| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
4. батамад̣̇ааругканд̇хобамасуд̇д̇аван̣н̣анаа
4. Paṭhamadārukkhandhopamasuttavaṇṇanā
241. жад̇уд̇т̇з ад̣̇д̣̇асаад̇и г̇ан̇г̇аад̇ийрз бан̃н̃ад̇д̇авараб̣уд̣̇д̇хаасанз нисинно ад̣̇д̣̇аса. вуяхамаананд̇и жад̇урассам̣ д̇ажчзд̇ваа баб̣б̣ад̇анд̇арз табид̇ам̣ ваад̇аад̇абзна субарисугкам̣ баавуссагз мзгхз вассанд̇з уд̣̇агзна ублавид̇ваа анубуб̣б̣зна г̇ан̇г̇ааяа над̣̇ияаа сод̇з бад̇ид̇ам̣ д̇зна сод̇зна вуяхамаанам̣. бхигкуу ааманд̇зсийд̇и ‘‘иминаа д̣̇ааругканд̇хзна сад̣̇исам̣ гад̇ваа мама саасанз сад̣̇д̇хаабаб̣б̣аж̇ид̇ам̣ гулабуд̇д̇ам̣ д̣̇ассзссаамий’’д̇и д̇хаммам̣ д̣̇зсзд̇угаамад̇ааяа ааманд̇зси. амум̣ маханд̇ам̣ д̣̇ааругканд̇хам̣ г̇ан̇г̇ааяа над̣̇ияаа сод̇зна вуяхамаананд̇и ид̣̇ам̣ бана адтад̣̇осавимуд̇д̇ад̇д̇аа сод̇абадибаннасса д̣̇ааругканд̇хасса абарз самуд̣̇д̣̇абад̇д̇ияаа анд̇арааяагарз адта д̣̇осз д̣̇ассзд̇ум̣ аарабхи.
241. Catutthe addasāti gaṅgātīre paññattavarabuddhāsane nisinno addasa. Vuyhamānanti caturassaṃ tacchetvā pabbatantare ṭhapitaṃ vātātapena suparisukkhaṃ pāvussake meghe vassante udakena uplavitvā anupubbena gaṅgāya nadiyā sote patitaṃ tena sotena vuyhamānaṃ. Bhikkhū āmantesīti ‘‘iminā dārukkhandhena sadisaṃ katvā mama sāsane saddhāpabbajitaṃ kulaputtaṃ dassessāmī’’ti dhammaṃ desetukāmatāya āmantesi. Amuṃ mahantaṃ dārukkhandhaṃ gaṅgāya nadiyā sotena vuyhamānanti idaṃ pana aṭṭhadosavimuttattā sotapaṭipannassa dārukkhandhassa apare samuddapattiyā antarāyakare aṭṭha dose dassetuṃ ārabhi.
д̇ад̇расса звам̣ адтад̣̇осавимуд̇д̇ад̇аа взд̣̇ид̇аб̣б̣аа – зго хи г̇ан̇г̇ааяа над̣̇ияаа авид̣̇уурз баб̣б̣ад̇ад̇алз ж̇аад̇о наанааваллийхи баливзтид̇о бан̣д̣убалаасад̇ам̣ аабаж̇ж̇ид̇ваа убажигаад̣̇ийхи каж̇ж̇амаано д̇асмим̣язва таанз абан̣н̣ад̇д̇игабхаавам̣ г̇ажчад̇и, аяам̣ д̣̇ааругканд̇хо г̇ан̇г̇ам̣ од̇арид̇ваа ван̇гадтаанзсу вилаасамаано сааг̇арам̣ бад̇ваа ман̣иван̣н̣з уумибидтз собхид̇ум̣ на лабхад̇и.
Tatrassa evaṃ aṭṭhadosavimuttatā veditabbā – eko hi gaṅgāya nadiyā avidūre pabbatatale jāto nānāvallīhi paliveṭhito paṇḍupalāsataṃ āpajjitvā upacikādīhi khajjamāno tasmiṃyeva ṭhāne apaṇṇattikabhāvaṃ gacchati, ayaṃ dārukkhandho gaṅgaṃ otaritvā vaṅkaṭṭhānesu vilāsamāno sāgaraṃ patvā maṇivaṇṇe ūmipiṭṭhe sobhituṃ na labhati.
абаро г̇ан̇г̇аад̇ийрз б̣ахимууло анд̇осаако худ̇ваа ж̇аад̇о, аяам̣ гин̃жааби гаалзна гаалам̣ оламб̣инийхи саакаахи уд̣̇агам̣ пусад̇и, б̣ахимуулад̇д̇аа бана г̇ан̇г̇ам̣ од̇арид̇ваа ван̇гадтаанзсу вилаасамаано сааг̇арам̣ бад̇ваа ман̣иван̣н̣з уумибидтз собхид̇ум̣ на лабхад̇и.
Aparo gaṅgātīre bahimūlo antosākho hutvā jāto, ayaṃ kiñcāpi kālena kālaṃ olambinīhi sākhāhi udakaṃ phusati, bahimūlattā pana gaṅgaṃ otaritvā vaṅkaṭṭhānesu vilāsamāno sāgaraṃ patvā maṇivaṇṇe ūmipiṭṭhe sobhituṃ na labhati.
абаро маж̇жхз г̇ан̇г̇ааяа ж̇аад̇о, д̣̇ал̣хамуулзна бана суббад̇идтид̇о, б̣ахи жасса г̇ад̇аа ван̇гасаакаа наанааваллийхи ааб̣ад̣̇д̇хаа, аяамби д̣̇ал̣хамуулад̇д̇аа б̣ахид̣̇д̇хаа валлийхи ааб̣ад̣̇д̇хад̇д̇аа жа г̇ан̇г̇ам̣ од̇арид̇ваа…бз… собхид̇ум̣ на лабхад̇и.
Aparo majjhe gaṅgāya jāto, daḷhamūlena pana suppatiṭṭhito, bahi cassa gatā vaṅkasākhā nānāvallīhi ābaddhā, ayampi daḷhamūlattā bahiddhā vallīhi ābaddhattā ca gaṅgaṃ otaritvā…pe… sobhituṃ na labhati.
абаро бад̇ид̇адтаанзязва ваалигааяа од̇т̇адо бууд̇ибхаавам̣ аабаж̇ж̇ад̇и, аяамби г̇ан̇г̇ам̣ од̇арид̇ваа…бз… на лабхад̇и.
Aparo patitaṭṭhāneyeva vālikāya otthaṭo pūtibhāvaṃ āpajjati, ayampi gaṅgaṃ otaritvā…pe… na labhati.
абаро д̣̇виннам̣ баасаан̣аанам̣ анд̇арз ж̇аад̇ад̇д̇аа, суникаад̇о вияа нижжало тид̇о, ааг̇ад̇ааг̇ад̇ам̣ уд̣̇агам̣ д̣̇вид̇хаа паалзд̇и, аяам̣ баасаан̣анд̇арз судту бад̇идтид̇ад̇д̇аа г̇ан̇г̇ам̣ од̇арид̇ваа…бз… на лабхад̇и.
Aparo dvinnaṃ pāsāṇānaṃ antare jātattā, sunikhāto viya niccalo ṭhito, āgatāgataṃ udakaṃ dvidhā phāleti, ayaṃ pāsāṇantare suṭṭhu patiṭṭhitattā gaṅgaṃ otaritvā…pe… na labhati.
абаро аб̣бхогаасадтаанз набхам̣ буурзд̇ваа валлийхи ааб̣ад̣̇д̇хо тид̇о. згам̣ д̣̇вз сам̣важчарз ад̇иггамид̇ваа ааг̇ад̇з махогхз сагим̣ ваа д̣̇вигкад̇д̇ум̣ ваа д̇змзд̇и, аяамби набхам̣ буурзд̇ваа тид̇ад̇ааяа жзва згасса ваа д̣̇виннам̣ ваа сам̣важчараанам̣ ажжаязна сагим̣ ваа д̣̇вигкад̇д̇ум̣ ваа д̇зманад̇ааяа жа г̇ан̇г̇ам̣ од̇арид̇ваа…бз… на лабхад̇и.
Aparo abbhokāsaṭṭhāne nabhaṃ pūretvā vallīhi ābaddho ṭhito. Ekaṃ dve saṃvacchare atikkamitvā āgate mahoghe sakiṃ vā dvikkhattuṃ vā temeti, ayampi nabhaṃ pūretvā ṭhitatāya ceva ekassa vā dvinnaṃ vā saṃvaccharānaṃ accayena sakiṃ vā dvikkhattuṃ vā temanatāya ca gaṅgaṃ otaritvā…pe… na labhati.
абароби маж̇жхз г̇ан̇г̇ааяа д̣̇ийбагз ж̇аад̇о муд̣̇угканд̇хасаако огхз ааг̇ад̇з анусод̇ам̣ нибаж̇ж̇ид̇ваа, уд̣̇агз г̇ад̇з сийсам̣ угкибид̇ваа, нажжанд̇о вияа д̇идтад̇и. яассад̇т̇ааяа сааг̇аро г̇ан̇г̇ам̣ звам̣ вияа вад̣̇ад̇и, ‘‘бход̇и г̇ан̇г̇з д̇вам̣ маяхам̣ жанд̣̇анасаарасалал̣асаараад̣̇ийни наанаад̣̇аарууни аахараси, д̣̇ааругканд̇хам̣ бана наахарасий’’д̇и. сулабхо зса, д̣̇зва, бунаваарз ж̇ааниссаамийд̇и. бунаваарз д̇амб̣аван̣н̣зна уд̣̇агзна аалин̇г̇амаанаа вияа ааг̇ажчад̇и. соби д̇ат̇зва анусод̇ам̣ нибаж̇ж̇ид̇ваа, уд̣̇агз г̇ад̇з сийсам̣ угкибид̇ваа, нажжанд̇о вияа д̇идтад̇и. аяам̣ ад̇д̇ано муд̣̇уд̇ааяа г̇ан̇г̇ам̣ од̇арид̇ваа…бз… на лабхад̇и.
Aparopi majjhe gaṅgāya dīpake jāto mudukkhandhasākho oghe āgate anusotaṃ nipajjitvā, udake gate sīsaṃ ukkhipitvā, naccanto viya tiṭṭhati. Yassatthāya sāgaro gaṅgaṃ evaṃ viya vadati, ‘‘bhoti gaṅge tvaṃ mayhaṃ candanasārasalaḷasārādīni nānādārūni āharasi, dārukkhandhaṃ pana nāharasī’’ti. Sulabho esa, deva, punavāre jānissāmīti. Punavāre tambavaṇṇena udakena āliṅgamānā viya āgacchati. Sopi tatheva anusotaṃ nipajjitvā, udake gate sīsaṃ ukkhipitvā, naccanto viya tiṭṭhati. Ayaṃ attano mudutāya gaṅgaṃ otaritvā…pe… na labhati.
