| Library / Tipiṭaka / ತಿಪಿಟಕ • Tipiṭaka / ನೇತ್ತಿಪ್ಪಕರಣ-ಟೀಕಾ • Nettippakaraṇa-ṭīkā |
೧೫. ಪರಿಕ್ಖಾರಹಾರವಿಭಙ್ಗವಣ್ಣನಾ
15. Parikkhārahāravibhaṅgavaṇṇanā
೪೯. ‘‘ಹಿನೋತೀ’’ತಿ ಪದಸ್ಸ ಅತ್ಥಂ ದಸ್ಸೇನ್ತೋ ‘‘ಕಾರಣಭಾವಂ ಗಚ್ಛತೀ’’ತಿ ಆಹ ಅನೇಕತ್ಥತ್ತಾ ಧಾತೂನಂ। ಏತೀತಿ ಆಗಚ್ಛತಿ, ಉಪ್ಪಜ್ಜತೀತಿ ಅತ್ಥೋ।
49.‘‘Hinotī’’ti padassa atthaṃ dassento ‘‘kāraṇabhāvaṃ gacchatī’’ti āha anekatthattā dhātūnaṃ. Etīti āgacchati, uppajjatīti attho.
ಅವಿಜ್ಜಾಯಪಿ ಹೇತುಭಾವೇತಿ ಏತ್ಥ ಅವಿಜ್ಜಾ ಅನನ್ತರಾಯ ಅವಿಜ್ಜಾಯ ಅನನ್ತರಸಮನನ್ತರೂಪನಿಸ್ಸಯನತ್ಥಿವಿಗತಾಸೇವನಪಚ್ಚಯೇಹಿ, ಅನನ್ತರಾಯ ಪನ ಸಹಜಾತಾಯ ಸಹಜಾತಅಞ್ಞಮಞ್ಞನಿಸ್ಸಯಸಮ್ಪಯುತ್ತಅತ್ಥಿಅವಿಗತಹೇತುಪಚ್ಚಯೇಹಿ, ಅಸಹಜಾತಾಯ ಉಪನಿಸ್ಸಯಕೋಟಿಯಾ ಏವ ಪಚ್ಚಯೋ ಹೋತೀತಿ ವೇದಿತಬ್ಬಂ। ಅತ್ತನೋ ಫಲಂ ಕರೋತೀತಿ ಕಾರಣನ್ತಿ ಆಹ ‘‘ಕಾರಣಭಾವೋ ಚ ಫಲಾಪೇಕ್ಖಾಯಾ’’ತಿ।
Avijjāyapi hetubhāveti ettha avijjā anantarāya avijjāya anantarasamanantarūpanissayanatthivigatāsevanapaccayehi, anantarāya pana sahajātāya sahajātaaññamaññanissayasampayuttaatthiavigatahetupaccayehi, asahajātāya upanissayakoṭiyā eva paccayo hotīti veditabbaṃ. Attano phalaṃ karotīti kāraṇanti āha ‘‘kāraṇabhāvo ca phalāpekkhāyā’’ti.
ನಿಬ್ಬತ್ತಿಅತ್ಥೋ ಫಲತ್ಥೋ ಫಲಸಙ್ಖಾತೋ ಅತ್ಥೋ।
Nibbattiattho phalattho phalasaṅkhāto attho.
ಯೋ ಸಭಾವೋತಿ ಪುಞ್ಞಾದಿಅಭಿಸಙ್ಖಾರಾನಂ ಯೋ ಅಭಿಸಙ್ಖರಣಸಭಾವೋ, ಸೋ ಹೇತು। ಸೇಸಪದೇಸೂತಿ ವಿಞ್ಞಾಣಾದಿಪದೇಸು। ಯಥಾವುತ್ತಪ್ಪಭೇದೋತಿ ‘‘ಅಸಾಧಾರಣಲಕ್ಖಣೋ ಹೇತೂ’’ತಿಆದಿನಾ ವುತ್ತಪ್ಪಭೇದೋ। ಯೋ ಕೋಚಿ ಪಚ್ಚಯೋತಿ ಜನಕಾದಿಭೇದಂ ಯಂ ಕಿಞ್ಚಿ ಕಾರಣಂ। ಅಭಿಸಙ್ಖರಣತೋತಿ ಪಚ್ಚಕ್ಖತೋ, ಪರಮ್ಪರಾಯ ಚ ನಿಬ್ಬತ್ತನತೋ।
Yo sabhāvoti puññādiabhisaṅkhārānaṃ yo abhisaṅkharaṇasabhāvo, so hetu. Sesapadesūti viññāṇādipadesu. Yathāvuttappabhedoti ‘‘asādhāraṇalakkhaṇo hetū’’tiādinā vuttappabhedo. Yo kocipaccayoti janakādibhedaṃ yaṃ kiñci kāraṇaṃ. Abhisaṅkharaṇatoti paccakkhato, paramparāya ca nibbattanato.
ಪರಿಕ್ಖಾರಹಾರವಿಭಙ್ಗವಣ್ಣನಾ ನಿಟ್ಠಿತಾ।
Parikkhārahāravibhaṅgavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ನೇತ್ತಿಪ್ಪಕರಣಪಾಳಿ • Nettippakaraṇapāḷi / ೧೫. ಪರಿಕ್ಖಾರಹಾರವಿಭಙ್ಗೋ • 15. Parikkhārahāravibhaṅgo
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ನೇತ್ತಿಪ್ಪಕರಣ-ಅಟ್ಠಕಥಾ • Nettippakaraṇa-aṭṭhakathā / ೧೫. ಪರಿಕ್ಖಾರಹಾರವಿಭಙ್ಗವಣ್ಣನಾ • 15. Parikkhārahāravibhaṅgavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಖುದ್ದಕನಿಕಾಯ (ಟೀಕಾ) • Khuddakanikāya (ṭīkā) / ನೇತ್ತಿವಿಭಾವಿನೀ • Nettivibhāvinī / ೧೫. ಪರಿಕ್ಖಾರಹಾರವಿಭಙ್ಗವಿಭಾವನಾ • 15. Parikkhārahāravibhaṅgavibhāvanā
