| Library / Tipiṭaka / તિપિટક • Tipiṭaka / ખુદ્દસિક્ખા-મૂલસિક્ખા • Khuddasikkhā-mūlasikkhā |
૩૫. પરિક્ખારનિદ્દેસવણ્ણના
35. Parikkhāraniddesavaṇṇanā
૨૫૯-૨૬૦. ગિરિકૂટન્તિ મકરદન્તકં. સિબ્બિતુઞ્ચ છિન્દિતુઞ્ચ ન વટ્ટતીતિ સબ્બત્થ યોજના. દણ્ડેતિ છત્તદણ્ડે.
259-260.Girikūṭanti makaradantakaṃ. Sibbituñca chindituñca na vaṭṭatīti sabbattha yojanā. Daṇḍeti chattadaṇḍe.
૨૬૧. સિબ્બિતું વા પઞ્જરં વિનન્ધિતું વા થિરત્થં છત્તે બન્ધિતું દણ્ડે લેખા વટ્ટતીતિ સમ્બન્ધો. સચે વુત્તપ્પકારં અકપ્પિયછત્તં લભતિ, ઘટકમ્પિ વાળરૂપમ્પિ છિન્દિત્વા ધારેતબ્બં, લેખાપિ ઘંસેત્વા અપનેતબ્બા, સુત્તકેન વા દણ્ડો વેઠેતબ્બો.
261. Sibbituṃ vā pañjaraṃ vinandhituṃ vā thiratthaṃ chatte bandhituṃ daṇḍe lekhā vaṭṭatīti sambandho. Sace vuttappakāraṃ akappiyachattaṃ labhati, ghaṭakampi vāḷarūpampi chinditvā dhāretabbaṃ, lekhāpi ghaṃsetvā apanetabbā, suttakena vā daṇḍo veṭhetabbo.
૨૬૨. અનુવાતં સન્ધાય ‘‘અન્તે વા’’તિ વુત્તં. દ્વિન્નં પટ્ટાનં સઙ્ઘટિતટ્ઠાનં સન્ધાય ‘‘પટ્ટમુખે વાપી’’તિ વુત્તં. વરકસીસાકારેન સિબ્બનં સન્ધાય ‘‘વેણિકા’’તિ ચ સતપદાકારેન સિબ્બનં સન્ધાય ‘‘સઙ્ખલિકાપિ વા’’તિ ચ વુત્તં. સતપદિસદિસં અઞ્ઞં વા સૂચિવિકારં ન કપ્પતિ, પકતિસૂચિકમ્મમેવ વટ્ટતીતિ અત્થો. પાળિકણ્ણિકઆદિકં ચીવરે ન ચ કપ્પતીતિ સમ્બન્ધો.
262. Anuvātaṃ sandhāya ‘‘ante vā’’ti vuttaṃ. Dvinnaṃ paṭṭānaṃ saṅghaṭitaṭṭhānaṃ sandhāya ‘‘paṭṭamukhe vāpī’’ti vuttaṃ. Varakasīsākārena sibbanaṃ sandhāya ‘‘veṇikā’’ti ca satapadākārena sibbanaṃ sandhāya ‘‘saṅkhalikāpi vā’’ti ca vuttaṃ. Satapadisadisaṃ aññaṃ vā sūcivikāraṃ na kappati, pakatisūcikammameva vaṭṭatīti attho. Pāḷikaṇṇikaādikaṃ cīvare na ca kappatīti sambandho.
૨૬૩-૪. ચતુકોણાવ (પારા॰ અટ્ઠ॰ ૧.૮૫) કપ્પરેતિ સમ્બન્ધો. અગ્ઘિકન્તિ અગ્ઘિયં ચેતિયસદિસં. એત્થાતિ ગણ્ઠિપાસકપટ્ટે. કોણસુત્તા ચ પીળકાતિ ન કેવલં ચતુકોણા ગણ્ઠિકપાસકપટ્ટાવ કપ્પન્તિ, અથ ખો દુવિઞ્ઞેય્યા કોણસુત્તપીળકા ચ કપ્પરેતિ અત્થો. ગન્ધં તેલં વાતિ ગન્ધં વા તેલં વા.
263-4. Catukoṇāva (pārā. aṭṭha. 1.85) kappareti sambandho. Agghikanti agghiyaṃ cetiyasadisaṃ. Etthāti gaṇṭhipāsakapaṭṭe. Koṇasuttā ca pīḷakāti na kevalaṃ catukoṇā gaṇṭhikapāsakapaṭṭāva kappanti, atha kho duviññeyyā koṇasuttapīḷakā ca kappareti attho. Gandhaṃ telaṃ vāti gandhaṃ vā telaṃ vā.