абаро г̇ан̇г̇ааяа над̣̇ияаа д̇ирияам̣ бад̇ид̇о ваалигааяа од̇т̇арид̇о анд̇арасзд̇у вияа б̣ахуунам̣ бажжаяо ж̇аад̇о, убхосу д̇ийрзсу взл̣унал̣агаран̃ж̇агагуд̇хаад̣̇аяо ублавид̇ваа д̇ад̇т̇зва лаг̇г̇анд̇и. д̇ат̇аа наанаавид̇хаа г̇ажчаа вуяхамаанаа бхиннамусалабхиннасуббаахигуггурахад̇т̇иассаад̣̇игун̣абааниби д̇ад̇т̇зва лаг̇г̇анд̇и. махааг̇ан̇г̇ааби нам̣ аасаж̇ж̇а бхиж̇ж̇ид̇ваа д̣̇вид̇хаа г̇ажчад̇и, мажчагажчабагумбхийламагараад̣̇аяоби д̇ад̇т̇зва ваасам̣ габбзнд̇и. аяамби д̇ирияам̣ бад̇ид̇ваа махааж̇анасса бажжаяад̇д̇агад̇абхаавзна г̇ан̇г̇ам̣ од̇арид̇ваа ван̇гадтаанзсу вилаасамаано сааг̇арам̣ бад̇ваа ман̣иван̣н̣з уумибидтз собхид̇ум̣ на лабхад̇и.
Aparo gaṅgāya nadiyā tiriyaṃ patito vālikāya ottharito antarasetu viya bahūnaṃ paccayo jāto, ubhosu tīresu veḷunaḷakarañjakakudhādayo uplavitvā tattheva lagganti. Tathā nānāvidhā gacchā vuyhamānā bhinnamusalabhinnasuppaahikukkurahatthiassādikuṇapānipi tattheva lagganti. Mahāgaṅgāpi naṃ āsajja bhijjitvā dvidhā gacchati, macchakacchapakumbhīlamakarādayopi tattheva vāsaṃ kappenti. Ayampi tiriyaṃ patitvā mahājanassa paccayattakatabhāvena gaṅgaṃ otaritvā vaṅkaṭṭhānesu vilāsamāno sāgaraṃ patvā maṇivaṇṇe ūmipiṭṭhe sobhituṃ na labhati.
ид̇и бхаг̇аваа имзхи адтахи д̣̇осзхи вимуд̇д̇ад̇д̇аа сод̇абадибаннасса д̣̇ааругканд̇хасса абарз самуд̣̇д̣̇абад̇д̇ияаа анд̇арааяагарз адта д̣̇осз д̣̇ассзд̇ум̣ амум̣ маханд̇ам̣ д̣̇ааругканд̇хам̣ г̇ан̇г̇ааяа над̣̇ияаа сод̇зна вуяхамаананд̇иаад̣̇имааха. д̇ад̇т̇а на т̇алз уссийд̣̇иссад̇ийд̇и т̇алам̣ наабхирухиссад̇и. на мануссаг̇г̇аахо г̇ахзссад̇ийд̇и ‘‘махаа вад̇ааяам̣ д̣̇ааругканд̇хо’’д̇и д̣̇исваа, ул̣умбзна д̇арамаанаа г̇анд̇ваа, г̇обаанасийаад̣̇ийнам̣ ад̇т̇ааяа мануссаа на г̇ан̣хиссанд̇и. на амануссаг̇г̇аахо г̇ахзссад̇ийд̇и ‘‘махаг̇гхо аяам̣ жанд̣̇анасааро, вимаанад̣̇ваарз нам̣ табзссаамаа’’д̇и ман̃н̃амаанаа на амануссаа г̇ан̣хиссанд̇и.
Iti bhagavā imehi aṭṭhahi dosehi vimuttattā sotapaṭipannassa dārukkhandhassa apare samuddapattiyā antarāyakare aṭṭha dose dassetuṃ amuṃmahantaṃ dārukkhandhaṃ gaṅgāya nadiyā sotena vuyhamānantiādimāha. Tattha na thale ussīdissatīti thalaṃ nābhiruhissati. Na manussaggāho gahessatīti ‘‘mahā vatāyaṃ dārukkhandho’’ti disvā, uḷumpena taramānā gantvā, gopānasīādīnaṃ atthāya manussā na gaṇhissanti. Na amanussaggāho gahessatīti ‘‘mahaggho ayaṃ candanasāro, vimānadvāre naṃ ṭhapessāmā’’ti maññamānā na amanussā gaṇhissanti.
звамзва код̇и зд̇т̇а сад̣̇д̇хим̣ б̣аахирзхи адтахи д̣̇осзхи звам̣ обаммасам̣санд̣̇анам̣ взд̣̇ид̇аб̣б̣ам̣ – г̇ан̇г̇ааяа авид̣̇уурз баб̣б̣ад̇ад̇алз ж̇аад̇о д̇ад̇т̇зва убажигаад̣̇ийхи каж̇ж̇амаано абан̣н̣ад̇д̇игабхаавам̣ г̇ад̇ад̣̇ааругканд̇хо вияа хи ‘‘над̇т̇и д̣̇инна’’нд̇иаад̣̇игааяа мижчаад̣̇идтияаа саманнааг̇ад̇о буг̇г̇ало взд̣̇ид̇аб̣б̣о. аяан̃хи саасанасса д̣̇уурийбхууд̇ад̇д̇аа арияамаг̇г̇ам̣ оруяха самаад̇хигуллз нисинно ниб̣б̣аанасааг̇арам̣ баабун̣ид̇ум̣ на саггод̇и.
Evameva khoti ettha saddhiṃ bāhirehi aṭṭhahi dosehi evaṃ opammasaṃsandanaṃ veditabbaṃ – gaṅgāya avidūre pabbatatale jāto tattheva upacikādīhi khajjamāno apaṇṇattikabhāvaṃ gatadārukkhandho viya hi ‘‘natthi dinna’’ntiādikāya micchādiṭṭhiyā samannāgato puggalo veditabbo. Ayañhi sāsanassa dūrībhūtattā ariyamaggaṃ oruyha samādhikulle nisinno nibbānasāgaraṃ pāpuṇituṃ na sakkoti.
г̇ан̇г̇аад̇ийрз б̣ахимууло анд̇осаако худ̇ваа ж̇аад̇о вияа ажчиннаг̇ихиб̣анд̇хано саман̣агудимб̣игабуг̇г̇ало д̣̇адтаб̣б̣о. аяан̃хи ‘‘жид̇д̇ам̣ наамзд̇ам̣ аниб̣ад̣̇д̇хам̣, ‘саман̣омхий’д̇и вад̣̇анд̇ова г̇ихий ход̇и, ‘г̇ихиймхий’д̇и вад̣̇анд̇ова саман̣о ход̇и. го ж̇ааниссад̇и, гим̣ бхависсад̇ий’’д̇и? махаллагагаалз баб̣б̣аж̇анд̇оби г̇ихиб̣анд̇ханам̣ на виссаж̇ж̇зд̇и. махаллагабаб̣б̣аж̇ид̇аанан̃жа самбад̇д̇и наама над̇т̇и. д̇асса сажз жийварам̣ баабун̣аад̇и, анд̇ажчиннагам̣ ваа ж̇ин̣н̣ад̣̇уб̣б̣ан̣н̣ам̣ ваа баабун̣аад̇и. сзнаасанамби вихаарабажжанд̇з бан̣н̣асаалаа ваа ман̣д̣або ваа баабун̣аад̇и. бин̣д̣ааяа жаранд̇знааби буд̇д̇анад̇д̇агаанам̣ д̣̇аарагаанам̣ бажчад̇о жарид̇аб̣б̣ам̣ ход̇и, барияанд̇з нисийд̣̇ид̇аб̣б̣ам̣ ход̇и. д̇зна со д̣̇угкий д̣̇уммано ассууни мун̃жанд̇о, ‘‘ад̇т̇и мз гуласанд̇агам̣ д̇ханам̣, габбад̇и ну ко д̇ам̣ каад̣̇анд̇зна ж̇ийвид̇у’’нд̇и жинд̇зд̇ваа згам̣ винаяад̇харам̣ бужчад̇и – ‘‘гим̣, бханд̇з аажарияа, ад̇д̇ано санд̇агам̣ вижаарзд̇ваа каад̣̇ид̇ум̣ габбад̇и, но габбад̇ий’’д̇и? ‘‘над̇т̇зд̇т̇а д̣̇осо, габбад̇зд̇а’’нд̇и. со ад̇д̇ано бхаж̇амаанагз гад̇ибаяз д̣̇уб̣б̣ажз д̣̇ураажаарз бхигкуу г̇ахзд̇ваа, сааяанхасамаяз анд̇ог̇аамам̣ г̇анд̇ваа, г̇аамамаж̇жхз тид̇о г̇аамигз баггосаабзд̇ваа, ‘‘амхаагам̣ баяог̇ад̇о удтид̇ам̣ ааяам̣ гасса д̣̇зт̇аа’’д̇и ааха. бханд̇з, д̇умхз баб̣б̣аж̇ид̇аа, маяам̣ гасса д̣̇ассаамаад̇и? гим̣ баб̣б̣аж̇ид̇аанам̣ ад̇д̇ано санд̇агам̣ на ваддад̇ийд̇и? гуд̣̇д̣̇аала-бидагам̣ г̇ахзд̇ваа, кзд̇д̇амарияаад̣̇аб̣анд̇ханаад̣̇ийни гаронд̇о наанааббагаарам̣ буб̣б̣ан̣н̣аабаран̣н̣ан̃жзва палаапалз жа сан̇г̇ан̣хид̇ваа, хзманд̇аг̇имхавассаанзсу яам̣ яам̣ ижчад̇и, д̇ам̣ д̇ам̣ бажаабзд̇ваа каад̣̇анд̇о саман̣агудумб̣иго худ̇ваа ж̇ийвад̇и. гзваламасса бан̃жажуул̣агзна д̣̇аарагзна сад̣̇д̇хим̣ баад̣̇абарижааригаава згаа над̇т̇и. аяам̣ буг̇г̇ало гин̃жааби оламб̣инийхи саакаахи уд̣̇агам̣ пусамаано анд̇осаако ругко вияа жзд̇ияан̇г̇ан̣аб̣од̇хияан̇г̇ан̣аад̣̇ийсу бхигкуунам̣ гааяасаамаг̇г̇им̣ д̣̇зд̇и, г̇ихиб̣анд̇ханасса бана ажчиннад̇ааяа б̣ахимуулад̇д̇аа арияамаг̇г̇ам̣ од̇арид̇ваа самаад̇хигуллз нисинно ниб̣б̣аанасааг̇арам̣ баабун̣ид̇ум̣ на саггод̇и.
Gaṅgātīre bahimūlo antosākho hutvā jāto viya acchinnagihibandhano samaṇakuṭimbikapuggalo daṭṭhabbo. Ayañhi ‘‘cittaṃ nāmetaṃ anibaddhaṃ, ‘samaṇomhī’ti vadantova gihī hoti, ‘gihīmhī’ti vadantova samaṇo hoti. Ko jānissati, kiṃ bhavissatī’’ti? Mahallakakāle pabbajantopi gihibandhanaṃ na vissajjeti. Mahallakapabbajitānañca sampatti nāma natthi. Tassa sace cīvaraṃ pāpuṇāti, antacchinnakaṃ vā jiṇṇadubbaṇṇaṃ vā pāpuṇāti. Senāsanampi vihārapaccante paṇṇasālā vā maṇḍapo vā pāpuṇāti. Piṇḍāya carantenāpi puttanattakānaṃ dārakānaṃ pacchato caritabbaṃ hoti, pariyante nisīditabbaṃ hoti. Tena so dukkhī dummano assūni muñcanto, ‘‘atthi me kulasantakaṃ dhanaṃ, kappati nu kho taṃ khādantena jīvitu’’nti cintetvā ekaṃ vinayadharaṃ pucchati – ‘‘kiṃ, bhante ācariya, attano santakaṃ vicāretvā khādituṃ kappati, no kappatī’’ti? ‘‘Natthettha doso, kappateta’’nti. So attano bhajamānake katipaye dubbace durācāre bhikkhū gahetvā, sāyanhasamaye antogāmaṃ gantvā, gāmamajjhe ṭhito gāmike pakkosāpetvā, ‘‘amhākaṃ payogato uṭṭhitaṃ āyaṃ kassa dethā’’ti āha. Bhante, tumhe pabbajitā, mayaṃ kassa dassāmāti? Kiṃ pabbajitānaṃ attano santakaṃ na vaṭṭatīti? Kuddāla-piṭakaṃ gahetvā, khettamariyādabandhanādīni karonto nānāppakāraṃ pubbaṇṇāparaṇṇañceva phalāphale ca saṅgaṇhitvā, hemantagimhavassānesu yaṃ yaṃ icchati, taṃ taṃ pacāpetvā khādanto samaṇakuṭumbiko hutvā jīvati. Kevalamassa pañcacūḷakena dārakena saddhiṃ pādaparicārikāva ekā natthi. Ayaṃ puggalo kiñcāpi olambinīhi sākhāhi udakaṃ phusamāno antosākho rukkho viya cetiyaṅgaṇabodhiyaṅgaṇādīsu bhikkhūnaṃ kāyasāmaggiṃ deti, gihibandhanassa pana acchinnatāya bahimūlattā ariyamaggaṃ otaritvā samādhikulle nisinno nibbānasāgaraṃ pāpuṇituṃ na sakkoti.
