| Library / Tipiṭaka / திபிடக • Tipiṭaka / தீ³க⁴னிகாய • Dīghanikāya |
6. பாஸாதி³கஸுத்தங்
6. Pāsādikasuttaṃ
164. ஏவங் மே ஸுதங் – ஏகங் ஸமயங் ப⁴க³வா ஸக்கேஸு விஹரதி வேத⁴ஞ்ஞா நாம ஸக்யா, தேஸங் அம்ப³வனே பாஸாதே³.
164. Evaṃ me sutaṃ – ekaṃ samayaṃ bhagavā sakkesu viharati vedhaññā nāma sakyā, tesaṃ ambavane pāsāde.
நிக³ண்ட²னாடபுத்தகாலங்கிரியா
Nigaṇṭhanāṭaputtakālaṅkiriyā
தேன கோ² பன ஸமயேன நிக³ண்டோ² நாடபுத்தோ 1 பாவாயங் அது⁴னாகாலங்கதோ ஹோதி. தஸ்ஸ காலங்கிரியாய பி⁴ன்னா நிக³ண்டா² த்³வேதி⁴கஜாதா ப⁴ண்ட³னஜாதா கலஹஜாதா விவாதா³பன்னா அஞ்ஞமஞ்ஞங் முக²ஸத்தீஹி விதுத³ந்தா விஹரந்தி – ‘‘ந த்வங் இமங் த⁴ம்மவினயங் ஆஜானாஸி, அஹங் இமங் த⁴ம்மவினயங் ஆஜானாமி, கிங் த்வங் இமங் த⁴ம்மவினயங் ஆஜானிஸ்ஸஸி? மிச்சா²படிபன்னோ த்வமஸி, அஹமஸ்மி ஸம்மாபடிபன்னோ. ஸஹிதங் மே, அஸஹிதங் தே. புரேவசனீயங் பச்சா² அவச, பச்சா²வசனீயங் புரே அவச. அதி⁴சிண்ணங் தே விபராவத்தங், ஆரோபிதோ தே வாதோ³, நிக்³க³ஹிதோ த்வமஸி, சர வாத³ப்பமொக்கா²ய, நிப்³பே³டே²ஹி வா ஸசே பஹோஸீ’’தி. வதோ⁴யேவ கோ² 2 மஞ்ஞே நிக³ண்டே²ஸு நாடபுத்தியேஸு வத்ததி 3. யேபி நிக³ண்ட²ஸ்ஸ நாடபுத்தஸ்ஸ ஸாவகா கி³ஹீ ஓதா³தவஸனா , தேபி 4 நிக³ண்டே²ஸு நாடபுத்தியேஸு நிப்³பி³ன்னரூபா 5 விரத்தரூபா படிவானரூபா, யதா² தங் து³ரக்கா²தே த⁴ம்மவினயே து³ப்பவேதி³தே அனிய்யானிகே அனுபஸமஸங்வத்தனிகே அஸம்மாஸம்பு³த்³த⁴ப்பவேதி³தே பி⁴ன்னதூ²பே அப்படிஸரணே.
Tena kho pana samayena nigaṇṭho nāṭaputto 6 pāvāyaṃ adhunākālaṅkato hoti. Tassa kālaṅkiriyāya bhinnā nigaṇṭhā dvedhikajātā bhaṇḍanajātā kalahajātā vivādāpannā aññamaññaṃ mukhasattīhi vitudantā viharanti – ‘‘na tvaṃ imaṃ dhammavinayaṃ ājānāsi, ahaṃ imaṃ dhammavinayaṃ ājānāmi, kiṃ tvaṃ imaṃ dhammavinayaṃ ājānissasi? Micchāpaṭipanno tvamasi, ahamasmi sammāpaṭipanno. Sahitaṃ me, asahitaṃ te. Purevacanīyaṃ pacchā avaca, pacchāvacanīyaṃ pure avaca. Adhiciṇṇaṃ te viparāvattaṃ, āropito te vādo, niggahito tvamasi, cara vādappamokkhāya, nibbeṭhehi vā sace pahosī’’ti. Vadhoyeva kho 7 maññe nigaṇṭhesu nāṭaputtiyesu vattati 8. Yepi nigaṇṭhassa nāṭaputtassa sāvakā gihī odātavasanā , tepi 9 nigaṇṭhesu nāṭaputtiyesu nibbinnarūpā 10 virattarūpā paṭivānarūpā, yathā taṃ durakkhāte dhammavinaye duppavedite aniyyānike anupasamasaṃvattanike asammāsambuddhappavedite bhinnathūpe appaṭisaraṇe.
165. அத² கோ² சுந்தோ³ ஸமணுத்³தே³ஸோ பாவாயங் வஸ்ஸங்வுட்டோ² 11 யேன ஸாமகா³மோ, யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மந்தங் ஆனந்த³ங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² சுந்தோ³ ஸமணுத்³தே³ஸோ ஆயஸ்மந்தங் ஆனந்த³ங் ஏதத³வோச – ‘‘நிக³ண்டோ², ப⁴ந்தே, நாடபுத்தோ பாவாயங் அது⁴னாகாலங்கதோ. தஸ்ஸ காலங்கிரியாய பி⁴ன்னா நிக³ண்டா² த்³வேதி⁴கஜாதா…பே॰… பி⁴ன்னதூ²பே அப்படிஸரணே’’தி.
165. Atha kho cundo samaṇuddeso pāvāyaṃ vassaṃvuṭṭho 12 yena sāmagāmo, yenāyasmā ānando tenupasaṅkami; upasaṅkamitvā āyasmantaṃ ānandaṃ abhivādetvā ekamantaṃ nisīdi. Ekamantaṃ nisinno kho cundo samaṇuddeso āyasmantaṃ ānandaṃ etadavoca – ‘‘nigaṇṭho, bhante, nāṭaputto pāvāyaṃ adhunākālaṅkato. Tassa kālaṅkiriyāya bhinnā nigaṇṭhā dvedhikajātā…pe… bhinnathūpe appaṭisaraṇe’’ti.
ஏவங் வுத்தே, ஆயஸ்மா ஆனந்தோ³ சுந்த³ங் ஸமணுத்³தே³ஸங் ஏதத³வோச – ‘‘அத்தி² கோ² இத³ங், ஆவுஸோ சுந்த³, கதா²பாப⁴தங் ப⁴க³வந்தங் த³ஸ்ஸனாய. ஆயாமாவுஸோ சுந்த³, யேன ப⁴க³வா தேனுபஸங்கமிஸ்ஸாம; உபஸங்கமித்வா ஏதமத்த²ங் ப⁴க³வதோ ஆரோசெஸ்ஸாமா’’தி 13. ‘‘ஏவங், ப⁴ந்தே’’தி கோ² சுந்தோ³ ஸமணுத்³தே³ஸோ ஆயஸ்மதோ ஆனந்த³ஸ்ஸ பச்சஸ்ஸோஸி.
Evaṃ vutte, āyasmā ānando cundaṃ samaṇuddesaṃ etadavoca – ‘‘atthi kho idaṃ, āvuso cunda, kathāpābhataṃ bhagavantaṃ dassanāya. Āyāmāvuso cunda, yena bhagavā tenupasaṅkamissāma; upasaṅkamitvā etamatthaṃ bhagavato ārocessāmā’’ti 14. ‘‘Evaṃ, bhante’’ti kho cundo samaṇuddeso āyasmato ānandassa paccassosi.
அத² கோ² ஆயஸ்மா ச ஆனந்தோ³ சுந்தோ³ ச ஸமணுத்³தே³ஸோ யேன ப⁴க³வா தேனுபஸங்கமிங்ஸு; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னோ கோ² ஆயஸ்மா ஆனந்தோ³ ப⁴க³வந்தங் ஏதத³வோச – ‘‘அயங், ப⁴ந்தே, சுந்தோ³ ஸமணுத்³தே³ஸோ ஏவமாஹ, ‘நிக³ண்டோ², ப⁴ந்தே, நாடபுத்தோ பாவாயங் அது⁴னாகாலங்கதோ, தஸ்ஸ காலங்கிரியாய பி⁴ன்னா நிக³ண்டா²…பே॰… பி⁴ன்னதூ²பே அப்படிஸரணே’’’தி.
Atha kho āyasmā ca ānando cundo ca samaṇuddeso yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinno kho āyasmā ānando bhagavantaṃ etadavoca – ‘‘ayaṃ, bhante, cundo samaṇuddeso evamāha, ‘nigaṇṭho, bhante, nāṭaputto pāvāyaṃ adhunākālaṅkato, tassa kālaṅkiriyāya bhinnā nigaṇṭhā…pe… bhinnathūpe appaṭisaraṇe’’’ti.
அஸம்மாஸம்பு³த்³த⁴ப்பவேதி³தத⁴ம்மவினயோ
Asammāsambuddhappaveditadhammavinayo
166. ‘‘ஏவங் ஹேதங், சுந்த³, ஹோதி து³ரக்கா²தே த⁴ம்மவினயே து³ப்பவேதி³தே அனிய்யானிகே அனுபஸமஸங்வத்தனிகே அஸம்மாஸம்பு³த்³த⁴ப்பவேதி³தே. இத⁴, சுந்த³, ஸத்தா² ச ஹோதி அஸம்மாஸம்பு³த்³தோ⁴, த⁴ம்மோ ச து³ரக்கா²தோ து³ப்பவேதி³தோ அனிய்யானிகோ அனுபஸமஸங்வத்தனிகோ அஸம்மாஸம்பு³த்³த⁴ப்பவேதி³தோ, ஸாவகோ ச தஸ்மிங் த⁴ம்மே ந த⁴ம்மானுத⁴ம்மப்படிபன்னோ விஹரதி ந ஸாமீசிப்படிபன்னோ ந அனுத⁴ம்மசாரீ, வோக்கம்ம ச தம்ஹா த⁴ம்மா வத்ததி. ஸோ ஏவமஸ்ஸ வசனீயோ – ‘தஸ்ஸ தே, ஆவுஸோ, லாபா⁴, தஸ்ஸ தே ஸுலத்³த⁴ங், ஸத்தா² ச தே அஸம்மாஸம்பு³த்³தோ⁴, த⁴ம்மோ ச து³ரக்கா²தோ து³ப்பவேதி³தோ அனிய்யானிகோ அனுபஸமஸங்வத்தனிகோ அஸம்மாஸம்பு³த்³த⁴ப்பவேதி³தோ. த்வஞ்ச தஸ்மிங் த⁴ம்மே ந த⁴ம்மானுத⁴ம்மப்படிபன்னோ விஹரஸி, ந ஸாமீசிப்படிபன்னோ, ந அனுத⁴ம்மசாரீ, வோக்கம்ம ச தம்ஹா த⁴ம்மா வத்தஸீ’தி. இதி கோ², சுந்த³, ஸத்தா²பி தத்த² கா³ரய்ஹோ, த⁴ம்மோபி தத்த² கா³ரய்ஹோ, ஸாவகோ ச தத்த² ஏவங் பாஸங்ஸோ. யோ கோ², சுந்த³, ஏவரூபங் ஸாவகங் ஏவங் வதெ³ய்ய – ‘ஏதாயஸ்மா ததா² படிபஜ்ஜது, யதா² தே ஸத்தா²ரா த⁴ம்மோ தே³ஸிதோ பஞ்ஞத்தோ’தி. யோ ச ஸமாத³பேதி 15, யஞ்ச ஸமாத³பேதி, யோ ச ஸமாத³பிதோ 16 தத²த்தாய படிபஜ்ஜதி. ஸப்³பே³ தே ப³ஹுங் அபுஞ்ஞங் பஸவந்தி. தங் கிஸ்ஸ ஹேது? ஏவங் ஹேதங், சுந்த³, ஹோதி து³ரக்கா²தே த⁴ம்மவினயே து³ப்பவேதி³தே அனிய்யானிகே அனுபஸமஸங்வத்தனிகே அஸம்மாஸம்பு³த்³த⁴ப்பவேதி³தே.
166. ‘‘Evaṃ hetaṃ, cunda, hoti durakkhāte dhammavinaye duppavedite aniyyānike anupasamasaṃvattanike asammāsambuddhappavedite. Idha, cunda, satthā ca hoti asammāsambuddho, dhammo ca durakkhāto duppavedito aniyyāniko anupasamasaṃvattaniko asammāsambuddhappavedito, sāvako ca tasmiṃ dhamme na dhammānudhammappaṭipanno viharati na sāmīcippaṭipanno na anudhammacārī, vokkamma ca tamhā dhammā vattati. So evamassa vacanīyo – ‘tassa te, āvuso, lābhā, tassa te suladdhaṃ, satthā ca te asammāsambuddho, dhammo ca durakkhāto duppavedito aniyyāniko anupasamasaṃvattaniko asammāsambuddhappavedito. Tvañca tasmiṃ dhamme na dhammānudhammappaṭipanno viharasi, na sāmīcippaṭipanno, na anudhammacārī, vokkamma ca tamhā dhammā vattasī’ti. Iti kho, cunda, satthāpi tattha gārayho, dhammopi tattha gārayho, sāvako ca tattha evaṃ pāsaṃso. Yo kho, cunda, evarūpaṃ sāvakaṃ evaṃ vadeyya – ‘etāyasmā tathā paṭipajjatu, yathā te satthārā dhammo desito paññatto’ti. Yo ca samādapeti 17, yañca samādapeti, yo ca samādapito 18 tathattāya paṭipajjati. Sabbe te bahuṃ apuññaṃ pasavanti. Taṃ kissa hetu? Evaṃ hetaṃ, cunda, hoti durakkhāte dhammavinaye duppavedite aniyyānike anupasamasaṃvattanike asammāsambuddhappavedite.
167. ‘‘இத⁴ பன, சுந்த³, ஸத்தா² ச ஹோதி அஸம்மாஸம்பு³த்³தோ⁴, த⁴ம்மோ ச து³ரக்கா²தோ து³ப்பவேதி³தோ அனிய்யானிகோ அனுபஸமஸங்வத்தனிகோ அஸம்மாஸம்பு³த்³த⁴ப்பவேதி³தோ, ஸாவகோ ச தஸ்மிங் த⁴ம்மே த⁴ம்மானுத⁴ம்மப்படிபன்னோ விஹரதி ஸாமீசிப்படிபன்னோ அனுத⁴ம்மசாரீ, ஸமாதா³ய தங் த⁴ம்மங் வத்ததி. ஸோ ஏவமஸ்ஸ வசனீயோ – ‘தஸ்ஸ தே, ஆவுஸோ, அலாபா⁴, தஸ்ஸ தே து³ல்லத்³த⁴ங், ஸத்தா² ச தே அஸம்மாஸம்பு³த்³தோ⁴ , த⁴ம்மோ ச து³ரக்கா²தோ து³ப்பவேதி³தோ அனிய்யானிகோ அனுபஸமஸங்வத்தனிகோ அஸம்மாஸம்பு³த்³த⁴ப்பவேதி³தோ. த்வஞ்ச தஸ்மிங் த⁴ம்மே த⁴ம்மானுத⁴ம்மப்படிபன்னோ விஹரஸி ஸாமீசிப்படிபன்னோ அனுத⁴ம்மசாரீ, ஸமாதா³ய தங் த⁴ம்மங் வத்தஸீ’தி. இதி கோ², சுந்த³, ஸத்தா²பி தத்த² கா³ரய்ஹோ, த⁴ம்மோபி தத்த² கா³ரய்ஹோ, ஸாவகோபி தத்த² ஏவங் கா³ரய்ஹோ. யோ கோ², சுந்த³, ஏவரூபங் ஸாவகங் ஏவங் வதெ³ய்ய – ‘அத்³தா⁴யஸ்மா ஞாயப்படிபன்னோ ஞாயமாராதெ⁴ஸ்ஸதீ’தி. யோ ச பஸங்ஸதி, யஞ்ச பஸங்ஸதி, யோ ச பஸங்ஸிதோ பி⁴ய்யோஸோ மத்தாய வீரியங் ஆரப⁴தி. ஸப்³பே³ தே ப³ஹுங் அபுஞ்ஞங் பஸவந்தி. தங் கிஸ்ஸ ஹேது? ஏவஞ்ஹேதங், சுந்த³, ஹோதி து³ரக்கா²தே த⁴ம்மவினயே து³ப்பவேதி³தே அனிய்யானிகே அனுபஸமஸங்வத்தனிகே அஸம்மாஸம்பு³த்³த⁴ப்பவேதி³தே.
167. ‘‘Idha pana, cunda, satthā ca hoti asammāsambuddho, dhammo ca durakkhāto duppavedito aniyyāniko anupasamasaṃvattaniko asammāsambuddhappavedito, sāvako ca tasmiṃ dhamme dhammānudhammappaṭipanno viharati sāmīcippaṭipanno anudhammacārī, samādāya taṃ dhammaṃ vattati. So evamassa vacanīyo – ‘tassa te, āvuso, alābhā, tassa te dulladdhaṃ, satthā ca te asammāsambuddho , dhammo ca durakkhāto duppavedito aniyyāniko anupasamasaṃvattaniko asammāsambuddhappavedito. Tvañca tasmiṃ dhamme dhammānudhammappaṭipanno viharasi sāmīcippaṭipanno anudhammacārī, samādāya taṃ dhammaṃ vattasī’ti. Iti kho, cunda, satthāpi tattha gārayho, dhammopi tattha gārayho, sāvakopi tattha evaṃ gārayho. Yo kho, cunda, evarūpaṃ sāvakaṃ evaṃ vadeyya – ‘addhāyasmā ñāyappaṭipanno ñāyamārādhessatī’ti. Yo ca pasaṃsati, yañca pasaṃsati, yo ca pasaṃsito bhiyyoso mattāya vīriyaṃ ārabhati. Sabbe te bahuṃ apuññaṃ pasavanti. Taṃ kissa hetu? Evañhetaṃ, cunda, hoti durakkhāte dhammavinaye duppavedite aniyyānike anupasamasaṃvattanike asammāsambuddhappavedite.
