Library / Tipiṭaka / తిపిటక • Tipiṭaka / సంయుత్తనికాయ • Saṃyuttanikāya |
౮. పఠమనతుమ్హాకంసుత్తం
8. Paṭhamanatumhākaṃsuttaṃ
౧౦౧. ‘‘యం 1, భిక్ఖవే, న తుమ్హాకం, తం పజహథ. తం వో పహీనం హితాయ సుఖాయ భవిస్సతి. కిఞ్చ, భిక్ఖవే, న తుమ్హాకం? చక్ఖు, భిక్ఖవే, న తుమ్హాకం . తం పజహథ. తం వో పహీనం హితాయ సుఖాయ భవిస్సతి . రూపా న తుమ్హాకం. తే పజహథ. తే వో పహీనా హితాయ సుఖాయ భవిస్సన్తి. చక్ఖువిఞ్ఞాణం న తుమ్హాకం. తం పజహథ. తం వో పహీనం హితాయ సుఖాయ భవిస్సతి. చక్ఖుసమ్ఫస్సో న తుమ్హాకం. తం పజహథ. సో వో పహీనో హితాయ సుఖాయ భవిస్సతి. యమ్పిదం చక్ఖుసమ్ఫస్సపచ్చయా ఉప్పజ్జతి వేదయితం సుఖం వా దుక్ఖం వా అదుక్ఖమసుఖం వా తమ్పి న తుమ్హాకం. తం పజహథ. తం వో పహీనం హితాయ సుఖాయ భవిస్సతి. సోతం న తుమ్హాకం. తం పజహథ. తం వో పహీనం హితాయ సుఖాయ భవిస్సతి. సద్దా న తుమ్హాకం. తే పజహథ. తే వో పహీనా హితాయ సుఖాయ భవిస్సన్తి. సోతవిఞ్ఞాణం న తుమ్హాకం. తం పజహథ. తం వో పహీనం హితాయ సుఖాయ భవిస్సతి. సోతసమ్ఫస్సో న తుమ్హాకం. తం పజహథ. సో వో పహీనా హితాయ సుఖాయ భవిస్సతి. యమ్పిదం సోతసమ్ఫస్సపచ్చయా ఉప్పజ్జతి వేదయితం సుఖం వా దుక్ఖం వా అదుక్ఖమసుఖం వా తమ్పి న తుమ్హాకం. తం పజహథ. తం వో పహీనం హితాయ సుఖాయ భవిస్సతి. ఘానం న తుమ్హాకం. తం పజహథ. తం వో పహీనం హితాయ సుఖాయ భవిస్సతి. గన్ధా న తుమ్హాకం. తే పజహథ. తే వో పహీనా హితాయ సుఖాయ భవిస్సన్తి. ఘానవిఞ్ఞాణం న తుమ్హాకం. తం పజహథ. తం వో పహీనం హితాయ సుఖాయ భవిస్సతి. ఘానసమ్ఫస్సో న తుమ్హాకం. తం పజహథ. సో వో పహీనా హితాయ సుఖాయ భవిస్సతి. యమ్పిదం ఘానసమ్ఫస్సపచ్చయా ఉప్పజ్జతి వేదయితం సుఖం వా దుక్ఖం వా అదుక్ఖమసుఖం వా తమ్పి న తుమ్హాకం. తం పజహథ. తం వో పహీనం హితాయ సుఖాయ భవిస్సతి.