г̇ан̇г̇ааяа маж̇жхз ж̇аад̇о б̣ахид̣̇д̇хаа валлийхи ааб̣ад̣̇д̇хаван̇гасаакаа вияа сан̇гхасанд̇агам̣ ниссааяа ж̇ийвамаано бхиннааж̇ийвабуг̇г̇ало д̣̇адтаб̣б̣о. згажжо г̇ихиб̣анд̇ханам̣ бахааяа баб̣б̣аж̇анд̇оби сааруббадтаанз баб̣б̣аж̇ж̇ам̣ на лабхад̇и. баб̣б̣аж̇ж̇аа хи наамзсаа бадисанд̇хиг̇г̇ахан̣асад̣̇исаа. яат̇аа мануссаа яад̇т̇а бадисанд̇хим̣ г̇ан̣ханд̇и, д̇зсам̣язва гулаанам̣ аажаарам̣ сигканд̇и, звам̣ бхигкууби язсам̣ санд̇игз баб̣б̣аж̇анд̇и, д̇зсам̣язва аажаарам̣ г̇ан̣ханд̇и. д̇асмаа згажжо асааруббадтаанз баб̣б̣аж̇ид̇ваа оваад̣̇аанусаасанийуд̣̇д̣̇зсабарибужчаад̣̇ийхи бариб̣аахиро худ̇ваа баад̇ова мун̣д̣агхадам̣ г̇ахзд̇ваа уд̣̇агад̇ид̇т̇ам̣ г̇ажчад̇и, аажарияубаж̇жхааяаанам̣ бхад̇д̇ад̇т̇ааяа канд̇хз бад̇д̇ам̣ гад̇ваа бхад̇д̇асаалам̣ г̇ажчад̇и, д̣̇уб̣б̣ажасааман̣зрзхи сад̣̇д̇хим̣ наанаагийл̣ам̣ гийл̣ад̇и, аараамигад̣̇аарагзхи сам̣садто вихарад̇и.
Gaṅgāya majjhe jāto bahiddhā vallīhi ābaddhavaṅkasākhā viya saṅghasantakaṃ nissāya jīvamāno bhinnājīvapuggalo daṭṭhabbo. Ekacco gihibandhanaṃ pahāya pabbajantopi sāruppaṭṭhāne pabbajjaṃ na labhati. Pabbajjā hi nāmesā paṭisandhiggahaṇasadisā. Yathā manussā yattha paṭisandhiṃ gaṇhanti, tesaṃyeva kulānaṃ ācāraṃ sikkhanti, evaṃ bhikkhūpi yesaṃ santike pabbajanti, tesaṃyeva ācāraṃ gaṇhanti. Tasmā ekacco asāruppaṭṭhāne pabbajitvā ovādānusāsanīuddesaparipucchādīhi paribāhiro hutvā pātova muṇḍaghaṭaṃ gahetvā udakatitthaṃ gacchati, ācariyupajjhāyānaṃ bhattatthāya khandhe pattaṃ katvā bhattasālaṃ gacchati, dubbacasāmaṇerehi saddhiṃ nānākīḷaṃ kīḷati, ārāmikadārakehi saṃsaṭṭho viharati.
со д̣̇ахарабхигкугаалз ад̇д̇ано ануруубзхи д̣̇ахарабхигкуухи жзва аараамигзхи жа сад̣̇д̇хим̣ сан̇гхабхог̇ам̣ г̇анд̇ваа, ‘‘аяам̣ кийн̣аасавзхи асугаран̃н̃о санд̇игаа бадиг̇г̇ахид̇асан̇гхабхог̇о, д̇умхз сан̇гхасса ид̣̇ан̃жид̣̇ан̃жа на д̣̇зт̇а, на хи д̇умхаагам̣ бавад̇д̇им̣ суд̇ваа рааж̇аа ваа рааж̇амахаамад̇д̇аа ваа ад̇д̇аманаа бхависсанд̇и, зт̇а д̣̇аани ид̣̇ан̃жид̣̇ан̃жа гарот̇аа’’д̇и гуд̣̇д̣̇аала-бидагаани г̇аахаабзд̇ваа хздтаа д̇ал̣аагамаад̇игаасу гад̇д̇аб̣б̣агижжаани гаараабзд̇ваа б̣ахум̣ буб̣б̣ан̣н̣аабаран̣н̣ам̣ вихаарам̣ бавзсзд̇ваа аараамигзхи ад̇д̇ано убагаарабхаавам̣ сан̇гхасса аарожаабзд̇и. сан̇гхо ‘‘аяам̣ д̣̇ахаро б̣ахуубагааро, имасса сад̇ам̣ ваа д̣̇висад̇ам̣ ваа д̣̇зт̇аа’’д̇и д̣̇аабзд̇и. ид̇и со ид̇о жид̇о жа сан̇гхасанд̇агзнзва вад̣дханд̇о б̣ахид̣̇д̇хаа згавийсад̇ивид̇хаахи анзсанаахи б̣ад̣̇д̇хо арияамаг̇г̇ам̣ од̇арид̇ваа самаад̇хигуллз нисинно ниб̣б̣аанасааг̇арам̣ баабун̣ид̇ум̣ на саггод̇и.
So daharabhikkhukāle attano anurūpehi daharabhikkhūhi ceva ārāmikehi ca saddhiṃ saṅghabhogaṃ gantvā, ‘‘ayaṃ khīṇāsavehi asukarañño santikā paṭiggahitasaṅghabhogo, tumhe saṅghassa idañcidañca na detha, na hi tumhākaṃ pavattiṃ sutvā rājā vā rājamahāmattā vā attamanā bhavissanti, etha dāni idañcidañca karothā’’ti kuddāla-piṭakāni gāhāpetvā heṭṭhā taḷākamātikāsu kattabbakiccāni kārāpetvā bahuṃ pubbaṇṇāparaṇṇaṃ vihāraṃ pavesetvā ārāmikehi attano upakārabhāvaṃ saṅghassa ārocāpeti. Saṅgho ‘‘ayaṃ daharo bahūpakāro, imassa sataṃ vā dvisataṃ vā dethā’’ti dāpeti. Iti so ito cito ca saṅghasantakeneva vaḍḍhanto bahiddhā ekavīsatividhāhi anesanāhi baddho ariyamaggaṃ otaritvā samādhikulle nisinno nibbānasāgaraṃ pāpuṇituṃ na sakkoti.
бад̇ид̇адтаанзязва ваалигааяа од̇т̇арид̇ваа бууд̇ибхаавам̣ аабаад̣̇ид̇аругко вияа ааласияамахаг̇гхасо взд̣̇ид̇аб̣б̣о. зваруубан̃хи буг̇г̇алам̣ аамисажагкум̣ бажжаяалолам̣ виссадтааажарияубаж̇жхааяавад̇д̇ам̣ уд̣̇д̣̇зсабарибужчааяонисоманасигаараваж̇ж̇ид̇ам̣ санд̇хааяа бан̃жа нийваран̣аани ад̇т̇ад̇о звам̣ вад̣̇анд̇и – ‘‘бхо, гасса санд̇игам̣ г̇ажчаамаа’’д̇и? ат̇а т̇инамид̣̇д̇хам̣ удтааяа звамааха – ‘‘гим̣ на бассат̇а? зсо асугавихаараваасий гусийд̇абуг̇г̇ало асугам̣ наама г̇аамам̣ г̇анд̇ваа яааг̇умад̇т̇агз яааг̇ум̣, буувамад̇т̇агз буувам̣, бхад̇д̇амад̇т̇агз бхад̇д̇ам̣ аж̇жхохарид̇ваа вихаарам̣ ааг̇амма виссадтасаб̣б̣авад̇д̇о уд̣̇д̣̇зсаад̣̇ивирахид̇о ман̃жам̣ убаг̇ажчанд̇о маяхам̣ огаасам̣ гарод̇ий’’д̇и.
Patitaṭṭhāneyeva vālikāya ottharitvā pūtibhāvaṃ āpāditarukkho viya ālasiyamahagghaso veditabbo. Evarūpañhi puggalaṃ āmisacakkhuṃ paccayalolaṃ vissaṭṭhaācariyupajjhāyavattaṃ uddesaparipucchāyonisomanasikāravajjitaṃ sandhāya pañca nīvaraṇāni atthato evaṃ vadanti – ‘‘bho, kassa santikaṃ gacchāmā’’ti? Atha thinamiddhaṃ uṭṭhāya evamāha – ‘‘kiṃ na passatha? Eso asukavihāravāsī kusītapuggalo asukaṃ nāma gāmaṃ gantvā yāgumatthake yāguṃ, pūvamatthake pūvaṃ, bhattamatthake bhattaṃ ajjhoharitvā vihāraṃ āgamma vissaṭṭhasabbavatto uddesādivirahito mañcaṃ upagacchanto mayhaṃ okāsaṃ karotī’’ti.
