસેન સિત-સદ્દલોપો, અત્થો પનસ્સ ભિક્ખુવિભઙ્ગે વુત્તનયોવ.
1977-9. Bhikkhu bhikkhuniyā saddhiṃ sace kāyasaṃsaggaṃ kelāyati sevatīti yojanā. Bhikkhuniyā nāso siyāti sīlavināso pārājikāpatti siyāti attho. Gehapemanti ettha ‘‘gehasitapema’’nti vattabbe gāthābandhavasena sita-saddalopo, attho panassa bhikkhuvibhaṅge vuttanayova.
૧૯૮૦. અવિસેસેનાતિ ‘‘ભિક્ખુનિયા’’તિ વા ‘‘ભિક્ખુસ્સા’’તિ વા વિસેસં અકત્વા.
1980.Avisesenāti ‘‘bhikkhuniyā’’ti vā ‘‘bhikkhussā’’ti vā visesaṃ akatvā.
૧૯૮૧. યસ્સાતિ ભિક્ખુસ્સ વા ભિક્ખુનિયા વા. યત્થાતિ ભિક્ખુનિયં વા ભિક્ખુસ્મિં વા. મનોસુદ્ધન્તિ કાયસંસગ્ગાદિરાગરહિતં. તસ્સ ભિક્ખુસ્સ વા ભિક્ખુનિયા વા તત્થ ભિક્ખુનિયં વા ભિક્ખુસ્મિં વા વિસયે નદોસતા અનાપત્તીતિ અત્થો.
1981.Yassāti bhikkhussa vā bhikkhuniyā vā. Yatthāti bhikkhuniyaṃ vā bhikkhusmiṃ vā. Manosuddhanti kāyasaṃsaggādirāgarahitaṃ. Tassa bhikkhussa vā bhikkhuniyā vā tattha bhikkhuniyaṃ vā bhikkhusmiṃ vā visaye nadosatā anāpattīti attho.
૧૯૮૨. ભિન્દિત્વાતિ સીલભેદં કત્વા. ભિક્ખુનિયા અપકતત્તા આહ ‘‘નેવ હોતિ ભિક્ખુનિદૂસકો’’તિ.
1982.Bhinditvāti sīlabhedaṃ katvā. Bhikkhuniyā apakatattā āha ‘‘neva hoti bhikkhunidūsako’’ti.
૧૯૮૩. અથાતિ વાક્યારમ્ભે. ન હોતાપત્તિ ભિક્ખુનોતિ એત્થ ભિક્ખુનીહિ કાયસંસગ્ગસઙ્ઘાદિસેસમાહ.
1983.Athāti vākyārambhe. Na hotāpatti bhikkhunoti ettha bhikkhunīhi kāyasaṃsaggasaṅghādisesamāha.
૧૯૮૪. ‘‘ખેત્તે’’તિ વક્ખમાનં ‘‘ફુટ્ઠા’’તિ ઇમિના યોજેત્વા ‘‘પારાજિક’’ન્તિઆદીહિ, ‘‘થુલ્લચ્ચયં ખેત્તે’’તિઆદીહિ ચ સમ્બન્ધિતબ્બં. ‘‘પારાજિક’’ન્તિ વક્ખમાનત્તા ફુટ્ઠાતિ એત્થ ‘‘પારાજિકક્ખેત્તે’’તિ સેસો.
1984. ‘‘Khette’’ti vakkhamānaṃ ‘‘phuṭṭhā’’ti iminā yojetvā ‘‘pārājika’’ntiādīhi, ‘‘thullaccayaṃ khette’’tiādīhi ca sambandhitabbaṃ. ‘‘Pārājika’’nti vakkhamānattā phuṭṭhāti ettha ‘‘pārājikakkhette’’ti seso.