ஸம்மாஸம்பு³த்³த⁴ப்பவேதி³தத⁴ம்மவினயோ
Sammāsambuddhappaveditadhammavinayo
168. ‘‘இத⁴ பன, சுந்த³, ஸத்தா² ச ஹோதி ஸம்மாஸம்பு³த்³தோ⁴, த⁴ம்மோ ச ஸ்வாக்கா²தோ ஸுப்பவேதி³தோ நிய்யானிகோ உபஸமஸங்வத்தனிகோ ஸம்மாஸம்பு³த்³த⁴ப்பவேதி³தோ, ஸாவகோ ச தஸ்மிங் த⁴ம்மே ந த⁴ம்மானுத⁴ம்மப்படிபன்னோ விஹரதி, ந ஸாமீசிப்படிபன்னோ, ந அனுத⁴ம்மசாரீ, வோக்கம்ம ச தம்ஹா த⁴ம்மா வத்ததி. ஸோ ஏவமஸ்ஸ வசனீயோ – ‘தஸ்ஸ தே, ஆவுஸோ, அலாபா⁴, தஸ்ஸ தே து³ல்லத்³த⁴ங், ஸத்தா² ச தே ஸம்மாஸம்பு³த்³தோ⁴, த⁴ம்மோ ச ஸ்வாக்கா²தோ ஸுப்பவேதி³தோ நிய்யானிகோ உபஸமஸங்வத்தனிகோ ஸம்மாஸம்பு³த்³த⁴ப்பவேதி³தோ. த்வஞ்ச தஸ்மிங் த⁴ம்மே ந த⁴ம்மானுத⁴ம்மப்படிபன்னோ விஹரஸி, ந ஸாமீசிப்படிபன்னோ, ந அனுத⁴ம்மசாரீ, வோக்கம்ம ச தம்ஹா த⁴ம்மா வத்தஸீ’தி. இதி கோ², சுந்த³, ஸத்தா²பி தத்த² பாஸங்ஸோ, த⁴ம்மோபி தத்த² பாஸங்ஸோ, ஸாவகோ ச தத்த² ஏவங் கா³ரய்ஹோ. யோ கோ², சுந்த³, ஏவரூபங் ஸாவகங் ஏவங் வதெ³ய்ய – ‘ஏதாயஸ்மா ததா² படிபஜ்ஜது யதா² தே ஸத்தா²ரா த⁴ம்மோ தே³ஸிதோ பஞ்ஞத்தோ’தி. யோ ச ஸமாத³பேதி, யஞ்ச ஸமாத³பேதி, யோ ச ஸமாத³பிதோ தத²த்தாய படிபஜ்ஜதி. ஸப்³பே³ தே ப³ஹுங் புஞ்ஞங் பஸவந்தி. தங் கிஸ்ஸ ஹேது? ஏவஞ்ஹேதங் , சுந்த³, ஹோதி ஸ்வாக்கா²தே த⁴ம்மவினயே ஸுப்பவேதி³தே நிய்யானிகே உபஸமஸங்வத்தனிகே ஸம்மாஸம்பு³த்³த⁴ப்பவேதி³தே.
168. ‘‘Idha pana, cunda, satthā ca hoti sammāsambuddho, dhammo ca svākkhāto suppavedito niyyāniko upasamasaṃvattaniko sammāsambuddhappavedito, sāvako ca tasmiṃ dhamme na dhammānudhammappaṭipanno viharati, na sāmīcippaṭipanno, na anudhammacārī, vokkamma ca tamhā dhammā vattati. So evamassa vacanīyo – ‘tassa te, āvuso, alābhā, tassa te dulladdhaṃ, satthā ca te sammāsambuddho, dhammo ca svākkhāto suppavedito niyyāniko upasamasaṃvattaniko sammāsambuddhappavedito. Tvañca tasmiṃ dhamme na dhammānudhammappaṭipanno viharasi, na sāmīcippaṭipanno, na anudhammacārī, vokkamma ca tamhā dhammā vattasī’ti. Iti kho, cunda, satthāpi tattha pāsaṃso, dhammopi tattha pāsaṃso, sāvako ca tattha evaṃ gārayho. Yo kho, cunda, evarūpaṃ sāvakaṃ evaṃ vadeyya – ‘etāyasmā tathā paṭipajjatu yathā te satthārā dhammo desito paññatto’ti. Yo ca samādapeti, yañca samādapeti, yo ca samādapito tathattāya paṭipajjati. Sabbe te bahuṃ puññaṃ pasavanti. Taṃ kissa hetu? Evañhetaṃ , cunda, hoti svākkhāte dhammavinaye suppavedite niyyānike upasamasaṃvattanike sammāsambuddhappavedite.
169. ‘‘இத⁴ பன, சுந்த³, ஸத்தா² ச ஹோதி ஸம்மாஸம்பு³த்³தோ⁴, த⁴ம்மோ ச ஸ்வாக்கா²தோ ஸுப்பவேதி³தோ நிய்யானிகோ உபஸமஸங்வத்தனிகோ ஸம்மாஸம்பு³த்³த⁴ப்பவேதி³தோ, ஸாவகோ ச தஸ்மிங் த⁴ம்மே த⁴ம்மானுத⁴ம்மப்படிபன்னோ விஹரதி ஸாமீசிப்படிபன்னோ அனுத⁴ம்மசாரீ, ஸமாதா³ய தங் த⁴ம்மங் வத்ததி. ஸோ ஏவமஸ்ஸ வசனீயோ – ‘தஸ்ஸ தே, ஆவுஸோ, லாபா⁴, தஸ்ஸ தே ஸுலத்³த⁴ங், ஸத்தா² ச தே 19 ஸம்மாஸம்பு³த்³தோ⁴ , த⁴ம்மோ ச ஸ்வாக்கா²தோ ஸுப்பவேதி³தோ நிய்யானிகோ உபஸமஸங்வத்தனிகோ ஸம்மாஸம்பு³த்³த⁴ப்பவேதி³தோ. த்வஞ்ச தஸ்மிங் த⁴ம்மே த⁴ம்மானுத⁴ம்மப்படிபன்னோ விஹரஸி ஸாமீசிப்படிபன்னோ அனுத⁴ம்மசாரீ, ஸமாதா³ய தங் த⁴ம்மங் வத்தஸீ’தி. இதி கோ², சுந்த³, ஸத்தா²பி தத்த² பாஸங்ஸோ, த⁴ம்மோபி தத்த² பாஸங்ஸோ, ஸாவகோபி தத்த² ஏவங் பாஸங்ஸோ. யோ கோ², சுந்த³, ஏவரூபங் ஸாவகங் ஏவங் வதெ³ய்ய – ‘அத்³தா⁴யஸ்மா ஞாயப்படிபன்னோ ஞாயமாராதெ⁴ஸ்ஸதீ’தி. யோ ச பஸங்ஸதி, யஞ்ச பஸங்ஸதி, யோ ச பஸங்ஸிதோ 20 பி⁴ய்யோஸோ மத்தாய வீரியங் ஆரப⁴தி. ஸப்³பே³ தே ப³ஹுங் புஞ்ஞங் பஸவந்தி. தங் கிஸ்ஸ ஹேது? ஏவஞ்ஹேதங், சுந்த³, ஹோதி ஸ்வாக்கா²தே த⁴ம்மவினயே ஸுப்பவேதி³தே நிய்யானிகே உபஸமஸங்வத்தனிகே ஸம்மாஸம்பு³த்³த⁴ப்பவேதி³தே.
169. ‘‘Idha pana, cunda, satthā ca hoti sammāsambuddho, dhammo ca svākkhāto suppavedito niyyāniko upasamasaṃvattaniko sammāsambuddhappavedito, sāvako ca tasmiṃ dhamme dhammānudhammappaṭipanno viharati sāmīcippaṭipanno anudhammacārī, samādāya taṃ dhammaṃ vattati. So evamassa vacanīyo – ‘tassa te, āvuso, lābhā, tassa te suladdhaṃ, satthā ca te 21 sammāsambuddho , dhammo ca svākkhāto suppavedito niyyāniko upasamasaṃvattaniko sammāsambuddhappavedito. Tvañca tasmiṃ dhamme dhammānudhammappaṭipanno viharasi sāmīcippaṭipanno anudhammacārī, samādāya taṃ dhammaṃ vattasī’ti. Iti kho, cunda, satthāpi tattha pāsaṃso, dhammopi tattha pāsaṃso, sāvakopi tattha evaṃ pāsaṃso. Yo kho, cunda, evarūpaṃ sāvakaṃ evaṃ vadeyya – ‘addhāyasmā ñāyappaṭipanno ñāyamārādhessatī’ti. Yo ca pasaṃsati, yañca pasaṃsati, yo ca pasaṃsito 22 bhiyyoso mattāya vīriyaṃ ārabhati. Sabbe te bahuṃ puññaṃ pasavanti. Taṃ kissa hetu? Evañhetaṃ, cunda, hoti svākkhāte dhammavinaye suppavedite niyyānike upasamasaṃvattanike sammāsambuddhappavedite.
ஸாவகானுதப்பஸத்து²
Sāvakānutappasatthu
170. ‘‘இத⁴ பன, சுந்த³, ஸத்தா² ச லோகே உத³பாதி³ அரஹங் ஸம்மாஸம்பு³த்³தோ⁴, த⁴ம்மோ ச ஸ்வாக்கா²தோ ஸுப்பவேதி³தோ நிய்யானிகோ உபஸமஸங்வத்தனிகோ ஸம்மாஸம்பு³த்³த⁴ப்பவேதி³தோ, அவிஞ்ஞாபிதத்தா² சஸ்ஸ ஹொந்தி ஸாவகா ஸத்³த⁴ம்மே, ந ச தேஸங் கேவலங் பரிபூரங் ப்³ரஹ்மசரியங் ஆவிகதங் ஹோதி உத்தானீகதங் ஸப்³ப³ஸங்கா³ஹபத³கதங் ஸப்பாடிஹீரகதங் யாவ தே³வமனுஸ்ஸேஹி ஸுப்பகாஸிதங். அத² நேஸங் ஸத்து²னோ அந்தரதா⁴னங் ஹோதி. ஏவரூபோ கோ², சுந்த³, ஸத்தா² ஸாவகானங் காலங்கதோ அனுதப்போ ஹோதி. தங் கிஸ்ஸ ஹேது? ஸத்தா² ச நோ லோகே உத³பாதி³ அரஹங் ஸம்மாஸம்பு³த்³தோ⁴, த⁴ம்மோ ச ஸ்வாக்கா²தோ ஸுப்பவேதி³தோ நிய்யானிகோ உபஸமஸங்வத்தனிகோ ஸம்மாஸம்பு³த்³த⁴ப்பவேதி³தோ, அவிஞ்ஞாபிதத்தா² சம்ஹ ஸத்³த⁴ம்மே, ந ச நோ கேவலங் பரிபூரங் ப்³ரஹ்மசரியங் ஆவிகதங் ஹோதி உத்தானீகதங் ஸப்³ப³ஸங்கா³ஹபத³கதங் ஸப்பாடிஹீரகதங் யாவ தே³வமனுஸ்ஸேஹி ஸுப்பகாஸிதங். அத² நோ ஸத்து²னோ அந்தரதா⁴னங் ஹோதீதி. ஏவரூபோ கோ², சுந்த³, ஸத்தா² ஸாவகானங் காலங்கதோ அனுதப்போ ஹோதி.
170. ‘‘Idha pana, cunda, satthā ca loke udapādi arahaṃ sammāsambuddho, dhammo ca svākkhāto suppavedito niyyāniko upasamasaṃvattaniko sammāsambuddhappavedito, aviññāpitatthā cassa honti sāvakā saddhamme, na ca tesaṃ kevalaṃ paripūraṃ brahmacariyaṃ āvikataṃ hoti uttānīkataṃ sabbasaṅgāhapadakataṃ sappāṭihīrakataṃ yāva devamanussehi suppakāsitaṃ. Atha nesaṃ satthuno antaradhānaṃ hoti. Evarūpo kho, cunda, satthā sāvakānaṃ kālaṅkato anutappo hoti. Taṃ kissa hetu? Satthā ca no loke udapādi arahaṃ sammāsambuddho, dhammo ca svākkhāto suppavedito niyyāniko upasamasaṃvattaniko sammāsambuddhappavedito, aviññāpitatthā camha saddhamme, na ca no kevalaṃ paripūraṃ brahmacariyaṃ āvikataṃ hoti uttānīkataṃ sabbasaṅgāhapadakataṃ sappāṭihīrakataṃ yāva devamanussehi suppakāsitaṃ. Atha no satthuno antaradhānaṃ hotīti. Evarūpo kho, cunda, satthā sāvakānaṃ kālaṅkato anutappo hoti.
ஸாவகானநுதப்பஸத்து²
Sāvakānanutappasatthu
171. ‘‘இத⁴ பன, சுந்த³, ஸத்தா² ச லோகே உத³பாதி³ அரஹங் ஸம்மாஸம்பு³த்³தோ⁴. த⁴ம்மோ ச ஸ்வாக்கா²தோ ஸுப்பவேதி³தோ நிய்யானிகோ உபஸமஸங்வத்தனிகோ ஸம்மாஸம்பு³த்³த⁴ப்பவேதி³தோ. விஞ்ஞாபிதத்தா² சஸ்ஸ ஹொந்தி ஸாவகா ஸத்³த⁴ம்மே, கேவலஞ்ச தேஸங் பரிபூரங் ப்³ரஹ்மசரியங் ஆவிகதங் ஹோதி உத்தானீகதங் ஸப்³ப³ஸங்கா³ஹபத³கதங் ஸப்பாடிஹீரகதங் யாவ தே³வமனுஸ்ஸேஹி ஸுப்பகாஸிதங். அத² நேஸங் ஸத்து²னோ அந்தரதா⁴னங் ஹோதி. ஏவரூபோ கோ², சுந்த³, ஸத்தா² ஸாவகானங் காலங்கதோ அனநுதப்போ ஹோதி . தங் கிஸ்ஸ ஹேது? ஸத்தா² ச நோ லோகே உத³பாதி³ அரஹங் ஸம்மாஸம்பு³த்³தோ⁴. த⁴ம்மோ ச ஸ்வாக்கா²தோ ஸுப்பவேதி³தோ நிய்யானிகோ உபஸமஸங்வத்தனிகோ ஸம்மாஸம்பு³த்³த⁴ப்பவேதி³தோ. விஞ்ஞாபிதத்தா² சம்ஹ ஸத்³த⁴ம்மே, கேவலஞ்ச நோ பரிபூரங் ப்³ரஹ்மசரியங் ஆவிகதங் ஹோதி உத்தானீகதங் ஸப்³ப³ஸங்கா³ஹபத³கதங் ஸப்பாடிஹீரகதங் யாவ தே³வமனுஸ்ஸேஹி ஸுப்பகாஸிதங் . அத² நோ ஸத்து²னோ அந்தரதா⁴னங் ஹோதீதி. ஏவரூபோ கோ², சுந்த³, ஸத்தா² ஸாவகானங் காலங்கதோ அனநுதப்போ ஹோதி.
171. ‘‘Idha pana, cunda, satthā ca loke udapādi arahaṃ sammāsambuddho. Dhammo ca svākkhāto suppavedito niyyāniko upasamasaṃvattaniko sammāsambuddhappavedito. Viññāpitatthā cassa honti sāvakā saddhamme, kevalañca tesaṃ paripūraṃ brahmacariyaṃ āvikataṃ hoti uttānīkataṃ sabbasaṅgāhapadakataṃ sappāṭihīrakataṃ yāva devamanussehi suppakāsitaṃ. Atha nesaṃ satthuno antaradhānaṃ hoti. Evarūpo kho, cunda, satthā sāvakānaṃ kālaṅkato ananutappo hoti . Taṃ kissa hetu? Satthā ca no loke udapādi arahaṃ sammāsambuddho. Dhammo ca svākkhāto suppavedito niyyāniko upasamasaṃvattaniko sammāsambuddhappavedito. Viññāpitatthā camha saddhamme, kevalañca no paripūraṃ brahmacariyaṃ āvikataṃ hoti uttānīkataṃ sabbasaṅgāhapadakataṃ sappāṭihīrakataṃ yāva devamanussehi suppakāsitaṃ . Atha no satthuno antaradhānaṃ hotīti. Evarūpo kho, cunda, satthā sāvakānaṃ kālaṅkato ananutappo hoti.
ப்³ரஹ்மசரியஅபரிபூராதி³கதா²
Brahmacariyaaparipūrādikathā
172. ‘‘ஏதேஹி சேபி, சுந்த³, அங்கே³ஹி ஸமன்னாக³தங் ப்³ரஹ்மசரியங் ஹோதி, நோ ச கோ² ஸத்தா² ஹோதி தே²ரோ ரத்தஞ்ஞூ சிரபப்³ப³ஜிதோ அத்³த⁴க³தோ வயோஅனுப்பத்தோ. ஏவங் தங் ப்³ரஹ்மசரியங் அபரிபூரங் ஹோதி தேனங்கே³ன.
172. ‘‘Etehi cepi, cunda, aṅgehi samannāgataṃ brahmacariyaṃ hoti, no ca kho satthā hoti thero rattaññū cirapabbajito addhagato vayoanuppatto. Evaṃ taṃ brahmacariyaṃ aparipūraṃ hoti tenaṅgena.
‘‘யதோ ச கோ², சுந்த³, ஏதேஹி சேவ அங்கே³ஹி ஸமன்னாக³தங் ப்³ரஹ்மசரியங் ஹோதி, ஸத்தா² ச ஹோதி தே²ரோ ரத்தஞ்ஞூ சிரபப்³ப³ஜிதோ அத்³த⁴க³தோ வயோஅனுப்பத்தோ. ஏவங் தங் ப்³ரஹ்மசரியங் பரிபூரங் ஹோதி தேனங்கே³ன.
‘‘Yato ca kho, cunda, etehi ceva aṅgehi samannāgataṃ brahmacariyaṃ hoti, satthā ca hoti thero rattaññū cirapabbajito addhagato vayoanuppatto. Evaṃ taṃ brahmacariyaṃ paripūraṃ hoti tenaṅgena.
173. ‘‘ஏதேஹி சேபி, சுந்த³, அங்கே³ஹி ஸமன்னாக³தங் ப்³ரஹ்மசரியங் ஹோதி, ஸத்தா² ச ஹோதி தே²ரோ ரத்தஞ்ஞூ சிரபப்³ப³ஜிதோ அத்³த⁴க³தோ வயோஅனுப்பத்தோ , நோ ச க்²வஸ்ஸ தே²ரா பி⁴க்கூ² ஸாவகா ஹொந்தி வியத்தா வினீதா விஸாரதா³ பத்தயோக³க்கே²மா. அலங் ஸமக்கா²துங் ஸத்³த⁴ம்மஸ்ஸ, அலங் உப்பன்னங் பரப்பவாத³ங் ஸஹத⁴ம்மேஹி ஸுனிக்³க³ஹிதங் நிக்³க³ஹெத்வா ஸப்பாடிஹாரியங் த⁴ம்மங் தே³ஸேதுங். ஏவங் தங் ப்³ரஹ்மசரியங் அபரிபூரங் ஹோதி தேனங்கே³ன.
