| Library / Tipiṭaka / တိပိဋက • Tipiṭaka / ဣတိဝုတ္တက-အဋ္ဌကထာ • Itivuttaka-aṭṭhakathā |
၃. တတိယဝဂ္ဂော
3. Tatiyavaggo
၁. ပသန္နစိတ္တသုတ္တဝဏ္ဏနာ
1. Pasannacittasuttavaṇṇanā
၂၁. တတိယဝဂ္ဂသ္သ ပဌမေ ပသန္နစိတ္တန္တိ ရတနတ္တယသဒ္ဓာယ ကမ္မဖလသဒ္ဓာယ စ ပသန္နမာနသံ။ သုဂတိန္တိ သုန္ဒရံ ဂတိံ, သုခသ္သ ဝာ ဂတိန္တိ သုဂတိံ။ သဂ္ဂန္တိ ရူပာဒိသမ္ပတ္တီဟိ သုဋ္ဌု အဂ္ဂန္တိ သဂ္ဂံ။ လောကန္တိ လောကိယန္တိ ဧတ္ထ ပုညပာပဖလာနိ, လုဇ္ဇနဋ္ဌေနေဝ ဝာ လောကံ။ ဧတ္ထ စ သုဂတိဂ္ဂဟဏေန မနုသ္သဂတိပိ သင္ဂယ္ဟတိ, သဂ္ဂဂ္ဂဟဏေန ဒေဝဂတိ ဧဝ။ သေသံ ဟေဋ္ဌာ ဝုတ္တနယမေဝ။
21. Tatiyavaggassa paṭhame pasannacittanti ratanattayasaddhāya kammaphalasaddhāya ca pasannamānasaṃ. Sugatinti sundaraṃ gatiṃ, sukhassa vā gatinti sugatiṃ. Sagganti rūpādisampattīhi suṭṭhu agganti saggaṃ. Lokanti lokiyanti ettha puññapāpaphalāni, lujjanaṭṭheneva vā lokaṃ. Ettha ca sugatiggahaṇena manussagatipi saṅgayhati, saggaggahaṇena devagati eva. Sesaṃ heṭṭhā vuttanayameva.
ပဌမသုတ္တဝဏ္ဏနာ နိဋ္ဌိတာ။
Paṭhamasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / ဣတိဝုတ္တကပာဠိ • Itivuttakapāḷi / ၁. ပသန္နစိတ္တသုတ္တံ • 1. Pasannacittasuttaṃ
