| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. பரிஸாஸுத்தவண்ணனா
9. Parisāsuttavaṇṇanā
69. நவமே க²த்தியபரிஸாதி க²த்தியானங் பரிஸானங் ஸன்னிபாதோ ஸமாக³மோ. ஏஸ நயோ ஸப்³ப³த்த². அனேகஸதங் க²த்தியபரிஸந்தி பி³ம்பி³ஸாரஸமாக³ம-ஞாதிஸமாக³ம-லிச்ச²விஸமாக³மாதி³ஸதி³ஸங், அஞ்ஞேஸு சக்கவாளேஸுபி லப்³ப⁴தேவ. ஸல்லபிதபுப்³ப³ந்தி ஆலாபஸல்லாபோ கதபுப்³போ³. ஸாகச்சா²தி த⁴ம்மஸாகச்சா²பி ஸமாபஜ்ஜிதபுப்³பா³. யாதி³ஸகோ தேஸங் வண்ணோதி தே ஓதா³தாபி ஹொந்தி காளாபி மங்கு³ரச்ச²வீபி, ஸத்தா² ஸுவண்ணவண்ணோ. இத³ங் பன ஸண்டா²னங் படிச்ச கதி²தங். ஸண்டா²னம்பி ச கேவலங் தேஸங் பஞ்ஞாயதியேவ. ந பன ப⁴க³வா மிலக்க²ஸதி³ஸோ ஹோதி, நாபி ஆமுத்தமணிகுண்ட³லோ, பு³த்³த⁴வேஸேனேவ நிஸீத³தி. தேபி அத்தனோ ஸமானஸண்டா²னமேவ பஸ்ஸந்தி. யாதி³ஸகோ தேஸங் ஸரோதி தே சி²ன்னஸ்ஸராபி ஹொந்தி க³க்³க³ஸ்ஸராபி காகஸ்ஸராபி, ஸத்தா² ப்³ரஹ்மஸ்ஸரோவ. இத³ங் பன பா⁴ஸந்தரங் ஸந்தா⁴ய கதி²தங். ஸசேபி ஹி ஸத்தா² ராஜாஸனே நிஸின்னோ கதே²தி, ‘‘அஜ்ஜ ராஜா மது⁴ரேன கதே²தீ’’தி நேஸங் ஹோதி. கதெ²த்வா பக்கந்தே பன ப⁴க³வதி புன ராஜானங் ஆக³தங் தி³ஸ்வா ‘‘கோ நு கோ² அய’’ந்தி வீமங்ஸா உப்பஜ்ஜதி. தத்த² கோ நு கோ² அயந்தி ‘‘இமஸ்மிங் டா²னே இதா³னேவ மாக³த⁴பா⁴ஸாய ஸீஹளபா⁴ஸாய மது⁴ரேன ஆகாரேன கதெ²ந்தோ கோ நு கோ² அயங் அந்தரஹிதோ, கிங் தே³வோ உதா³ஹு மனுஸ்ஸோ’’தி ஏவங் வீமங்ஸந்தாபி ந ஜானந்தீதி அத்தோ². கிமத்த²ங் பனேவங் அஜானந்தானங் த⁴ம்மங் தே³ஸேதீதி? வாஸனத்தா²ய. ஏவங் ஸுதோபி ஹி த⁴ம்மோ அனாக³தே பச்சயோ ஹோதீதி அனாக³தங் படிச்ச தே³ஸேதி. அனேகஸதங் ப்³ராஹ்மணபரிஸந்திஆதி³னங் ஸோணத³ண்ட³ஸமாக³மாதி³வஸேன சேவ அஞ்ஞசக்கவாளவஸேன ச ஸம்ப⁴வோ வேதி³தப்³போ³.
69. Navame khattiyaparisāti khattiyānaṃ parisānaṃ sannipāto samāgamo. Esa nayo sabbattha. Anekasataṃ khattiyaparisanti bimbisārasamāgama-ñātisamāgama-licchavisamāgamādisadisaṃ, aññesu cakkavāḷesupi labbhateva. Sallapitapubbanti ālāpasallāpo katapubbo. Sākacchāti dhammasākacchāpi samāpajjitapubbā. Yādisako tesaṃ vaṇṇoti te odātāpi honti kāḷāpi maṅguracchavīpi, satthā suvaṇṇavaṇṇo. Idaṃ pana saṇṭhānaṃ paṭicca kathitaṃ. Saṇṭhānampi ca kevalaṃ tesaṃ paññāyatiyeva. Na pana bhagavā milakkhasadiso hoti, nāpi āmuttamaṇikuṇḍalo, buddhaveseneva nisīdati. Tepi attano samānasaṇṭhānameva passanti. Yādisako tesaṃ saroti te chinnassarāpi honti gaggassarāpi kākassarāpi, satthā brahmassarova. Idaṃ pana bhāsantaraṃ sandhāya kathitaṃ. Sacepi hi satthā rājāsane nisinno katheti, ‘‘ajja rājā madhurena kathetī’’ti nesaṃ hoti. Kathetvā pakkante pana bhagavati puna rājānaṃ āgataṃ disvā ‘‘ko nu kho aya’’nti vīmaṃsā uppajjati. Tattha ko nu kho ayanti ‘‘imasmiṃ ṭhāne idāneva māgadhabhāsāya sīhaḷabhāsāya madhurena ākārena kathento ko nu kho ayaṃ antarahito, kiṃ devo udāhu manusso’’ti evaṃ vīmaṃsantāpi na jānantīti attho. Kimatthaṃ panevaṃ ajānantānaṃ dhammaṃ desetīti? Vāsanatthāya. Evaṃ sutopi hi dhammo anāgate paccayo hotīti anāgataṃ paṭicca deseti. Anekasataṃ brāhmaṇaparisantiādinaṃ soṇadaṇḍasamāgamādivasena ceva aññacakkavāḷavasena ca sambhavo veditabbo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. பரிஸாஸுத்தங் • 9. Parisāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. பரிஸாஸுத்தவண்ணனா • 9. Parisāsuttavaṇṇanā