173. ‘‘Etehi cepi, cunda, aṅgehi samannāgataṃ brahmacariyaṃ hoti, satthā ca hoti thero rattaññū cirapabbajito addhagato vayoanuppatto , no ca khvassa therā bhikkhū sāvakā honti viyattā vinītā visāradā pattayogakkhemā. Alaṃ samakkhātuṃ saddhammassa, alaṃ uppannaṃ parappavādaṃ sahadhammehi suniggahitaṃ niggahetvā sappāṭihāriyaṃ dhammaṃ desetuṃ. Evaṃ taṃ brahmacariyaṃ aparipūraṃ hoti tenaṅgena.
‘‘யதோ ச கோ², சுந்த³, ஏதேஹி சேவ அங்கே³ஹி ஸமன்னாக³தங் ப்³ரஹ்மசரியங் ஹோதி, ஸத்தா² ச ஹோதி தே²ரோ ரத்தஞ்ஞூ சிரபப்³ப³ஜிதோ அத்³த⁴க³தோ வயோஅனுப்பத்தோ, தே²ரா சஸ்ஸ பி⁴க்கூ² ஸாவகா ஹொந்தி வியத்தா வினீதா விஸாரதா³ பத்தயோக³க்கே²மா. அலங் ஸமக்கா²துங் ஸத்³த⁴ம்மஸ்ஸ, அலங் உப்பன்னங் பரப்பவாத³ங் ஸஹத⁴ம்மேஹி ஸுனிக்³க³ஹிதங் நிக்³க³ஹெத்வா ஸப்பாடிஹாரியங் த⁴ம்மங் தே³ஸேதுங். ஏவங் தங் ப்³ரஹ்மசரியங் பரிபூரங் ஹோதி தேனங்கே³ன.
‘‘Yato ca kho, cunda, etehi ceva aṅgehi samannāgataṃ brahmacariyaṃ hoti, satthā ca hoti thero rattaññū cirapabbajito addhagato vayoanuppatto, therā cassa bhikkhū sāvakā honti viyattā vinītā visāradā pattayogakkhemā. Alaṃ samakkhātuṃ saddhammassa, alaṃ uppannaṃ parappavādaṃ sahadhammehi suniggahitaṃ niggahetvā sappāṭihāriyaṃ dhammaṃ desetuṃ. Evaṃ taṃ brahmacariyaṃ paripūraṃ hoti tenaṅgena.
174. ‘‘ஏதேஹி சேபி, சுந்த³, அங்கே³ஹி ஸமன்னாக³தங் ப்³ரஹ்மசரியங் ஹோதி, ஸத்தா² ச ஹோதி தே²ரோ ரத்தஞ்ஞூ சிரபப்³ப³ஜிதோ அத்³த⁴க³தோ வயோஅனுப்பத்தோ, தே²ரா சஸ்ஸ பி⁴க்கூ² ஸாவகா ஹொந்தி வியத்தா வினீதா விஸாரதா³ பத்தயோக³க்கே²மா. அலங் ஸமக்கா²துங் ஸத்³த⁴ம்மஸ்ஸ, அலங் உப்பன்னங் பரப்பவாத³ங் ஸஹத⁴ம்மேஹி ஸுனிக்³க³ஹிதங் நிக்³க³ஹெத்வா ஸப்பாடிஹாரியங் த⁴ம்மங் தே³ஸேதுங். நோ ச க்²வஸ்ஸ மஜ்ஜி²மா பி⁴க்கூ² ஸாவகா ஹொந்தி…பே॰… மஜ்ஜி²மா சஸ்ஸ பி⁴க்கூ² ஸாவகா ஹொந்தி, நோ ச க்²வஸ்ஸ நவா பி⁴க்கூ² ஸாவகா ஹொந்தி…பே॰… நவா சஸ்ஸ பி⁴க்கூ² ஸாவகா ஹொந்தி, நோ ச க்²வஸ்ஸ தே²ரா பி⁴க்கு²னியோ ஸாவிகா ஹொந்தி…பே॰… தே²ரா சஸ்ஸ பி⁴க்கு²னியோ ஸாவிகா ஹொந்தி, நோ ச க்²வஸ்ஸ மஜ்ஜி²மா பி⁴க்கு²னியோ ஸாவிகா ஹொந்தி…பே॰… மஜ்ஜி²மா சஸ்ஸ பி⁴க்கு²னியோ ஸாவிகா ஹொந்தி , நோ ச க்²வஸ்ஸ நவா பி⁴க்கு²னியோ ஸாவிகா ஹொந்தி…பே॰… நவா சஸ்ஸ பி⁴க்கு²னியோ ஸாவிகா ஹொந்தி, நோ ச க்²வஸ்ஸ உபாஸகா ஸாவகா ஹொந்தி கி³ஹீ ஓதா³தவஸனா ப்³ரஹ்மசாரினோ…பே॰… உபாஸகா சஸ்ஸ ஸாவகா ஹொந்தி கி³ஹீ ஓதா³தவஸனா ப்³ரஹ்மசாரினோ, நோ ச க்²வஸ்ஸ உபாஸகா ஸாவகா ஹொந்தி கி³ஹீ ஓதா³தவஸனா காமபோ⁴கி³னோ…பே॰… உபாஸகா சஸ்ஸ ஸாவகா ஹொந்தி கி³ஹீ ஓதா³தவஸனா காமபோ⁴கி³னோ, நோ ச க்²வஸ்ஸ உபாஸிகா ஸாவிகா ஹொந்தி கி³ஹினியோ ஓதா³தவஸனா ப்³ரஹ்மசாரினியோ…பே॰… உபாஸிகா சஸ்ஸ ஸாவிகா ஹொந்தி கி³ஹினியோ ஓதா³தவஸனா ப்³ரஹ்மசாரினியோ, நோ ச க்²வஸ்ஸ உபாஸிகா ஸாவிகா ஹொந்தி கி³ஹினியோ ஓதா³தவஸனா காமபோ⁴கி³னியோ…பே॰… உபாஸிகா சஸ்ஸ ஸாவிகா ஹொந்தி கி³ஹினியோ ஓதா³தவஸனா காமபோ⁴கி³னியோ, நோ ச க்²வஸ்ஸ ப்³ரஹ்மசரியங் ஹோதி இத்³த⁴ஞ்சேவ பீ²தஞ்ச வித்தா²ரிகங் பா³ஹுஜஞ்ஞங் புது²பூ⁴தங் யாவ தே³வமனுஸ்ஸேஹி ஸுப்பகாஸிதங்…பே॰… ப்³ரஹ்மசரியஞ்சஸ்ஸ ஹோதி இத்³த⁴ஞ்சேவ பீ²தஞ்ச வித்தா²ரிகங் பா³ஹுஜஞ்ஞங் புது²பூ⁴தங் யாவ தே³வமனுஸ்ஸேஹி ஸுப்பகாஸிதங், நோ ச கோ² லாப⁴க்³க³யஸக்³க³ப்பத்தங். ஏவங் தங் ப்³ரஹ்மசரியங் அபரிபூரங் ஹோதி தேனங்கே³ன.
174. ‘‘Etehi cepi, cunda, aṅgehi samannāgataṃ brahmacariyaṃ hoti, satthā ca hoti thero rattaññū cirapabbajito addhagato vayoanuppatto, therā cassa bhikkhū sāvakā honti viyattā vinītā visāradā pattayogakkhemā. Alaṃ samakkhātuṃ saddhammassa, alaṃ uppannaṃ parappavādaṃ sahadhammehi suniggahitaṃ niggahetvā sappāṭihāriyaṃ dhammaṃ desetuṃ. No ca khvassa majjhimā bhikkhū sāvakā honti…pe… majjhimā cassa bhikkhū sāvakā honti, no ca khvassa navā bhikkhū sāvakā honti…pe… navā cassa bhikkhū sāvakā honti, no ca khvassa therā bhikkhuniyo sāvikā honti…pe… therā cassa bhikkhuniyo sāvikā honti, no ca khvassa majjhimā bhikkhuniyo sāvikā honti…pe… majjhimā cassa bhikkhuniyo sāvikā honti , no ca khvassa navā bhikkhuniyo sāvikā honti…pe… navā cassa bhikkhuniyo sāvikā honti, no ca khvassa upāsakā sāvakā honti gihī odātavasanā brahmacārino…pe… upāsakā cassa sāvakā honti gihī odātavasanā brahmacārino, no ca khvassa upāsakā sāvakā honti gihī odātavasanā kāmabhogino…pe… upāsakā cassa sāvakā honti gihī odātavasanā kāmabhogino, no ca khvassa upāsikā sāvikā honti gihiniyo odātavasanā brahmacāriniyo…pe… upāsikā cassa sāvikā honti gihiniyo odātavasanā brahmacāriniyo, no ca khvassa upāsikā sāvikā honti gihiniyo odātavasanā kāmabhoginiyo…pe… upāsikā cassa sāvikā honti gihiniyo odātavasanā kāmabhoginiyo, no ca khvassa brahmacariyaṃ hoti iddhañceva phītañca vitthārikaṃ bāhujaññaṃ puthubhūtaṃ yāva devamanussehi suppakāsitaṃ…pe… brahmacariyañcassa hoti iddhañceva phītañca vitthārikaṃ bāhujaññaṃ puthubhūtaṃ yāva devamanussehi suppakāsitaṃ, no ca kho lābhaggayasaggappattaṃ. Evaṃ taṃ brahmacariyaṃ aparipūraṃ hoti tenaṅgena.
‘‘யதோ ச கோ², சுந்த³, ஏதேஹி சேவ அங்கே³ஹி ஸமன்னாக³தங் ப்³ரஹ்மசரியங் ஹோதி, ஸத்தா² ச ஹோதி தே²ரோ ரத்தஞ்ஞூ சிரபப்³ப³ஜிதோ அத்³த⁴க³தோ வயோஅனுப்பத்தோ, தே²ரா சஸ்ஸ பி⁴க்கூ² ஸாவகா ஹொந்தி வியத்தா வினீதா விஸாரதா³ பத்தயோக³க்கே²மா. அலங் ஸமக்கா²துங் ஸத்³த⁴ம்மஸ்ஸ, அலங் உப்பன்னங் பரப்பவாத³ங் ஸஹத⁴ம்மேஹி ஸுனிக்³க³ஹிதங் நிக்³க³ஹெத்வா ஸப்பாடிஹாரியங் த⁴ம்மங் தே³ஸேதுங். மஜ்ஜி²மா சஸ்ஸ பி⁴க்கூ² ஸாவகா ஹொந்தி…பே॰… நவா சஸ்ஸ பி⁴க்கூ² ஸாவகா ஹொந்தி…பே॰… தே²ரா சஸ்ஸ பி⁴க்கு²னியோ ஸாவிகா ஹொந்தி…பே॰… மஜ்ஜி²மா சஸ்ஸ பி⁴க்கு²னியோ ஸாவிகா ஹொந்தி…பே॰… நவா சஸ்ஸ பி⁴க்கு²னியோ ஸாவிகா ஹொந்தி…பே॰… உபாஸகா சஸ்ஸ ஸாவகா ஹொந்தி…பே॰… கி³ஹீ ஓதா³தவஸனா ப்³ரஹ்மசாரினோ . உபாஸகா சஸ்ஸ ஸாவகா ஹொந்தி கி³ஹீ ஓதா³தவஸனா காமபோ⁴கி³னோ…பே॰… உபாஸிகா சஸ்ஸ ஸாவிகா ஹொந்தி கி³ஹினியோ ஓதா³தவஸனா ப்³ரஹ்மசாரினியோ…பே॰… உபாஸிகா சஸ்ஸ ஸாவிகா ஹொந்தி கி³ஹினியோ ஓதா³தவஸனா காமபோ⁴கி³னியோ…பே॰… ப்³ரஹ்மசரியஞ்சஸ்ஸ ஹோதி இத்³த⁴ஞ்சேவ பீ²தஞ்ச வித்தா²ரிகங் பா³ஹுஜஞ்ஞங் புது²பூ⁴தங் யாவ தே³வமனுஸ்ஸேஹி ஸுப்பகாஸிதங், லாப⁴க்³க³ப்பத்தஞ்ச யஸக்³க³ப்பத்தஞ்ச. ஏவங் தங் ப்³ரஹ்மசரியங் பரிபூரங் ஹோதி தேனங்கே³ன.
‘‘Yato ca kho, cunda, etehi ceva aṅgehi samannāgataṃ brahmacariyaṃ hoti, satthā ca hoti thero rattaññū cirapabbajito addhagato vayoanuppatto, therā cassa bhikkhū sāvakā honti viyattā vinītā visāradā pattayogakkhemā. Alaṃ samakkhātuṃ saddhammassa, alaṃ uppannaṃ parappavādaṃ sahadhammehi suniggahitaṃ niggahetvā sappāṭihāriyaṃ dhammaṃ desetuṃ. Majjhimā cassa bhikkhū sāvakā honti…pe… navā cassa bhikkhū sāvakā honti…pe… therā cassa bhikkhuniyo sāvikā honti…pe… majjhimā cassa bhikkhuniyo sāvikā honti…pe… navā cassa bhikkhuniyo sāvikā honti…pe… upāsakā cassa sāvakā honti…pe… gihī odātavasanā brahmacārino . Upāsakā cassa sāvakā honti gihī odātavasanā kāmabhogino…pe… upāsikā cassa sāvikā honti gihiniyo odātavasanā brahmacāriniyo…pe… upāsikā cassa sāvikā honti gihiniyo odātavasanā kāmabhoginiyo…pe… brahmacariyañcassa hoti iddhañceva phītañca vitthārikaṃ bāhujaññaṃ puthubhūtaṃ yāva devamanussehi suppakāsitaṃ, lābhaggappattañca yasaggappattañca. Evaṃ taṃ brahmacariyaṃ paripūraṃ hoti tenaṅgena.
175. ‘‘அஹங் கோ² பன, சுந்த³, ஏதரஹி ஸத்தா² லோகே உப்பன்னோ அரஹங் ஸம்மாஸம்பு³த்³தோ⁴. த⁴ம்மோ ச ஸ்வாக்கா²தோ ஸுப்பவேதி³தோ நிய்யானிகோ உபஸமஸங்வத்தனிகோ ஸம்மாஸம்பு³த்³த⁴ப்பவேதி³தோ. விஞ்ஞாபிதத்தா² ச மே ஸாவகா ஸத்³த⁴ம்மே, கேவலஞ்ச தேஸங் பரிபூரங் ப்³ரஹ்மசரியங் ஆவிகதங் உத்தானீகதங் ஸப்³ப³ஸங்கா³ஹபத³கதங் ஸப்பாடிஹீரகதங் யாவ தே³வமனுஸ்ஸேஹி ஸுப்பகாஸிதங். அஹங் கோ² பன, சுந்த³, ஏதரஹி ஸத்தா² தே²ரோ ரத்தஞ்ஞூ சிரபப்³ப³ஜிதோ அத்³த⁴க³தோ வயோஅனுப்பத்தோ.
175. ‘‘Ahaṃ kho pana, cunda, etarahi satthā loke uppanno arahaṃ sammāsambuddho. Dhammo ca svākkhāto suppavedito niyyāniko upasamasaṃvattaniko sammāsambuddhappavedito. Viññāpitatthā ca me sāvakā saddhamme, kevalañca tesaṃ paripūraṃ brahmacariyaṃ āvikataṃ uttānīkataṃ sabbasaṅgāhapadakataṃ sappāṭihīrakataṃ yāva devamanussehi suppakāsitaṃ. Ahaṃ kho pana, cunda, etarahi satthā thero rattaññū cirapabbajito addhagato vayoanuppatto.
‘‘ஸந்தி கோ² பன மே, சுந்த³, ஏதரஹி தே²ரா பி⁴க்கூ² ஸாவகா ஹொந்தி வியத்தா வினீதா விஸாரதா³ பத்தயோக³க்கே²மா. அலங் ஸமக்கா²துங் ஸத்³த⁴ம்மஸ்ஸ, அலங் உப்பன்னங் பரப்பவாத³ங் ஸஹத⁴ம்மேஹி ஸுனிக்³க³ஹிதங் நிக்³க³ஹெத்வா ஸப்பாடிஹாரியங் த⁴ம்மங் தே³ஸேதுங். ஸந்தி கோ² பன மே, சுந்த³ , ஏதரஹி மஜ்ஜி²மா பி⁴க்கூ² ஸாவகா…பே॰… ஸந்தி கோ² பன மே, சுந்த³, ஏதரஹி நவா பி⁴க்கூ² ஸாவகா…பே॰… ஸந்தி கோ² பன மே, சுந்த³, ஏதரஹி தே²ரா பி⁴க்கு²னியோ ஸாவிகா…பே॰… ஸந்தி கோ² பன மே, சுந்த³, ஏதரஹி மஜ்ஜி²மா பி⁴க்கு²னியோ ஸாவிகா…பே॰… ஸந்தி கோ² பன மே, சுந்த³, ஏதரஹி நவா பி⁴க்கு²னியோ ஸாவிகா…பே॰… ஸந்தி கோ² பன மே, சுந்த³, ஏதரஹி உபாஸகா ஸாவகா கி³ஹீ ஓதா³தவஸனா ப்³ரஹ்மசாரினோ…பே॰… ஸந்தி கோ² பன மே, சுந்த³, ஏதரஹி உபாஸகா ஸாவகா கி³ஹீ ஓதா³தவஸனா காமபோ⁴கி³னோ…பே॰… ஸந்தி கோ² பன மே, சுந்த³, ஏதரஹி உபாஸிகா ஸாவிகா கி³ஹினியோ ஓதா³தவஸனா ப்³ரஹ்மசாரினியோ…பே॰… ஸந்தி கோ² பன மே, சுந்த³, ஏதரஹி உபாஸிகா ஸாவிகா கி³ஹினியோ ஓதா³தவஸனா காமபோ⁴கி³னியோ…பே॰… ஏதரஹி கோ² பன மே, சுந்த³, ப்³ரஹ்மசரியங் இத்³த⁴ஞ்சேவ பீ²தஞ்ச வித்தா²ரிகங் பா³ஹுஜஞ்ஞங் புது²பூ⁴தங் யாவ தே³வமனுஸ்ஸேஹி ஸுப்பகாஸிதங்.