101. ‘‘Yaṃ 2, bhikkhave, na tumhākaṃ, taṃ pajahatha. Taṃ vo pahīnaṃ hitāya sukhāya bhavissati. Kiñca, bhikkhave, na tumhākaṃ? Cakkhu, bhikkhave, na tumhākaṃ . Taṃ pajahatha. Taṃ vo pahīnaṃ hitāya sukhāya bhavissati . Rūpā na tumhākaṃ. Te pajahatha. Te vo pahīnā hitāya sukhāya bhavissanti. Cakkhuviññāṇaṃ na tumhākaṃ. Taṃ pajahatha. Taṃ vo pahīnaṃ hitāya sukhāya bhavissati. Cakkhusamphasso na tumhākaṃ. Taṃ pajahatha. So vo pahīno hitāya sukhāya bhavissati. Yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na tumhākaṃ. Taṃ pajahatha. Taṃ vo pahīnaṃ hitāya sukhāya bhavissati. Sotaṃ na tumhākaṃ. Taṃ pajahatha. Taṃ vo pahīnaṃ hitāya sukhāya bhavissati. Saddā na tumhākaṃ. Te pajahatha. Te vo pahīnā hitāya sukhāya bhavissanti. Sotaviññāṇaṃ na tumhākaṃ. Taṃ pajahatha. Taṃ vo pahīnaṃ hitāya sukhāya bhavissati. Sotasamphasso na tumhākaṃ. Taṃ pajahatha. So vo pahīnā hitāya sukhāya bhavissati. Yampidaṃ sotasamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na tumhākaṃ. Taṃ pajahatha. Taṃ vo pahīnaṃ hitāya sukhāya bhavissati. Ghānaṃ na tumhākaṃ. Taṃ pajahatha. Taṃ vo pahīnaṃ hitāya sukhāya bhavissati. Gandhā na tumhākaṃ. Te pajahatha. Te vo pahīnā hitāya sukhāya bhavissanti. Ghānaviññāṇaṃ na tumhākaṃ. Taṃ pajahatha. Taṃ vo pahīnaṃ hitāya sukhāya bhavissati. Ghānasamphasso na tumhākaṃ. Taṃ pajahatha. So vo pahīnā hitāya sukhāya bhavissati. Yampidaṃ ghānasamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na tumhākaṃ. Taṃ pajahatha. Taṃ vo pahīnaṃ hitāya sukhāya bhavissati.
జివ్హా న తుమ్హాకం. తం పజహథ. సా వో పహీనా హితాయ సుఖాయ భవిస్సతి. రసా న తుమ్హాకం. తే పజహథ. తే వో పహీనా హితాయ సుఖాయ భవిస్సన్తి. జివ్హావిఞ్ఞాణం న తుమ్హాకం. తం పజహథ. తం వో పహీనం హితాయ సుఖాయ భవిస్సతి. జివ్హాసమ్ఫస్సో న తుమ్హాకం. తం పజహథ. సో వో పహీనా హితాయ సుఖాయ భవిస్సతి. యమ్పిదం జివ్హాసమ్ఫస్సపచ్చయా ఉప్పజ్జతి వేదయితం సుఖం వా దుక్ఖం వా అదుక్ఖమసుఖం వా తమ్పి న తుమ్హాకం. తం పజహథ. తం వో పహీనం హితాయ సుఖాయ భవిస్సతి …పే॰….
Jivhā na tumhākaṃ. Taṃ pajahatha. Sā vo pahīnā hitāya sukhāya bhavissati. Rasā na tumhākaṃ. Te pajahatha. Te vo pahīnā hitāya sukhāya bhavissanti. Jivhāviññāṇaṃ na tumhākaṃ. Taṃ pajahatha. Taṃ vo pahīnaṃ hitāya sukhāya bhavissati. Jivhāsamphasso na tumhākaṃ. Taṃ pajahatha. So vo pahīnā hitāya sukhāya bhavissati. Yampidaṃ jivhāsamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na tumhākaṃ. Taṃ pajahatha. Taṃ vo pahīnaṃ hitāya sukhāya bhavissati …pe….
మనో న తుమ్హాకం. తం పజహథ. సో వో పహీనో హితాయ సుఖాయ భవిస్సతి. ధమ్మా న తుమ్హాకం. తే పజహథ. తే వో పహీనా హితాయ సుఖాయ భవిస్సన్తి. మనోవిఞ్ఞాణం న తుమ్హాకం. తం పజహథ. తం వో పహీనం హితాయ సుఖాయ భవిస్సతి. మనోసమ్ఫస్సో న తుమ్హాకం. తం పజహథ. సో వో పహీనో హితాయ సుఖాయ భవిస్సతి. యమ్పిదం మనోసమ్ఫస్సపచ్చయా ఉప్పజ్జతి వేదయితం సుఖం వా దుక్ఖం వా అదుక్ఖమసుఖం వా తమ్పి న తుమ్హాకం. తం పజహథ. తం వో పహీనం హితాయ సుఖాయ భవిస్సతి.
