| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
5. பரிபோ⁴க³மயபுஞ்ஞகதா²வண்ணனா
5. Paribhogamayapuññakathāvaṇṇanā
483. இதா³னி பரிபோ⁴க³மயபுஞ்ஞகதா² நாம ஹோதி. தத்த² ‘‘தேஸங் தி³வா ச ரத்தோ ச, ஸதா³ புஞ்ஞங் பவட்³ட⁴தீ’’தி (ஸங்॰ நி॰ 1.47) ச ‘‘யஸ்ஸ பி⁴க்க²வே, பி⁴க்கு² சீவரங் பரிபு⁴ஞ்ஜமானோ’’தி (அ॰ நி॰ 4.51) ச ஏவமாதீ³னி ஸுத்தானி அயோனிஸோ க³ஹெத்வா யேஸங் பரிபோ⁴க³மயங் நாம புஞ்ஞங் அத்தீ²’’தி லத்³தி⁴, ஸெய்யதா²பி ராஜகி³ரிகஸித்³த⁴த்தி²கஸம்மிதியானங்; தே ஸந்தா⁴ய பரிபோ⁴க³மயந்தி புச்சா² ஸகவாதி³ஸ்ஸ, படிஞ்ஞா இதரஸ்ஸ. அத² நங் ‘‘புஞ்ஞங் நாம ப²ஸ்ஸாத³யோ குஸலா த⁴ம்மா, ந ததோ பரங், தஸ்மா ப²ஸ்ஸாதீ³ஹி தே வட்³டி⁴தப்³ப³’’ந்தி சோதே³துங் பரிபோ⁴க³மயோ ப²ஸ்ஸோதிஆதி³ ஆரத்³த⁴ங். தங் ஸப்³ப³ங் இதரேன தேஸங் அவட்³ட⁴னதோ படிக்கி²த்தங். லதாவியாதிஆதீ³னி ‘‘கிரியாய வா பா⁴வனாய வா வினாபி யதா² லதாதீ³னி ஸயமேவ வட்³ட⁴ந்தி, கிங் தே ஏவங் வட்³ட⁴ந்தீ’’தி சோத³னத்த²ங் வுத்தானி. ததா² பனஸ்ஸ அவட்³ட⁴னதோ ந ஹேவாதி படிக்கி²த்தங்.
483. Idāni paribhogamayapuññakathā nāma hoti. Tattha ‘‘tesaṃ divā ca ratto ca, sadā puññaṃ pavaḍḍhatī’’ti (saṃ. ni. 1.47) ca ‘‘yassa bhikkhave, bhikkhu cīvaraṃ paribhuñjamāno’’ti (a. ni. 4.51) ca evamādīni suttāni ayoniso gahetvā yesaṃ paribhogamayaṃ nāma puññaṃ atthī’’ti laddhi, seyyathāpi rājagirikasiddhatthikasammitiyānaṃ; te sandhāya paribhogamayanti pucchā sakavādissa, paṭiññā itarassa. Atha naṃ ‘‘puññaṃ nāma phassādayo kusalā dhammā, na tato paraṃ, tasmā phassādīhi te vaḍḍhitabba’’nti codetuṃ paribhogamayo phassotiādi āraddhaṃ. Taṃ sabbaṃ itarena tesaṃ avaḍḍhanato paṭikkhittaṃ. Latāviyātiādīni ‘‘kiriyāya vā bhāvanāya vā vināpi yathā latādīni sayameva vaḍḍhanti, kiṃ te evaṃ vaḍḍhantī’’ti codanatthaṃ vuttāni. Tathā panassa avaḍḍhanato na hevāti paṭikkhittaṃ.