‘‘Santi kho pana me, cunda, etarahi therā bhikkhū sāvakā honti viyattā vinītā visāradā pattayogakkhemā. Alaṃ samakkhātuṃ saddhammassa, alaṃ uppannaṃ parappavādaṃ sahadhammehi suniggahitaṃ niggahetvā sappāṭihāriyaṃ dhammaṃ desetuṃ. Santi kho pana me, cunda , etarahi majjhimā bhikkhū sāvakā…pe… santi kho pana me, cunda, etarahi navā bhikkhū sāvakā…pe… santi kho pana me, cunda, etarahi therā bhikkhuniyo sāvikā…pe… santi kho pana me, cunda, etarahi majjhimā bhikkhuniyo sāvikā…pe… santi kho pana me, cunda, etarahi navā bhikkhuniyo sāvikā…pe… santi kho pana me, cunda, etarahi upāsakā sāvakā gihī odātavasanā brahmacārino…pe… santi kho pana me, cunda, etarahi upāsakā sāvakā gihī odātavasanā kāmabhogino…pe… santi kho pana me, cunda, etarahi upāsikā sāvikā gihiniyo odātavasanā brahmacāriniyo…pe… santi kho pana me, cunda, etarahi upāsikā sāvikā gihiniyo odātavasanā kāmabhoginiyo…pe… etarahi kho pana me, cunda, brahmacariyaṃ iddhañceva phītañca vitthārikaṃ bāhujaññaṃ puthubhūtaṃ yāva devamanussehi suppakāsitaṃ.
176. ‘‘யாவதா கோ², சுந்த³, ஏதரஹி ஸத்தா²ரோ லோகே உப்பன்னா, நாஹங், சுந்த³, அஞ்ஞங் ஏகஸத்தா²ரம்பி ஸமனுபஸ்ஸாமி ஏவங்லாப⁴க்³க³யஸக்³க³ப்பத்தங் யத²ரிவாஹங். யாவதா கோ² பன, சுந்த³, ஏதரஹி ஸங்கோ⁴ வா க³ணோ வா லோகே உப்பன்னோ; நாஹங், சுந்த³, அஞ்ஞங் ஏகங் ஸங்க⁴ம்பி ஸமனுபஸ்ஸாமி ஏவங்லாப⁴க்³க³யஸக்³க³ப்பத்தங் யத²ரிவாயங், சுந்த³, பி⁴க்கு²ஸங்கோ⁴. யங் கோ² தங், சுந்த³, ஸம்மா வத³மானோ வதெ³ய்ய – ‘ஸப்³பா³காரஸம்பன்னங் ஸப்³பா³காரபரிபூரங் அனூனமனதி⁴கங் ஸ்வாக்கா²தங் கேவலங் பரிபூரங் ப்³ரஹ்மசரியங் ஸுப்பகாஸித’ந்தி. இத³மேவ தங் ஸம்மா வத³மானோ வதெ³ய்ய – ‘ஸப்³பா³காரஸம்பன்னங்…பே॰… ஸுப்பகாஸித’ந்தி.
176. ‘‘Yāvatā kho, cunda, etarahi satthāro loke uppannā, nāhaṃ, cunda, aññaṃ ekasatthārampi samanupassāmi evaṃlābhaggayasaggappattaṃ yatharivāhaṃ. Yāvatā kho pana, cunda, etarahi saṅgho vā gaṇo vā loke uppanno; nāhaṃ, cunda, aññaṃ ekaṃ saṃghampi samanupassāmi evaṃlābhaggayasaggappattaṃ yatharivāyaṃ, cunda, bhikkhusaṅgho. Yaṃ kho taṃ, cunda, sammā vadamāno vadeyya – ‘sabbākārasampannaṃ sabbākāraparipūraṃ anūnamanadhikaṃ svākkhātaṃ kevalaṃ paripūraṃ brahmacariyaṃ suppakāsita’nti. Idameva taṃ sammā vadamāno vadeyya – ‘sabbākārasampannaṃ…pe… suppakāsita’nti.
‘‘உத³கோ 23 ஸுத³ங், சுந்த³, ராமபுத்தோ ஏவங் வாசங் பா⁴ஸதி – ‘பஸ்ஸங் ந பஸ்ஸதீ’தி. கிஞ்ச பஸ்ஸங் ந பஸ்ஸதீதி? கு²ரஸ்ஸ ஸாது⁴னிஸிதஸ்ஸ தலமஸ்ஸ பஸ்ஸதி, தா⁴ரஞ்ச க்²வஸ்ஸ ந பஸ்ஸதி. இத³ங் வுச்சதி – ‘பஸ்ஸங் ந பஸ்ஸதீ’தி. யங் கோ² பனேதங், சுந்த³, உத³கேன ராமபுத்தேன பா⁴ஸிதங் ஹீனங் க³ம்மங் போது²ஜ்ஜனிகங் அனரியங் அனத்த²ஸங்ஹிதங் கு²ரமேவ ஸந்தா⁴ய. யஞ்ச தங் 24, சுந்த³, ஸம்மா வத³மானோ வதெ³ய்ய – ‘பஸ்ஸங் ந பஸ்ஸதீ’தி, இத³மேவ தங் 25 ஸம்மா வத³மானோ வதெ³ய்ய – ‘பஸ்ஸங் ந பஸ்ஸதீ’தி. கிஞ்ச பஸ்ஸங் ந பஸ்ஸதீதி? ஏவங் ஸப்³பா³காரஸம்பன்னங் ஸப்³பா³காரபரிபூரங் அனூனமனதி⁴கங் ஸ்வாக்கா²தங் கேவலங் பரிபூரங் ப்³ரஹ்மசரியங் ஸுப்பகாஸிதந்தி, இதி ஹேதங் பஸ்ஸதி 26. இத³மெத்த² அபகட்³டெ⁴ய்ய, ஏவங் தங் பரிஸுத்³த⁴தரங் அஸ்ஸாதி, இதி ஹேதங் ந பஸ்ஸதி 27. இத³மெத்த² உபகட்³டெ⁴ய்ய, ஏவங் தங் பரிபூரங் 28 அஸ்ஸாதி, இதி ஹேதங் ந பஸ்ஸதி. இத³ங் வுச்சதி சுந்த³ – ‘பஸ்ஸங் ந பஸ்ஸதீ’தி. யங் கோ² தங், சுந்த³, ஸம்மா வத³மானோ வதெ³ய்ய – ‘ஸப்³பா³காரஸம்பன்னங்…பே॰… ப்³ரஹ்மசரியங் ஸுப்பகாஸித’ந்தி. இத³மேவ தங் ஸம்மா வத³மானோ வதெ³ய்ய – ‘ஸப்³பா³காரஸம்பன்னங் ஸப்³பா³காரபரிபூரங் அனூனமனதி⁴கங் ஸ்வாக்கா²தங் கேவலங் பரிபூரங் ப்³ரஹ்மசரியங் ஸுப்பகாஸித’ந்தி.
‘‘Udako 29 sudaṃ, cunda, rāmaputto evaṃ vācaṃ bhāsati – ‘passaṃ na passatī’ti. Kiñca passaṃ na passatīti? Khurassa sādhunisitassa talamassa passati, dhārañca khvassa na passati. Idaṃ vuccati – ‘passaṃ na passatī’ti. Yaṃ kho panetaṃ, cunda, udakena rāmaputtena bhāsitaṃ hīnaṃ gammaṃ pothujjanikaṃ anariyaṃ anatthasaṃhitaṃ khurameva sandhāya. Yañca taṃ 30, cunda, sammā vadamāno vadeyya – ‘passaṃ na passatī’ti, idameva taṃ 31 sammā vadamāno vadeyya – ‘passaṃ na passatī’ti. Kiñca passaṃ na passatīti? Evaṃ sabbākārasampannaṃ sabbākāraparipūraṃ anūnamanadhikaṃ svākkhātaṃ kevalaṃ paripūraṃ brahmacariyaṃ suppakāsitanti, iti hetaṃ passati 32. Idamettha apakaḍḍheyya, evaṃ taṃ parisuddhataraṃ assāti, iti hetaṃ na passati 33. Idamettha upakaḍḍheyya, evaṃ taṃ paripūraṃ 34 assāti, iti hetaṃ na passati. Idaṃ vuccati cunda – ‘passaṃ na passatī’ti. Yaṃ kho taṃ, cunda, sammā vadamāno vadeyya – ‘sabbākārasampannaṃ…pe… brahmacariyaṃ suppakāsita’nti. Idameva taṃ sammā vadamāno vadeyya – ‘sabbākārasampannaṃ sabbākāraparipūraṃ anūnamanadhikaṃ svākkhātaṃ kevalaṃ paripūraṃ brahmacariyaṃ suppakāsita’nti.
ஸங்கா³யிதப்³ப³த⁴ம்மோ
Saṅgāyitabbadhammo
177. தஸ்மாதிஹ, சுந்த³, யே வோ மயா த⁴ம்மா அபி⁴ஞ்ஞா தே³ஸிதா, தத்த² ஸப்³பே³ஹேவ ஸங்க³ம்ம ஸமாக³ம்ம அத்தே²ன அத்த²ங் ப்³யஞ்ஜனேன ப்³யஞ்ஜனங் ஸங்கா³யிதப்³ப³ங் ந விவதி³தப்³ப³ங், யத²யித³ங் ப்³ரஹ்மசரியங் அத்³த⁴னியங் அஸ்ஸ சிரட்டி²திகங், தத³ஸ்ஸ ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸானங். கதமே ச தே, சுந்த³ , த⁴ம்மா மயா அபி⁴ஞ்ஞா தே³ஸிதா, யத்த² ஸப்³பே³ஹேவ ஸங்க³ம்ம ஸமாக³ம்ம அத்தே²ன அத்த²ங் ப்³யஞ்ஜனேன ப்³யஞ்ஜனங் ஸங்கா³யிதப்³ப³ங் ந விவதி³தப்³ப³ங், யத²யித³ங் ப்³ரஹ்மசரியங் அத்³த⁴னியங் அஸ்ஸ சிரட்டி²திகங், தத³ஸ்ஸ ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸானங்? ஸெய்யதி²த³ங் – சத்தாரோ ஸதிபட்டா²னா, சத்தாரோ ஸம்மப்பதா⁴னா, சத்தாரோ இத்³தி⁴பாதா³, பஞ்சிந்த்³ரியானி, பஞ்ச ப³லானி, ஸத்த பொ³ஜ்ஜ²ங்கா³ , அரியோ அட்ட²ங்கி³கோ மக்³கோ³. இமே கோ² தே, சுந்த³, த⁴ம்மா மயா அபி⁴ஞ்ஞா தே³ஸிதா. யத்த² ஸப்³பே³ஹேவ ஸங்க³ம்ம ஸமாக³ம்ம அத்தே²ன அத்த²ங் ப்³யஞ்ஜனேன ப்³யஞ்ஜனங் ஸங்கா³யிதப்³ப³ங் ந விவதி³தப்³ப³ங், யத²யித³ங் ப்³ரஹ்மசரியங் அத்³த⁴னியங் அஸ்ஸ சிரட்டி²திகங், தத³ஸ்ஸ ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸானங்.
177. Tasmātiha, cunda, ye vo mayā dhammā abhiññā desitā, tattha sabbeheva saṅgamma samāgamma atthena atthaṃ byañjanena byañjanaṃ saṅgāyitabbaṃ na vivaditabbaṃ, yathayidaṃ brahmacariyaṃ addhaniyaṃ assa ciraṭṭhitikaṃ, tadassa bahujanahitāya bahujanasukhāya lokānukampāya atthāya hitāya sukhāya devamanussānaṃ. Katame ca te, cunda , dhammā mayā abhiññā desitā, yattha sabbeheva saṅgamma samāgamma atthena atthaṃ byañjanena byañjanaṃ saṅgāyitabbaṃ na vivaditabbaṃ, yathayidaṃ brahmacariyaṃ addhaniyaṃ assa ciraṭṭhitikaṃ, tadassa bahujanahitāya bahujanasukhāya lokānukampāya atthāya hitāya sukhāya devamanussānaṃ? Seyyathidaṃ – cattāro satipaṭṭhānā, cattāro sammappadhānā, cattāro iddhipādā, pañcindriyāni, pañca balāni, satta bojjhaṅgā , ariyo aṭṭhaṅgiko maggo. Ime kho te, cunda, dhammā mayā abhiññā desitā. Yattha sabbeheva saṅgamma samāgamma atthena atthaṃ byañjanena byañjanaṃ saṅgāyitabbaṃ na vivaditabbaṃ, yathayidaṃ brahmacariyaṃ addhaniyaṃ assa ciraṭṭhitikaṃ, tadassa bahujanahitāya bahujanasukhāya lokānukampāya atthāya hitāya sukhāya devamanussānaṃ.
ஸஞ்ஞாபேதப்³ப³விதி⁴
Saññāpetabbavidhi
178. ‘‘தேஸஞ்ச வோ, சுந்த³, ஸமக்³கா³னங் ஸம்மோத³மானானங் அவிவத³மானானங் ஸிக்க²தங் 35 அஞ்ஞதரோ ஸப்³ரஹ்மசாரீ ஸங்கே⁴ த⁴ம்மங் பா⁴ஸெய்ய. தத்ர சே தும்ஹாகங் ஏவமஸ்ஸ – ‘அயங் கோ² ஆயஸ்மா அத்த²ஞ்சேவ மிச்சா² க³ண்ஹாதி, ப்³யஞ்ஜனானி ச மிச்சா² ரோபேதீ’தி. தஸ்ஸ நேவ அபி⁴னந்தி³தப்³ப³ங் ந படிக்கோஸிதப்³ப³ங், அனபி⁴னந்தி³த்வா அப்படிக்கோஸித்வா ஸோ ஏவமஸ்ஸ வசனீயோ – ‘இமஸ்ஸ நு கோ², ஆவுஸோ, அத்த²ஸ்ஸ இமானி வா ப்³யஞ்ஜனானி ஏதானி வா ப்³யஞ்ஜனானி கதமானி ஓபாயிகதரானி, இமேஸஞ்ச 36 ப்³யஞ்ஜனானங் அயங் வா அத்தோ² ஏஸோ வா அத்தோ² கதமோ ஓபாயிகதரோ’தி ? ஸோ சே ஏவங் வதெ³ய்ய – ‘இமஸ்ஸ கோ², ஆவுஸோ, அத்த²ஸ்ஸ இமானேவ ப்³யஞ்ஜனானி ஓபாயிகதரானி, யா சேவ 37 ஏதானி; இமேஸஞ்ச 38 ப்³யஞ்ஜனானங் அயமேவ அத்தோ² ஓபாயிகதரோ, யா சேவ 39 ஏஸோ’தி. ஸோ நேவ உஸ்ஸாதே³தப்³போ³ ந அபஸாதே³தப்³போ³, அனுஸ்ஸாதெ³த்வா அனபஸாதெ³த்வா ஸ்வேவ ஸாது⁴கங் ஸஞ்ஞாபேதப்³போ³ தஸ்ஸ ச அத்த²ஸ்ஸ தேஸஞ்ச ப்³யஞ்ஜனானங் நிஸந்தியா.
178. ‘‘Tesañca vo, cunda, samaggānaṃ sammodamānānaṃ avivadamānānaṃ sikkhataṃ 40 aññataro sabrahmacārī saṅghe dhammaṃ bhāseyya. Tatra ce tumhākaṃ evamassa – ‘ayaṃ kho āyasmā atthañceva micchā gaṇhāti, byañjanāni ca micchā ropetī’ti. Tassa neva abhinanditabbaṃ na paṭikkositabbaṃ, anabhinanditvā appaṭikkositvā so evamassa vacanīyo – ‘imassa nu kho, āvuso, atthassa imāni vā byañjanāni etāni vā byañjanāni katamāni opāyikatarāni, imesañca 41 byañjanānaṃ ayaṃ vā attho eso vā attho katamo opāyikataro’ti ? So ce evaṃ vadeyya – ‘imassa kho, āvuso, atthassa imāneva byañjanāni opāyikatarāni, yā ceva 42 etāni; imesañca 43 byañjanānaṃ ayameva attho opāyikataro, yā ceva 44 eso’ti. So neva ussādetabbo na apasādetabbo, anussādetvā anapasādetvā sveva sādhukaṃ saññāpetabbo tassa ca atthassa tesañca byañjanānaṃ nisantiyā.
179. ‘‘அபரோபி சே, சுந்த³, ஸப்³ரஹ்மசாரீ ஸங்கே⁴ த⁴ம்மங் பா⁴ஸெய்ய. தத்ர சே தும்ஹாகங் ஏவமஸ்ஸ – ‘அயங் கோ² ஆயஸ்மா அத்த²ஞ்ஹி கோ² மிச்சா² க³ண்ஹாதி ப்³யஞ்ஜனானி ஸம்மா ரோபேதீ’தி. தஸ்ஸ நேவ அபி⁴னந்தி³தப்³ப³ங் ந படிக்கோஸிதப்³ப³ங், அனபி⁴னந்தி³த்வா அப்படிக்கோஸித்வா ஸோ ஏவமஸ்ஸ வசனீயோ – ‘இமேஸங் நு கோ², ஆவுஸோ, ப்³யஞ்ஜனானங் அயங் வா அத்தோ² ஏஸோ வா அத்தோ² கதமோ ஓபாயிகதரோ’தி? ஸோ சே ஏவங் வதெ³ய்ய – ‘இமேஸங் கோ², ஆவுஸோ, ப்³யஞ்ஜனானங் அயமேவ அத்தோ² ஓபாயிகதரோ, யா சேவ ஏஸோ’தி. ஸோ நேவ உஸ்ஸாதே³தப்³போ³ ந அபஸாதே³தப்³போ³, அனுஸ்ஸாதெ³த்வா அனபஸாதெ³த்வா ஸ்வேவ ஸாது⁴கங் ஸஞ்ஞாபேதப்³போ³ தஸ்ஸேவ அத்த²ஸ்ஸ நிஸந்தியா.
