Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౩౩. పరాయనసుత్తం
33. Parāyanasuttaṃ
౪౦౯. ‘‘పరాయనఞ్చ 1 వో, భిక్ఖవే, దేసేస్సామి పరాయనగామిఞ్చ మగ్గం. తం సుణాథ. కతమఞ్చ, భిక్ఖవే, పరాయనం? యో, భిక్ఖవే, రాగక్ఖయో దోసక్ఖయో మోహక్ఖయో – ఇదం వుచ్చతి, భిక్ఖవే, పరాయనం. కతమో చ, భిక్ఖవే, పరాయనగామీ మగ్గో? కాయగతాసతి. అయం వుచ్చతి, భిక్ఖవే, పరాయనగామిమగ్గో. ఇతి ఖో, భిక్ఖవే, దేసితం వో మయా పరాయనం, దేసితో పరాయనగామిమగ్గో. యం, భిక్ఖవే, సత్థారా కరణీయం సావకానం హితేసినా అనుకమ్పకేన అనుకమ్పం ఉపాదాయ, కతం వో తం మయా. ఏతాని, భిక్ఖవే, రుక్ఖమూలాని, ఏతాని సుఞ్ఞాగారాని. ఝాయథ, భిక్ఖవే, మా పమాదత్థ; మా పచ్ఛా విప్పటిసారినో అహువత్థ. అయం వో అమ్హాకం అనుసాసనీ’’తి. (యథా అసఙ్ఖతం తథా విత్థారేతబ్బం). తేత్తింసతిమం.
409. ‘‘Parāyanañca 2 vo, bhikkhave, desessāmi parāyanagāmiñca maggaṃ. Taṃ suṇātha. Katamañca, bhikkhave, parāyanaṃ? Yo, bhikkhave, rāgakkhayo dosakkhayo mohakkhayo – idaṃ vuccati, bhikkhave, parāyanaṃ. Katamo ca, bhikkhave, parāyanagāmī maggo? Kāyagatāsati. Ayaṃ vuccati, bhikkhave, parāyanagāmimaggo. Iti kho, bhikkhave, desitaṃ vo mayā parāyanaṃ, desito parāyanagāmimaggo. Yaṃ, bhikkhave, satthārā karaṇīyaṃ sāvakānaṃ hitesinā anukampakena anukampaṃ upādāya, kataṃ vo taṃ mayā. Etāni, bhikkhave, rukkhamūlāni, etāni suññāgārāni. Jhāyatha, bhikkhave, mā pamādattha; mā pacchā vippaṭisārino ahuvattha. Ayaṃ vo amhākaṃ anusāsanī’’ti. (Yathā asaṅkhataṃ tathā vitthāretabbaṃ). Tettiṃsatimaṃ.
దుతియో వగ్గో.
Dutiyo vaggo.
తస్సుద్దానం –
Tassuddānaṃ –
అసఙ్ఖతం అనతం అనాసవం, సచ్చఞ్చ పారం నిపుణం సుదుద్దసం;
Asaṅkhataṃ anataṃ anāsavaṃ, saccañca pāraṃ nipuṇaṃ sududdasaṃ;
అజజ్జరం ధువం అపలోకితం, అనిదస్సనం నిప్పపఞ్చ సన్తం.
Ajajjaraṃ dhuvaṃ apalokitaṃ, anidassanaṃ nippapañca santaṃ.
అమతం పణీతఞ్చ సివఞ్చ ఖేమం, తణ్హాక్ఖయో అచ్ఛరియఞ్చ అబ్భుతం;
Amataṃ paṇītañca sivañca khemaṃ, taṇhākkhayo acchariyañca abbhutaṃ;
అనీతికం అనీతికధమ్మం, నిబ్బానమేతం సుగతేన దేసితం.
Anītikaṃ anītikadhammaṃ, nibbānametaṃ sugatena desitaṃ.
అబ్యాపజ్ఝో విరాగో చ, సుద్ధి ముత్తి అనాలయో;
Abyāpajjho virāgo ca, suddhi mutti anālayo;
దీపో లేణఞ్చ తాణఞ్చ, సరణఞ్చ పరాయనన్తి.
Dīpo leṇañca tāṇañca, saraṇañca parāyananti.
అసఙ్ఖతసంయుత్తం సమత్తం.
Asaṅkhatasaṃyuttaṃ samattaṃ.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౧-౩౩. అసఙ్ఖతసుత్తాదివణ్ణనా • 1-33. Asaṅkhatasuttādivaṇṇanā
టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౨౩-౩౩. అసఙ్ఖతసుత్తాదివణ్ణనా • 23-33. Asaṅkhatasuttādivaṇṇanā