| Library / Tipiṭaka / തിപിടക • Tipiṭaka / ഖുദ്ദസിക്ഖാ-മൂലസിക്ഖാ • Khuddasikkhā-mūlasikkhā |
൩൫. പരിക്ഖാരനിദ്ദേസവണ്ണനാ
35. Parikkhāraniddesavaṇṇanā
൨൫൯-൨൬൦. ഗിരികൂടന്തി മകരദന്തകം. സിബ്ബിതുഞ്ച ഛിന്ദിതുഞ്ച ന വട്ടതീതി സബ്ബത്ഥ യോജനാ. ദണ്ഡേതി ഛത്തദണ്ഡേ.
259-260.Girikūṭanti makaradantakaṃ. Sibbituñca chindituñca na vaṭṭatīti sabbattha yojanā. Daṇḍeti chattadaṇḍe.
൨൬൧. സിബ്ബിതും വാ പഞ്ജരം വിനന്ധിതും വാ ഥിരത്ഥം ഛത്തേ ബന്ധിതും ദണ്ഡേ ലേഖാ വട്ടതീതി സമ്ബന്ധോ. സചേ വുത്തപ്പകാരം അകപ്പിയഛത്തം ലഭതി, ഘടകമ്പി വാളരൂപമ്പി ഛിന്ദിത്വാ ധാരേതബ്ബം, ലേഖാപി ഘംസേത്വാ അപനേതബ്ബാ, സുത്തകേന വാ ദണ്ഡോ വേഠേതബ്ബോ.
261. Sibbituṃ vā pañjaraṃ vinandhituṃ vā thiratthaṃ chatte bandhituṃ daṇḍe lekhā vaṭṭatīti sambandho. Sace vuttappakāraṃ akappiyachattaṃ labhati, ghaṭakampi vāḷarūpampi chinditvā dhāretabbaṃ, lekhāpi ghaṃsetvā apanetabbā, suttakena vā daṇḍo veṭhetabbo.
൨൬൨. അനുവാതം സന്ധായ ‘‘അന്തേ വാ’’തി വുത്തം. ദ്വിന്നം പട്ടാനം സങ്ഘടിതട്ഠാനം സന്ധായ ‘‘പട്ടമുഖേ വാപീ’’തി വുത്തം. വരകസീസാകാരേന സിബ്ബനം സന്ധായ ‘‘വേണികാ’’തി ച സതപദാകാരേന സിബ്ബനം സന്ധായ ‘‘സങ്ഖലികാപി വാ’’തി ച വുത്തം. സതപദിസദിസം അഞ്ഞം വാ സൂചിവികാരം ന കപ്പതി, പകതിസൂചികമ്മമേവ വട്ടതീതി അത്ഥോ. പാളികണ്ണികആദികം ചീവരേ ന ച കപ്പതീതി സമ്ബന്ധോ.
262. Anuvātaṃ sandhāya ‘‘ante vā’’ti vuttaṃ. Dvinnaṃ paṭṭānaṃ saṅghaṭitaṭṭhānaṃ sandhāya ‘‘paṭṭamukhe vāpī’’ti vuttaṃ. Varakasīsākārena sibbanaṃ sandhāya ‘‘veṇikā’’ti ca satapadākārena sibbanaṃ sandhāya ‘‘saṅkhalikāpi vā’’ti ca vuttaṃ. Satapadisadisaṃ aññaṃ vā sūcivikāraṃ na kappati, pakatisūcikammameva vaṭṭatīti attho. Pāḷikaṇṇikaādikaṃ cīvare na ca kappatīti sambandho.
൨൬൩-൪. ചതുകോണാവ (പാരാ॰ അട്ഠ॰ ൧.൮൫) കപ്പരേതി സമ്ബന്ധോ. അഗ്ഘികന്തി അഗ്ഘിയം ചേതിയസദിസം. ഏത്ഥാതി ഗണ്ഠിപാസകപട്ടേ. കോണസുത്താ ച പീളകാതി ന കേവലം ചതുകോണാ ഗണ്ഠികപാസകപട്ടാവ കപ്പന്തി, അഥ ഖോ ദുവിഞ്ഞേയ്യാ കോണസുത്തപീളകാ ച കപ്പരേതി അത്ഥോ. ഗന്ധം തേലം വാതി ഗന്ധം വാ തേലം വാ.
263-4. Catukoṇāva (pārā. aṭṭha. 1.85) kappareti sambandho. Agghikanti agghiyaṃ cetiyasadisaṃ. Etthāti gaṇṭhipāsakapaṭṭe. Koṇasuttā ca pīḷakāti na kevalaṃ catukoṇā gaṇṭhikapāsakapaṭṭāva kappanti, atha kho duviññeyyā koṇasuttapīḷakā ca kappareti attho. Gandhaṃ telaṃ vāti gandhaṃ vā telaṃ vā.