Mano na tumhākaṃ. Taṃ pajahatha. So vo pahīno hitāya sukhāya bhavissati. Dhammā na tumhākaṃ. Te pajahatha. Te vo pahīnā hitāya sukhāya bhavissanti. Manoviññāṇaṃ na tumhākaṃ. Taṃ pajahatha. Taṃ vo pahīnaṃ hitāya sukhāya bhavissati. Manosamphasso na tumhākaṃ. Taṃ pajahatha. So vo pahīno hitāya sukhāya bhavissati. Yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na tumhākaṃ. Taṃ pajahatha. Taṃ vo pahīnaṃ hitāya sukhāya bhavissati.
‘‘సేయ్యథాపి, భిక్ఖవే, యం ఇమస్మిం జేతవనే తిణకట్ఠసాఖాపలాసం తం జనో హరేయ్య వా డహేయ్య వా యథాపచ్చయం వా కరేయ్య, అపి ను తుమ్హాకం ఏవమస్స – ‘అమ్హే జనో హరతి వా డహతి వా యథాపచ్చయం వా కరోతీ’’’తి?
‘‘Seyyathāpi, bhikkhave, yaṃ imasmiṃ jetavane tiṇakaṭṭhasākhāpalāsaṃ taṃ jano hareyya vā ḍaheyya vā yathāpaccayaṃ vā kareyya, api nu tumhākaṃ evamassa – ‘amhe jano harati vā ḍahati vā yathāpaccayaṃ vā karotī’’’ti?
‘‘నో హేతం, భన్తే’’.
‘‘No hetaṃ, bhante’’.
‘‘తం కిస్స హేతు’’?
‘‘Taṃ kissa hetu’’?
‘‘న హి నో ఏతం, భన్తే, అత్తా వా అత్తనియం వా’’తి.
‘‘Na hi no etaṃ, bhante, attā vā attaniyaṃ vā’’ti.
‘‘ఏవమేవ ఖో, భిక్ఖవే, చక్ఖు న తుమ్హాకం. తం పజహథ. తం వో పహీనం హితాయ సుఖాయ భవిస్సతి. రూపా న తుమ్హాకం… చక్ఖువిఞ్ఞాణం… చక్ఖుసమ్ఫస్సో…పే॰… యమ్పిదం మనోసమ్ఫస్సపచ్చయా ఉప్పజ్జతి వేదయితం సుఖం వా దుక్ఖం వా అదుక్ఖమసుఖం వా తమ్పి న తుమ్హాకం. తం పజహథ. తం వో పహీనం హితాయ సుఖాయ భవిస్సతీ’’తి. అట్ఠమం.
‘‘Evameva kho, bhikkhave, cakkhu na tumhākaṃ. Taṃ pajahatha. Taṃ vo pahīnaṃ hitāya sukhāya bhavissati. Rūpā na tumhākaṃ… cakkhuviññāṇaṃ… cakkhusamphasso…pe… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi na tumhākaṃ. Taṃ pajahatha. Taṃ vo pahīnaṃ hitāya sukhāya bhavissatī’’ti. Aṭṭhamaṃ.
Footnotes:
Related texts:
అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / సంయుత్తనికాయ (అట్ఠకథా) • Saṃyuttanikāya (aṭṭhakathā) / ౮-౯. పఠమనతుమ్హాకంసుత్తాదివణ్ణనా • 8-9. Paṭhamanatumhākaṃsuttādivaṇṇanā
టీకా • Tīkā / సుత్తపిటక (టీకా) • Suttapiṭaka (ṭīkā) / సంయుత్తనికాయ (టీకా) • Saṃyuttanikāya (ṭīkā) / ౮-౯. పఠమనతుమ్హాకంసుత్తాదివణ్ణనా • 8-9. Paṭhamanatumhākaṃsuttādivaṇṇanā