| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೨. ದುತಿಯಪಣ್ಣಾಸಕಂ
2. Dutiyapaṇṇāsakaṃ
(೬) ೧. ಬ್ರಾಹ್ಮಣವಗ್ಗೋ
(6) 1. Brāhmaṇavaggo
೧. ಪಠಮದ್ವೇಬ್ರಾಹ್ಮಣಸುತ್ತಂ
1. Paṭhamadvebrāhmaṇasuttaṃ
೫೨. ಅಥ ಖೋ ದ್ವೇ ಬ್ರಾಹ್ಮಣಾ ಜಿಣ್ಣಾ ವುದ್ಧಾ ಮಹಲ್ಲಕಾ ಅದ್ಧಗತಾ ವಯೋಅನುಪ್ಪತ್ತಾ ವೀಸವಸ್ಸಸತಿಕಾ ಜಾತಿಯಾ ಯೇನ ಭಗವಾ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ಭಗವತಾ ಸದ್ಧಿಂ ಸಮ್ಮೋದಿಂಸು। ಸಮ್ಮೋದನೀಯಂ ಕಥಂ ಸಾರಣೀಯಂ ವೀತಿಸಾರೇತ್ವಾ ಏಕಮನ್ತಂ ನಿಸೀದಿಂಸು। ಏಕಮನ್ತಂ ನಿಸಿನ್ನಾ ಖೋ ತೇ ಬ್ರಾಹ್ಮಣಾ ಭಗವನ್ತಂ ಏತದವೋಚುಂ – ‘‘ಮಯಮಸ್ಸು, ಭೋ ಗೋತಮ, ಬ್ರಾಹ್ಮಣಾ ಜಿಣ್ಣಾ ವುದ್ಧಾ ಮಹಲ್ಲಕಾ ಅದ್ಧಗತಾ ವಯೋಅನುಪ್ಪತ್ತಾ ವೀಸವಸ್ಸಸತಿಕಾ ಜಾತಿಯಾ; ತೇ ಚಮ್ಹಾ ಅಕತಕಲ್ಯಾಣಾ ಅಕತಕುಸಲಾ ಅಕತಭೀರುತ್ತಾಣಾ। ಓವದತು ನೋ ಭವಂ ಗೋತಮೋ, ಅನುಸಾಸತು ನೋ ಭವಂ ಗೋತಮೋ ಯಂ ಅಮ್ಹಾಕಂ ಅಸ್ಸ ದೀಘರತ್ತಂ ಹಿತಾಯ ಸುಖಾಯಾ’’ತಿ।
52. Atha kho dve brāhmaṇā jiṇṇā vuddhā mahallakā addhagatā vayoanuppattā vīsavassasatikā jātiyā yena bhagavā tenupasaṅkamiṃsu; upasaṅkamitvā bhagavatā saddhiṃ sammodiṃsu. Sammodanīyaṃ kathaṃ sāraṇīyaṃ vītisāretvā ekamantaṃ nisīdiṃsu. Ekamantaṃ nisinnā kho te brāhmaṇā bhagavantaṃ etadavocuṃ – ‘‘mayamassu, bho gotama, brāhmaṇā jiṇṇā vuddhā mahallakā addhagatā vayoanuppattā vīsavassasatikā jātiyā; te camhā akatakalyāṇā akatakusalā akatabhīruttāṇā. Ovadatu no bhavaṃ gotamo, anusāsatu no bhavaṃ gotamo yaṃ amhākaṃ assa dīgharattaṃ hitāya sukhāyā’’ti.
‘‘ತಗ್ಘ ತುಮ್ಹೇ, ಬ್ರಾಹ್ಮಣಾ, ಜಿಣ್ಣಾ ವುದ್ಧಾ ಮಹಲ್ಲಕಾ ಅದ್ಧಗತಾ ವಯೋಅನುಪ್ಪತ್ತಾ ವೀಸವಸ್ಸಸತಿಕಾ ಜಾತಿಯಾ; ತೇ ಚತ್ಥ ಅಕತಕಲ್ಯಾಣಾ ಅಕತಕುಸಲಾ ಅಕತಭೀರುತ್ತಾಣಾ। ಉಪನೀಯತಿ ಖೋ ಅಯಂ, ಬ್ರಾಹ್ಮಣಾ, ಲೋಕೋ ಜರಾಯ ಬ್ಯಾಧಿನಾ ಮರಣೇನ। ಏವಂ ಉಪನೀಯಮಾನೇ ಖೋ, ಬ್ರಾಹ್ಮಣಾ, ಲೋಕೇ ಜರಾಯ ಬ್ಯಾಧಿನಾ ಮರಣೇನ, ಯೋ ಇಧ ಕಾಯೇನ ಸಂಯಮೋ ವಾಚಾಯ ಸಂಯಮೋ ಮನಸಾ ಸಂಯಮೋ, ತಂ ತಸ್ಸ ಪೇತಸ್ಸ ತಾಣಞ್ಚ ಲೇಣಞ್ಚ ದೀಪಞ್ಚ ಸರಣಞ್ಚ ಪರಾಯಣಞ್ಚಾ’’ತಿ।
‘‘Taggha tumhe, brāhmaṇā, jiṇṇā vuddhā mahallakā addhagatā vayoanuppattā vīsavassasatikā jātiyā; te cattha akatakalyāṇā akatakusalā akatabhīruttāṇā. Upanīyati kho ayaṃ, brāhmaṇā, loko jarāya byādhinā maraṇena. Evaṃ upanīyamāne kho, brāhmaṇā, loke jarāya byādhinā maraṇena, yo idha kāyena saṃyamo vācāya saṃyamo manasā saṃyamo, taṃ tassa petassa tāṇañca leṇañca dīpañca saraṇañca parāyaṇañcā’’ti.
‘‘ಉಪನೀಯತಿ ಜೀವಿತಮಪ್ಪಮಾಯು,
‘‘Upanīyati jīvitamappamāyu,
ಜರೂಪನೀತಸ್ಸ ನ ಸನ್ತಿ ತಾಣಾ।
Jarūpanītassa na santi tāṇā;
ಏತಂ ಭಯಂ ಮರಣೇ ಪೇಕ್ಖಮಾನೋ,
Etaṃ bhayaṃ maraṇe pekkhamāno,
ಪುಞ್ಞಾನಿ ಕಯಿರಾಥ ಸುಖಾವಹಾನಿ॥
Puññāni kayirātha sukhāvahāni.
‘‘ಯೋಧ ಕಾಯೇನ ಸಂಯಮೋ, ವಾಚಾಯ ಉದ ಚೇತಸಾ।
‘‘Yodha kāyena saṃyamo, vācāya uda cetasā;
ತಂ ತಸ್ಸ ಪೇತಸ್ಸ ಸುಖಾಯ ಹೋತಿ,
Taṃ tassa petassa sukhāya hoti,
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೧. ಪಠಮದ್ವೇಬ್ರಾಹ್ಮಣಸುತ್ತವಣ್ಣನಾ • 1. Paṭhamadvebrāhmaṇasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧. ಪಠಮದ್ವೇಬ್ರಾಹ್ಮಣಸುತ್ತವಣ್ಣನಾ • 1. Paṭhamadvebrāhmaṇasuttavaṇṇanā