д̇ад̇о гаамажчанд̣̇анийваран̣ам̣ удтааяааха – ‘‘бхо, д̇ава огаасз гад̇з маяхам̣ гад̇ова ход̇и, ид̣̇аанзва со нид̣̇д̣̇ааяид̇ваа гилзсаануран̃ж̇ид̇ова баб̣уж̇жхид̇ваа гаамавид̇аггам̣ вид̇аггзссад̇ий’’д̇и. д̇ад̇о б̣яаабаад̣̇анийваран̣ам̣ удтааяааха – ‘‘д̇умхаагам̣ огаасз гад̇з маяхам̣ гад̇ова ход̇и. ид̣̇аанзва нид̣̇д̣̇ааяид̇ваа вудтид̇о ‘вад̇д̇абадивад̇д̇ам̣ гарохий’д̇и вужжамаано, ‘бхо, имз ад̇д̇ано гаммам̣ агад̇ваа амхзсу б̣яаавадаа’д̇и наанаббагаарам̣ парусаважанам̣ вад̣̇анд̇о агкийни нийхарид̇ваа вижариссад̇ий’’д̇и. д̇ад̇о уд̣̇д̇хажжанийваран̣ам̣ удтааяааха – ‘‘д̇умхаагам̣ огаасз гад̇з маяхам̣ гад̇ова ход̇и, гусийд̇о наама ваад̇аахад̇о аг̇г̇игканд̇хо вияа уд̣̇д̇хад̇о ход̇ий’’д̇и. ат̇а гугужжанийваран̣ам̣ удтааяааха – ‘‘д̇умхаагам̣ огаасз гад̇з маяхам̣ гад̇ова ход̇и, гусийд̇о наама гуггужжабагад̇ова ход̇и, агаббияз габбияасан̃н̃ам̣ габбияз жа агаббияасан̃н̃ам̣ уббаад̣̇зд̇ий’’д̇и. ат̇а вижигижчаанийваран̣ам̣ удтааяааха – ‘‘д̇умхаагам̣ огаасз гад̇з маяхам̣ гад̇ова ход̇и. зваруубо хи адтасу таанзсу махаавижигижчам̣ уббаад̣̇зсий’’д̇и. звам̣ ааласияамахаг̇гхасам̣ бан̃жа нийваран̣аани жан̣д̣асунакаад̣̇аяо вияа син̇г̇ажчиннам̣ ж̇араг̇г̇авам̣ аж̇жход̇т̇арид̇ваа г̇ан̣ханд̇и. соби арияамаг̇г̇асод̇ам̣ од̇арид̇ваа самаад̇хигуллз нисинно ниб̣б̣аанасааг̇арам̣ баабун̣ид̇ум̣ на саггод̇и.
Tato kāmacchandanīvaraṇaṃ uṭṭhāyāha – ‘‘bho, tava okāse kate mayhaṃ katova hoti, idāneva so niddāyitvā kilesānurañjitova pabujjhitvā kāmavitakkaṃ vitakkessatī’’ti. Tato byāpādanīvaraṇaṃ uṭṭhāyāha – ‘‘tumhākaṃ okāse kate mayhaṃ katova hoti. Idāneva niddāyitvā vuṭṭhito ‘vattapaṭivattaṃ karohī’ti vuccamāno, ‘bho, ime attano kammaṃ akatvā amhesu byāvaṭā’ti nānappakāraṃ pharusavacanaṃ vadanto akkhīni nīharitvā vicarissatī’’ti. Tato uddhaccanīvaraṇaṃ uṭṭhāyāha – ‘‘tumhākaṃ okāse kate mayhaṃ katova hoti, kusīto nāma vātāhato aggikkhandho viya uddhato hotī’’ti. Atha kukuccanīvaraṇaṃ uṭṭhāyāha – ‘‘tumhākaṃ okāse kate mayhaṃ katova hoti, kusīto nāma kukkuccapakatova hoti, akappiye kappiyasaññaṃ kappiye ca akappiyasaññaṃ uppādetī’’ti. Atha vicikicchānīvaraṇaṃ uṭṭhāyāha – ‘‘tumhākaṃ okāse kate mayhaṃ katova hoti. Evarūpo hi aṭṭhasu ṭhānesu mahāvicikicchaṃ uppādesī’’ti. Evaṃ ālasiyamahagghasaṃ pañca nīvaraṇāni caṇḍasunakhādayo viya siṅgacchinnaṃ jaraggavaṃ ajjhottharitvā gaṇhanti. Sopi ariyamaggasotaṃ otaritvā samādhikulle nisinno nibbānasāgaraṃ pāpuṇituṃ na sakkoti.
д̣̇виннам̣ баасаан̣аанам̣ анд̇арз никаад̇амуулаагаарзна тид̇аругко вияа д̣̇идтим̣ уббаад̣̇зд̇ваа тид̇о д̣̇идтиг̇ад̇иго взд̣̇ид̇аб̣б̣о. со хи ‘‘аруубабхавз руубам̣ ад̇т̇и, асан̃н̃ийбхавз жид̇д̇ам̣ бавад̇д̇ад̇и, б̣ахужид̇д̇агкан̣иго логуд̇д̇арамаг̇г̇о, анусаяо жид̇д̇авиббаяуд̇д̇о, д̇з жа сад̇д̇аа санд̇хааванд̇и сам̣саранд̇ий’’д̇и вад̣̇анд̇о аридто вияа ган̣дагасааман̣зро вияа жа вижарад̇и. бисун̣аваажо бана ход̇и, убаж̇жхааяаад̣̇аяо сад̣̇д̇хивихааригаад̣̇ийхи бхинд̣̇анд̇о вижарад̇и. соби арияамаг̇г̇асод̇ам̣ од̇арид̇ваа самаад̇хигуллз нисинно ниб̣б̣аанасааг̇арам̣ баабун̣ид̇ум̣ на саггод̇и.
Dvinnaṃ pāsāṇānaṃ antare nikhātamūlākārena ṭhitarukkho viya diṭṭhiṃ uppādetvā ṭhito diṭṭhigatiko veditabbo. So hi ‘‘arūpabhave rūpaṃ atthi, asaññībhave cittaṃ pavattati, bahucittakkhaṇiko lokuttaramaggo, anusayo cittavippayutto, te ca sattā sandhāvanti saṃsarantī’’ti vadanto ariṭṭho viya kaṇṭakasāmaṇero viya ca vicarati. Pisuṇavāco pana hoti, upajjhāyādayo saddhivihārikādīhi bhindanto vicarati. Sopi ariyamaggasotaṃ otaritvā samādhikulle nisinno nibbānasāgaraṃ pāpuṇituṃ na sakkoti.
аб̣бхогаасз набхам̣ буурзд̇ваа валлийхи ааб̣ад̣̇д̇хо тид̇о згам̣ д̣̇вз сам̣важчарз ад̇иггамид̇ваа ааг̇ад̇з махогхз сагим̣ ваа д̣̇вигкад̇д̇ум̣ ваа д̇зманаругко вияа махаллагагаалз баб̣б̣аж̇ид̇ваа бажжанд̇з васамаано д̣̇уллабхасан̇гхад̣̇ассано жзва д̣̇уллабхад̇хаммассавано жа буг̇г̇ало взд̣̇ид̇аб̣б̣о. згажжо хи вуд̣дхагаалз баб̣б̣аж̇ид̇о гад̇ибаахзна убасамбад̣̇ам̣ лабхид̇ваа бан̃жавассагаалз баад̇имогкам̣ баг̇ун̣ам̣ гад̇ваа д̣̇асавассагаалз винаяад̇харад̇т̇зрасса санд̇игз винаяагат̇аагаалз марижам̣ ваа харийд̇агакан̣д̣ам̣ ваа мукз табзд̇ваа б̣ийж̇анзна мукам̣ бид̇хааяа нид̣̇д̣̇ааяанд̇о нисийд̣̇ид̇ваа лзсагаббзна гад̇авинаяо наама худ̇ваа бад̇д̇ажийварам̣ аад̣̇ааяа бажжанд̇ам̣ г̇ажчад̇и. д̇ад̇ра нам̣ мануссаа саггарид̇ваа бхигкуд̣̇ассанасса д̣̇уллабхад̇ааяа ‘‘ид̇хзва, бханд̇з, васат̇аа’’д̇и вихаарам̣ гаарзд̇ваа бубпуубаг̇апалуубаг̇аругкз робзд̇ваа д̇ад̇т̇а ваасзнд̇и.
Abbhokāse nabhaṃ pūretvā vallīhi ābaddho ṭhito ekaṃ dve saṃvacchare atikkamitvā āgate mahoghe sakiṃ vā dvikkhattuṃ vā temanarukkho viya mahallakakāle pabbajitvā paccante vasamāno dullabhasaṅghadassano ceva dullabhadhammassavano ca puggalo veditabbo. Ekacco hi vuḍḍhakāle pabbajito katipāhena upasampadaṃ labhitvā pañcavassakāle pātimokkhaṃ paguṇaṃ katvā dasavassakāle vinayadharattherassa santike vinayakathākāle maricaṃ vā harītakakhaṇḍaṃ vā mukhe ṭhapetvā bījanena mukhaṃ pidhāya niddāyanto nisīditvā lesakappena katavinayo nāma hutvā pattacīvaraṃ ādāya paccantaṃ gacchati. Tatra naṃ manussā sakkaritvā bhikkhudassanassa dullabhatāya ‘‘idheva, bhante, vasathā’’ti vihāraṃ kāretvā pupphūpagaphalūpagarukkhe ropetvā tattha vāsenti.
ат̇а махаавихаарасад̣̇исавихаараа б̣ахуссуд̇аа бхигкуу, ‘‘ж̇анабад̣̇з жийварараж̇анаад̣̇ийни гад̇ваа ааг̇амиссаамаа’’д̇и д̇ад̇т̇а г̇ажчанд̇и. со д̇з д̣̇исваа, хадтад̇удто вад̇д̇абадивад̇д̇ам̣ гад̇ваа, бунад̣̇ивасз аад̣̇ааяа бхигкаажаараг̇аамам̣ бависид̇ваа, ‘‘асуго т̇зро суд̇д̇анд̇иго, асуго абхид̇хаммиго, асуго винаяад̇харо, асуго д̇збидаго, зваруубз т̇зрз гад̣̇аа лабхиссат̇а, д̇хаммасаванам̣ гаарзт̇аа’’д̇и вад̣̇ад̇и. убаасагаа ‘‘д̇хаммассаванам̣ гаарзссаамаа’’д̇и вихаарамаг̇г̇ам̣ сод̇хзд̇ваа, саббид̇злаад̣̇ийни аад̣̇ааяа, махаат̇зрам̣ убасан̇гамид̇ваа, ‘‘бханд̇з, д̇хаммассаванам̣ гаарзссаама, д̇хаммагат̇игаанам̣ вижаарзт̇аа’’д̇и вад̇ваа бунад̣̇ивасз ааг̇анд̇ваа д̇хаммам̣ сун̣анд̇и.
Atha mahāvihārasadisavihārā bahussutā bhikkhū, ‘‘janapade cīvararajanādīni katvā āgamissāmā’’ti tattha gacchanti. So te disvā, haṭṭhatuṭṭho vattapaṭivattaṃ katvā, punadivase ādāya bhikkhācāragāmaṃ pavisitvā, ‘‘asuko thero suttantiko, asuko abhidhammiko, asuko vinayadharo, asuko tepiṭako, evarūpe there kadā labhissatha, dhammasavanaṃ kārethā’’ti vadati. Upāsakā ‘‘dhammassavanaṃ kāressāmā’’ti vihāramaggaṃ sodhetvā, sappitelādīni ādāya, mahātheraṃ upasaṅkamitvā, ‘‘bhante, dhammassavanaṃ kāressāma, dhammakathikānaṃ vicārethā’’ti vatvā punadivase āgantvā dhammaṃ suṇanti.
