| Library / Tipiṭaka / တိပိဋက • Tipiṭaka / နေတ္တိပ္ပကရဏ-ဋီကာ • Nettippakaraṇa-ṭīkā |
၉. ပရိဝတ္တနဟာရဝိဘင္ဂဝဏ္ဏနာ
9. Parivattanahāravibhaṅgavaṇṇanā
၃၅. သမ္မာဒိဋ္ဌိသ္သ။ပေ.။ နိဇ္ဇိဏ္ဏာ ဘဝတီတိ ဧတ္ထ ယထာ မဂ္ဂသမ္မာဒိဋ္ဌိဝသေနတ္ထော ဝုတ္တော, ဧဝံ ကမ္မသ္သကတာကမ္မပထသမ္မာဒိဋ္ဌီနမ္ပိ ဝသေန အတ္ထော လဗ္ဘတေဝ။ ကမ္မပထကထာ ဟေသာ။ ယထာဝုတ္တေနာကာရေနာတိ ‘‘အဝိမုတ္တာဝ သမာနာ’’တိ, ‘‘အဝိမုတ္တိယ’’န္တိ စ ဝုတ္တပ္ပကာရေန။ မိစ္ဆာဘိနိဝေသဝသေနာတိ အသမ္မာသမ္ဗုဒ္ဓံ ဧဝ သမ္မာသမ္ဗုဒ္ဓောတိ, အနိယ္ယာနိကံ ဧဝ နိယ္ယာနိကောတိ, အသန္တံ ဧဝ ပန သန္တန္တိ, အနရိယံ ဧဝ အရိယောတိ ဝိပရီတာဘိနိဝေသဝသေန ။ မိစ္ဆာဓိမောက္ခောတိ အယာထာဝပသာဒော, အယာထာဝသန္နိဋ္ဌာနံ ဝာ။ ဥပ္ပန္နမောဟော မိစ္ဆာဝိမုတ္တိဉာဏဒသ္သနန္တိ သမ္ဗန္ဓော။
35.Sammādiṭṭhissa…pe… nijjiṇṇā bhavatīti ettha yathā maggasammādiṭṭhivasenattho vutto, evaṃ kammassakatākammapathasammādiṭṭhīnampi vasena attho labbhateva. Kammapathakathā hesā. Yathāvuttenākārenāti ‘‘avimuttāva samānā’’ti, ‘‘avimuttiya’’nti ca vuttappakārena. Micchābhinivesavasenāti asammāsambuddhaṃ eva sammāsambuddhoti, aniyyānikaṃ eva niyyānikoti, asantaṃ eva pana santanti, anariyaṃ eva ariyoti viparītābhinivesavasena . Micchādhimokkhoti ayāthāvapasādo, ayāthāvasanniṭṭhānaṃ vā. Uppannamoho micchāvimuttiñāṇadassananti sambandho.
၃၆. ဝာဒာနံ ဝာ အနုဝာဒာ ဝာဒာနုဝာဒာ, တေသံ ဝာဒာနံ ဥပာဒာတိ အတ္ထော။ ဝာဒာနုပဝတ္တိယောတိ ဝာဒာနံ ဒောသာနံ အနုပဝတ္တိယော။
36. Vādānaṃ vā anuvādā vādānuvādā, tesaṃ vādānaṃ upādāti attho. Vādānupavattiyoti vādānaṃ dosānaṃ anupavattiyo.
အန္တဒ္ဝယပရိဝတ္တနန္တိ ကာမသုခအတ္တကိလမထာနုယောဂသင္ခာတသ္သ အန္တဒ္ဝယသ္သ ပဋိပက္ခဝသေန ပရိဝတ္တနံ။
Antadvayaparivattananti kāmasukhaattakilamathānuyogasaṅkhātassa antadvayassa paṭipakkhavasena parivattanaṃ.