૧૯૮૫. તથાતિ નિચ્ચલાપિ સાદિયતિ. ખેત્તેતિ થુલ્લચ્ચયાદીનં ખેત્તે. કાયેન નિચ્ચલાયપિ ચિત્તેન સાદિયન્તિયા આપત્તિ કસ્મા વુત્તાતિ આહ ‘‘વુત્તત્તા…પે॰… સત્થુના’’તિ , ભિક્ખુપાતિમોક્ખે વિય ‘‘કાયસંસગ્ગં સમાપજ્જેય્યા’’તિ અવત્વા ઇધ ‘‘કાયસંસગ્ગં સાદિયેય્યા’’તિ વુત્તત્તાતિ અધિપ્પાયો.
1985.Tathāti niccalāpi sādiyati. Khetteti thullaccayādīnaṃ khette. Kāyena niccalāyapi cittena sādiyantiyā āpatti kasmā vuttāti āha ‘‘vuttattā…pe… satthunā’’ti , bhikkhupātimokkhe viya ‘‘kāyasaṃsaggaṃ samāpajjeyyā’’ti avatvā idha ‘‘kāyasaṃsaggaṃ sādiyeyyā’’ti vuttattāti adhippāyo.
૧૯૮૬. તસ્સા આપત્તિયા. ક્રિયસમુટ્ઠાનન્તિ કિરિયાય સમુટ્ઠાનં. એવં સતીતિ સાદિયનમત્તેનેવ આપજ્જિતબ્બભાવે સતિ. ઇદન્તિ ‘‘કિરિયસમુટ્ઠાન’’મિતિવિધાનં. તબ્બહુલેનેવ નયેનાતિ કિરિયસમુટ્ઠાનબાહુલ્લેન નયેન ખદિરવનાદિવોહારો વિયાતિ દટ્ઠબ્બં.
1986.Tassā āpattiyā. Kriyasamuṭṭhānanti kiriyāya samuṭṭhānaṃ. Evaṃ satīti sādiyanamatteneva āpajjitabbabhāve sati. Idanti ‘‘kiriyasamuṭṭhāna’’mitividhānaṃ. Tabbahuleneva nayenāti kiriyasamuṭṭhānabāhullena nayena khadiravanādivohāro viyāti daṭṭhabbaṃ.
૧૯૮૭. તસ્સા ભિક્ખુનિયા અસઞ્ચિચ્ચ વિરજ્ઝિત્વા આમસન્તિયા અનાપત્તિ, ‘‘અયં પુરિસો’’તિ વા ‘‘ઇત્થી’’તિ વા અજાનિત્વા આમસન્તિયા અનાપત્તિ, પુરિસસ્સ આમસને સતિ ફસ્સં અસાદિયન્તિયા વા અનાપત્તીતિ યોજના.
1987.Tassā bhikkhuniyā asañcicca virajjhitvā āmasantiyā anāpatti, ‘‘ayaṃ puriso’’ti vā ‘‘itthī’’ti vā ajānitvā āmasantiyā anāpatti, purisassa āmasane sati phassaṃ asādiyantiyā vā anāpattīti yojanā.
૧૯૮૮. ખિત્તચિત્તાયાતિ યક્ખુમ્મત્તાય. ઉમ્મત્તિકાય વાતિ પિત્તકોપેન ઉમ્માદપ્પત્તાય. ઇદઞ્ચ ‘‘અસુચી’’તિ વા ‘‘ચન્દન’’ન્તિ વા વિસેસતં અજાનનમેવ પમાણં.
1988.Khittacittāyāti yakkhummattāya. Ummattikāya vāti pittakopena ummādappattāya. Idañca ‘‘asucī’’ti vā ‘‘candana’’nti vā visesataṃ ajānanameva pamāṇaṃ.
ઉબ્ભજાણુમણ્ડલકથાવણ્ણના.
Ubbhajāṇumaṇḍalakathāvaṇṇanā.
૧૯૮૯-૯૦. ‘‘પારાજિકત્તં જાનન્તી’’તિ ઇમિના અવસેસાપત્તિં જાનિત્વા છાદેન્તિયા પારાજિકાભાવં દીપેતિ. સલિઙ્ગે તુ ઠિતાયાતિ પબ્બજ્જાલિઙ્ગેયેવ ઠિતાય. ઇતિ ધુરે નિક્ખિત્તમત્તસ્મિન્તિ યોજના. ઇતિ-સદ્દો નિદસ્સને. ઇતરાય પુબ્બેયેવ આપન્નત્તા તમપેક્ખિત્વા ‘‘સા ચા’’તિ આહ.