нзваасигад̇т̇зро ааг̇анд̇угаанам̣ бад̇д̇ажийвараани бадисаамзнд̇о анд̇ог̇аб̣бхзязва д̣̇ивасабхааг̇ам̣ вийд̇инаамзд̇и. д̣̇иваагат̇иго удтид̇о сарабхаан̣аго гхадзна уд̣̇агам̣ вамзнд̇о вияа сарабхаан̣ам̣ бхан̣ид̇ваа удтид̇о, д̇амби со на ж̇аанаад̇и. рад̇д̇игат̇иго сааг̇арам̣ кобхзнд̇о вияа рад̇д̇им̣ гат̇зд̇ваа удтид̇о, д̇амби со на ж̇аанаад̇и. бажжуусагат̇иго гат̇зд̇ваа удтааси, д̇амби со на ж̇аанаад̇и. баад̇ова бана удтааяа мукам̣ д̇ховид̇ваа, т̇зраанам̣ бад̇д̇ажийвараани убанаамзд̇ваа, бхигкаажаарам̣ убаг̇ажчанд̇о махаат̇зрам̣ ааха – ‘‘бханд̇з, д̣̇иваагат̇иго гад̇арам̣ ж̇аад̇агам̣ наама гат̇зси, сарабхаан̣аго гад̇арам̣ суд̇д̇ам̣ наама бхан̣и, рад̇д̇игат̇иго гад̇арам̣ д̇хаммагат̇ам̣ наама гат̇зси, бажжуусагат̇иго гад̇арам̣ ж̇аад̇агам̣ наама гат̇зси, канд̇хаа наама гад̇и, д̇хаад̇уяо наама гад̇и, ааяад̇анаа наама гад̇ий’’д̇и. зваруубо згам̣ д̣̇вз сам̣важчараани ад̇иггамид̇ваа бхигкуд̣̇ассанан̃жзва д̇хаммассаванан̃жа лабханд̇оби огхз ааг̇ад̇з уд̣̇агзна сагим̣ ваа д̣̇вигкад̇д̇ум̣ ваа д̇змид̇аругкасад̣̇исо ход̇и. со звам̣ сан̇гхад̣̇ассанад̇о жа д̇хаммассаванад̇о жа бадиггамма д̣̇уурз васанд̇о арияамаг̇г̇ам̣ од̇арид̇ваа самаад̇хигуллз нисинно ниб̣б̣аанасааг̇арам̣ баабун̣ид̇ум̣ на саггод̇и.
Nevāsikatthero āgantukānaṃ pattacīvarāni paṭisāmento antogabbheyeva divasabhāgaṃ vītināmeti. Divākathiko uṭṭhito sarabhāṇako ghaṭena udakaṃ vamento viya sarabhāṇaṃ bhaṇitvā uṭṭhito, tampi so na jānāti. Rattikathiko sāgaraṃ khobhento viya rattiṃ kathetvā uṭṭhito, tampi so na jānāti. Paccūsakathiko kathetvā uṭṭhāsi, tampi so na jānāti. Pātova pana uṭṭhāya mukhaṃ dhovitvā, therānaṃ pattacīvarāni upanāmetvā, bhikkhācāraṃ upagacchanto mahātheraṃ āha – ‘‘bhante, divākathiko kataraṃ jātakaṃ nāma kathesi, sarabhāṇako kataraṃ suttaṃ nāma bhaṇi, rattikathiko kataraṃ dhammakathaṃ nāma kathesi, paccūsakathiko kataraṃ jātakaṃ nāma kathesi, khandhā nāma kati, dhātuyo nāma kati, āyatanā nāma katī’’ti. Evarūpo ekaṃ dve saṃvaccharāni atikkamitvā bhikkhudassanañceva dhammassavanañca labhantopi oghe āgate udakena sakiṃ vā dvikkhattuṃ vā temitarukkhasadiso hoti. So evaṃ saṅghadassanato ca dhammassavanato ca paṭikkamma dūre vasanto ariyamaggaṃ otaritvā samādhikulle nisinno nibbānasāgaraṃ pāpuṇituṃ na sakkoti.
маж̇жхз г̇ан̇г̇ааяа д̣̇ийбагз ж̇аад̇о муд̣̇уругко вияа мад̇хурассарабхаан̣агабуг̇г̇ало взд̣̇ид̇аб̣б̣о. со хи абхин̃н̃аад̇аани абхин̃н̃аад̇аани взссанд̇араад̣̇ийни ж̇аад̇агаани уг̇г̇ан̣хид̇ваа, д̣̇уллабхабхигкуд̣̇ассанам̣ бажжанд̇ам̣ г̇анд̇ваа, д̇ад̇т̇а д̇хаммагат̇ааяа басаад̣̇ид̇ахад̣̇аязна ж̇анзна убадтияамаано ад̇д̇аанам̣ уд̣̇д̣̇исса гад̇з самбаннабубпапаларугкз нанд̣̇анаванаабхираамз вихаарз васад̇и. ат̇асса бхаарахаарабхигкуу д̇ам̣ бавад̇д̇им̣ суд̇ваа, ‘‘асуго гира звам̣ убадтаагзсу бадиб̣ад̣̇д̇хажид̇д̇о вихарад̇и. бан̣д̣ид̇о бхигку бадиб̣ало б̣уд̣̇д̇хаважанам̣ ваа уг̇г̇ан̣хид̇ум̣, гаммадтаанам̣ ваа манасигаад̇ум̣, аанзд̇ваа д̇зна сад̣̇д̇хим̣ асугад̇т̇зрасса санд̇игз д̇хаммам̣ уг̇г̇ан̣хиссаама, асугад̇т̇зрасса санд̇игз гаммадтаана’’нд̇и д̇ад̇т̇а г̇ажчанд̇и.
Majjhe gaṅgāya dīpake jāto mudurukkho viya madhurassarabhāṇakapuggalo veditabbo. So hi abhiññātāni abhiññātāni vessantarādīni jātakāni uggaṇhitvā, dullabhabhikkhudassanaṃ paccantaṃ gantvā, tattha dhammakathāya pasāditahadayena janena upaṭṭhiyamāno attānaṃ uddissa kate sampannapupphaphalarukkhe nandanavanābhirāme vihāre vasati. Athassa bhārahārabhikkhū taṃ pavattiṃ sutvā, ‘‘asuko kira evaṃ upaṭṭhākesu paṭibaddhacitto viharati. Paṇḍito bhikkhu paṭibalo buddhavacanaṃ vā uggaṇhituṃ, kammaṭṭhānaṃ vā manasikātuṃ, ānetvā tena saddhiṃ asukattherassa santike dhammaṃ uggaṇhissāma, asukattherassa santike kammaṭṭhāna’’nti tattha gacchanti.
со д̇зсам̣ вад̇д̇ам̣ гад̇ваа сааяанхасамаяам̣ вихааражааригам̣ нигканд̇зхи д̇зхи ‘‘имам̣, аавусо, жзд̇ияам̣ д̇аяаа гаарид̇а’’нд̇и будто, ‘‘аама, бханд̇з’’д̇и вад̣̇ад̇и. ‘‘аяам̣ б̣од̇хи, аяам̣ ман̣д̣або, ид̣̇ам̣ убосат̇ааг̇аарам̣, зсаа аг̇г̇исаалаа, аяам̣ жан̇гамо д̇аяаа гаарид̇о. имз ругкз робаабзд̇ваа д̇аяаа нанд̣̇анаванаабхираамо вихааро гаарид̇о’’д̇и. ‘‘аама, бханд̇з’’д̇и, вад̣̇ад̇и.
So tesaṃ vattaṃ katvā sāyanhasamayaṃ vihāracārikaṃ nikkhantehi tehi ‘‘imaṃ, āvuso, cetiyaṃ tayā kārita’’nti puṭṭho, ‘‘āma, bhante’’ti vadati. ‘‘Ayaṃ bodhi, ayaṃ maṇḍapo, idaṃ uposathāgāraṃ, esā aggisālā, ayaṃ caṅkamo tayā kārito. Ime rukkhe ropāpetvā tayā nandanavanābhirāmo vihāro kārito’’ti. ‘‘Āma, bhante’’ti, vadati.
со сааяам̣ т̇зрубадтаанам̣ г̇анд̇ваа ванд̣̇ид̇ваа бужчад̇и – ‘‘гасмаа, бханд̇з, ааг̇ад̇ад̇т̇аа’’д̇и? ‘‘аавусо, д̇ам̣ аад̣̇ааяа г̇анд̇ваа, асугад̇т̇зрасса санд̇игз д̇хаммам̣ уг̇г̇ан̣хид̇ваа, асугад̇т̇зрасса санд̇игз гаммадтаанам̣, асугасмим̣ наама аран̃н̃з самаг̇г̇аа саман̣ад̇хаммам̣ гариссаамаад̇и иминаа гааран̣зна ааг̇ад̇амхаа’’д̇и. саад̇ху, бханд̇з, д̇умхз наама маяхам̣ ад̇т̇ааяа ааг̇ад̇аа, ахамби жираниваасзна ид̇ха угган̣тид̇о г̇ажчаами, бад̇д̇ажийварам̣ г̇ан̣хаами, бханд̇зд̇и. аавусо, сааман̣зрад̣̇ахараа маг̇г̇агиланд̇аа, аж̇ж̇а васид̇ваа свз бажчаабхад̇д̇ам̣ г̇амиссаамаад̇и. саад̇ху, бханд̇зд̇и бунад̣̇ивасз д̇зхи сад̣̇д̇хим̣ бин̣д̣ааяа бависад̇и. г̇аамаваасино ‘‘амхаагам̣ аяяо б̣ахуу ааг̇анд̇угз бхигкуу г̇ахзд̇ваа ааг̇ад̇о’’д̇и аасанаани бан̃н̃аабзд̇ваа яааг̇ум̣ бааязд̇ваа суканисиннагат̇ам̣ суд̇ваа бхад̇д̇ам̣ ад̣̇ам̣су. т̇зраа ‘‘д̇вам̣, аавусо, анумод̣̇анам̣ гад̇ваа нигкама, маяам̣ уд̣̇агапаасугадтаанз бхад̇д̇агижжам̣ гариссаамаа’’д̇и нигканд̇аа.
So sāyaṃ therupaṭṭhānaṃ gantvā vanditvā pucchati – ‘‘kasmā, bhante, āgatatthā’’ti? ‘‘Āvuso, taṃ ādāya gantvā, asukattherassa santike dhammaṃ uggaṇhitvā, asukattherassa santike kammaṭṭhānaṃ, asukasmiṃ nāma araññe samaggā samaṇadhammaṃ karissāmāti iminā kāraṇena āgatamhā’’ti. Sādhu, bhante, tumhe nāma mayhaṃ atthāya āgatā, ahampi ciranivāsena idha ukkaṇṭhito gacchāmi, pattacīvaraṃ gaṇhāmi, bhanteti. Āvuso, sāmaṇeradaharā maggakilantā, ajja vasitvā sve pacchābhattaṃ gamissāmāti. Sādhu, bhanteti punadivase tehi saddhiṃ piṇḍāya pavisati. Gāmavāsino ‘‘amhākaṃ ayyo bahū āgantuke bhikkhū gahetvā āgato’’ti āsanāni paññāpetvā yāguṃ pāyetvā sukhanisinnakathaṃ sutvā bhattaṃ adaṃsu. Therā ‘‘tvaṃ, āvuso, anumodanaṃ katvā nikkhama, mayaṃ udakaphāsukaṭṭhāne bhattakiccaṃ karissāmā’’ti nikkhantā.
г̇аамаваасино анумод̣̇анам̣ суд̇ваа бужчим̣су, ‘‘гуд̇о, бханд̇з, т̇зраа ааг̇ад̇аа’’д̇и? зд̇з амхаагам̣ аажарияубаж̇жхааяаа самаанубаж̇жхааяаа санд̣̇идтаа самбхад̇д̇аад̇и. гасмаа ааг̇ад̇аад̇и? мам̣ г̇ахзд̇ваа г̇анд̇угаамад̇ааяаад̇и. д̇умхз бана г̇анд̇угаамаад̇и? аамаавусод̇и. гим̣ вад̣̇зт̇а, бханд̇з, амхзхи гасса убосат̇ааг̇аарам̣ гаарид̇ам̣, гасса бхож̇анасаалаа, гасса аг̇г̇исаалаад̣̇аяо гаарид̇аа, маяам̣ ман̇г̇алааман̇г̇алзсу гасса санд̇игам̣ г̇амиссаамаад̇и? махааубаасигааяоби д̇ад̇т̇зва нисийд̣̇ид̇ваа ассууни бавад̇д̇аяим̣су. д̣̇ахаро ‘‘д̇умхзсу звам̣ д̣̇угкид̇зсу ахам̣ г̇анд̇ваа гим̣ гариссаами? т̇зрз уяяож̇зссаамий’’д̇и вихаарам̣ г̇ад̇о.
