| Library / Tipiṭaka / തിപിടക • Tipiṭaka / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) |
൫. പഠമലോകധമ്മസുത്തവണ്ണനാ
5. Paṭhamalokadhammasuttavaṇṇanā
൫. പഞ്ചമേ ലോകസ്സ ധമ്മാതി ലോകധമ്മാ. ഏതേഹി മുത്താ നാമ നത്ഥി, ബുദ്ധാനമ്പി ഹോന്തി. തേനേവാഹ – ലോകം അനുപരിവത്തന്തീതി അനുബന്ധന്തി നപ്പജഹന്തി , ലോകതോ ന നിവത്തന്തീതി അത്ഥോ. ലോകോ ച അട്ഠ ലോകധമ്മേ അനുപരിവത്തതീതി അയഞ്ച ലോകോ ഏതേ അനുബന്ധതി ന പജഹതി, തേഹി ധമ്മേഹി ന നിവത്തതീതി അത്ഥോ.
5. Pañcame lokassa dhammāti lokadhammā. Etehi muttā nāma natthi, buddhānampi honti. Tenevāha – lokaṃ anuparivattantīti anubandhanti nappajahanti , lokato na nivattantīti attho. Loko ca aṭṭha lokadhamme anuparivattatīti ayañca loko ete anubandhati na pajahati, tehi dhammehi na nivattatīti attho.
ലാഭോ അലാഭോതി ലാഭേ ആഗതേ അലാഭോ ആഗതോയേവാതി വേദിതബ്ബോ. അയസാദീസുപി ഏസേവ നയോ. അവേക്ഖതി വിപരിണാമധമ്മേതി ‘‘വിപരിണാമധമ്മാ ഇമേ’’തി ഏവം അവേക്ഖതി. വിധൂപിതാതി വിധമിതാ വിദ്ധംസിതാ. പദഞ്ച ഞത്വാതി നിബ്ബാനപദം ജാനിത്വാ. സമ്മപ്പജാനാതി ഭവസ്സ പാരഗൂതി ഭവസ്സ പാരം ഗതോ നിപ്ഫത്തിം മത്ഥകം പത്തോ, നിബ്ബാനപദം ഞത്വാവ തം പാരം ഗതഭാവം സമ്മപ്പജാനാതീതി. ഇമസ്മിം സുത്തേ വട്ടവിവട്ടം കഥിതം.
Lābho alābhoti lābhe āgate alābho āgatoyevāti veditabbo. Ayasādīsupi eseva nayo. Avekkhati vipariṇāmadhammeti ‘‘vipariṇāmadhammā ime’’ti evaṃ avekkhati. Vidhūpitāti vidhamitā viddhaṃsitā. Padañca ñatvāti nibbānapadaṃ jānitvā. Sammappajānāti bhavassa pāragūti bhavassa pāraṃ gato nipphattiṃ matthakaṃ patto, nibbānapadaṃ ñatvāva taṃ pāraṃ gatabhāvaṃ sammappajānātīti. Imasmiṃ sutte vaṭṭavivaṭṭaṃ kathitaṃ.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / അങ്ഗുത്തരനികായ • Aṅguttaranikāya / ൫. പഠമലോകധമ്മസുത്തം • 5. Paṭhamalokadhammasuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൫. പഠമലോകധമ്മസുത്തവണ്ണനാ • 5. Paṭhamalokadhammasuttavaṇṇanā
