| Library / Tipiṭaka / તિપિટક • Tipiṭaka / પરિવારપાળિ • Parivārapāḷi |
૫. પરપક્ખાદિઅવજાનનં
5. Parapakkhādiavajānanaṃ
૩૯૧. કથં લદ્ધપક્ખોમ્હીતિ પરપક્ખં અવજાનાતિ? ઇધેકચ્ચો લદ્ધપક્ખો હોતિ લદ્ધપરિવારો પક્ખવા ઞાતિમા. ‘‘અયં અલદ્ધપક્ખો અલદ્ધપરિવારો ન પક્ખવા ન ઞાતિમા’’તિ તસ્સ અવજાનન્તો અધમ્મં ધમ્મોતિ દીપેતિ, ધમ્મં અધમ્મોતિ દીપેતિ…પે॰… દુટ્ઠુલ્લં આપત્તિં અદુટ્ઠુલ્લા આપત્તીતિ દીપેતિ, અદુટ્ઠુલ્લં આપત્તિં દુટ્ઠુલ્લા આપત્તીતિ દીપેતિ. એવં લદ્ધપક્ખોમ્હીતિ પરપક્ખં અવજાનાતિ.
391.Kathaṃ laddhapakkhomhīti parapakkhaṃ avajānāti? Idhekacco laddhapakkho hoti laddhaparivāro pakkhavā ñātimā. ‘‘Ayaṃ aladdhapakkho aladdhaparivāro na pakkhavā na ñātimā’’ti tassa avajānanto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ laddhapakkhomhīti parapakkhaṃ avajānāti.
૩૯૨. કથં બહુસ્સુતોમ્હીતિ અપ્પસ્સુતં અવજાનાતિ? ઇધેકચ્ચો બહુસ્સુતો હોતિ સુતધરો સુતસન્નિચયો. ‘‘અયં અપ્પસ્સુતો અપ્પાગમો અપ્પધરો’’તિ તસ્સ અવજાનન્તો અધમ્મં ધમ્મોતિ દીપેતિ, ધમ્મં અધમ્મોતિ દીપેતિ…પે॰… દુટ્ઠુલ્લં આપત્તિં અદુટ્ઠુલ્લા આપત્તીતિ દીપેતિ, અદુટ્ઠુલ્લં આપત્તિં દુટ્ઠુલ્લા આપત્તીતિ દીપેતિ. એવં બહુસ્સુતોમ્હીતિ અપ્પસ્સુતં અવજાનાતિ.
392.Kathaṃ bahussutomhīti appassutaṃ avajānāti? Idhekacco bahussuto hoti sutadharo sutasannicayo. ‘‘Ayaṃ appassuto appāgamo appadharo’’ti tassa avajānanto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ bahussutomhīti appassutaṃ avajānāti.
૩૯૩. કથં થેરતરોમ્હીતિ નવકતરં અવજાનાતિ? ઇધેકચ્ચો થેરો હોતિ રત્તઞ્ઞૂ ચિરપબ્બજિતો અયં નવકો અપ્પઞ્ઞાતો અપ્પકતઞ્ઞૂ ઇમસ્સ વચનં અકતં ભવિસ્સતી’’તિ તસ્સ અવજાનન્તો અધમ્મં ધમ્મોતિ દીપેતિ, ધમ્મં અધમ્મોતિ દીપેતિ …પે॰… દુટ્ઠુલ્લં આપત્તિં અદુટ્ઠુલ્લા આપત્તીતિ દીપેતિ, અદુટ્ઠુલ્લં આપત્તિં દુટ્ઠુલ્લા આપત્તીતિ દીપેતિ. એવં થેરતરોમ્હીતિ નવકતરં અવજાનાતિ.
393.Kathaṃ therataromhīti navakataraṃ avajānāti? Idhekacco thero hoti rattaññū cirapabbajito ayaṃ navako appaññāto appakataññū imassa vacanaṃ akataṃ bhavissatī’’ti tassa avajānanto adhammaṃ dhammoti dīpeti, dhammaṃ adhammoti dīpeti …pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Evaṃ therataromhīti navakataraṃ avajānāti.
૩૯૪. અસમ્પત્તં ન બ્યાહરિતબ્બન્તિ અનોતિણ્ણં ભારં 1 ન ઓતારેતબ્બં. સમ્પત્તં ધમ્મતો વિનયતો ન પરિહાપેતબ્બન્તિ યંઅત્થાય સઙ્ઘો સન્નિપતિતો હોતિ તં અત્થં ધમ્મતો વિનયતો ન પરિહાપેતબ્બં.
394.Asampattaṃ na byāharitabbanti anotiṇṇaṃ bhāraṃ 2 na otāretabbaṃ. Sampattaṃ dhammato vinayato na parihāpetabbanti yaṃatthāya saṅgho sannipatito hoti taṃ atthaṃ dhammato vinayato na parihāpetabbaṃ.
૩૯૫. યેન ધમ્મેનાતિ ભૂતેન વત્થુના. યેન વિનયેનાતિ ચોદેત્વા સારેત્વા. યેન સત્થુસાસનેનાતિ ઞત્તિસમ્પદાય અનુસ્સાવનસમ્પદાય, યેન ધમ્મેન યેન વિનયેન યેન સત્થુસાસનેન તં અધિકરણં વૂપસમ્મતિ, તથા તં અધિકરણં વૂપસમેતબ્બન્તિ.
395.Yena dhammenāti bhūtena vatthunā. Yena vinayenāti codetvā sāretvā. Yena satthusāsanenāti ñattisampadāya anussāvanasampadāya, yena dhammena yena vinayena yena satthusāsanena taṃ adhikaraṇaṃ vūpasammati, tathā taṃ adhikaraṇaṃ vūpasametabbanti.
Footnotes:
Related texts:
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / પરિવાર-અટ્ઠકથા • Parivāra-aṭṭhakathā / અગતિઅગન્તબ્બવણ્ણના • Agatiagantabbavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / અગતિઅગન્તબ્બવણ્ણના • Agatiagantabbavaṇṇanā