179. ‘‘Aparopi ce, cunda, sabrahmacārī saṅghe dhammaṃ bhāseyya. Tatra ce tumhākaṃ evamassa – ‘ayaṃ kho āyasmā atthañhi kho micchā gaṇhāti byañjanāni sammā ropetī’ti. Tassa neva abhinanditabbaṃ na paṭikkositabbaṃ, anabhinanditvā appaṭikkositvā so evamassa vacanīyo – ‘imesaṃ nu kho, āvuso, byañjanānaṃ ayaṃ vā attho eso vā attho katamo opāyikataro’ti? So ce evaṃ vadeyya – ‘imesaṃ kho, āvuso, byañjanānaṃ ayameva attho opāyikataro, yā ceva eso’ti. So neva ussādetabbo na apasādetabbo, anussādetvā anapasādetvā sveva sādhukaṃ saññāpetabbo tasseva atthassa nisantiyā.
180. ‘‘அபரோபி சே, சுந்த³, ஸப்³ரஹ்மசாரீ ஸங்கே⁴ த⁴ம்மங் பா⁴ஸெய்ய. தத்ர சே தும்ஹாகங் ஏவமஸ்ஸ – ‘அயங் கோ² ஆயஸ்மா அத்த²ஞ்ஹி கோ² ஸம்மா க³ண்ஹாதி ப்³யஞ்ஜனானி மிச்சா² ரோபேதீ’தி. தஸ்ஸ நேவ அபி⁴னந்தி³தப்³ப³ங் ந படிக்கோஸிதப்³ப³ங்; அனபி⁴னந்தி³த்வா அப்படிக்கோஸித்வா ஸோ ஏவமஸ்ஸ வசனீயோ – ‘இமஸ்ஸ நு கோ², ஆவுஸோ, அத்த²ஸ்ஸ இமானி வா ப்³யஞ்ஜனானி ஏதானி வா ப்³யஞ்ஜனானி கதமானி ஓபாயிகதரானீ’தி? ஸோ சே ஏவங் வதெ³ய்ய – ‘இமஸ்ஸ கோ², ஆவுஸோ, அத்த²ஸ்ஸ இமானேவ ப்³யஞ்ஜனானி ஓபயிகதரானி, யானி சேவ ஏதானீ’தி . ஸோ நேவ உஸ்ஸாதே³தப்³போ³ ந அபஸாதே³தப்³போ³; அனுஸ்ஸாதெ³த்வா அனபஸாதெ³த்வா ஸ்வேவ ஸாது⁴கங் ஸஞ்ஞாபேதப்³போ³ தேஸஞ்ஞேவ ப்³யஞ்ஜனானங் நிஸந்தியா.
180. ‘‘Aparopi ce, cunda, sabrahmacārī saṅghe dhammaṃ bhāseyya. Tatra ce tumhākaṃ evamassa – ‘ayaṃ kho āyasmā atthañhi kho sammā gaṇhāti byañjanāni micchā ropetī’ti. Tassa neva abhinanditabbaṃ na paṭikkositabbaṃ; anabhinanditvā appaṭikkositvā so evamassa vacanīyo – ‘imassa nu kho, āvuso, atthassa imāni vā byañjanāni etāni vā byañjanāni katamāni opāyikatarānī’ti? So ce evaṃ vadeyya – ‘imassa kho, āvuso, atthassa imāneva byañjanāni opayikatarāni, yāni ceva etānī’ti . So neva ussādetabbo na apasādetabbo; anussādetvā anapasādetvā sveva sādhukaṃ saññāpetabbo tesaññeva byañjanānaṃ nisantiyā.
181. ‘‘அபரோபி சே, சுந்த³, ஸப்³ரஹ்மசாரீ ஸங்கே⁴ த⁴ம்மங் பா⁴ஸெய்ய. தத்ர சே தும்ஹாகங் ஏவமஸ்ஸ – ‘அயங் கோ² ஆயஸ்மா அத்த²ஞ்சேவ ஸம்மா க³ண்ஹாதி ப்³யஞ்ஜனானி ச ஸம்மா ரோபேதீ’தி. தஸ்ஸ ‘ஸாதூ⁴’தி பா⁴ஸிதங் அபி⁴னந்தி³தப்³ப³ங் அனுமோதி³தப்³ப³ங்; தஸ்ஸ ‘ஸாதூ⁴’தி பா⁴ஸிதங் அபி⁴னந்தி³த்வா அனுமோதி³த்வா ஸோ ஏவமஸ்ஸ வசனீயோ – ‘லாபா⁴ நோ ஆவுஸோ, ஸுலத்³த⁴ங் நோ ஆவுஸோ, யே மயங் ஆயஸ்மந்தங் தாதி³ஸங் ஸப்³ரஹ்மசாரிங் பஸ்ஸாம ஏவங் அத்து²பேதங் ப்³யஞ்ஜனுபேத’ந்தி.
181. ‘‘Aparopi ce, cunda, sabrahmacārī saṅghe dhammaṃ bhāseyya. Tatra ce tumhākaṃ evamassa – ‘ayaṃ kho āyasmā atthañceva sammā gaṇhāti byañjanāni ca sammā ropetī’ti. Tassa ‘sādhū’ti bhāsitaṃ abhinanditabbaṃ anumoditabbaṃ; tassa ‘sādhū’ti bhāsitaṃ abhinanditvā anumoditvā so evamassa vacanīyo – ‘lābhā no āvuso, suladdhaṃ no āvuso, ye mayaṃ āyasmantaṃ tādisaṃ sabrahmacāriṃ passāma evaṃ atthupetaṃ byañjanupeta’nti.
பச்சயானுஞ்ஞாதகாரணங்
Paccayānuññātakāraṇaṃ
182. ‘‘ந வோ அஹங், சுந்த³, தி³ட்ட²த⁴ம்மிகானங்யேவ ஆஸவானங் ஸங்வராய த⁴ம்மங் தே³ஸேமி. ந பனாஹங், சுந்த³, ஸம்பராயிகானங்யேவ ஆஸவானங் படிகா⁴தாய த⁴ம்மங் தே³ஸேமி. தி³ட்ட²த⁴ம்மிகானங் சேவாஹங், சுந்த³, ஆஸவானங் ஸங்வராய த⁴ம்மங் தே³ஸேமி; ஸம்பராயிகானஞ்ச ஆஸவானங் படிகா⁴தாய. தஸ்மாதிஹ, சுந்த³, யங் வோ மயா சீவரங் அனுஞ்ஞாதங், அலங் வோ தங் – யாவதே³வ ஸீதஸ்ஸ படிகா⁴தாய, உண்ஹஸ்ஸ படிகா⁴தாய, ட³ங்ஸமகஸவாதாதபஸரீஸப 45 ஸம்ப²ஸ்ஸானங் படிகா⁴தாய, யாவதே³வ ஹிரிகோபீனபடிச்சா²த³னத்த²ங். யோ வோ மயா பிண்ட³பாதோ அனுஞ்ஞாதோ, அலங் வோ ஸோ யாவதே³வ இமஸ்ஸ காயஸ்ஸ டி²தியா யாபனாய விஹிங்ஸூபரதியா ப்³ரஹ்மசரியானுக்³க³ஹாய, இதி புராணஞ்ச வேத³னங் படிஹங்கா²மி, நவஞ்ச வேத³னங் ந உப்பாதெ³ஸ்ஸாமி, யாத்ரா ச மே ப⁴விஸ்ஸதி அனவஜ்ஜதா ச பா²ஸுவிஹாரோ ச 46. யங் வோ மயா ஸேனாஸனங் அனுஞ்ஞாதங், அலங் வோ தங் யாவதே³வ ஸீதஸ்ஸ படிகா⁴தாய, உண்ஹஸ்ஸ படிகா⁴தாய, ட³ங்ஸமகஸவாதாதபஸரீஸபஸம்ப²ஸ்ஸானங் படிகா⁴தாய, யாவதே³வ உதுபரிஸ்ஸயவினோத³ன படிஸல்லானாராமத்த²ங். யோ வோ மயா கி³லானபச்சயபே⁴ஸஜ்ஜ பரிக்கா²ரோ அனுஞ்ஞாதோ, அலங் வோ ஸோ யாவதே³வ உப்பன்னானங் வெய்யாபா³தி⁴கானங் வேத³னானங் படிகா⁴தாய அப்³யாபஜ்ஜபரமதாய 47.
182. ‘‘Na vo ahaṃ, cunda, diṭṭhadhammikānaṃyeva āsavānaṃ saṃvarāya dhammaṃ desemi. Na panāhaṃ, cunda, samparāyikānaṃyeva āsavānaṃ paṭighātāya dhammaṃ desemi. Diṭṭhadhammikānaṃ cevāhaṃ, cunda, āsavānaṃ saṃvarāya dhammaṃ desemi; samparāyikānañca āsavānaṃ paṭighātāya. Tasmātiha, cunda, yaṃ vo mayā cīvaraṃ anuññātaṃ, alaṃ vo taṃ – yāvadeva sītassa paṭighātāya, uṇhassa paṭighātāya, ḍaṃsamakasavātātapasarīsapa 48 samphassānaṃ paṭighātāya, yāvadeva hirikopīnapaṭicchādanatthaṃ. Yo vo mayā piṇḍapāto anuññāto, alaṃ vo so yāvadeva imassa kāyassa ṭhitiyā yāpanāya vihiṃsūparatiyā brahmacariyānuggahāya, iti purāṇañca vedanaṃ paṭihaṅkhāmi, navañca vedanaṃ na uppādessāmi, yātrā ca me bhavissati anavajjatā ca phāsuvihāro ca 49. Yaṃ vo mayā senāsanaṃ anuññātaṃ, alaṃ vo taṃ yāvadeva sītassa paṭighātāya, uṇhassa paṭighātāya, ḍaṃsamakasavātātapasarīsapasamphassānaṃ paṭighātāya, yāvadeva utuparissayavinodana paṭisallānārāmatthaṃ. Yo vo mayā gilānapaccayabhesajja parikkhāro anuññāto, alaṃ vo so yāvadeva uppannānaṃ veyyābādhikānaṃ vedanānaṃ paṭighātāya abyāpajjaparamatāya 50.
ஸுக²ல்லிகானுயோகோ³
Sukhallikānuyogo
183. ‘‘டா²னங் கோ² பனேதங், சுந்த³, விஜ்ஜதி யங் அஞ்ஞதித்தி²யா பரிப்³பா³ஜகா ஏவங் வதெ³ய்யுங் – ‘ஸுக²ல்லிகானுயோக³மனுயுத்தா ஸமணா ஸக்யபுத்தியா விஹரந்தீ’தி. ஏவங்வாதி³னோ 51, சுந்த³, அஞ்ஞதித்தி²யா பரிப்³பா³ஜகா ஏவமஸ்ஸு வசனீயா – ‘கதமோ ஸோ , ஆவுஸோ, ஸுக²ல்லிகானுயோகோ³? ஸுக²ல்லிகானுயோகா³ ஹி ப³ஹூ அனேகவிஹிதா நானப்பகாரகா’தி.
183. ‘‘Ṭhānaṃ kho panetaṃ, cunda, vijjati yaṃ aññatitthiyā paribbājakā evaṃ vadeyyuṃ – ‘sukhallikānuyogamanuyuttā samaṇā sakyaputtiyā viharantī’ti. Evaṃvādino 52, cunda, aññatitthiyā paribbājakā evamassu vacanīyā – ‘katamo so , āvuso, sukhallikānuyogo? Sukhallikānuyogā hi bahū anekavihitā nānappakārakā’ti.
‘‘சத்தாரோமே, சுந்த³, ஸுக²ல்லிகானுயோகா³ ஹீனா க³ம்மா போது²ஜ்ஜனிகா அனரியா அனத்த²ஸங்ஹிதா ந நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸங்வத்தந்தி. கதமே சத்தாரோ?
‘‘Cattārome, cunda, sukhallikānuyogā hīnā gammā pothujjanikā anariyā anatthasaṃhitā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattanti. Katame cattāro?
‘‘இத⁴, சுந்த³, ஏகச்சோ பா³லோ பாணே வதி⁴த்வா வதி⁴த்வா அத்தானங் ஸுகே²தி பீணேதி. அயங் பட²மோ ஸுக²ல்லிகானுயோகோ³.
‘‘Idha, cunda, ekacco bālo pāṇe vadhitvā vadhitvā attānaṃ sukheti pīṇeti. Ayaṃ paṭhamo sukhallikānuyogo.
‘‘புன சபரங், சுந்த³, இதே⁴கச்சோ அதி³ன்னங் ஆதி³யித்வா ஆதி³யித்வா அத்தானங் ஸுகே²தி பீணேதி. அயங் து³தியோ ஸுக²ல்லிகானுயோகோ³.
‘‘Puna caparaṃ, cunda, idhekacco adinnaṃ ādiyitvā ādiyitvā attānaṃ sukheti pīṇeti. Ayaṃ dutiyo sukhallikānuyogo.
‘‘புன சபரங், சுந்த³, இதே⁴கச்சோ முஸா ப⁴ணித்வா ப⁴ணித்வா அத்தானங் ஸுகே²தி பீணேதி. அயங் ததியோ ஸுக²ல்லிகானுயோகோ³.
‘‘Puna caparaṃ, cunda, idhekacco musā bhaṇitvā bhaṇitvā attānaṃ sukheti pīṇeti. Ayaṃ tatiyo sukhallikānuyogo.
‘‘புன சபரங், சுந்த³, இதே⁴கச்சோ பஞ்சஹி காமகு³ணேஹி ஸமப்பிதோ ஸமங்கீ³பூ⁴தோ பரிசாரேதி. அயங் சதுத்தோ² ஸுக²ல்லிகானுயோகோ³.
‘‘Puna caparaṃ, cunda, idhekacco pañcahi kāmaguṇehi samappito samaṅgībhūto paricāreti. Ayaṃ catuttho sukhallikānuyogo.
‘‘இமே கோ², சுந்த³, சத்தாரோ ஸுக²ல்லிகானுயோகா³ ஹீனா க³ம்மா போது²ஜ்ஜனிகா அனரியா அனத்த²ஸங்ஹிதா ந நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸங்வத்தந்தி.
‘‘Ime kho, cunda, cattāro sukhallikānuyogā hīnā gammā pothujjanikā anariyā anatthasaṃhitā na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattanti.
‘‘டா²னங் கோ² பனேதங், சுந்த³, விஜ்ஜதி யங் அஞ்ஞதித்தி²யா பரிப்³பா³ஜகா ஏவங் வதெ³ய்யுங் – ‘‘இமே சத்தாரோ ஸுக²ல்லிகானுயோகே³ அனுயுத்தா ஸமணா ஸக்யபுத்தியா விஹரந்தீ’தி. தே வோ 53 ‘மாஹேவங்’ திஸ்ஸு வசனீயா. ந தே வோ ஸம்மா வத³மானா வதெ³ய்யுங், அப்³பா⁴சிக்கெ²ய்யுங் அஸதா அபூ⁴தேன.
‘‘Ṭhānaṃ kho panetaṃ, cunda, vijjati yaṃ aññatitthiyā paribbājakā evaṃ vadeyyuṃ – ‘‘ime cattāro sukhallikānuyoge anuyuttā samaṇā sakyaputtiyā viharantī’ti. Te vo 54 ‘māhevaṃ’ tissu vacanīyā. Na te vo sammā vadamānā vadeyyuṃ, abbhācikkheyyuṃ asatā abhūtena.
184. ‘‘சத்தாரோமே, சுந்த³, ஸுக²ல்லிகானுயோகா³ ஏகந்தனிப்³பி³தா³ய விராகா³ய நிரோதா⁴ய உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்தந்தி. கதமே சத்தாரோ?
184. ‘‘Cattārome, cunda, sukhallikānuyogā ekantanibbidāya virāgāya nirodhāya upasamāya abhiññāya sambodhāya nibbānāya saṃvattanti. Katame cattāro?
‘‘இத⁴ , சுந்த³, பி⁴க்கு² விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கங் ஸவிசாரங் விவேகஜங் பீதிஸுக²ங் பட²மங் ஜா²னங் உபஸம்பஜ்ஜ விஹரதி. அயங் பட²மோ ஸுக²ல்லிகானுயோகோ³.
‘‘Idha , cunda, bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati. Ayaṃ paṭhamo sukhallikānuyogo.
‘‘புன சபரங், சுந்த³, பி⁴க்கு² விதக்கவிசாரானங் வூபஸமா…பே॰… து³தியங் ஜா²னங் உபஸம்பஜ்ஜ விஹரதி. அயங் து³தியோ ஸுக²ல்லிகானுயோகோ³.
‘‘Puna caparaṃ, cunda, bhikkhu vitakkavicārānaṃ vūpasamā…pe… dutiyaṃ jhānaṃ upasampajja viharati. Ayaṃ dutiyo sukhallikānuyogo.
‘‘புன சபரங், சுந்த³, பி⁴க்கு² பீதியா ச விராகா³…பே॰… ததியங் ஜா²னங் உபஸம்பஜ்ஜ விஹரதி. அயங் ததியோ ஸுக²ல்லிகானுயோகோ³.
‘‘Puna caparaṃ, cunda, bhikkhu pītiyā ca virāgā…pe… tatiyaṃ jhānaṃ upasampajja viharati. Ayaṃ tatiyo sukhallikānuyogo.
‘‘புன சபரங், சுந்த³, பி⁴க்கு² ஸுக²ஸ்ஸ ச பஹானா து³க்க²ஸ்ஸ ச பஹானா…பே॰… சதுத்த²ங் ஜா²னங் உபஸம்பஜ்ஜ விஹரதி. அயங் சதுத்தோ² ஸுக²ல்லிகானுயோகோ³.
‘‘Puna caparaṃ, cunda, bhikkhu sukhassa ca pahānā dukkhassa ca pahānā…pe… catutthaṃ jhānaṃ upasampajja viharati. Ayaṃ catuttho sukhallikānuyogo.
‘‘இமே கோ², சுந்த³, சத்தாரோ ஸுக²ல்லிகானுயோகா³ ஏகந்தனிப்³பி³தா³ய விராகா³ய நிரோதா⁴ய உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்தந்தி.
‘‘Ime kho, cunda, cattāro sukhallikānuyogā ekantanibbidāya virāgāya nirodhāya upasamāya abhiññāya sambodhāya nibbānāya saṃvattanti.
‘‘டா²னங் கோ² பனேதங், சுந்த³, விஜ்ஜதி யங் அஞ்ஞதித்தி²யா பரிப்³பா³ஜகா ஏவங் வதெ³ய்யுங் – ‘‘இமே சத்தாரோ ஸுக²ல்லிகானுயோகே³ அனுயுத்தா ஸமணா ஸக்யபுத்தியா விஹரந்தீ’தி. தே வோ ‘ஏவங்’ திஸ்ஸு வசனீயா. ஸம்மா தே வோ வத³மானா வதெ³ய்யுங், ந தே வோ அப்³பா⁴சிக்கெ²ய்யுங் அஸதா அபூ⁴தேன.
