| Library / Tipiṭaka / திபிடக • Tipiṭaka / பஞ்சபகரண-மூலடீகா • Pañcapakaraṇa-mūlaṭīkā |
2. பரிஹானிகதா²
2. Parihānikathā
1. வாத³யுத்திபரிஹானிகதா²வண்ணனா
1. Vādayuttiparihānikathāvaṇṇanā
239. ‘‘த்³வேமே , பி⁴க்க²வே, த⁴ம்மா ஸெக்க²ஸ்ஸ பி⁴க்கு²னோ பரிஹானாய ஸங்வத்தந்தீ’’தி (அ॰ நி॰ 2.185) இத³ங் ஸுத்தங் அரஹதோ பரிஹானிலத்³தி⁴யா ந நிஸ்ஸயோ, அத² கோ² அனாகா³மிஆதீ³னங் பரிஹானிலத்³தி⁴யா, தஸ்மா அரஹதோபி பரிஹானிங் இச்ச²ந்தீதி எத்த² பி-ஸத்³தே³ன அனாகா³மிஸ்ஸபி ஸகதா³கா³மிஸ்ஸபீதி யோஜேதப்³ப³ங்.
239. ‘‘Dveme , bhikkhave, dhammā sekkhassa bhikkhuno parihānāya saṃvattantī’’ti (a. ni. 2.185) idaṃ suttaṃ arahato parihāniladdhiyā na nissayo, atha kho anāgāmiādīnaṃ parihāniladdhiyā, tasmā arahatopi parihāniṃ icchantīti ettha pi-saddena anāgāmissapi sakadāgāmissapīti yojetabbaṃ.
‘‘ததியஸ்மிம்பி முதி³ந்த்³ரியாவ அதி⁴ப்பேதா. தேஸஞ்ஹி ஸப்³பே³ஸம்பி பரிஹானி ந ஹோதீதி தஸ்ஸ லத்³தீ⁴’’தி புரிமபாடோ², முதி³ந்த்³ரியெஸ்வேவ பன அதி⁴ப்பேதேஸு பரிக்கே²போ ந காதப்³போ³ ஸியா, கதோ ச, தஸ்மா ‘‘ததியஸ்மிம்பி திக்கி²ந்த்³ரியாவ அதி⁴ப்பேதா. தேஸஞ்ஹி ஸப்³பே³ஸம்பி பரிஹானி ந ஹோதீதி தஸ்ஸ லத்³தீ⁴’’தி பட²ந்தி.
‘‘Tatiyasmimpi mudindriyāva adhippetā. Tesañhi sabbesampi parihāni na hotīti tassa laddhī’’ti purimapāṭho, mudindriyesveva pana adhippetesu parikkhepo na kātabbo siyā, kato ca, tasmā ‘‘tatiyasmimpi tikkhindriyāva adhippetā. Tesañhi sabbesampi parihāni na hotīti tassa laddhī’’ti paṭhanti.
அயோனிஸோ அத்த²ங் க³ஹெத்வாதி ஸோதாபன்னோயேவ நியதோதி வுத்தோதி ஸோயேவ ந பரிஹாயதி, ந இதரேதி அத்த²ங் க³ஹெத்வா. ‘‘உபரிமக்³க³த்தா²யா’’தி வுத்தங் அத்த²ங் அக்³க³ஹெத்வா நியதோதி ஸோதாபத்திப²லா ந பரிஹாயதீதி ஏதமத்த²ங் க³ண்ஹீதி பன வத³ந்தி.
Ayoniso atthaṃ gahetvāti sotāpannoyeva niyatoti vuttoti soyeva na parihāyati, na itareti atthaṃ gahetvā. ‘‘Uparimaggatthāyā’’ti vuttaṃ atthaṃ aggahetvā niyatoti sotāpattiphalā na parihāyatīti etamatthaṃ gaṇhīti pana vadanti.
வாத³யுத்திபரிஹானிகதா²வண்ணனா நிட்டி²தா.
Vādayuttiparihānikathāvaṇṇanā niṭṭhitā.