1989-90.‘‘Pārājikattaṃ jānantī’’ti iminā avasesāpattiṃ jānitvā chādentiyā pārājikābhāvaṃ dīpeti. Saliṅge tu ṭhitāyāti pabbajjāliṅgeyeva ṭhitāya. Iti dhure nikkhittamattasminti yojanā. Iti-saddo nidassane. Itarāya pubbeyeva āpannattā tamapekkhitvā ‘‘sā cā’’ti āha.
૧૯૯૧. વુત્તાવિસિટ્ઠં સબ્બં વિનિચ્છયં સઙ્ગહેતુમાહ ‘‘સેસ’’ન્તિઆદિ. તત્થાતિ દુટ્ઠુલ્લપટિચ્છાદને.
1991. Vuttāvisiṭṭhaṃ sabbaṃ vinicchayaṃ saṅgahetumāha ‘‘sesa’’ntiādi. Tatthāti duṭṭhullapaṭicchādane.
વજ્જપટિચ્છાદિકથાવણ્ણના.
Vajjapaṭicchādikathāvaṇṇanā.
૧૯૯૨-૫. સઙ્ઘેનાતિ સમગ્ગેન સઙ્ઘેન. ઉક્ખિત્તકોતિ આપત્તિયા અદસ્સનાદીસુ ઉક્ખિત્તકો. ‘‘ઉક્ખેપને ઠિતો’’તિ ઇમિના ઉક્ખેપનીયકમ્મકતસ્સ અનોસારિતભાવં દીપેતિ. યા દિટ્ઠિ એતસ્સાતિ યંદિટ્ઠિકો, સો ઉક્ખિત્તકો ભિક્ખુ યાય દિટ્ઠિયા સમન્નાગતો હોતીતિ અધિપ્પાયો . ‘‘તસ્સા દિટ્ઠિયા ગહણેના’’તિ ઇમિના અનુવત્તપ્પકારો દસ્સિતો. તં ઉક્ખિત્તકં ભિક્ખુન્તિ યોજના. સા ભિક્ખુની અઞ્ઞાહિ ભિક્ખુનીહિ વિસુમ્પિચ સઙ્ઘમજ્ઝેપિ ‘‘એસો ખો અય્યે ભિક્ખુ સમગ્ગેન સઙ્ઘેન ઉક્ખિત્તો’’તિઆદિના (પાચિ॰ ૬૬૯) નયેન તિક્ખત્તું વુચ્ચમાનાતિ યોજના. તં વત્થું અચજન્તી ગહેત્વા યદિ તથેવ તિટ્ઠતીતિ યોજના. એત્થ ‘‘યાવતતિયં સમનુભાસિતબ્બા’’તિ સેસો. તસ્સ કમ્મસ્સ ઓસાનેતિ તતિયાય કમ્મવાચાય ય્યકારપ્પત્તવસેન અસ્સ સમનુભાસનકમ્મસ્સ પરિયોસાને. અસાકિયધીતરાતિ અસાકિયધીતા, પચ્ચત્તે કરણવચનં. ‘‘પુન અપ્પટિસન્ધેયા’’તિ ઇમિના પુન તેનેવ ચ અત્તભાવેન ભિક્ખુનિભાવે પટિસન્ધાતું અનરહતા વુત્તા.