‘‘Ṭhānaṃ kho panetaṃ, cunda, vijjati yaṃ aññatitthiyā paribbājakā evaṃ vadeyyuṃ – ‘‘ime cattāro sukhallikānuyoge anuyuttā samaṇā sakyaputtiyā viharantī’ti. Te vo ‘evaṃ’ tissu vacanīyā. Sammā te vo vadamānā vadeyyuṃ, na te vo abbhācikkheyyuṃ asatā abhūtena.
ஸுக²ல்லிகானுயோகா³னிஸங்ஸோ
Sukhallikānuyogānisaṃso
185. ‘‘டா²னங் கோ² பனேதங், சுந்த³, விஜ்ஜதி, யங் அஞ்ஞதித்தி²யா பரிப்³பா³ஜகா ஏவங் வதெ³ய்யுங் – ‘இமே பனாவுஸோ, சத்தாரோ ஸுக²ல்லிகானுயோகே³ அனுயுத்தானங் விஹரதங் கதி ப²லானி கதானிஸங்ஸா பாடிகங்கா²’தி? ஏவங்வாதி³னோ, சுந்த³, அஞ்ஞதித்தி²யா பரிப்³பா³ஜகா ஏவமஸ்ஸு வசனீயா – ‘இமே கோ², ஆவுஸோ, சத்தாரோ ஸுக²ல்லிகானுயோகே³ அனுயுத்தானங் விஹரதங் சத்தாரி ப²லானி சத்தாரோ ஆனிஸங்ஸா பாடிகங்கா². கதமே சத்தாரோ? இதா⁴வுஸோ, பி⁴க்கு² திண்ணங் ஸங்யோஜனானங் பரிக்க²யா ஸோதாபன்னோ ஹோதி அவினிபாதத⁴ம்மோ நியதோ ஸம்போ³தி⁴பராயணோ. இத³ங் பட²மங் ப²லங், பட²மோ ஆனிஸங்ஸோ. புன சபரங், ஆவுஸோ, பி⁴க்கு² திண்ணங் ஸங்யோஜனானங் பரிக்க²யா ராக³தோ³ஸமோஹானங் தனுத்தா ஸகதா³கா³மீ ஹோதி, ஸகிதே³வ இமங் லோகங் ஆக³ந்த்வா து³க்க²ஸ்ஸந்தங் கரோதி. இத³ங் து³தியங் ப²லங், து³தியோ ஆனிஸங்ஸோ. புன சபரங், ஆவுஸோ, பி⁴க்கு² பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா ஓபபாதிகோ ஹோதி, தத்த² பரினிப்³பா³யீ அனாவத்தித⁴ம்மோ தஸ்மா லோகா. இத³ங் ததியங் ப²லங், ததியோ ஆனிஸங்ஸோ. புன சபரங், ஆவுஸோ, பி⁴க்கு² ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரதி. இத³ங் சதுத்த²ங் ப²லங் சதுத்தோ² ஆனிஸங்ஸோ. இமே கோ², ஆவுஸோ, சத்தாரோ ஸுக²ல்லிகானுயோகே³ அனுயுத்தானங் விஹரதங் இமானி சத்தாரி ப²லானி, சத்தாரோ ஆனிஸங்ஸா பாடிகங்கா²’’தி.
185. ‘‘Ṭhānaṃ kho panetaṃ, cunda, vijjati, yaṃ aññatitthiyā paribbājakā evaṃ vadeyyuṃ – ‘ime panāvuso, cattāro sukhallikānuyoge anuyuttānaṃ viharataṃ kati phalāni katānisaṃsā pāṭikaṅkhā’ti? Evaṃvādino, cunda, aññatitthiyā paribbājakā evamassu vacanīyā – ‘ime kho, āvuso, cattāro sukhallikānuyoge anuyuttānaṃ viharataṃ cattāri phalāni cattāro ānisaṃsā pāṭikaṅkhā. Katame cattāro? Idhāvuso, bhikkhu tiṇṇaṃ saṃyojanānaṃ parikkhayā sotāpanno hoti avinipātadhammo niyato sambodhiparāyaṇo. Idaṃ paṭhamaṃ phalaṃ, paṭhamo ānisaṃso. Puna caparaṃ, āvuso, bhikkhu tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmī hoti, sakideva imaṃ lokaṃ āgantvā dukkhassantaṃ karoti. Idaṃ dutiyaṃ phalaṃ, dutiyo ānisaṃso. Puna caparaṃ, āvuso, bhikkhu pañcannaṃ orambhāgiyānaṃ saṃyojanānaṃ parikkhayā opapātiko hoti, tattha parinibbāyī anāvattidhammo tasmā lokā. Idaṃ tatiyaṃ phalaṃ, tatiyo ānisaṃso. Puna caparaṃ, āvuso, bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Idaṃ catutthaṃ phalaṃ catuttho ānisaṃso. Ime kho, āvuso, cattāro sukhallikānuyoge anuyuttānaṃ viharataṃ imāni cattāri phalāni, cattāro ānisaṃsā pāṭikaṅkhā’’ti.
கீ²ணாஸவஅப⁴ப்³ப³டா²னங்
Khīṇāsavaabhabbaṭhānaṃ
186. ‘‘டா²னங் கோ² பனேதங், சுந்த³, விஜ்ஜதி யங் அஞ்ஞதித்தி²யா பரிப்³பா³ஜகா ஏவங் வதெ³ய்யுங் – ‘அட்டி²தத⁴ம்மா ஸமணா ஸக்யபுத்தியா விஹரந்தீ’தி. ஏவங்வாதி³னோ, சுந்த³, அஞ்ஞதித்தி²யா பரிப்³பா³ஜகா ஏவமஸ்ஸு வசனீயா – ‘அத்தி² கோ², ஆவுஸோ, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஸாவகானங் த⁴ம்மா தே³ஸிதா பஞ்ஞத்தா யாவஜீவங் அனதிக்கமனீயா. ஸெய்யதா²பி, ஆவுஸோ, இந்த³கீ²லோ வா அயோகீ²லோ வா க³ம்பீ⁴ரனேமோ ஸுனிகா²தோ அசலோ அஸம்பவேதீ⁴. ஏவமேவ கோ², ஆவுஸோ, தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன ஸாவகானங் த⁴ம்மா தே³ஸிதா பஞ்ஞத்தா யாவஜீவங் அனதிக்கமனீயா. யோ ஸோ, ஆவுஸோ, பி⁴க்கு² அரஹங் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞா விமுத்தோ, அப⁴ப்³போ³ ஸோ நவ டா²னானி அஜ்ஜா²சரிதுங். அப⁴ப்³போ³, ஆவுஸோ, கீ²ணாஸவோ பி⁴க்கு² ஸஞ்சிச்ச பாணங் ஜீவிதா வோரோபேதுங்; அப⁴ப்³போ³ கீ²ணாஸவோ பி⁴க்கு² அதி³ன்னங் தெ²ய்யஸங்கா²தங் ஆதி³யிதுங்; அப⁴ப்³போ³ கீ²ணாஸவோ பி⁴க்கு² மேது²னங் த⁴ம்மங் படிஸேவிதுங்; அப⁴ப்³போ³ கீ²ணாஸவோ பி⁴க்கு² ஸம்பஜானமுஸா பா⁴ஸிதுங்; அப⁴ப்³போ³ கீ²ணாஸவோ பி⁴க்கு² ஸன்னிதி⁴காரகங் காமே பரிபு⁴ஞ்ஜிதுங் ஸெய்யதா²பி புப்³பே³ ஆகா³ரிகபூ⁴தோ; அப⁴ப்³போ³ கீ²ணாஸவோ பி⁴க்கு² ச²ந்தா³க³திங் க³ந்துங்; அப⁴ப்³போ³ கீ²ணாஸவோ பி⁴க்கு² தோ³ஸாக³திங் க³ந்துங்; அப⁴ப்³போ³ கீ²ணாஸவோ பி⁴க்கு² மோஹாக³திங் க³ந்துங்; அப⁴ப்³போ³ கீ²ணாஸவோ பி⁴க்கு² ப⁴யாக³திங் க³ந்துங். யோ ஸோ, ஆவுஸோ, பி⁴க்கு² அரஹங் கீ²ணாஸவோ வுஸிதவா கதகரணீயோ ஓஹிதபா⁴ரோ அனுப்பத்தஸத³த்தோ² பரிக்கீ²ணப⁴வஸங்யோஜனோ ஸம்மத³ஞ்ஞா விமுத்தோ, அப⁴ப்³போ³ ஸோ இமானி நவ டா²னானி அஜ்ஜா²சரிது’’ந்தி.
186. ‘‘Ṭhānaṃ kho panetaṃ, cunda, vijjati yaṃ aññatitthiyā paribbājakā evaṃ vadeyyuṃ – ‘aṭṭhitadhammā samaṇā sakyaputtiyā viharantī’ti. Evaṃvādino, cunda, aññatitthiyā paribbājakā evamassu vacanīyā – ‘atthi kho, āvuso, tena bhagavatā jānatā passatā arahatā sammāsambuddhena sāvakānaṃ dhammā desitā paññattā yāvajīvaṃ anatikkamanīyā. Seyyathāpi, āvuso, indakhīlo vā ayokhīlo vā gambhīranemo sunikhāto acalo asampavedhī. Evameva kho, āvuso, tena bhagavatā jānatā passatā arahatā sammāsambuddhena sāvakānaṃ dhammā desitā paññattā yāvajīvaṃ anatikkamanīyā. Yo so, āvuso, bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññā vimutto, abhabbo so nava ṭhānāni ajjhācarituṃ. Abhabbo, āvuso, khīṇāsavo bhikkhu sañcicca pāṇaṃ jīvitā voropetuṃ; abhabbo khīṇāsavo bhikkhu adinnaṃ theyyasaṅkhātaṃ ādiyituṃ; abhabbo khīṇāsavo bhikkhu methunaṃ dhammaṃ paṭisevituṃ; abhabbo khīṇāsavo bhikkhu sampajānamusā bhāsituṃ; abhabbo khīṇāsavo bhikkhu sannidhikārakaṃ kāme paribhuñjituṃ seyyathāpi pubbe āgārikabhūto; abhabbo khīṇāsavo bhikkhu chandāgatiṃ gantuṃ; abhabbo khīṇāsavo bhikkhu dosāgatiṃ gantuṃ; abhabbo khīṇāsavo bhikkhu mohāgatiṃ gantuṃ; abhabbo khīṇāsavo bhikkhu bhayāgatiṃ gantuṃ. Yo so, āvuso, bhikkhu arahaṃ khīṇāsavo vusitavā katakaraṇīyo ohitabhāro anuppattasadattho parikkhīṇabhavasaṃyojano sammadaññā vimutto, abhabbo so imāni nava ṭhānāni ajjhācaritu’’nti.
பஞ்ஹாப்³யாகரணங்
Pañhābyākaraṇaṃ
187. ‘‘டா²னங் கோ² பனேதங், சுந்த³, விஜ்ஜதி, யங் அஞ்ஞதித்தி²யா பரிப்³பா³ஜகா ஏவங் வதெ³ய்யுங் – ‘அதீதங் கோ² அத்³தா⁴னங் ஆரப்³ப⁴ ஸமணோ கோ³தமோ அதீரகங் ஞாணத³ஸ்ஸனங் பஞ்ஞபேதி, நோ ச கோ² அனாக³தங் அத்³தா⁴னங் ஆரப்³ப⁴ அதீரகங் ஞாணத³ஸ்ஸனங் பஞ்ஞபேதி, தயித³ங் கிங்ஸு தயித³ங் கத²ங்ஸூ’தி? தே ச அஞ்ஞதித்தி²யா பரிப்³பா³ஜகா அஞ்ஞவிஹிதகேன ஞாணத³ஸ்ஸனேன அஞ்ஞவிஹிதகங் ஞாணத³ஸ்ஸனங் பஞ்ஞபேதப்³ப³ங் மஞ்ஞந்தி யத²ரிவ பா³லா அப்³யத்தா. அதீதங் கோ², சுந்த³, அத்³தா⁴னங் ஆரப்³ப⁴ ததா²க³தஸ்ஸ ஸதானுஸாரி ஞாணங் ஹோதி; ஸோ யாவதகங் ஆகங்க²தி தாவதகங் அனுஸ்ஸரதி. அனாக³தஞ்ச கோ² அத்³தா⁴னங் ஆரப்³ப⁴ ததா²க³தஸ்ஸ போ³தி⁴ஜங் ஞாணங் உப்பஜ்ஜதி – ‘அயமந்திமா ஜாதி, நத்தி²தா³னி புனப்³ப⁴வோ’தி. ‘அதீதங் சேபி, சுந்த³, ஹோதி அபூ⁴தங் அதச்ச²ங் அனத்த²ஸங்ஹிதங், ந தங் ததா²க³தோ ப்³யாகரோதி. அதீதங் சேபி, சுந்த³, ஹோதி பூ⁴தங் தச்ச²ங் அனத்த²ஸங்ஹிதங், தம்பி ததா²க³தோ ந ப்³யாகரோதி. அதீதங் சேபி சுந்த³, ஹோதி பூ⁴தங் தச்ச²ங் அத்த²ஸங்ஹிதங், தத்ர காலஞ்ஞூ ததா²க³தோ ஹோதி தஸ்ஸ பஞ்ஹஸ்ஸ வெய்யாகரணாய. அனாக³தங் சேபி, சுந்த³, ஹோதி அபூ⁴தங் அதச்ச²ங் அனத்த²ஸங்ஹிதங், ந தங் ததா²க³தோ ப்³யாகரோதி…பே॰… தஸ்ஸ பஞ்ஹஸ்ஸ வெய்யாகரணாய. பச்சுப்பன்னங் சேபி, சுந்த³, ஹோதி அபூ⁴தங் அதச்ச²ங் அனத்த²ஸங்ஹிதங், ந தங் ததா²க³தோ ப்³யாகரோதி. பச்சுப்பன்னங் சேபி, சுந்த³, ஹோதி பூ⁴தங் தச்ச²ங் அனத்த²ஸங்ஹிதங், தம்பி ததா²க³தோ ந ப்³யாகரோதி. பச்சுப்பன்னங் சேபி, சுந்த³, ஹோதி பூ⁴தங் தச்ச²ங் அத்த²ஸங்ஹிதங், தத்ர காலஞ்ஞூ ததா²க³தோ ஹோதி தஸ்ஸ பஞ்ஹஸ்ஸ வெய்யாகரணாய.
187. ‘‘Ṭhānaṃ kho panetaṃ, cunda, vijjati, yaṃ aññatitthiyā paribbājakā evaṃ vadeyyuṃ – ‘atītaṃ kho addhānaṃ ārabbha samaṇo gotamo atīrakaṃ ñāṇadassanaṃ paññapeti, no ca kho anāgataṃ addhānaṃ ārabbha atīrakaṃ ñāṇadassanaṃ paññapeti, tayidaṃ kiṃsu tayidaṃ kathaṃsū’ti? Te ca aññatitthiyā paribbājakā aññavihitakena ñāṇadassanena aññavihitakaṃ ñāṇadassanaṃ paññapetabbaṃ maññanti yathariva bālā abyattā. Atītaṃ kho, cunda, addhānaṃ ārabbha tathāgatassa satānusāri ñāṇaṃ hoti; so yāvatakaṃ ākaṅkhati tāvatakaṃ anussarati. Anāgatañca kho addhānaṃ ārabbha tathāgatassa bodhijaṃ ñāṇaṃ uppajjati – ‘ayamantimā jāti, natthidāni punabbhavo’ti. ‘Atītaṃ cepi, cunda, hoti abhūtaṃ atacchaṃ anatthasaṃhitaṃ, na taṃ tathāgato byākaroti. Atītaṃ cepi, cunda, hoti bhūtaṃ tacchaṃ anatthasaṃhitaṃ, tampi tathāgato na byākaroti. Atītaṃ cepi cunda, hoti bhūtaṃ tacchaṃ atthasaṃhitaṃ, tatra kālaññū tathāgato hoti tassa pañhassa veyyākaraṇāya. Anāgataṃ cepi, cunda, hoti abhūtaṃ atacchaṃ anatthasaṃhitaṃ, na taṃ tathāgato byākaroti…pe… tassa pañhassa veyyākaraṇāya. Paccuppannaṃ cepi, cunda, hoti abhūtaṃ atacchaṃ anatthasaṃhitaṃ, na taṃ tathāgato byākaroti. Paccuppannaṃ cepi, cunda, hoti bhūtaṃ tacchaṃ anatthasaṃhitaṃ, tampi tathāgato na byākaroti. Paccuppannaṃ cepi, cunda, hoti bhūtaṃ tacchaṃ atthasaṃhitaṃ, tatra kālaññū tathāgato hoti tassa pañhassa veyyākaraṇāya.
188. ‘‘இதி கோ², சுந்த³, அதீதானாக³தபச்சுப்பன்னேஸு த⁴ம்மேஸு ததா²க³தோ காலவாதீ³ 55 பூ⁴தவாதீ³ அத்த²வாதீ³ த⁴ம்மவாதீ³ வினயவாதீ³, தஸ்மா ‘ததா²க³தோ’தி வுச்சதி. யஞ்ச கோ², சுந்த³, ஸதே³வகஸ்ஸ லோகஸ்ஸ ஸமாரகஸ்ஸ ஸப்³ரஹ்மகஸ்ஸ ஸஸ்ஸமணப்³ராஹ்மணியா பஜாய ஸதே³வமனுஸ்ஸாய தி³ட்ட²ங் ஸுதங் முதங் விஞ்ஞாதங் பத்தங் பரியேஸிதங் அனுவிசரிதங் மனஸா, ஸப்³ப³ங் ததா²க³தேன அபி⁴ஸம்பு³த்³த⁴ங், தஸ்மா ‘ததா²க³தோ’தி வுச்சதி. யஞ்ச, சுந்த³, ரத்திங் ததா²க³தோ அனுத்தரங் ஸம்மாஸம்போ³தி⁴ங் அபி⁴ஸம்பு³ஜ்ஜ²தி, யஞ்ச ரத்திங் அனுபாதி³ஸேஸாய நிப்³பா³னதா⁴துயா பரினிப்³பா³யதி, யங் ஏதஸ்மிங் அந்தரே பா⁴ஸதி லபதி நித்³தி³ஸதி. ஸப்³ப³ங் தங் ததே²வ ஹோதி நோ அஞ்ஞதா², தஸ்மா ‘ததா²க³தோ’தி வுச்சதி. யதா²வாதீ³, சுந்த³, ததா²க³தோ ததா²காரீ, யதா²காரீ ததா²வாதீ³. இதி யதா²வாதீ³ ததா²காரீ, யதா²காரீ ததா²வாதீ³, தஸ்மா ‘ததா²க³தோ’தி வுச்சதி. ஸதே³வகே லோகே, சுந்த³, ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய ததா²க³தோ அபி⁴பூ⁴ அனபி⁴பூ⁴தோ அஞ்ஞத³த்து²த³ஸோ வஸவத்தீ, தஸ்மா ‘ததா²க³தோ’தி வுச்சதி.