૨૬૫. રત્તન્તિ (પારા॰ અટ્ઠ॰ ૧.૮૫) રજિતં. અઞ્ઞેન વાતિ મુગ્ગરાદિના વા. કત્વાતિ ઠપેત્વા. પહારે ન ચ મુટ્ઠિનાતિ મુટ્ઠિના ન પહારેય્યાતિ અત્થો.
265.Rattanti (pārā. aṭṭha. 1.85) rajitaṃ. Aññena vāti muggarādinā vā. Katvāti ṭhapetvā. Pahāre na ca muṭṭhināti muṭṭhinā na pahāreyyāti attho.
૨૬૬-૭. છત્તવટ્ટિયં (પારા॰ અટ્ઠ॰ ૧.૮૫) લેખં ઠપેત્વા ધમ્મકરણે લેખા ન વટ્ટતીતિ સમ્બન્ધો. કુઞ્ચિકાય ચ પિપ્ફલે ચ મણિકા ચ પીળકા ચ ન વટ્ટતીતિ સમ્બન્ધો. તત્થ મણિકાતિ એકા એવ વટ્ટમણિકા. પીળકા મુત્તરાજિસદિસા બહૂ.
266-7. Chattavaṭṭiyaṃ (pārā. aṭṭha. 1.85) lekhaṃ ṭhapetvā dhammakaraṇe lekhā na vaṭṭatīti sambandho. Kuñcikāya ca pipphale ca maṇikā ca pīḷakā ca na vaṭṭatīti sambandho. Tattha maṇikāti ekā eva vaṭṭamaṇikā. Pīḷakā muttarājisadisā bahū.
૨૬૮-૯. માલાદ્યરણિયન્તિ (પારા॰ અટ્ઠ॰ ૧.૮૫) અરણિયં માલાદિ વણ્ણમટ્ઠં ન વટ્ટતીતિ સમ્બન્ધો. એવં સબ્બત્થ. તિપુસીસમયે પત્તમણ્ડલે ભિત્તિકમ્મઞ્ચ ન વટ્ટતીતિ અત્થો. હિત્વાતિ ઠપેત્વા. સૂચિસણ્ડાસકો (પારા॰ અટ્ઠ॰ ૧.૮૫) નામ સૂચિં ડંસાપેત્વા ઘંસિતું કતો દારુમયો. ‘‘અનુજાનામિ, ભિક્ખવે, મકરદન્તકં છિન્દિતુ’’ન્તિ (ચૂળવ॰ ૨૫૩) વુત્તત્તા પત્તમણ્ડલે મકરદન્તકં વટ્ટતિ, અઞ્ઞં ભિત્તિકમ્માદિવિકારમેવ ન વટ્ટતિ, તસ્મા ગિરિકૂટં પત્તમણ્ડલે ઠપેત્વા અવસેસે ન વટ્ટતીતિ વેદિતબ્બં.
268-9.Mālādyaraṇiyanti (pārā. aṭṭha. 1.85) araṇiyaṃ mālādi vaṇṇamaṭṭhaṃ na vaṭṭatīti sambandho. Evaṃ sabbattha. Tipusīsamaye pattamaṇḍale bhittikammañca na vaṭṭatīti attho. Hitvāti ṭhapetvā. Sūcisaṇḍāsako (pārā. aṭṭha. 1.85) nāma sūciṃ ḍaṃsāpetvā ghaṃsituṃ kato dārumayo. ‘‘Anujānāmi, bhikkhave, makaradantakaṃ chinditu’’nti (cūḷava. 253) vuttattā pattamaṇḍale makaradantakaṃ vaṭṭati, aññaṃ bhittikammādivikārameva na vaṭṭati, tasmā girikūṭaṃ pattamaṇḍale ṭhapetvā avasese na vaṭṭatīti veditabbaṃ.
૨૭૨. સેનાસનેતિ (પારા॰ અટ્ઠ॰ ૧.૮૫) પાસાદાદિસેનાસનેતિ અત્થો.
272.Senāsaneti (pārā. aṭṭha. 1.85) pāsādādisenāsaneti attho.
૨૭૩. પુમિત્થિરૂપરહિતન્તિ પુરિસરૂપઇત્થિરૂપરહિતન્તિ અત્થો. પરિક્ખારવિનિચ્છયો.
273.Pumitthirūparahitanti purisarūpaitthirūparahitanti attho. Parikkhāravinicchayo.
પરિક્ખારનિદ્દેસવણ્ણના નિટ્ઠિતા.
Parikkhāraniddesavaṇṇanā niṭṭhitā.
