| Library / Tipiṭaka / તિપિટક • Tipiṭaka / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) |
૫. પઠમલોકધમ્મસુત્તવણ્ણના
5. Paṭhamalokadhammasuttavaṇṇanā
૫. પઞ્ચમે લોકસ્સ ધમ્માતિ લોકધમ્મા. એતેહિ મુત્તા નામ નત્થિ, બુદ્ધાનમ્પિ હોન્તિ. તેનેવાહ – લોકં અનુપરિવત્તન્તીતિ અનુબન્ધન્તિ નપ્પજહન્તિ , લોકતો ન નિવત્તન્તીતિ અત્થો. લોકો ચ અટ્ઠ લોકધમ્મે અનુપરિવત્તતીતિ અયઞ્ચ લોકો એતે અનુબન્ધતિ ન પજહતિ, તેહિ ધમ્મેહિ ન નિવત્તતીતિ અત્થો.
5. Pañcame lokassa dhammāti lokadhammā. Etehi muttā nāma natthi, buddhānampi honti. Tenevāha – lokaṃ anuparivattantīti anubandhanti nappajahanti , lokato na nivattantīti attho. Loko ca aṭṭha lokadhamme anuparivattatīti ayañca loko ete anubandhati na pajahati, tehi dhammehi na nivattatīti attho.
લાભો અલાભોતિ લાભે આગતે અલાભો આગતોયેવાતિ વેદિતબ્બો. અયસાદીસુપિ એસેવ નયો. અવેક્ખતિ વિપરિણામધમ્મેતિ ‘‘વિપરિણામધમ્મા ઇમે’’તિ એવં અવેક્ખતિ. વિધૂપિતાતિ વિધમિતા વિદ્ધંસિતા. પદઞ્ચ ઞત્વાતિ નિબ્બાનપદં જાનિત્વા. સમ્મપ્પજાનાતિ ભવસ્સ પારગૂતિ ભવસ્સ પારં ગતો નિપ્ફત્તિં મત્થકં પત્તો, નિબ્બાનપદં ઞત્વાવ તં પારં ગતભાવં સમ્મપ્પજાનાતીતિ. ઇમસ્મિં સુત્તે વટ્ટવિવટ્ટં કથિતં.
Lābho alābhoti lābhe āgate alābho āgatoyevāti veditabbo. Ayasādīsupi eseva nayo. Avekkhati vipariṇāmadhammeti ‘‘vipariṇāmadhammā ime’’ti evaṃ avekkhati. Vidhūpitāti vidhamitā viddhaṃsitā. Padañca ñatvāti nibbānapadaṃ jānitvā. Sammappajānāti bhavassa pāragūti bhavassa pāraṃ gato nipphattiṃ matthakaṃ patto, nibbānapadaṃ ñatvāva taṃ pāraṃ gatabhāvaṃ sammappajānātīti. Imasmiṃ sutte vaṭṭavivaṭṭaṃ kathitaṃ.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૫. પઠમલોકધમ્મસુત્તં • 5. Paṭhamalokadhammasuttaṃ
ટીકા • Tīkā / સુત્તપિટક (ટીકા) • Suttapiṭaka (ṭīkā) / અઙ્ગુત્તરનિકાય (ટીકા) • Aṅguttaranikāya (ṭīkā) / ૫. પઠમલોકધમ્મસુત્તવણ્ણના • 5. Paṭhamalokadhammasuttavaṇṇanā