2. அரியபுக்³க³லஸங்ஸந்த³னபரிஹானிவண்ணனா
2. Ariyapuggalasaṃsandanaparihānivaṇṇanā
241. யங் பனெத்தா²திஆதி³ம்ஹி த³ஸ்ஸனமக்³க³ப²லே டி²தஸ்ஸ அனந்தரங் அரஹத்தப்பத்திங், ததோ பரிஹாயித்வா தத்த² ச டா²னங் இச்ச²ந்தோ புன வாயாமேன தத³னந்தரங் அரஹத்தப்பத்திங் ந இச்ச²தீதி விசாரேதப்³ப³மேதங்.
241. Yaṃpanetthātiādimhi dassanamaggaphale ṭhitassa anantaraṃ arahattappattiṃ, tato parihāyitvā tattha ca ṭhānaṃ icchanto puna vāyāmena tadanantaraṃ arahattappattiṃ na icchatīti vicāretabbametaṃ.
262. அவஸிப்பத்தோ ஜா²னலாபீ⁴தி ஸெக்கோ² வுத்தோதி த³ட்ட²ப்³போ³. புது²ஜ்ஜனோ பன வஸிப்பத்தோ அவஸிப்பத்தோ ச ஸமயவிமுத்தஅஸமயவிமுத்ததந்தியா அக்³க³ஹிதோ, ப⁴ஜாபியமானோ பன ஸமாபத்திவிக்க²ம்பி⁴தானங் கிலேஸானங் வஸேன ஸமயவிமுத்தபா⁴வங் ப⁴ஜெய்யாதி வுத்தோதி.
262. Avasippatto jhānalābhīti sekkho vuttoti daṭṭhabbo. Puthujjano pana vasippatto avasippatto ca samayavimuttaasamayavimuttatantiyā aggahito, bhajāpiyamāno pana samāpattivikkhambhitānaṃ kilesānaṃ vasena samayavimuttabhāvaṃ bhajeyyāti vuttoti.
அரியபுக்³க³லஸங்ஸந்த³னபரிஹானிவண்ணனா நிட்டி²தா.
Ariyapuggalasaṃsandanaparihānivaṇṇanā niṭṭhitā.
3. ஸுத்தஸாத⁴னபரிஹானிவண்ணனா
3. Suttasādhanaparihānivaṇṇanā
265. உத்தமஹீனபே⁴தோ³ ‘‘தத்ர யாயங் படிபதா³ ஸுகா² கி²ப்பாபி⁴ஞ்ஞா, ஸா உப⁴யேனேவ பணீதா அக்கா²யதீ’’திஆதி³ஸுத்தவஸேன (தீ³॰ நி॰ 3.152) வுத்தோ. ‘‘தி³ட்ட²ங் ஸுதங் முத’’ந்தி எத்த² விய முதஸத்³தோ³ பத்தப்³ப³ங் வத³தீதி ஆஹ ‘‘பு²ஸனாரஹ’’ந்தி.
265. Uttamahīnabhedo ‘‘tatra yāyaṃ paṭipadā sukhā khippābhiññā, sā ubhayeneva paṇītā akkhāyatī’’tiādisuttavasena (dī. ni. 3.152) vutto. ‘‘Diṭṭhaṃ sutaṃ muta’’nti ettha viya mutasaddo pattabbaṃ vadatīti āha ‘‘phusanāraha’’nti.
267. அப்பத்தபரிஹானாய சேவ ஸங்வத்தந்தி யதா²கதஸன்னிட்டா²னஸ்ஸ ஸமயவிமுத்தஸ்ஸாதி அதி⁴ப்பாயோ.
267. Appattaparihānāya ceva saṃvattanti yathākatasanniṭṭhānassa samayavimuttassāti adhippāyo.
ஸுத்தஸாத⁴னபரிஹானிவண்ணனா நிட்டி²தா.
Suttasādhanaparihānivaṇṇanā niṭṭhitā.
பரிஹானிகதா²வண்ணனா நிட்டி²தா.
Parihānikathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / 2. பரிஹானிகதா² • 2. Parihānikathā
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 2. பரிஹானிகதா² • 2. Parihānikathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 2. பரிஹானிகதா² • 2. Parihānikathā