1992-5.Saṅghenāti samaggena saṅghena. Ukkhittakoti āpattiyā adassanādīsu ukkhittako. ‘‘Ukkhepane ṭhito’’ti iminā ukkhepanīyakammakatassa anosāritabhāvaṃ dīpeti. Yā diṭṭhi etassāti yaṃdiṭṭhiko, so ukkhittako bhikkhu yāya diṭṭhiyā samannāgato hotīti adhippāyo . ‘‘Tassā diṭṭhiyā gahaṇenā’’ti iminā anuvattappakāro dassito. Taṃ ukkhittakaṃ bhikkhunti yojanā. Sā bhikkhunī aññāhi bhikkhunīhi visumpica saṅghamajjhepi ‘‘eso kho ayye bhikkhu samaggena saṅghena ukkhitto’’tiādinā (pāci. 669) nayena tikkhattuṃ vuccamānāti yojanā. Taṃ vatthuṃ acajantī gahetvā yadi tatheva tiṭṭhatīti yojanā. Ettha ‘‘yāvatatiyaṃ samanubhāsitabbā’’ti seso. Tassa kammassa osāneti tatiyāya kammavācāya yyakārappattavasena assa samanubhāsanakammassa pariyosāne. Asākiyadhītarāti asākiyadhītā, paccatte karaṇavacanaṃ. ‘‘Puna appaṭisandheyā’’ti iminā puna teneva ca attabhāvena bhikkhunibhāve paṭisandhātuṃ anarahatā vuttā.
૧૯૯૬. તિકદુક્કટં નિદ્દિટ્ઠન્તિ અધમ્મકમ્મે અધમ્મકમ્મસઞ્ઞા, વેમતિકા, ધમ્મકમ્મસઞ્ઞાતિ એતાસં વસેન તિકદુક્કટં વુત્તં. સમનુભાસને વુત્તા સમુટ્ઠાનાદયો સબ્બે ઇધ વત્તબ્બાતિ યોજના.
1996.Tikadukkaṭaṃ niddiṭṭhanti adhammakamme adhammakammasaññā, vematikā, dhammakammasaññāti etāsaṃ vasena tikadukkaṭaṃ vuttaṃ. Samanubhāsane vuttā samuṭṭhānādayo sabbe idha vattabbāti yojanā.
ઉક્ખિત્તાનુવત્તિકકથાવણ્ણના.
Ukkhittānuvattikakathāvaṇṇanā.
૧૯૯૭. ‘‘હત્થગ્ગહણં વા સાદિયેય્યાતિ હત્થો નામ કપ્પરં ઉપાદાય યાવ અગ્ગનખા. એતસ્સ અસદ્ધમ્મસ્સ પટિસેવનત્થાય ઉબ્ભક્ખકં અધોજાણુમણ્ડલં ગહણં સાદિયતિ, આપત્તિ થુલ્લચ્ચયસ્સા’’તિ (પાચિ॰ ૬૭૬) વુત્તત્તા આહ ‘‘અપારાજિકખેત્તસ્સા’’તિઆદિ. ‘‘ત’’ન્તિ વક્ખમાનત્તા ‘‘ય’’ન્તિ લબ્ભતિ. અપારાજિકક્ખેત્તસ્સ યસ્સ કસ્સચિ અઙ્ગસ્સ યં ગહણં, તં હત્થગ્ગહણન્તિ પવુચ્ચતીતિ યોજના. હત્થે ગહણં હત્થગ્ગહણં.
1997. ‘‘Hatthaggahaṇaṃ vā sādiyeyyāti hattho nāma kapparaṃ upādāya yāva agganakhā. Etassa asaddhammassa paṭisevanatthāya ubbhakkhakaṃ adhojāṇumaṇḍalaṃ gahaṇaṃ sādiyati, āpatti thullaccayassā’’ti (pāci. 676) vuttattā āha ‘‘apārājikakhettassā’’tiādi. ‘‘Ta’’nti vakkhamānattā ‘‘ya’’nti labbhati. Apārājikakkhettassa yassa kassaci aṅgassa yaṃ gahaṇaṃ, taṃ hatthaggahaṇanti pavuccatīti yojanā. Hatthe gahaṇaṃ hatthaggahaṇaṃ.
૧૯૯૮. યસ્સ કસ્સચીતિ વુત્તપ્પકારેન યસ્સ કસ્સચિ ચીવરસ્સ યં ગહણન્તિ યોજના.
1998.Yassa kassacīti vuttappakārena yassa kassaci cīvarassa yaṃ gahaṇanti yojanā.
