| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
35. பரினிப்³பா³னஞாணனித்³தே³ஸோ
35. Parinibbānañāṇaniddeso
86. கத²ங் ஸம்பஜானஸ்ஸ பவத்தபரியாதா³னே பஞ்ஞா பரினிப்³பா³னே ஞாணங்? இத⁴ ஸம்பஜானோ நெக்க²ம்மேன காமச்ச²ந்த³ஸ்ஸ பவத்தங் பரியாதி³யதி, அப்³யாபாதே³ன ப்³யாபாத³ஸ்ஸ பவத்தங் பரியாதி³யதி, ஆலோகஸஞ்ஞாய தி²னமித்³த⁴ஸ்ஸ பவத்தங் பரியாதி³யதி, அவிக்கே²பேன உத்³த⁴ச்சஸ்ஸ பவத்தங் பரியாதி³யதி, த⁴ம்மவவத்தா²னேன விசிகிச்சா²ய…பே॰… ஞாணேன அவிஜ்ஜாய… பாமோஜ்ஜேன அரதியா … பட²மேன ஜா²னேன நீவரணானங் பவத்தங் பரியாதி³யதி…பே॰… அரஹத்தமக்³கே³ன ஸப்³ப³கிலேஸானங் பவத்தங் பரியாதி³யதி.
86. Kathaṃ sampajānassa pavattapariyādāne paññā parinibbāne ñāṇaṃ? Idha sampajāno nekkhammena kāmacchandassa pavattaṃ pariyādiyati, abyāpādena byāpādassa pavattaṃ pariyādiyati, ālokasaññāya thinamiddhassa pavattaṃ pariyādiyati, avikkhepena uddhaccassa pavattaṃ pariyādiyati, dhammavavatthānena vicikicchāya…pe… ñāṇena avijjāya… pāmojjena aratiyā … paṭhamena jhānena nīvaraṇānaṃ pavattaṃ pariyādiyati…pe… arahattamaggena sabbakilesānaṃ pavattaṃ pariyādiyati.
அத² வா பன ஸம்பஜானஸ்ஸ அனுபாதி³ஸேஸாய நிப்³பா³னதா⁴துயா பரினிப்³பா³யந்தஸ்ஸ இத³ஞ்சேவ சக்கு²பவத்தங் பரியாதி³யதி, அஞ்ஞஞ்ச சக்கு²பவத்தங் ந உப்பஜ்ஜதி. இத³ஞ்சேவ ஸோதபவத்தங்…பே॰… கா⁴னபவத்தங்… ஜிவ்ஹாபவத்தங்… காயபவத்தங்… மனோபவத்தங் பரியாதி³யதி, அஞ்ஞஞ்ச மனோபவத்தங் ந உப்பஜ்ஜதி. இத³ங் ஸம்பஜானஸ்ஸ பவத்தபரியாதா³னே பஞ்ஞா பரினிப்³பா³னே ஞாணங். தங் ஞாதட்டே²ன ஞாணங், பஜானநட்டே²ன பஞ்ஞா. தேன வுச்சதி – ‘‘ஸம்பஜானஸ்ஸ பவத்தபரியாதா³னே பஞ்ஞா பரினிப்³பா³னே ஞாணங்’’.
Atha vā pana sampajānassa anupādisesāya nibbānadhātuyā parinibbāyantassa idañceva cakkhupavattaṃ pariyādiyati, aññañca cakkhupavattaṃ na uppajjati. Idañceva sotapavattaṃ…pe… ghānapavattaṃ… jivhāpavattaṃ… kāyapavattaṃ… manopavattaṃ pariyādiyati, aññañca manopavattaṃ na uppajjati. Idaṃ sampajānassa pavattapariyādāne paññā parinibbāne ñāṇaṃ. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘sampajānassa pavattapariyādāne paññā parinibbāne ñāṇaṃ’’.
பரினிப்³பா³னஞாணனித்³தே³ஸோ பஞ்சதிங்ஸதிமோ.
Parinibbānañāṇaniddeso pañcatiṃsatimo.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 35. பரினிப்³பா³னஞாணனித்³தே³ஸவண்ணனா • 35. Parinibbānañāṇaniddesavaṇṇanā