484. ந ஸமன்னாஹரதீதி பஞ்ஹே படிக்³கா³ஹகானங் பரிபோ⁴கே³ன புரிமசேதனா வட்³ட⁴தி, ஏவங் தங் ஹோதி புஞ்ஞந்தி லத்³தி⁴வஸேன படிஜானாதி. ததோ அனாவட்டெந்தஸ்ஸாதிஆதீ³ஹி புட்டோ² தா³யகஸ்ஸ சாக³சேதனங் ஸந்தா⁴ய படிக்கி²பதி. தத்த² அனாவட்டெந்தஸ்ஸாதி தா³னசேதனாய புரேசாரிகேன ஆவஜ்ஜனேன ப⁴வங்க³ங் அனாவட்டெந்தஸ்ஸ அபரிவட்டெந்தஸ்ஸ. அனாபோ⁴க³ஸ்ஸாதி நிராபோ⁴க³ஸ்ஸ. அஸமன்னாஹரந்தஸ்ஸாதி ந ஸமன்னாஹரந்தஸ்ஸ. ஆவஜ்ஜனஞ்ஹி ப⁴வங்க³ங் விச்சி²ந்தி³த்வா அத்தனோ க³தமக்³கே³ உப்பஜ்ஜமானங் தா³னசேதனங் ஸமன்னாஹரதி நாம. ஏவங்கிச்சேன இமினா சித்தேன அஸமன்னாஹரந்தஸ்ஸ புஞ்ஞங் ஹோதீதி புச்ச²தி. அமனஸிகரொந்தஸ்ஸாதி மனங் அகரொந்தஸ்ஸ. ஆவஜ்ஜனேன ஹி தத³னந்தரங் உப்பஜ்ஜமானங் மனங் கரோதி நாம. ஏவங் அகரொந்தஸ்ஸாதி அத்தோ². உபயோக³வசனஸ்மிஞ்ஹி ஏதங் பு⁴ம்மங். அசேதயந்தஸ்ஸாதி சேதனங் அனுப்பாதெ³ந்தஸ்ஸ. அபத்தெ²ந்தஸ்ஸாதி பத்த²னாஸங்கா²தங் குஸலச்ச²ந்த³ங் அகரொந்தஸ்ஸ. அப்பணித³ஹந்தஸ்ஸாதி தா³னசேதனாவஸேன சித்தங் அட்ட²பெந்தஸ்ஸாதி அத்தோ². நனு ஆவட்டெந்தஸ்ஸாதி வாரே ஆபோ⁴க³ஸ்ஸாதி ஆபோ⁴க³வதோ. அத² வா ஆபோ⁴கா³ அஸ்ஸ, ஆபோ⁴க³ஸ்ஸ வா அனந்தரங் தங் புஞ்ஞங் ஹோதீதி அத்தோ².
484. Na samannāharatīti pañhe paṭiggāhakānaṃ paribhogena purimacetanā vaḍḍhati, evaṃ taṃ hoti puññanti laddhivasena paṭijānāti. Tato anāvaṭṭentassātiādīhi puṭṭho dāyakassa cāgacetanaṃ sandhāya paṭikkhipati. Tattha anāvaṭṭentassāti dānacetanāya purecārikena āvajjanena bhavaṅgaṃ anāvaṭṭentassa aparivaṭṭentassa. Anābhogassāti nirābhogassa. Asamannāharantassāti na samannāharantassa. Āvajjanañhi bhavaṅgaṃ vicchinditvā attano gatamagge uppajjamānaṃ dānacetanaṃ samannāharati nāma. Evaṃkiccena iminā cittena asamannāharantassa puññaṃ hotīti pucchati. Amanasikarontassāti manaṃ akarontassa. Āvajjanena hi tadanantaraṃ uppajjamānaṃ manaṃ karoti nāma. Evaṃ akarontassāti attho. Upayogavacanasmiñhi etaṃ bhummaṃ. Acetayantassāti cetanaṃ anuppādentassa. Apatthentassāti patthanāsaṅkhātaṃ kusalacchandaṃ akarontassa. Appaṇidahantassāti dānacetanāvasena cittaṃ aṭṭhapentassāti attho. Nanu āvaṭṭentassāti vāre ābhogassāti ābhogavato. Atha vā ābhogā assa, ābhogassa vā anantaraṃ taṃ puññaṃ hotīti attho.
485. த்³வின்னங் ப²ஸ்ஸானந்திஆதீ³ஸுபி ஏகக்க²ணே தா³யகஸ்ஸ த்³வின்னங் ப²ஸ்ஸாதீ³னங் அபா⁴வா படிக்கி²பதி, தா³யகஸ்ஸ ச பரிபு⁴ஞ்ஜந்தஸ்ஸ சாதி உபி⁴ன்னங் ப²ஸ்ஸாத³யோ ஸந்தா⁴ய படிஜானாதி. அபிசஸ்ஸ பஞ்சன்னங் விஞ்ஞாணானங் ஸமோதா⁴னங் ஹோதீதி லத்³தி⁴, தஸ்ஸாபி வஸேன படிஜானாதி. அத² நங் ஸகவாதீ³ பரியாயஸ்ஸ த்³வாரங்பித³ஹித்வா உஜுவிபச்சனீகவஸேன சோதே³துங் குஸலாதி³பஞ்ஹங் புச்ச²தி. தத்ராபி குஸலாகுஸலானங் ஏகஸ்ஸேகக்க²ணே ஸம்பயோகா³பா⁴வங் ஸந்தா⁴ய படிக்கி²பதி. பரிபோ⁴க³மயங் பன சித்தவிப்பயுத்தங் உப்பஜ்ஜதீதி லத்³தி⁴யா படிஜானாதி. அத² நங் ஸகவாதீ³ ஸுத்தேன நிக்³க³ண்ஹாதி.