Gāmavāsino anumodanaṃ sutvā pucchiṃsu, ‘‘kuto, bhante, therā āgatā’’ti? Ete amhākaṃ ācariyupajjhāyā samānupajjhāyā sandiṭṭhā sambhattāti. Kasmā āgatāti? Maṃ gahetvā gantukāmatāyāti. Tumhe pana gantukāmāti? Āmāvusoti. Kiṃ vadetha, bhante, amhehi kassa uposathāgāraṃ kāritaṃ, kassa bhojanasālā, kassa aggisālādayo kāritā, mayaṃ maṅgalāmaṅgalesu kassa santikaṃ gamissāmāti? Mahāupāsikāyopi tattheva nisīditvā assūni pavattayiṃsu. Daharo ‘‘tumhesu evaṃ dukkhitesu ahaṃ gantvā kiṃ karissāmi? There uyyojessāmī’’ti vihāraṃ gato.
т̇зрааби гад̇абхад̇д̇агижжаа бад̇д̇ажийвараани г̇ахзд̇ваа нисиннаа д̇ам̣ д̣̇исваава, ‘‘гим̣, аавусо, жирааяаси, д̣̇иваа ход̇и, г̇ажчаамаа’’д̇и аахам̣су. аама, бханд̇з, д̇умхз сукид̇аа, асугаг̇зхасса идтагаамуулам̣ тид̇асан̣таанзнзва тид̇ам̣, асугаг̇зхаад̣̇ийнам̣ жид̇д̇агаммамуулаад̣̇ийни ад̇т̇и, г̇ад̇ассааби мз жид̇д̇авигкзбо бхависсад̇и, д̇умхз бурад̇о г̇анд̇ваа асугавихаарз жийварад̇хованараж̇анаад̣̇ийни гарот̇а, ахам̣ д̇ад̇т̇а самбаабун̣иссаамийд̇и. д̇з д̇асса осаггид̇угаамад̇ам̣ н̃ад̇ваа д̇вам̣ бажчаа ааг̇ажчзяяаасийд̇и баггамим̣су.
Therāpi katabhattakiccā pattacīvarāni gahetvā nisinnā taṃ disvāva, ‘‘kiṃ, āvuso, cirāyasi, divā hoti, gacchāmā’’ti āhaṃsu. Āma, bhante, tumhe sukhitā, asukagehassa iṭṭhakāmūlaṃ ṭhitasaṇṭhāneneva ṭhitaṃ, asukagehādīnaṃ cittakammamūlādīni atthi, gatassāpi me cittavikkhepo bhavissati, tumhe purato gantvā asukavihāre cīvaradhovanarajanādīni karotha, ahaṃ tattha sampāpuṇissāmīti. Te tassa osakkitukāmataṃ ñatvā tvaṃ pacchā āgaccheyyāsīti pakkamiṃsu.
со т̇зрз ануг̇анд̇ваа нивад̇д̇о вихаарамзва ааг̇анд̇ваа бхож̇анасаалаад̣̇ийни ологзнд̇о вихаарам̣ рааман̣зяяагам̣ д̣̇исваа жинд̇зси – ‘‘саад̇ху вад̇амхи на г̇ад̇о. сажз аг̇амиссам̣, гожи, д̣̇зва, д̇хаммагат̇иго ааг̇анд̇ваа , саб̣б̣зсам̣ манам̣ бхинд̣̇ид̇ваа, вихаарам̣ ад̇д̇ано нигааяасанд̇агам̣ гарзяяа, ат̇а маяаа бажчаа ааг̇анд̇ваа зд̇асса бажчад̇о лад̣̇д̇хабин̣д̣ам̣ бхун̃ж̇анд̇зна жарид̇аб̣б̣ам̣ бхависсад̇ий’’д̇и.
So there anugantvā nivatto vihārameva āgantvā bhojanasālādīni olokento vihāraṃ rāmaṇeyyakaṃ disvā cintesi – ‘‘sādhu vatamhi na gato. Sace agamissaṃ, koci, deva, dhammakathiko āgantvā , sabbesaṃ manaṃ bhinditvā, vihāraṃ attano nikāyasantakaṃ kareyya, atha mayā pacchā āgantvā etassa pacchato laddhapiṇḍaṃ bhuñjantena caritabbaṃ bhavissatī’’ti.
со абарзна самаязна сун̣аад̇и, ‘‘д̇з гира бхигкуу г̇ад̇адтаанз зганигааяад̣̇взнигааяазгабидагад̣̇взбидагаад̣̇ивасзна б̣уд̣̇д̇хаважанам̣ уг̇г̇ан̣хид̇ваа адтагат̇аажарияаа ж̇аад̇аа винаяад̇хараа ж̇аад̇аа сад̇абариваарааби сахассабариваарааби жаранд̇и. яз банзд̇т̇а саман̣ад̇хаммам̣ гаад̇ум̣ г̇ад̇аа, д̇з гхадзнд̇аа вааяаманд̇аа сод̇аабаннаа ж̇аад̇аа, сагад̣̇ааг̇аамино анааг̇аамино араханд̇о ж̇аад̇аа, махаасаггаарзна бариниб̣б̣уд̇аа’’д̇и . со жинд̇зси – ‘‘сажз ахамби аг̇амиссам̣, маяхамбзсаа самбад̇д̇и абхависса, имам̣ бана таанам̣ мун̃жид̇ум̣ асаггонд̇о ад̇ивияа барихийнамхий’’д̇и. аяам̣ буг̇г̇ало ад̇д̇ано муд̣̇уд̇ааяа д̇ам̣ таанам̣ амун̃жанд̇о арияамаг̇г̇ам̣ од̇арид̇ваа самаад̇хигуллз нисинно ниб̣б̣аанасааг̇арам̣ баабун̣ид̇ум̣ на саггод̇и.
So aparena samayena suṇāti, ‘‘te kira bhikkhū gataṭṭhāne ekanikāyadvenikāyaekapiṭakadvepiṭakādivasena buddhavacanaṃ uggaṇhitvā aṭṭhakathācariyā jātā vinayadharā jātā sataparivārāpi sahassaparivārāpi caranti. Ye panettha samaṇadhammaṃ kātuṃ gatā, te ghaṭentā vāyamantā sotāpannā jātā, sakadāgāmino anāgāmino arahanto jātā, mahāsakkārena parinibbutā’’ti . So cintesi – ‘‘sace ahampi agamissaṃ, mayhampesā sampatti abhavissa, imaṃ pana ṭhānaṃ muñcituṃ asakkonto ativiya parihīnamhī’’ti. Ayaṃ puggalo attano mudutāya taṃ ṭhānaṃ amuñcanto ariyamaggaṃ otaritvā samādhikulle nisinno nibbānasāgaraṃ pāpuṇituṃ na sakkoti.
г̇ан̇г̇ааяа над̣̇ияаа д̇ирияам̣ бад̇ид̇ваа, ваалигааяа од̇т̇адабхаавзна анд̇арасзд̇у вияа худ̇ваа, б̣ахуунам̣ бажжаяо ж̇аад̇аругко вияа рат̇авинийд̇амахааарияавам̣сажанд̣̇обамаад̣̇ибадибад̣̇аасу ан̃н̃ад̇арам̣ бадибад̣̇ам̣ уг̇г̇ахзд̇ваа тид̇о олийнавуд̇д̇иго буг̇г̇ало взд̣̇ид̇аб̣б̣о. со хи д̇ам̣ бадибад̇д̇иниссид̇ам̣ д̇хаммам̣ уг̇г̇ахзд̇ваа багад̇ияаа ман̃ж̇уссаро жид̇д̇алабаб̣б̣ад̇аад̣̇исад̣̇исам̣ маханд̇ам̣ таанам̣ г̇анд̇ваа жзд̇ияан̇г̇ан̣авад̇д̇аад̣̇ийни гарод̇и. ат̇а нам̣ д̇хаммассаванаг̇г̇ам̣ бад̇д̇ам̣ ааг̇анд̇угаа д̣̇ахараа ‘‘д̇хаммам̣ гат̇зхий’’д̇и вад̣̇анд̇и. со саммаа уг̇г̇ахид̇ам̣ д̇хаммам̣ бадибад̣̇ам̣ д̣̇ийбзд̇ваа гат̇зд̇и. ат̇асса бам̣сугуулигабин̣д̣абаад̇игаад̣̇аяо саб̣б̣з т̇зранавамаж̇жхимаа бхигкуу ‘‘ахо саббурисо’’д̇и ад̇д̇аманаа бхаванд̇и.
Gaṅgāya nadiyā tiriyaṃ patitvā, vālikāya otthaṭabhāvena antarasetu viya hutvā, bahūnaṃ paccayo jātarukkho viya rathavinītamahāariyavaṃsacandopamādipaṭipadāsu aññataraṃ paṭipadaṃ uggahetvā ṭhito olīnavuttiko puggalo veditabbo. So hi taṃ paṭipattinissitaṃ dhammaṃ uggahetvā pakatiyā mañjussaro cittalapabbatādisadisaṃ mahantaṃ ṭhānaṃ gantvā cetiyaṅgaṇavattādīni karoti. Atha naṃ dhammassavanaggaṃ pattaṃ āgantukā daharā ‘‘dhammaṃ kathehī’’ti vadanti. So sammā uggahitaṃ dhammaṃ paṭipadaṃ dīpetvā katheti. Athassa paṃsukūlikapiṇḍapātikādayo sabbe theranavamajjhimā bhikkhū ‘‘aho sappuriso’’ti attamanā bhavanti.
со гассажи нид̣̇аанамад̇д̇ам̣, гассажи убад̣дхаг̇аат̇ам̣, гассажи г̇аат̇ам̣ убадтаабзнд̇о аяабаддагзна ааб̣анд̇ханд̇о вияа д̣̇ахарасааман̣зрз сан̇г̇ан̣хид̇ваа махаат̇зрз убасан̇гамид̇ваа, ‘‘бханд̇з, аяам̣ бораан̣агавихааро ад̇т̇и, зд̇т̇а гожи д̇ад̇руббаад̣̇о’’д̇и?, бужчад̇и. т̇зраа – ‘‘гим̣ вад̣̇зси, аавусо, жад̇увийсад̇и гарийсасахассаани д̇ад̇руббаад̣̇о’’д̇и. бханд̇з, д̇умхз звам̣ вад̣̇зт̇а, уд̣̇д̇ханз бана аг̇г̇иби на ж̇алад̇ийд̇и. аавусо, махаавихаараваасийхи лад̣̇д̇хаа наама звамзва нассанд̇и, на гожи сан̣табзд̇ийд̇и. бханд̇з, бораан̣агарааж̇уухи д̣̇иннам̣ кийн̣аасавзхи бадиг̇г̇ахид̇ам̣ гасмаа зд̇з наасзнд̇ийд̇и? аавусо, д̇аад̣̇исзна д̇хаммагат̇игзна саггаа бхавзяяа лад̣̇д̇хунд̇и. бханд̇з, маа звам̣ вад̣̇зт̇а, амхз бадибад̇д̇ид̣̇ийбагад̇хаммагат̇игаа наама, д̇умхз мам̣ ‘‘сан̇гхагудумб̣иго вихаарубадтааго’’д̇и ман̃н̃амаанаа гаад̇угаамаад̇и. гим̣ ну ко, аавусо, агаббияамзд̇ам̣, д̇умхаад̣̇исзхи бана гат̇ид̇з амхаагам̣ уббаж̇ж̇зяяаад̇и? д̇зна хи, бханд̇з, аараамигзсу ааг̇ад̇зсу амхаагам̣ бхаарам̣ гарот̇а, згам̣ габбияад̣̇ваарам̣ гат̇зссаамаад̇и.