૧૯૯૯. અસદ્ધમ્મ-સદ્દેન મેથુનસ્સાપિ વુચ્ચમાનત્તા તતો વિસેસેતુમાહ ‘‘કાયસંસગ્ગ …પે॰… કારણા’’તિ. ભિક્ખુની કાયસંસગ્ગસઙ્ખાતસ્સ અસદ્ધમ્મસ્સ કારણા પુરિસસ્સ હત્થપાસસ્મિં તિટ્ઠેય્ય વાતિ યોજના.
1999. Asaddhamma-saddena methunassāpi vuccamānattā tato visesetumāha ‘‘kāyasaṃsagga…pe… kāraṇā’’ti. Bhikkhunī kāyasaṃsaggasaṅkhātassa asaddhammassa kāraṇā purisassa hatthapāsasmiṃ tiṭṭheyya vāti yojanā.
૨૦૦૦. તતોતિ તસ્સ અસદ્ધમ્મસ્સ કારણા. તત્થાતિ હત્થપાસે. પુરિસેનાતિ એત્થ ‘‘કત’’ન્તિ સેસો, ‘‘સઙ્કેત’’ન્તિ ઇમિના સમ્બન્ધો. ‘‘આગમનં અસ્સા’’તિ પદચ્છેદો. ઇચ્છેય્યાતિ વુત્તેપિ ન ગમનિચ્છામત્તેન, અથ ખો ભિક્ખુનિયા પુરિસસ્સ હત્થપાસં, પુરિસેન ચ ભિક્ખુનિયા હત્થપાસં ઓક્કન્તકાલેયેવ વત્થુપૂરણં દટ્ઠબ્બં. યથાહ ‘‘સઙ્કેતં વા ગચ્છેય્યાતિ એતસ્સ અસદ્ધમ્મસ્સ પટિસેવનત્થાય પુરિસેન ‘ઇત્થન્નામં આગચ્છા’તિ વુત્તા ગચ્છતિ, પદે પદે આપત્તિ દુક્કટસ્સ. પુરિસસ્સ હત્થપાસં ઓક્કન્તમત્તે આપત્તિ થુલ્લચ્ચયસ્સા’’તિ (પાચિ॰ ૬૭૬) ચ ‘‘પુરિસસ્સ અબ્ભાગમનં સાદિયતિ, આપત્તિ દુક્કટસ્સ. હત્થપાસં ઓક્કન્તમત્તે આપત્તિ થુલ્લચ્ચયસ્સા’’તિ (પાચિ॰ ૬૭૬) ચ. એત્થ ચ ઇત્થન્નામં આગચ્છાતિ ઇત્થન્નામં ઠાનં આગચ્છાતિ અત્થો.
2000.Tatoti tassa asaddhammassa kāraṇā. Tatthāti hatthapāse. Purisenāti ettha ‘‘kata’’nti seso, ‘‘saṅketa’’nti iminā sambandho. ‘‘Āgamanaṃ assā’’ti padacchedo. Iccheyyāti vuttepi na gamanicchāmattena, atha kho bhikkhuniyā purisassa hatthapāsaṃ, purisena ca bhikkhuniyā hatthapāsaṃ okkantakāleyeva vatthupūraṇaṃ daṭṭhabbaṃ. Yathāha ‘‘saṅketaṃ vā gaccheyyāti etassa asaddhammassa paṭisevanatthāya purisena ‘itthannāmaṃ āgacchā’ti vuttā gacchati, pade pade āpatti dukkaṭassa. Purisassa hatthapāsaṃ okkantamatte āpatti thullaccayassā’’ti (pāci. 676) ca ‘‘purisassa abbhāgamanaṃ sādiyati, āpatti dukkaṭassa. Hatthapāsaṃ okkantamatte āpatti thullaccayassā’’ti (pāci. 676) ca. Ettha ca itthannāmaṃ āgacchāti itthannāmaṃ ṭhānaṃ āgacchāti attho.
