| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
၃. ပရမ္ပရဘောဇနသိက္ခာပဒဝဏ္ဏနာ
3. Paramparabhojanasikkhāpadavaṇṇanā
၂၂၁. တတိယေ ပာဠိယံ ဘတ္တပဋိပာဋိ အဋ္ဌိတာတိ ကုလပဋိပာဋိယာ ဒာတဗ္ဗာ ဘတ္တပဋိပာဋိ အဋ္ဌိတာ န ဌိတာ, အဗ္ဗောစ္ဆိန္နာ နိရန္တရပ္ပဝတ္တာတိ အတ္ထော။ ဗဒရဖလာနိ ပက္ခိပိတ္ဝာ ပက္ကယာဂုအာဒိကံ ‘‘ဗဒရသာဠဝ’’န္တိ ဝုစ္စတိ။
221. Tatiye pāḷiyaṃ bhattapaṭipāṭi aṭṭhitāti kulapaṭipāṭiyā dātabbā bhattapaṭipāṭi aṭṭhitā na ṭhitā, abbocchinnā nirantarappavattāti attho. Badaraphalāni pakkhipitvā pakkayāguādikaṃ ‘‘badarasāḷava’’nti vuccati.
ပာဠိယံ ပရမ္ပရဘောဇနေတိ ယေန ပဌမံ နိမန္တိတော, တသ္သ ဘောဇနတော ပရသ္သ ဘောဇနသ္သ ဘုဉ္ဇနေ။ ဝိကပ္ပနာဝ ဣဓ အနုပညတ္တိဝသေန မာတိကာယံ အနာရောပိတာပိ ပရိဝာရေ ‘‘စတသ္သော အနုပညတ္တိယော’’တိ (ပရိ. ၈၆) အနုပညတ္တိယံ ဂဏိတာ။ တတ္ထ ကိဉ္စာပိ အဋ္ဌကထာယံ မဟာပစ္စရိဝာဒသ္သ ပစ္ဆာ ကထနေန ပရမ္မုခာဝိကပ္ပနာ ပတိဋ္ဌပိတာ, တထာပိ သမ္မုခာဝိကပ္ပနာပိ ဂဟေတဗ္ဗာဝ။ တေနေဝ မာတိကာဋ္ဌကထာယမ္ပိ ‘‘ယော ဘိက္ခု ပဉ္စသု သဟဓမ္မိကေသု အညတရသ္သ ‘မယ္ဟံ ဘတ္တပစ္စာသံ တုယ္ဟံ ဒမ္မီ’တိ ဝာ ‘ဝိကပ္ပေမီ’တိ ဝာ ဧဝံ သမ္မုခာ’’တိအာဒိ (ကင္ခာ. အဋ္ဌ. ပရမ္ပရဘောဇနသိက္ခာပဒဝဏ္ဏနာ) ဝုတ္တံ။
Pāḷiyaṃ paramparabhojaneti yena paṭhamaṃ nimantito, tassa bhojanato parassa bhojanassa bhuñjane. Vikappanāva idha anupaññattivasena mātikāyaṃ anāropitāpi parivāre ‘‘catasso anupaññattiyo’’ti (pari. 86) anupaññattiyaṃ gaṇitā. Tattha kiñcāpi aṭṭhakathāyaṃ mahāpaccarivādassa pacchā kathanena parammukhāvikappanā patiṭṭhapitā, tathāpi sammukhāvikappanāpi gahetabbāva. Teneva mātikāṭṭhakathāyampi ‘‘yo bhikkhu pañcasu sahadhammikesu aññatarassa ‘mayhaṃ bhattapaccāsaṃ tuyhaṃ dammī’ti vā ‘vikappemī’ti vā evaṃ sammukhā’’tiādi (kaṅkhā. aṭṭha. paramparabhojanasikkhāpadavaṇṇanā) vuttaṃ.
၂၂၉. ခီရံ ဝာ ရသံ ဝာတိ ပဉ္စဘောဇနာမိသံ ဘတ္တတော ဥပရိ ဌိတံ သန္ဓာယ ဝုတ္တံ။ တဉ္ဟိ အဘောဇနတ္တာ ဥပ္ပဋိပာဋိယာ ပိဝတောပိ အနာပတ္တိ။ တေနာဟ ‘‘ဘုဉ္ဇန္တေနာ’’တိအာဒိ။
229.Khīraṃ vā rasaṃ vāti pañcabhojanāmisaṃ bhattato upari ṭhitaṃ sandhāya vuttaṃ. Tañhi abhojanattā uppaṭipāṭiyā pivatopi anāpatti. Tenāha ‘‘bhuñjantenā’’tiādi.
ဝိကပ္ပနာယ အကရဏတော အကိရိယာဝသေန ဣဒံ ဝာစာယပိ သမုဋ္ဌိတန္တိ အာဟ ‘‘ဝစီကမ္မ’’န္တိ။ ပရမ္ပရဘောဇနတာ, သမယာဘာဝော, အဇ္ဈောဟရဏန္တိ ဣမာနေတ္ထ တီဏိ အင္ဂာနိ။
Vikappanāya akaraṇato akiriyāvasena idaṃ vācāyapi samuṭṭhitanti āha ‘‘vacīkamma’’nti. Paramparabhojanatā, samayābhāvo, ajjhoharaṇanti imānettha tīṇi aṅgāni.
ပရမ္ပရဘောဇနသိက္ခာပဒဝဏ္ဏနာ နိဋ္ဌိတာ။
Paramparabhojanasikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၄. ဘောဇနဝဂ္ဂော • 4. Bhojanavaggo
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၃. ပရမ္ပရဘောဇနသိက္ခာပဒဝဏ္ဏနာ • 3. Paramparabhojanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၃. ပရမ္ပရဘောဇနသိက္ခာပဒဝဏ္ဏနာ • 3. Paramparabhojanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ၃. ပရမ္ပရဘောဇနသိက္ခာပဒဝဏ္ဏနာ • 3. Paramparabhojanasikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၃. ပရမ္ပရဘောဇနသိက္ခာပဒံ • 3. Paramparabhojanasikkhāpadaṃ