So kassaci nidānamattaṃ, kassaci upaḍḍhagāthaṃ, kassaci gāthaṃ upaṭṭhāpento ayapaṭṭakena ābandhanto viya daharasāmaṇere saṅgaṇhitvā mahāthere upasaṅkamitvā, ‘‘bhante, ayaṃ porāṇakavihāro atthi, ettha koci tatruppādo’’ti?, Pucchati. Therā – ‘‘kiṃ vadesi, āvuso, catuvīsati karīsasahassāni tatruppādo’’ti. Bhante, tumhe evaṃ vadetha, uddhane pana aggipi na jalatīti. Āvuso, mahāvihāravāsīhi laddhā nāma evameva nassanti, na koci saṇṭhapetīti. Bhante, porāṇakarājūhi dinnaṃ khīṇāsavehi paṭiggahitaṃ kasmā ete nāsentīti? Āvuso, tādisena dhammakathikena sakkā bhaveyya laddhunti. Bhante, mā evaṃ vadetha, amhe paṭipattidīpakadhammakathikā nāma, tumhe maṃ ‘‘saṅghakuṭumbiko vihārupaṭṭhāko’’ti maññamānā kātukāmāti. Kiṃ nu kho, āvuso, akappiyametaṃ, tumhādisehi pana kathite amhākaṃ uppajjeyyāti? Tena hi, bhante, ārāmikesu āgatesu amhākaṃ bhāraṃ karotha, ekaṃ kappiyadvāraṃ kathessāmāti.
со баад̇ова г̇анд̇ваа, саннибаад̇асаалааяам̣ тад̇ваа, аараамигзсу ааг̇ад̇зсу ‘‘убаасагаа асугакзд̇д̇з бхааг̇о гухим̣, асугакзд̇д̇з гахаабан̣ам̣ гухи’’нд̇иаад̣̇ийни вад̇ваа, ан̃н̃асса кзд̇д̇ам̣ г̇ахзд̇ваа, ан̃н̃асса д̣̇зд̇и. звам̣ ануггамзна д̇ам̣ д̇ам̣ бадисзд̇хзнд̇о д̇асса д̇асса д̣̇знд̇о д̇ат̇аа агааси , яат̇аа яааг̇ухад̇т̇аа буувахад̇т̇аа бхад̇д̇ахад̇т̇аа д̇зламад̇хупаан̣ид̇агхад̇аад̣̇ихад̇т̇аа жа ад̇д̇анова санд̇игам̣ ааг̇ажчанд̇и. сагалавихааро згаголаахало ход̇и, бзсалаа бхигкуу ниб̣б̣иж̇ж̇а абаггамим̣су.
So pātova gantvā, sannipātasālāyaṃ ṭhatvā, ārāmikesu āgatesu ‘‘upāsakā asukakhette bhāgo kuhiṃ, asukakhette kahāpaṇaṃ kuhi’’ntiādīni vatvā, aññassa khettaṃ gahetvā, aññassa deti. Evaṃ anukkamena taṃ taṃ paṭisedhento tassa tassa dento tathā akāsi , yathā yāguhatthā pūvahatthā bhattahatthā telamadhuphāṇitaghatādihatthā ca attanova santikaṃ āgacchanti. Sakalavihāro ekakolāhalo hoti, pesalā bhikkhū nibbijja apakkamiṃsu.
соби аажарияубаж̇жхааязхи виссадтагаанам̣ б̣ахуунам̣ д̣̇уб̣б̣ажабуг̇г̇алаанам̣ убаж̇жхам̣ д̣̇знд̇о вихаарам̣ буурзд̇и. ааг̇анд̇угаа бхигкуу вихаарад̣̇ваарз тад̇ваава ‘‘вихаарз гз васанд̇ий’’д̇и, бужчид̇ваа, ‘‘зваруубаа наама бхигкуу’’д̇и суд̇ваа б̣аахирзнзва баггаманд̇и. аяам̣ буг̇г̇ало саасанз д̇ирияам̣ нибаннад̇ааяа махааж̇анасса бажжаяабхаавам̣ убаг̇ад̇о арияамаг̇г̇ам̣ од̇арид̇ваа самаад̇хигуллз нисинно ниб̣б̣аанасааг̇арам̣ баабун̣ид̇ум̣ на саггод̇и.
Sopi ācariyupajjhāyehi vissaṭṭhakānaṃ bahūnaṃ dubbacapuggalānaṃ upajjhaṃ dento vihāraṃ pūreti. Āgantukā bhikkhū vihāradvāre ṭhatvāva ‘‘vihāre ke vasantī’’ti, pucchitvā, ‘‘evarūpā nāma bhikkhū’’ti sutvā bāhireneva pakkamanti. Ayaṃ puggalo sāsane tiriyaṃ nipannatāya mahājanassa paccayabhāvaṃ upagato ariyamaggaṃ otaritvā samādhikulle nisinno nibbānasāgaraṃ pāpuṇituṃ na sakkoti.
бхаг̇аванд̇ам̣ зд̇ад̣̇авожаад̇и ‘‘ниб̣б̣аанабаб̣бхаараа’’д̇и бад̣̇зна осаабид̇ам̣ д̇хаммад̣̇зсанам̣ н̃ад̇ваа анусанд̇хигусалад̇ааяа зд̇ам̣ ‘‘гим̣ ну ко, бханд̇з’’д̇иаад̣̇иважанам̣ авожа. д̇ат̇ааг̇ад̇оби хи имиссам̣ барисад̇и нисинно ‘‘анусанд̇хигусало бхигку ад̇т̇и, со мам̣ бан̃хам̣ бужчиссад̇ий’’д̇и д̇ассзва огаасагаран̣ад̇т̇ааяа имасмим̣ таанз д̣̇зсанам̣ нидтаабзси.
Bhagavantaṃ etadavocāti ‘‘nibbānapabbhārā’’ti padena osāpitaṃ dhammadesanaṃ ñatvā anusandhikusalatāya etaṃ ‘‘kiṃ nu kho, bhante’’tiādivacanaṃ avoca. Tathāgatopi hi imissaṃ parisati nisinno ‘‘anusandhikusalo bhikkhu atthi, so maṃ pañhaṃ pucchissatī’’ti tasseva okāsakaraṇatthāya imasmiṃ ṭhāne desanaṃ niṭṭhāpesi.
ид̣̇аани оримам̣ д̇ийранд̇иаад̣̇инаа наязна вуд̇д̇зсу аж̇жхад̇д̇игааяад̇анаад̣̇ийсу звам̣ убаг̇аманаанубаг̇аманаад̣̇ийни взд̣̇ид̇аб̣б̣аани. ‘‘маяхам̣ жагку-басаннам̣, ахам̣ аббамад̇д̇агамби руубаарамман̣ам̣ бадивиж̇жхид̇ум̣ саггомий’’д̇и зд̇ам̣ ниссааяа жагкум̣ ассаад̣̇знд̇оби д̇имирагаваад̇аад̣̇ийхи убахад̇абасаад̣̇о ‘‘аманаабам̣ маяхам̣ жагку, маханд̇амби руубаарамман̣ам̣ вибхаавзд̇ум̣ на саггомий’’д̇и д̣̇оманассам̣ аабаж̇ж̇анд̇оби жагкааяад̇анам̣ убаг̇ажчад̇и наама. анижжам̣ д̣̇угкам̣ анад̇д̇аад̇и д̇ин̣н̣ам̣ лагкан̣аанам̣ васзна вибассанд̇о бана на убаг̇ажчад̇и наама. сод̇аад̣̇ийсуби зсзва наяо.
Idāni orimaṃ tīrantiādinā nayena vuttesu ajjhattikāyatanādīsu evaṃ upagamanānupagamanādīni veditabbāni. ‘‘Mayhaṃ cakkhu-pasannaṃ, ahaṃ appamattakampi rūpārammaṇaṃ paṭivijjhituṃ sakkomī’’ti etaṃ nissāya cakkhuṃ assādentopi timirakavātādīhi upahatapasādo ‘‘amanāpaṃ mayhaṃ cakkhu, mahantampi rūpārammaṇaṃ vibhāvetuṃ na sakkomī’’ti domanassaṃ āpajjantopi cakkhāyatanaṃ upagacchati nāma. Aniccaṃ dukkhaṃ anattāti tiṇṇaṃ lakkhaṇānaṃ vasena vipassanto pana na upagacchati nāma. Sotādīsupi eseva nayo.
манааяад̇анз бана ‘‘манаабам̣ вад̇а мз мано, гин̃жи ваамад̇о аг̇г̇ахзд̇ваа саб̣б̣ам̣ д̣̇агкин̣ад̇ова г̇ан̣хаад̇ий’’д̇и ваа ‘‘манзна мз жинд̇ид̇ажинд̇ид̇асса алаабхо наама над̇т̇ий’’д̇и ваа звам̣ ассаад̣̇знд̇оби, ‘‘д̣̇ужинд̇ид̇ажинд̇ид̇асса мз мано аббад̣̇агкин̣аг̇г̇аахий’’д̇и звам̣ д̣̇оманассам̣ уббаад̣̇знд̇оби манааяад̇анам̣ убаг̇ажчад̇и наама. идтз бана руубз рааг̇ам̣, анидтз бадигхам̣ уббаад̣̇знд̇о руубааяад̇анам̣ убаг̇ажчад̇и наама. сад̣̇д̣̇ааяад̇анаад̣̇ийсуби зсзва наяо.
Manāyatane pana ‘‘manāpaṃ vata me mano, kiñci vāmato aggahetvā sabbaṃ dakkhiṇatova gaṇhātī’’ti vā ‘‘manena me cintitacintitassa alābho nāma natthī’’ti vā evaṃ assādentopi, ‘‘ducintitacintitassa me mano appadakkhiṇaggāhī’’ti evaṃ domanassaṃ uppādentopi manāyatanaṃ upagacchati nāma. Iṭṭhe pana rūpe rāgaṃ, aniṭṭhe paṭighaṃ uppādento rūpāyatanaṃ upagacchati nāma. Saddāyatanādīsupi eseva nayo.
нанд̣̇ийрааг̇ассзд̇ам̣ ад̇хиважананд̇и яат̇аа хи маж̇жхз сам̣сийд̣̇ид̇ваа т̇алам̣ бад̇д̇ам̣ д̣̇ааругканд̇хам̣ сан̣хат̇уулаваалигаа бид̣̇ахад̇и, со буна сийсам̣ угкибид̇ум̣ на саггод̇и, звам̣ нанд̣̇ийрааг̇зна ааб̣ад̣̇д̇хо буг̇г̇ало жад̇уусу махааабааязсу бад̇ид̇о махаад̣̇угкзна бид̇хийяад̇и, со анзгзхиби вассасахассзхи буна сийсам̣ угкибид̇ум̣ на саггод̇и. д̇зна вуд̇д̇ам̣ ‘‘нанд̣̇ийрааг̇ассзд̇ам̣ ад̇хиважана’’нд̇и.