૨૦૦૧. તદત્થાયાતિ તસ્સેવ કાયસંસગ્ગસઙ્ખાતઅસદ્ધમ્મસ્સ સેવનત્થાય. પટિચ્છન્નટ્ઠાનઞ્ચાતિ વત્થાદિના યેન કેનચિ પટિચ્છન્નઓકાસં. પુરિસસ્સ હત્થપાસે ઠિતા તદત્થાય કાયં ઉપસંહરેય્ય વાતિ યોજના.
2001.Tadatthāyāti tasseva kāyasaṃsaggasaṅkhātaasaddhammassa sevanatthāya. Paṭicchannaṭṭhānañcāti vatthādinā yena kenaci paṭicchannaokāsaṃ. Purisassa hatthapāse ṭhitā tadatthāya kāyaṃ upasaṃhareyya vāti yojanā.
૨૦૦૨. હત્થગ્ગહણાદીનં વુત્તપ્પકારાનં અટ્ઠન્નં વત્થૂનં પૂરણેન ‘‘અટ્ઠવત્થુકા’’તિ સઙ્ખાતા અયં ભિક્ખુની વિનટ્ઠા હોતિ સીલવિનાસેન, તતોયેવ અસ્સમણી હોતિ અભિક્ખુની હોતીતિ યોજના.
2002. Hatthaggahaṇādīnaṃ vuttappakārānaṃ aṭṭhannaṃ vatthūnaṃ pūraṇena ‘‘aṭṭhavatthukā’’ti saṅkhātā ayaṃ bhikkhunī vinaṭṭhā hoti sīlavināsena, tatoyeva assamaṇī hoti abhikkhunī hotīti yojanā.
૨૦૦૩. અનુલોમેન વાતિ હત્થગ્ગહણાદિપટિપાટિયા વા. પટિલોમેન વાતિ તબ્બિપરિયતો પટિલોમેન વા. એકન્તરિકાય વાતિ એકમેકં અન્તરિત્વા પુન તસ્સાપિ કરણવસેન એકન્તરિકાય વા. અનુલોમેન વા પટિલોમેન વા તથેકન્તરિકાય વા અટ્ઠમં વત્થું પરિપૂરેન્તી ચુતાતિ યોજના.
2003.Anulomenavāti hatthaggahaṇādipaṭipāṭiyā vā. Paṭilomena vāti tabbipariyato paṭilomena vā. Ekantarikāya vāti ekamekaṃ antaritvā puna tassāpi karaṇavasena ekantarikāya vā. Anulomena vā paṭilomena vā tathekantarikāya vā aṭṭhamaṃ vatthuṃ paripūrentī cutāti yojanā.
૨૦૦૪. એતદેવ અત્થં બ્યતિરેકમુખેન સમત્થેતુમાહ ‘‘અથાદિતો’’તિઆદિ. સતક્ખત્તુમ્પીતિ બહુક્ખત્તુમ્પિ. સત-સદ્દો હેત્થ બહુ-સદ્દપરિયાયો. પારાજિકા નેવ સિયાતિ યોજના, ઇમિના તંતંવત્થુમૂલકં દુક્કટથુલ્લચ્ચયં આપજ્જતીતિ વુત્તં હોતિ.
2004. Etadeva atthaṃ byatirekamukhena samatthetumāha ‘‘athādito’’tiādi. Satakkhattumpīti bahukkhattumpi. Sata-saddo hettha bahu-saddapariyāyo. Pārājikā neva siyāti yojanā, iminā taṃtaṃvatthumūlakaṃ dukkaṭathullaccayaṃ āpajjatīti vuttaṃ hoti.
૨૦૦૫. યા પન આપત્તિયો આપન્ના, દેસેત્વા તાહિ મુચ્ચતીતિ યોજના. ધુરનિક્ખેપનં કત્વાતિ ‘‘ન પુનેવં કરિસ્સામી’’તિ ધુરં નિક્ખિપિત્વા. દેસિતા ગણનૂપિકાતિ દેસિતા દેસિતગણનમેવ ઉપેતિ, પારાજિકસ્સ અઙ્ગં ન હોતીતિ અત્થો. તસ્મા યા એકં આપન્ના, ધુરનિક્ખેપં કત્વા દેસેત્વા પુન કિલેસવસેન આપજ્જતિ, પુન દેસેતિ, એવં અટ્ઠ વત્થૂનિ પૂરેન્તીપિ પારાજિકા ન હોતિ.