൨൬൫. രത്തന്തി (പാരാ॰ അട്ഠ॰ ൧.൮൫) രജിതം. അഞ്ഞേന വാതി മുഗ്ഗരാദിനാ വാ. കത്വാതി ഠപേത്വാ. പഹാരേ ന ച മുട്ഠിനാതി മുട്ഠിനാ ന പഹാരേയ്യാതി അത്ഥോ.
265.Rattanti (pārā. aṭṭha. 1.85) rajitaṃ. Aññena vāti muggarādinā vā. Katvāti ṭhapetvā. Pahāre na ca muṭṭhināti muṭṭhinā na pahāreyyāti attho.
൨൬൬-൭. ഛത്തവട്ടിയം (പാരാ॰ അട്ഠ॰ ൧.൮൫) ലേഖം ഠപേത്വാ ധമ്മകരണേ ലേഖാ ന വട്ടതീതി സമ്ബന്ധോ. കുഞ്ചികായ ച പിപ്ഫലേ ച മണികാ ച പീളകാ ച ന വട്ടതീതി സമ്ബന്ധോ. തത്ഥ മണികാതി ഏകാ ഏവ വട്ടമണികാ. പീളകാ മുത്തരാജിസദിസാ ബഹൂ.
266-7. Chattavaṭṭiyaṃ (pārā. aṭṭha. 1.85) lekhaṃ ṭhapetvā dhammakaraṇe lekhā na vaṭṭatīti sambandho. Kuñcikāya ca pipphale ca maṇikā ca pīḷakā ca na vaṭṭatīti sambandho. Tattha maṇikāti ekā eva vaṭṭamaṇikā. Pīḷakā muttarājisadisā bahū.
൨൬൮-൯. മാലാദ്യരണിയന്തി (പാരാ॰ അട്ഠ॰ ൧.൮൫) അരണിയം മാലാദി വണ്ണമട്ഠം ന വട്ടതീതി സമ്ബന്ധോ. ഏവം സബ്ബത്ഥ. തിപുസീസമയേ പത്തമണ്ഡലേ ഭിത്തികമ്മഞ്ച ന വട്ടതീതി അത്ഥോ. ഹിത്വാതി ഠപേത്വാ. സൂചിസണ്ഡാസകോ (പാരാ॰ അട്ഠ॰ ൧.൮൫) നാമ സൂചിം ഡംസാപേത്വാ ഘംസിതും കതോ ദാരുമയോ. ‘‘അനുജാനാമി, ഭിക്ഖവേ, മകരദന്തകം ഛിന്ദിതു’’ന്തി (ചൂളവ॰ ൨൫൩) വുത്തത്താ പത്തമണ്ഡലേ മകരദന്തകം വട്ടതി, അഞ്ഞം ഭിത്തികമ്മാദിവികാരമേവ ന വട്ടതി, തസ്മാ ഗിരികൂടം പത്തമണ്ഡലേ ഠപേത്വാ അവസേസേ ന വട്ടതീതി വേദിതബ്ബം.
268-9.Mālādyaraṇiyanti (pārā. aṭṭha. 1.85) araṇiyaṃ mālādi vaṇṇamaṭṭhaṃ na vaṭṭatīti sambandho. Evaṃ sabbattha. Tipusīsamaye pattamaṇḍale bhittikammañca na vaṭṭatīti attho. Hitvāti ṭhapetvā. Sūcisaṇḍāsako (pārā. aṭṭha. 1.85) nāma sūciṃ ḍaṃsāpetvā ghaṃsituṃ kato dārumayo. ‘‘Anujānāmi, bhikkhave, makaradantakaṃ chinditu’’nti (cūḷava. 253) vuttattā pattamaṇḍale makaradantakaṃ vaṭṭati, aññaṃ bhittikammādivikārameva na vaṭṭati, tasmā girikūṭaṃ pattamaṇḍale ṭhapetvā avasese na vaṭṭatīti veditabbaṃ.
൨൭൨. സേനാസനേതി (പാരാ॰ അട്ഠ॰ ൧.൮൫) പാസാദാദിസേനാസനേതി അത്ഥോ.
272.Senāsaneti (pārā. aṭṭha. 1.85) pāsādādisenāsaneti attho.
൨൭൩. പുമിത്ഥിരൂപരഹിതന്തി പുരിസരൂപഇത്ഥിരൂപരഹിതന്തി അത്ഥോ. പരിക്ഖാരവിനിച്ഛയോ.
273.Pumitthirūparahitanti purisarūpaitthirūparahitanti attho. Parikkhāravinicchayo.
പരിക്ഖാരനിദ്ദേസവണ്ണനാ നിട്ഠിതാ.
Parikkhāraniddesavaṇṇanā niṭṭhitā.