188. ‘‘Iti kho, cunda, atītānāgatapaccuppannesu dhammesu tathāgato kālavādī 56 bhūtavādī atthavādī dhammavādī vinayavādī, tasmā ‘tathāgato’ti vuccati. Yañca kho, cunda, sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā, sabbaṃ tathāgatena abhisambuddhaṃ, tasmā ‘tathāgato’ti vuccati. Yañca, cunda, rattiṃ tathāgato anuttaraṃ sammāsambodhiṃ abhisambujjhati, yañca rattiṃ anupādisesāya nibbānadhātuyā parinibbāyati, yaṃ etasmiṃ antare bhāsati lapati niddisati. Sabbaṃ taṃ tatheva hoti no aññathā, tasmā ‘tathāgato’ti vuccati. Yathāvādī, cunda, tathāgato tathākārī, yathākārī tathāvādī. Iti yathāvādī tathākārī, yathākārī tathāvādī, tasmā ‘tathāgato’ti vuccati. Sadevake loke, cunda, samārake sabrahmake sassamaṇabrāhmaṇiyā pajāya sadevamanussāya tathāgato abhibhū anabhibhūto aññadatthudaso vasavattī, tasmā ‘tathāgato’ti vuccati.
அப்³யாகதட்டா²னங்
Abyākataṭṭhānaṃ
189. ‘‘டா²னங் கோ² பனேதங், சுந்த³, விஜ்ஜதி யங் அஞ்ஞதித்தி²யா பரிப்³பா³ஜகா ஏவங் வதெ³ய்யுங் – ‘கிங் நு கோ², ஆவுஸோ, ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’ந்தி? ஏவங்வாதி³னோ, சுந்த³, அஞ்ஞதித்தி²யா பரிப்³பா³ஜகா ஏவமஸ்ஸு வசனீயா – ‘அப்³யாகதங் கோ², ஆவுஸோ, ப⁴க³வதா – ‘‘ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’’’ந்தி.
189. ‘‘Ṭhānaṃ kho panetaṃ, cunda, vijjati yaṃ aññatitthiyā paribbājakā evaṃ vadeyyuṃ – ‘kiṃ nu kho, āvuso, hoti tathāgato paraṃ maraṇā, idameva saccaṃ moghamañña’nti? Evaṃvādino, cunda, aññatitthiyā paribbājakā evamassu vacanīyā – ‘abyākataṃ kho, āvuso, bhagavatā – ‘‘hoti tathāgato paraṃ maraṇā, idameva saccaṃ moghamañña’’’nti.
‘‘டா²னங் கோ² பனேதங், சுந்த³, விஜ்ஜதி, யங் அஞ்ஞதித்தி²யா பரிப்³பா³ஜகா ஏவங் வதெ³ய்யுங் – ‘கிங் பனாவுஸோ, ந ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’ந்தி? ஏவங்வாதி³னோ, சுந்த³, அஞ்ஞதித்தி²யா பரிப்³பா³ஜகா ஏவமஸ்ஸு வசனீயா – ‘ஏதம்பி கோ², ஆவுஸோ, ப⁴க³வதா அப்³யாகதங் – ‘‘ந ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’’’ந்தி.
‘‘Ṭhānaṃ kho panetaṃ, cunda, vijjati, yaṃ aññatitthiyā paribbājakā evaṃ vadeyyuṃ – ‘kiṃ panāvuso, na hoti tathāgato paraṃ maraṇā, idameva saccaṃ moghamañña’nti? Evaṃvādino, cunda, aññatitthiyā paribbājakā evamassu vacanīyā – ‘etampi kho, āvuso, bhagavatā abyākataṃ – ‘‘na hoti tathāgato paraṃ maraṇā, idameva saccaṃ moghamañña’’’nti.
‘‘டா²னங் கோ² பனேதங், சுந்த³, விஜ்ஜதி, யங் அஞ்ஞதித்தி²யா பரிப்³பா³ஜகா ஏவங் வதெ³ய்யுங் – ‘கிங் பனாவுஸோ, ஹோதி ச ந ச ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’ந்தி? ஏவங்வாதி³னோ, சுந்த³, அஞ்ஞதித்தி²யா பரிப்³பா³ஜகா ஏவமஸ்ஸு வசனீயா – ‘அப்³யாகதங் கோ² ஏதங், ஆவுஸோ, ப⁴க³வதா – ‘‘ஹோதி ச ந ச ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’’’ந்தி.
‘‘Ṭhānaṃ kho panetaṃ, cunda, vijjati, yaṃ aññatitthiyā paribbājakā evaṃ vadeyyuṃ – ‘kiṃ panāvuso, hoti ca na ca hoti tathāgato paraṃ maraṇā, idameva saccaṃ moghamañña’nti? Evaṃvādino, cunda, aññatitthiyā paribbājakā evamassu vacanīyā – ‘abyākataṃ kho etaṃ, āvuso, bhagavatā – ‘‘hoti ca na ca hoti tathāgato paraṃ maraṇā, idameva saccaṃ moghamañña’’’nti.
‘‘டா²னங் கோ² பனேதங், சுந்த³, விஜ்ஜதி, யங் அஞ்ஞதித்தி²யா பரிப்³பா³ஜகா ஏவங் வதெ³ய்யுங் – ‘கிங் பனாவுஸோ, நேவ ஹோதி ந ந ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’ந்தி? ஏவங்வாதி³னோ, சுந்த³, அஞ்ஞதித்தி²யா பரிப்³பா³ஜகா ஏவமஸ்ஸு வசனீயா – ‘ஏதம்பி கோ², ஆவுஸோ, ப⁴க³வதா அப்³யாகதங் – ‘‘நேவ ஹோதி ந ந ஹோதி ததா²க³தோ பரங் மரணா, இத³மேவ ஸச்சங் மோக⁴மஞ்ஞ’’’ந்தி.
‘‘Ṭhānaṃ kho panetaṃ, cunda, vijjati, yaṃ aññatitthiyā paribbājakā evaṃ vadeyyuṃ – ‘kiṃ panāvuso, neva hoti na na hoti tathāgato paraṃ maraṇā, idameva saccaṃ moghamañña’nti? Evaṃvādino, cunda, aññatitthiyā paribbājakā evamassu vacanīyā – ‘etampi kho, āvuso, bhagavatā abyākataṃ – ‘‘neva hoti na na hoti tathāgato paraṃ maraṇā, idameva saccaṃ moghamañña’’’nti.
‘‘டா²னங் கோ² பனேதங், சுந்த³, விஜ்ஜதி, யங் அஞ்ஞதித்தி²யா பரிப்³பா³ஜகா ஏவங் வதெ³ய்யுங் – ‘கஸ்மா பனேதங், ஆவுஸோ, ஸமணேன கோ³தமேன அப்³யாகத’ந்தி? ஏவங்வாதி³னோ, சுந்த³, அஞ்ஞதித்தி²யா பரிப்³பா³ஜகா ஏவமஸ்ஸு வசனீயா – ‘ந ஹேதங், ஆவுஸோ, அத்த²ஸங்ஹிதங் ந த⁴ம்மஸங்ஹிதங் ந ஆதி³ப்³ரஹ்மசரியகங் ந நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸங்வத்ததி, தஸ்மா தங் ப⁴க³வதா அப்³யாகத’ந்தி.
‘‘Ṭhānaṃ kho panetaṃ, cunda, vijjati, yaṃ aññatitthiyā paribbājakā evaṃ vadeyyuṃ – ‘kasmā panetaṃ, āvuso, samaṇena gotamena abyākata’nti? Evaṃvādino, cunda, aññatitthiyā paribbājakā evamassu vacanīyā – ‘na hetaṃ, āvuso, atthasaṃhitaṃ na dhammasaṃhitaṃ na ādibrahmacariyakaṃ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati, tasmā taṃ bhagavatā abyākata’nti.
ப்³யாகதட்டா²னங்
Byākataṭṭhānaṃ
190. ‘‘டா²னங் கோ² பனேதங், சுந்த³, விஜ்ஜதி, யங் அஞ்ஞதித்தி²யா பரிப்³பா³ஜகா ஏவங் வதெ³ய்யுங் – ‘கிங் பனாவுஸோ, ஸமணேன கோ³தமேன ப்³யாகத’ந்தி? ஏவங்வாதி³னோ, சுந்த³, அஞ்ஞதித்தி²யா பரிப்³பா³ஜகா ஏவமஸ்ஸு வசனீயா – ‘இத³ங் து³க்க²ந்தி கோ², ஆவுஸோ, ப⁴க³வதா ப்³யாகதங், அயங் து³க்க²ஸமுத³யோதி கோ², ஆவுஸோ, ப⁴க³வதா ப்³யாகதங், அயங் து³க்க²னிரோதோ⁴தி கோ², ஆவுஸோ, ப⁴க³வதா ப்³யாகதங், அயங் து³க்க²னிரோத⁴கா³மினீ படிபதா³தி கோ², ஆவுஸோ, ப⁴க³வதா ப்³யாகத’ந்தி.
190. ‘‘Ṭhānaṃ kho panetaṃ, cunda, vijjati, yaṃ aññatitthiyā paribbājakā evaṃ vadeyyuṃ – ‘kiṃ panāvuso, samaṇena gotamena byākata’nti? Evaṃvādino, cunda, aññatitthiyā paribbājakā evamassu vacanīyā – ‘idaṃ dukkhanti kho, āvuso, bhagavatā byākataṃ, ayaṃ dukkhasamudayoti kho, āvuso, bhagavatā byākataṃ, ayaṃ dukkhanirodhoti kho, āvuso, bhagavatā byākataṃ, ayaṃ dukkhanirodhagāminī paṭipadāti kho, āvuso, bhagavatā byākata’nti.
‘‘டா²னங் கோ² பனேதங், சுந்த³, விஜ்ஜதி, யங் அஞ்ஞதித்தி²யா பரிப்³பா³ஜகா ஏவங் வதெ³ய்யுங் – ‘கஸ்மா பனேதங், ஆவுஸோ, ஸமணேன கோ³தமேன ப்³யாகத’ந்தி? ஏவங்வாதி³னோ, சுந்த³, அஞ்ஞதித்தி²யா பரிப்³பா³ஜகா ஏவமஸ்ஸு வசனீயா – ‘ஏதஞ்ஹி, ஆவுஸோ, அத்த²ஸங்ஹிதங், ஏதங் த⁴ம்மஸங்ஹிதங், ஏதங் ஆதி³ப்³ரஹ்மசரியகங் ஏகந்தனிப்³பி³தா³ய விராகா³ய நிரோதா⁴ய உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி. தஸ்மா தங் ப⁴க³வதா ப்³யாகத’ந்தி.
‘‘Ṭhānaṃ kho panetaṃ, cunda, vijjati, yaṃ aññatitthiyā paribbājakā evaṃ vadeyyuṃ – ‘kasmā panetaṃ, āvuso, samaṇena gotamena byākata’nti? Evaṃvādino, cunda, aññatitthiyā paribbājakā evamassu vacanīyā – ‘etañhi, āvuso, atthasaṃhitaṃ, etaṃ dhammasaṃhitaṃ, etaṃ ādibrahmacariyakaṃ ekantanibbidāya virāgāya nirodhāya upasamāya abhiññāya sambodhāya nibbānāya saṃvattati. Tasmā taṃ bhagavatā byākata’nti.
புப்³ப³ந்தஸஹக³ததி³ட்டி²னிஸ்ஸயா
Pubbantasahagatadiṭṭhinissayā
191. ‘‘யேபி தே, சுந்த³, புப்³ப³ந்தஸஹக³தா தி³ட்டி²னிஸ்ஸயா, தேபி வோ மயா ப்³யாகதா, யதா² தே ப்³யாகாதப்³பா³. யதா² ச தே ந ப்³யாகாதப்³பா³, கிங் வோ அஹங் தே ததா² 57 ப்³யாகரிஸ்ஸாமி? யேபி தே, சுந்த³, அபரந்தஸஹக³தா தி³ட்டி²னிஸ்ஸயா, தேபி வோ மயா ப்³யாகதா, யதா² தே ப்³யாகாதப்³பா³. யதா² ச தே ந ப்³யாகாதப்³பா³, கிங் வோ அஹங் தே ததா² ப்³யாகரிஸ்ஸாமி? கதமே ச தே, சுந்த³, புப்³ப³ந்தஸஹக³தா தி³ட்டி²னிஸ்ஸயா, யே வோ மயா ப்³யாகதா, யதா² தே ப்³யாகாதப்³பா³. (யதா² ச தே ந ப்³யாகாதப்³பா³, கிங் வோ அஹங் தே ததா² ப்³யாகரிஸ்ஸாமி) 58? ஸந்தி கோ², சுந்த³, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘ஸஸ்ஸதோ அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி. ஸந்தி பன, சுந்த³, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘அஸஸ்ஸதோ அத்தா ச லோகோ ச…பே॰… ஸஸ்ஸதோ ச அஸஸ்ஸதோ ச அத்தா ச லோகோ ச… நேவ ஸஸ்ஸதோ நாஸஸ்ஸதோ அத்தா ச லோகோ ச… ஸயங்கதோ அத்தா ச லோகோ ச… பரங்கதோ அத்தா ச லோகோ ச… ஸயங்கதோ ச பரங்கதோ ச அத்தா ச லோகோ ச… அஸயங்காரோ அபரங்காரோ அதி⁴ச்சஸமுப்பன்னோ அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி. ஸஸ்ஸதங் ஸுக²து³க்க²ங்… அஸஸ்ஸதங் ஸுக²து³க்க²ங்… ஸஸ்ஸதஞ்ச அஸஸ்ஸதஞ்ச ஸுக²து³க்க²ங்… நேவஸஸ்ஸதங் நாஸஸ்ஸதங் ஸுக²து³க்க²ங்… ஸயங்கதங் ஸுக²து³க்க²ங்… பரங்கதங் ஸுக²து³க்க²ங்… ஸயங்கதஞ்ச பரங்கதஞ்ச ஸுக²து³க்க²ங்… அஸயங்காரங் அபரங்காரங் அதி⁴ச்சஸமுப்பன்னங் ஸுக²து³க்க²ங், இத³மேவ ஸச்சங் மோக⁴மஞ்ஞ’ந்தி.
191. ‘‘Yepi te, cunda, pubbantasahagatā diṭṭhinissayā, tepi vo mayā byākatā, yathā te byākātabbā. Yathā ca te na byākātabbā, kiṃ vo ahaṃ te tathā 59 byākarissāmi? Yepi te, cunda, aparantasahagatā diṭṭhinissayā, tepi vo mayā byākatā, yathā te byākātabbā. Yathā ca te na byākātabbā, kiṃ vo ahaṃ te tathā byākarissāmi? Katame ca te, cunda, pubbantasahagatā diṭṭhinissayā, ye vo mayā byākatā, yathā te byākātabbā. (Yathā ca te na byākātabbā, kiṃ vo ahaṃ te tathā byākarissāmi) 60? Santi kho, cunda, eke samaṇabrāhmaṇā evaṃvādino evaṃdiṭṭhino – ‘sassato attā ca loko ca, idameva saccaṃ moghamañña’nti. Santi pana, cunda, eke samaṇabrāhmaṇā evaṃvādino evaṃdiṭṭhino – ‘asassato attā ca loko ca…pe… sassato ca asassato ca attā ca loko ca… neva sassato nāsassato attā ca loko ca… sayaṃkato attā ca loko ca… paraṃkato attā ca loko ca… sayaṃkato ca paraṃkato ca attā ca loko ca… asayaṃkāro aparaṃkāro adhiccasamuppanno attā ca loko ca, idameva saccaṃ moghamañña’nti. Sassataṃ sukhadukkhaṃ… asassataṃ sukhadukkhaṃ… sassatañca asassatañca sukhadukkhaṃ… nevasassataṃ nāsassataṃ sukhadukkhaṃ… sayaṃkataṃ sukhadukkhaṃ… paraṃkataṃ sukhadukkhaṃ… sayaṃkatañca paraṃkatañca sukhadukkhaṃ… asayaṃkāraṃ aparaṃkāraṃ adhiccasamuppannaṃ sukhadukkhaṃ, idameva saccaṃ moghamañña’nti.
192. ‘‘தத்ர, சுந்த³, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘ஸஸ்ஸதோ அத்தா ச லோகோ ச, இத³மேவ ஸச்சங் மோக⁴மஞ்ஞ’ந்தி. த்யாஹங் உபஸங்கமித்வா ஏவங் வதா³மி – ‘அத்தி² நு கோ² இத³ங், ஆவுஸோ, வுச்சதி – ‘‘ஸஸ்ஸதோ அத்தா ச லோகோ சா’’தி? யஞ்ச கோ² தே ஏவமாஹங்ஸு – ‘இத³மேவ ஸச்சங் மோக⁴மஞ்ஞ’ந்தி. தங் தேஸங் நானுஜானாமி. தங் கிஸ்ஸ ஹேது? அஞ்ஞதா²ஸஞ்ஞினோபி ஹெத்த², சுந்த³, ஸந்தேகே ஸத்தா. இமாயபி கோ² அஹங், சுந்த³, பஞ்ஞத்தியா நேவ அத்தனா ஸமஸமங் ஸமனுபஸ்ஸாமி குதோ பி⁴ய்யோ. அத² கோ² அஹமேவ தத்த² பி⁴ய்யோ யதி³த³ங் அதி⁴பஞ்ஞத்தி.