ဧတေသုပိ ဝာရေသူတိ ‘‘နိယ္ယာနိကော ဓမ္မော တေသံ အဓမ္မော, သုခော တေသံ အဓမ္မော’’တိ စ ဣမေသု ဝာရေသု။ ဝုတ္တနယေနာတိ ယဒိ အတ္တပရိတာပနံ အတ္တနော ဒုက္ခာပနံ ဓမ္မော, ဓမ္မသ္သ ပဋိဝိရုဒ္ဓော အဓမ္မော သိယာ, ဒုက္ခသ္သ စ သုခပဋိဝိရုဒ္ဓန္တိ ဈာနမဂ္ဂဖလသုခသ္သ, အနဝဇ္ဇပစ္စယပရိဘောဂသုခသ္သ စ တေသံ အဓမ္မဘာဝော အာပဇ္ဇတီတိ ဧဝံ ဝတ္တဗ္ဗာ။ ‘‘ယံ ယံ ဝာ ပနာတိအာဒိနာ’’တိ ဣဒံ အဝသေသပာဌာမသနံ။ ဧတ္ထ ယံ ယံ ဝာ ပန ဓမ္မန္တိ ယံ ဝာ တံ ဝာ ဓမ္မံ, ကုသလံ ဝာ အကုသလံ ဝာ ဣဋ္ဌံ ဝာ အနိဋ္ဌံ ဝာတိ ဝုတ္တံ ဟောတိ။ ရောစယတိ ဝာ ဥပဂစ္ဆတိ ဝာတိ စိတ္တေန ရောစတိ, ဒိဋ္ဌိယာ ဥပဂစ္ဆတီတိ။ တသ္သ တသ္သ ဓမ္မသ္သ ယော ပဋိပက္ခောတိ တသ္သ တသ္သ ရုစိတသ္သ, ဥပဂတသ္သ ဝာ ဓမ္မသ္သ ယော ပဋိပက္ခော နာမ။ သ္ဝသ္သ အနိဋ္ဌတော အဇ္ဈာပန္နော ဘဝတီတိ ယော ဓမ္မော အသ္သ ရုစိတသ္သ, ဥပဂတသ္သ ဝာ ဓမ္မသ္သ အနိဋ္ဌတော ပစ္စနီကတော အဗ္ဘုပဂတော ဟောတိ, တေန ပဋိပက္ခေန ဒေသနာယ ပရိဝတ္တနံ ပရိဝတ္တနော ဟာရောတိ အတ္ထော။ တေနာဟ ‘‘ပဋိပက္ခသ္သ လက္ခဏံ ဝိဘာဝေတီ’’တိ။
Etesupi vāresūti ‘‘niyyāniko dhammo tesaṃ adhammo, sukho tesaṃ adhammo’’ti ca imesu vāresu. Vuttanayenāti yadi attaparitāpanaṃ attano dukkhāpanaṃ dhammo, dhammassa paṭiviruddho adhammo siyā, dukkhassa ca sukhapaṭiviruddhanti jhānamaggaphalasukhassa, anavajjapaccayaparibhogasukhassa ca tesaṃ adhammabhāvo āpajjatīti evaṃ vattabbā. ‘‘Yaṃ yaṃ vā panātiādinā’’ti idaṃ avasesapāṭhāmasanaṃ. Ettha yaṃ yaṃ vā pana dhammanti yaṃ vā taṃ vā dhammaṃ, kusalaṃ vā akusalaṃ vā iṭṭhaṃ vā aniṭṭhaṃ vāti vuttaṃ hoti. Rocayati vā upagacchati vāti cittena rocati, diṭṭhiyā upagacchatīti. Tassa tassa dhammassa yo paṭipakkhoti tassa tassa rucitassa, upagatassa vā dhammassa yo paṭipakkho nāma. Svassa aniṭṭhato ajjhāpanno bhavatīti yo dhammo assa rucitassa, upagatassa vā dhammassa aniṭṭhato paccanīkato abbhupagato hoti, tena paṭipakkhena desanāya parivattanaṃ parivattano hāroti attho. Tenāha ‘‘paṭipakkhassa lakkhaṇaṃ vibhāvetī’’ti.
ပရိဝတ္တနဟာရဝိဘင္ဂဝဏ္ဏနာ နိဋ္ဌိတာ။
Parivattanahāravibhaṅgavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / နေတ္တိပ္ပကရဏပာဠိ • Nettippakaraṇapāḷi / ၉. ပရိဝတ္တနဟာရဝိဘင္ဂော • 9. Parivattanahāravibhaṅgo
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / နေတ္တိပ္ပကရဏ-အဋ္ဌကထာ • Nettippakaraṇa-aṭṭhakathā / ၉. ပရိဝတ္တနဟာရဝိဘင္ဂဝဏ္ဏနာ • 9. Parivattanahāravibhaṅgavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / ခုဒ္ဒကနိကာယ (ဋီကာ) • Khuddakanikāya (ṭīkā) / နေတ္တိဝိဘာဝိနီ • Nettivibhāvinī / ၉. ပရိဝတ္တနဟာရဝိဘင္ဂဝိဘာဝနာ • 9. Parivattanahāravibhaṅgavibhāvanā