Nandīrāgassetaṃ adhivacananti yathā hi majjhe saṃsīditvā thalaṃ pattaṃ dārukkhandhaṃ saṇhathūlavālikā pidahati, so puna sīsaṃ ukkhipituṃ na sakkoti, evaṃ nandīrāgena ābaddho puggalo catūsu mahāapāyesu patito mahādukkhena pidhīyati, so anekehipi vassasahassehi puna sīsaṃ ukkhipituṃ na sakkoti. Tena vuttaṃ ‘‘nandīrāgassetaṃ adhivacana’’nti.
асмимаанассзд̇ам̣ ад̇хиважананд̇и яат̇аа хи т̇алз аарул̣хо д̣̇ааругканд̇хо хздтаа г̇ан̇г̇од̣̇агзна жзва убари вассзна жа д̇змзнд̇о ануггамзна сзваалабарияонад̣̇д̇хо ‘‘баасаан̣о ну ко зса каан̣уго’’д̇и вад̇д̇аб̣б̣ад̇ам̣ аабаж̇ж̇ад̇и, звамзва асмимаанзна уннад̇о буг̇г̇ало бам̣сугуулигадтаанз бам̣сугуулиго ход̇и, д̇хаммагат̇игадтаанз д̇хаммагат̇иго, бхан̣д̣анагаарагадтаанз бхан̣д̣анагаараго, взж̇ж̇адтаанз взж̇ж̇о, бисун̣адтаанз бисун̣о. со наанаббагаарам̣ анзсанам̣ аабаж̇ж̇анд̇о д̇аахи д̇аахи аабад̇д̇ийхи баливзтид̇о ‘‘ад̇т̇и ну ко асса аб̣бханд̇арз гин̃жи сийлам̣, уд̣̇ааху над̇т̇ий’’д̇и вад̇д̇аб̣б̣ад̇ам̣ аабаж̇ж̇ад̇и. д̇зна вуд̇д̇ам̣ ‘‘асмимаанассзд̇ам̣ ад̇хиважана’’нд̇и.
Asmimānassetaṃ adhivacananti yathā hi thale āruḷho dārukkhandho heṭṭhā gaṅgodakena ceva upari vassena ca temento anukkamena sevālapariyonaddho ‘‘pāsāṇo nu kho esa khāṇuko’’ti vattabbataṃ āpajjati, evameva asmimānena unnato puggalo paṃsukūlikaṭṭhāne paṃsukūliko hoti, dhammakathikaṭṭhāne dhammakathiko, bhaṇḍanakārakaṭṭhāne bhaṇḍanakārako, vejjaṭṭhāne vejjo, pisuṇaṭṭhāne pisuṇo. So nānappakāraṃ anesanaṃ āpajjanto tāhi tāhi āpattīhi paliveṭhito ‘‘atthi nu kho assa abbhantare kiñci sīlaṃ, udāhu natthī’’ti vattabbataṃ āpajjati. Tena vuttaṃ ‘‘asmimānassetaṃ adhivacana’’nti.
бан̃жаннзд̇ам̣ гаамаг̇ун̣аанам̣ ад̇хиважананд̇и яат̇аа хи ааваддз бад̇ид̇ад̣̇ааруканд̇хо анд̇оязва баасаан̣аад̣̇ийсу аахад̇асамаб̣бхаахад̇о бхиж̇ж̇ид̇ваа жун̣н̣авижун̣н̣ам̣ ход̇и, звам̣ бан̃жагаамаг̇ун̣ааваддз бад̇ид̇абуг̇г̇ало жад̇уусу абааязсу гаммагааран̣акуббибаасаад̣̇ид̣̇угкзхи аахад̇асамаб̣бхаахад̇о д̣̇ийгхарад̇д̇ам̣ жун̣н̣авижун̣н̣ад̇ам̣ аабаж̇ж̇ад̇и. д̇зна вуд̇д̇ам̣ ‘‘бан̃жаннзд̇ам̣ гаамаг̇ун̣аанам̣ ад̇хиважана’’нд̇и.
Pañcannetaṃkāmaguṇānaṃ adhivacananti yathā hi āvaṭṭe patitadārukhandho antoyeva pāsāṇādīsu āhatasamabbhāhato bhijjitvā cuṇṇavicuṇṇaṃ hoti, evaṃ pañcakāmaguṇāvaṭṭe patitapuggalo catūsu apāyesu kammakāraṇakhuppipāsādidukkhehi āhatasamabbhāhato dīgharattaṃ cuṇṇavicuṇṇataṃ āpajjati. Tena vuttaṃ ‘‘pañcannetaṃ kāmaguṇānaṃ adhivacana’’nti.
д̣̇уссийлод̇и ниссийло. баабад̇хаммод̇и лаамагад̇хаммо. асужийд̇и на сужи. сан̇гассарасамаажаарод̇и ‘‘имасса ман̃н̃з имасса ман̃н̃з ид̣̇ам̣ гамма’’нд̇и звам̣ барзхи сан̇гааяа сарид̇аб̣б̣асамаажааро. сан̇гааяа ваа барзсам̣ самаажаарам̣ сарад̇ийд̇иби сан̇гассарасамаажааро. д̇асса хи д̣̇вз д̇аяо ж̇анз гат̇знд̇з д̣̇исваа, ‘‘мама д̣̇осам̣ ман̃н̃з гат̇знд̇ий’’д̇и д̇зсам̣ самаажаарам̣ сан̇гассарад̇и д̇хаавад̇ийд̇и сан̇гассарасамаажааро.
Dussīloti nissīlo. Pāpadhammoti lāmakadhammo. Asucīti na suci. Saṅkassarasamācāroti ‘‘imassa maññe imassa maññe idaṃ kamma’’nti evaṃ parehi saṅkāya saritabbasamācāro. Saṅkāya vā paresaṃ samācāraṃ saratītipi saṅkassarasamācāro. Tassa hi dve tayo jane kathente disvā, ‘‘mama dosaṃ maññe kathentī’’ti tesaṃ samācāraṃ saṅkassarati dhāvatīti saṅkassarasamācāro.
саман̣абадин̃н̃од̇и салаагаг̇г̇ахан̣аад̣̇ийсу ‘‘гид̇д̇агаа вихаарз саман̣аа’’д̇и г̇ан̣анааяа аарад̣̇д̇хааяа ‘‘ахамби саман̣о, ахамби саман̣о’’д̇и бадин̃н̃ам̣ д̣̇зд̇и, салаагаг̇г̇ахан̣аад̣̇ийни гарод̇и. б̣рахмажаарибадин̃н̃од̇и убосат̇абавааран̣аад̣̇ийсу ‘‘ахамби б̣рахмажаарий’’д̇и бадин̃н̃ааяа д̇аани гаммаани бависад̇и . анд̇обууд̇ийд̇и ваггахад̣̇аяаад̣̇ийсу абууд̇игассаби г̇ун̣аанам̣ бууд̇ибхаавзна, анд̇обууд̇и. авассуд̇од̇и рааг̇зна д̇инд̇о. гасамб̣уж̇аад̇од̇и рааг̇аад̣̇ийхи гилзсзхи гажавараж̇аад̇о.
Samaṇapaṭiññoti salākaggahaṇādīsu ‘‘kittakā vihāre samaṇā’’ti gaṇanāya āraddhāya ‘‘ahampi samaṇo, ahampi samaṇo’’ti paṭiññaṃ deti, salākaggahaṇādīni karoti. Brahmacāripaṭiññoti uposathapavāraṇādīsu ‘‘ahampi brahmacārī’’ti paṭiññāya tāni kammāni pavisati . Antopūtīti vakkahadayādīsu apūtikassapi guṇānaṃ pūtibhāvena, antopūti. Avassutoti rāgena tinto. Kasambujātoti rāgādīhi kilesehi kacavarajāto.
зд̇ад̣̇авожаад̇и г̇ог̇ан̣ам̣ г̇ан̇г̇аад̇ийраабхимукам̣ гад̇ваа барисабарияанд̇з тид̇о аад̣̇ид̇о бадтааяа яаава барияосаанаа сад̇т̇у д̇хаммад̣̇зсанам̣ суд̇ваа, ‘‘сад̇т̇аа оримад̇ийраад̣̇ийнам̣ анубаг̇ажчанд̇аад̣̇ивасзна саггаа бадибад̇д̇им̣ буурзд̇унд̇и вад̣̇ад̇и. яад̣̇и звам̣ буурзд̇ум̣ саггаа, ахам̣ баб̣б̣аж̇ид̇ваа буурзссаамий’’д̇и жинд̇зд̇ваа зд̇ам̣ ‘‘ахам̣ ко, бханд̇з’’д̇иаад̣̇иважанам̣ авожа.
Etadavocāti gogaṇaṃ gaṅgātīrābhimukhaṃ katvā parisapariyante ṭhito ādito paṭṭhāya yāva pariyosānā satthu dhammadesanaṃ sutvā, ‘‘satthā orimatīrādīnaṃ anupagacchantādivasena sakkā paṭipattiṃ pūretunti vadati. Yadi evaṃ pūretuṃ sakkā, ahaṃ pabbajitvā pūressāmī’’ti cintetvā etaṃ ‘‘ahaṃ kho, bhante’’tiādivacanaṃ avoca.
важчаг̇ид̣̇д̇хинияод̇и важчзсу саснзхаа т̇анзхи кийрам̣ баг̇гхаранд̇зхи важчагаснзхзна саяамзва г̇амиссанд̇ийд̇и. нияяаад̇зхзваад̇и нияяаад̇зхиязва. г̇аавийсу хи анияяаад̇ид̇аасу г̇осаамигаа ааг̇анд̇ваа, ‘‘згаа г̇аавий на д̣̇иссад̇и, зго г̇он̣о, зго важчаго на д̣̇иссад̇ий’’д̇и д̇уяхам̣ бидтид̇о бидтид̇о вижариссанд̇и, ид̇и д̇з апаасугам̣ бхависсад̇и. баб̣б̣аж̇ж̇аа жа наамзсаа саин̣асса на рухад̇и, ан̣ан̣аа баб̣б̣аж̇ж̇аа жа б̣уд̣̇д̇хаад̣̇ийхи сам̣ван̣н̣ид̇аад̇и д̣̇ассанад̇т̇ам̣ звамааха. нияяаад̇аад̇и нияяаад̇ид̇аа. имасмим̣ суд̇д̇з ваддавиваддам̣ гат̇ид̇ам̣.
Vacchagiddhiniyoti vacchesu sasnehā thanehi khīraṃ paggharantehi vacchakasnehena sayameva gamissantīti. Niyyātehevāti niyyātehiyeva. Gāvīsu hi aniyyātitāsu gosāmikā āgantvā, ‘‘ekā gāvī na dissati, eko goṇo, eko vacchako na dissatī’’ti tuyhaṃ piṭṭhito piṭṭhito vicarissanti, iti te aphāsukaṃ bhavissati. Pabbajjā ca nāmesā saiṇassa na ruhati, aṇaṇā pabbajjā ca buddhādīhi saṃvaṇṇitāti dassanatthaṃ evamāha. Niyyātāti niyyātitā. Imasmiṃ sutte vaṭṭavivaṭṭaṃ kathitaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 4. батамад̣̇ааругканд̇хобамасуд̇д̇ам̣ • 4. Paṭhamadārukkhandhopamasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 4. батамад̣̇ааругканд̇хобамасуд̇д̇аван̣н̣анаа • 4. Paṭhamadārukkhandhopamasuttavaṇṇanā