192. ‘‘Tatra, cunda, ye te samaṇabrāhmaṇā evaṃvādino evaṃdiṭṭhino – ‘sassato attā ca loko ca, idameva saccaṃ moghamañña’nti. Tyāhaṃ upasaṅkamitvā evaṃ vadāmi – ‘atthi nu kho idaṃ, āvuso, vuccati – ‘‘sassato attā ca loko cā’’ti? Yañca kho te evamāhaṃsu – ‘idameva saccaṃ moghamañña’nti. Taṃ tesaṃ nānujānāmi. Taṃ kissa hetu? Aññathāsaññinopi hettha, cunda, santeke sattā. Imāyapi kho ahaṃ, cunda, paññattiyā neva attanā samasamaṃ samanupassāmi kuto bhiyyo. Atha kho ahameva tattha bhiyyo yadidaṃ adhipaññatti.
193. ‘‘தத்ர, சுந்த³, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘அஸஸ்ஸதோ அத்தா ச லோகோ ச…பே॰… ஸஸ்ஸதோ ச அஸஸ்ஸதோ ச அத்தா ச லோகோ ச… நேவஸஸ்ஸதோ நாஸஸ்ஸதோ அத்தா ச லோகோ ச… ஸயங்கதோ அத்தா ச லோகோ ச… பரங்கதோ அத்தா ச லோகோ ச… ஸயங்கதோ ச பரங்கதோ ச அத்தா ச லோகோ ச… அஸயங்காரோ அபரங்காரோ அதி⁴ச்சஸமுப்பன்னோ அத்தா ச லோகோ ச… ஸஸ்ஸதங் ஸுக²து³க்க²ங்… அஸஸ்ஸதங் ஸுக²து³க்க²ங்… ஸஸ்ஸதஞ்ச அஸஸ்ஸதஞ்ச ஸுக²து³க்க²ங்… நேவஸஸ்ஸதங் நாஸஸ்ஸதங் ஸுக²து³க்க²ங்… ஸயங்கதங் ஸுக²து³க்க²ங்… பரங்கதங் ஸுக²து³க்க²ங்… ஸயங்கதஞ்ச பரங்கதஞ்ச ஸுக²து³க்க²ங்… அஸயங்காரங் அபரங்காரங் அதி⁴ச்சஸமுப்பன்னங் ஸுக²து³க்க²ங், இத³மேவ ஸச்சங் மோக⁴மஞ்ஞ’ந்தி. த்யாஹங் உபஸங்கமித்வா ஏவங் வதா³மி – ‘அத்தி² நு கோ² இத³ங், ஆவுஸோ, வுச்சதி – ‘‘அஸயங்காரங் அபரங்காரங் அதி⁴ச்சஸமுப்பன்னங் ஸுக²து³க்க²’’’ந்தி? யஞ்ச கோ² தே ஏவமாஹங்ஸு – ‘இத³மேவ ஸச்சங் மோக⁴மஞ்ஞ’ந்தி. தங் தேஸங் நானுஜானாமி. தங் கிஸ்ஸ ஹேது? அஞ்ஞதா²ஸஞ்ஞினோபி ஹெத்த², சுந்த³, ஸந்தேகே ஸத்தா. இமாயபி கோ² அஹங், சுந்த³, பஞ்ஞத்தியா நேவ அத்தனா ஸமஸமங் ஸமனுபஸ்ஸாமி குதோ பி⁴ய்யோ. அத² கோ² அஹமேவ தத்த² பி⁴ய்யோ யதி³த³ங் அதி⁴பஞ்ஞத்தி. இமே கோ² தே, சுந்த³, புப்³ப³ந்தஸஹக³தா தி³ட்டி²னிஸ்ஸயா, யே வோ மயா ப்³யாகதா, யதா² தே ப்³யாகாதப்³பா³ . யதா² ச தே ந ப்³யாகாதப்³பா³, கிங் வோ அஹங் தே ததா² ப்³யாகரிஸ்ஸாமீதி 61?
193. ‘‘Tatra, cunda, ye te samaṇabrāhmaṇā evaṃvādino evaṃdiṭṭhino – ‘asassato attā ca loko ca…pe… sassato ca asassato ca attā ca loko ca… nevasassato nāsassato attā ca loko ca… sayaṃkato attā ca loko ca… paraṃkato attā ca loko ca… sayaṃkato ca paraṃkato ca attā ca loko ca… asayaṃkāro aparaṃkāro adhiccasamuppanno attā ca loko ca… sassataṃ sukhadukkhaṃ… asassataṃ sukhadukkhaṃ… sassatañca asassatañca sukhadukkhaṃ… nevasassataṃ nāsassataṃ sukhadukkhaṃ… sayaṃkataṃ sukhadukkhaṃ… paraṃkataṃ sukhadukkhaṃ… sayaṃkatañca paraṃkatañca sukhadukkhaṃ… asayaṃkāraṃ aparaṃkāraṃ adhiccasamuppannaṃ sukhadukkhaṃ, idameva saccaṃ moghamañña’nti. Tyāhaṃ upasaṅkamitvā evaṃ vadāmi – ‘atthi nu kho idaṃ, āvuso, vuccati – ‘‘asayaṃkāraṃ aparaṃkāraṃ adhiccasamuppannaṃ sukhadukkha’’’nti? Yañca kho te evamāhaṃsu – ‘idameva saccaṃ moghamañña’nti. Taṃ tesaṃ nānujānāmi. Taṃ kissa hetu? Aññathāsaññinopi hettha, cunda, santeke sattā. Imāyapi kho ahaṃ, cunda, paññattiyā neva attanā samasamaṃ samanupassāmi kuto bhiyyo. Atha kho ahameva tattha bhiyyo yadidaṃ adhipaññatti. Ime kho te, cunda, pubbantasahagatā diṭṭhinissayā, ye vo mayā byākatā, yathā te byākātabbā . Yathā ca te na byākātabbā, kiṃ vo ahaṃ te tathā byākarissāmīti 62?
அபரந்தஸஹக³ததி³ட்டி²னிஸ்ஸயா
Aparantasahagatadiṭṭhinissayā
194. ‘‘கதமே ச தே, சுந்த³, அபரந்தஸஹக³தா தி³ட்டி²னிஸ்ஸயா, யே வோ மயா ப்³யாகதா, யதா² தே ப்³யாகாதப்³பா³. (யதா² ச தே ந ப்³யாகாதப்³பா³, கிங் வோ அஹங் தே ததா² ப்³யாகரிஸ்ஸாமீ) 63? ஸந்தி, சுந்த³, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘ரூபீ அத்தா ஹோதி அரோகோ³ பரங் மரணா, இத³மேவ ஸச்சங் மோக⁴மஞ்ஞ’ந்தி. ஸந்தி பன, சுந்த³, ஏகே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘அரூபீ அத்தா ஹோதி…பே॰… ரூபீ ச அரூபீ ச அத்தா ஹோதி… நேவரூபீ நாரூபீ அத்தா ஹோதி… ஸஞ்ஞீ அத்தா ஹோதி… அஸஞ்ஞீ அத்தா ஹோதி… நேவஸஞ்ஞீனாஸஞ்ஞீ அத்தா ஹோதி… அத்தா உச்சி²ஜ்ஜதி வினஸ்ஸதி ந ஹோதி பரங் மரணா, இத³மேவ ஸச்சங் மோக⁴மஞ்ஞ’ந்தி. தத்ர, சுந்த³, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘ரூபீ அத்தா ஹோதி அரோகோ³ பரங் மரணா, இத³மேவ ஸச்சங் மோக⁴மஞ்ஞ’ந்தி. த்யாஹங் உபஸங்கமித்வா ஏவங் வதா³மி – ‘அத்தி² நு கோ² இத³ங், ஆவுஸோ, வுச்சதி – ‘‘ரூபீ அத்தா ஹோதி அரோகோ³ பரங் மரணா’’’தி? யஞ்ச கோ² தே ஏவமாஹங்ஸு – ‘இத³மேவ ஸச்சங் மோக⁴மஞ்ஞ’ந்தி. தங் தேஸங் நானுஜானாமி. தங் கிஸ்ஸ ஹேது? அஞ்ஞதா²ஸஞ்ஞினோபி ஹெத்த², சுந்த³, ஸந்தேகே ஸத்தா. இமாயபி கோ² அஹங், சுந்த³, பஞ்ஞத்தியா நேவ அத்தனா ஸமஸமங் ஸமனுபஸ்ஸாமி குதோ பி⁴ய்யோ. அத² கோ² அஹமேவ தத்த² பி⁴ய்யோ யதி³த³ங் அதி⁴பஞ்ஞத்தி.
194. ‘‘Katame ca te, cunda, aparantasahagatā diṭṭhinissayā, ye vo mayā byākatā, yathā te byākātabbā. (Yathā ca te na byākātabbā, kiṃ vo ahaṃ te tathā byākarissāmī) 64? Santi, cunda, eke samaṇabrāhmaṇā evaṃvādino evaṃdiṭṭhino – ‘rūpī attā hoti arogo paraṃ maraṇā, idameva saccaṃ moghamañña’nti. Santi pana, cunda, eke samaṇabrāhmaṇā evaṃvādino evaṃdiṭṭhino – ‘arūpī attā hoti…pe… rūpī ca arūpī ca attā hoti… nevarūpī nārūpī attā hoti… saññī attā hoti… asaññī attā hoti… nevasaññīnāsaññī attā hoti… attā ucchijjati vinassati na hoti paraṃ maraṇā, idameva saccaṃ moghamañña’nti. Tatra, cunda, ye te samaṇabrāhmaṇā evaṃvādino evaṃdiṭṭhino – ‘rūpī attā hoti arogo paraṃ maraṇā, idameva saccaṃ moghamañña’nti. Tyāhaṃ upasaṅkamitvā evaṃ vadāmi – ‘atthi nu kho idaṃ, āvuso, vuccati – ‘‘rūpī attā hoti arogo paraṃ maraṇā’’’ti? Yañca kho te evamāhaṃsu – ‘idameva saccaṃ moghamañña’nti. Taṃ tesaṃ nānujānāmi. Taṃ kissa hetu? Aññathāsaññinopi hettha, cunda, santeke sattā. Imāyapi kho ahaṃ, cunda, paññattiyā neva attanā samasamaṃ samanupassāmi kuto bhiyyo. Atha kho ahameva tattha bhiyyo yadidaṃ adhipaññatti.
195. ‘‘தத்ர, சுந்த³, யே தே ஸமணப்³ராஹ்மணா ஏவங்வாதி³னோ ஏவங்தி³ட்டி²னோ – ‘அரூபீ அத்தா ஹோதி…பே॰… ரூபீ ச அரூபீ ச அத்தா ஹோதி… நேவரூபீனாரூபீ அத்தா ஹோதி… ஸஞ்ஞீ அத்தா ஹோதி… அஸஞ்ஞீ அத்தா ஹோதி… நேவஸஞ்ஞீனாஸஞ்ஞீ அத்தா ஹோதி… அத்தா உச்சி²ஜ்ஜதி வினஸ்ஸதி ந ஹோதி பரங் மரணா, இத³மேவ ஸச்சங் மோக⁴மஞ்ஞ’ந்தி. த்யாஹங் உபஸங்கமித்வா ஏவங் வதா³மி – ‘அத்தி² நு கோ² இத³ங், ஆவுஸோ, வுச்சதி – ‘‘அத்தா உச்சி²ஜ்ஜதி வினஸ்ஸதி ந ஹோதி பரங் மரணா’’’தி? யஞ்ச கோ² தே, சுந்த³, ஏவமாஹங்ஸு – ‘இத³மேவ ஸச்சங் மோக⁴மஞ்ஞ’ந்தி. தங் தேஸங் நானுஜானாமி. தங் கிஸ்ஸ ஹேது? அஞ்ஞதா²ஸஞ்ஞினோபி ஹெத்த², சுந்த³, ஸந்தேகே ஸத்தா. இமாயபி கோ² அஹங், சுந்த³, பஞ்ஞத்தியா நேவ அத்தனா ஸமஸமங் ஸமனுபஸ்ஸாமி, குதோ பி⁴ய்யோ. அத² கோ² அஹமேவ தத்த² பி⁴ய்யோ யதி³த³ங் அதி⁴பஞ்ஞத்தி. இமே கோ² தே, சுந்த³, அபரந்தஸஹக³தா தி³ட்டி²னிஸ்ஸயா, யே வோ மயா ப்³யாகதா , யதா² தே ப்³யாகாதப்³பா³. யதா² ச தே ந ப்³யாகாதப்³பா³, கிங் வோ அஹங் தே ததா² ப்³யாகரிஸ்ஸாமீதி 65?
195. ‘‘Tatra, cunda, ye te samaṇabrāhmaṇā evaṃvādino evaṃdiṭṭhino – ‘arūpī attā hoti…pe… rūpī ca arūpī ca attā hoti… nevarūpīnārūpī attā hoti… saññī attā hoti… asaññī attā hoti… nevasaññīnāsaññī attā hoti… attā ucchijjati vinassati na hoti paraṃ maraṇā, idameva saccaṃ moghamañña’nti. Tyāhaṃ upasaṅkamitvā evaṃ vadāmi – ‘atthi nu kho idaṃ, āvuso, vuccati – ‘‘attā ucchijjati vinassati na hoti paraṃ maraṇā’’’ti? Yañca kho te, cunda, evamāhaṃsu – ‘idameva saccaṃ moghamañña’nti. Taṃ tesaṃ nānujānāmi. Taṃ kissa hetu? Aññathāsaññinopi hettha, cunda, santeke sattā. Imāyapi kho ahaṃ, cunda, paññattiyā neva attanā samasamaṃ samanupassāmi, kuto bhiyyo. Atha kho ahameva tattha bhiyyo yadidaṃ adhipaññatti. Ime kho te, cunda, aparantasahagatā diṭṭhinissayā, ye vo mayā byākatā , yathā te byākātabbā. Yathā ca te na byākātabbā, kiṃ vo ahaṃ te tathā byākarissāmīti 66?
196. ‘‘இமேஸஞ்ச, சுந்த³, புப்³ப³ந்தஸஹக³தானங் தி³ட்டி²னிஸ்ஸயானங் இமேஸஞ்ச அபரந்தஸஹக³தானங் தி³ட்டி²னிஸ்ஸயானங் பஹானாய ஸமதிக்கமாய ஏவங் மயா சத்தாரோ ஸதிபட்டா²னா தே³ஸிதா பஞ்ஞத்தா. கதமே சத்தாரோ? இத⁴, சுந்த³, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா வினெய்ய லோகே அபி⁴ஜ்ஜா²தோ³மனஸ்ஸங். வேத³னாஸு வேத³னானுபஸ்ஸீ…பே॰… சித்தே சித்தானுபஸ்ஸீ… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங். இமேஸஞ்ச சுந்த³, புப்³ப³ந்தஸஹக³தானங் தி³ட்டி²னிஸ்ஸயானங் இமேஸஞ்ச அபரந்தஸஹக³தானங் தி³ட்டி²னிஸ்ஸயானங் பஹானாய ஸமதிக்கமாய. ஏவங் மயா இமே சத்தாரோ ஸதிபட்டா²னா தே³ஸிதா பஞ்ஞத்தா’’தி.
196. ‘‘Imesañca, cunda, pubbantasahagatānaṃ diṭṭhinissayānaṃ imesañca aparantasahagatānaṃ diṭṭhinissayānaṃ pahānāya samatikkamāya evaṃ mayā cattāro satipaṭṭhānā desitā paññattā. Katame cattāro? Idha, cunda, bhikkhu kāye kāyānupassī viharati ātāpī sampajāno satimā vineyya loke abhijjhādomanassaṃ. Vedanāsu vedanānupassī…pe… citte cittānupassī… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Imesañca cunda, pubbantasahagatānaṃ diṭṭhinissayānaṃ imesañca aparantasahagatānaṃ diṭṭhinissayānaṃ pahānāya samatikkamāya. Evaṃ mayā ime cattāro satipaṭṭhānā desitā paññattā’’ti.
197. தேன கோ² பன ஸமயேன ஆயஸ்மா உபவாணோ ப⁴க³வதோ பிட்டி²தோ டி²தோ ஹோதி ப⁴க³வந்தங் பீ³ஜயமானோ. அத² கோ² ஆயஸ்மா உபவாணோ ப⁴க³வந்தங் ஏதத³வோச – ‘‘அச்ச²ரியங், ப⁴ந்தே, அப்³பு⁴தங், ப⁴ந்தே! பாஸாதி³கோ வதாயங், ப⁴ந்தே, த⁴ம்மபரியாயோ; ஸுபாஸாதி³கோ வதாயங் ப⁴ந்தே, த⁴ம்மபரியாயோ, கோ நாமாயங் ப⁴ந்தே த⁴ம்மபரியாயோ’’தி? ‘‘தஸ்மாதிஹ த்வங், உபவாண, இமங் த⁴ம்மபரியாயங் ‘பாஸாதி³கோ’ த்வேவ நங் தா⁴ரேஹீ’’தி. இத³மவோச ப⁴க³வா. அத்தமனோ ஆயஸ்மா உபவாணோ ப⁴க³வதோ பா⁴ஸிதங் அபி⁴னந்தீ³தி.
197. Tena kho pana samayena āyasmā upavāṇo bhagavato piṭṭhito ṭhito hoti bhagavantaṃ bījayamāno. Atha kho āyasmā upavāṇo bhagavantaṃ etadavoca – ‘‘acchariyaṃ, bhante, abbhutaṃ, bhante! Pāsādiko vatāyaṃ, bhante, dhammapariyāyo; supāsādiko vatāyaṃ bhante, dhammapariyāyo, ko nāmāyaṃ bhante dhammapariyāyo’’ti? ‘‘Tasmātiha tvaṃ, upavāṇa, imaṃ dhammapariyāyaṃ ‘pāsādiko’ tveva naṃ dhārehī’’ti. Idamavoca bhagavā. Attamano āyasmā upavāṇo bhagavato bhāsitaṃ abhinandīti.
பாஸாதி³கஸுத்தங் நிட்டி²தங் ச²ட்ட²ங்.
Pāsādikasuttaṃ niṭṭhitaṃ chaṭṭhaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / தீ³க⁴ நிகாய (அட்ட²கதா²) • Dīgha nikāya (aṭṭhakathā) / 6. பாஸாதி³கஸுத்தவண்ணனா • 6. Pāsādikasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / தீ³க⁴னிகாய (டீகா) • Dīghanikāya (ṭīkā) / 6. பாஸாதி³கஸுத்தவண்ணனா • 6. Pāsādikasuttavaṇṇanā