2005. Yā pana āpattiyo āpannā, desetvā tāhi muccatīti yojanā. Dhuranikkhepanaṃ katvāti ‘‘na punevaṃ karissāmī’’ti dhuraṃ nikkhipitvā. Desitā gaṇanūpikāti desitā desitagaṇanameva upeti, pārājikassa aṅgaṃ na hotīti attho. Tasmā yā ekaṃ āpannā, dhuranikkhepaṃ katvā desetvā puna kilesavasena āpajjati, puna deseti, evaṃ aṭṭha vatthūni pūrentīpi pārājikā na hoti.
૨૦૦૬. સઉસ્સાહાય દેસિતાતિ પુન આપજ્જને અનિક્ખિત્તધુરાય ભિક્ખુનિયા દેસિતાપિ આપત્તિ દેસનાગણનં ન ઉપેતિ. કિં હોતીતિ આહ ‘‘દેસિતાપિ અદેસિતા’’તિ, તસ્મા પારાજિકાપત્તિયા અઙ્ગમેવ હોતીતિ અધિપ્પાયો.
2006.Saussāhāya desitāti puna āpajjane anikkhittadhurāya bhikkhuniyā desitāpi āpatti desanāgaṇanaṃ na upeti. Kiṃ hotīti āha ‘‘desitāpi adesitā’’ti, tasmā pārājikāpattiyā aṅgameva hotīti adhippāyo.
૨૦૦૮. અયં અત્થોતિ ‘‘અસદ્ધમ્મો નામ કાયસંસગ્ગો’’તિ અયં અત્થો. ઉદ્દિસિતોતિ પકાસિતો.
2008.Ayaṃ atthoti ‘‘asaddhammo nāma kāyasaṃsaggo’’ti ayaṃ attho. Uddisitoti pakāsito.
૨૦૦૯. અયમત્થો કેન વચનેન ઉદ્દિસિતોતિ આહ ‘‘વિઞ્ઞૂ…પે॰… સાધકં વચનં ઇદ’’ન્તિ. ઇદં વચનન્તિ ‘‘વિઞ્ઞૂ પટિબલો કાયસંસગ્ગં સમાપજ્જિતુ’’ન્તિ (પાચિ॰ ૬૭૬) ઇદં વચનં. સાધકં પમાણં.
2009. Ayamattho kena vacanena uddisitoti āha ‘‘viññū…pe… sādhakaṃ vacanaṃ ida’’nti. Idaṃ vacananti ‘‘viññū paṭibalo kāyasaṃsaggaṃ samāpajjitu’’nti (pāci. 676) idaṃ vacanaṃ. Sādhakaṃ pamāṇaṃ.
અટ્ઠવત્થુકકથાવણ્ણના.
Aṭṭhavatthukakathāvaṇṇanā.
૨૦૧૦. અવસ્સુતા, વજ્જપટિચ્છાદિકા, ઉક્ખિત્તાનુવત્તિકા, અટ્ઠવત્થુકાતિ ઇમા ચતસ્સો પારાજિકાપત્તિયો મહેસિના અસાધારણા ભિક્ખુનીનમેવ પઞ્ઞત્તાતિ યોજના.
2010. Avassutā, vajjapaṭicchādikā, ukkhittānuvattikā, aṭṭhavatthukāti imā catasso pārājikāpattiyo mahesinā asādhāraṇā bhikkhunīnameva paññattāti yojanā.
ઇતિ વિનયત્થસારસન્દીપનિયા
Iti vinayatthasārasandīpaniyā
વિનયવિનિચ્છયવણ્ણનાય
Vinayavinicchayavaṇṇanāya
પારાજિકકથાવણ્ણના નિટ્ઠિતા.
Pārājikakathāvaṇṇanā niṭṭhitā.