485. Dvinnaṃ phassānantiādīsupi ekakkhaṇe dāyakassa dvinnaṃ phassādīnaṃ abhāvā paṭikkhipati, dāyakassa ca paribhuñjantassa cāti ubhinnaṃ phassādayo sandhāya paṭijānāti. Apicassa pañcannaṃ viññāṇānaṃ samodhānaṃ hotīti laddhi, tassāpi vasena paṭijānāti. Atha naṃ sakavādī pariyāyassa dvāraṃpidahitvā ujuvipaccanīkavasena codetuṃ kusalādipañhaṃ pucchati. Tatrāpi kusalākusalānaṃ ekassekakkhaṇe sampayogābhāvaṃ sandhāya paṭikkhipati. Paribhogamayaṃ pana cittavippayuttaṃ uppajjatīti laddhiyā paṭijānāti. Atha naṃ sakavādī suttena niggaṇhāti.
486. ஸுத்தஸாத⁴னே ஆராமரோபகாதீ³னங் அனுஸ்ஸரணபடிஸங்க²ரணாதி³வஸேன அந்தரந்தரா உப்பஜ்ஜமானங் புஞ்ஞங் ஸந்தா⁴ய ஸதா³ புஞ்ஞங் பவட்³ட⁴தீதி வுத்தங். அப்பமாணோ தஸ்ஸ புஞ்ஞாபி⁴ஸந்தோ³தி இத³ங் அப்பமாணவிஹாரினோ தி³ன்னபச்சயத்தா ச ‘‘ஏவரூபோ மே சீவரங் பரிபு⁴ஞ்ஜதீ’’தி அனுமோத³னவஸேன ச வுத்தங். தங் ஸோ பரிபோ⁴க³மயந்தி ஸல்லக்கே²தி. யஸ்மா பன படிக்³கா³ஹகேன படிக்³க³ஹெத்வா அபரிபு⁴த்தேபி தெ³ய்யத⁴ம்மே புஞ்ஞங் ஹோதியேவ, தஸ்மா ஸகவாதீ³வாதோ³வ ப³லவா, தத்த² படிக்³கா³ஹகேன படிக்³க³ஹிதேதி அத்தோ² த³ட்ட²ப்³போ³. ஸேஸங் உத்தானத்த²மேவாதி.
486. Suttasādhane ārāmaropakādīnaṃ anussaraṇapaṭisaṅkharaṇādivasena antarantarā uppajjamānaṃ puññaṃ sandhāya sadā puññaṃ pavaḍḍhatīti vuttaṃ. Appamāṇo tassa puññābhisandoti idaṃ appamāṇavihārino dinnapaccayattā ca ‘‘evarūpo me cīvaraṃ paribhuñjatī’’ti anumodanavasena ca vuttaṃ. Taṃ so paribhogamayanti sallakkheti. Yasmā pana paṭiggāhakena paṭiggahetvā aparibhuttepi deyyadhamme puññaṃ hotiyeva, tasmā sakavādīvādova balavā, tattha paṭiggāhakena paṭiggahiteti attho daṭṭhabbo. Sesaṃ uttānatthamevāti.
பரிபோ⁴க³மயபுஞ்ஞகதா²வண்ணனா.
Paribhogamayapuññakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (67) 5. பரிபோ⁴க³மயபுஞ்ஞகதா² • (67) 5. Paribhogamayapuññakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 5. பரிபோ⁴க³மயபுஞ்ஞகதா²வண்ணனா • 5. Paribhogamayapuññakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 5. பரிபோ⁴க³மயபுஞ்ஞகதா²வண்ணனா • 5. Paribhogamayapuññakathāvaṇṇanā
